1. Yɛɛ naŋ nɔ yɛ miŋ tosa le miŋ nɛŋi Chɛhowa kɔl?

 YIYAŊNDƆ a mɛɛ ŋ sinaŋ yɛ te a ke pɛ wana ŋ kaala wo nyɛ sɔvɛ sɔviɔɔ. Ma tambu kɔl tau te o chua pɛ nyɛ koŋ mbo kɛsi ndu inɛ, o soliŋ ndu kpeku le. O baa pilɔɔ choo, ma naŋ kɔl tau te wana koŋ chɔm pɛ balika melaa le nyɛ ŋ ke ndu wo, nduyɛ mbo soliŋ ndu kpeku. Yɛɛ hei pɛɛku yɛ naa? Mi Chɛhowa yɔŋgu Po ndɔɔ le naa baŋaa. Mi Chɛhowa naŋ kɔl tau, te ŋ chɔm pɛ balika melaa le ke sɔvɛ o ke naa hoo wo, vɛlɛ a kaala o chɔm naa wo. Nduyɛ kaalaa hoo nyindu ndu ni mbo ke naa sala baŋaa.—Chɔŋ 3:16; Luom. 5:​7, 8.

2. Yɛɛ naŋ cho yɛ pɛɛku o buŋgɛi hei niŋ?

² Mɛɛ teleŋndo hiau fau, te ŋ mandaŋ te, mi balika melaa naŋ nɔ le sala baŋaa wo kandu tolɔɔ toolo. Nduyɛ te ŋ kɛɛ pɛ le balika melaa chɔmndo le sala baŋaa, i wa ko maa ke sɔvɛ Mɛlɛka ke naa wo naŋ chua ni miŋ kɛsi ndu inɛ, ŋ yiyaŋ lɛ a ndu okɔɔ le. Le hei kpakpalaa, ŋ nɔ miŋ wa teleŋ o teleŋ balika melaa chɔmndo le nyɛ Mɛlɛka nda Kiliti tosa le naa wo. Buŋgɛi hei tiuba mi i mala naa le hei tosaa. Ŋ cho chɔ mɛɛ naŋ sɔla tɔnɔɔ suŋ suŋ o sala baŋaa niŋ yɛ, vɛlɛ a tɔnɔ naŋ sɔla niŋ o chilaŋ niŋndo. Ŋ cho vɛlɛ chɔ mɛɛ naŋ chɔm balika melaa le kaala Chɛhowa chɔm naa wo yɛ, taama taama a boondii Loonuŋyaa hoo.

MƐƐ NAŊ SƆLA TƆNƆƆ SUŊ SUŊ YƐ

3. Ɔɔ nɛiyo opilɛ o naŋ cho suŋ suŋ tɔnɔɔ sɔlaa o sala baŋaa niŋndo?

³ Ŋ cho niŋ tɔnɔɔ sɔlaa o sala baŋaa Kiliti wo niŋ. Le tamaseliiyo, mi Chɛhowa mal naa haki le hakila naalaŋ sanaa a sala baŋaa. I cho ndu kuee le mbo mal naa haki le. Kɛ o nɔ yeemɛi le ndi tosaa. Mi wana ŋchondoo poonyiaa aa: “Oo Chɛhowa, a cho bɔɔ wana kɛndɛ, nduyɛ a cho o bɛɛndiaŋ teleŋ o teleŋ le ma mal haki.”—Sam 86:5; 103:​3, 10-13.

