1, 2. (a) Yɛɛ ke yɛ wanaa Mɛlɛkaa hau nyaaloo? (b) Vɛɛ kalaŋ chuauwaa Kilisiɔŋnda a bɛnduaa mala yɛ feleŋguaa le ma sina nyɛ yiŋɔɔ simndo?

MI BƐNDU kunda pilɛ dimul Kilisofa wa wɔsilaŋ 12 aa, “Chɔŋ a teleŋ nda velu numndo ya sina num ni. Nduyɛ I naŋ kɔl le tueiyɔɔ maa a yeema ma sɔla yiŋɔɔ. I yeema mi nyuna num, ‘Le yɛɛ ŋ yeema yɛ kpeleŋ koŋ chuaa?’” Bɛndu kunda koŋ sina le sabu o nyuna nyuna koŋndo. Miŋ naŋ kɔl tau le chɔɔ feleŋguaa yiŋɔɔ o waalaŋ niŋ iwɔsi o iwɔsi. (Ikilisiaatii 12:​1) Kɛ kalaŋ chuauwaa Kilisiɔŋnda a bɛnduaa o kundaa niŋ yeema ma che le mi feleŋguaa pila tosa kɛɛsiaa a ba nda nduyɛ ma sina le sabu nda yeema yiŋɔɔ wo.

² Miŋ pɛɛku o Baabuiyo niŋ maa yɔŋgɔŋndo a yiŋɔɔ cho yoomu sɛnɛiyo kandɔɔ le Kilisiɔŋnɔɔ ni. Chɛhowa cho yoomu sɛnɛiyo hoo salaa dɔuwɔɔ tau, kɛ nduyɛ, Setana bɛɛ cho wa hunɔɔ a tɔɔndaŋndo. (Pulɔwaa 10:​22; Pitɛ Tasoo 5:​8) Le saboo hoo kalaŋ chuauwaa Kilisiɔŋnda nɔ ni ma chua teleŋndo ma  pɛɛku chuauwaa ndaa le ma sina nyɛ o sim le waa buɛi Kilitioo wo. Te feleŋguaa nɔ wanaa velu nda wa o tonyaa niŋ te, bɛnduaa o kundaa niŋ mala nda a kaalaa le ma sina nyɛ yɔŋgɔŋndo a yiŋɔɔ simndo. (Nuawɔ Luku 14:​27-30.) Mɛɛ ŋ bɛɛndiaŋ le chiɛiyo chiiyo taŋgullo yɛ, lende koni feleŋguaa bɛɛ nɔ ni ma bɛɛndiaŋ tuupa ma yiŋ le halikpeŋ ma piɛi Chɛhowa o laalaŋndo choo “haa o mɛɛlulaŋ.” (Maatiu 24:​13) Yɛɛ mala yɛ feleŋguaa le ma kɛɛsiaa a kɔllo kpou le Chɛhowa piɛiyo lefafɛɛŋ? Ŋ yaasiaŋndɔ.

3. (a) Yɛɛ nyɛ Chiisu a Pitɛ dimi wo pɛɛku yɛ naa a mɛɛ yiŋɔɔ cho nyɛ sɔvɛ yɛ? (Maatiu 28:​19, 20; Pitɛ Tasoo 3:​21) (b) Nyunala kuɛɛ naŋ cho yɛ yaasiaa, nduyɛ le sabu yɛɛ?

