1-3. (a) Siŋgaŋnda kuɛɛ la wa yɛ ikala le tosaa te ŋ yiŋ niŋ pɛ? (b) Te ŋ chi ndi pɛ ikala le hiouwɔɔ lachioo tosaa mɛɛ naŋ yeema yɛ, nyunala kuɛɛ naŋ nɔ yɛ miŋ nyunaŋ? (Tofa fotueiyo o peele naŋ kandu leŋ choo.)

LE WƆSIŊ bɔɔbɔɔ, Kɛviŋ wa pisultaŋ tosaa o kanioŋ choo, sikɛɛtiiyo kolɔɔ, muɛiyaŋ kolɔɔ tau, a kooma wana ve o numpila niŋ te waŋ chuaa. ^[1] (Tofa diomnda chɔɔlaalaŋ.) Mbo pɛɛku a Chɛhowa okɔɔ, nduyɛ mbo yeema le simnɔŋndo chaaŋ ndɔ. Kɛ le hei tosaa, ndoo nɔ mbo tosa siŋgaŋndaŋ o yoomu ndɔɔ niŋ. A mala Chɛhowaa vɛlɛ a Diom Ndɔɔ, Baabuiyo, mbo siŋgaŋ.—Hibuluiya 4:​12.

² Mɛɛ Kɛviŋ yiŋ, ndoo nɔ wɔ mbo tosa siŋgaŋndaŋ kɛ o kaa ndɔɔ niŋ le halikpeŋ mbo simnuŋ Kilisiɔŋnɔ sɔviɔɔ. (Ɛfisiaŋnda 4:​31, 32) Le tamaseliiyo, mi ndoo tuulu kɔl chɔ chɔ. Mi kaamaa bii ndu mɛɛ o che maa i wa ikala le kɔl ndɔɔ baa tiuwo. Mi Kɛviŋ dimi pɛŋ maa siŋgaŋnda cheleŋnda o tosa o yoomu ndɔɔ niŋ tuupa mbo yiŋ ndaŋ la wa tɛtɛlɛ mbo hiau kɔl ndɔɔ baa tiuwo! Kɛ mbo tiuba le siŋgaŋndaŋ tosaa mɛɛ o nyɔɔlu Chɛhowa o piɛileŋ niŋ vɛlɛ a Baabuiyo pɛɛkoo nyɛkɛndɛi.

 ³ Tuupa miŋ yiŋ, naa bɔɔbɔɔ naŋ nɔ miŋ tosa siŋgaŋnda bɛndaŋ tau o yoomu naa niŋ le halikpeŋ miŋ tosa sɔɔŋ Baabuiyo dimi maa ŋ nɔ miŋ tosa woŋ. Kɛ suŋ suŋ bɛɛ, ŋ sina maa ŋ nɔ kuee miŋ tosa siŋgaŋnda pɔm pɔmbɔlaŋ le simnɔŋndo maa Mɛlɛka nda Kiliti. (Ɛfisiaŋnda 5:​1, 2; Pitɛ Tasoo 2:​21) Le tamaseliiyo, miŋ che lepum maa miŋ ŋɔɔchiaŋ tau ɔɔ miŋ luei balaŋ o choŋgulaŋ niŋ, nduyɛ miŋ dimi sɔɔŋ wɔɔŋndoŋ tau a wanaa cheleŋnda okɔɔ. Ɔɔ lepum, mi sioonde bii naa tau le nyɛ acheleŋnda cho dimi a naa okɔɔ wo, nduyɛ mi hei kuuna naa suɛi bɛnda ve tosaa. Kɛlɛŋgaa ŋ cho niŋ kindiŋndo le siŋgaŋndaŋ tosaa le wɔsila bɔɔbɔɔ, kɛ miŋ tosa wɔ biondɔŋnda pilɛlaŋ kpe. Le hei, mi kaamaa bii naa lepum miŋ nyunaŋ aa, ‘Le yɛɛ i cho yɛ ikala kpoke le ya le siŋgaŋnda pɔm pɔmbɔlaŋ tosaa? Le yɛɛ ya nɔ yɛ mi dɔu nyɛ Baabuiyo dimi wo o wali niŋ le halikpeŋ mi hiou lachi a kaa nuu siŋgaa?’

