“O viu wɔ bɛɛ le, naŋ yiyaŋ kposoŋ maa ŋ tiuba miŋ nɔ yaula naalaŋ kpou o nyɛm mapuuloŋ choo le.” Baa lende num aa yiyaŋ ni? Diomndaŋ lapum la wa laŋ ni, la Ŋgɔɔ Geoffrey Jackson dimi o Kona Sɛnɛi Ŋɔmpum Dialii Kuumbaŋ Choo Ve le 2020 niŋ ni. Mbo hiau lachi a dimioo aa: “Nduyɛ I laalaŋ maa miŋ yiyaŋ dɔɔ a mɛɛ sɔɔŋ wa wa naa choo a teleŋ naa Kolonaa hoo yɛ, te naŋ nɔ nyɛm walloŋ te, mɛɛ JW Library cho naa yɛ. Chɛhowa wa naa bɛɛndiaa o wɔsiŋ hiou woŋ niŋ le sɔɔŋ waa naa.”

 Vɛɛ Chɛhowa bii yɛ niŋ naa bɛɛndiaa? Wali yɛɛ tosaŋ yɛ le JW Library app toosiaa? Nduyɛ yɛɛ yeemaŋ le ndu kpɛlɛkiaa le halikpeŋ mbo hiou lachi a wallo, vɛlɛ a sɔɔŋ cheleŋ chɔɔloo handɔɔ lechoo?

 A wɔsi 2013, mi Dialii Kuumbaŋ Choo Ve dimul kundaa pum o fondaŋnda leboltaŋ diolaŋ MEPS Programming, le ma toosiaa nyɔɔ, o nda tiuba ma dɔu New World Translation nda miŋgi kpɛlɛkiaa wo leniŋ ndo. Mi puaapilɛnɔ pilɛ tosa wallo a kundaa hoo wo diolaŋ Paul Willies dimi aa: “Haaa a teleŋ koŋ, naŋ nɔ wɔ nyɛ o nyɛ o nyɛm naŋ mapuuloŋ niŋ, o naŋ tiuba miŋ dɔu yaula naalaŋ leniŋ ndo le. Kɛ miŋ kila kundaa hoo, miŋ pɛŋgi wɔ walta cheleŋnda naŋ tosalaŋ lapum tosaa, nduyɛ miŋ tosa wallo a kundala cheleŋ le JW Library toosiaa a nyɛ o nyɛ cho leniŋ. Mi naŋ piɛi teleŋnda bɔɔbɔɔ, nduyɛ a mala Chɛhowaa, miŋ tiuba le ndu solioo o bɔŋaŋ iwɔsi biinuŋ o wɔsi koŋ niŋndo. Paŋgoŋ ŋuɛɛnu kinɛi naŋ chua ni!”

 Simul cheleŋ naŋ sɔla vɛlɛ wo wa le ndu siiŋguuwo fondaŋ kɛsiaa layawo ni. Naŋ nɔ mi naŋ dɔu yaula bɔɔbɔɔ leniŋ nduyɛ mi laa wa o sɔɔŋ maŋgalaŋ bɔɔbɔɔ niŋ. A Tɛɛkpaa wɔsi 2015, yaula naŋ soliŋ kpeku suŋ suŋndaŋ la bɔɔbɔɔ wa niŋ o JW Library niŋ o Iŋkilisiiye niŋ. Nduyɛ paŋgoŋ ŋɔmpum hiouwɔɔ okoŋ kɔɔli, wanaa bɔɔbɔɔ ndaa tiuba ma hivi niŋ yaula naalaŋ o sɔɔŋ maŋgalaŋ cheleŋ niŋ o kɛmɛlaŋ niŋ.