4. Le nɛɛ waa Chɛhowa yɔŋgu yɛ sala baŋaa? (Luku 5:32; 1 Timoti 1:15)

 ⁴ Mi apum yiyaŋ maa a cho a sɔvɛ le mi Chɛhowa mal nda haki le. O kpeekpei niŋ, naa kpou cho a sɔvɛ le mbo mal naa haki le. Mi kiilanɔɔ Pɔɔl dimi maa ‘o cho o sɔvɛ le ma veelu ndu maa kiilanɔɔ le.’ Kɛ, mbo chɔɔlu dimi aa: “Kɛndɛi bɛnduii Mɛlɛkɛi tosa ni mi wa hau nuaa.” (1 Kɔl. 15:​9, 10) Te ŋ wookuŋ pɛ le hakila naalaŋ, mi Chɛhowa mal naa haki. Le yɛɛ o tosa yɛ keŋ? O cho le mɛɛ naŋ suliŋ yɛ le o tosa lende le, kɛ le mɛɛ o kaala naa yɛ. Te a yiyaŋ pɛ maa a cho o sɔvɛ le, loonuŋ maa o cho le wanaa nɔ haki le wa le Chɛhowa yɔŋgu sala baŋaa le, kɛ le wanaa lahakiaa wookuŋ nda.—Nauwɔ Luku 5:32; 1 Timoti 1:15.

5. Baa naa o kɛ kɛ nɔ pa miŋ yiyaŋ maa ŋ nɔ di le mi Chɛhowa tuiinuŋ naa inyiɛɛ? Tɛɛsiaawɔ.

⁵ Naa o kɛ kɛ nɔ miŋ yiyaŋ maa ŋ nɔ di le mi Chɛhowa tuiinuŋ naa inyiɛɛ, le mɛɛ naŋ chii niŋ wɔsiŋ bɔɔbɔɔ o ndu piɛiyo niŋ yɛ le. I cho tonya maa, Chɛhowa puɛɛnuŋ a lo lechoo naa le. (Hibu. 6:10) Mbo ke naa Po ndɔɔ fondo fuu, kɛ o cho nuaa maa paawa le o paawa naa le wali naŋ tosal ndu wo le. Te o yɔŋ pɛ miŋ yiyaŋ maa ŋ nɔ di le mi Chɛhowa tuiinuŋ naa inyiɛɛ, ɔɔ mbo bii naa o nɛi teŋgeŋndo choo, mɛɛ dimioo naŋ wa koŋ ni maa, le fondo fuu Kiliti sɔla piɔmndo ni.—Tuuwɔ Kaleesiaŋnda 2:21.

6. Le yɛɛ Pɔɔl ndoo dɔu yɛ sɛmbɔɔ tau o wali Chɛhowa wo niŋ?

⁶ Pɔɔl ndoo sina maa o suliŋ le mi Chɛhowa tuiinuŋ ndu inyiɛɛ le. Kɛ, le yɛɛ o dɔu yɛ sɛmbɔɔ tau o wali Chɛhowa wo niŋ? O tosa hei le chɔmndo maa o nɔ balika melaa le nyɛiyii Chɛhowa tuiinuŋ ndu ve, vɛlɛ a kɛndɛi bɛnduii o tosal ndu ve. (Ɛfi. 3:7) Maa Pɔɔl, naa bɛɛ nɔ miŋ hiou lachi a Chɛhowa piɛiyo a dialuŋ fulaa, o cho le miŋ sɔla dioo le mbo tuiinuŋ naa inyiɛɛ le, kɛ le chɔmndo maa ŋ nɔ balika melaa le sala baŋaa.

7. Ɔɔ nɛi cheleŋ naŋ sɔla suŋ suŋ tɔnɔɔ o sala baŋaa niŋndo? (Luomaŋnda 5:1; Chemisi 2:23)

⁷ Nɛi cheleŋ naŋ sɔla tɔnɔɔ suŋ suŋ o sala baŋaa niŋndo cho chaŋyɛi kpɛɛluŋnde nɔɔ a Chɛhowa ni. a A mɛɛ naŋ che o buŋgɛi naŋ hiou ve niŋ yɛ, teleŋ naŋ veluŋ ndo chaŋyɛi ve naa tɛɛŋ a Mɛlɛka le. Kɛ sanaa a sala baŋaa, ŋ nɔla miŋ hiou lachi a waa “o kɔl nyulu niŋ a Mɛlɛka,” nduyɛ miŋ sɔɔŋguu ndu ikɛi kpɛɛluŋ.—Nuawɔ Luomaŋnda 5:1; Chemisi 2:23.

