1, 2. (a) Vɛɛ Seiyaa Chɛhowaa che yɛ Baabuiyo? (b) Buŋgɛi kuɛɛ hɛnaŋ yɛ num tau o Baabuiyo niŋ?

NAA Seiyaa Chɛhowaa kaala Baabuiyo. Mi Baabuiyo ke naa kɔl dɛɛniaa, a tiindaŋndo, vɛlɛ a sila naŋ nɔla miŋ tiindaŋndo. (Luomaŋnda 15:​4) O cho kɔlkalu wana chiee le cho o Baabuiyo niŋ te, kɛ “Mɛlɛka diom ndɔɔ kpeekpei o cho ni.”—Tɛsaloniaŋ Tasoo 2:​13.

² Kɛlɛŋgaa naa kpou nɔ buŋgɛi naŋ hɛnaŋ nde o Baabuiyo niŋ. Apum hɛnaŋ yau Maatiu, Maki, Luku, a Chɔŋ ndo o Baabuiyo niŋ kanifuule, yaulaŋ ndaŋ la chɔm suiliŋnda kɛndɛla Chɛhowalaŋ, la Chiisu chɔm ndaŋ. (Chɔŋ 14:​9) Apum hɛnaŋ yaula soo a sɔɔŋ nɔ le peelɔŋndo woŋ, mɛɛ yau Sɔɔŋ Chɔɔmaŋndoŋ o Baabuiyo niŋ cho naa yɛ. Yauwo hoo chɔm naa “sɔɔŋ cho hunɔɔ suŋ yɔnɔŋ ndoŋ.” (Sɔɔŋ Chɔɔmaŋndoŋ 1:​1) Mi apum sɔla kɔl dɛɛniaa te a veelu pɛ diomndaŋ o Yau Sam ndo niŋ. Nduyɛ mi acheleŋnda tuei diomnda ke naa sila sɔviɔɔ laŋ veeloo yeela o yau Pulɔwaa wo niŋ. A tonya, le wana o wana Baabuiyo cho ni.

3, 4. (a) Vɛɛ naŋ nɔ yɛ miŋ che yaula naalaŋ? (b) Yaula cheleŋ kuɛɛ naŋ sɔla yɛ le waŋnda apum kinɛi?

³ Ŋ kaala Baabuiyo tau, nduyɛ ŋ kaala vɛlɛ yaula naalaŋ, le mɛɛ  la tɔlnuŋ o diom Mɛlɛkaa choo yɛ. Chɛhowa ke naa yaula naŋ soliŋ kpekulaŋ kpou ni. Yaulaŋ ndaŋ la mala naa le ndu sɔɔŋgoo ikɛi kpɛɛluŋ, vɛlɛ le mi tiindaŋ naa wa o kala poŋ.—Taitɔɔ 2:​2.

⁴ Le Chɛhowɛiya yaula naalaŋ la bɔɔbɔɔ poonyiaŋ ni. Kɛ, lapum le feleŋguaa ɔɔ kalaŋ chuauwa kinɛi la poonyiaŋ ni. Yaula bɔɔbɔɔ a vidueilaŋ o tɛɛŋgii nɛi, le wanaa cho ŋChɛhowɛi le wa la cho ni. Nyɛm yɛyɔŋ muŋ chɔm mɛɛ Chɛhowa cho peeloo buŋgɛi o chua le waŋnda kpou silala ndɔlaŋ kioo yɛ.—Aisaya 25:​6.

5. Yɛɛ tosa yɛ mi Chɛhowa hini kɔl a naa?

⁵ Mi naa pumnda chɔɔlu teleŋndo yeema le diomndaŋ veeloo o Baabuiyo niŋ a yaula naalaŋ. Lepum, o cho teleŋ pilɔɔ le naŋ soliŋ kpeku le pɛɛkoo yau kɛ kɛ naŋ sɔla le. Kɛ, ŋ nɔ miŋ sina maa mi Chɛhowa hini kɔl a naa le teleŋ naa soliŋndo kpeku a taasi le diomndaŋ veeloo o Baabuiyo niŋ vɛlɛ a yaula naa laŋ pɛɛkoo. (Ɛfisiaŋnda 5:​15, 16) Kɛ, ŋ nɔ miŋ wa yekeŋ le kpundɔɔ opum kpakpalaa. Kpundɛ kuɛɛ?

