1. Tɔnɔ yɛɛ naŋ sɔla yɛ le Loonuŋyaa biyɔɔ iwɔsi o iwɔsi?

 KE SƆVƐ bɛndu Chɛhowa ke naa wo cho Po ndɔ kalaa yɔŋndo, mbo huŋ wu le naa ŋwaŋnda chiee ni. (2 Kɔl. 9:15) Le mɛɛ Chiisu vi le naa yɛ, ŋ tiuba miŋ simnuŋ chaaŋaa Chɛhowa wa. Nduyɛ hei ke naa vɛlɛ tiindaŋndo le yoomu fafɛɛŋndo sɔlaa. Ŋ nɔ sabulaŋ tau le Chɛhowa balikaa mello, kanifuule ndu soliŋ Po ndɔɔ sala le naa ni, le mɛɛ o kaala naa yɛ. (Luom. 5:8) Le miŋ loonuŋ nduyɛ miŋ chɔm balika melaa le nyɛ Chɛhowa nda Chiisu tosal naa wo, mi Chiisu dimul naa le miŋ wa loonɔŋndo a piɔm ndɔɔ okɔɔ iwɔsi o iwɔsi.—Luku 22:​19, 20.

2. Yɛɛ naŋ cho yɛ pɛɛku o buŋgɛi hei niŋ?

² Naŋndee, ŋ cho Loonuŋyaa biyɔɔ o Ndaamaa choo, Nyaakuɛiyo 12, 2025. I cho tonya maa naa kpou cho niŋ bɛɛndiaŋndo le miŋ wa o bɔŋaŋndo hoo. Ŋ cho tɔnɔ sɔla tau te ŋ chua pɛ teleŋndo a boondii Loonuŋyaa, le yiyaŋndo a o nyɛ Chɛhowa nda Chiisu Po ndɔ tosal naa wo choo. O buŋgɛi hei niŋ, ŋ cho pɛɛku nyɛ sala baŋaa pɛɛku naa a Chɛhowa, vɛlɛ a Po ndɔɔ okɔɔ wo. Buŋgɛi cho lachi ve cho naa mala le miŋ che mɛɛ naŋ sɔla tɔnɔɔ o sala baŋaa hoo niŋ yɛ, vɛlɛ a mɛɛ naŋ chɔm balika melaa le ndu yɛ.

YƐƐ SALA BAŊAA PƐƐKU YƐ NAA A CHƐHOWA OKƆƆ?

3. Vɛɛ piɔm wana pilɔɔ baŋa yɛ waŋnda o miiliɔŋndaŋ niŋ, o hakioo niŋ a piɔmndo? (Tofa vɛlɛ fotueiyo.)

³ Sala baŋaa pɛɛku naa a sandii Chɛhowa ve okɔɔ. (Ditɔ. 32:4) Vɛɛ hei cho yɛ tonya? Yiyaŋndɔ a hei okɔɔ, le mɛɛ Adam kɛɛ le diikɔŋndo yɛ, miŋ simnuŋ wanaa lahakiaa, nduyɛ miŋ vi. (Luom. 5:12) Le naa solioo o hakiaa niŋ vɛlɛ a piɔmndo, mi  Chɛhowa tosa kɛɛsiaa le mi Chiisu soliŋ sala le naa. Kɛ vɛɛ sala baŋaa wana walaŋndo opilɛ nɔla yɛ mbo baŋa waŋnda o miiliɔŋndaŋ niŋ? Mi kiilanɔɔ Pɔɔl tɛɛsiaa aa: “Le mɛɛ wana pilɛ [Adam] kɛɛ Mɛlɛka diikɔŋndo yɛ, mi wanaa bɔɔbɔɔ simnuŋ wanaa lahakiaa. Lende koni, le mɛɛ wana pilɛ [Chiisu] diikuŋ Mɛlɛka yɛ, wanaa bɔɔbɔɔ cho simnɔŋ wanaa sakpuaa.” (Luom. 5:19; 1 Tim. 2:6) Dimioo Pɔɔl wa ni maa, le mɛɛ wana pilɛ kɛɛ le Mɛlɛka diikɔŋndo yɛ, mi waŋnda kpou simnuŋ wanaa lahakiaa, ma wa piɔmndo sɔlaa. Kɛ le miŋ fula o hakioo niŋ a piɔmndo, mi wana walaŋndo opilɛ diikuŋ Mɛlɛka.

