1. Vɛɛ waŋnda ndaa tosa yɛ wali Mɛlɛkaa chɔŋ o sindɔɔ niŋ?

CHƐHOWA nda Chiisu cho o diompilɔɔ niŋ chɔŋ a teleŋ nyɔɔŋ kandu toosiaŋndo wo. Chiisu fɛŋ Chɛhowa toosiaa tuupa mbo toosiaa nyɛ o nyɛ cheleŋ. Okoŋ, mi Chiisu tosa wallo a ndu latulu. O “wa ndu ikɛi, mɛɛ wana chaa taŋgullo wo wa nuaa waŋndo ikɛi le taŋgullo mbo mɛɛndaŋ wana koŋ yɛ.” (Pulɔwaa 8:​30) Mi buɛiyaa Mɛlɛkaa bɛɛ duau balaŋ diompilɛ le wali ndaa nɔ ma tosa wo. Le tamaseliiyo, mi Nuuwa a yuŋgu ndɔɔ taŋgul dɛndɔɔ diompilɛ. Okoŋ kɔɔli, mi Isɔluɛiya taŋgul tɛndiiyo le Mɛlɛka piɛiyo leniŋ, nduyɛ ndaa nɔla ma bɛɛŋuu ndu le kɔlaŋ a ndu naa cheleŋ. O chiɛi Chuuwa ndaa piɛi Mɛlɛka wo niŋ, mi ndaa soli chondoŋ a nyɛchaa yeelɛiyo lɔɔ diompilɛ le Chɛhowa saŋgalaa. Mi wanaa Chɛhowaa nɔla muŋ kpou tosaa kanifuule, a wa balaŋ dɔuwɔɔ diompilɛ vellaa velle.—Chɛnɛsee 6:​14-16, 22; Nɔmbaa 4:​4-32; Koloniku Tasoo 25:​1-8.

2. (a) A yɛɛ okɔɔ ndaa sina yɛ Kunda leKilisiɔŋndo o sindɔɔ niŋ? (b) Nyunala kuɛɛ naŋ nɔ yɛ le yaasiaa?

² Mi Kilisiɔŋnda o wɔsiŋ kɛmɛ tasoŋ niŋ bɛɛ duau balaŋ diompilɛ. Mi kiilanɔɔ Pɔɔl tɛɛsiaa maa ndaa nɔ kpaaya pilɛ le,  nduyɛ walta yɛ yɛlaŋ ndaa tosa ni, kɛ a wa diompilɛ. Nda kpou Masanɔ ndaa Chiisu Kiliti nda wa tolɔɔ kɔɔli ni. Mi Pɔɔl tuu nda a dialuŋ nɔ faluŋ yɛ yɔɔŋ miŋ wa wallo diompilɛ woŋ. (Nuawɔ Kɔliŋtiaŋ Tasoo 12:​4-6, 12.) Kɛ naa yɛ? Vɛɛ naŋ duau yɛ balaŋ diompilɛ o wali dimiaa yooŋgu kɛndɔɔ niŋ, o kundaa niŋ, a o yuŋgoo niŋ?

3. Yilaŋii kuɛɛ kiilanɔɔ Chɔŋ ndoo che yɛ?

³ O wɔsiŋ kɛmɛ tasoŋ niŋ, mi kiilanɔɔ Chɔŋ cha maalikɛiya a ŋɔmmɛu o yilaŋnde niŋ. A wa bululaŋ hɔŋndo. Mɛɛ maalikɛinɔ ŋuɛɛnoo hɔŋ bulu ndɔɔ, mi Chɔŋ “cha mi luei diandɛi fula o halaa niŋ, mi i del o chieeŋndo choo.” Mi “luei” hei soliŋ kiiye kpeku le sooŋ yiŋgilɛi kpiŋgbi bɛndoo kumbioo. O tasoo, mi kumnde fula o sooŋndo hoo niŋ, okoŋ mi soonuaa a fula o kumii keŋ niŋ. A tosal yɔmnde a tɔlɔɔlaŋ nyɛ o nyɛ le. Kɛ ma tual waŋnda choo “a nɔ taamasi Mɛlɛkaa o ŋtendu le wa.” (Sɔɔŋ Chɔɔmaŋndoŋ 9:​1-4) Mi Chɔŋ sina maa soonuaa bombokoluaa haa nɔla ma mal wolokasioo. A tosa niŋ lende Ichipi o teleŋ Muusioo niŋ. (Ɛsɔdɔɔ 10:​12-15) Soonuaa Chɔŋ che wa a sim le Kilisiɔŋaa pɔyaŋnda a cho niŋ yooŋgu tuu kpɛiyo dimioo a piɛiyii lachoowɛi okɔɔ wa. Nduyɛ waŋnda o miiliɔŋndaŋ niŋ a nɔ tiindaŋndo le waa o lɛŋndeŋ choo wa sɔɔŋguu nda choo le yooŋgoo hoo dimioo. Wallo hoo mala niŋ wanaa bɔɔbɔɔ ma fula o piɛiyii lachoowɛi niŋ a o ba Setanaa bɛŋgu.

