Bɔŋaŋ bɛndu naŋ bii a wɔsi 2020 wo wa bɔɔ teŋgeŋ. Kanifuule, ndu wa bɔŋaŋ tase nda chua diomndaŋ nduyɛ ma heelu ndu o intanɛtiiyo choo wo ni. Kɛ o lɛŋnde Malawi leŋ a lɛŋnde Mɔsambiki leŋ niŋ, o cho intanɛtii le puaapiliaa a ndepiliaa naa bɔɔbɔɔ soliŋ kpeku le bɔŋaŋ bɛndoo hivioo okoŋ ma tofa ndu o nyɛm ndaŋ mapuuloŋ choo le. Vɛɛ nda looku yɛ ndu biyɔɔ?

 Le lɛŋnde hei ndu ndu, mi Kunda Kɔɔna Sɔɔŋ o Dialii Kuumbaŋ Choo Ve choo wo a Kunda Pɛɛkaa yɔŋgu nɛi chɔmaa le mi puaapiliaa tofa bɔŋaŋ bɛndoo o tɛlivisiɔŋndo choo ɔɔ ma yaŋ alaadioo nilaŋ. Le yɛɛ kɛɛsiaa hoo wa yɛ o sɔvɛ? O chieeŋndo choo kpou, lɛŋnde Malawi leŋ intanɛtiiyo hiou nɔ baa. Le hei, Seiyaa Chɛhowaa nyɛɛmbɔ koni nɔla ni ma pendu intanɛtiiyo. A mɛɛ William Chumbi, wana pilɛ o Kunda Kɔɔna Sɔɔŋ o Lɛuve Malawi wo dimi yɛ: “O alaadioo a o tɛlivisiɔŋndo choo kinɛi puaapiliaa ndaa tiuba ni ma yaŋ nilaŋ ɔɔ ma tofa bɔŋaŋ bɛndoo.” Mi Luka Sibeko, wana pilɛ o Kunda Kɔɔna Sɔɔŋ o Lɛuve Malawi wo bɛɛ chɔɔlu dimi aa: “Te ndoo ve o tɛlivisiɔŋndo ɔɔ o alaadioo choo le, puaapiliaa nyɛɛmbɔ koni wa tɔnɔɔ sɔla o bɔŋaŋ bɛndoo niŋ ni, o tanda lɛuvii nɛi bɛŋgu.” O lɛŋnde Mɔsambiki leŋ niŋ bɛɛ, puaapiliaa nyɛɛmbɔ koni wa tiuba ni le nyɛm mapuuloŋ sɔlaa le bɔŋaŋndo tofaa, o cho wɔ le intanɛtiiyo piondɔɔ le.

 Le mɛɛ naa Kolonaa wa pɛŋgɛlaŋndo yɛ, puaapiliaa wa niŋ fondaŋnda tɛlivisiɔŋndo a alaadi laŋ lapum soliŋndo kpeku le bɔŋaŋnda kundaa biyɔɔ. a Mɛɛ teleŋ bɔŋaŋ bɛndoo biinuŋ ndo fuuluu, mi puaapiliaa naa kua o fondaŋndaŋ ndaŋ le suukaŋndo a wanaa tosa wallo loŋ nda, le ma chɔɔlu nda teleŋndo hendul lechoo le bɔŋaŋ bɛndoo biyɔɔ.

 O Malawi niŋ, mi puaapiliaa naa sɔla simullo opum. O kpeekpei niŋ, hawɛiyo opilɛ kinɛi wanaa tosa wallo o fondaŋnda alaadi laŋ a tɛlivisiɔŋndo wa chɛl waŋnda ni le sɔɔŋ nda yeema tosaa woŋ tosaa. Nduyɛ wanaa kaŋ wa buulaŋndo maa te nyɔɔ pilɛ hiu pɛ viouwɔɔ, waŋnda nɔ iyeema le ndu nilaŋ yaŋɔɔ ɔɔ le ndu tofaa le. Kɛ mi puaapiliaa naa tɛɛsial nda maa wali naa nɔla mbo mala waŋnda tau. Nduyɛ ma dimul nda maa hali a teleŋ naa Kolonaa hoo bɛɛ, ŋ cho waŋnda dimullo yooŋgu kɛndɛ chɛŋ o Baabuiyo niŋndo. O nɔla mbo mala nda ma simnuŋ pilachieeyaa kɛndɛ, nduyɛ mbo tosa ma wa a kɔl kɛndɛ o yuŋgula ndala niŋ. Mɛɛ nda tuei hei, ma chɛl le puaapiliaa naa chɔɔloo teleŋ nda nyuna nda wo hendul lo lechoo.

 O Malawi niŋ, fondaŋ tɛlivisiɔŋndo opilɛ a alaadioo opilɛ ndaa soliŋ kpeku ni le bɔŋaŋ bɛndoo biyɔɔ. Nduyɛ o lɛŋnde leŋ niŋ, waŋnda o miiliɔŋndaŋ niŋ tiuba ma sɔla tɛlivisiɔŋ koŋ a alaadi koŋ ba o ba nda wa. O lɛŋnde Mɔsambiki leŋ niŋ, fondaŋ tɛlivisiɔŋndo opilɛ a fondaŋnda alaadi laŋ 85 nda soliŋ kpeku ni le bɔŋaŋ bɛndoo biyɔɔ.