4. Le yɛɛ ŋ nɔla Chɛhowa kɔllo nɛŋi o sɔɔŋ naŋ tosa woŋ niŋ kpou le?

⁴ Ŋ kaala Chɛhowa, nduyɛ ŋ nɔ yeemɛi a kɔl naa kpou le ndu kɔllo nɛŋioo. Kɛ i cho suɛi imɔnɔ le sinaa maa o cho teleŋndaŋ fau le naŋ nɛŋi ndu kɔl te. Kanifuule, wanaa lahakiaa naŋ cho ni. Nduyɛ miŋ nɔ yiyaŋ pilɔɔ maa kiilanɔɔ Pɔɔl. Mbo dimi aa, “Mi I nɔ yeemɛi le suɛi kɛndɛi tosaa, kɛ I nɔla le.”—Luomaŋnda 7:​18; Chemisi 3:​2.

5. Siŋgaŋnda suu kuɛ naŋ tosa yɛ tuupa miŋ yiŋ, kɛ siɔwuŋ kuɛɛ naŋ cho yɛ wɔ chɔulabaa?

⁵ Tuupa miŋ simnuŋ waŋndo opilɛ o kunda leKilisiɔŋndo niŋ, mɛɛ miŋ mal sɔɔŋ Chɛhowa tul leyɛ woŋ tosaa. (Kɔliŋtiaŋ Tasoo 6:​9, 10) Kɛ wanaa lahakiaa naŋ cho wɔ ni. (Kolosiaŋnda 3:​9, 10) Nduyɛ o yɔŋ bɛɛ miŋ yiŋ niŋ le wɔsioŋ tau, kɛ miŋ tosa wɔ biondɔŋndaŋ. Teleŋndaŋ lapum, miŋ nɔ yiyaŋnda wɔɔŋndaŋ, ɔɔ miŋ che ndi ikala le siɔwuŋ naŋ nɔ woŋ chɔulabaa. A tonya, kɛlɛŋgaa ŋ nɔ pɛŋ miŋ chɔulaba siɔuwoŋ muŋ le wɔsila bɔɔbɔɔ.

6, 7. (a) Mi che bɛɛ ŋ cho wanaa lahaki, yɛɛ tosa yɛ naa miŋ simnuŋ chaaŋaa Chɛhowaa? (b) Le yɛɛ naŋ nɔ miŋ vi ŋdial le Chɛhowaa nyunaa o piɛileŋ niŋ le haki malaa le?

⁶ Mi che bɛɛ naa wanaa lahakiaa naŋ cho ni, chaŋyɛi kɛndɛi nɔla mii wa naa tɛɛŋ naa Chɛhowa waa nduyɛ miŋ piɛi ndu. Loonuŋ lɔɔlɔɔ a nyɛ tase tosa ma simnuŋ chaaŋ o Chɛhowa wo. Chɛhowa pila che o kɛndɔɔ num o ŋdial ni, nduyɛ mbo yeema le ma sina ndu. (Chɔŋ 6:​44) Mi Chɛhowa sina vɛlɛ biondɔŋnda ŋ tosalaŋ a siɔwuŋ ŋ nɔ woŋ. Kɛ a koŋ kpou, Chɛhowa ndoo yeema ma simnuŋ chaaŋ ndɔ.