4. Wali yɛɛ wanaa Mɛlɛkaa nɔ yɛ ma tosa, nduyɛ o nɛi kuɛɛ choo kinɛi nda nɔla yɛ ma tosa ndu?

⁴ Ŋ nɔ wallo le “yooŋgu kɛndɔɔ” dimioo o waŋnda lo o chieeŋndo choo kpou tuupa mi mɛɛlaŋ la fuuluu. Wali bɛndoo pila cho hoo ni! (Maatiu 24:​14; 28:​19, 20) Ŋ nɔ miŋ veelu wana o wana cho a “bolola vesɛilaŋ” le ma huŋ kol “mɛŋma ke wana yoomoo waŋ.” Koŋ cho ni, wana o wana yeema tonya Baabuiyo biyɔɔ bila, ŋ nɔ miŋ pɛɛku ndu tonya koŋ. (Sɔɔŋ Chɔɔmaŋndoŋ 22:​17) Le miŋ tiuba le hei tosaa, mɛɛ miŋ wa a ‘mɔɔsaa naa pilɛ’ nduyɛ miŋ dɔu balaŋ diompilɛ vellaa velle o kundaa niŋ.—Ɛfisiaŋnda 4:​16.

5, 6. Vɛɛ naŋ nɔ yɛ diompilɔɔ o wali dimiaa yooŋgu kɛndɔɔ niŋ?

⁵ Le mi yooŋgu kɛndɔɔ hoo komal wanaa bɔɔ, ŋ nɔ miŋ wa a kɔɔnaa nyɛkɛndɛi o wali naa dimiaa yooŋgu kɛndɔɔ niŋ. Nɛi chɔmaa naŋ sɔla o kunda leKilisiɔŋndo niŋndo mala naa ni le hei tosaa. Te ŋ chii pɛ bɔŋaŋ wali pollo biyɔɔ, miŋ kuɛ o bɛɛla waŋnda le nda yooŋgu kɛndɔɔ dimullo a Masale Mɛlɛkaleŋ okɔɔ. Miŋ ke nda vɛlɛ yaula cho a Baabuiyo okɔɔ laŋ. Nduyɛ pɛŋ, ŋ yɔŋgu niŋ yaulaŋ ndaŋ o miiliɔŋndaŋ niŋ chieeŋndo balɔɔ silɔ. Lepum, ma dimul naa le miŋ tosa wali dimiaa yooŋgu kɛndɛ teŋgeŋndo. Te a tosa pɛ wallo hoo, mɛɛ a cho diompilɛ a wanaa cheleŋ o miiliɔŋndaŋ niŋ chieeŋndo balɔɔ silɔ, a cho yooŋgu pilɔɔ hoo kpe dimioo wa! A cho vɛlɛ wallo a maalikɛiya latulu, a cho wanaa Mɛlɛkaa malaa le yooŋgu kɛndɔɔ hoo dimioo wa.—Sɔɔŋ Chɔɔmaŋndoŋ 14:​6.