 Chɔŋ a teleŋ koŋ, puaapiliaa naa cho hiouwɔɔ lachi a JW Library kpɛlɛkiaa o nɛila bɔɔbɔɔ niŋ. A chɔɔlu niŋ vidueila bɔɔbɔɔ, nduyɛ a handu niŋ yaulaŋ vɛlɛ a vidueila cho le bɔŋaŋndo laŋ kpou o fondaŋndo opilɛ bɛŋgu. O faŋaŋ okoŋ kɔɔli, te o yɔŋ pɛ miŋ yeema sinaa a bolle Baabuileŋ okɔɔ, ŋ tiuba niŋ miŋ saaluŋ yaula cho o Yau Yaasiaa Ŋsɔɔ le Seiyaa Chɛhowaa niŋndaŋ a bolle Baabuile leŋ okɔɔ o nyɛ wallo hoo niŋ.

 Lepaa o lepaa, waŋnda miiliɔŋndaŋ 8 soliŋ JW Library kpeku ni o nyɛm ndaŋ mapuuloŋ niŋ. Nduyɛ ipaŋgu o ipaŋgu, waŋnda hiouwɔɔ miiliɔŋndaŋ 15 soliŋ ndu kpeku ni! Yɛɛ yeemaŋ yɛ le ndu kpɛlɛkiaa le halikpeŋ mbo hiou lachi a wallo tosaa nyɛkɛndɛi? Mi Ŋgɔɔ Willies dimi aa: “Wana nɔla ma chii nyɛm nda handu muŋ o nyɛm mapuuloŋ choo wo kpɛlɛkiaa le. Ŋ cho wallo tosaa lepaa o lepaa le halikpeŋ miŋ chɔɔlu nyɛm sɛnɛi cheleŋ handɔɔ lechoo, a le chɔɔloo tosaa mbo wa tɛtɛlɛ le ndu soliŋndo kpeku. Le mɛɛ wanaa toosiaa nyɛm mapuuloŋ nda cho teleŋ o teleŋ nyɛm sɛnɛi cheleŋ chɔɔloo kpɛlɛkiaa leniŋ yɛ, naa bɛɛ nɔ miŋ tosa yɛlɛmiaalaŋ o JW Library niŋ, le halikpeŋ mbo hiou lachi a wallo tosaa nyɛkɛndɛi o nyɛm mapuuloŋ muŋ niŋ. Nduyɛ mɛɛ yaulaŋ a diomnda nda chua laŋ la chɔɔluŋ lechoo fau, lende koni naa bɛɛ nɔ ni miŋ chɔɔlu nyɔɔŋ ŋpum handɔɔ leniŋ nduyɛ miŋ kpɛlɛkiaa ndu.” Te ŋ chɔm pɛ sɔɔŋ maŋgalaŋ kpou, ŋ nɔ suŋ suŋ yaulaŋ le 200,000 a vidueilaŋ ɔɔ diomnda nda chua laŋ hiouwɔɔ 600,000 o JW Library niŋ!

 Le tosaa a sabu mi nyɛ wallo hoo hiou lachi a wallo tosaa nyɛkɛndɛi, o cho ko kɔmpitɛiyo soliŋndo kpeku le yeemaŋ te. Kɛ kundaa hoo nɔ vɛlɛ ma paawa le halikpeŋ ma sɔla dioo le nyɔɔŋ pum soliŋndo kpeku o kɔmpitɛiyo niŋ le wallo o nyɛ wallo hoo choo. Nyɔɔŋ muŋ opilɛ nɔ baa le kaniŋ mapuuloŋ dalalaŋ $1,500 le wɔsioo opilɛ. Le handɔɔ lechoo, iwɔsi o wɔsi, mi kundaa hoo soliŋ kaniŋ mapuuloŋ dalalaŋ $10,000 le wanaa toosiaa nyɛm mapuuloŋ nda kioo, le halikpeŋ mi JW Library hiou lachi a wallo tosaa o kɔmpitɛilaŋ, tabilɛtiilaŋ, a foŋnda sɛnɛila nda cho solioo laŋ niŋ nyɛkɛndɛi.