8. Le yɛɛ naŋ nɔ yɛ miŋ chɔm Chɛhowa balika melaa le dikeŋnaŋ naŋ nɔ le piɛileŋ ndo?

⁸ Dikeŋnaŋ sɔvɛ bɛndu naŋ nɔ le waa o chaŋyɛi kpɛɛluŋnde niŋ a Chɛhowa wo opilɛ cho piɛileŋ ni. O cho ko piɛile buɛiyaa nduaa piɛi te a chuuŋgiaŋ pɛ naapilɛ leŋ te Chɛhowa tuɛi le, kɛ mbo tuei vɛlɛ piɛile naŋ piɛi o ndu lo a pilɛŋ pilɛŋnda wo. Mi piɛileŋ le tosa miŋ pɛŋgi buulaŋ bɛndoo nduyɛ miŋ sɔla kɔl nyuloo. Kɛ, o cho ko hei le cho tɔnɔ naŋ sɔla le piɛileŋ ndo le. Le nɔla vɛlɛ mi le kindi chaŋyɛi nɛi a Mɛlɛka. (Sam 65:2; Chemi. 4:8; 1 Chɔŋ 5:14) Teleŋ Chiisu wa o lɛŋndeŋ choo wo, mi ndoo piɛi teleŋ o teleŋ kanifuule, ndoo sina maa mi Chɛhowa yaŋ nilaŋ o piɛileŋ, nduyɛ mi piɛile leŋ lee kindi chaŋyɛi o nɔ a Finya ve poŋ. (Luku 5:16) Nuawɔ se mɛɛ i cho suɛi kɔl kɛndɛ le sinaa maa sanaa o sala baŋaa Chiisu wo niŋ, ŋ nɔla miŋ simnuŋ chaaŋaa Chɛhowa wa, nduyɛ pɛŋ miŋ piɛi o ndu lo!

MƐƐ NAŊ SƆLA NIŊ TƆNƆƆ O CHILAŊ NIŊ YƐ

9. Vɛɛ wanaa cho lo lechoo wo chɔm o Chɛhowa lo wa cho yɛ tɔnɔɔ sɔla o sala baŋaa niŋ o chilaŋ niŋ?

⁹ O chilaŋ niŋ, vɛɛ wanaa cho lo lechoo wo  chɔm o Chɛhowa lo wa cho yɛ tɔnɔɔ sɔla o sala baŋaa niŋ? Chɛhowa cho nda yoomu fafɛɛŋndo ke. Mi wanaa bɔɔbɔɔ yiyaŋ maa hei nɔla mi i yɔŋnuŋ te, kanifuule waŋnda chieeya bii niŋ piɔmndo sɔlaa le wɔsiŋ bɔɔbɔɔ. Kɛ, tuu Chɛhowa wo wa le mi waŋnda chieeyaa ndaa wa achal lefafɛɛŋ ni. Te Adam ndoo tosa hakioo le, wana o wana ve yiyaŋ nuaa maa, waa yoomu le fafɛɛŋ cho bɔɔ suɛi kɔndɔfili bɛndu le. Suŋ suŋ, mi che bɛɛ i cho suɛi kala le yiyaŋndo maa ŋ nɔla miŋ wa yoomu lefafɛɛŋ, kɛ ŋ nɔla miŋ laalaŋ hei, kanifuule ŋ sina maa mi Chɛhowa luɛi bɔnɔɔ tau, mɛɛ o soliŋ yoomu Po ndɔɔ kpeku le halikpeŋ mi hei yɔŋnuŋ.—Luom. 8:32.