4. Le yɛɛ Chɛhowa kɛɛsiaa le mi chuauwaa Adam nda, a wa ndu diikɔŋ nda hiou lachi a waa yoomu le fɛɛŋ a fɛɛŋ te?

⁴ Baa mɛɛ mi Chiisu ndoo sɔla piɔmndo kpeekpei malaŋ naŋ sɔla pioŋɔɔ? Baa Chɛhowa ndoo tiuba mbo kɛɛsiaa le mi chuauwaa Adam nda, a wa ndu diikɔŋ nda hiou lachi a waa yoomu le fɛɛŋ a fɛɛŋ te? Le naa wanaa lahakiaa, miŋ yiyaŋ maa nɛi sɔviɔɔ wa hoo ni le bahawɛi koŋ solioo. Kɛ hei ndii nɔla mi i chɔm sandii Chɛhowa ve le. Le mɛɛ Chɛhowa cho Mɛlɛka sakpoo yɛ, fɛɛŋ bɛɛ ndoo kɛɛsiaa le haki Adam tosa kpɛsɛkɛɛ wo kumbɔɔ le.

5. Le yɛɛ naŋ nɔ yɛ tiindaŋndo maa Chɛhowa cho nyɛ cho sakpo wo tosa le teleŋ o teleŋ?

⁵ Kɛ te ndoo yɔŋ yɛ mi Chɛhowa ndoo yɔŋgu sala baŋaa le, mi ndo chɛl mi chuauwaa Adam nda hiou lachi a waa yoomu le fɛɛŋ a fɛɛŋ, mi che bɛɛ wanaa lahakiaa nda cho ni? Naapum waŋnda wa yiyaŋ te Mɛlɛka ndoo nɔla niŋ pɛ mbo kelu yamɛi o nɛi sakpoo choo, te sɔɔŋ cheleŋ muŋ fula pɛ. Le tamaseliiyo, baa ndoo kɛɛ niŋ pa le mɛɛla ndɔlaŋ lapum peeloo? Ŋ nɔ miŋ buulaŋ a keŋ okɔɔ le. Le sabu yɛɛ? Mi Chɛhowa tosa suɛi wa ikala le tosaa ve. Mbo soli Po ndɔ pilɔɔ kpe sala. Le hei, ŋ nɔ tiindaŋndo maa, le teleŋ o teleŋ o cho nyɛ cho sakpo wo tosa.

6. Suliŋ sɔvɛ cheleŋ kuɛɛ nyindu yɛ vɛlɛ Chɛhowa le Po ndɔɔ yɔŋndo? (1 Chɔŋ 4:​9, 10)

⁶ Suliŋ cheleŋ, o nyindu vɛlɛ Chɛhowa le Chiisu yɔŋndo mbo huŋ wu le naa wo cho kaalaa ni. (Chɔŋ 3:16; nuawɔ 1 Chɔŋ 4:​9, 10.) Sala baŋaa chɔm naa maa, o cho ko le waa yoomu le fɛɛŋ a fɛɛŋ te Chɛhowa yeema naa le, kɛ o yeema vɛlɛ naa miŋ wa o yuŋgu ndɔɔ niŋ. Yiyaŋndɔ a hei: Mɛɛ Adam tosa hakioo, mi Chɛhowa soli ndu o yuŋgu ndɔɔ niŋ, wanaa cho ndu piɛiyo wa tɛɛŋ. Fulamakɔɔlioo cho ni, naa kpou viluŋ o yuŋgu Mɛlɛkaa niŋ te. Kɛ sanaa a sala baŋaa, Chɛhowa mal naa haki le hakila naalaŋ, nduyɛ mbo wa wanaa dɔu laalaŋndo o ndu niŋ ma wa ndu diikɔŋndo wa kpou lueiyo o pɔmpɔmbɔ o yuŋgu ndɔɔ niŋ. Suŋ suŋ bɛɛ, ŋ tiuba miŋ nɔ chaŋyɛi sɔvɛi a  Chɛhowa, vɛlɛ a puaapiliaa a ndepiliaa naa. A tonya, Chɛhowa kaala naa bɔɔ.—Luom. 5:​10, 11.