 Le mɛɛ naŋ nɔ niŋ JW Library yɛ, ŋ pisi lɛ nyɛsɔlaa bɔɔ le yaulaŋ solioo o pei choo, dɔwɔɔ laŋ diompilɛ a le laŋ yɔŋndo chieeŋndo balɔɔ silɔ le. Ŋ chua wɔ tamaseliiyo a buluchiɔɔ hoo, Pɛɛku Diom Mɛlɛka Lepaa o Lepaa. O wɔsi 2013 niŋ, miŋ soli yauwo hoo le miiliɔŋndaŋ 12. Kɛ o wɔsi 2020 niŋ, mi che bɛɛ mi wanaa dimiaa yooŋgu kɛndiaa chɔɔluŋ lechoo le 700,000, kɛ le miiliɔŋndaŋ la ŋuɛɛnu kinɛi naŋ soli yauwo hoo o pei choo ni. Yɛɛ hiŋ yɛ a siŋgaŋ koŋ? Kanifuule, puaapiliaa a ndepiliaa bɔɔbɔɔ, JW Library nda soliŋ niŋ kpeku ni le diomndaŋ veeloo o yauwo hoo niŋ.

 Mi JW Library mala vɛlɛ waŋnda o nɛila bɔɔbɔɔ niŋ. Ndepilɛnɔ pilɛ diolaŋ Geneviève o lɛŋnde Kanada leŋ niŋ dimi maa nyɛ wallo hoo cho ndu malaa ni le pɛɛkɔŋ ipilayaa tosaa teleŋ o teleŋ. Mbo dimi aa: “O kpeekpei niŋ, te ndoo yɔŋ pɛ maa mɛɛ mi yaa nuuviaa fɛŋ yaula ya nɔ le pɛɛkoo laŋ o fondaŋ kɛsiaa layauwo, I laalaŋ maa I wa wa dialloŋ wuoo le pɛɛkoo idii o idii. Pɛɛku ya tosa hoo teleŋ o teleŋ ndo kindi niŋ laalaŋ nuu, nduyɛ mbo tosa mi chɔɔlu Chɛhowa sɔɔŋguu ikɛi kpɛɛluŋ.”

 JW Library mala niŋ wanaa bɔɔbɔɔ o teleŋ naa Kolonaa hoo niŋ. Mi ndepilɛnɔ pilɛ o Amɛlika niŋ diolaŋ Chaliliŋ dimi aa: “Le mɛɛ naa Kolonaa cho pɛŋgɛlaŋndo chieeŋndo balɔɔ silɔ yɛ, o hiou niŋ wɔsioo opilɛ I chi wɔ yaula sɛnɛila kɔɔnaa toosiaa nduyɛ ma soli laŋ o pei choo laŋ te. Kɛ JW Library cho naa malaa le laalaŋ naa kindioo, nduyɛ I mel bɔɔ Chɛhowa balika le mɛɛ o ke naa nyɛ wali sɔviɔɔ hoo yɛ.”

 Wanaa bɔɔbɔɔ chɛl nyɛ ndepilɛnɔ pilɛ diolaŋ Faye o lɛŋnde Filipiŋ ndeŋ niŋ dimi wo. Mbo dimi aa “Nyɛ wali sɔvɛ sɔviɔɔ hoo ya soliŋ kpeku ni le sɔɔŋgoo Chɛhowa ikɛi kpɛɛluŋ. Ndu ya soliŋ kpeku ni le diomndaŋ veeloo idii o idii. Ndu ko ya soliŋ kpeku ni le diomnda nda chua laŋ nilaŋ yaŋɔɔ te I wa pɛ kpekula pɔmpɔmbɔ laŋ tosaa. Nduyɛ ndu ya soliŋ vɛlɛ kpeku ni le pɛɛkoo le bɔŋaŋndaŋ. Ndu ko ya soliŋ kpeku ni le bɛɛndiaŋndo le pɛɛku Baabuiyo. Mi tofa vidueilaŋ leniŋ te I ve nyɛ o nyɛ tosa le. Mi veelu diomndaŋ o buŋgaŋ niŋ ɔɔ o Baabuiyo niŋ te I wa pɛ chumndo o pulaleŋ. Nyɛ wali sɔvɛ sɔviɔɔ pila o cho ni.”