10. Yɛɛ Kilisiɔŋaa pɔyaŋnda a saa cheleŋnda cho yɛ lehɔl o nɛi?

¹⁰ Mi che bɛɛ o chilaŋ niŋ naŋ cho yoomu fafɛɛŋndo sɔla ni, kɛ Chɛhowa yeema naa miŋ wa yiyaŋndo lechoo suŋ suŋ. Kilisiɔŋaa pɔyaŋnda cho lehɔl o nɛi, le ma huŋ tuei yoomu yeela o choo choo niŋ, nduyɛ ma wa o masaleŋ choo a Chiisu latulu o lɛŋndeŋ choo. (Sɔɔŋ. 20:6) Saa cheleŋnda nɔ tiindaŋndo le ma huŋ wa achal o kpele hɛnɛkiɔɔ niŋ o lɛŋndeŋ choo, naa nyɛ nɛiyaa, a buulaŋ ve niŋ te wa. (Sɔɔŋ. 21:​3, 4) Baa a cho pa waŋndo opilɛ o saa cheleŋnda tɛɛŋ, a nɔ tiindaŋndo le waa achal o lɛŋndeŋ choo lefafɛɛŋ nda? Ŋ nɔ miŋ yiyaŋ maa fanda wanaa cho wa o lɛŋndeŋ choo wa sɔla niŋndo ve niŋ o sɔvɛ maa o wanaa cho wa o choo choo niŋnda sɔla niŋndo le. O kpeekpei niŋ, le waa yoomu o lɛŋndeŋ choo Mɛlɛka ndoo toosiaa waŋnda chieeya ni. Lelaŋ, waa yoomu lefafɛɛŋ o lɛŋndeŋ choo cho tosa miŋ wa a kɔl kɛndɛ tau.

11-12. Ɔɔ salala wa niŋ o kpele hɛnɛkiɔɔ niŋndaŋ lapum, la naŋ cho lehɔl o nɛi le laŋ ndaŋ? (Tofa vɛlɛ fotueilaŋ.)

¹¹ Yiyaŋndɔ a mɛɛ yoomoo wa niŋ a num o kpele hɛnɛkiɔɔ niŋ o lɛŋndeŋ choo yɛ! Buulaŋ ve lɛ niŋ num le ma naa, ɔɔ ma sɔla piɔm te. (Aisa. 25:8; 33:24) Chɛhowa cho hunɔɔ yeemaŋ kpeekpei wana o wana nɔ woŋ peelu. Yɛɛ ŋ nɔ yɛ niŋ yeemɛi le pɛɛkoo a ndu okɔɔ? Baa a yeema niŋ le ma pɛɛku a visiaa okɔɔ, ɔɔ youwa? Baa a yeema niŋ le ma pɛɛku nyɛchaa lɔɔ?  Ɔɔ a yeema niŋ le ma pɛɛku nyɔɔŋ tuuliaa a laba? O kpeekpei niŋ, yeemɛi wa niŋ le wanaa tuuliaŋ nyɔɔŋ a laba wa, wanaa taŋgulaa a wanaa tosa walta yondolaŋ nda. A tonya, yeemɛi wa niŋ vɛlɛ le malaa a le nyɔɔŋ toosiaa, mɛɛ nyɛdiaa yauwo, nyɛm walloŋ toosiaa, vɛlɛ a lɛŋndeŋ bɛɛndiaa nyɛkɛndɛi cho nuaa yɛ. (Aisa. 35:1; 65:21) Le mɛɛ naŋ cho wa achal lefafɛɛŋ yɛ, a sɔla niŋ teleŋndo tau le nyɛ o nyɛ ŋ yiyaŋ pɛ a ndu okɔɔ tosaa.

¹² Nuawɔ se mɛɛ i wa niŋ suɛi kɔl kɛndɛ yɛ, le wanaa miiŋgu niŋ yoomu wa demullo! (Walta. 24:15) Yiyaŋndɔ a mɛɛ ŋ tuɛi niŋ pɛɛkoo a Chɛhowa okɔɔ yeela yɛ, te a wa pɛ nyɛm bɔɔbɔɔ o toosiaa woŋ mɛɛndaŋndo. (Sam 104:24; Aisa. 11:9) I hiou kpou ve, yiyaŋndɔ a mɛɛ ŋ wa niŋ a kɔl kɛndɛ le Chɛhowa piɛiyo a kɔl iyama walaŋndo yɛ. Baa a yeema pa ma pisi tɔnɔla ŋ sɔla niŋ o chilaŋ niŋndaŋ le “yelelaŋ haki nɛi mɛɛlu le wo tueiyɔɔ yeela?” (Hibu. 11:25) Sako bɛɛ! Salalaŋ ndaŋ la bɛnda mbo hiau sala kɛ kɛ naŋ cho hau soliŋndo. Loonuŋ maa, kpele hɛnɛkiɔɔ o lɛŋndeŋ choo ve niŋ teleŋ o teleŋ tiindaŋ naŋ cho wa lehɔl o nɛiyo le. Kɛ o pɔmpɔmbɔ, o cho simnɔŋ fondaŋ naŋ cho wa achal le lepaa o lepaa wo. Sɔɔŋ muŋ i kɛ kɛ ve yɔŋnɔŋ te, te Chɛhowa ndoo kaala naa tau, mbo yɔŋgu Po ndɔɔ le naa le.