7. Vɛɛ saŋga Chiisu sɔla wo mala yɛ naa le miŋ bii bila mɛɛ kpɛ Chɛhowa kaala naa yɛ?

⁷ Le miŋ che mɛɛ kpe Chɛhowa kaala naa yɛ, mɛɛ miŋ bii bila mɛɛ o wa sinaŋndo yɛ, mɛɛ o che Po ndɔɔ saŋgaa. Setana dimi maa wana o wana cho Mɛlɛka piɛiyo, te sɔɔŋ kendu ndu choo pɛ, o nɔla mbo chɔm lo lechoo wo o ndu lo le. Le chɔmndo maa choolaŋ Setana dimi ni, mi Chɛhowa chɛl le mi Chiisu saŋga tuupa mbo sɔla piɔmndo. (Choobu 2:​1-5; 1 Pit. 2:21) Mi Chɛhowa cha waŋnda Chiisu mamɔɔ, mi sovɛiya luaa ndu, nduyɛ ma baŋ ndu o yɔmndo choo. Mi Chɛhowa cha Po ndɔ kalaa piɔm imɔnɔɔ sɔlaa. (Mat. 27:​28-31, 39) Chɛhowa ndoo nɔ kpaayaa le mi ndoo kuuna nyɛ o nyɛ wa yɔŋnɔŋndo. Le tamaseliiyo, mɛɛ wanaa simul ndu wa dimi aa: “Te Mɛlɛka hini kɔl a ndu pɛ, mɛɛ o piŋi wɔ ndu.” Chɛhowa ndoo tiuba mbo tosa mɛɛ nda dimi yɛ. (Mat. 27:​42, 43) Kɛ te Chɛhowa ndoo tosa lende pɛ, sala baŋaa ve fula le, nduyɛ naŋ nɔ niŋ tiindaŋ kɛ kɛ le. Le hei, mi Chɛhowa chɛl le mi Po ndɔɔ biunuŋ saŋgaa haaa a piɔmndo.

8. Vɛɛ Chɛhowa wa yɛ sinaŋndo, mɛɛ o che Po ndɔɔ saŋgaa? Tɛɛsiaawɔ. (Tofa vɛlɛ fotueiyo.)

⁸ Ŋ nɔ miŋ yiyaŋ nuaa maa le mɛɛ Chɛhowa cho Mɛlɛka kpaaya kpou kpou wo yɛ, o sinaŋ nyɛ nɛiyaa le le. Chɛhowa toosiaa waŋnda chieeya a kɔlkaloo le sinaŋndo. Nduyɛ le mɛɛ Baabuiyo dimi maa o velaŋ ndɔɔ niŋ o toosiaa naa ni yɛ, hei chɔm ni maa mi Chɛhowa bɛɛ sinaŋ. Baabuiyo dimi a ndu okɔɔ maa, “mbo tambu kɔllo.” (Sam 78:​40, 41) Yiyaŋndɔ vɛlɛ a bundɛi Ebilaham nda Aase ve okɔɔ. Mi Chɛhowa dimul Ebilaham le mbo soli po ndɔ pilɔɔ kpe sala. (Chɛn. 22:​9-12; Hibu. 11:​17-19) Yiyaŋndɔ mɛɛ Ebilaham wa sinaŋndo yɛ, mɛɛ o heelu muɛi le Aase po ndɔ diyɔɔ. Nuawɔ se mɛɛ Chɛhowa bɛɛ wa sinaŋndo yɛ, mɛɛ o wa Po ndɔ pilɔɔ kpe chɔɔ, teleŋ o wa piɔm imɔnɔɔ sɔlaa wanaa dɛnɛwɔɔŋnda o ba o yɔmndo choo wo!—Tofa vidueiyo hoo o jw.org choo, Tol Laalaŋ Ndaa Kɔɔli—Ebilaham, Pɛl 2.