³ Feleŋgɔnɔ yeema yiŋɔɔ wo ŋ cho ni? Te o wa pɛ lende, mɛɛ kpeleŋ sɔvɛ bɛndoo pila cho koŋ ni! Bɛɛleŋ pila i cho ni le yiŋɔɔ ma simnuŋ Chɛhowɛinɔɔ. Nyɛ Kilisiɔŋnɔɔ nɔ mbo tosa wo cho koŋ ni, nduyɛ kpeleŋ sɔviɔɔ o cho ni le wanaa sɔla niŋ pioŋɔɔ a boondii nyɛpalaa bɛndoo ve. (Maatiu 28:​19, 20; Pitɛ Tasoo 3:​21) Te a yiŋ pɛ, mɛɛ a chɔm maa a chua buŋgɛi Chɛhowa o hɔl le ndu piɛiyo lefafɛɛŋ. A yeema kɛsɛ ma lo o buŋgɛi ŋ chua keŋnde choo. Lelaŋ, nyunalaŋ ndaŋ la cho num mala le sinaa te a bɛɛndiaŋ pɛ le yiŋɔɔ. (1) I suiliŋ pa nyɛkɛndɛi le kɛɛsiaa hoo tosaa? (2) I nɔ pa yeemɛi le ndi tosaa? (3) Baa I sina pa nyɛ yɔŋgɔŋndo o Chɛhowa lo simndo? Ŋ yaasiaŋndɔ nyunalaŋ ndaŋ.

4, 5. (a) Le yɛɛ yiŋɔɔ cho ko le kosuaa le? (b) Yɛɛ o sim yɛ le mi Kilisiɔŋnɔɔ simnuŋ kaasoŋnɔɔ?

⁴ Baabuiyo dimi naa maa mɛɛ ma simnuŋ kosoo ɔɔ ma fuuluu wɔsilaŋ lapum malaŋ ŋ yiŋ te. Pulɔwaa 20:​11 dimi aa, “Chɛlɛkpɔɔ bɛɛ, wana nɔla ma sina wana o cho wo, sanaa a kaa ndɔɔ. Wana nɔla ma sina te o cho wana sandu, nduyɛ mbo wa wana kɛndɛ.” Lelaŋ, chuaambɔɔ bɛɛ nɔla mbo sina suɛi kɛndɛi a iwɔɔŋnde nduyɛ o nɔla mbo yɔŋguŋ o Wana Toosiaa ndu wo lo. Lelaŋ, yiŋɔɔ cho nyɛ sɔvɛ a kpeleŋ kɛndɛ le feleŋgɔnɔ sul kaasoŋnɔɔ o Chɛhowa piɛiyo niŋ nduyɛ mbo yɔŋguŋ o ndulo wo.—Pulɔwaa 20:​7.

⁵ Yɛɛ cho yɛ simnɔŋndo kaasoŋnɔɔ? Kaasoŋyɛi cho a wɔsila waŋndo okɔɔ ɔɔ hindɔɔ ŋdiallo le. Baabuiyo dimi maa wanaa cho kaasoŋnda o Mɛlɛka piɛiyo niŋnda “sina yɛ yɔɔ suɛi naŋ le tosaa ve tɛɛŋ a suɛi niŋ le tosa le ve.” (Hibuluiya 5:​14) Wana cho kaasoŋnɔɔ o Mɛlɛka piɛiyo niŋndo sina i kɛndɛi nduyɛ mbo kɛɛsiaa o kɔl ndɔɔ niŋ le ndi tosaa. Lelaŋ, wana keleŋa ndu hui le suɛi wɔɔŋnde tosaa le. Nduyɛ o cho teleŋ o teleŋ te o yeema mi wana cheleŋ dimul ndu nyɛ bɛnda le tosaa wo le. Lelaŋ, i wa suɛi kɛndɛ le mi feleŋgɔnɔ yiŋndo tosa i kɛndɛi, mi wanaa velu ndu wa ɔɔ acheleŋnda ve bɛɛ ndu ikɛi le.—Tuuwɔ Filipiaŋnda 2:​12.

6, 7. (a) Tɛɛsiaawɔ simulta komal Daaniɛɛ laŋ teleŋ o wa Babilɔŋndo. (b) Vɛɛ Daaniɛɛ chɔm yɛ maa kaasoŋnɔɔ o wa o Mɛlɛka piɛiyo niŋ ni?

