Sɔŋga leMasaa cho hiouwɔɔ lachi a kuiyo chieeŋndo balɔɔ silɔ mbo hiau maa paandu.

•   Le mɛɛ nda dii 39 o Mɛsiko niŋ a ndaa sim le masaleŋ vɛlɛ a sɔŋga la lemasala cheleŋnda wa yɔŋnɔŋndo laŋ yɛ tosa ni, mi waŋnda yɔŋ siooŋnde a teleŋ nda wa yaulaŋ malɔɔ le masaa hɛlioo a wɔsi 2023-2024 yɛ.

•   O teleŋ biŋgi hiou wo niŋ, mi sɔŋga la lemasala bɔɔbɔɔ yɔŋnuŋ o Yulopi niŋ, nduyɛ pɛŋ mi waŋnda kɛɛsiaa le masa diiŋ ndɔɔ Slovakia diyɔɔ a Bukuloo 15, 2024.

•   Lɛŋnde Amɛlika leŋ le hiiluŋ vɛlɛ le mɛɛ waŋndo kindiŋ le masa nda lelɛŋ paandoo Donald Trump diyɔɔ le teleŋ diiŋ ndɔɔ yɛ. Nduyɛ hei yɔŋnuŋ a Tapioo 15, 2024.

 Le yɛɛ sɔŋga la lemasalaŋ la cho yɛ hau tau? Baa la chuu niŋ pa? Yɛɛ Baabuiyo dimi yɛ?

 Mi Baabuiyo veelu teleŋ naa hoo aa, “palɛi mɛɛlɛi” nduyɛ maa wanaa bɔɔbɔɔ cho nɔ kaala huŋ niŋ a sɛɛŋgiaŋndaŋ vɛlɛ a kɛɛ sinapɛŋgoo wo

•   Kɛsiŋ o kɔl maa o palɛi mɛɛlɛi niŋ, nyɔɔ kiandu niŋ bɔɔ. Kanifuule, waŋnda ve niŋ wanaa sinaa ikɛndɛ le, a lo niŋ o lediom te, . . . . a chɛl niŋ acheleŋnda diom te, . . . a wa niŋ wanaa kɔl vesɛi, . . . a wa niŋ wanaa pisi chaaŋaa ndaa wa, wanaa bolii kalaa, a wanaa hɔlaa heelaa bɛndu.—2 Timoti 3:​1-4.

 Mi Baabuiyo dimi vɛlɛ huuluei maa waŋnda simul niŋ masaleŋ, nduyɛ mi sɔŋga la lemasalaŋ la wa tau o teleŋ naa hoo niŋ. (Luku 21:​9 tɛɛsiaa amatou) Kɛ, sɔŋga la lemasalaŋ la cho wa lefafɛɛŋ te.

 Mi Baabuiyo tɛɛsiaa maa Mɛlɛka cho masale waŋ chieeya faŋa okoŋ mbo miŋgi masale ndɔle cho choo choo niŋndeŋ o foofo ndaa.

•   “Mɛlɛka cho o choo choo wo cho hunɔɔ masale cheleŋ hɛli. Masale tembu le fɛɛŋ a fɛɛŋ te leŋ. . . Masɛi paanduei kinɛi masaleŋ ndeŋ le cho hunɔɔ ndi pesi pesi, i ve lɛ le. Mi masale sɛnɛileŋ ndeŋ le lo le fɛɛŋ a fɛɛŋ.” —Daaniɛɛ 2:​44.

 Masale Mɛlɛkaleŋ le cho hunɔɔ a waŋnda diompilɛ, nduyɛ ma wa o kɔl nyulu kpeekpeiyo niŋ chieeŋndo balɔɔ silɔ.

•   Chiisu Kiliti cho Masaa le Masale Mɛlɛkaleŋ ni, nduyɛ a veelu ndu vɛlɛ aa “Masa Kɔl Nyuloo,” o cho tosa a sabu mi “kɔl nyuloo o wa hiouwɔɔ lachi a waa o Masale ndɔleŋ bɛŋgu le pɛŋgu o pɛŋgu, mɛɛlula bɛɛ la ve niŋ le.”—Aisaya 9:​6, 7.

•   Suŋ suŋ bɛɛ wanaa cho o masale ndeŋ bɛŋgu wa cho hiouwɔɔ lachi a pɛɛkoo mɛɛ nda wa o kɔl nyulu niŋ yɛ. Nyɛ koŋ pɛŋ Baabuiyo dimi ni aa: “Waŋnda huŋ niŋ ma huŋ chɔu mɔɔŋ ndaaŋ faŋndoŋ dɛndɛla waalaŋ, nduyɛ ma toosiaa balta ndalaŋ mɔɔŋ nda bɛɛndiaa tɔlɔɔlaŋ ndoŋ. A teleŋ koŋ lelɛŋ o lelɛŋ le melnuŋ ndɛ mi le kɔ saa lelɛŋnde cheleŋ a sɔŋgɔɔ le. Lelɛŋ o lelɛŋ le bɛɛndiaŋ ndɛ le kɔlaŋ o chɔu le.”—Aisaya 2:​3, 4.

 Le chɔɔloo sinaa veelu diomndaŋ o suɛi lebolle hei bɛŋgu “Tɔnɔla Yɛɛ Naŋ Tuɛi yɛ Niŋ Yeela o Masale Mɛlɛkaleŋ Bɛŋgu?” nduyɛ tofa vidueiyo hoo Yɛɛ Cho yɛ Masale Mɛlɛkaleŋ?