CHƆM BALIKA MELAA LE KAALA CHƐHOWA CHƆM NUMNDO

13. Vɛɛ naŋ chɔm maa ŋ nɔ balika melaa le kaala Chɛhowa chɔm naa wo? (2 Kɔliŋtiaŋ 6:1)

¹³ Vɛɛ naŋ chɔm yɛ Chɛhowa balika melaa le sala baŋaa o ke naa wo? Ŋ tosa hei sanaa a hɛnaŋ ndɔɔ kɛsioo nyɛ tase o yoomula naalaŋ niŋ. (Mat. 6:33) O kpeekpei niŋ, Chiisu vi “le halikpeŋ wanaa cho yoomu wa ve lɛ yoomu le ndapila le, kɛ le wana vi le nda, nduyɛ mbo miiŋgu yoomu wo.” (2 Kɔl. 5:15) Chɛhowa chɔm naa kɛndɛi bɛnduɛi mbo mal naa haki. Te ŋ tosa pɛ nyɛ o nyɛ naŋ tiuba le ndu piɛiyo, ŋ cho chɔm maa ŋ bii bila mɛɛ kpɛ o soliŋ sala le naa yɛ, nduyɛ maa ŋ nɔ balika melaa le ndu.—Nuawɔ 2 Kɔliŋtiaŋ 6:1.

14. Vɛɛ naŋ duau yɛ tiindaŋ naa o nɛila chɔmaala Chɛhowalaŋ niŋ?

¹⁴ Ŋ chɔm vɛlɛ maa ŋ nɔ balika melaa le kaala Chɛhowa chɔm naa wo, te ŋ dɔu pɛ tiindaŋndo o ndu niŋ, nduyɛ miŋ tol nɛila ndɔla chɔmaalaŋ kɔɔli. O nɛi kuɛɛ choo? Te ŋ nɔ pɛ kɛɛsiaalaŋ le tosaa a sukuu naŋ nɔ miŋ tosa wo vɛlɛ a wali suu naŋ nɔ miŋ chɛl lo okɔɔ, ŋ nɔ miŋ sina nyɛ Chɛhowa yeema naa miŋ tosa wo. (1 Kɔl. 10:31; 2 Kɔl. 5:7) Te ŋ dɔu pɛ laalaŋ naa o wali niŋ, mi suɛi naŋ ve kɔl te ve yɔŋnuŋ. Mi laalaŋ naa a chaŋyɛi naŋ nɔ a Chɛhowa ve hiou lachi a kaloo, nduyɛ mi tiindaŋ naa le waa yoomu lefafɛɛŋ chɔɔlu kalu poŋ.—Luom. 5:​3-5; Chemi. 2:​21, 22.

