“Teleŋ ya wa o pɔmbɔ wo, lepaa o lepaa mi yema ni chuu ya okɔɔ wo ndoo lɔɔ ya, nduyɛ mi ndoo dimul la diomnda wɔɔŋndaŋ. Mɛɛ ya chal o nɔɔ, mi kaalɛi nuu bɛɛ wa ya biyɔɔ wɔɔŋndo. Mi ndu nda finya nuu bii ya naŋ chaa chiɔɔ ya wa ni. Mi hei tosa pɛŋ mi tuu le diinɔŋndo.”—Madu, a Iŋdiaa.

 Mi Kɔɔna Cho le Kɛndiaa Waŋchieeya Wo dimi aa, “Chieeŋndo balɔɔ silɔ, i cho bɔɔ tɛtɛlɛ le waŋ laanduaa biyɔɔ wɔɔŋndo.” Naapum te a chɔm pɛ waŋ laanduaa a yaa o nda tɛɛŋ, a cho saalɔŋ maa a bii niŋ opilɛ biyɔɔ wɔɔŋndo ɔɔ naapum a kpuwa niŋ ndu.

 Te o yɔŋ pɛ maa nyɛ waa nuaa yɔŋnuŋ num niŋ, naapum a ve lɛ hɛnɛkɛ le kelaa le kanifuule, a wa yiyaŋndo maa waŋndo cho num diomnda wɔɔŋndaŋ dimul ɔɔ ma kpuwa num. Fulamakɔɔlioo cho ni, ma kandu yiyaŋndo maa le mɛɛ ŋ cho wana lanɔɔ yɛ nda cho num biyɔɔ wɔɔŋndo ni, ɔɔ ma yiyaŋ maa “Waŋ laanduaa cho wanaa sɔvɛ kposoŋ te.” Kɛ baa waŋ laanduaa cho pa wanaa sɔvɛ Mɛlɛka o hɔl?

 Bolle Baabuileŋ: Mi “[Mɛlɛka] toosiaa wana pɔnɔɔ a wana lanɔɔ.”—Chɛnɛsi 1:27.

 Nyɛ Hei Sim Ndo: Mɛlɛka toosiaa waŋ piaanduaa a waŋ laanduaa ni. O che nda kpou maa a cho wanaa sɔvɛ, nduyɛ nda bɛɛ nɔ ma sɔla bɛɛleŋ. Le handɔɔ lechoo, o yeema mi pɔnɔɔ “kaala laa ndɔ mɛɛ o kaala ndupila yɛ.” O cho le mi piaanduaa wa nda biyɔɔ ŋuasu ŋuasu, deŋioo nda choo ɔɔ ma wa nda diomnda wɔɔŋndaŋ dimullo le. (Ɛfisiaŋnda 5:33; Kolosiaŋnda 3:19) A tonya, Mɛlɛka yeema mi waŋ laanduaa wa hɛnɛkɛ nduyɛ ma wa o manda sɔviɔɔ bɛŋgu.

 “Teleŋ ya wa o pɔmbɔ wo, mi wanayɛi nii pum ndii tosa kaa hini nɔɔlɛiyo a ya. Nduyɛ mɛɛ ya fuuluu wɔsilaŋ 17, mi wana ni bɛndoo o fondaŋ ya tosa wallo wo ndoo kindila ya le mbo hini a ya. Mɛɛ ya sul kaasoŋnɔ mi pɔnɔ nuu, wanaa veelu ya wa, a wanaa naŋ cho o fondaŋ pilɔɔ wa ndaa bii ya biyɔɔ wɔɔŋndo. Mɛɛ ya pɛɛku a Chɛhowa b okɔɔ Wana Toosiaa, mi sina maa o che bɔɔ waŋ laanduaa wanaa sɔvɛ. Mi hei tosa mi sinaŋ maa Chɛhowa kaala ya, nduyɛ maa o che ya wana sɔvɛ.”—Malia, Achɛŋtina.

 Bolle Baabuileŋ: “Chaŋyɛi i pum bɛnda mbo hiau wana nya fula kala pilɔɔ wo.”—Polowaa 18:24.

 Nyɛ Hei Sim Ndo: Chaŋyɛi kpeekpeiye cho num mala. Te a yiyaŋ pɛ maa hei cho num mala, mɛɛ dimul wana ŋ tiindaŋndo a mɛɛ ŋ cho sinaŋndo yɛ.

 “Le wɔsilaŋ 20, I dimul wana o wana maa mi waŋndo kpuuwa ya le. Mi hei tosa, I vɛ lɛ a kɔl kɛndɛ le, mi yaa buulaŋ, nduyɛ mi yaa tambu kɔllo tau. Kɛ mɛɛ ya dimul waŋndo a mɛɛ ya cho sinaŋndo yɛ, okoŋ mbo yaŋ ya nilaŋ, mi sinaŋ nyɛkɛndɛi, nduyɛ I wa niŋ hɛnɛkɛ.”—Elif, Tɔki.

 Bolle Baabuileŋ: “La nyindul ndu buulaŋnda nyalaŋ kpou, kanifuule o buulaŋ le nya.”—1 Pitɛ 5:7.

 Nyɛ Hei Sim Ndo: Te ŋ piɛi pɛ o Mɛlɛka lo, mbo yaŋ naa nilaŋ. (Sam 55:22; 65:2) Kanifuule o buulaŋ a naa, nduyɛ mbo tosa ma sinaŋ maa a cho o sɔvɛ ndu o hɔl.

 “Pɛɛkoo a Chɛhowa okɔɔ mala ya niŋ, le yiyaŋnda wɔɔŋnda laa paaliaŋ ya laŋ malɔɔ. Suŋ suŋ niŋ mi dimul Chɛhowa o piɛileŋ niŋ mɛɛ ya cho sinaŋndo yɛ. Chaŋ ni kɛndɛ kɛndɔɔ o cho niŋ ni, o bii bila mɛɛ ya cho sinaŋndo yɛ wo.”—Ana, Belisi.

 Bolle Baabuileŋ: “Chɛhowa . . . cho yamɛi kiolɔɔ o nɛi sakpoo choo, le wanaa nɔ ŋfinya le wa a wanaa cho a kɔlta tambɛilaŋ nda, Le halikpeŋ wanachioo o lɛŋndeŋ choo luei lɛ nda isiooŋ te.”—Sam 10:​17, 18.

 Nyɛ Hei Sim Ndo: Mɛlɛka cho suŋ chii kafalaŋ o chieeŋndo choo, hali biyɔɔ wɔɔŋ nda cho waŋ laanduaa wo bɛɛ.

 “I cho ko maa koowaŋ ya mel ni mi siaŋgu mɛɛ ya sina maa Chɛhowa cho biyɔɔ wɔɔŋ nda cho waŋ laanduaa a chuaambuaa feleŋguaa wo chii.”—Lɔbɔta, Mɛsiko.

 Le ma chɔɔlu sina a tiindaŋ Baabuiyo ke naa wo okɔɔ, le sabu ŋ nɔ ma tiindaŋ diomnde ndɔle mɛyaaleŋ ndo nduyɛ a mɛɛ Seiyaa Chɛhowaa mala num ma bii Baabuiyo bila yɛ, nyuna wana ke yauwo hoo wo le .

 Tusi yauwo hoo o nyɛ num mapuuloo choo