Waŋnda le Miiliɔŋndaŋ 70 chieeŋndo balɔɔ silɔ cho wanaa nila baŋulɛiya ni, nduyɛ o waŋnda haa tɛɛŋ waŋnda hiouwɔɔ 200 soliŋ suɛi maŋgalɛi nda tuuliaa a la ba ve kpeku ni le suukaŋndo. A mɛɛ kona cho amatou wo chɔm yɛ, i cho suɛi imɔnɔ le sinaa maa wanaa bɔɔbɔɔ cho hau wanaa nila baŋulɛiya chaa biyɔɔ le.

•   “Chieeŋndo balɔɔ silɔ waŋnda kuuna niŋ hau dila wanaa nila baŋulɛiya vɛlɛ a wanaa tui lapi le wa nɔlaŋ.”—Kunda Duaunuŋ Naapilɛ le Wanaa Nila Baŋulɛiya Wo (U.S.).

•   “O lɛŋii nɔ nyɛsɔlaa bɔɔ le ve niŋ wanaa nila baŋulɛiya cho wanaa tambɛiya ni, nduyɛ mi wa ikala nda o ba le dɛnɛ sinaa, waltaŋ vɛlɛ a yooŋgulaŋ sɔlaa.”—Kɔɔna Chieeŋndo Le Wanaa Nila Baŋulɛiya.

 Vɛɛ Mɛlɛka che yɛ wanaa nila baŋulɛiya? Yɛɛ Baabuiyo dimi yɛ a wanaa nila baŋulɛiya okɔɔ? Nduyɛ vɛɛ Seiyaa Chɛhowa cho yɛ hau wanaa nila baŋulɛiya malaa?

Mɛɛ Mɛlɛka che wanaa nila baŋulɛiya yɛ

 Mi Baabuiyo chɔm maa Mɛlɛka a Chɛhowa buulaŋ tau a wanaa nila baŋulɛiya okɔɔ. O yeema miŋ bii wanaa nila baŋulɛiya nyɛkɛndɛi nduyɛ mi nda bɛɛ sɔla tɔnɔɔ o pɛɛkula o cho naa kioo laŋ ni.

 Bolle Baabuileŋ: “La nɔ mi la mɛna wana nila baŋulɛiyo . . . le.”—Lɛvitikɔɔ 19:​14.

 Bolle Baabuileŋ: “Mɛlɛka hɛli ŋwaŋnda chiee le.”—Walta Kiilaa 10:​34.

 Bolle Baabuileŋ: “Mi Chiisu balu . . . , nda yooŋgu kɛndɛ leMasaa dimullo”.—Maatiu 9:​35.

 Bolle Baabuileŋ: Mi Chiisu “tosa pɛŋ mi wanaa nila baŋulɛiya [tuɛi], nduyɛ mi bobuaa [suaa].”—Maki 7:​37.

 Bolle Baabuileŋ: “Wanaa nila baŋulɛiya a nɔla [niŋ] ma tuei.”—Aisaya 35:​5.

 Nyɛ Hei Simndo: Chɛhowa mei lediom maa wanaa nila baŋulɛiya cho hunɔɔ tueiyɔɔ.—Aisaya 29:​18.

Vɛɛ Seiyaa Chɛhowaa Cho yɛ Hau Wanaa Nila Baŋulɛiya Malaa?