 O lɛŋii ŋiiŋnde hei niŋ kpou, mi kɔɔnaa yɔŋgu kaniŋ mapuuloŋ dalalaŋ $28,227 b le halikpeŋ ma tofa bɔŋaŋndo o tɛlivisiɔŋndo choo, a kaniŋ mapuuloŋ sɔŋgɔ dalalaŋ $20,000 le paawaa o fondaŋnda alaadi laŋ. O fondaŋnda alaadi la pɔmbɔlaŋ, mi ndaa paawa kaniŋ mapuuloŋ dalalaŋ $15, nduyɛ o la bɛndaŋ, mi ndaa paawa kaniŋ mapuuloŋ dalalaŋ $2,777.

 Mi puaapiliaa naa ndaa tosa wallo kalaŋ le toolulaŋ soliŋndo kpeku nyɛkɛndɛi. Le tamaseliiyo, o Malawi niŋ, mi puaapiliaa ndaa kindi kindiŋ o nɛi o nɛi niŋ le suukaŋndo a wanaa tosa wallo o fondaŋnda ndaŋ nda le halikpeŋ ma mala nda o baala pɔmbɔlaŋ. Mi hei tosa ma kɛsi kaniŋ mapuuloŋ dalalaŋ $1,711. O lɛŋnde Mɔsambiki leŋ niŋ, mi apum ndaa chɛl le baa tusioo le mɛɛ naŋ sandu yɛ a le mɛɛ naŋ paawa nda o teleŋ naŋ chɛlaŋ choo yɛ.

 Puaapiliaa naa nɔ bɔɔ balika melaa le mɛɛ nda tiuba le bɔŋaŋ bɛndoo biyɔɔ o tɛlivisiɔŋndo choo ɔɔ o alaadioo choo yɛ. Mi bɛndu kunda pilɛ diolaŋ Patiliki o lɛŋnde Malawi leŋ niŋ dimi aa: “Ŋ nɔ bɔɔ balika melaa le puaapiliaa cho o Dialii Kuumbaŋ Choo Ve choo wa, le buulaŋ kpeekpei nda cho naa chɔmndo o teleŋ naa Kolonaa hoo niŋndo.” Mi Aase o lɛŋnde Malawi leŋ niŋ bɛɛ dimi aa: “Ŋ nɔ nyɛ mapuulu kɛ kɛ le. Lelaŋ, ŋ nɔ bɔɔ balika melaa le mɛɛ kɔɔna Chɛhowaa tosa kɛɛsiaa teŋgeŋndo le bɔŋaŋ bɛndoo nilaŋ yaŋɔɔ o alaadioo choo yɛ. Kɛɛsiaa hoo tosa mi yuŋgu nuu kpou sɔla tɔnɔɔ o bɔŋaŋndo hoo niŋ. Miŋ cha kpendekele maa kaala Chɛhowa nɔ le wanaa nduaa wo o chɔm naa hoo ni.”

 O lɛŋnde Mɔsambiki leŋ niŋ, bɔŋaŋ bɛndoo le wɔsi 2020 wa bɔŋaŋ bɛndu tasoo le wana dimiaa yooŋgu pum ni. Mbo dimi aa: “Kɛɛsiaa le bɔŋaŋ bɛndoo tofaa o tɛlivisiɔŋndo choo loonuŋ ya maa Mɛlɛka kpuluŋguma bɛndoo Chɛhowa cho ni. Naa Kolonaa hoo kuuna ndu le naa nyɛm mala naa o ndu piɛiyo niŋndoŋ yɔŋgoo o lumuila naalaŋ niŋ te. Mi cha kpendekele kaala cho wanaa Chɛhowaa tɛɛŋndo. I laalaŋ kɛsɛ maa piɛile tonyaleŋ le cho leŋ ni.”

 Mi bɛndu kunda pila diolaŋ Wisiŋ dimi aa: “I yeema mi chɔm balika melaa le buulaŋ kpeekpei buɛi cho sakpo wo cho naa chɔmndo o teleŋ naa Kolonaa hoo niŋndo. Kɛɛsiaa nda tosa hoo le bɔŋaŋ bɛndoo biyɔɔ o tɛlivisiɔŋndo choo ɔɔ o alaadioo choo wo, mala naa a bɔɔbɔɔ nɔ bala fondolaŋ o lɛŋndeŋ ndeŋ niŋnda miŋ tiuba le tɔnɔɔ sɔlaa o bɔŋaŋndo hoo niŋ.”

 Le bɔŋaŋ bɛndoo le wɔsi 2021 bɛɛ, Kunda Kɔɔna Sɔɔŋ Ndo a Kunda Pɛɛkaa tosa vɛlɛ kɛɛsiaa le ndu tofaa o tɛlivisiɔŋndo choo, ɔɔ nilaŋ yaŋɔɔ o alaadioo choo o fondaŋndaŋ lapum. Vɛɛ naŋ nɔla yɛ bɔnɔla tosaŋ le bɔŋaŋ bɛndoo biyɔɔ o nɛi waa naa choo wo paawaa? Ŋ tosa hei sanaa a toolula yɔŋguŋ le wali Chɛhowaa tooloo chieeŋndo balɔɔ sila wo. Nduyɛ puaapiliaa bɔɔbɔɔ, ma soliŋ nɛila yɛ yɛla cho o donate.pr418.com choo laŋ kpeku le toolula ndalaŋ yɔŋndo. La nuwali tau le kɛndɛi nyɛi, a toolula nya cho yɔŋgoo a kɔllo kpou laŋ.