9. Vɛɛ Luomaŋnda 8:​32, 38, 39 mala yɛ num le chɔɔ mɛɛ kpɛ Chɛhowa kaala num yɛ, vɛlɛ a puaapiliaa a ndepiliaa numnda?

⁹ Sala baŋaa pɛɛku naa maa wana o wana cheleŋ kaala naa, mbo sulaŋ a mɛɛ Chɛhowa kaala naa yɛ le. Hali wanayɛi nɛi naŋ kaala tau ve, ɔɔ chaaŋ naa sɔviɔɔ bɛɛ. (Nuawɔ Luomaŋnda 8:​32, 38, 39.) O kpeekpei niŋ, Chɛhowa kaala naa mbo hiau mɛɛ naŋ kaala naapila yɛ. Baa a yeema pa ma wa achal lefafɛɛŋ? Chɛhowa yeema num ma wa achal mbo hiau bɛɛ mɛɛ ŋ nɔ yeemɛi yɛ. Baa a yeema pa ma sɔla malɔɔ hakioo le hakila numndaŋ? Chɛhowa nɔ yeemɛi le num malɔɔ haki mbo hiau  yeemɛi ŋ nɔ ve. Nyɛ kinɛi o yeema naa miŋ tosa wo cho ke sɔvɛ o ke naa wo chɛlɔɔ ni, miŋ dɔu laalaŋndo o ndu niŋ, nduyɛ miŋ wa wanaa diikaŋ. Sala baŋaa cho ke sɔvɛ chɔm maa, Chɛhowa nɔ kaala yiŋgoloŋndo le naa wo ni. Nduyɛ o chieeŋ sɛnɛiyo niŋ, ŋ cho vɛlɛ chɔɔlu pɛɛku tau a kaala ndɔɔ okɔɔ.—Iki. 3:11.

YƐƐ SALA BAŊAA PƐƐKU YƐ NAA A CHIISU OKƆƆ?

10. (a) Yɛɛ kpeekpei ndoo tɛɛmbuu yɛ Chiisu kɔllo teleŋ o wa piɔmndo sɔlaa wo? (b) Vɛɛ Chiisu dindi yɛ diola Finya ndɔlaŋ? (Tofa vɛlɛ kɔfoo hoo, “ Mi Lo Lechoo Chiisu Wo Dindi Diola Chɛhowalaŋ.”)

¹⁰ Chiisu buulaŋ tau a mɛɛ waŋnda yiyaŋ a Finya ndɔ okɔɔ yɛ. (Chɔŋ 14:31) Mi Chiisu tambu kɔl tau a yiyaŋ wɔɔŋ waŋnda ndaa nɔ niŋ a Finya ndɔ okɔɔ wo kanifuule, a wa ndu diyɔɔ maa wana dɛnɛwɔɔŋ tɛɛmbuu diola Mɛlɛkalaŋ ndo. Le saboo hoo o piɛi ni aa: “Finya nuu, te o bɛnda pɛ, mɛɛ faŋa ya taalaa hoo kuee.” (Mat. 26:39) Mɛɛ Chiisu chɔm lo lechoo wo o Finya ndɔ lo haaa a piɔmndo, mbo chɔm kpendekele maa, nyɛ Setana dimi a Finya ndɔ okɔɔ wo cho tonya le.

11. Vɛɛ Chiisu ndoo chɔm yɛ kaala yiŋgoloŋndo le waŋnda? (Chɔŋ 13:1)

¹¹ Sala baŋaa pɛɛku vɛlɛ naa maa, Chiisu buulaŋ tau le waŋnda chieeya, taama taama buɛiyaa nduaa. (Polo. 8:31; nuawɔ Chɔŋ 13:1.) Le tamaseliiyo, mi Chiisu sina maa sɔɔŋ pum muŋ kiandu niŋ bɔɔ o wali ndɔ dimiaa yooŋgu kɛndɔɔ niŋ, mɛɛ piɔm imɔnɔ o wa sɔla wo cho nuaa yɛ. A koŋ kpou, mi Chiisu hiau lachi a wali ndɔɔ tosaa o lɛŋndeŋ choo, o hendu kɔllo o sɔɔŋ palaŋ muŋ choo le. Kɛ mbo hiau lachi a kɔllo handɔɔ kpou le yooŋgu kɛndɔɔ dimioo, waŋnda pɛɛkoo a nda malaa. O paale o wa piɔmndo sɔlaa leŋ choo bɛɛ, mbo chua teleŋndo le kiilaa nduaa peloŋ pulɔɔ, nduyɛ mbo dimul nda diomnda kɔl dɛɛniaalaŋ  le nda choŋgɔŋndo a nda nɛi chɔmaa kioo. (Chɔŋ 13:​12-15) Okoŋ kɔɔli, teleŋ Chiisu wa o yɔmndo choo wo, mbo chua teleŋ biŋgi le po viinɔ wa ndu ikɛiyo tiindaŋndo kioo. Nduyɛ mbo tosa kɛɛsiaa le ma koma manda kala ndɔ. (Luku 23:​42, 43; Chɔŋ 19:​26, 27) Mi Chiisu chɔm kaala yiŋgoloŋ ndoo nɔ le waŋnda wo, o cho ko teleŋ o wa piɔmndo sɔlaa wo le, kɛ o nyɛ o nyɛ o tosa o yoomu ndɔɔ niŋ, teleŋ o wa o chieeŋndo choo wo.