 Mi Seiya Chɛhowaa dimul wanaa nila baŋulɛiya yooŋgu kɛndɛ leMasaa chieeŋndo balɔɔ silɔ. Yɛɛ naŋ cho yɛ tosaa le batiuwaa waa ndoo sɔlaa? Miŋ soli Baabuiyo vɛlɛ a vidueila naŋ pɛɛku Baabuiyo laŋ o sɔɔŋ maŋgalaŋ nda tuuliaa a laba woŋ niŋ hiouwɔɔ 100. Miŋ kandu pɛɛkula Baabui laŋ tosaa vɛlɛ a bɔŋaŋndaŋ biyɔɔ o suɛi maŋgalɛi nda tuuliaa a laba ve niŋ. Muŋ kpou naŋ cho tosaa ni le wanaa yeema sinaa a Mɛlɛka okɔɔ wa malaa, kɛ a paawa nyɛsɔlaa le hei le. Le sabu yɛ? Kanifuule nyɛ Chiisu dimi wo naŋ cho tolɔɔ kɔɔli ni. Mbo dimi aa: “Fondo nya sɔla ni, nya bɛɛ la yɔŋgu fondo.”—Maatiu 10:​8.

 A tiuba maa tul nɛila cho laŋ amatou laŋ kɔɔli le nyɔɔŋ muŋ saalɔŋndo o intanɛtiiyo choo ɔɔ ma tusi muŋ o nyɛ num mapuuloo choo:

 JW.ORG. Chuku fondaŋ cho le sɔɔŋ maŋgalaŋ o intanɛtiiyo choo wo le saalɔŋndo yooŋgu kpeekpei ŋ yeema o suɛi maŋgalɛi nda tuuliaa a laba ve niŋndo.

 JW Library Sign Language. Tusi nyɔɔ hoo o nyɛ num mapuuloo choo, o cho num mala le ma nua vidueila cho o sɔɔŋ maŋgalaŋ nda tuuliaa a laba ve niŋndo.

Nyɛm Pɛɛkaŋ Baabui Kuɛɛ Naŋ Nɔ Yɛ Suŋ Suŋ?

 Baabuiyo o suɛi maŋgalɛi nda tuuliaa a laba ve niŋ. Hivioo le Chieeŋ Sɛnɛiyo o Suɛi Maŋgalɛi Nda Tuuliaa a Laba ve o Amɛlika niŋ wa Baabui tase nda soli o suɛi maŋgalɛi nda tuuliaa a laba ve niŋ ni. Hivioo le Chieeŋ Sɛnɛiyo kpou ɔɔ o tiŋ cho niŋ suŋ suŋ o sɔɔŋ maŋgalaŋ nda tuuliaa a laba ve niŋ. Nduyɛ iwɔsi o iwɔsi mi sɔɔŋ maŋgalaŋ cheleŋ chɔɔluŋ lechoo.(Te a yeema pɛ ma che sɔɔŋ maŋgalaŋ ɔɔ Baabuiyo o intanɛtiiyo choo o sɔɔŋ maŋgalaŋ nda tuuliaa a laba ve niŋ, tofa kɔfoo hoo “ Hivioo le Chieeŋ Sɛnɛiyo o Suɛi Maŋgalɛi Nda Tuuliaa a Laba ve niŋ.”)

•   Tofa vidueiyo le Baabuiyo Hivioo le Chieeŋ Sɛnɛiyo o nda hivi kpou o suɛi maŋgalɛi nda tuuliaa a laba o Amɛlika niŋndo, le ma sina wali nda tosaŋ le Baabuiyo solioo o suɛi maŋgalɛi nda tuuliaa a laba ve ni.

•   Le nilaŋ yaŋɔɔ o diomnda nda chua nyɛkɛndɛi laŋ, tusi JW Library Sign Language o nyɛ num mapuuloo choo. Nyɔɔ hoo cho num mala le bolle Baabuile kpeekpei le ŋ yeema diomnda veeloo o suɛi maŋgalɛi nda tuuliaa a laba ve niŋndo.

•   Dimitɔɔ Nda Vita kalaŋ chuauwaa nila baŋulɛiya nda cho ni, kɛ mi chuauwaa ndaa tuei. Tofa ma che mɛɛ yuŋgoo hoo cho tɔnɔɔ sɔlaa lepaa o lepaa o viduei nda soli a Baabui nda chua diomndaŋ le suɛi maŋgalɛi nda tuuliaa a laba ve niŋ yɛ.