⁷ Chɛhowa kaala naa bɔɔ. Nduyɛ le sabu koŋ o yɔŋgu naa ke sɔviɔɔ ni. Mbo viam Chiisu Po ndɔ o chieeŋndo choo le halikpeŋ mbo yɔŋgu yoomu ndɔɔ le hakila naalaŋ baŋaa. (Chɔŋ 3:​16) Te ŋ tosa pɛ biondɔŋndo, ŋ nɔla miŋ nyuna Chɛhowa le haki malaa. Nduyɛ ŋ nɔ tiindaŋndo maa o nɔla mbo soliŋ sala baŋaa kpeku le naa hakioo malɔɔ nduyɛ miŋ wa wɔ chaaŋaa nduaa. (Luomaŋnda 7:​24, 25; Chɔŋ Tasoo 2:​1, 2) Loonuŋ maa le wanaa mal yɔŋnda ndala wɔɔŋndaŋ tosaa wa Chiisu vi ni. Lelaŋ, o yɔŋ bɛɛ miŋ yiyaŋ maa suɛi naŋ tosa ve i wɔu bɔɔ, ŋ nɔ miŋ pɛgi Chɛhowa piɛileŋ le haki malaa le. Te ŋ nyuna ndu le haki malaa le, i cho ko maa mɛɛ waŋndo kɛɛ bala nɔɔlɛilaŋ pulɔɔ yɛ. Ŋ naŋ bɔɔ kɔl le mɛɛ Mɛlɛka tosa a sabu le mi naa wanaa lahakiaa simnuŋ chaaŋaa nduaa yɛ!—Nuawɔ Timoti Tasoo 1:​15.

8. Le yɛɛ naŋ nɔ yɛ miŋ chua siɔwuŋ naŋ maa nyɛ le mamɔɔ le?

⁸ A tonya, ŋ nɔ miŋ pɛɛsa siɔwuŋ naŋ te. Chɛhowa dimul naa wanaa suu o yeema mi chaaŋaa nduaa wa wa. (Sam 15:​1-5) Lelaŋ, te ŋ yeemaŋ pɛ miŋ sɔɔŋguu Chɛhowa ikɛi kpɛɛluŋ, ŋ nɔ miŋ kindiŋ le tamasi ndɔɔ a o Po ndɔɔ tolɔɔ kɔɔli. Ŋ nɔ vɛlɛ miŋ chɔulaba yiyaŋnda naala wɔɔŋndaŋ, nduyɛ miŋ soliŋ ndaŋ o kɔl po. Mɛɛ mɛɛ naŋ chua wɔsioŋ  o yiŋɔɔ naa kɔɔli, ŋ nɔ miŋ hiou lachi a kaa naa siŋgaa.—Kɔliŋtiaŋ Diiŋ Ndɔɔ 13:​11.

9. Vɛɛ naŋ looku yɛ sina maa ŋ cho wɔ wana chieeyɛi sɛnɛiye wounɔŋndo?

⁹ Mi Kiilanɔɔ Pɔɔl dimul Kilisiɔŋnda aa, “Lelaŋ, la mal sɔɔŋ wɔɔŋ nya aa wa muŋ paandu leniŋ ndoŋ. Nduyɛ, wana chieeyɛi nyɛi paanduei i yeemaŋ wɔɔŋndoŋ ŋ cho tɛɛmbuuwo ve, la mal wana chieeyɛi keŋ. Kɔlta nyalaŋ la nɔ mi la simnuŋ la sɛnɛi yuka. O koŋ kɔɔli, la nɔ mi la wounuŋ wana chieeyɛi sɛnɛi Mɛlɛka toosiaa hei le waa maa ndu pila ve. O koŋ, mi la wa o nɛi tonyaa choo, koŋ cho ni, mi la simnuŋ wanaa cho sakpo, nduyɛ, mi la wa a yɔŋgaŋ o Mɛlɛka lo.” (Ɛfisiaŋnda 4:​22-24) Hoo sim ni maa ŋ nɔ miŋ wa kindiŋndo le siŋgaŋndaŋ tosaa nduyɛ miŋ “wounuŋ wana chieeyɛi sɛnɛi” ye. Lelaŋ, mɛɛ mɛɛ naŋ chua wɔsioŋ o Chɛhowa piɛiyo niŋ, ŋ nɔ miŋ chɔɔlu pɛɛku a suiliŋnda ndɔlaŋ okɔɔ. Nduyɛ Baabuiyo nɔla mbo mala naa le siŋgaŋndaŋ tosaa o yoomu naa niŋ le waa maa Mɛlɛka.