 Nyɛ wallo hoo cho vɛlɛ bɔɔ o sɔvɛ o wali pollo niŋ. Le tamaseliiyo, mɛɛ ndepilɛnɔ pilɛ wa yooŋgu kɛndɔɔ dimioo o lɛŋnde Kamɛluŋ ndeŋ niŋ, ndoo yeema mbo soo a bolle Baabuile o che mi ndepilɛnɔ pilɛ soliŋ ndeŋ kpeku o lɔɔla laa hiou laŋ niŋndo. Kɛ mbo puɛɛnuŋ bolle Baabuile leŋ. Mbo dimi aa: “Kɛ mi loonuŋ diomndaŋ lapum o bolle Baabuile leŋ niŋ. Le hei, mi kumbi JW Library, okoŋ mi chuku o fondaŋ Baabuiyo cho wo, nduyɛ mi nuuviaa diomnda laŋ. Mi saaluŋ ndeŋ sakpo o foofo koŋ choo. Sanaa a nyɛ wallo hoo, I nɔla niŋ mi loonuŋ bolii Baabui bɔɔbɔɔ ya puɛɛnuŋ teleŋndaŋ lapum nde.”

 Toolula ŋ cho yɔŋgoo sanaa a nɛilaŋ chɔmaala cho o donate.pr418.com choo laŋ la mala naa ni le JW Library toosiaa, kpɛlɛkiaa ndu le mbo hiou lachi a wallo tosaa, vɛlɛ a nyɛm cheleŋ chɔɔloo handɔɔ lechoo le puaapiliaa a ndepiliaa naa chieeŋndo balɔɔ silɔ. Nuwali tau le kɛndɛi numnde.

1. Saa 2013—Wɔsioo hoo nda soli ndu ni nduyɛ ma duau New World Translation nda miŋgi kpɛlɛkiaa wo leniŋ

2. Tɛɛkpaa 2015—Ma chɔɔlu yaula cheleŋ handɔɔ lechoo o Iŋkilisiiye niŋ, a o sɔɔŋ maŋgalaŋ cheleŋ niŋ o kɛmɛlaŋ niŋ

3. Bɛŋgufɔnɔɔ 2015—Ma chɔɔlu handɔɔ nyɛ keeku pondaleŋ o pulaŋ choo wo leniŋ

4. Bukuloo 2016—Ma chɔɔlu handɔɔ fondaŋ cho le bɔŋaŋndaŋ ndo leniŋ

5. Bukuloo 2017—Ma chɔɔlu handɔɔ fondaŋ wana chuku okoŋ ma poonyiaa nyɛ ŋ yeema wo leniŋ

6. Yindimiiyo 2017—Ma chɔɔlu handɔɔ nyɛ tosa mi Study Bible tosa wallo wo leniŋ

7. Fuoo 2019—Ma chɔɔlu handɔɔ nyɛ tosa miŋ tiuba le diomnda nda chua laŋ hivioo o nyɛm naŋ mapuuloŋ niŋndo, nyɛ tosa mi wana tofa vidueiyo sakpo o nyɛm num mapuuloo niŋndo, a yaula cho o Yau Yaasiaa Ŋsɔɔ le Seiyaa Chɛhowaa niŋndaŋ leniŋ

8. Tɛɛkpaa 2021—Ma chɔɔlu handɔɔ nyɛm yɛ yɛ cho o yauwo hoo niŋndoŋ, Tuei Yoomoo Yeela Lefafɛɛŋ!