⁶ Baa feleŋgɔnɔɔ nɔla pa kɛsɛ mbo chɔm kaasoŋyɛi waa lende? Tofawɔ tamaseliiyo a Daaniɛɛ okɔɔ. Naapum o wa niŋ kpasu teleŋ nda faŋa ndu wanaa nduaa ikɛi ma kua a ndu Babilɔŋndo. O lepilɔɔ niŋ kpe, mbo kɔ wa latulu a wanaa ndaa diikuŋ sawala Mɛlɛkalaŋ te wa. Kɛ ŋ tofaŋndɔ  nyɛkɛndɛi nyɛ ndoo yɔŋnuŋ Daaniɛɛ wo. Teleŋ o wa Babilɔŋndo, ma bii ndu teŋgeŋ. O wa feleŋguaa nda hɛli le wallo o chiɛi lemasaa niŋnda tɛɛŋ. (Daaniɛɛ 1:​3-5, 13) Wana che pɛ maa mi Daaniɛɛ sɔla foofu sɔviɔɔ o Babilɔŋ niŋ o ndoo sɔla niŋ bɛɛ o Isɔluɛi niŋ te wo.

⁷ Lelaŋ, yɛɛ Daaniɛɛ ndoo tosa yɛ? Ndoo chɛl pa waŋnda Babilɔŋ le ndu siŋgaa ɔɔ ma yɔŋyɔla tiindaŋ ndɔɔ? Pesiŋ bɛɛ! Baabuiyo dimi maa teleŋ Daaniɛɛ wa Babilɔŋndo, mbo “kɛɛsiaa maa, o yeema mbo siiŋguu ndu pila o nɔɔlɛi” le. Nduyɛ maa nyɛ o nyɛ chiɛɛliaŋ a piɛile lachoowaleŋ, o cho ndu sɔɔŋguu ikɛi le. (Daaniɛɛ 1:​8, naapila piimiaa ndu diki diki ni) Kaasoŋyɛi chɔmndo kpeekpei cho keŋ ni!

8. Yɛɛ tamasi Daaniɛɛ wo pɛɛku yɛ num?

⁸ Yɛɛ tamasi Daaniɛɛ wo pɛɛku yɛ num? Feleŋgɔnɔ cho kaasoŋnɔɔ o Mɛlɛka piɛiyo niŋndo tosa lamamɔɔ a sɔɔŋ o laalaŋ ndoŋ te, o yɔŋ bɛɛ mbo wa o nyɛ kindilaa bɛŋgu. O ve maa nyaŋgafele le, ba o ba o kuɛ pɛ o siŋga kɔɔleŋ te. O chɔm maa chaaŋ o Mɛlɛka le o cho o Toŋgo leMasaa niŋ, kɛ te o kuɛ pɛ o sukuu o bii chieeŋndo ichaŋya le. Kɛ, mbo lo o tiindaŋ ndɔɔ choo o yɔŋ bɛɛ mi tɔɔndaŋndo komal ndu.—Nuawɔ Ɛfisiaŋnda 4:​14, 15.

9, 10. (a) Vɛɛ feleŋgɔnɔɔ sɔla yɛ tɔnɔɔ te o yiyaŋ pɛ a nyɛ ndoo tosa teleŋ tiindaŋ ndɔɔ sɔla tɔɔndaŋndaŋ ndo? (b) Yɛɛ yiŋɔɔ sim yɛ?

⁹ I cho tonya maa wana o wana cho walaŋ te. Chuaambɔ ni, kaasoŋnɔ ni, kpou ma tosa biondɔŋndaŋ teleŋndaŋ lapum. (Ikilisiaatii 7:​20) Kɛ te a yeema pɛ yiŋɔɔ, i wa suɛi taasi le sinaa mɛɛ kpɛ ŋ kɛɛsiaŋ o kɔl le sawala Chɛhowalaŋ diikɔŋndo yɛ. Nyunaŋndɔ aa, ‘I diikuŋ niŋ pa Chɛhowa o wɔsiŋ hiou woŋ niŋ?’ Yiyaŋndɔ nyɛ num oo tosa teleŋ tiindaŋ numndo sɔla tɔɔndaŋndo wo. Num oo nɔla pa ma kɛɛsiaa nyɛ bɛnda le tosaa wo? Maa Daaniɛɛ, waŋndo dɛɛniaa num niŋ pa le ke ŋ nɔ wo soliŋndo kpeku le chieeŋ Setanaa hoo? Te suɛi waa naa wa pɛ tɔɔndaŋndo le num, a nɔla pa ma sina nyɛ cho hɛnaŋ Chɛhowaa wo?—Ɛfisiaŋnda 5:​17.