15. Vɛɛ naŋ chɔm yɛ maa ŋ nɔ balika melaa a boondii Loonuŋyaa?

¹⁵ Nɛi cheleŋ cho vɛlɛ o mala naa miŋ chɔm balika melaa le kaala Chɛhowa chɔm naa wo. Ndu cho boondii Loonuŋyaa soliŋndo kpeku le  Chɛhowa chɔmndo mɛɛ kpɛ naŋ nɔ balika melaa le sala baŋaa yɛ ni. O faŋaŋ o kɛɛsiaa tosaa le miŋ wa o Loonuŋyaa, ŋ nɔ vɛlɛ miŋ veelu acheleŋnda le ndu biyɔɔ. (1 Tim. 2:4) Tɛɛsial wanaa ŋ cho veelu wa nyɛ yɔŋnuŋ niŋ a teleŋ Loonuŋyaa wo. A chɔm nda vidueilaŋ ndaŋ o jw.org choo, Le yɛɛ Chiisu Vi Yɛ? a Loonuŋ a Piɔm Chiisu Wo Okɔɔ le nda malaa. Bɛnduaa kundaa nɔ ma veelu wanaa vi ŋdialla o Loonuŋyaa. Yiyaŋndɔ mɛɛ nyaaloo wa o choo choo niŋ a o lɛŋndeŋ choo yɛ, te saa Chɛhowaa luusiaŋnda apum miiŋgu pɛ o saa nduaa choo! (Luku 15:​4-7) A teleŋ Loonuŋyaa, kɛsi kpeleŋndo o wa ko le puaapiliaa a ndepiliaa yilɔɔ le, kɛ taama taama wanaa sɛnɛiyaa hiŋ nda, ɔɔ a chua niŋ teleŋ vilɛi le Loonuŋyaa biyɔɔ wa. Ŋ nɔ miŋ tosa a sabu ma sinaŋ nyɛkɛndɛi.—Luom. 12:13.

16. Le yɛɛ naŋ nɔ yɛ miŋ chɔɔlu tosa tau o wali dimiaa yooŋgu kɛndɔɔ niŋ a boondii Loonuŋyaa?

¹⁶ Baa a nɔla pa ma chɔɔlu tosa tau o Mɛlɛka piɛiyo niŋ a boondii Loonuŋyaa? Nɛi sɔviɔɔ opilɛ cho koŋ ni le chɔmndo balika melaa le nyɛ o nyɛ Mɛlɛka nda Chiisu tosal naa. Mɛɛ naŋ yɔŋguŋ fau o wali Chɛhowaa niŋ yɛ, lende koni naŋ cha mala ndɔɔ o yoomu naa niŋ ni, nduyɛ mi keŋ tosa mi tiindaŋ naŋ nɔ o ndu niŋ ndo chɔɔlu kalu poŋ. (1 Kɔl. 3:9) Tosa a sabu ma tol kɛɛsiaa cho o yau tɛɛsiiyo, vɛlɛ a o yau wali bɔŋaŋndo niŋ le diomndaŋ veeloo o Baabuiyo niŋ a boondii Loonuŋyaa wo. Naapum a hɛli bolii Baabui keŋ ipum le pɛɛkoo a ndi okɔɔ.

17. Yɛɛ nɛŋi yɛ Chɛhowa kɔl lo? (Tofa vɛlɛ kɔfoo hoo, “ Nɛila Naŋ Chɔm Maa Ŋ Nɔ Balika Melaa le Kaala Chɛhowaa Wo.”)

¹⁷ Naapum bahawɛila numndaŋ la chɛl niŋ num le tosaa nyɛ o nyɛ naŋ soo a ndu okɔɔ o buŋgɛi hei niŋndo le. Kɛ loonuŋ maa Chɛhowa tuu nyɛ ŋ cho tosaa wo a o acheleŋnda cho tosaa wo le. O sina nyɛ cho num o kɔl lo. Mbo naŋ kɔl te o che pɛ mɛɛ kpɛ ŋ nɔ balika melaa o kɔllo niŋ le sala baŋaa, ke sɔvɛ o ke naa wo.—1 Sam. 16:7; Maki 12:​41-44.

18. Le yɛɛ naŋ nɔ yɛ balika melaa le Chɛhowa Mɛlɛka nda Chiisu Kiliti?

¹⁸ Sala baŋaa kinɛi tosa ni miŋ sɔla malɔɔ hakioo le hakila naalaŋ, miŋ nɔ chaŋyɛi a Chɛhowa, nduyɛ miŋ nɔ tiindaŋndo le yoomu fafɛɛŋndo sɔlaa. Maa teleŋ o teleŋ ŋ hiounuŋ lachi a balika melaa chɔmndo le kaala Chɛhowa nɔ le naa wo, o nyindu ndu le naa salalaŋ nda kioo wo. (1 Chɔŋ 4:19) Maa ŋ hiounuŋ vɛlɛ lachi a Chiisu balika melaa chɔmndo, o kaala naa tau nduyɛ mbo yɔŋgu yoomu ndɔɔ le naa wo.—Chɔŋ 15:13.