6. Yɛɛ kuuna yɛ naa lepum tɔnɔɔ sɔlaa o nyɛm Chɛhowa ke naa le pɛɛkoo a ndu okɔɔ woŋ?

⁶ Te ŋ ve yekeŋ te, miŋ yiyaŋ maa buŋgaŋ ŋpum o Baabuiyo niŋ, ɔɔ yaulaŋ lapum la cho le naa le. Le tamaseliiyo, te o wa yɛ miŋ che maa buŋgɛi ipum cho le naa le? Ɔɔ te o wa yɛ maa o cho le naa le nda poonyiaa yauwo opum te? Ŋ cho pa diomndaŋ veelu o yau koŋ niŋ chɔ chɔ, ɔɔ te koŋ te miŋ kɛɛ nuaa leniŋ? Te lende i cho ni, mɛɛ ŋ cho yooŋgu sɔvɛ ke naa tɔnɔɔ wo biondɔɔ. Vɛɛ naŋ kpakpala yɛ kpundɛ waa naa? Ŋ nɔ miŋ kɛsiŋ o kɔl maa yooŋgu kɛ kɛ naŋ sɔla o yaula naalaŋ niŋ, o Chɛhowa lo o fula ni. Baabuiyo dimi aa, “Ya cho Mɛlɛka Yaawɛɛ, Mɛlɛka nyaa ni. Le teleŋ o teleŋ nyɛ bɛnda le tosaa wo, ndu ya I pɛɛku nya ni.” (Aisaya 48:​17) O buŋgɛi hei niŋ, ŋ cho isɔɔ a kɛɛsiaalaŋ sala yaa la nɔla mi la mala naa le tɔnɔɔ sɔlaa o nyɛm Chɛhowa cho naa kioo kpou woŋ niŋ.

7. Le yɛɛ naŋ nɔ yɛ miŋ veelu diomndaŋ o Baabuiyo niŋ a kɔl naa kpou?

⁷ Veelu diomndaŋ a kɔl numndo kpou. Tonya i cho ni maa le waŋnda apum nda poonyiaa yaulaŋ lapum o Baabuiyo niŋ ni. Kɛ Baabuiyo dimi kpendekele maa “diom o diom cho o yau Mɛlɛkaa niŋ, Nyina Mɛlɛkaa tosa ni ma poonyiaa laŋ. Nduyɛ, la cho diomnda nɔ malaa leniŋ.” (Timoti Diiŋ Ndɔɔ 3:​16) Lelaŋ, ŋ nɔ miŋ veelu diomndaŋ o Baabuiyo niŋ a kɔl naa kpou. Mi puaapilɛnɔɔ loonuŋ maa, mbo pɛɛku sɔɔŋ tau o Baabuiyo niŋ o buŋgɛi ipilɛ niŋ. Nduyɛ mi hei mala ndu le chɔɔ sɔɔŋ wana bii bila lapi le woŋ. Lelaŋ, tuupa miŋ veelu diomndaŋ o Baabuiyo niŋ, ŋ nɔ miŋ nyuna Chɛhowa o piɛileŋ niŋ le mbo kumbi naa kɔllo wakpa, nduyɛ le naa taasioo kioo le sinapɛŋgoo sɔlaa o sɔɔŋ o yeema naa miŋ pɛɛku woŋ niŋ.—Ɛsilua 7:​10; nuawɔ Chemisi 1:​5.

8, 9. (a) Yɛɛ ŋ nɔ yɛ ma nyunaŋ te a wa pɛ diomndaŋ veeloo o Baabuiyo niŋ? (b) Yɛɛ suiliŋnda cho le wanaa chua chilaŋ o kunda leKilisiɔŋndo niŋnda dimullɛ naa a Chɛhowa okɔɔ?

