1. O yɛɛ choo wanaa bɔɔbɔɔ handu yɛ hau kɔllo?

 A CHE niŋ pa maa wanaa bɔɔbɔɔ buulaŋ hau a ndapila okɔɔ mbo hiau mɛɛ nda buulaŋ a acheleŋnda yɛ? Le tamaseliiyo, mi wanaa bɔɔbɔɔ soliŋ intanɛtiiyo kpeku le pɛɛlɔŋndo a le chɔmndo batiuwaa nda sɔla o yoomu ndaa niŋndo. Kɛ waŋnda nyɛɛmbɔ koni ke hau Chɛhowa Mɛlɛka bɛɛle o nɔ mbo sɔla leŋ ni. O buŋgɛi hei niŋ, ŋ cho pɛɛku nyɛ o sim le Chɛhowa bɛɛleŋ kioo wo, nduyɛ a nyɛ nyindu naa le ndi tosaa wo. Ŋ cho vɛlɛ pɛɛku mɛɛ naŋ ke Mɛlɛka bɛɛle o nɔ mbo sɔla leŋ yɛ, vɛlɛ a mɛɛ o cho tosa mi diola ndɔlaŋ la sɔla bɛɛleŋ o chilaŋ niŋ yɛ.

YƐƐ O SIM YƐ LE CHƐHOWA BƐƐLEŊ KIOO?

2. Vɛɛ Chɛhowa chɔm yɛ kpaaya ndɔɔ o Pembii Sanai Ve? (Tofa vɛlɛ o kɔɔ.)

² Yɛɛ cho yɛ bɛɛleŋ? O Baabuiyo niŋ, diomndo hoo “bɛɛleŋ” sim le nyɛ o nyɛ tosa mi waŋndo sɔla kpiiliaa. Mɛɛ Chɛhowa soli waŋnda Isɔluɛi o chɛleŋ niŋ Ichipi, teleŋ biŋgi okoŋ kɔɔli mbo chɔm mɛɛ o cho Mɛlɛka kpaaya bɛndu yɛ. Yiyaŋndɔ a hei okɔɔ: Mɛɛ Isɔluɛiya o miiliɔŋndaŋ niŋ chuuŋgiaŋ Mɛlɛka lachi o Pembii Sanai Ve bɛŋgu, o lepilɛ niŋ kpe mi yumbu yumbu piimiɛiyo kumbu pembei bolleŋ. Mi lɛŋndeŋ le nyiiya tau, nyɛ ŋualalɛi ŋualalɛiyo wa kiolioo, taŋndaŋ ma wa deŋioo, nduyɛ mi buloo suaa choo choo kpeleŋ. (Ɛso. 19:​16-18; 24:17; Sam 68:8) Yiyaŋndɔ mɛɛ kɔndɔfillo ndoo bii Isɔluɛiya haa yɛ mɛɛ Chɛhowa soliŋ kpaaya ndɔ bɛndoo kpeku.

3. Yɛɛ o sim yɛ le Chɛhowa bɛɛleŋ kioo?

 ³ Kɛ baa naa waŋnda chieeya nɔla pa miŋ ke Chɛhowa bɛɛleŋ? Ei, ŋ nɔla. Nɛiyo opilɛ o naŋ ke Chɛhowa bɛɛleŋ ndo cho acheleŋnda dimullo a kpaaya ndɔ bɛndoo vɛlɛ a suliŋnda ndɔla kɛndɛlaŋ okɔɔ ni. Miŋ ke Mɛlɛka bɛɛleŋ te ŋ saŋgala ndu pɛ le mɛɛ o mala naa miŋ sɔla batiuwaa o sɔɔŋ niŋ yɛ. (Aisa. 26:12) Masaa Deeve cho tamaseliiyo opilɛ o tosa mi Chɛhowa sɔla bɛɛleŋ ndo. Mɛɛ Deeve wa piɛileŋ o Chɛhowa lo Isɔluɛiya kpou o hɔl, mbo dimul Mɛlɛka aa: “Oo Chɛhowa, a cho Mɛlɛka kpaaya bɛndu. A nɔ tɔɔ, bɛɛleŋ, nduyɛ naŋɔɔ numndo cho bɔɔ. Kanifuule, nyɛ o nyɛ cho o choo choo niŋ a o lɛŋndeŋ choo, le num ŋ cho ni.” Mɛɛ Deeve chii piɛile ndɔleŋ “mi [Isɔluɛiya] kpou saŋgala Chɛhowa.”—1 Kolo. 29:​11, 20.