 ¹⁰ Le yɛɛ i cho yɛ suɛi sɔvɛ le mulilaŋ sinaa le nyunalaŋ ndaŋ? Kanifuule, la mala num le ma che mɛɛ yiŋɔɔ cho suɛi sɔvɛ bɛndu yɛ. Yiŋɔɔ chɔm acheleŋnda maa a chua buŋgɛi sɔvɛi Chɛhowa o hɔl. A chua buŋgɛi ndu o hɔl maa a cho ndu kaala nduyɛ ma piɛi ndu lefafɛɛŋ a kɔl numndo kpou. (Maki 12:​30) Wana o wana yiŋ pɛ, o nɔ mbo kɛɛsiaŋ o kɔl le loo o buŋgɛi o chua Chɛhowa o hɔl le choo.—Nuawɔ Ikilisiaatii 5:​4, 5.

11, 12. (a) Yɛɛ wana cho yiyaŋndo le yiŋɔɔ wo nɔ yɛ mbo sina? (b) Yɛɛ mala yɛ num le ma che kɛɛsiaa Chɛhowaa le yiŋɔɔ nyɛ sɔvɛ?

¹¹ Baabuiyo dimi maa wanaa Chɛhowaa kpou, feleŋguaa bɛɛ, cho ndu piɛi a ‘kɔllo kpou.’ (Sam 54:​6) Lelaŋ, wana yeema mbo yiŋndo nɔ mbo sina kpeekpei maa yeemɛi nduɛi cho keŋ ni. Hei nɔla mii mala num le yeemɛi numnde mɛɛndaŋndo nyɛkɛndɛi, taama taama te o tonyaa ikɛi nda manda num ni.

¹² Teleŋ ŋ wa chɔnɔŋndo wo, naapum ma cha wanaa bɔɔbɔɔ yiŋɔɔ. Kɛlɛŋgaa chaaŋaa numnda apum a wanaa nya fula kala pilɔɔ wa. Kɛ chua teleŋ numndo, nduyɛ kandu yiyaŋndo nɔɔ maa num bɛɛ sul niŋ le yiŋɔɔ le, ɔɔ num bɛɛ nɔ ma yiŋ le mɛɛ wana o wana fee cho yiŋɔɔ yɛ le. Vɛɛ ŋ looku yɛ sina maa a che yiŋɔɔ mɛɛ Chɛhowa che ndu yɛ? Chua teleŋ numndo le sinaa sabu yiŋɔɔ cho nyɛ sɔvɛ bɛndu wo. A cho sabula kɛndɛlaŋ chɔ tau o buŋgɛi hei niŋ a i cho lachi ve.

13. Vɛɛ ŋ looku yɛ ma sina te num o kɔl kɛɛsiaa ŋ tosa le yiŋɔɔ wo fula ni?

¹³ Nɛiyo opilɛ o ŋ nɔla ma sina maa num o kɔl kɛɛsiaa ŋ tosa le yiŋɔɔ wo chɛŋ ni wo cho piɛile numndeŋ mɛɛndaŋndo ni. Vɛɛ kpɛ ŋ piɛi yɛ o Chɛhowa lo? Yɛɛ kpeekpei ŋ nɔ yɛ ma dimi o piɛile numndeŋ niŋ? Mulilaŋ le nyunalaŋ ndaŋ la cho chɔm mɛɛ chaŋyɛi numnde cho kpɛɛluŋ nya Chɛhowa tɛɛŋ yɛ. (Sam 25:​4) Mi Chɛhowa muli piɛile naaleŋ teleŋnda bɔɔbɔɔ o Baabuiyo niŋ. Lelaŋ, nɛiyo opilɔɔ o ŋ nɔla ma sina kpeekpei maa a yeema ma sɔɔŋguu Chɛhowa ikɛi kpɛɛluŋ le ndu piɛiyo a kɔl numndo kpou wo, cho kɛɛsiaa pɛɛku numndo mɛɛndaŋndo ni. (Chɔɔsuaa 1:​8) Nyunaŋndɔ aa, ‘I cho pa pɛɛku ipilayaa tosaa lɔɔlɔɔ? I cho pa pɛɛku leyuŋgoo tooloo a kɔllo kpou?’ Mulilaŋ le nyunalaŋ ndaŋ la cho num mala le sinaa te kɛɛsiaa numndo i cho le yɔŋɔɔ ni.

