Te wallo hɛluŋ num pɛ, mi keŋ paaliaŋ num tau. Mi hei hiŋ a bala fondolaŋ, bahawɛila yuŋgoo, kɔl saŋgaa, nduyɛ pɛŋ mbo paaliaŋ kɛndiaa numndo. Sɔɔŋ cho muŋ lebɛŋgu woŋ chɔm maa sawala mandaala Baabuiyo tolɔɔ kɔɔli mala naa miŋ biunuŋ o sɔɔŋ waa nuaa niŋ.

•   Dimul acheleŋnda mɛɛ ŋ cho sinaŋndo yɛ.

   Nyɛ Baabuiyo Dimi wo: “Chaaŋ num nya naaŋaŋndo ndu, kaalaa o kaala num le teleŋ o teleŋ ni.”—Pulɔwaa 17:​17.

   Te wallo hɛluŋ num pɛ, ma tambu kɔl, ma nɔ kɔl tuuwo, mi sɔɔŋ laasiaŋ num o ba, nduyɛ ma chelnuŋ pɛŋ maa wana fondoo fuu ŋ cho ni. Te a dimul pɛ yuŋgu numndo a chaŋyaŋ num kpɛɛluŋndoŋ mɛɛ ŋ cho sinaŋndo yɛ, a cho num yoomuaŋ luei. Nduyɛ a cho num vɛlɛ silala mala numndaŋ ke le ma sɔla wali sɛnɛiyo.

•   Pɛŋgi buulaŋ bɛndoo

   Nyɛ Baabuiyo dimi wo: “Lelaŋ, la buulaŋ le siɔdii le. Siɔdii nɔ buulaŋnda ndɔlaŋ.”—Maatiu 6:​34.

   Baabuiyo dɛɛniaa naa le miŋ chaa kɛɛsiaa tosa le siɔdiiyo (Pulɔwaa 21:​5) Kɛ a koŋ kpou, mbo dimi vɛlɛ maa naŋ nɔ miŋ pɛŋgi buulaŋ bɛndoo le siɔdii lachioo. Nduyɛ teleŋnda bɔɔbɔɔ miŋ buulaŋ a nyɛ cho bɛɛ yɔŋnɔŋ te wo okɔɔ. Lelaŋ o bɛnda miŋ chua buulaŋ cho le siɔdiiyo, miŋ handu ndu o hoo hau choo le.

   Baabuiyo chɔm num nyɛ ŋ nɔ ma tosa le ma pɛŋgi buulaŋndo wo. Te a yeema pɛ ma chɔɔlu sina, veelu diomndaŋ o suɛi lebolle hei niŋ: “Vɛɛ Ŋ Pɛŋgi yɛ Buulaŋndo”

•   Tosa yɛlɛmiaalaŋ a mɛɛ ŋ pisi nyɛsɔlaa yɛ.

   Nyɛ Baabuiyo dimi wo: “I sina nyɛ cho pɛŋndeŋ ndo. Nduyɛ te waŋndo nɔ vɛlɛ pɛ tau, keŋ bɛɛ I sina.”—Filipiaŋnda 4:​12.

   Yɛlɛmiaa sɔɔŋ ŋ tosa o yoomoo niŋndoŋ. Nduyɛ ma siŋga vɛlɛ mɛɛ ŋ pisi nyɛsɔlaa yɛ. Hei cho num mala ma soliŋ nyɛsɔlaa kpeku mɛɛ ŋ nɔ ndu yɛ. Wa yekeŋ a kueela isiɛlɛilaŋ biyɔɔ.—Pulɔwaa 22:​7.

   Le ma chɔɔlu sina a mɛɛ ŋ tosa yɛlɛmiaa a nyɛsɔlaa pisioo okɔɔ yɛ, tofa suɛi lebolle hei “Vɛɛ Naŋ Soliŋ yɛ Nyɛsɔlaa Pɔmbɔ Naŋ Nɔ wo Kpeku?”

•   Soliŋ teleŋ numndo kpeku nyɛkɛndɛi.

   Nyɛ Baabuiyo dimi wo: “La kela wanaa cho wanaa laalaŋ te wa tɛɛŋ a taasi, nduyɛ mi la soliŋ teleŋ nyaa kpeku nyɛkɛndɛi.”—Kolosiaŋnda 4:​5.

   A yɔŋ bɛɛ ma ve lɛ wali le, teleŋ numndo soliŋndo kpeku nyɛkɛndɛi cho bɔɔ suɛi kɛndɛ bɛndu. Mi keŋ mala a hiu buulaŋ a sɔɔŋ cho num choo woŋ te, nduyɛ ma sinaŋ nyɛkɛndɛi.

•   Tosa yɛlɛmiaalaŋ

   Nyɛ Baabuiyo dimi wo: “Te wana tosa wallo o kala kala pɛ, a sɔla tɔnɔɔ o wali numndo niŋ.”—Pulɔwaa 14:​23.

   Chɛl le wali cheleŋ tosaa. Naapum a tiuba ma tosa walta taaniŋndaŋ, ɔɔ la nda paawa num nyɛsɔlaa bɔɔ le laŋ.

•   Lambaŋ.

   Nyɛ Baabuiyo dimi wo: “Tɔl tɔlɔɔla numndaŋ yɛ yɛlaŋ teleŋ o teleŋ, idii ni ichɔl ni, fondole a sina o kpeekpei cho naŋɔɔ wo le.”—Ikilisiaatii 11:​6.

   Hiou lachi a wallo nuuviaa. Dimul acheleŋnda maa a cho kela wallo. Dimul wanayaŋ numndoŋ, chaaŋaa numnda, a wanaa nya chiɛɛliaŋnda a ndi okɔɔ. Dimul wanaa chua waŋnda le waltaŋ nda, wanaa yeema wanaa malaa le waltaŋ nda, nduyɛ ma nuuviaa fondaŋnda sɛnɛila nda kumbi o intanɛtiiyo choo laŋ. Poonyiaa yaulaŋ le walta yɛ yɛlaŋ, nduyɛ ma wa o bɛɛndiaŋ le nyuuniaala kɛ kɛ mulioo.