10. Yɛɛ naŋ nɔ yɛ miŋ tosa le hiouwɔɔ lachi a siŋgaŋndaŋ tosaa sinaa a mala Baabuiyo, nduyɛ nyunala kuɛɛ naŋ nyunaŋ yɛ?

¹⁰ Naa kpou yeema miŋ tol nyɛ Baabuiyo dimi wo kɔɔli. Kɛ ŋ nɔ miŋ tosa wallo kekelee te ŋ yeema pɛ le hiouwɔɔ lachi a siŋgaŋndaŋ tosaa. Le yɛɛ naŋ nɔ yɛ miŋ kindiŋ kpoke? Baa Chɛhowa nɔla mbo tosa ndi tɛtɛlɛ le miŋ tosa nyɛ cho o kɛndɔɔ wo le?

11-13. Le yɛɛ Chɛhowa yeema yɛ naa miŋ kindiŋ kpoke le siɔwuŋ naŋ chɔulabaa?

¹¹ Te ŋ yiyaŋ pɛ a choo choo a lɛŋndeŋ, vɛlɛ a nyɛ o nyɛ cho leniŋ, ŋ nɔ kiisaŋ maa Chɛhowa nɔ kpaayaa le nyɛ o nyɛ fee toosiaa le. Le tamaseliiyo, ndu toosiaa paaleŋ ni, nduyɛ le nɔ kpaaya hiuwaŋ mɛŋndo. Mi paaleŋ le teeŋgiaa fondaa wakpa o biɔŋɔɔ lepilɛ bɛŋgu nduyɛ haŋgullo pila le nɔ ni. Kɛ nyɛɛmbɔ koni nyaa yoomaa o chieeŋndo choo soliŋ paaleŋ kpeku ni le waa  achal. (Sam 74:​16; Aisaya 40:​26) Chɛhowa ke vɛlɛ buɛiyaa nduaa o chieeŋndo choo kpaayaa te a yeema pɛ. (Aisaya 40:​29) A tonya, te Chɛhowa ndoo yeema pɛ, ndoo nɔla mbo tosa ndi tɛtɛlɛ le siɔwuŋ naŋ chɔulabaa, a yiyaŋnda wɔɔŋndaŋ soliŋndo o kɔl po. Kɛ le yɛɛ o kɛɛ yɛ keŋ tosaa?

¹² Chɛhowa ke naa dioo le sɔɔŋ tosaa a ba naa. O ke naa dioo le chuaŋ chuaa tosaa le ndu diikɔŋndo ɔɔ miŋ kɛɛ ndu diikɔŋndo. Te ŋ hɛli pɛ le ndu diikɔŋndo nduyɛ miŋ tosa wallo kekelee le hɛnaŋ ndɔɔ tosaa, ŋ cho chɔm maa ŋ kaala ndu nduyɛ ŋ yeema miŋ nɛŋi ndu kɔl. Setana dimi maa Chɛhowa nɔ di le waa masa le. Kɛ te ŋ diikuŋ pɛ Chɛhowa, ŋ cho chɔm maa ŋ yeema mbo wa naa choo Masa. Nduyɛ ŋ nɔ tiindaŋndo maa Finya naa kaalaa puɛɛnuŋ a kindi kindiŋ naŋ cho le ndu diikɔŋndo wo le. (Choobu 2:​3-5; Pulɔwaa 27:​11) I cho suɛi bɛɛŋ le siɔwuŋ naŋ chɔulabaa le. Kɛ te ŋ tosa pɛ wallo kekelee le muŋ chɔulabaa, ŋ cho lo lechoo naa chɔm o Chɛhowa lo nduyɛ miŋ chɔm maa ŋ yeema ndu mbo wa Masa naa.

¹³ Chɛhowa dimul naa maa ŋ nɔ miŋ tosa wallo kekelee le suiliŋnda ndɔlaŋ tolɔɔ kɔɔli. (Kolosiaŋnda 3:​12; nuawɔ Pitɛ Diiŋ Ndɔɔ 1:​5-7.) O yeema naa vɛlɛ miŋ tosa wallo kekelee le yiyaŋnda naalaŋ mandaa. (Luomaŋnda 8:​5; 12:​9) Lɔɔlɔɔ naŋ tosa pɛ wallo kekelee le siŋgaŋndo tosaa nduyɛ miŋ sɔla batiuwaa, miŋ naŋ kɔl tau.

