Wanapilɛyɛi Cho Hiouwɔɔ Lachi a Wana Bɔɔbɔɔ Saaŋgiaa—Yɛɛ Baabuiyo Dimi Yɛ?
A mɛɛ kona chieeŋndo laŋga dimi yɛ, a te a chɔm pɛ wanaa hiɔɔlu, wana pilɛ o nda tɛɛŋ cho wanapilɛyɛi sinaŋndo ni.
“Mi wana o wana sinaŋ wanapilɛyɛi, hali kaasoŋnda bɛɛ, nduyɛ mi hei yɔŋnuŋ naa ba o ba naŋ wa pɛ”. Lende Chindo Mpemba wanaa bɛndoo o pilɛ le Kɔɔna Cho A Kɛndiaa Okɔɔ Wo, Nduyɛ Mbo Wa Chilaŋ Le Wanaa Tosa Chaŋyaŋ O Intanɛtiiyo Choo Wo Wa dimi ni.
Wanaa bɔɔbɔɔ ndaa yiyaŋ maa, kaasoŋnda ɔɔ wanaa cho kpeele wa kinɛi sinaŋ wanapilɛyɛi ni, kɛ o kpeekpei niŋ hali feleŋguaa, wanaa cho kɛndiaa wa, wanaa cho batiuwaa sɔlaa nduyɛ a wanaa cho o nɔlaŋ nda kpou cho hau wanapilɛyɛi sinaŋndo ni. Te waŋndo ve a cheleŋnda holnɔŋ te, mi keŋ tosa mbo sinaŋ wanapilɛyɛi nduyɛ mi hei paaliaŋ kɛndiaa ndɔɔ vɛlɛ a yiyaŋ ndɔɔ.
“Wanapilɛyɛi sinaŋndo cho ko naa maa kɔl tambɛiyo ɔɔ yiyaŋnda wɔɔŋnda nɔɔ le”, a mɛɛ Dr.Vivek Murthy , U.S. dimi yɛ. Mbo chɔɔlu vɛlɛ dimi aa: “Mi wanaa bɔɔbɔɔ sɔla hau piɔmndaŋ le mɛɛ nda kɛɛ waŋnda holnɔŋndo yɛ, nduyɛ nyɛ pilɔɔ hoo kpe yɔŋnuŋ a wanaa kol hau sikɛɛtiiyo tau o paaleŋ niŋnda ni.”
Yɛɛ Baabuiyo dimi yɛ
Wana Toosiaa naa wo yeema naa kposoŋ miŋ kɛɛ a cheleŋnda holnɔŋndo le. Sabu Mɛlɛkaa le teleŋ o teleŋ cho ni, le miŋ waŋchieeya tuei yoomoo yeela, vɛlɛ a chaŋyaŋ kɛndɔŋ.
Sawa Mandaa Baabuiyo: “Mɛlɛka dimi aa: O bɛnda mi wana pɔnɔɔ wa ndupilɛ kpeele le.”—Chɛnɛsi 2:18.
Mɛlɛka yeema naa miŋ nɔ chaŋyɛi kɛndɛi a ndu. O chua buŋgɛi maa te ŋ kindiŋ pɛ le ndu sɔɔŋguu wo ikɛi, ndu bɛɛ cho naa sɔɔŋguu ikɛi kpɛɛluŋ.—Chemisi 4:8.
Sawa Mandaa Baabuiyo: “Kɔl kɛndɔɔ cho le wanaa landuŋ kɔl le suɛi Mɛlɛkɛiya, kanifuule le nda Masale Mɛlɛkaleŋ le cho ni.”—Maatiu 5:3.
Mɛlɛka yeema naa miŋ piɛi ndu a waŋnda latulu. Te ŋ tosa hei pɛ miŋ sinaŋ nyɛkɛndɛi.
Sawa Mandaa Baabuiyo: “Ŋ waŋnuŋ yiyaŋndo a chaaŋaa naa vellaa velle, okoŋ miŋ kpeeŋiaŋ le kaalaa a walta kɛndɛlaŋ tosaa. La ŋ malnuŋ kɔlaŋ o bɔŋaŋndaŋ, . . . . Kɛ la ŋ dɛɛniaŋ vellaa velle.”—Hibuluiya 10:24, 25.
Le chɔɔloo sinaa le mɛɛ i cho suɛi sɔvɛ le wanapilɛyɛi chɔulabaa yɛ, tofa suɛi lebolle hei “Wanapilɛyɛi Sinaŋndo o Chieeŋ Nɔ Hoo Nyɛm Mapuuloŋ Tau Wo Niŋ.”
a The Global State of Social Connections, by Meta and Gallup, 2023.
Naapum a Yeema Dɔɔ Vɛlɛ
PƐƐKULA SƆVƐLA BAABUIYO
Ŋ Nɔla Pa Miŋ Wa Chaaŋ o Mɛlɛka?
Waŋchieeya bii niŋ yeemɛi chɔmndo le sinaa a wana nda toosiaa okɔɔ le wɔsiŋ bɔɔbɔɔ. Baabuiyo nɔla mbo mala naa miŋ simnuŋ chaaŋ o Mɛlɛka. Chaŋyɛi hei tiuba mii kandu kilaŋndo te ŋ sina pɛ diola Mɛlɛkalaŋ.
PƐƐKULA BAABUIYO
Tofa Ma Che Mɛɛ Naŋ Tosa Pɛɛku Baabuiyo Hoo Yɛ
Kindiŋ ma sɔla pɛɛku Baabui waŋndo wa num malaa wo.