⁸ Nyuuniaŋ. Te a veelu pɛ diomndaŋ o Baabuiyo niŋ, sim ndɔ kpɛ ma nyunaŋ aa, ‘Yɛɛ buŋgɛi hei dimullɛ ya a Chɛhowa okɔɔ? Vɛɛ ya soliŋ yɛ nyɛ ya pɛɛku wo kpeku o yoomu nuu niŋ? Vɛɛ ya soliŋ yɛ ndu kpeku le acheleŋnda malaa?’ Te ŋ yiyaŋ pɛ o nyunalaŋ ndaŋ choo, ŋ nɔla miŋ chɔɔlu tɔnɔɔ sɔla o diomnda naŋ veelu o Baabuiyo niŋndaŋ. Ŋ tofaŋndɔ tamaseliiyo opilɛ. Baabuiyo tɛɛsiaa suiliŋnda Kilisiɔŋaa chua chilaŋnda. (Nuawɔ Timoti Tasoo 3:​2-7.) Naa pumnda cho chila chua le. Le hei, miŋ yiyaŋ maa ŋ sɔla tɔnɔɔ o nyɛ Baabuiyo dimi a wanaa chua chilaŋ okɔɔ wa le. Kɛ, ŋ soliŋ ndɔ nyunala yaalaŋ a amaluaŋ kpeku o pɛllo hoo niŋ miŋ che mɛɛ naa kpou sɔla tɔnɔɔ o suiliŋnda laŋ niŋ yɛ.

⁹ “Yɛɛ buŋgɛi hei dimullɛ ya a Chɛhowa okɔɔ?” Chɛhowa ke naa suiliŋndaŋ le wanaa  chua chilaŋ o kundaa niŋnda. O nɔ sawala filioŋndaŋ le wanaa chua chilaŋ o kunda leKilisiɔŋndo niŋnda. Hoo chɔm ni maa nyɛ sɔviɔɔ pila Chɛhowa che kunda leKilisiɔŋndo ni. Baabuiyo dimi maa “piɔm Po ndɔɔ vi wo ndu tosa ni, mi kunda wanaa laalaŋnda wa le Mɛlɛka.” (Walta Wanaa Chiisuaa 20:​28) Lelaŋ, Chɛhowa yeema wanaa chua chilaŋnda ma kɛsi tamasi kɛndɔɔ. Nduyɛ a nɔ ma dɔunuŋ kona o Chɛhowa lo a mɛɛ nda cho waŋnda biyɔɔ o kunda leKilisiɔŋndo niŋ yɛ. O yeema ma chaa naa biyɔɔ nyɛkɛndɛi. (Aisaya 32:​1, 2) Te ŋ veelu pɛ diomndaŋ a suiliŋndaŋ ndaŋ okɔɔ, miŋ pɛɛku mɛɛ kpɛ Chɛhowa buulaŋ le naa yɛ.

10, 11. (a) Te ŋ wa pɛ diomndaŋ veeloo a suiliŋnda wanaa chua chilaŋ o kundaa niŋnda okɔɔ, vɛɛ naŋ duau yɛ nyɛ naŋ pɛɛku wo o wali niŋ? (b) Vɛɛ naŋ soliŋ yɛ nyɛ naŋ pɛɛku wo kpeku le acheleŋnda malaa?

¹⁰ “Vɛɛ ya soliŋ yɛ nyɛ ya pɛɛku wo kpeku o yoomu nuu niŋ?” Te wana chua chilaŋ o kundaa niŋndo ŋ cho niŋ ni, a nɔ kuee ma wa hɔlteŋ keekoo lɔɔlɔɔ o suiliŋndaŋ ndaŋ choo nduyɛ ma kindiŋ le hiouwɔɔ lachioo tosaa. Te “wana landuŋ kɔl le waa kunda wanaa laalaŋnda lachi wo” ŋ cho ni, a nɔ ma kindiŋ kpoke le suiliŋndaŋ ndaŋ sɔlaa. (Timoti Tasoo 3:​1) Kɛ Kilisiɔŋnda kpou nɔ ma pɛɛku a suiliŋndaŋ ndaŋ okɔɔ. Le tamaseliiyo, Chɛhowa yeema naa pilɛŋ pilɛŋnda miŋ nɔ kɔlta biuwaŋndaŋ nduyɛ miŋ soliŋ sinapɛŋgu naa kpeku. (Filipiaŋnda 4:​5; Pitɛ Tasoo 4:​7) Te o wa pɛ mi wanaa chua chilaŋ o kunda leKilisiɔŋndo niŋnda kɛsi “taamasi” kɛndɔɔ, ŋ nɔla miŋ pɛɛku nda o ba, okoŋ, miŋ tol tamasi ndaa kɔɔli le tiindaŋndo dɔuwɔɔ o Mɛlɛka niŋ.—Pitɛ Tasoo 5:​3; Hibuluiya 13:​7.