4. Vɛɛ Chiisu ndoo ke yɛ Chɛhowa bɛɛleŋ?

⁴ Teleŋ Chiisu wa o lɛŋndeŋ choo wo, mbo ke Finya ndɔ bɛɛleŋ mɛɛ o chɔm kpendekele maa ndu mala ndu ni mbo tosa kaamaalaŋ. (Maki 5:​18-20) Mi Chiisu ke vɛlɛ Finya ndɔ bɛɛleŋ a mɛɛ ndoo suaa o waŋnda lo a Finya ndɔ okɔɔ yɛ, vɛlɛ a mɛɛ ndoo bii acheleŋnda yɛ. Mbo tosa hei teleŋ pilɛ mɛɛ o wa waŋnda pɛɛkoo o chiɛi Chuuwa piɛi Mɛlɛka wo niŋ. Chua nyina wɔɔŋndo wa kɔɔli le wɔsilaŋ 18 wo wa waŋndo opilɛ o waŋnda haa tɛɛŋ. Mi nyina wɔɔŋndo bɛviaa ndu ndoo nɔla lɛ mbo sim te. Nuawɔ se suɛi imɔnɔ! Mi nyɛiye bii Chiisu okoŋ mbo sɔɔŋguu ndu ikɛi, mbo suaa o ndu lo o nɛi lebɛɛ niŋ. Mbo dimul ndu aa: “Chuaa, naa numndo seŋgu.” Mbo handu ndu balaŋ choo, nduyɛ o lepilɛ niŋ kpe mi chuaa sim sakpo “mbo kandu Mɛlɛka saŋgalaa.” O wa a kɔl kɛndɛ tau mɛɛ Chɛhowa tosa mbo siaŋgu. (Luku 13:​10-13) Chuaa hoo ndoo nɔ sabu sɔviɔɔ le Chɛhowa saŋgalaa, nduyɛ lende o tosa ni.

YƐƐ NYINDU YƐ NAA LE MIŊ KE CHƐHOWA BƐƐLEŊ?

5. Ɔɔ sabula naŋ nɔ le Chɛhowa bɛɛleŋ kioo laŋ?

⁵ Miŋ saŋgala Chɛhowa kanifuule ŋ nɔ bɛɛle yiŋgoloŋ ndeŋ le ndu. Ŋ nɔ sabulaŋ tau le ndu bɛɛleŋ kioo. Chɛhowa nɔ kpaayaa le mbo tosa nyɛ o nyɛ o yeema pɛ, nduyɛ fɛɛŋ bɛɛ o saŋga le. (Sam 96:​4-7) Miŋ che taasi ndɔ bɛndoo kpendekele o nyɛm o toosiaa woŋ niŋ. Ndu ke naa yoomoo ni, vɛlɛ a nyɛ o nyɛ mala naa le miŋ wa yoomu. (Sɔɔŋ. 4:11) Mbo chɔm lo lechoo wo. (Sɔɔŋ. 15:4) Mbo sɔla batiuwaa o nyɛ o nyɛ o wa pɛ tosaa niŋ, nduyɛ mbo peelu buŋgaŋ ndɔŋ kpou. (Chs. 23:14) Le saboo hoo Chɛluimaya wana suaa le Mɛlɛka wo dimi a Chɛhowa okɔɔ niŋ aa: “O wanaa taasiaa cho o lɛŋnde niŋnda tɛɛŋ vɛlɛ a masɛi ndɛi kpou, wana o wana cho maa num te.” (Chɛl. 10:​6, 7) O kpeekpei niŋ, ŋ nɔ sabula sɔvɛlaŋ tau le Finya naa o choo choo niŋ bɛɛleŋ kioo. O cho ko bɛɛleŋ te naŋ nɔ le Chɛhowa le, kɛ ŋ kaala ndu.

