Sila cho lepɛŋ a mɔnɛi biyɔɔ okɔɔ le. Kɛ o cho silalaŋ kpou le la mala naa le. Le tamaseliiyo, mi waŋnda apum sila num maa a nɔ ma chaŋ te. Ɔɔ, a nɔ ma bii mɔnɛi o nɛi o nɛi niŋ te. Kɛlɛŋgaa mi apum nyindu num le chaŋndo puɛɛ, nduyɛ le mɔnɛi hiuwaŋ mɛŋnde biyɔɔ. Baabuiyo chɔm mɛɛ naŋ nɔ miŋ bii mɔnɛi yɛ. Nduyɛ wanaa yaasiaa sɔɔŋ hau wa chɛl nyɛ Baabuiyo dimi wo.

O naamulaŋ lapum niŋ, ma dimi maa o bɛnda mi wana pɔnɔɔ chaŋ maa wana lanɔ le. Baa saboo cho pa kpeekpei le mi siɔmbulaŋ la bii naa le mɛmiaŋ kiɔɔ tuisioo kpasu kpasu o faŋgaa tɛɛŋ? Wanaa pɛɛku a kɛndiaa mahullo okɔɔ wa saaluŋ maa mɛmiaŋ tuisioo kpasu kpasu o mɔnɛi biyɔɔ niŋ cho suɛi wɔɔŋ te. Nduyɛ lepum, mi mɔnɛi biyɔɔ mala num le hiouwɔɔ lachi a sɔɔŋ cheleŋ tosaa o yɔŋ bɛɛ mi wana ŋ kaala wo vi. Kɛ i ve suɛi kɛndɛ le kiɔɔ mɔnɛi biyɔɔ le. Baabuiyo dimi naa maa wana pɔnɔɔ nɔ mbo chaŋ maa wana lanɔ le le. Yiyaŋndɔ a tamasi Chiisoo okɔɔ. Mɛɛ chaaŋ ndɔ kaalaa, Lasalɔɔ vi, mbo tuisi  mɛmiaŋ kpasu kpasu faŋgaa tɛɛŋ, mi che bɛɛ naa ndoo nɔ kpaayaa le wanaa vi wa miŋgioo yoomu!—Chɔŋ 11:​33-35.

Mi mɔnɛi biyɔɔ tosa miŋ dɔunuŋ tumbe tau, taama taama te waŋndo sɔla pɛ piɔm naŋ ve kɔl te wo. Wana biisioo komallo nɔ sabulaŋ tau le tumboo dɔunɔŋndo. Nduyɛ saboo opilɛ cho ni, te wana o ke bɛɛleŋ ndo dimi pɛ sɔɔŋ diɔmndoŋ. Mi Maik cho o lɛŋnde Saut Afilikaleŋ niŋndo dimi aa, “I wa wɔsilaŋ 14 mi finya nuu wu. O biisi koŋ choo, mi wana bɛndoo o kaŋnde Aŋkilikaŋnda dimi maa Mɛlɛka yeema wanaa kɛndiaa choo choo, nduyɛ lelaŋ nda viu achal te ni. * Mi tuulu kɔllo tau a nyɛ o dimi hoo wo kanifuule, naŋ yeema bɔɔ a finya naa. Mi che bɛɛ naa finya nuu vi niŋ le wɔsioŋ 63, I cho wɔ a kɔl tambɛiyo kɛ.”

Ɔɔ niŋ numpila tɔɔyaŋndo biyɔɔ? Taama taama te piɔm waŋnda ve kɔl te wo yɔŋnuŋ pɛ, mi wana biisioo komallo lambaŋ yiyaŋndo o kɔl niŋ aa, ‘Kɛlɛŋgaa te yaa tosa hei pɛ hei ve yɔŋnɔŋ te.’ Ɔɔ naapum balta ŋ mɛɛlu dɔuwɔɔ nya wana vi koŋndo wo, wa sɛɛŋgiaŋndo ni. Nduyɛ mi hei chɔɔlu num kɔllo tɛɛmbuu.