¹¹ “Vɛɛ ya soliŋ yɛ ndu kpeku le acheleŋnda malaa?” Ŋ soliŋ suiliŋnda cho o Baabuiyo niŋndaŋ kpeku le wanaa chuaŋ chilaŋ o kundaa niŋnda miŋ mala wanaa naŋ cho Baabuiyo pɛɛkoo wa, a wanaa nɔ yeemɛi le Baabuiyo pɛɛkoo le ma sina teŋgeŋndo tɛɛŋ wanaa chua chilaŋ o kunda niŋnda a simlachiaa o kaaŋii cheleŋnde niŋ. Suiliŋnda Baabuiyo tɛɛsiaa laŋ ndaŋ la mala naa le loonɔŋndo wali kala kala wanaa chua chilaŋnda cho tosaa o kunda leKilisiɔŋndo niŋndo. Nduyɛ hei mala naa miŋ ke puaapiliaa haa bɛɛleŋ. (Tɛsaloniaŋ Tasoo 5:​12) Mɛɛ naŋ hiau lachi fau a nda bɛɛleŋ kioo, lende koni nda bɛɛ sɔla nyaaloo o wali nda ke nda le tosaa wo niŋ ni.—Hibuluiya 13:​17.

12, 13. (a) Yaasiaa suu kuɛɛ naŋ nɔ yɛ miŋ tosa o yaula naŋ nɔlaŋ niŋ? (b) Chɔmndɔ tamaseliiyo mɛɛ yaasiaa naŋ tosa wo mala naa le sɔɔŋ cheleŋ biyɔɔ bila yɛ?

¹² Tosa yaasiaa. Te ŋ wa pɛ Baabuiyo pɛɛkoo, ŋ tofa mulilaŋ le nyunalaŋ ndaŋ,

• Nɛɛ poonyiaa yɛ buŋgɛi hei o Baabuiyo niŋ?

• Kuɛɛnɛ nduyɛ a teleŋ kuɛɛ i poonyiaŋ yɛ?

• Sɔɔŋ sɔvɛŋ kuɛɛ wa yɛ yɔŋnɔŋndo a teleŋ nda poonyiaa yauwo hoo wo?

Yaasiaa waa naa mala naa le sinaa nyɛ naŋ pɛɛku o sɔɔŋ naŋ bii bila lapi le woŋ niŋ.

¹³ Le tamaseliiyo, Isikiaa 14:​13, 14 dimi aa, “Lelɛŋ o lelɛŋ le kɛɛ waa sakpo a ya Mɛlɛka pɛ, dɛnɛ palaa ya I tusi leŋ choo ni, mi tosa mi nyɛ diaa chuu o lɛŋnde leŋ niŋ kpou, mi yima bɛnduaŋ ma del loŋ. Nduyɛ wana chiee ni, chɔlu ni, ma sɔla piɔmndo. Mi che bɛɛ Nuuwa ni, Daaniɛɛ ni, a Choobu, mi nda aa wa wanaa sakpo ya Mɛlɛka o hɔl, kɛ nda aa yɔŋ bɛɛ mi nda aa wa o lɛŋnde leŋ niŋ, nda aa nɔla mi nda aa chiindiaa yoomula wanaa kaŋ le sakpoyɛi ndɛi le, nda pila koni nda aa chinda niŋ ni. Nyɛ Mɛlɛka Yaawɛɛ Kpuluŋgumaa bɛndoo o dimi wo cho koŋ ni.” Te ŋ tosa pɛ yaasiaa, ŋ cho pɛɛku maa kɛlɛŋgaa o wɔsi 612 niŋ tuupa mi Kiliti vialuŋ Isikiaa ndoo poonyiaa diomndaŋ ndaŋ ni. Nuuwaa nda Choobu ndaa vi niŋ le wɔsilaŋ o kɛmɛlaŋ niŋ. Kɛ mi Chɛhowa loonuŋ ndɔ kɛ a tiindaŋ ndaa dɔu o ndu niŋndo. Kɛ Daaniɛɛ ndu wa wɔ achal. Kɛlɛŋgaa  Daaniɛɛ wa niŋ wɔsilaŋ 20 teleŋ Chɛhowa dimi maa wana sakpoo o wa ni maa Nuuwa a Choobu. Yɛɛ naŋ pɛɛku yɛ? Ŋ pɛɛku maa Chɛhowa che maa wanaa sɔviaa wanaa dɔu tiindaŋndo o ndu niŋnda cho ni, nduyɛ feleŋguaa bɛɛ.—Sam 148:​12-14.