⁶ Nuawɔ suɛi kɛndɛ se le diomndaŋ veeloo o yau naa iwɔsioo niŋ a fulamakɔɔli naŋ sɔla o wallo hoo tosaa niŋ chieeŋndo balɔɔ silɔ wo! Yiyaŋndɔ vɛlɛ a mɛɛ naŋ cho diompilɛ o chieeŋndo choo kpou yɛ te ŋ veelu pɛ waŋnda o bɔŋaŋnda naala bɛndaŋ. O bɔŋaŋnda laŋ choo, miŋ yaŋ nilaŋ o yooŋgu pilɔɔ kpe. Miŋ yaŋ nilaŋ o sɔɔŋ pilɔŋ, tuula waŋnda chuɛinuŋ teŋgeŋndo, a tuulala dɛɛniaa naa le miŋ piɛi Chɛhowa a kɔl naa kpou wo. Ŋ wa vɛlɛ diompilɛ a puaapiliaa a ndepiliaa naa o chieeŋndo choo kpou te ŋ bii pɛ Loonuŋyaa iwɔsi o iwɔsi. (Kɔliŋtiaŋ Tasoo 11:​23-26) Miŋ chuuŋgiaŋ o paale pilɛ leŋ choo kpe, Naisaŋ 14, a paale delaaleŋ doŋ le chɔmndo maa ŋ naŋ kɔl le nyɛ Chɛhowa tosal naa wo, nduyɛ le miŋ diikuŋ nyɛ Chiisu dimul naa wo. Nduyɛ o lɔɔla biŋgi niŋ tuupa mi Loonuŋyaa fuuluu, miŋ tosa wallo diompilɛ le waŋnda veeloo tau le ma huŋ bii bɔŋaŋ sɔviɔɔ hoo a naa latulu.

7. Yɛɛ naŋ nɔla yɛ miŋ tosa te ŋ wa pɛ wallo diompilɛ?

 ⁷ Soonɔɔ opilɛ nɔla mbo tɛɛmbuu nyɔɔŋ tau le. Lende koni, naa bɛɛ wana pilɛ kpe tiuba mbo dimul waŋnda kpou yooŋgu kɛndɔɔ le. Kɛ le mɛɛ naŋ cho wallo diompilɛ yɛ, ŋ nɔla miŋ dimul waŋnda a Chɛhowa okɔɔ o miiliɔŋndaŋ niŋ nduyɛ miŋ mala nda ma saŋgala Chɛhowa nduyɛ ma ke ndu bɛɛleŋ.

8, 9. (a) Tamaselii yɛɛ Pɔɔl soliŋ yɛ kpeku le Kilisiɔŋnda pɛɛkoo le waa diompilɛ? (b) Vɛɛ naŋ duau yɛ balaŋ naapilɛ le mi diompilɔɔ wa o kundaa niŋ?

⁸ Mi Pɔɔl tɛɛsial Ɛfisiaŋnda mɛɛ kundaa cho o kɔɔnaa yɛ, nduyɛ mbo dimi maa wana o wana cho o kundaa niŋ nɔ mbo “hindu o kaalaa niŋ.” (Nuawɔ Ɛfisiaŋnda 4:​15, 16.) Mi Pɔɔl soliŋ tamasi ŋdiallo kpeku le tɛɛsiaa maa Kilisiɔŋnɔ kɛ kɛ mala le mi kundaa wa diompilɛ le Chiisu tolɔɔ kɔɔli, wana cho kundaa bolleŋ ndo. Mbo dimi maa “te pɛl o pɛl tosa wali o nɔ le tosaa o dialloŋ niŋ ndoŋ pɛ, muŋ pila nɔla miŋ hindu.” Lelaŋ chuaambɔ ni bɛndu ni, nɔ kɛndiaa kɛndɔɔ nɔ kɛndiaa kɛndɛ le, yɛɛ naa kpou nɔ yɛ miŋ tosa?

⁹ Chiisu yulu bɛnduaa iso ni le ma chua chilaŋ o kundaa niŋ. O yeema naa miŋ diikuŋ nda nduyɛ miŋ tol nɛi chɔmaa nda cho naa kioo wo kɔɔli. (Hibuluiya 13:​7, 17) Lepum, hei ve suɛi kpɛdɛ le tosaa le. Kɛ ŋ nyuna Chɛhowa le nyina ndɔ diandaa le mbo mala naa miŋ diikuŋ nɛi chɔmaa kɛ kɛ bɛnduaa ke naa. Yiyaŋndɔ vɛlɛ mɛɛ naŋ mala kunda naa yɛ te o yɔŋ pɛ miŋ wa wanaa diikaŋ nduyɛ miŋ wa diompilɛ a bɛnduaa. Kunda naa cho wa diompilɛ, nduyɛ kaala cho naa tɛɛŋ vellaa velle wo cho chɔɔlu kalu poŋ.

