Yau Luku wo o Baabuiyo niŋ dimi maa mi Chiisu kumbi yau simbulaa Aisaya wo, mbo veelu diomndaŋ leniŋ, nduyɛ mbo miŋgi ndu simbul. O yau Chɔŋ ndo mɛɛlulaŋ o Baabuiyo niŋ, mi Chɔŋ bɛɛ suaa a yau simbulaa okɔɔ. Mbo dimi maa o tiuba le mbo poonyiaa kaamaala Chiisu ndoo tosalaŋ kpou o yau simbulaa ndɔɔ niŋ te.—Luku 4:16-20; Chɔŋ 20:30; 21:25.

Vɛɛ ndaa toosiaa yɛ yaula simbulaalaŋ? Yaula visiaa, ɔɔ kpɛndiaŋ ndaa kua a holi holioo ni le yau simbulaa toosiaa. O kpɛndɛleŋ ndaa simbul yauwo hoo ni a poonyiaa kumbuei ipilɛ. Tɛɛŋ tulumasaa poonyiaa wa o yau simbulaa choo ni. Te yau simbulaa ndoo hiu pɛ ibandu, mi ndoo nɔ kpɛndɛlaŋ sala tiɔɔŋ o kpeŋgoŋ. Kpɛndɛlaŋ ndaŋ wana veelaa ladiomndo ndoo saa ni le ndu timbioo a baa opilɛ nduyɛ mbo wa ndu simbullo a baa opilɔɔ haaa mbo saaluŋ naa o yeema le diomndaŋ veeloo wa.

Mi yauwo hoo “The Anchor Bible Dictionary” dimi aa, “Bandei pila yau simbulaa ndoo bandu ni, [ndoo wa le nɛiyo 33]. Nduyɛ te ndaa simbul ndu pɛ, ndoo wa le yauwo kpulukuu.” Le tamaseliiyo, ma dimi maa te ndaa timbi pɛ yau simbulaa Luku wo o Baabuiyo niŋ, nɛiyo 31 bandii nduɛi ndii wa ni. Lepum, mi ndaa kɛyiaa chɔchɔŋ yau simbulaa nyɛkɛndɛi, ma kpɔlɔkiaa ndu a pouwo, okoŋ a yiŋ ndu o kaaŋ niŋ.

Chɔŋ a teleŋ kunda soliaa lasalaa kanduŋ o Isɔluɛi niŋndo, waŋndo opilɛ kpe ndaa yulu iso ni le waa masa wanaa soliaa lasalaa. Nduyɛ o tase ndɔɔ, ndoo nɔ mbo lo o foofo koŋ haaa a piɔm ndɔɔ. (Nɔmbaa 35:25) Elɔŋ wa wana tasoo ni le foofo waa naa sɔlaa. Okoŋ kɔɔli, te finyaa vi pɛ, dikeŋnaŋndo hoo namba o po tasoo lo. (Ɛsodɔɔ 29:9) Waŋpiaanduaa bɔɔbɔɔ o pulale Elɔŋ ndeŋ niŋ, wanaa soliaa lasalaa nda wa ni, kɛ nyɛɛmbɔ koni wa masaa wanaa soliaa lasalaa ni.

Mɛɛ wanaa ve ŋChuu le wa wa Isɔluɛi choo masa, mi ndaa faŋa masaa wanaa soliaa lasalaa Chuuwa a mɛɛ nda hɛnaŋ yɛ, okoŋ, ma miŋgi wana nda hɛnaŋndo o foofo koŋ. I wa maa, teleŋ o teleŋ wanaa ndaa yulu iso sɛnɛiya, o yuŋgula nɔ dikeŋnaŋndo laŋ niŋ ndaa chua nda ni, o bii fau o pulale Elɔŋ ndeŋ niŋ. Dimioo hoo “wanaa bɛnduaa soliaa lasalaa” sim ni, laŋgbaa kɛsuŋ kalaa cho o kunda wanaa soliaa lasalaa niŋnda. Wanaa bɛnduaa soliaa lasalaa wa a piɔuwaa kundalaŋ 24, nduyɛ masaa wanaa soliaa lasalaa wa kundalaŋ ndaŋ bolleŋ ni. Tɔɔ pila masaa wanaa soliaa lasalaa ndaa nɔ o yuŋgula ndalaŋ niŋ ni. Nduyɛ, a wa paandu masaa wanaa soliaa lasalaa kɛ ma faŋa nda wa bɛɛ, mɛɛ Anasi wa naa yɛ.—Koloniko Tasoo 24:1-19; Maatiu 2:4; Maki 8:31; Walta Wanaa Chiisuaa 4:6.