Naa kpou yeema mɛŋma kɛndiaŋ le miŋ wa yoomu. Mi wana poonyiaa le kɔɔna UN diolaŋ António Guterres dimi aa: “Le mɛɛ bahawɛi mamɛŋndo cho hiouwɔɔ lachi a wɔɔleŋ chieeŋndo balɔɔ silɔ yɛ, lelaŋ i cho ikala le mɛŋma kɛndiaŋ sɔlaa.” Waŋnda o biiliɔŋndaŋ niŋ chieeŋndo balɔɔ silɔ nɔ mɛŋma kɛndɛ le kolɔɔ le.

 Baa teleŋ cho pa fuuluu mi wana o wana sɔla mɛŋma kɛndiaŋ le kolɔɔ? Ɔɔ baa bahawɛi mamɛŋndo hoo cho hiouwɔɔ lachi a wɔɔleŋ? Yɛɛ Baabuiyo dimi yɛ?

Yɛɛ Baabuiyo dimi yɛ a bahawɛi mamɛŋndo okɔɔ?

 Baabuiyo dimi maa teleŋ cho fuuluu mi bahawɛi mamɛŋndo chuu. Nduyɛ pɛɛŋ mɛŋma kɛndiaŋ ma cho wa tau o chieeŋndo choo.

 “Mɛŋndaŋ ma cho hunɔɔ piɔl lɛŋ, o lɛŋnde polteŋ niŋ, mi ma simnuŋ peela pɔmbɔlaŋ. Lɛŋnde polte tuule bɛnduleŋ le cho hunɔɔ simnɔŋ fondaŋ sooŋnda mamɛŋ. Lɛŋnde vesɛile bɛnduleŋ le cho hunɔɔ simnɔŋ fondaŋ peela pɔmbɔlaŋ la wa la tiuwaa wo.”—Aisaya 35:​6, 7.

 Le yɛɛ naŋ tiindaŋ yɛ diomnde mɛyaaleŋ ndeŋ? Ŋ yaasiaŋndɔ yiŋgoloŋ a nyɛ Baabuiyo dimi a mɛɛ chieeŋndo cho o toosiaa yɛ okɔɔ.

Yɛɛ Baabuiyo dimi yɛ a mɛŋma cho hiŋnɔŋndo o chieeŋndo choo waŋ okɔɔ?

 “[Mɛlɛka] toosiaa ndu le mbo wa lakasi lakasi le. Kɛ o toosiaa ndu le mi waŋnda chieeyaa a wa leniŋ”—Aisaya 45:​18.

 “Mɛlɛka mbo chua mɛŋndaŋ lɛŋ, mbo naŋ maŋ choo choo, mi mɛŋma maŋ ma simnuŋ piɔɔ. O koŋ kɔɔli, mbo tosa mi piɔɔ koŋ sia, mbo tiu a siaa ba o ba fee waŋnda chieeya a cho.”—Choobu 36:​27, 28.

 “I cho tosa mi la sɔla piɔɔ a teleŋ nya nɔ le ndu sɔlaa wo. Nduyɛ mi tɔlɔɔlaŋ la naŋ tau o lɛŋndeŋ niŋ, okoŋ mi yɔmii cho o yondolaŋ niŋnde bɛɛ yɔŋgu kɔmndeŋ.” —Lɛvitikɔɔ 26:​4.

 Mi Mɛlɛka mei lediom maa o cho kaaleŋ Isɔluɛi salaa dɔwɔɔ. Nduyɛ mbo tosa mi wanaa ndaa tosa walii ichiɔɔ wa sɔla piɔɔ a teleŋndo, okoŋ mi tɔlɔɔla ndalaŋ la yɔŋgu kɔmndeŋ tau. O sina maa le mi tɔlɔɔla naalaŋ la kom mɛɛ mi piɔɔ sia tau.

 Nyɛ Mɛlɛka ndoo tosa hoo le Isɔluɛiya wo, o cho suŋ nyɛpilɛ koŋ kpe tosa le chieeŋndo kpou. (Aisaya 30:​23) Kɛ o teleŋ naa hoo niŋ, fondaŋ nda bɔɔbɔɔ o chieeŋndo choo, bahawɛi mamɛŋndo cho wɔ hiouwɔɔ lachi a wɔɔleŋ kɛ. Saboo cho ni, le mɛɛ piɔɔ kɛɛ le siaa o foŋndaŋ nda waa nuaa yɛ. Yɛɛ cheleŋ Baabuiyo dimi yɛ a mɛɛ bahawɛi mamɛŋndo o chieeŋndo choo chuu niŋ yɛ?

Vɛɛ bahawɛi mamɛŋndo cho yɛ mɛɛlu?

 Baabuiyo chɔm naa kpendekele maa Masale Mɛlɛkaleŋ le cho bahawɛila naalaŋ chii o chieeŋndo choo kpou ni, hali bahawɛi mamɛŋ naŋ nɔ hau wo bɛɛ. (Maatiu 6:​9, 10) Masale Mɛlɛkaleŋ kinɛi le cho wa o chieeŋndo choo ni. (Daaniɛɛ 2:​44; Sɔɔŋ Chɔɔmaŋndoŋ 11:​15) Okoŋ kɔɔli, Masale Mɛlɛkaleŋ le cho hunɔɔ nyɛ masɛi waŋchieeya tiuba le tosa le wo tosa.

