Chieeŋndo balɔɔ silɔ, masaa waa kuuna niŋ hau waŋnda sɔɔŋgaŋndo ikɛi a chuuŋgiaŋndo diompilɛ. Seiyaa Chɛhowaa cho sawala masaa waa dɔu laŋ ndaŋ diikɔŋndo. Kɛ a cho hiouwɔɔ lachi a bɔŋaŋnda ndalaŋ biyɔɔ o nɛi nda manda kɛndiaa ndaa wo choo. Le hei, kundala bɔɔbɔɔ cho nyɛm mapuuloŋ soliŋndo kpeku mɛɛ Zoom cho naa yɛ, le bɔŋaŋnda ndalaŋ biyɔɔ.

 Le naa malaa miŋ wa bɔŋaŋnda naalaŋ biyɔɔ lɔɔlɔɔ, mi Dialii Kuumbaŋ Choo Ve chɛl le toolula naalaŋ soliŋndo kpeku le Zoom piondɔɔ le kundalaŋ kpou. Malaa pila hei cho le kundalaŋ lapum ni. Kanifuule le bɔŋaŋndaŋ biyɔɔ nyɛkɛndɛi, mɛɛ ma pendu fɛŋ fondaa o intanɛtiiyo choo le dalala mapuululaŋ 15 ɔɔ 20 a nyɛ lechoo. Nduyɛ ndaa nɔla kaniei hei sɔla le. Mi kundalaŋ ndaŋ laa soliŋ tɛɛŋguŋ ndaa paawa nyɛ le kumbi le woŋ kpeku le bɔŋaŋndaŋ biyɔɔ. Kɛ muŋ chue wanaa bɔɔ le nduyɛ, muŋ bɛnda tau le. Kundala cho Zoom kɔɔnaa pendu hoo wo soliŋndo kpeku laŋ kpou cho tɔnɔɔ sɔlaa leniŋ. O kindu chaa le nduyɛ mbo chua waŋnda tau. Hau, kundalaŋ hiouwɔɔ 65,000 o lɛŋnde hiouwɔɔ 170 niŋ cho ndu soliŋndo kpeku ni.

 Le taamaseliiyo, o Indonisiaa niŋ, mi kundaa Kailaki o cho Manado, Sulawesi Baluaŋndo wo, mal tɛɛŋgii nda wa paandu bɔŋaŋndaŋ biyɔɔ fondo ve, ma muliŋ o Zoom kɔɔnaa pendu wo. Mi Ŋgɔɔ Hadi Santoso dimi aa: “Puaapiliaa a ndepiliaa ndaa chiee paandu nyɛm mapuuloŋ soliŋndo kpeku le wa bɛɛ, cho niŋ ndu soliŋndo kpeku le bɔŋaŋndaŋ biyɔɔ. Kanifuule haaa mi bɔŋaŋndo chuu, lepilɛ kpe nda duau lepum nɔmbɛi cho le bɔŋaŋndo wo ni.”

 O Ikueedɔ niŋ, mi Lɛsta Hihɔŋ Jr. bɛndu kunda cho Kuayakil o kundaa Kuayakanisi Oeste niŋndo dimi aa: “O kunda naa niŋ, puaapiliaa a ndepiliaa a bɔɔbɔɔ nɔ nyɛsɔlaa bɔɔ le. Le hei, ŋ ve nɔla Zoom piondɔɔ le mi kundaa kpede bii bɔŋaŋndo a teleŋ pilɔɔ le. Kanifuule, bɔnɔɔ pila o nɔ ni. Kɛ ŋ mel kɔɔnaa balika le Zoom o pindul naa hoo wo kanifuule, o nɔla mbo chua waŋnda puɛɛ. Ŋ nɔla niŋ miŋ veelu acheleŋnda o bɔŋaŋnda naalaŋ buulaŋ ve lɛ naa maa fondaa cho piɔ le.”

 Tofawɔ vɛlɛ nyɛ Chɔŋsiŋ Muwaŋsa dimi wo. Bɛndu kundaa o cho ni o kundaa Ŋwelele Baluaŋndo, Lusaka, o Sambiaa niŋ. Mbo dimi aa: “Mi puaapiliaa a ndepiliaa a bɔɔbɔɔ dimi lɔɔlɔɔ maa, kɛɛsiaa kɔɔnaa tosa hoo le naa Zoom pindul lo wo tosa miŋ sɔɔŋguu puaapiliaa a ndepiliaa naa ikɛi kpɛɛluŋ. Kɛ i hiou kpou ve, hei tosa miŋ sina kɛsɛ maa Chɛhowa kaala naa nduyɛ maa o buulaŋ a naa.”

 Nyɛsɔlaa cho le wanaa kpundɔɔ komalla malaa wo kɔɔnaa soliŋ kpeku ni le Zoom piondɔɔ le kundalaŋ. O toolula waŋnda yɔŋgu le wali naŋ cho tosaa chieeŋndo balɔɔ silɔ wo niŋ nyɛsɔlaa hoo fula ni. Mi wanaa bɔɔbɔɔ yɔŋgu toolulaŋ ndaŋ o tɛɛŋgii nɛi choo o donate.pr418.com. La nuwali tau a toolula nya cho yɔŋgoo a kɔllo kpou laŋ kanifuule, ŋ cho laŋ soliŋndo kpeku o nɛila yɛyɛlaŋ niŋ le puaapiliaa naa malaa chieeŋndo balɔɔ silɔ.—2 Kɔliŋtiaŋ 8:​14.