10. Vɛɛ buɛiyaa malalaŋnda mala yɛ le mi kundaa wa diompilɛ?

¹⁰ Buɛiyaa malalaŋnda bɛɛ mala le mi kundaa wa diompilɛ. Ma tosa wallo kalaŋ le bɛnduaa malaa, nduyɛ ŋ naŋ kɔl tau le nyɛ o nyɛ nda cho tosaa. Le tamaseliiyo, buɛiyaa malalaŋnda tosa a sabu mi yaulaŋ la wa tau le laŋ soliŋndo kpeku o wali pollo niŋ, nduyɛ ma dimul wanaa huŋ o bɔŋaŋnda naalaŋnda maa a chaa hunɔɔ. Ma tosa vɛlɛ wallo kalaŋ le Toŋgo leMasaa miŋgioo toosiaa vɛlɛ a ndu dindioo. Te ŋ dɔu pɛ balaŋ naapilɛ naa puaapiliaa haa, ŋ wa a kɔɔnaa diompilɛ le Chɛhowa piɛiyo.—Tuuwɔ Walta Wanaa Chiisuaa 6:​3-6.

11. Yɛɛ feleŋguaa nɔ yɛ ma tosa mi kundaa wa diompilɛ?

¹¹ Bɛnduaa apum tosa niŋ wallo kalaŋ o kundaa niŋ le wɔsila bɔɔbɔɔ. Kɛlɛŋgaa a tiu lɛ ba le tosaa tau maa paandu le kanifuule, a cho niŋ yuwaa. Puaapiliaa feleŋguaa nɔla ma mala. Te a sɔla pɛ pɛɛkoo, a nɔla ma chua kalaŋndaŋ tau o kundaa niŋ. Nduyɛ te buɛiyaa malalaŋnda tosa pɛ wallo kalaŋ, a nɔla ma simnuŋ bɛnduaa kundaa o chilaŋ niŋ. (Timoti Tasoo 3:​1, 10) Bɛnduaa feleŋguaa apum tosa niŋ pɛŋ hiouwɔɔ lachioo tau. A cho niŋ suŋ suŋ buɛiyaa ibuŋgaa nduyɛ ma wa malaa puaapiliaa a ndepiliaa o kundalaŋ niŋ. Miŋ naŋ kɔl te feleŋguaa wa pɛ yɔŋgɔŋndo wulee le wallo tosaa le puaapiliaa a ndepiliaa.—Nuawɔ Sam 110:​3; Ikilisiaatii 12:​1.

12, 13. Yɛɛ wana o wana o yuŋgoo nɔ yɛ mbo tosa le mi diompilɔɔ wa nda tɛɛŋ vellaa velle?

¹² Vɛɛ naŋ mala yɛ wanaa naŋ cho o yuŋgoo niŋnda le waa diompilɛ? Pɛɛku leyuŋgoo tosaa o lɔɔ o lɔɔ bɛŋgu nɔla mbo mala naa. Te kalaŋchuauwa a chuauwaa ndaa chua pɛ teleŋndo le pɛɛkoo a Chɛhowa okɔɔ, kaala cho nda tɛɛŋndo nɔla mbo kendu poŋ. O teleŋ koŋ bɛŋgu, a nɔla ma pɛɛku nyɛ nda nɔ ma dimi o wali pollo niŋndo. Koŋ nɔla mbo mala nda kpou ma bɛɛndiaŋ nyɛkɛndɛi. Te a wa pɛ suukaŋndo vellaa velle a tonyaa okɔɔ, nduyɛ ma che maa yuŋgoo kpou kaala Chɛhowa, ma wa ndu kɔllo nɛŋioo, hei tosa ma chɔɔlu wa diompilɛ.

