Baa i cho hau pa bɛɛŋ bɛɛŋ le teŋgeŋndo sinaa tonyaa tɛɛŋ a choolaŋ? Mi wanaa bɔɔbɔɔ chɛl hau sɔɔŋ te o yɔŋ pɛ ma nɔ yeemɛi o muŋ niŋ, ɔɔ ma laalaŋ muŋ. O wa bɛɛ a sɔɔŋ muŋ cho tonya le. Chieeŋndo balɔɔ silɔ, wanaa bɔɔbɔɔ laalaŋ maa tonya cho hau kposoŋ te.

 O cho hau le hei kanduŋ te. Mi Masa maLuomaŋndo Pɔŋtiɔɔ Paile nyuna Chiisu aa: “Yɛɛ cho yɛ tonyaa?” (Chɔŋ 18:​38) O cho niŋ hau le wɔsilaŋ 2,000 chɔŋ a teleŋ hei yɔŋnuŋndo. Mi che bɛɛ Paile chum le mulioo le, kɛ nyuna sɔviɔɔ pila ndoo nyuna koŋ ni. Baabuiyo nɔ muli dɛɛniaa num kɔllo le nyunaa hoo wo, nduyɛ mbo mala num ma saaluŋ tonyaa o chieeŋ nɔ hoo choolaŋndo niŋ.

Baa tonyaa cho pa hau kpeekpei?

 Ei. Baabuiyo soliŋ diomndo hoo kpeku “tonyaa” le naa chɔmndo sɔɔŋ cho kpeekpeiyoŋ vɛlɛ a sɔɔŋ bɛnda le tosaa woŋ. O chɔm naa vɛlɛ maa Chɛhowa a Mɛlɛka cho puundule tonyaa ni. Nduyɛ pɛŋ mi Baabuiyo veelu ndu aa: “num cho Mɛlɛka tonyaa ni, [NWT].” (Sam 31:​5) Baabuiyo nɔ tonyala chɛŋ o Mɛlɛka lo laŋ. Ŋ tuu tonyalaŋ ndaŋ a nyɛ wawoŋndo. Nduyɛ mi nyɛ wawoŋndo hoo manda naa o chieeŋ manyumndo hoo niŋ.—Sam 43:​3; Chɔŋ 17:​17.

Vɛɛ ŋ saaluŋ yɛ tonyaa?

 Mɛlɛka yeema naa miŋ chɛl tonya cho o Baabuiyo niŋndo le chɛlɔɔ leŋ te. Kɛ o yeema naa miŋ yaasiaa fɛlɛŋ nduyɛ miŋ soliŋ sinapɛŋgu naa kpeku nyɛkɛndɛi le tonyaa sinaa. (Luomaŋnda 12:​1) O yeema naa miŋ sina ndu, nduyɛ miŋ kaala ndu a ‘yiyaŋnda naalaŋ kpou.’ O yeema naa vɛlɛ miŋ che maa nyɛ naŋ cho pɛɛkoo o Baabuiyo niŋndo tonyaa kɛsɛ o cho ni.—Maatiu 22:​37, 38; Walta Kiilaa 17:​11.

Kuɛɛ choolaŋ la fula yɛ?

 Baabuiyo dimi maa yaamɔɔnɔ Mɛlɛkaa Setana cho ni. Nduyɛ ndu kandu choolaŋ dimioo ni. O veelu ndu aa: “finyaa le choolaŋ.” (Chɔŋ 8:​44) Mbo nyiinduu Mɛlɛka choolaŋ choo o waŋchieeyaa tasiaa wa o chieeŋndo choo wa lo.—Chɛnɛsee 3:​1-6, 13, 17-19; 5:​5. Chɔŋ niŋ a teleŋ koŋ, Setana cho hiouwɔɔ lachi a choolaŋ pɛŋgɛlaa nduyɛ mbo wa kindiŋndo le tonya cho a Mɛlɛka okɔɔ wo vioŋɔɔ.—Sɔɔŋ Chɔɔmaŋndoŋ 12:​9.

Le yɛɛ Choolaŋ la kui yɛ hau o chieeŋndo choo?

 Baabuiyo veelu teleŋ naa hoo a “palɛi mɛɛlɛi.” Nduyɛ Setana cho hiouwɔɔ lachi a waŋchieeyaa huiyo mbo hiau maa paandu. Waŋchieeyaa che ndi niŋ hau tɛtɛlɛ le chaaŋaa ndaa huiyo le tɔnɔ nda pilaa. (2 Timoti 3:​1, 13) Choolaŋ la kui vɛlɛ hau o piɛiyii bɔɔbɔɔ niŋ. Mi Baabuiyo dimi a waŋnda o teleŋ naa hoo niŋ maa a cho wa “wanaa pɛɛkaa cheleŋ nuuviaa le ma dimul nda nyɛ nda yeema ma wa tueiyɔɔ wo.” Nduyɛ “a cho tonyaa kɔɔ mulul.”—2 Timoti 4:​3, 4.

Le yɛɛ tonyaa cho yɛ nyɛ sɔvɛ?

 Tonyaa tosa mi waŋndo laalaŋ chaŋndɔ. Laalaŋ lepɛŋndo tɛɛmbuu chaŋyɛi nduyɛ mbo tosa waŋnda ve o diompilɛ niŋ te. Baabuiyo dimi maa Mɛlɛka yeema mi piɛile naaleŋ le tɔlnuŋ o tonyaa choo. Mbo dimi aa: “Wanaa cho ndu piɛiyo wa nɔ ma piɛi ndu mbo wa o chɛlaŋ a nyina ndɔɔ vɛlɛ a tonyaa.” (Chɔŋ 4:​24) Le miŋ sina tonya cho o Baabuiyo niŋ o mala naa le miŋ fula o piɛiyii lachoowɛi niŋndo, veelu diomndaŋ o suɛi lebolle hei niŋ: “Choola Tosa Mi Waŋnda Yiyaŋ Maa Mɛlɛka Kaala Naa le Wo.”

Le yɛɛ Mɛlɛka yeema yɛ ya mi sina tonyaa?

 Mɛlɛka yeema num ma sɔla pioŋɔɔ. Le hei, o yeema num ma sina tonya cho a ndu okɔɔ wo. (1 Timoti 2:​4) Te a pɛɛku pɛ sawala Mɛlɛkalaŋ le sinaa ikɛndɛi tɛɛŋ a iwɔɔŋnde, nduyɛ ma tol taŋ kɔɔli o yoomu numndo niŋ, a cho nɔ chaŋyɛi kpɛɛluŋnde a ndu. (Sam 15:​1, 2) Mi Mɛlɛka yɔŋ Chiisu o chieeŋndo choo le mi waŋnda pɛɛku tonya cho a ndu okɔɔ wo. Mɛlɛka yeema naa miŋ tuei Chiisu diom.—Maatiu 17:​5; Chɔŋ 18:​37.

Baa Mɛlɛka faŋa niŋ pa choolaŋ o chieeŋndo choo?

 Ei. Mɛlɛka tul wanaa dimi choolaŋ le acheleŋnda huiyo wa leyɛ. Nduyɛ o mɛi lediom maa o cho hunɔɔ wanaa cho hiouwɔɔ lachi a choolaŋ dimioo wa tɛɛmbuu. (Sam 5:​6) Te o huŋ tosa hei pɛ, mɛɛ o cho vɛlɛ buŋgɛi o chua ve peelu aa: “Tonyaa ndu, loo o lo lechoo le fɛɛŋ a fɛɛŋ ni.”—Pulɔwaa 12:​19.