SUƐI LEBOLLE O KƆƆ | TE WANA Ŋ KAALA WO VI PƐ
Baa o Bɛnda le Mɔnɛi Biyɔɔ Le?
Baa a naa niŋ pa le teleŋ biŋgi? Naapum ma keleŋa sioŋgɔɔ nduyɛ ma puɛɛnuŋ pɛŋ a naa koŋ okɔɔ. Kɛ o cho lende le naŋ puɛɛnuŋ a mɔnɛi biyɔɔ okɔɔ le. Mi wana sinaa dɛnɛ bɛndoo diolaŋ Alaŋ Wulifɛlit poonyiaa o yau ndɔɔ hoo niŋ “Healing a Spouse’s Grieving Heart” aa, “Nyɛ o nyɛ cho mbo tosa le ‘ma puɛɛnuŋ’ mɔnɛi biyɔɔ le.” Nduyɛ mbo chɔɔlu vɛlɛ dimi aa, “Kɛ mɛɛ teleŋndo hiau fau, vɛlɛ a mala wanaa cheleŋnda, a nɔla ma puɛɛnuŋ tiŋ a mɔnɛi biyɔɔ okɔɔ.”
Le tamaseliiyo, ŋ yaasiaŋndɔ nyɛ wana yuŋgu lebollo, Ebilaham ndoo tosa teleŋ laandɔ vi wo. Baabuiyo dimi maa “mi Ebilaham chaŋ laa ndɔ.” Diomndaŋ ndaŋ mbo “chaŋ laa ndɔ,” chɔm maa mbo chua teleŋ vilɛi le mi Ebilaham biunuŋ piɔm laa ndɔɔ. * Tamasi diiŋ ndɔɔ cho Chekɔpu ni. Mɛɛ nda dimul Chekɔpu choolaŋ maa visi manyumndo dii Choosɛ po ndɔ, mbo laalaŋ choola laŋ. Mi Chekɔpu bii mɔnɛi le “palɛi faŋga” nduyɛ yuŋgu ndɔɔ nɔla ndu kɔllo dɛɛniaa le. Mɛɛ wɔsiŋ bɔɔbɔɔ hiou okoŋ kɔɔli, piɔm Choosiɔɔ wa wɔ Chekɔpu kɔllo tɛɛmboo tau.—Chɛnɛsee 23:2; 37:34, 35; 42:36; 45:28.
Mi Ebilaham chaŋ teleŋ Selua vi wo
Nyɛ pilɔɔ kpe yɔŋnuŋ hau a wanaa bɔɔbɔɔ cho mɔnɛi biyɔɔ le piɔm wana nda kaala wo ni. Ŋ yaasiaŋndɔ tamaseliilaŋ la tiɔɔŋ.
“Mi Lɔbɔti pɔnɔ ni wu a Suɛɛsɔɔ 9, 2008 ve. Tuupa mbo mal le kɔlaŋ o wallo niŋ o paale o sɔla leŋ piɔm kpundɔɔ leŋ choo, miŋ tosa nyɛ naŋ tosa lepaa o lepaa wo. Mɛɛ naŋ chii nyɛdiaa idiiyo dio, miŋ wɛiyaŋ sondolaŋ, miŋ kɔɔmiaŋ, nduyɛ miŋ dimulaŋ aa ‘I kaala num.’ I wa wɔ a kɔl tambɛiyo le wɔsilaŋ la ŋɔmpum o piɔm ndɔɔ kɔɔli. I laalaŋ maa I puɛɛnuŋ niŋ a piɔm Lɔbɔtioo le.”—Kaal, wɔsilaŋ 60.
“Mi che bɛɛ naa o hiou niŋ wɔsilaŋ 18 chɔŋ a teleŋ laa ni kaalaa vi wo, kɛ I cho wɔ yiyaŋndo a ndu okɔɔ, nduyɛ mi wa mɔnɛi biyɔɔ le ndu. Te I che pɛ nyɛ o nyɛ Mɛlɛka toosiaa mbo naŋ, I yiyaŋ dɔɔ a laa nuu. Nduyɛ kɔndɔfillo nɔla mbo pɛŋgi ya biyɔɔ a mɛɛ ndu bɛɛ ndoo wa niŋ a nyaale le chɔɔ nyɛm ya cho chɔɔ woŋ.”—Etiɛŋ, wɔsilaŋ 84.
Ŋ che kpendekele maa mi naa kpou bii mɔnɛi le teleŋ vilɛi te wana naŋ kaala wo vi pɛ. Wana o wana nɔ mɛɛ o bii mɔnɛi yɛ, nduyɛ i ve suɛi taasi le waŋndo pɛɛsaa a mɛɛ ndu bii suɛi kpundɛi yɛ le. Te ŋ hiu pɛ mɔnɛi biyɔɔ, ŋ nɔ vɛlɛ miŋ kɛɛ naapila tɔɔyaŋndo biyɔɔ. Vɛɛ naŋ looku yɛ mɔnɛi biunɔŋ?
^ pɛl 4 Mi po Ebilahamndo, Aase bii mɔnɛi le teleŋ vilɛi. Mɛɛ Selua vi, mi Aase po ndɔ bii mɔnɛi le wɔsilaŋ la yaa o piɔm ndɔɔ kɔɔli.—Chɛnɛsee 24:67.