14. Vɛɛ yaula nda poonyiaa le feleŋguaa laŋ la mala yɛ nda, nduyɛ vɛɛ la mala yɛ vɛlɛ acheleŋnda? (Tofa fotueiyo o peele naŋ kandu leŋ choo.)

¹⁴ Yaulaŋ le feleŋguaa. Ŋ pɛɛku maa miŋ sɔla tɔnɔɔ o yaula cho o Baabuiyo niŋndaŋ kpou. Lende koni vɛlɛ, miŋ sɔla tɔnɔɔ o yaula naalaŋ niŋ kpou. Ŋ yaasiaŋndɔ tamaseliilaŋ lapum. O wɔsiŋ laŋga hiou woŋ niŋ, Chɛhowa ke niŋ feleŋguaa nyɔɔŋ tau.  ^[1] (Tofa diomnda chɔɔlaalaŋ.) Nyɛm Chɛhowa ke nda muŋndoŋ mala nda le simulta nda komal o sukuu laŋ biuwɔŋndo, a teleŋ nda wa hindɔɔ wo. Kɛ vɛɛ naa kpou sɔla yɛ tɔnɔɔ te ŋ wa pɛ nuaa o yaula nda poonyiaa laŋ le feleŋguaa laŋ niŋ? Te ŋ wa pɛ laŋ nuaa, ŋ nɔla miŋ pɛɛku a bahawɛila komal nda laŋ okɔɔ. O hei niŋ, ŋ nɔla miŋ mala nda nduyɛ miŋ ke nda kɔl dɛɛniaa.

15. Le yɛɛ Kilisiɔŋaa kaasoŋnda nɔ yɛ kuee ma nɔ yeemɛi o yaula cho le feleŋguaa laŋ?

¹⁵ Kilisiɔŋaa kaasoŋnda nɔ ma yiyaŋ maa a hiou lɔɔ le nuaa o yaula nda poonyiaa le feleŋguaa wa niŋ te. Bahawɛila nda poonyiaa o yaulaŋ ndaŋ niŋndo piiliaŋ naa kpou. Le tamaseliiyo, naa kpou nɔ miŋ soo a laalaŋ naa okɔɔ, ŋ nɔ miŋ bii kɔlta naalaŋ, ŋ nɔ miŋ kɛɛ sɔɔŋ wɔɔŋ chaaŋaa naa nyindu naa le tosaa woŋ, nduyɛ ŋ nɔ miŋ kpakpala chaŋyaŋ wɔɔŋndoŋ, a yelelaŋnda wɔɔŋndaŋ. Mi che bɛɛ naa le feleŋguaa nda poonyiaa yaulaŋ ndaŋ ni, kɛ o Baabuiyo niŋ yooŋgu cho o laŋ niŋndo fula ni, nduyɛ la cho tɔnɔɔ le Kilisiɔŋnda kpou.

16. Yɛɛ cheleŋ yaula naalaŋ la mala yɛ feleŋguaa le tosaa?

¹⁶ Yaula nda poonyiaa le feleŋguaa wa la mala nda le chaŋyɛi ndɛi kindioo poŋ nda Chɛhowaa tɛɛŋ. (Nuawɔ Ikilisiaatii 12:​1, 13.) Nduyɛ kaasoŋnda bɛɛ sɔla tɔnɔɔ o laŋ niŋ. Le tamaseliiyo, “Tiondoo!” le Nyaakuɛiyo, 2009 ve nɔ suɛi lebolle aa, “Young People Ask . . . How Can I Make Bible Reading Enjoyable?” Suɛi lebolii keŋ nɔ kɛɛsiaala mala naalaŋ tau. I nɔ vɛlɛ kɔfoo o naŋ nɔla miŋ kelu peele leŋ nduyɛ miŋ wa leŋ kpekoo soliŋndo le Baabuiyo pɛɛkoo wo. Baa mi kaasoŋnda ndaa sɔla pa tɔnɔɔ o suɛi lebolii keŋ niŋ? Mi chua nɔ yuŋguleŋndo dimi maa i wa ikala le ndu le diomndaŋ veeloo o Baabuiyo niŋ. Kɛ mbo soliŋ kɛɛsiaala  cho o suɛi lebolii keŋ niŋndaŋ kpeku nduyɛ, o wa niŋ bɔɔ a kɔl kɛndɛ le diomndaŋ veeloo o Baabuiyo niŋ. Mob dimi maa o cho niŋ tɔnɔɔ sɔlaa le chɔɔ mɛɛ yooŋgu cho o yaula Baabuilaŋ niŋndo vela velaŋ yɛ, nduyɛ nyɔɔ cho ndu bɔɔ hɛnaŋndo. Mbo chɔɔlu dimi aa, “Kani bɛɛ I ve a kɔl kɛndɛ le diomndaŋ veeloo o Baabuiyo niŋ maa suŋ suŋ te.”

