Waŋnda nyɛɛmbɔ koni bii waŋnda o nɛi kɛndɔɔ choo ni. Mi wanaa cho a naalaŋ nda ma nɔ yoŋgaa wa deŋul wanaa ndaa chiɔuwaa; mi wanaa huŋ nyɛdiaa piondɔɔ o fondaŋ nda pisi nyɛdiaa wo wa bii wanaa yɔŋgu nyɛdiaa wa o nɛi wɔɔŋndo choo; mi wanaa chua nyɛm nyaanaŋndo nda dimul wanaa nɔ ndu wo diomnda wɔɔŋndaŋ; mi chuaambuaa nɔ yoŋgaa wa kɔŋgɔlaŋ wanaa ndaa pɛɛkaa, ma dimul nda diomnda wɔɔŋnda nduyɛ pɛŋ ma maŋ nda; mi wanaa cho o yalale chieeŋnde niŋ nda tosa sɔɔŋ wɔɔŋndo tau, nduyɛ mi apum chɔm maa wanaa lebɛɛ wa nda cho ni.

 Baabuiyo cho yau kpeekpei chɔm naa nyɛ cho hau waŋnda nyindɔɔ le kaala wɔɔŋndaŋ nɔɔ wo. Nduyɛ mbo chɔm naa le sabu waŋnda chiee hau chaaŋaa ndaa biyɔɔ le wo.

 Kaala kɛndɛla waŋnda nɔ hau laŋ, la cho kɔlaŋ a tɔlɔɔ o pɔmpɔmbɔ nduyɛ hei cho ba o ba fee o chieeŋndo choo.

•   A mɛɛ Konaa laŋga chɔm a kaala waŋnda chieeya okɔɔ yɛ, o Amɛlika niŋ, waŋnda nɔ bɛɛle bɔɔ le waŋnda le, nduyɛ le wɔsilaŋ 22 hei cho niŋ yɔŋnɔŋndo ni.

•   Mi kona cheleŋ chɔm vɛlɛ maa waŋnda hiouwɔɔ 32,000 o lɛŋnde 28 niŋ, koŋ cho ni waŋnda 65 o waŋ kɛmɛ kɛ kɛ choo dimi ni maa kaa hoo cho niŋ wɔɔleŋ mbo hiau maa paandu.

 Mi Baabuiyo suaa a kaala waŋnda chieeya okɔɔ la naŋ cho hau chɔɔ laŋ.

•   “Kɛsiŋ o kɔl maa o palɛi mɛɛlɛi niŋ, nyɔɔ kiandu niŋ bɔɔ. Kanifuule, waŋnda kaala niŋ ndapila, . . . wanaa heelaŋnda, wanaa yoŋgaa, . . . a tuii niŋ wanaa velu nda wa diom te, . . . a ve niŋ wanaa sina ikɛndɛ le, . . . nduyɛ a tui niŋ kɔlta ndalaŋ ba le.”—2 Timoti 3:​1-3.

 Le chɔɔloo sinaa a mɛɛ huuluei hei peeluŋ niŋ yɛ, veelu diomndaŋ o suɛi lebolle hei bɛŋgu: “Baa Mi Baabuiyo Suaa pa a Mɛɛ Waŋnda Yiyaŋ Niŋ yɛ Ɔɔ Mɛɛ Nda Tosa Niŋ Sɔɔŋ Yɛ?”

 O chieeŋ waŋnda cho acheleŋnda chaa biyɔɔ le wo niŋ, waŋnda o miiliɔŋndaŋ niŋ saaluŋ niŋ maa Baabuiyo nɔ silala sɔvɛla mala naa miŋ nɔ kaa kɛndɔɔ wo. Nduyɛ silala ndɔlaŋ ndaŋ “teleŋ o teleŋ la cho [silala] wana nɔla ma tiindaŋ” (Sam 111:​8) Ŋ yaasiaŋndɔ tamaseliilaŋ la tiŋ:

•   Nyɛ Baabuiyo dimi wo: “Nyɛ o nyɛ nya yeema pɛ mi chaanda tosal nya, nya bɛɛ la tosal nda nyɛ pilɛ koŋ kpe.”—Maatiu 7:​12.

   Nyɛ hei sim ndo: Ŋ nɔ miŋ bii waŋnda nyɛkɛndɛi nduyɛ miŋ ke nda bɛɛleŋ, mɛɛ naŋ yeema mi waŋnda bii naa yɛ.

•   Nyɛ Baabuiyo dimi wo: “Mɛɛ nya mal niŋ choolaŋ dimioo yɛ, la soo tonyaa naa chaaŋaa nyaa chua.”—Ɛfisiaŋnda 4:​25.

   Nyɛ hei sim ndo: Ŋ nɔ miŋ chɔm sandei o nyɛ o nyɛ niŋ naŋ dimi pɛ ɔɔ miŋ tosa.

 Le chɔɔloo sinaa a suɛi hei okɔɔ, veelu diomndaŋ:

•   O Bandu Mɛŋgɛlaa nɔ hoo suɛi lebolle aa: “Nyɛ Kɛndɔɔ a o Wɔɔŋndo—Nyɛ Ŋ Nɔ Ma Tiindaŋndo le Mbo Mala Numndo.”

•   A suɛi lebolle hei “Te a Chiee Naa Biyɔɔ Le—Vɛɛ Baabuiyo Mala yɛ Naa.”