 Vidueila cho a Baabuiyo okɔɔ laŋ. Seiyaa Chɛhowaa soli niŋ vidueilaŋ o suɛi maŋgalɛi nda tuuliaa a laba ve niŋ le waŋnda malaa ma bii bila nyɛ Baabuiyo dimi wo, nduyɛ a le maa dɔu ndu o wali niŋ. Le . . .

•   Wanaa cho o nɔlaŋ nda

•   Feleŋguaa

•   Chuaambuaa

 Pɛɛku Baabuiyo tosaa nyaa ŋiɔɔŋ kpeele. A mala wanaa chaa suɛi maŋgalɛi tuuliaa a laba wa, a tiuba ma pɛɛku a yooŋgu cho o Baabuiyo niŋndo o num ndo bɛɛ. Nyuna le pɛɛku Baabui ŋ paawa nyɛ o nyɛ le wo.

 Chesiŋ Sɛnachɔnɛŋ cho o lɛŋnde Filipi leŋ niŋ. Tofa ma che mɛɛ pɛɛku Baabuiyo mala ndu le chaŋyɛi kpɛɛluŋnde nɔɔ a Mɛlɛka yɛ.

 Malioo Antɔnɛɛ wana bɛndu le kaaŋndo cho o Hɔŋdoliaa niŋ. Tofa ma che mɛɛ o saaluŋ mulilaŋ le nyunala ndoo nɔ a Baabuiyo okɔɔ laŋ, te a wa pɛ diomndaŋ veeloo o bundɛi nduɛi hei niŋ “I Nɔ Nyunalaŋ Tau Mbo Hiau Mulilaŋ.”

 Bɔŋaŋndaŋ a sɔɔŋ. Ŋ nɔ kundala bii bɔŋaŋndo o suɛi maŋgalɛi nda tuuliaa a laba ve niŋ, a kundala pɔmbɔlaŋ chieeŋndo balɔɔ silɔ. Nduyɛ loŋ wanaa nila baŋulɛiya chuuŋgiaŋ ni le pɛɛkoo a Mɛlɛka piɛiyo o lɔɔ kɛ kɛ bɛŋgu. Miŋ kɔɔna vɛlɛ bɔŋaŋnda bɛŋndaŋ iwɔsi o iwɔsi o suɛi maŋgalɛi nda tuuliaa a laba ve niŋ, le mi wanaa nila baŋulɛiya pɛɛku tonya cho a Baabuiyo okɔɔ wo. O bɔŋaŋndaŋ laŋ, miŋ kindiŋ le wanaa nila baŋulɛiya a wanaa nda vialu a sumɛi nduyɛ ma nɔ nila baŋulɛi laŋ nda tuuliallo sɔɔŋ nda wa yɔŋgoo woŋ nyɛkɛndɛi. Le halikpeŋ mi waŋnda haa bii bila nyɛ nda wa dimioo wo. Miŋ soli vɛlɛ yaula tɔlnuŋ o Baabuiyo choo laŋ le wanaa sumɛiya malaa, nduyɛ a paawa nyɛ o nyɛ le.

•   Saaluŋ kundaa num ikɛi.

•   Pɛɛku le ma sina a bɔŋaŋnda naŋ bii o wɔsioo niŋndaŋ a bɔŋaŋnda ibuŋgalaŋ.

•   Bii bɔŋaŋndo le loonɔŋndo a piɔm Chiisu wo okɔɔ, bɔŋaŋ sɔvɛ naŋ bii o wɔsioo niŋndo o cho ni.

 Choosɛ Luwis Ayala cho Mɛsiko. A nila baŋulɛi laŋ nda velu ndu ni, nduyɛ okoŋ kɔɔli mbo mɛɛlu suma. Tofawɔ ma che mɛɛ o looku malaa sɔlaa le simnɔŋndo wana pɛɛkaa Baabui kɛndɛ yɛ.