12. Yɛɛ Chiisu cho yɛ tosaa le naa?

¹² Mi che bɛɛ “lepilɛ kpe” Chiisu vi ni, kɛ o cho wɔ hiouwɔɔ lachi a sɔɔŋ kɛndɔŋ tosaa le naa. (Luom. 6:10) Yɛɛnɛ o cho yɛ tosaa le naa? Sala baŋaa tosa mbo wa hiouwɔɔ lachi a naa nyɛm kɛndɔŋ kioo tau o suŋ suŋndo hoo niŋ. Ŋ yaasiaŋndɔ walta o cho tosaa suŋ suŋndaŋ. Ndu cho Masa naa ni, Masa Bɛndu Wanaa Soliaa Lasalaa, nduyɛ ndu cho kunda leKilisiɔŋndo bolleŋ ni. (1 Kɔl. 15:25; Ɛfi. 5:23; Hibu. 2:17) Ndu cho chilaŋ chua ni le Kilisiɔŋaa pɔyaŋnda a faŋga bɛndoo chuuŋgiaa. Nduyɛ wallo hoo nɔ mbo chuu tuupa mi nyɛ palaa bɛndoo fuuluu o mɛɛlulaŋ. b (Mat. 25:32; Maki 13:27) O cho vɛlɛ tosa a sabu, le mi wanaa laalaŋnda sɔla nyɛm nda pɛɛku a Mɛlɛka okɔɔ woŋ o palɛi mɛɛlɛi hei niŋ. (Mat. 24:45) Nduyɛ teleŋ o cho wa masaa le Wɔsilaŋ Waa Pilɛ wo, o cho hiouwɔɔ lachi a wallo tosaa le yeemaŋ ndaŋ peeloo. A tonya, mi Chɛhowa yɔŋgu Po ndɔɔ le naa.

HIOU LACHI A SƆƆŊ SƐNƐIYOŊ PƐƐKOO

13. Vɛɛ yiyaŋndo mala yɛ num le ma hiou lachi a pɛɛkoo, le kaala Mɛlɛka nda Kiliti nɔ le naa wo.

¹³ A nɔla ma hiou lachi a pɛɛkoo, le kaala Chɛhowa nda Chiisu Kiliti nɔ le naa wo, te a hiou pɛ lachi a yiyaŋndo yiŋgoloŋ o nyɛ nda tosal naa wo choo. Naapum a teleŋ Loonuŋya naŋndee, a nɔla ma veelu diomndaŋ o yaula soo a yoomu Chiisu wo okɔɔ laŋ niŋ, opilɛ ɔɔ laŋ kpou. Kindiŋ le diomndaŋ veeloo o bolii Baabuiye niŋ tau, o teleŋ pilɔɔ bɛŋgu kpe le. Kɛ, o bɛnda ma chɔɔlu teleŋndo chua le yiyaŋndo le sabu naŋ nɔ miŋ kaala Chɛhowa, nda Chiisu wo. Nduyɛ kindiŋ o nɛi o nɛi niŋ le ma chɔm acheleŋnda nyɛ ŋ pɛɛku wo.

14. A mɛɛ Sam 119:97 dimi yɛ, vɛɛ yaasiaa mala yɛ naa, le miŋ hiou lachi a pɛɛkoo a sala baŋaa okɔɔ, vɛlɛ a sɔɔŋ cheleŋ? (Tofa vɛlɛ fotueiyo.)