Te yiyaŋnda waa naa la wa pɛ tosaa ma dɔunuŋ tumbe ɔɔ ma bii numpila tɔɔyaŋ, o bɛnda ma kpaa laŋ. Kɛ, dimul chaaŋ num yaŋ num nilaŋ ndo, nduyɛ mbo dimul num maa lende wanaa biisioo komalla yiyaŋ ni. Baabuiyo dimul naa aa, “Kaalaa cho chaŋyɛi kɛndɛi tɛɛŋ le teleŋ o teleŋ. Nduyɛ, o yɔŋ bɛɛ o teleŋ nyɛpalaa niŋ, a melaŋ te.”—Pulɔwaa 17:​17, NW.

Chɛhowa Mɛlɛka, Wana Toosiaa naa wo cho chaŋyɛi sɔvɛi le wana biisioo komallo ni. Dimul ndu nyɛ cho num o kɔllo kpou o piɛileŋ niŋ kanifuule, ‘o buulaŋ a num.’ (Pitɛ Tasoo 5:​7) Le handɔɔ lechoo, o dimi maa wana o wana tosa lende pɛ, ‘kɔl nyulu Mɛlɛka yɔŋgu wo o wana chiee nɔla mbo sina bɛɛ pɛŋgu le wo nɔla mbo manda kɔlta ndalaŋ, a yiyaŋnda ndalaŋ.’ (Filipiaŋnda 4:​6, 7) Chɛl vɛlɛ le mi Mɛlɛka mala num a Diom ndɔ kɔl dɛɛniaa, Baabuiyo. Poonyiaa bolii Baabui nɔla mii dɛɛniaa num kɔllo ve. (Tofa  kɔfoo o peeleŋ ndeŋ choo.) Kɛlɛŋgaa a yeema pɛŋ ma bii bolii Baabuiye hei i tiŋ o kɔl. Yiyaŋndo o sɔɔŋ waa naa choo nɔla mbo mala num, o bii fau ichɔl, teleŋ ŋ wa numpilɛ, nduyɛ mi luaŋ ma kiolu num o hɔllo.—Aisaya 57:​15.

Wɔsioŋ 40 Chaki nɔ ni. Nduyɛ nyɔɔ viu wɔ bɛɛ le mi naa pauwo dii laa ndɔ kaalaa. Mi Chaki dimi maa teleŋndaŋ lapum, mi wana pilɛyɛi pala ndu tau. Kɛ mbo saaluŋ malaa o piɛileŋ niŋ. Mbo dimi aa, “Te I piɛi pɛ o Chɛhowa lo, I yiyaŋ lɛ maa yapilɛ le cho le. Mi tendu daandi daandi o malɔ, nduyɛ lɔma hiŋ lɛ ya o hɔl te. Kɛ te I chii pɛ diomnda kɔl dɛɛniaalaŋ veelu o Baabuiyo niŋ nduyɛ mi yiyaŋ o laŋ choo, kɔllo nyulul la dɔɔ fɛɛ. Te I dimul pɛ vɛlɛ Chɛhowa nyɛ cho ya o kɔllo kpou o piɛileŋ niŋ, I buulaŋ lɛ le, nduyɛ mi hei mala ya mi lɔl.”

Teleŋ Vanɛsa wa chuaambɔ feleŋgɔnɔɔ wo, mi naa dii kala ndɔ. Mi ndu bɛɛ sina kpaaya piɛileŋ le nɔ wo. Mbo dimi aa, “I veelu dɔɔ pɛ diola Mɛlɛkalaŋ, mɛmiaŋ ma tol la kpasu kpasu. Mi Chɛhowa ndoo yaŋ nilaŋ o piɛile nileŋ nduyɛ mi ndoo ke ya yoomuaŋ lɔɔlɔɔ.”

Wanaa sila a biisioo okɔɔ wa dimi maa, le mi wanaa biisioo komalla pɛŋgi mɔnɛi biyɔɔ, o bɛnda ma wa wanaa cheleŋnda malaa, ɔɔ ma soliŋ teleŋ ndaa kpeku le walta mala waŋnda laŋ tosaa o tanda nda cho wo niŋ. Hei tosaa nɔla mbo ke wana koŋ nyaaloo nduyɛ o hiu lɛ mɔnɛi biyɔɔ le. (Walta Wanaa Chiisuaa 20:​35) Kilisiɔŋaa biisioo komalla a bɔɔbɔɔ saaluŋ maa ma sɔla kɔl dɛɛniaa te a wa pɛ wallo tosaa le wanaa cheleŋnda malaa.—Kɔliŋtiaŋ Diiŋ Ndɔɔ 1:​3, 4.