6. Le sabu yɛɛ naŋ kaala yɛ Chɛhowa?

⁶ Miŋ saŋgala Chɛhowa kanifuule ŋ kaala ndu. Ŋ tofaŋndɔ suliŋnda kɛndɛla Chɛhowa nɔ laŋ, la tosa miŋ kaala ndu laŋ. O nɔ nyɛiye a kɛndɛi. (Sam 103:13; Aisa. 49:15) Te ŋ wa pɛ a kɔl tambɛiyo, mi ndu bɛɛ tambu kɔl. (Sɛka. 2:8) Mbo mala naa miŋ sina a ndu okɔɔ, nduyɛ miŋ simnuŋ chaaŋaa nduaa. (Sam 25:14; Walta. 17:27) O tusiŋ, “mbo tunduŋ le mbo tofa choo choo vɛlɛ a lɛŋndeŋ, mbo chua wana nɔ wana malaa le wo o chundoo niŋ mbo simi ndu.” (Sam 113:​6, 7) Sabulaŋ ndaŋ la tosa ni miŋ saŋgala Mɛlɛka naa.—Sam 86:12.

7. Dikeŋnaŋ teŋgeŋ kuɛɛ naŋ nɔ yɛ?

⁷ Miŋ saŋgala Chɛhowa kanifuule ŋ yeema mi acheleŋnda sina ndu. Wanaa bɔɔbɔɔ yeema ma sina tonyaa a Chɛhowa okɔɔ le. Le yɛɛ?  Kanifuule Setana suumiaa kɔlta ndalaŋ sanaa a choola o dimi a ndu okɔɔ laŋ. (2 Kɔl. 4:4) Setana tosa mi waŋnda laalaŋ maa Mɛlɛka kɔl tuuwo Chɛhowa cho ni, o buulaŋ a naa le, nduyɛ maa ndu tosa ni miŋ saŋgaa. Kɛ naa ŋ sina tonyaa a Mɛlɛka naa okɔɔ. Ŋ nɔ dikeŋnaŋndo le miŋ dimul waŋnda a Mɛlɛka suu o cho wo okɔɔ, le halikpeŋ mi nda bɛɛ saŋgala ndu. (Aisa. 43:10) Sam 96 soo a Chɛhowa saŋgalaa okɔɔ. Te ŋ wa pɛ sɔɔŋ pum yaasiaa o bolle Baabuileŋ ndeŋ niŋ, yiyaŋ a nɛila ŋ ke Chɛhowa saŋgala o nɔ mbo sɔla wo okɔɔ.

VƐƐ NAŊ KE YƐ CHƐHOWA SAŊGALA O NƆ MBO SƆLA WO?

8. Ɔɔ nɛiyo opilɛ o naŋ saŋgala Chɛhowa wo? (Sam 96:​1-3)