17, 18. Tɔnɔ yɛɛ naŋ sɔla yɛ te ŋ wa pɛ nuaa o yaula nda poonyiaa le wana o wana laŋ niŋ? Chɔmndɔ tamaseliiyo.

¹⁷ Yaulaŋ le wana o wana. Kanduŋ a wɔsi 2008 ve, ŋ tuei niŋ Bandu Mɛŋgɛlaa naŋ soliŋ kpeku le pɛɛkoo wo yeela. Le Seiyaa Chɛhowaa nda poonyiaa ndu ni. Kɛ ŋ nɔ vɛlɛ o cheleŋ le wana o wana. Vɛɛ naŋ sɔla yɛ vɛlɛ tɔnɔɔ o koŋ niŋ? Ŋ soliŋ ndɔ tamaseliiyo kpeku. Te a veelu pɛ waŋndo o Toŋgo leMasaa niŋ le bɔŋaŋndo nduyɛ mbo hiŋ, ma naŋ kɔl tau. Nduyɛ ma yiyaŋ a wana koŋ okɔɔ te puaapilɛnɔɔ wa pɛ suɛi yooŋgoo. Ma wa yiyaŋndo mɛɛ wana koŋ cho yiyaŋ a sɔɔŋ o cho nilaŋ yaŋɔɔ woŋ yɛ, nduyɛ a mɛɛ sɔɔŋ muŋ cho ndu mala le yoomu ndɔɔ siŋgaa yɛ. A tonya, mi hei nɛŋi num kɔllo tau nduyɛ ma mel Mɛlɛka balikaa le suɛi nda yɔŋgu keŋ nde.

¹⁸ Mi nyɛ pilɛ koŋ yɔŋnuŋ naa te ŋ wa pɛ nuaa o yaula nda poonyiaa le wana o wana laŋ niŋ. Le tamaseliiyo, diomnda tɛtɛlɛlaŋ nda soliŋ kpeku ni le Bandu Mɛŋgɛlaa cho le wana o wana wo poonyiaa, a sɔɔŋ cho o jw.org le Baabuiyo tɛɛsiaa woŋ. Te ŋ wa pɛ sɔɔŋ muŋ nuaa, ŋ cho chɔɔlu sinapɛŋgu yiŋgoloŋndo sɔla nduyɛ miŋ kaalaa tonya Baabui naŋ sina niŋ nyɛkɛndɛiyo. Ŋ nɔla vɛlɛ miŋ pɛɛku nɛila sɛnɛila cheleŋ le laalaŋ naa waŋnda tɛɛsiallo o yooŋgu kɛndɔɔ dimioo niŋ. Lende koni yau “Tiondoo!” bɛɛ chɔɔlu laalaŋ naa kindi ni maa Wana Toosiaa nyɔɔŋ ndo cho. Mbo mala naa vɛlɛ le pɛɛkoo mɛɛ naŋ tiuba miŋ timbi seileŋ a laalaŋnda naalaŋ okɔɔ yɛ.—Nuawɔ Pitɛ Tasoo 3:​15, 16.

19. Vɛɛ naŋ chɔm yɛ Chɛhowa balika melaa le nyɛm o cho naa kioo woŋ?

¹⁹ Ŋ che kpendekele maa Chɛhowa ke naa niŋ silalaŋ tau a nɛi chɔmaa le tɔnɔ naa. (Maatiu 5:​3) Ŋ hiounuŋ lachi a diomndaŋ veeloo o yaula o ke naalaŋ niŋ. Te ŋ tosa lende pɛ, ŋ cho tɔnɔɔ sɔla nduyɛ miŋ chɔm Chɛhowa maa ŋ hini kɔl le nyɛm o cho naa kioo woŋ.—Aisaya 48:​17.