¹⁴ Te o yɔŋ pɛ maa a cho niŋ o tonyaa niŋ le wɔsila bɔɔbɔɔ, mi kɔndɔfillo wa num lepum, te sɔɔŋ sɛnɛi cheleŋ cho ŋ nɔla ma chɔɔlu pɛɛku a muŋ okɔɔ woŋ, te o hiŋ pɛ a sandii Mɛlɛkɛi, kaala ndɔɔ, vɛlɛ a sala baŋaa. O kpeekpei  niŋ, fɛɛŋ bɛɛ ŋ nɔla miŋ chii pɛɛkoo a sɔɔŋ muŋ okɔɔ, vɛlɛ a ŋ cheleŋndoŋ te. Mɛɛ, yɛɛ ŋ nɔ yɛ ma tosa? Chua teleŋndo le diomndaŋ veeloo vɛlɛ a pɛɛkoo o sɔɔŋ sɔvɛŋ cho o yaula naalaŋ niŋ, miŋ tualnuŋ o Baabuiyo choo woŋ. Te a veelu pɛ diomndaŋ o Baabuiyo niŋ ma bii bila nyɛkɛndɛi le, tosa yaasiaa. Okoŋ ma wa yiyaŋndo a nyɛ ŋ pɛɛku paale leŋ ndo okɔɔ, nduyɛ a nyɛ keŋ pɛɛku num a Chɛhowa, Po ndɔɔ, vɛlɛ a kaala nda nɔ le numndo okɔɔ.—Nuawɔ Sam 119:97.

15. Le yɛɛ i cho yɛ suɛi sɔvɛ le miŋ hiou lachi a sɔɔŋ sɛnɛiyoŋ pɛɛkoo o Baabuiyo niŋ?

¹⁵ Teleŋ o teleŋ ŋ wa pɛ diomndaŋ veeloo o Baabuiyo niŋ ma seeluŋ sɔɔŋ sɛnɛi le yaasiaa tosa le, tambu kɔl le keŋ te. Mɛɛ o dimi niŋ a cho ko maa wana cho kooliiyoŋ nuuviaa wo. Mi wanaa cho kooliiyoŋ nuuviaa wa biunuŋ, ma chua hawɛilaŋ ɔɔ palɛi tau, tuupa ma saaluŋ kooliiye. A koŋ kpou ma lambaŋ nuuviaa, kanifuule a sina maa koolii taaniŋnde bɛɛ cho isɔvɛ le nda. Nyɛ o nyɛ sɛnɛi naŋ pɛɛku pɛ o Baabuiyo niŋ, o cho o sɔvɛ mbo hiau kooliiye. (Sam 119:127; Polo. 8:10) Lelaŋ, biunuŋ ma tol kɛɛsiaa ŋ tosa le diomndaŋ veeloo o Baabuiyo niŋndo kɔɔli.—Sam 1:2.

16. Vɛɛ naŋ tuallɛ tamasi Chɛhowa nda Chiisu wo kɔɔli?

¹⁶ Kindiŋ ma nuuviaa nɛilaŋ le nyɛ ŋ cho pɛɛkoo wo dɔwɔɔ o wali niŋ. Le tamaseliiyo, tol tamasi Chɛhowa wo kɔɔli le sandei chɔmndo, le acheleŋnda biyɔɔ a hɛli nda le. Tol tamasi Chiisu wo kɔɔli le kaala o nɔ le Finya ndɔ a acheleŋnda wo kɔɔli, nduyɛ ma yɔŋguŋ wulee le nyɛ Chɛhowa yeema num ma tosa le chaaŋaa num aa Kilisiɔŋnda malaa, o yɔŋ bɛɛ mi i wa ikala le tosaa teleŋnda lapum. A tual vɛlɛ tamasi Chiisu wo kɔɔli te a wa pɛ acheleŋnda yooŋgu kɛndɔɔ dimullo, le mi nda bɛɛ sɔla dikeŋnaŋndo le ke sɔvɛ bɛndu Chɛhowa ke naa wo chɛlɔɔ.

17. Yɛɛ naŋ cho yɛ yaasiaa o buŋgɛi cho lachi ve niŋ?

¹⁷ Mɛɛ naŋ hiau lachi fau a sala baŋaa biyɔɔ bila, vɛlɛ miŋ chɔm balika melaa le ndu yɛ, lende koni naŋ chɔɔlu kaalaa nɔ le Chɛhowa nda Po ndɔɔ ni. Nduyɛ keŋ tosa mi nda bɛɛ chɔɔlu kaalaa nɔ le naa. (Chɔŋ 14:21; Chemi. 4:8) Lelaŋ, maa ŋ soliŋ nyɛm Chɛhowa cho naa kioo woŋ kpeku, le miŋ hiou lachi a pɛɛkoo a sala baŋaa okɔɔ. O buŋgɛi cho lachi ve niŋ, ŋ cho yaasiaa nɛilaŋ lapum mɛɛ naŋ sɔla tɔnɔɔ o sala baŋaa niŋ yɛ, a mɛɛ naŋ chɔm balika melaa le kaala Chɛhowa chɔm naa wo yɛ.