 Bahawɛiyo: Mɛŋndaŋ ma hiŋnuŋ yɛ ma paandu le kanifuule, Chieeŋndo cho siŋgaŋndo. Fulamakɔɔlioo cho ni, mi piɔɔ kɛɛ le siaa le teleŋ vilɛi, mɛŋma hunaŋ, piɔɔ siaa tau, nduyɛ mi mɛŋma ihɛllaŋ ma hiŋ tau.

 Mɛɛ bahawɛiyo hoo cho fula yɛ: Masale Mɛlɛkaleŋ le cho hunɔɔ nyɛ o nyɛ tambu o chieeŋndo choo miŋgi toosiaa, okoŋ mi chieeŋ naa hoo miiŋgu nyɛkɛndɛi. Mɛlɛka mɛi lediom aa: “I cho nyɛ o nyɛ fee miŋgi o sɛnɛi.” (Sɔɔŋ Chɔɔmaŋndoŋ 21:​5) Mɛŋndaŋ ma cho fula tau o lɛŋnde vesɛileŋ niŋ. Hei cho tosa mi nyaa yoomaa kui tau o fondaŋnda nda ve paandu le wa. (Aisaya 41:​17-20) Teleŋ Chiisu cho wa Masaa le Masale Mɛlɛkaleŋ ndo, o cho nɔ kpaayaa kpundɛla yɔŋnuŋ o chieeŋndo choo laŋ choo.

 Bahawɛiyo: Mi wanaa bɔɔbɔɔ tosa hau sɔɔŋ o chieeŋndo choo a yiyaŋ a fulamakɔɔlioo le. Nduyɛ maasiila kɔɔnala leyulaŋ la cho hau soliŋndo kpeku laŋ la cho peelaŋ bɛŋndaŋ, la pɔmbɔlaŋ vɛlɛ a nyɛ manda mɛŋndaŋ lɛŋ ndo tɛɛmbuuwo. Muŋ kpou cho hau tosaa ni mi mɛŋma lepɛŋndaŋ ma wa.

 Mɛɛ bahawɛiyo hoo cho fula yɛ: Mɛlɛka cho chieeŋndo miŋgi toosiaa, nduyɛ mi mɛŋma kɛndiaŋ ma wa o peela bɛŋndaŋ, peela pɔmbɔlaŋ vɛlɛ a o mɛŋma ihɛllaŋ niŋ. Chieeŋndo cho simnuŋ kpele hɛnɛkiɔɔ. Mi Baabuiyo dimi aa: “Lɛŋnde polteŋ le duaunuŋ niŋ nyaale, nduyɛ mi bilta peeŋgelaŋ la vil lechoo mi la soli peeŋgelaŋ.”—Aisaya 35:​1.

 Bahawɛiyo: Waŋchieeya cho hau mɛŋndaŋ chaa soliŋ kpeku le, fulamakɔɔlioo cho ni, mɛŋma nda tɛɛmbuu waŋ ma hiau a ma fula lɛŋndaŋ.

 Mɛɛ bahawɛiyo hoo cho fula yɛ: Ŋ nɔ balika melaa le Masale Mɛlɛkaleŋ kanifuule, hɛnaŋ Mɛlɛkaa cho wa tosaŋndo o “lɛŋndeŋ choo” ni o cho mɛɛ wanaa ikayaa tosa hau yɛ le. (Maatiu 6:​9, 10) O Masale Mɛlɛkaleŋ bɛŋgu wana o wana cho pɛɛku sɔvɛ sɔviɔɔ sɔla. Kanifuule “sina pɛŋgu waŋnda nɔ niŋ a Mɛlɛka Yaawɛɛ okɔɔ wo o wa niŋ tau tau o chieeŋndo niŋ”. Aisaya 11:​9. a Le mɛɛ sina pɛŋgoo hoo a kaala waŋnda nɔ le Mɛlɛka vɛlɛ a nyɛm o toosiaa woŋ cho wa tau yɛ, cho tosa ni ma bii chieeŋndo a nyɛ o nyɛ cho le niŋ nyɛkɛndɛi.

•    Le chɔɔloo sinaa a nyɛ Masale Mɛlɛkaleŋ le cho hunɔɔ tosa wo, tofa suɛi lebolle hei: “Yɛɛ Masale Mɛlɛkaleŋ le Cho yɛ Tosa?”

•    Veelu diomnda o yau Aisaya 35 niŋ ma che mɛɛ chieeŋndo cho simnuŋ kpele hɛnɛkiɔɔ yɛ.

•  Le chɔɔloo sinaa sabu Mɛlɛkaa le chieeŋndo vɛlɛ a waŋchieeyaa, tofa vidueiyo hoo Le Yɛɛ Mɛlɛka Toosiaa yɛ Chieeŋndo?