¹³ Yɛɛ pɔnɔɔ a lanɔɔ nɔ yɛ ma tosa le mi diompilɔɔ wa nda tɛɛŋ? (Maatiu 19:​6)  Te pɔnɔɔ a lanɔɔ kaala pɛ Chɛhowa nduyɛ ma wa ndu piɛiyo diompilɛ, a nɔla ma wa a kɔl kɛndɛ nduyɛ ma nɔ diompilɔɔ o nɔ ndaa niŋ. Kaalaa nɔ mbo wa nda tɛɛŋ vellaa velle mɛɛ o wa Ebilaham nda Sela tɛɛŋ yɛ, Aase nda Luibɛka, vɛlɛ a Ɛlikanaa nda Hana. (Chɛnɛsee 26:​8; Saamiɛɛ Tasoo 1:​5, 8; Pitɛ Tasoo 3:​5, 6) Te pɔnɔɔ a lanɔɔ tosa hei pɛ, diompilɔɔ nɔla mbo wa nda tɛɛŋ nduyɛ ma sɔɔŋguu Chɛhowa ikɛi kpɛɛluŋ.—Nuawɔ Ikilisiaatii 4:​12.

14. Te o yɔŋ pɛ mi pɔnɔ num ɔɔ laa num ve Chɛhowa piɛi le, yɛɛ ŋ nɔ yɛ ma tosa le mi nɔ numndo wa o kala poŋ?

¹⁴ Baabuiyo dimi kpendekele maa pɛ pɛ bɛɛ ŋ nɔ miŋ chua wana cho Chɛhowa piɛi le wo o nɔɔ niŋ te. (Kɔliŋtiaŋ Diiŋ Ndɔɔ 6:​14) Kɛ puaapiliaa a ndepiliaa apum cho o nɔɔ niŋ nda wana cho Chɛhowɛinɔ le wo. Apum wa niŋ fɛŋ o nɔɔ niŋ malaŋ nda pɛɛku tonyaa, nduyɛ wana nda cho o nɔɔ niŋndo simnuŋ Chɛhowɛinɔ le. Apum yɛ, ma chal o nɔɔ niŋ nda wana cho Chɛhowa piɛiyo wo, kɛ mi pɔnɔ nda ɔɔ laa nda fulaŋ o kundaa niŋ. Te hei yɔŋnuŋ pɛ, Kilisiɔŋnda nɔ ma kindiŋ kpoke le silala Baabuiyo diikɔŋndo le nɔ ndaa tosaa o kala poŋ. Lepum, hei ve suɛi kpɛdɛ le. Le tamaseliiyo, Meele nda Deeve pɔnɔ ndɔ wa Chɛhowa piɛiyo diompilɛ. Kɛ mi Deeve kialu kɔlaŋ o bɔŋaŋnda leKilisiɔŋndaŋ. A koŋ kpou, mi Meele kindiŋ le waa lanɔ kɛndɛ vɛlɛ a kaala leKilisiɔŋndaŋ chɔmndo. Mbo pɛɛku vɛlɛ chuauwaa nduaa ŋɔmpum nda a Chɛhowa okɔɔ, nduyɛ a wa kɔlaŋ lɔɔlɔɔ o bɔŋaŋnda leKilisiɔŋndaŋ a la bɛndulaŋ. Mɛɛ wɔsioŋ ŋpum hiou, mi chuaambuaa sul nduyɛ ma wanuŋ a banda. Meele wa wɔ hiouwɔɔ lachi a Chɛhowa piɛiyo mi che bɛɛ naa i ve suɛi kpɛdɛ le ndu le. Kɛ, mi Deeve kandu vɛlɛ diomndaŋ veeloo o yaula Meele kɛsul ndu laŋ niŋ. O teleŋ pum bɛŋgu, mi Deeve kandu vɛlɛ kɔlaŋ o bɔŋaŋnda leKilisiɔŋndaŋ. Po ndɔ mama wɔsiŋ ŋɔmpumndo wa ndu fondaa biilul lo lɔɔlɔɔ. Nduyɛ te Deeve hiŋ te, mi po ndɔ mamaa hoo dimul ndu aa, “I chi num hau o bɔŋaŋndo le kɛkɛ bɛndu.” Mɛɛ wɔsilaŋ 25 hiou, mi Deeve miiŋgu Chɛhowa o ibuŋ. Nduyɛ ndu nda laa ndɔ cho niŋ Chɛhowa piɛiyo diompilɛ a kɔl kɛndɛ.