14. Tɛɛsiaawɔ teŋgeŋ cho yɔŋgɔŋndo tɛɛŋ a yiŋɔɔ wo.

¹⁴ Feleŋguaa apum sina kpeekpei teŋgeŋ cho yɔŋgɔŋndo tɛɛŋ a yiŋɔɔ wo le. Naapum mi apum dimi maa a yɔŋgu yoomu ndaa o Mɛlɛka lo kɛ a bɛɛndiaŋndɔ le yiŋɔɔ le. Kɛ keŋ nɔla pa mii yɔŋnuŋ? Yɔŋgɔŋndo cho ni, piɛileŋ o Chɛhowa lo nduyɛ ma chua buŋgɛi ndu o hɔl le ndu piɛiyo lefafɛɛŋ. Te a yiŋ pɛ, mɛɛ chɔmndo ŋ cho koŋ acheleŋnda ni maa a yɔŋguŋ niŋ o Chɛhowa lo. Lelaŋ, tuupa ma yiŋ, a nɔ ma sina nyɛ yɔŋgɔŋndo o Mɛlɛka lo simndo.

15. Yɛɛ yɔŋgɔŋndo o Mɛlɛka lo sim yɛ?

¹⁵ Te a yɔŋgu pɛ yoomu numndo o Chɛhowa lo, dimul ndu maa ndu nɔ num ni. Chua buŋgɛi maa ndu piɛiyo cho nyɛ sɔvɛ bɛndoo o yoomu numndo niŋ ni. (Nuawɔ Maatiu 16:​24.) Buŋgɛi ŋ cho keŋ chua Mɛlɛka o hɔl le cho suɛi lamamɔɔ le! (Maatiu 5:​33) Lelaŋ, vɛɛ ŋ looku yɛ sina maa kposoŋ bɛɛ a cho lɛ le numpila le kɛ le Chɛhowa ŋ cho niŋ ni?—Luomaŋnda 14:​8.

16, 17. (a) Chɔmndɔ tamaseliiyo a nyɛ yɔŋgɔŋndo o Mɛlɛka lo simndo. (b) Yɛɛ wana yɔŋguŋ hoo o Mɛlɛka lo wo cho yɛ kpeekpei dimioo?

¹⁶ Ŋ yaasiaŋndɔ tamaseliiyo. Yiyaŋndɔ maa chaaŋ num ke num mɔmbillo nduyɛ  mbo dimul num aa, “Num nɔ mɔmbillo hoo ni.” Kɛ o koŋ kɔɔli, mi chaaŋ num koŋ dimul num aa, “Ya kiiyoŋ cho wa o ba ni. Nduyɛ ya cho wa kɔlaŋ a mɔmbil kalaa ni, kɛ o cho num te.” Vɛɛ ŋ cho yɛ yiyaŋ a ke koŋ? Vɛɛ ŋ cho yɛ yiyaŋ a chaaŋ num ke num koŋ mɔmbil koŋndo?

