Puaa kɔl vesɛiya cho fondaŋnda bɔɔbɔɔ tɛɛmbuuwo o Hitili niŋ. Sɔŋga lekaa wo cho wanaa bɔɔbɔɔ saaŋgiaa o lɛŋnde Saut Afilika, Mɛsiko vɛlɛ a lɛŋii bɔɔbɔɔ o Amɛlika niŋ. Mi che bɛɛ lɛŋnde ipum sɔŋgɔlaŋ la yɛlɛmiaŋ niŋ loŋ, kɛ te waŋnda haa tuei pɛ konalaŋ a chɔulaŋ o lɛŋii cheleŋnde niŋ pɛ, mi siooŋnde bii nda nduyɛ ma buulaŋ tau.

 Yɛɛ Baabuiyo dimi yɛ a dɛnɛ wɔɔŋ cho hiouwɔɔ lachi a kuiyo chieeŋndo balɔɔ silɔ wo?

 Mi Baabuiyo dimi huului maa dɛnɛ wɔɔŋndo cho wa nyɔɔŋ opilɛ o chɔm maa “mɛɛlula chieeŋndo hoo la fuuluu” wo. (Maatiu 24:​3) Mɛɛ Chiisu wa suɛi a sɔɔŋ cho wa yɔŋnɔŋndo woŋ ŋ chɔm maa mɛɛlulaŋ la fuuluu wo okɔɔ, mbo dimi aa:

•   “Le mɛɛ dɛnɛ wɔɔŋndo cho hiouwɔɔ lachi a kuiyo yɛ, kaala wanaa bɔɔbɔɔ nɔ wo cho nyulul.” (Maatiu 24:​12)

 Mi Baabuiyo dimi vɛlɛ maa “o palɛi mɛɛlɛi niŋ” waŋnda “tiu niŋ kɔlta ndalaŋ ba le. A wa niŋ wanaa kɔl vesɛi, nduyɛ ma tul nyɛ cho o kɛndɔɔ wo leyɛ.” (2 Timoti 3:​1-5) Kaala wɔɔŋndaŋ laŋ la cho nyɔɔŋ opilɛ ni le dɛnɛ wɔɔŋ naŋ cho hau chɔɔ wo.

 Kɛ ŋ nɔ tiindaŋndo. Baabuiyo mei lediom maa, wanaa dɛnɛ wɔɔŋnda cho suŋ tambɛi sɔla.

•   “O bendu lɛ tiŋ te, mi wanaa dɛnɛ wɔɔŋnda lo pɛ. A tofa niŋ naa nda wa paandu wa, A seeluŋ niŋ nda loŋ te. Kɛ wanaa tusiaŋnda cho wa o lɛŋndeŋ choo, Okoŋ ma tuei kɔl nyulu bɛndoo yeela.”—Sam 37:​10, 11.

 Chɔɔlu pɛɛku a yooŋgula cho o Baabuiyo niŋndaŋ okɔɔ la ke naa tiindaŋndo laŋ, vɛlɛ a sabu naŋ nɔ miŋ laalaŋ maa sɔɔŋ naŋ cho hau chɔɔ yɔŋnɔŋndo woŋ cho huuluŋ Baabuiyo peeloo. Tofawɔ sɔɔŋ lebolloŋ muŋ amatou.

 “Tiindaŋ Kpeekpeiyo le Chilaŋ”

 “Yɛɛ Yɔŋnuŋ yɛ Niŋ le Sinaa Maa Mɛɛlula Chieeŋndo Hoo la Fuuluu?”

 “Baa Mi Baabuiyo Suaa pa a Mɛɛ Waŋnda Yiyaŋ Niŋ yɛ Ɔɔ Mɛɛ Nda Tosa Niŋ Sɔɔŋ Yɛ?”