⁸ Nuawɔ Sam 96:​1-3. Ŋ saŋgala Chɛhowa sanaa a nyɛ naŋ dimi a ndu okɔɔ wo. Bolle Baabuileŋ ndeŋ le cho naa dɛɛniaa le miŋ “solul Chɛhowa chondei,” miŋ “saŋgala diola ndɔlaŋ,” miŋ “dimul waŋnda yooŋgu kɛndɛ ndɔɔ maa ndu cho wana piŋiaa ni,” nduyɛ miŋ “dimul waŋnda o lɛŋnde niŋ a naŋɔɔ ndɔ bɛndoo okɔɔ.” Sɔɔŋ muŋ kpou naŋ nɔ ni miŋ tosa le miŋ saŋgala Finya naa o choo choo niŋ. Buɛiyaa Chɛhowaa o paandoo niŋ ndaa nɔ yeemɛi tau le acheleŋnda dimullo a suliŋnda ndɔla kɛndɛlaŋ, vɛlɛ a sɔɔŋ kɛndɛŋ o tosal nda woŋ kpou okɔɔ. (Daa. 3:​16-18; Walta. 4:29) Vɛɛ naa bɛɛ tosa yɛ nyɛpilɛ koŋ?

9-10. Yɛɛ ŋ pɛɛku yɛ o suɛi yɔŋnaŋii Aŋchɛlina ve niŋ? (Tofa vɛlɛ fotueiyo.)

⁹ Ŋ yaasiaŋndɔ suɛi yɔŋnaŋii ndepilɛnɔ pilɛ o Amɛlika niŋ diolaŋ aa Aŋchɛlina. a Mbo suŋgu le diola Chɛhowa laŋ a dialuŋ fulaa o fondaŋ o wa wallo wo. Le mɛɛ o wa wana sɛnɛiyo o wallo niŋ yɛ, ma nyuna Aŋchɛlina a chaaŋaa nduaa hiŋ sɛnɛiya le ma dimul acheleŋnda a kɔɔlima ndaŋ okɔɔ. Mi Aŋchɛlina chɔm nda fotueilaŋ lapum le tɛɛsiaa nyaale o nɔ le mɛɛ o cho Sei Chɛhowaa yɛ. Kɛ tuupa mi teleŋ ndɔɔ fuuluu le mbo soo, mi chaaŋ ndɔ pilɛ nda tɛɛŋ dimi maa, o tonyaa niŋ nda manda ndu ni. Mbo kandu sɔɔŋ wɔɔŋndoŋ dimioo a Seiyaa Chɛhowaa vɛlɛ a laalaŋnda ndalaŋ okɔɔ. Mi Aŋchɛlina dimi aa: “Mi buulaŋ tau. Yaa yeema mi waŋnda laalaŋ choola o wa dimioo a Chɛhowa okɔɔ laŋ te. Lelaŋ, mi kɛɛsiaa le mi dimul nda tonya cho a Ndu okɔɔ wo.”

¹⁰ Mɛɛ chaŋ ndɔ chii suɛi, mi Aŋchɛlina piɛi chɔchɔ o kɔl niŋ. Mbo dimul ndu o nɛi lebɛɛ  niŋ aa: “Naa ŋiɔɔŋ kɔɔlima piliaŋ kpe naŋ nɔ ni. Ya bɛɛ Seiyaa Chɛhowaa manda ya ni, nduyɛ Sei Chɛhowaa ya cho ni.” Mi che bɛɛ i ve bɛɛŋ bɛɛŋ te, kɛ mi Aŋchɛlina simul kɔl mbo chɔm wanaa nda tosa wallo naapilɛ wa fotueila kɛndɛla o chua o bɔŋaŋnda o bii a chaaŋaa nduaa latulu laŋ. Nduyɛ mbo tɛɛsial nda a laalaŋnda ndɔlaŋ okɔɔ o nɛi lebɛɛ niŋ. (1 Pit. 3:15) Yɛɛ wa yɛ fulamakɔɔlioo? Mɛɛ Aŋchɛlina chii suɛi a laalaŋnda ndɔlaŋ okɔɔ, mi poo hoo pɔlul kɔl. Mbo loonuŋ pɛŋ a sɔɔŋ kɛndɛŋ o pɛɛku Seiya Chɛhowaa o ba woŋ teleŋ o wa o pɔmbɔ wo. Mi Aŋchɛlina dimi aa: “Ŋ nɔ miŋ suŋgu le Chɛhowa. Nduyɛ dikeŋnaŋndo i cho ni le miŋ suŋgu le diola ndɔlaŋ.” Naa bɛɛ nɔ dikeŋnaŋndo le miŋ saŋgala Chɛhowa o yɔŋ bɛɛ mi acheleŋnda ke ndu lebɛɛ le.