14, 15. Yɛɛ naŋ nɔ yɛ miŋ tosa le miŋ nɔ suiliŋnda Mɛlɛkalaŋ yeema laŋ? (Tofa kɔfoo “ Baabuiyo a Piɛileŋ o Chɛhowa Lo Siŋga Yoomula Ndalaŋ.”)

¹⁴ Yɛɛ naŋ nɔ yɛ miŋ tosa le suiliŋnda Chɛhowa kaala laŋ sɔlaa? Tuupa miŋ tosa kɛɛsiaa a ba naa le nyɛ naŋ nɔ miŋ siŋga o yoomu naa niŋndo, Diom Mɛlɛkaa nɔ mbo chɔm naa nɛiyo. Luomaŋnda 12:​2 dimi aa, “La hiau lɛ lachi a kaala waŋnda o chieeŋndo hoo niŋ a tosa laŋ te. La ke Mɛlɛka fondaa mbo maŋgala nya, o hei niŋ, mbo tosa mi kɔlta nyalaŋ la simnuŋ la sɛnɛi. Te hei yɔnuŋ pɛ, la nɔla mi la sina nyɛ Mɛlɛka hɛnaŋ ndo, koŋ cho ni mi la sina suɛi cho suɛi kɛndɛi ndu o hɔl le tosaa ve. O koŋ kɔɔli, mi la sina suɛi nɛŋi ndu kɔl le, nduyɛ mi la sina nyɛ cho sanaa le tosaa wo.” Lelaŋ, le sinaa nyɛ Chɛhowa yeema wo, ŋ nɔ miŋ tiindaŋ mala o ke naa wo. Ŋ nɔ miŋ wa nuaa o Baabuiyo niŋ lepaa o lepaa, miŋ yiyaŋ o nyɛ naŋ nua wo choo, nduyɛ miŋ piɛi o Chɛhowa lo le mbo ke naa nyina ndɔ diandaa. (Luku 11:​13; Kaleesiaŋnda 5:​22, 23) Chɛhowa nɔla mbo mala naa o nɛilaŋ ndaŋ choo le sinaa pɛŋgu nyɛ nɛŋi ndu kɔllo, nduyɛ ŋ nɔla miŋ pɛɛku le yiyaŋ ndɔɔ nɔɔ. O hei niŋ, mɛɛ naŋ yiyaŋ yɛ, mɛɛ naŋ suaa yɛ, a nyɛ naŋ tosa wo cho ndu chɔɔlu kɔllo nɛŋi. Nduyɛ ŋ cho pɛɛku mɛɛ naŋ nɔ miŋ bii siɔwuŋ naŋ yɛ. Kɛ a koŋ kpou, ŋ nɔ miŋ hiou lachi a siɔwuŋ naŋ chɔulabaa.—Pulɔwaa 4:​23.

¹⁵ O cho ko diomndaŋ veeloo o Baabuiyo niŋ lepaa o lepaa le, kɛ ŋ nɔ vɛlɛ miŋ soliŋ  yaula naalaŋ kpeku le pɛɛkoo, mɛɛ yau Bandu Mɛŋgɛlaa a “Tiondoo!” cho naa yɛ. Mi buŋgaŋ bɔɔbɔɔ o yaula tiɔɔŋndaŋ niŋ pɛɛku naa mɛɛ naŋ tual suiliŋnda Chɛhowalaŋ kɔɔli yɛ, a mɛɛ naŋ chɔulaba siɔwuŋ naŋ yɛ. Lepum, miŋ saaluŋ buŋgaŋ ŋpum o yaulaŋ ndaŋ niŋ a bolii Baabui mala naa tau ve. Ŋ nɔla miŋ chuuŋgiaa buŋgaŋ naŋ saaluŋ o yaula naalaŋ niŋndoŋ ɔɔ bolii Baabui mala naa le siɔwuŋ naŋ chɔulabaa wo, nduyɛ miŋ wa hɔlteŋ keekoo lechoo teleŋndaŋ lapum.

