Simlachiaa a kɔɔnala chieeŋndaŋ la sɔla wɔ batiuwaa le hunɔɔ a kɔl nyuloo waŋnda tɛɛŋ te. Chɔŋ a teleŋ Chɔu Chieeŋ Diiŋ Ndɔɔ dello, chɔulaŋ a delɔɔla choolaŋ la cho niŋ yɔŋnuŋndo mbo hiau maa paandu. Waŋnda le biiliɔŋndaŋ la tiɔɔŋ o chieeŋndo choo cho o fondaŋ nda sɔɔŋ muŋ cho yɔŋnuŋndo woŋ niŋ ni.

 Le yɛɛ waŋchieeyaa sɔla batiuwaa le hunɔɔ a kɔl nyuloo le? Yɛɛ Baabuiyo dimi yɛ?

1.  1. Kaala waŋchieeyaa nɔ hau laŋ la cho nda kuunaa ni le hunɔɔ a kɔl nyuloo. Mi Baabuiyo dimi a teleŋ naa hoo okɔɔ aa: “Waŋnda kaala niŋ ndapila, nduyɛ ma kaala kaniei. A wa niŋ wanaa heelaŋnda, wanaa yoŋgaa, . . . a lo niŋ o lediom te, . . . a chɛl niŋ acheleŋnda diom te, . . . a tiu niŋ kɔlta ndalaŋ ba le, a wa niŋ wanaa kɔl vesɛi, . . . wanaa bolii kalaa, a wanaa hɔlaa heelaa bɛndu.”—2 Timoti 3:​2-4.

2.  2. Te o cho a mala Wana Naa Toosiaa Chɛhowa a Mɛlɛka le, ŋ tiuba miŋ soli bahawɛilaŋ naalaŋ a banaa le. Mi Baabuiyo dimi aa: “Wana chioo nɔ kpaaya o kpaaya yoomu ndɔɔ choo le.”—Chɛluimaya 10:​23.

3.  3. Chieeŋndo kpede cho hau wana dɛnɛ wɔɔŋndo o ba bɛŋgu, Setana nyina wɔɔŋndo. “Ndu cho waŋnda o chieeŋndo niŋ kpou huiyo ni.” (Sɔɔŋ Chɔɔmaŋndoŋ 12:​9) Te ‘chieeŋndo cho wɔ o kpaaya wana dɛnɛ wɔɔŋndo bɛŋgu’ pɛ, mɛɛ chɔulaŋ a delɔɔla choolaŋ la cho hiouwɔɔ lachi a kuiyo.—1 Chɔŋ 5:​19.

 Baabuiyo dimul naa kpendekele maa, mɛɛ mɛɛ waŋchieeya kindiŋ a tiuba ma hiŋ a kɔl nyuloo le, mɛɛ Mɛlɛka.

•   “Ya Mɛlɛka ya pilɛ kpe sina tuula ya I nɔ le nya laŋ ni. Tuula ya I nɔ le nya laŋ, tuula chuu nya niŋ dɛnɛ kɛndɔɔ laŋ la cho ni, la cho tuula chuu nya kpundɛ le. Tuula tosa niŋ mi la nɔ tiindaŋndo o siɔdii nya lachioo niŋ ndaŋ la cho ni.”—Chɛluimaya 29:​11.

 Vɛɛ Mɛlɛka cho yɛ diomnde mɛyaaleŋ ndeŋ peelu? “Mɛlɛka yɔŋgu kɔl nyuloo wo cho suŋ hunɔɔ Setana tɛɛmbuu.” (Luomaŋnda 16:​20) Mɛlɛka cho Masale cho o choo choo niŋndeŋ soliŋ kpeku. Leŋ Baabuiyo veelu ni aa “Masale Mɛlɛkaleŋ.” Leŋ le cho hunɔɔ a kɔl nyuloo o chieeŋndo choo kpou ni. (Luku 4:​43) Chiisu cho Masaa o Masaleŋ ndeŋ choo ni. O Masale Chiisu leŋ bɛŋgu, waŋchieeyaa cho pɛɛku le waa o kɔl nyulu niŋ.—Aisaya 9:​6, 7.

•   Le chɔɔloo sinaa veelu diomndaŋ o suɛi lebolle hei bɛŋgu “Yɛɛ Masale Mɛlɛkaleŋ le Cho yɛ Tosa?”