11. Vɛɛ Kilisiɔŋaa tonyaa bii yɛ niŋ nyɛ dimiŋ o Sam 96:8 niŋndo dɔwɔɔ o wali niŋ?

¹¹ Nuawɔ Sam 96:8. Ŋ nɔla miŋ saŋgala Chɛhowa a nyɛm sɔvɛŋ naŋ nɔ woŋ. Wanaa cho Chɛhowa piɛiyo o tonyaa choo wa tosa niŋ hei teleŋnda bɔɔbɔɔ. (Polo. 3:9) Le tamaseliiyo, mi Isɔluɛiya yɔŋgu chuuŋgiaa le chiɛi Mɛlɛkaa taŋgullo a le ndu bɛɛndiaa. (2 Ma. 12:​4, 5; 1 Kolo. 29:​3-9) Mi buɛiyaa Chiisuaa ‘soliŋ nyɛm ndaŋ kpeku’ le ndu a kiilaa nduaa malaa. (Luku 8:​1-3) Mi Kilisiɔŋnda o wɔsiŋ kɛmɛ tasoŋ niŋ bɛɛ yɔŋgu chuuŋgiaa le puaapiliaa a ndepiliaa ndaa malaa. (Walta. 11:​27-29) Hau, naa bɛɛ tiuba miŋ saŋgala Chɛhowa te ŋ yɔŋgu pɛ kela naalaŋ a kɔl naa kpou.

12. Vɛɛ kela naalaŋ la chuu yɛ Chɛhowa saŋgalaa? (Tofa vɛlɛ fotueiyo.)

¹² Ŋ tofaŋndɔ suɛi yɔŋnaŋnde ipilɛ miŋ che mɛɛ kela naalaŋ la chuu Chɛhowa saŋgalaa yɛ. O wɔsii 2020 niŋ, mi kona pilɛ chɔm kpundɛ yima bɛnduaŋ ma mal o Simbaabuei niŋndo. Mi waŋnda o miiliɔŋndaŋ niŋ nyau sɛɛŋ le nyɛdiaa lepɛŋndo. Nduyɛ ndepilɛnɔ naa pilɛ wa nda tɛɛŋ diolaŋ Pilisika. Mi Pilisika hiau lachi a yooŋgu kɛndɔɔ dimioo o Kpekedoo a o Chimɛi kɛ kɛ choo. Hali a teleŋ la wayiaa bɛɛ. Le mɛɛ ndoo mal walta ndɔlaŋ mi ndoo kuɛ yooŋgu kɛndɔɔ dimioo yɛ, mi wanaa nda chiɛɛliaŋnda wa ndu mamɔɔ ma dimul ndu aa: “Yiaŋ ma cho num diyɔɔ.” Mi Pilisika mulul nda a tiindaŋndo aa: “Chɛhowa bumba wɔ le wanaa nduaa malaa le.” Nyɔɔ viu bɛɛ le mbo sɔla malaa kɔɔna Chɛhowaa o ba. Kela naŋ yɔŋgu laŋ la tosa ni mi Pilisika sɔla nyɛdiaa a nyɛm cheleŋ ndoo hauba woŋ. Mi kɔndɔfillo bii wanaa nda chiɛɛliaŋnda ma dimul ndu aa: “Kani bɛɛ Mɛlɛka numndo mel num te. Lelaŋ  ŋ yeema miŋ pɛɛku a ndu okɔɔ.” Mi wanaa nda chiɛɛliaŋnda a ŋɔmmɛu kandu kɔlaŋ o bɔŋaŋndaŋ.

