Nyɛm Seiyaa Chɛhowaa cho niŋ sɔlaa le pɛɛkoo a Mɛlɛka okɔɔ woŋ ŋ bɔɔbɔɔ o Intanɛtiiyo choo ŋ cho ni. Kɛ fondaŋnda bɔɔbɔɔ o chieeŋndo choo, Intanɛtiiyo nɔ bɔɔ baa. Nduyɛ puaapiliaa naa nɔla ma sɔla ndu le. Apum cho o fondaŋnda Intanɛtiiyo kiolu chuɛi chuɛi laŋ. Apum yɛ, Intanɛtii nda nɔ wo niŋ lapi le. Nduyɛ, a bɔɔbɔɔ nɔ ndu kposoŋ te.

 Kɛ puaapiliaa a ndepiliaa bɔɔbɔɔ nɔla niŋ hau ma hivi yaula cho o Intanɛtiiyo choo laŋ o nyɛm ndaŋ mapuuloŋ niŋ, mi Intanɛtii ve bɛɛ o fondaŋ nda cho wo le. Vɛɛ keŋ yɔŋnuŋ yɛ?

 Kɔɔnaa cho yɔŋndo kɔfu pɔmbɔɔ o kundala Intanɛtii bɔɔ cho le laŋ, ma veelu ndu aa JW Box. O nɔ nyɔɔ pum leniŋ o nda pendu le Intanɛtiiyo yɔŋgoo wo. Mɛɛ nda pendu kɔfoo hoo, mi Kunda Cho Kɔmpitɛilaŋ Hɔlteŋ o Bɛtɛɛllo tosa wallo lechoo. Okoŋ, ma hivi vidueilaŋ a yaula cho o jw.org laŋ leniŋ. A pendu kɔfu kɛ kɛ kaniŋ mapuuloŋ dalalaŋ 75.

 Te kundaa sɔla pɛ kɔfoo hoo, a nɔla ma kɛsi ndu o Toŋgo leMasaa ma mɛndul okoŋ, mi puaapiliaa a ndepiliaa hivi vidueilaŋ, a yaulaŋ o nyɛm ndaŋ mapuuloŋ niŋ. Wanaa nɔ bɛɛ nyɛm mapuuluŋ paandoŋ nda ɔɔ ŋ kindu baa le woŋ nɔla ma sɔla Intanɛtiiyo o kɔfoo hoo. Kɛ te o wa pɛ ma yɔŋ kɔfoo hoo naa Intanɛtii cho le wa, vɛɛ nda looku yɛ ma sɔla yaulaŋ a vidueila sɛnɛila cho wa fulaa laŋ. Teleŋ o teleŋ, mi lɛuve hivi nyɛm sɛnɛŋ fula o jw.org woŋ o sionduei choo ma yɔŋ nda. Okoŋ, ma hivi o JW Box choo. Sionduei hei i kɛ kɛ baa ndɔɔ wa le kaniŋ mapuuloŋ dalalaŋ 4.

 Vɛɛ JW Box mala yɛ niŋ puaapiliaa naa? Mi Netaŋ Adulandua, o cho Koŋgo Dɛmɔkilatik wo dimi aa: “I kindiŋ niŋ teleŋnda bɔɔbɔɔ le vidueilaŋ ndaŋ hivioo ‘Oo Chɛhowa, . . . Num Ya I Tiindaŋ Ni’ a La Loonuŋ Nyɛ Yɔŋnuŋ a Lanɔɔ Lɔtu Wo, kɛ I tiuba le. Mi hei tɛɛmbuu ya kɔllo. Kɛ suŋ suŋ niŋ, I tiuba mi hivi vidueilaŋ ndaŋ o foŋ nuu choo nduyɛ, hei mala naa kalaŋ chuauwa le chuauwaa naa pɛɛkoo nyɛkɛndɛi.”

 Mi puaapilɛnɔ pilɛ, o mala le JW Box handɔɔ o kundalaŋ niŋ Naŋchiiliaa wo dimi aa: “Puaapiliaa che JW Box maa ke teŋgeŋ fula Chɛhowa o ba wo o cho ni. A cho bɔɔ a kɔl kɛndɛ kanifuule, a nɔla niŋ ma hivi yaulaŋ a vidueila cho o Kɔfu Nyɛm Waliŋ Naŋ Pɛɛku Waŋnda Woŋ niŋndaŋ bɛɛŋ bɛɛŋ.”

 A yɔŋ niŋ kɔfulaŋ ndaŋ o puaapiliaa lo Afilika, Osieeniaa, a Amɛlika Batouwo hiouwɔɔ 1,700. Kɛɛsiaa cho le laŋ chɔɔloo yɔŋndo o kundala bɔɔbɔɔ niŋ. Kuɛɛ nyɛsɔlaa cho yɛ fulaa le nyɔɔŋ muŋ piondɔɔ? O toolula nya cho yɔŋgoo o donate.pr418.com. a o nɛila cheleŋ niŋndaŋ o cho fulaa ni. La nuwali tau le toolulaŋ ndaŋ yɔŋgoo a kɔl nyaa kpou.