15. Vɛɛ wanaa viou niŋ o nɔɔ niŋnda mala yɛ wanaa chal o nɔɔ niŋ sɛnɛiya?

¹⁵ Setana cho hau yuŋgulaŋ chiŋalaŋndo a sɔŋgɔɔ. Saboo opilɛ cho hoo ni, le mi diompilɔɔ wa pɔnɔɔ a lanɔ cho Chɛhowa  piɛiyo wo tɛɛŋ. Mɛɛ mɛɛ ŋ chii wɔsioŋ o nɔɔ niŋ, yiyaŋ a nyɛ ŋ nɔ ma dimi ɔɔ ma tosa le mi nɔ numndo kendu wo. Te wanaa viou niŋ o nɔɔ niŋnda nya cho ni, la nɔla mi la kɛsi tamasi kɛndɔɔ le wanaa chal o nɔɔ niŋ sɛnɛiya. Kɛlɛŋgaa a nɔla ma veelu wanaa chal o nɔɔ niŋ sɛnɛiya o numndo bɛɛ le pɛɛku leyuŋgoo tosaa diompilɛ a yuŋgu numndo. Wanaa chal haa o nɔɔ niŋ sɛnɛiya cho chɔ maa mɛɛ mɛɛ waŋnda chua wɔsioŋ o nɔɔ niŋ, a nɔ ma chɔm kaalaa vellaa velle nduyɛ ma nɔ diompilɔɔ.—Taitɔɔ 2:​3-7.

16, 17. Yɛɛ wanaa cho Mɛlɛka piɛiyo o diompilɔɔ niŋnda cho yɛ lehɔl o nɛi?

¹⁶ Diompilɔɔ wa Isɔluɛiya tɛɛŋ teleŋ nda wa kɔlaŋ Chulusɛlɛm le dunyaŋ ndaŋ tosaa wo. Mi ndaa bɛɛndiaa nyɛ o nyɛ ndaa hau ba le kɔlaŋ. Mi ndaa bii nɛiyo diompilɛ, vɛlɛ mi ndaa maaliaŋ vellaa velle. Mi ndaa saŋgala Chɛhowa diompilɛ o maaŋndo niŋ nduyɛ mi ndaa piɛi ndu diompilɛ. (Luku 2:​41-44) Ŋ cho hau bɛɛndiaŋndo le yoomoo sɔlaa o chieeŋ sɛnɛiyo niŋ. Lelaŋ, diompilɔɔ a chɛlaŋndo nɔ mbo wa naa tɛɛŋ vellaa velle. A nɔla pa ma yiyaŋ a nɛila ŋ chɔɔlu hei tosa wo?

¹⁷ Chɛlaŋ cho waŋnda tɛɛŋ o chieeŋndo niŋ te, nduyɛ ma chɔulaba o nyɛm bɔɔbɔɔ choo. Kɛ ŋ yil Chɛhowa balikaa le naa malaa miŋ sɔla kɔl nyuloo nduyɛ le tonyaa sinaa pɛŋgu! Wanaa nduaa chieeŋndo balɔɔ silɔ cho ndu piɛiyo o nɛi bɛnda wo choo. Taama taama o palɛi mɛɛlɛi hei niŋ, diompilɔɔ cho wanaa Chɛhowaa tɛɛŋ mbo hiau maa paandu. Nyɛ Aisaya nda Makal dimi wo cho peelɔŋndo maa ŋ cho kɔlaŋ diompilɛ o “pembii chiɛi Mɛlɛka Yaawɛɛ wo” choo. (Aiasaya 2:​2-4; Nuawɔ Makal 4:​2-4.) Nuawɔ se mɛɛ naŋ cho wa a kɔl kɛndɛ o chilaŋ niŋ yɛ te wanaa cho wa o chieeŋndo choo kpou wa wa pɛ a ‘mɔɔsaa naa pilɛ’ nduyɛ mi chɛlaŋndo wa nda tɛɛŋ o Chɛhowa piɛiyo niŋ!