13. Vɛɛ kaala naalaŋ la chuu yɛ Chɛhowa saŋgalaa? (Sam 96:9)

¹³ Nuawɔ Sam 96:9. Ŋ nɔla miŋ saŋgala Chɛhowa a kaala naalaŋ. Wanaa soliaa lasalaa ndaa tosa wallo o chiɛi Mɛlɛkaa niŋnda ndaa nɔ ma wa a diandaa o dialloŋ niŋ. (Ɛso. 40:​30-32) Kɛ kaala diandaa laŋ nɔɔ la cho la sɔvɛ mbo hiau diondɔɔ ŋdiallo. (Sam 24:​3, 4; 1 Pit. 1:​15, 16) Baabuiyo dimi maa ŋ nɔ miŋ “soliŋ wanachieeyɛi paanduei lekɔɔ” nduyɛ miŋ wounuŋ “wanachieeyɛi sɛnɛiye.” Hei sim ni maa ŋ nɔ miŋ tosa nyɛ o nyɛ naŋ tiuba le yiyaŋnda wɔɔŋndaŋ fafaŋndo, vɛlɛ a kaala tɛɛmbuu Chɛhowa kɔllo laŋ. Nduyɛ miŋ pɛɛku le yiyaŋndo a sɔɔŋ tosaa o nɛi chɔm maa ŋ cho tamasi Chɛhowa wo tolɔɔ kɔɔli nduyɛ a suliŋnda ndɔla kɛndɛlaŋ ndo. (Kolo. 3:​9, 10) A mala Chɛhowaa, hali wanaa tosa kaala nɔɔlɛilaŋ ma nɔ kɔl tuuwo tau wa bɛɛ, tiuba ma siŋgaŋ nduyɛ ma wounuŋ wanachieeyɛi sɛnɛiye.

14. Yɛɛ ŋ pɛɛku yɛ o suɛi yɔŋnaŋii Chaki ve niŋ? (Tofa vɛlɛ fotueiyo.)

¹⁴ Tofawɔ suɛi yɔŋnaŋii Chaki ve. Le mɛɛ ndoo nɔ kɔl tuuwo nduyɛ mbo wa wana dɛnɛwɔɔŋ bɛndu yɛ, ma ke ndu diolaŋ aa Nyina Wɔɔŋndo. Le dɛnɛwɔɔŋ ndɔɔ, ma kilul ndu yamɛi le piɔmndo sɔlaa. Kɛ a teleŋ Chaki wa chumndo le ma dii ndu wo, mbo chɛl le Baabuiyo pɛɛkoo a puaapilɛnɔ ndoo kua yooŋgu kɛndɔɔ dimioo o chiɛi manyum koŋ niŋndo. Mi che bɛɛ mbo tosa sɔɔŋ wɔɔŋndoŋ tau, kɛ o pɔmpɔmbɔ mbo siŋgaŋ. Mɛɛ teleŋ tiŋ hiou, mbo sɔla yiŋɔɔ mbo simnuŋ Sei Chɛhowaa. Mi Chaki tosa siŋgaŋndaŋ tau. Le hei o paale nda wa ndu diyɔɔ leŋ choo, mi wanaa manda chiɛi manyumndo wa atiŋ tusi mɛmiaŋ mɛɛ nda wa ndu choŋgɔŋndo. Mi po pilɛ tosa wallo o chiɛi manyumndo wo dimi aa: “Chaki wa waŋndo opilɛ o ndoo wɔu mbo hiau wana o wana cho o fondaa hoo wa. Kɛ suŋ suŋ, ndu hiou niŋ naŋɔɔ poloŋ.” Mɛɛ nda dii Chaki, lɔɔ pilɔɔ, mi puaapiliaa miiŋgu le bɔŋaŋ lɔɔ tɛɛŋndo biyɔɔ o chiɛi manyumndo niŋ. Ma komal laŋunɔ dɛnɛ wɔɔŋ cheleŋ ichali le bɔŋaŋndo biyɔɔ le teleŋ tasoo. Yɛɛ nyindu yɛ ndu le hunɔɔ o bɔŋaŋndo? Mi kɔndɔfillo bii ndu le mɛɛ Chaki siŋga kaala ndɔlaŋ yɛ. Nduyɛ mbo yeema mbo sina nyɛ ndu bɛɛ nɔ mbo tosa le mbo piɛi Chɛhowa wo. O kpeekpei niŋ, mi kaala naalaŋ la chuu Finya naa cho o choo choo niŋndo saŋgalaa.—1 Pit. 2:12.

