O wɔsila 30 hiou laŋ niŋ, wanaa bɔɔbɔɔ ndaa yiyaŋ maa, sawala lɛŋii bɔɔbɔɔ ndaa handu le diompilɔɔ nɔɔ a lɛŋii cheleŋnde ve siŋgaŋ niŋ te, nduyɛ a wa hiou lachioo tosaa. Kɛ sɔɔŋ cho yɔŋnuŋndo suŋ suŋndoŋ chɔm maa hei cho tonya kposoŋ te.

•   “Habolah kunda puaa chɔuwa le Isɔluɛi. Kundaa hoo cho nyɛm chɔuwoŋ pum soliŋndo kpeku o cho tosaa mi waŋnda wa yiyaŋndo maa a cho fondaŋnda bɔɔbɔɔ o Kaza niŋ a lɛŋii bɔɔbɔɔ tɛɛmbuu. Kanifuule, o pɛŋgula lelɛŋndaŋ Lebanɔŋ nda cho sɔŋgɔɔ ni.”—Reuters, Tɛɛkpaa 6, 2024

•   “Kunda chɔuwo Alaŋ cho fondaŋnda bɔɔbɔɔ tɛɛmbuuwo, nduyɛ a cho vɛlɛ nyɛm chɔu cheleŋndoŋ toosiaa. Le handɔɔ lechoo, diompilɔɔ cho Lɔɔsiaa, Chana a Alaŋ tɛɛŋ, nduyɛ hei cho tosaa mi lɛŋii cho ba paaleŋ le dello wa, wa buulaŋndo maa a cho nda hunɔɔ chiŋalaŋ.”—The New York Times, Tɛɛkpaa 7, 2024.

•   “Le mɛɛ Lɔɔsiaa cho hiouwɔɔ lachi a Ukileŋ Chiŋalaŋndo yɛ cho tosaa ni mi nyɛm bɔɔbɔɔ wa tambɛi.”—UN News, Tɛɛkpaa 11, 2024.

•   “Chana cho hiouwɔɔ lachi a nyɛsɔlaa vɛlɛ a nyɛm chɔuwoŋ chuuŋgiaa tau. Tawaŋ yiyaŋ maa a cho a sɔvɛ ma hiau lɛŋii cheleŋnde. Nduyɛ le mɛɛ diompilɔɔ kɛɛ waa Bɛligiŋ nda Wasiŋtoŋ tɛɛŋ yɛ chɔm maa nyɛ o nyɛ yɔŋnuŋ teleŋ o teleŋ.”—The Japan Times, Tɛɛkpaa 9, 2024.

 Baa mi Baabuiyo dimi pa nyɛ a chɔula naŋ cho hau chɔɔ lɛŋii bɔɔbɔɔ tɛɛŋndaŋ? Baa hei chɔm ni maa chɔu chieeŋ cheleŋ cho vɛlɛ delɔɔ?

 Te o hiŋ a chɔula naŋ cho hau chɔɔ laŋ, Baabuiyo chɔm naa maa chɔu waa ndoo le cho delɔɔ le. Kɛ mbo dimi huuluei a chɔula cho wa yɔŋnɔŋndo o teleŋ naa hoo niŋndaŋ okɔɔ maa, la cho “kɔl nyuloo faŋaa o chieeŋndo choo bau.”—Sɔɔŋ Chɔɔmaŋndoŋ 6:​4.

 Mi yau Daaniɛɛ wo dimi aa: “te boondii kpeekpei Mɛlɛka kɛɛsiaa ve i fuuluu pɛ,” lɛŋii bɔɔbɔɔ cho wa kilulaŋndo le wana cho hiouwɔɔ kpaayaa lemasaa nɔ wo. Nduyɛ kilulaŋndo hoo cho tosaa mi lɛŋii bɔɔbɔɔ wa pisi nyɛsɔlaa pisioo tau le nyɛm chɔuwoŋ piondɔɔ.—Daaniɛɛ 11:​40, 42, 43.

 Mi Baabuiyo dimi maa, sɔɔŋ cho hau yɔŋnɔŋndo woŋ cho hiouwɔɔ lachi a wɔɔleŋ tuupa mi chieeŋ sɛnɛiyo hiŋ. Mi Chiisu dimi aa: “nyɛpalaa bɛndoo wa niŋ bɔɔ. Kani mi chieeŋndo kanduŋ mbo huŋ bii a hau, nyɛpalaa waa lende yɔŋnuŋndɔ le.” (Maatiu 24:​21) “Nyɛpalaa bɛndoo” hoo cho mɛɛlu a chɔu Amakɛdɔŋndo, o Baabuiyo tɛɛsiaa aa: “chɔu nɔ le yɔŋnɔŋndo o paale Mɛlɛka Kpaaya Kpou Kpou Wo choo wo.”—Sɔɔŋ Chɔɔmaŋndoŋ 16:​14, 16.

 Kɛ a koŋ kpou, o cho waŋnda kpede le chɔu Amakɛdɔŋndo cho tɛɛmbuu le. Kɛ chɔuwo hoo Mɛlɛka cho soliŋ kpeku ni, le masɛi waŋchieeya tɛɛmbuuwo. Kanifuule, masɛi hei tɛɛmbuu niŋ nyɛm bɔɔbɔɔ o chɔulaŋ niŋ. Te chɔu Amakɛdɔŋndo chuu pɛ, kɔl nyulu fafɛɛŋndo cho wa o chieeŋndo choo. Te a yeema pɛ ma chɔɔlu sina a hei okɔɔ, veelu diomndaŋ o sɔɔŋ lebolloŋ muŋ bɛŋgu:

•   “Yɛɛ Cho yɛ Chɔu Amakɛdɔŋndo?”

•   “Naŋ Kɔl le Hunɔɔ Amakɛdɔŋ Cho Wo!”