Seiyaa Chɛhowaa cho wali Mɛlɛkaa tosaa o lɛŋnde niŋ hiouwɔɔ 200. Nduyɛ, ma mala vɛlɛ chaaŋaa ndaa waŋchieeya te a wa pɛ o bahawɛiyo niŋ. Kɛ o lɛŋnde hei niŋ, 35 kinɛi nɔla ni mii soliŋ toolula ndalaŋ kpeku le bahawɛila ndalaŋ solioo. Kuɛɛ lɛŋii tuɛi sɔla yɛ niko nyɛsɔlaa le bahawɛila ndalaŋ solioo.

 Mi Dialii Kuumbaŋ Choo Seiyaa Chɛhowaa kindiŋ le sinaa nyɛm puaapiliaa ndaa kpou yeema le pɛɛkoo a Mɛlɛka okɔɔ woŋ. Ma suukaŋ vɛlɛ a bahawɛila cheleŋ nda nɔ laŋ okɔɔ. Ma kɛsi nyɛsɔlaa le bahawɛila teŋgeŋ teŋgeŋndaŋ solioo nduyɛ ma soliŋ ndu kpeku nyɛkɛndɛi. Te Dialii Kuumbaŋ Choo Ve yɔŋ pɛ lɛuve nyɛsɔlaa ma soliŋ ndu kpeku mbo lo, a yɔŋ ndu o lɛŋii nɔ bahawɛi nyɛsɔlaa ve niŋ. Kɛɛsiaa hoo chɛlaŋ a nyɛ Kilisiɔŋnda o wɔsiŋ kɛmɛ tasoŋ niŋ ndaa tosa le chaaŋaa ndaa malaa wo. Mi ‘waŋnda fau ndaa sɔla malaa kpeŋ kpeŋ.’ (2 Kɔliŋtiaŋ 8:​14) Mi Kilisiɔŋaa ndaa nɔ tau wa ndaa mala a nɔ tau le wa.

 Vɛɛ kɔllo wa yɛ puaapiliaa sɔla niŋ malaa hoo lɛuwoŋ o ba wa? Le taamaseliiyo, o Taŋsaniaa niŋ, o cho suɛi bɛɛŋ le mi wanaa bɔɔbɔɔ sɔla o diaa o paaleŋ niŋ te. Ma soliŋ nyɛsɔlaa lɛuwoŋ yɔŋ nda wo kpeku le Toŋgo leMasaa toosiaa le Kundaa Mafiŋka. Mi kundaa poonyiaa aa: “Chɔŋ a teleŋ nda toosiaa Toŋgo naa leMasaa wo, wanaa huŋ o bɔŋaŋnda naalaŋ nda handuŋ niŋ lechoo. Ŋ mel kɔɔna Chɛhowaa a puaapiliaa naa chieeŋndo balɔɔ silɔ balikaa tau le toolula ndalaŋ. Kanifuule, laŋ la tosa ni miŋ wa fonda kɛndɔɔ hoo tueiyɔɔ yeela le Mɛlɛka piɛiyo.”

 Naa Kolonaa hoo tosa mi bahawɛi nyɛdiaa komal puaapiliaa naa o Sili Laŋka niŋ. Imala Fanaŋndo nda po ndɔ pɔmbɔɔ Inɔsh cho o waŋnda haa tɛɛŋ. Kɛ ŋ mel Mɛlɛka balika kanifuule, toolula fula o lɛŋii cheleŋ niŋndaŋ la tosa ma sɔla mala nda yeema wo. Ma poonyiaa o yau nda toosiaa wo choo aa: “Ŋ mel puaapiliaa balika le mɛɛ nda chɔm naa kaalaa o teleŋ kala kalaa hoo niŋ yɛ. Ŋ naŋ bɔɔ kɔl le waa o yuŋgoo hoo niŋ. Nduyɛ ŋ cho hiouwɔɔ lachi a piɛileŋ le mi Chɛhowa mala puaapiliaa naa chieeŋndo balɔɔ silɔ o palɛi mɛɛlɛi hei niŋ.”

 Ba o ba puaapiliaa a ndepiliaa naa wa, ma naŋ kɔl tau le acheleŋnda kioo nyɛm nda nɔ woŋ. Le taamaseliiyo, mi Inɔsh toosiaa kɔfu pɔmbɔɔ le mbo wa toolulaŋ malɔɔ leniŋ, le halikpeŋ mbo mala yuŋgula cho o bahawɛiyo niŋ ndaŋ. Mi Kuadalupe Avalesi cho Mɛsiko wo bɛɛ chɔm yeemɛi waa naa le waŋnda malaa. O fonda o cho wo, a paawa waŋnda o bɔɔ le. Nduyɛ lepum, a yala nda paawa le. Kɛ a koŋ kpou, mbo yɔŋgu tooloo a nyɛ pɔmbɔ o sɔla wo. Mbo poonyiaa aa: “I mel bɔɔ Chɛhowa balika le kɛndɛi nduɛi a kaala o chɔm ya teleŋ o teleŋ ndo. I sina maa a cho toolula nilaŋ handɔɔ o toolula wanaa cheleŋ choo le puaapiliaa niaa cho o bahawɛiyo niŋnda malaa.”

 Mi lɛuwuŋ yɔŋ nyɛsɔlaa o lɛŋii bahawɛiyo cho ve niŋndoŋ bɛɛ naŋ kɔl tau. Mi Aŋtoni Kavalo, o cho waŋndo opilɛ le wanaa chua chilaŋ o lɛuve Bilasil la dimi aa: “Le wɔsiŋ bɔɔbɔɔ, lɛŋii cheleŋ naŋ tiindaŋ ni le naa tooloo a nyɛsɔlaa le wallo o lɛŋnde naaleŋ niŋ. Mi toolu naŋ wa hoo sɔlaa wo tosa mi hiouwɔɔ lachioo yɔŋnuŋ tau o lɛŋnde naaleŋ niŋ. Kɛ suŋ suŋ niŋ, ŋ nɔ lɛ bahawɛi nyɛsɔlaa tau maa paandu le nduyɛ, ŋ cho niŋ pɛŋ lɛŋii cheleŋ malaa. Puaapiliaa naa che niŋ wali dimiaa yooŋgu kɛndɔɔ hoo maa nyɛ cho tosaŋndo o chieeŋndo choo kpou wo o cho ni. Nduyɛ a sina maa mɛɛ nda cho buɛiyaa Chiisuaa yɛ, nda bɛɛ nɔ ma soliŋ sala le ndu tooloo.”

 Vɛɛ Seiyaa Chɛhowaa nɔla yɛ ma mala puaapiliaa a ndepiliaa ndaa cho o bahawɛiyo niŋnda? A cheŋ dɔɔ ko ma yɔŋ kanioŋ sakpo o lɛuwuŋ cheleŋ lo le. Kɛ ma yɔŋgu tooloo le wali cho tosaŋndo chieeŋndo balɔɔ silɔ wo. A wou toolulaŋ ndaŋ o kɔfu cho o kundaa niŋ le wali cho tosaŋndo o chieeŋndo choo kpou wo ɔɔ o donate.pr418.com. Miŋ naŋ kɔl tau te ŋ sɔla pɛ toolulaŋ ndaŋ nya o ba.