 VƐƐ CHƐHOWA CHO YƐ SUŊ TOSA MI DIOLA NDƆLAŊ LA SƆLA BƐƐLEŊ?

15. Vɛɛ Chɛhowa cho yɛ hunɔɔ suŋ diola ndɔlaŋ dindi? (Sam 96:​10-13)

¹⁵ Nuawɔ Sam 96:​10-13. Sɔɔŋ cho o bolle Baabuileŋ ndeŋ mɛɛlulaŋndo chɔm maa Chɛhowa cho Masa kialu yamaŋ o nɛi sakpoo choo wo ni. Vɛɛ Chɛhowa cho yɛ suŋ tosa mi diola ndɔlaŋ la sɔla bɛɛleŋ? Sanaa a yamaŋ o cho hunɔɔ kiolɔɔ woŋ. O cho suŋ hunɔɔ Babilɔŋ Bɛndoo yamɛi kilul o cho diola ndɔlaŋ nɔɔliaa wo. (Sɔɔŋ. 17:​5, 16; 19:​1, 2) Te waŋnda apum che pɛ mi Babilɔŋ Bɛndoo sɔla tambei, naapum a cho kɛɛsiaa le Chɛhowa piɛiyo a naa latulu. A teleŋ chɔu Amakɛdɔŋ ndo, Chɛhowa cho chieeŋ Setana wo tɛɛmbuu a wana o wana simul ndu ma wa diola ndɔlaŋ nɔɔliaa. Kɛ o cho wanaa kaala ndu ma nɔ yeemɛi le diola ndɔlaŋ bɛɛleŋ kioo wa kpou piŋi. (Maki 8:38; 2 Tɛsa. 1:​6-10) Te Wɔsila Waapilɛ Chiisu cho wa o masaleŋ choo laŋ la fuuluu pɛ o mɛɛlulaŋ, mi tofaa mɛɛlaa hiou pɛ, a boondii keŋ Chɛhowa chii niŋ diola ndɔlaŋ dindi fiou. (Sɔɔŋ. 20:​7-10) A teleŋ koŋ “sinapɛŋgu cho a tɔɔmayɛi Chɛhowa ve okɔɔ wo cho tiu ba o ba fee o lɛŋndeŋ choo, mɛɛ mɛŋndaŋ ma cho nuaa o pee mɛŋma ihɛllo niŋ yɛ.”—Haba. 2:14.

16. Yɛɛ ŋ kɛɛsiaa yɛ le tosaa? (Tofa vɛlɛ fotueiyo.)

¹⁶ Nuawɔ se mɛɛ i wa niŋ suɛi kɔl kɛndɛ bɛndu yɛ, te wana o wana huŋ ke pɛ Chɛhowa bɛɛle cho le diola ndɔlaŋ ndeŋ! Kɛ haaa mi teleŋ koŋ fuuluu, ŋ nɔla miŋ soliŋ nɛi o nɛi kpeku le tosaa nyɛ naŋ tiuba wo le Mɛlɛka naa saŋgalaa. Le suɛi kulle hei kindilaa, mi Dialii Kuumbaŋ Choo Ve hɛli Sam 96:8 le mi le wa bolle Baabuile wɔsi naa le wɔsi 2025. Le dimi aa: “La ke Chɛhowa bɛɛle diola ndɔlaŋ la nɔ mi la sɔla leŋ.”