16. Te ŋ ve siŋgaŋndaŋ tosa chɔ chɔ mɛɛ naŋ yeema yɛ le, le yɛɛ ŋ nɔ miŋ tambu kɔl te?

¹⁶ Mbo chua teleŋndo tau le suiliŋnda Chɛhowalaŋ nɔɔ. Lelaŋ, te a yiyaŋ pɛ maa a tosa wɔ siŋgaŋnda bɔɔ a mɛɛ ŋ yeema yɛ le, biunuŋ. O tase ndɔ, mɛɛ ma kindiŋ kpoke le nyɛ Baabuiyo dimi wo tosaa. Kɛ mɛɛ ŋ hiau lachi a yiyaŋ Chɛhowaa nɔɔ vɛlɛ a nyɛ o yeema wo tosaa yɛ, lende koni i wa tɛtɛlɛ le yiyaŋ ndɔɔ nɔɔ, a tosaa nyɛ bɛnda wo ni.—Sam 37:​31; Pulɔwaa 23:​12; Kaleesiaŋnda 5:​16, 17.

17. Te ŋ chɔm lo lechoo wo o Chɛhowa lo pɛ, chila sɔvɛ kuɛɛ naŋ nɔ yɛ miŋ wa lehɔl o nɛi?

¹⁷ Ŋ cho lehɔl o nɛi le teleŋ naŋ cho simnɔŋ walaŋ nduyɛ miŋ piɛi Mɛlɛka lefafɛɛŋndo. A teleŋ koŋ, ŋ cho lɛ wa siɔwuŋ naŋ chɔulaba le. Nduyɛ i cho wa tɛtɛlɛ le tamasi Chɛhowaa tolɔɔ kɔɔli. Kɛ suŋ suŋ bɛɛ ŋ nɔla miŋ piɛi Chɛhowa kanifuule, o ke naa sala baŋaa. Mi che bɛɛ naa wanaa lahakiaa naŋ cho ni, ŋ nɔla miŋ nɛŋi ndu kɔl te ŋ hiou pɛ lachi a wallo tosaa kekelee, nduyɛ miŋ tol nyɛ o cho naa pɛɛkoo o Baabuiyo niŋndo kɔɔli.

18, 19. Vɛɛ naŋ looku yɛ tiindaŋndo sɔla maa Baabuiyo nɔ kpaayaa le yoomu naa siŋgaa?

¹⁸ Mi Kɛviŋ kei o nɛi o nɛi niŋ le pɛɛkoo mɛɛ o tiu kɔl ndɔ tuuwo ba yɛ. Mbo yiyaŋ a nyɛ o pɛɛku o Baabuiyo niŋndo nduyɛ mbo kindiŋ kpoke le siŋgaŋndaŋ tosaa o yoomu ndɔɔ niŋ. Mbo tual vɛlɛ sila puaapiliaa Kilisiɔŋnda ke ndu wo kɔɔli. Mi che bɛɛ mbo chua wɔsioŋ ŋtiŋ le mi Kɛviŋ tosa hiouwɔɔ lachioo, kɛ a teleŋndo opum, mbo simnuŋ buɛi malalaŋndo. Nduyɛ o cho niŋ bɛndu kundaa le wɔsioŋ 20. Kɛ suŋ suŋ bɛɛ, o sina maa o nɔ mbo hiou lachi a siɔwuŋ ndɔŋ chɔulabaa.

¹⁹ Naa bɛɛ tosa hiouwɔɔ lachioo o yoomu naa niŋ maa Kɛviŋ. Te ŋ tosa lende pɛ, ŋ cho wa Chɛhowa sɔɔŋgoo ikɛi kpɛɛluŋ. (Sam 25:​14) Nduyɛ te ŋ kei pɛ o nɛi o nɛi niŋ le miŋ tosa siŋgaŋnda nɛŋi Mɛlɛka kɔllo laŋ, o cho naa mala le batiuwaa sɔlaa o yoomu naa niŋ. Ŋ cho nɔ tiindaŋndo maa Baabuiyo cho naa mala le hiouwɔɔ lachi a siŋgaŋndaŋ tosaa o yoomula naalaŋ niŋ.—Sam 34:​8.