A wɔɔleŋ o wɔsi 2024 niŋ waŋnda le biiliɔŋndaŋ la ŋuɛɛnu cho wa pisulta kilulaŋndaŋ tofaa. Nduyɛ waŋnda cho fula o lɛŋnde 206 niŋ le pisultaŋ ndaŋ. Mi Thomas Bach o cho chilaŋ le Pisulta Kilulaŋndaŋ o lɛŋii yɛ yɛi niŋndo dimi aa: “Naa kpou cho wa o Pisulta Kilulaŋnda duau niŋ chieeŋndo kpou diompilɛ wo, nduyɛ miŋ wa o kɔl nyulu niŋ. Lelaŋ la ŋ chɔmnuŋ bɛɛleŋ le yiyaŋ wanaa cho wa pisultaŋ ndaŋ tosaa wa nɔ wo, maa naa waŋnda chieeya yɛ yiaa kpou nɔ miŋ wa o kɔl nyulu niŋ nduyɛ miŋ nɔ diompilɔɔ naapila tɛɛŋ.”

 Baa wanaa tosa Pisulta Kilulaŋndaŋ nda nɔla pa ma komal kpeleŋ sɔvɛ waa nuaa? Baa tiindaŋndo cho pa le kɔl nyulu kpeekpeiyo a diompilɔɔ sɔlaa?

 Pisulta Kilulaŋnda nɔ le tosaŋndo naŋndee laŋ la ve niŋ ko pisulta yɔŋaa le. Pisultaŋ ndaŋ la kindila niŋ sɔɔŋ cho a yalale chieeŋndeŋ okɔɔ woŋ, ŋ cho hau tosaa mi piɔuwaŋndo wa waŋnda tɛɛŋ ndo. Sɔɔŋ muŋ ŋ tiŋ cho dila waŋnda chieeya, hɛliaŋ lekaa wo, hɛliaŋ lekaaŋndo, nduyɛ teŋgeŋ cho wanaa sulaa a wanaa bala fonduaa tɛɛŋndo ni.

 Pisulta Kilulaŋnda waŋnda tosa o lɛŋii yɛ yɛi niŋndaŋ la cho nɛiyo opilɛ le yelelaŋndo tosaa. Kɛ mi la chɔm mɛɛ kpɛ kaa piɔuwaŋndo cho nda tɛɛŋ yɛ, nduyɛ mi la nyindu nda pɛŋ le hiouwɔɔ lachi a kaa waa nuaa chɔmndo, kɛ la hiŋ a kɔl nyuloo a diompilɔɔ nda tɛɛŋ te.

 Mi Baabuiyo suaa a kaala waŋnda nɔ hau laŋ, la tosa ndi ikala le mi diompilɔɔ wa nda tɛɛŋ ndo. (2 Timoti 3:​1-5) Le chɔɔloo sinaa tau a huului Baabuiyo dimi hei ve okɔɔ, veelu diomndaŋ o suɛi lebolle hei bɛŋgu “Baa Mi Baabuiyo Suaa pa a Mɛɛ Waŋnda Yiyaŋ Niŋ yɛ Ɔɔ Mɛɛ Nda Tosa Niŋ Sɔɔŋ Yɛ?”

 Baabuiyo soo a tiindaŋndo le kɔl nyulu kpeekpeiyo a diompilɔɔ le chieeŋndo kpou okɔɔ. O chuel naa buŋgɛi maa waŋnda kpou o chieeŋndo choo cho wa o diompilɔɔ niŋ o masale nda veelu aa, “Masale Mɛlɛkaleŋ” ndo bɛŋgu.—Luku 4:​43; Maatiu 6:​10.

 Chiisu Kiliti o cho masaa le masaleŋ ndeŋ ndo cho hunɔɔ a kɔl nyuloo o chieeŋndo choo kpou. Baabuiyo dimi aa:

•   “Wanaa cho sakpo wa cho wa puiyo tɛɛ tɛɛ. Nduyɛ kɔl nyuloo cho wa le fɛɛŋ a fɛɛŋ.”—Sam 72:​7.

•   “O cho wanaa bala fonduaa cho chaŋndo le malaa wa piŋi. . . . O cho nda piŋi wanaa handu nda nyɛkindilaa choo wa a wanaa bii nda ŋuasu ŋuasu wa o ba.”—Sam 72:​12, 14.

 Hau bɛɛ pɛɛkula Chiisulaŋ la cho niŋ diompilɔɔ lueiyo waŋnda tɛɛŋ o miiliɔŋndaŋ niŋ o lɛŋnde 239 niŋ. Le mɛɛ Seiyaa Chɛhowaa cho Kilisiɔŋnda yɛ, a sɔla pɛɛkoo le waa wanaa kɔl nyulu chieeŋndo balɔɔ silɔ. Te a yeema pɛ chɔɔloo yaasiaa a hei okɔɔ, veelu diomndaŋ o Bandu Mɛŋgɛlaa nɔ suɛi lebolle hei aa, “Vɛɛ Naŋ Soliŋ yɛ Yɛletulaaleŋ o Kɔl?.”