¹⁷ Te waŋndo yɔŋgu pɛ yoomu ndɔɔ o Chɛhowa lo, mbo dimul Chɛhowa aa, “I cho num yoomu nuu kioo. Le num ya cho ni.” Chɛhowa nɔ dioo le mbo che mi wana koŋ lo o buŋgɛi o chua keŋnde choo. Kɛ te o wa yɛ mi wana koŋ kandu Chɛhowa nilakalulaŋ tosallo, mbo kandu chaŋyɛi nɔɔ tosaa sɔɔ sɔɔ a wana cho Mɛlɛka piɛi le wo? Ɔɔ te o wa yɛ mi wana koŋ chɛl le tosaa baala ke ndu teleŋ bɔɔ le kɔlaŋ o wali pollo niŋ te wo, ɔɔ o tosa mbo bendu bɔŋaŋnda leKilisiɔŋndaŋ daandi daandi wo? Mɛɛ wana koŋ cho nyɛ o chua buŋgɛi Chɛhowa o hɔllo tosa le. Mii simnuŋ maa wana ke koŋ chaaŋ ndɔ mɔmbillo mi ndupila kɛsi kiiyoŋ ndo. Te ŋ yɔŋgu pɛ yoomu naa o Chɛhowa lo, miŋ dimul ndu aa, “Num nɔ yoomu nuu ni, kɛ o cho yapila le.” Lelaŋ, ŋ nɔ miŋ tosa lɔɔlɔɔ nyɛ Chɛhowa yeema wo o yɔŋ bɛɛ mbo ve hɛnaŋ naa le. Ŋ tolnuŋ tamasi Chiisoo kɔɔli. Mbo dimi aa, “Kani fondole, Mɛlɛka o vem ya wo, le nyɛ o hɛnaŋ ndo tosaa ya I chɛŋ ɛchɛnɛ mi huŋ ni. I hiŋ le hɛnaŋ ni ya pila tosa le.”—Chɔŋ 6:​38.

18, 19. (a) Vɛɛ nyɛ Loos nda Kilisofa dimi wo chɔm yɛ maa dikeŋnaŋ huŋ a salalaŋ tau wo yiŋɔɔ cho ni? (b) Vɛɛ ŋ yiyaŋ yɛ a dikeŋnaŋ ŋ nɔ le yiŋɔɔ wo?

¹⁸ Ŋ che kpendekele maa kɛɛsiaa tosaa le yiŋɔɔ cho suɛi lamamɔɔ le. Dikenaŋ bɛndoo pila i cho le yɔŋgɔŋndo o Chɛhowa lo nduyɛ ma yiŋ ni. Feleŋguaa kaala Chɛhowa wa nduyɛ ma sina nyɛ yɔŋgɔŋndo simndo kiisaŋ le yoomula ndalaŋ yɔŋgoo o Mɛlɛka lo nduyɛ ma sɔla yiŋɔɔ le. A tembu kɔl le kɛɛsiaa nda tosa wo le. Mi Loos wa niŋ kpasu mbo yiŋndo dimi aa, “I kaala Chɛhowa, nduyɛ nyɛ o nyɛ ndoo ke ya kɔl hiniaa mi ndoo sulaŋ a Chɛhowa piɛiyo le. I yiyaŋ maa nyɛ o nyɛ cho mi tosa o yoomu nuu niŋ mbo hiau kɛɛsiaa tosaa le mi sɔla yiŋɔɔ le.”

¹⁹ Nduyɛ ɔɔ Kilisofa naŋ soo a ndu okɔɔ o buŋgɛi hei kandɔŋndo wo? Vɛɛ o yiyaŋ yɛ a kɛɛsiaa o tosa le yiŋɔɔ teleŋ o wa wɔsilaŋ 12? Mbo dimi maa o cho bɔɔ a kɔl kɛndɛ le kɛɛsiaa waa lende tosaa. Mbo kandu kɔɔfale lɔɔlɔɔ leŋ tosaa teleŋ o wa wɔsilaŋ 17 wo, mbo simnuŋ buɛi malalaŋndo teleŋ o wa wɔsilaŋ 18 wo. Nduyɛ hau, o cho wallo o Bɛtɛl. Mbo dimi aa, “Kɛɛsiaa sɔviɔɔ pila yiŋɔɔ cho ni. Yoomu nuu cho o piaa cha a kɔl hiniaa le Chɛhowa wallo tosallo a kɔɔna ndɔɔ.” Te a yeema pɛ yiŋɔɔ, a nɔla pa ma bɛɛndiaŋ le keŋ tosaa? Buŋgɛi cho lachi ve cho nyunaa hoo muli.