1-3. Yɛɛ cho yɛ Chɛhowa piɛiyo ‘a kɔllo kpou’? Chɔmndɔ taamaseliiyo?

NAA kpou wanaa lahakiaa naŋ cho ni nduyɛ miŋ tosa biondɔŋndaŋ. Ŋ mel Chɛhowa balikaa le naa sala baŋaa kioo, nduyɛ o cho o bɛɛndiaŋ le naa malɔɔ haki. Lelaŋ, te ŋ tuisiŋ pɛ nduyɛ miŋ mulul yɔŋ wɔɔŋndo kɔɔ, ŋ nɔla miŋ nyuna ndu le malɔɔ hakioo. Ŋ nɔla miŋ nɔ tiindaŋndo maa Chɛhowa tuisi naa nyɛpalaa choo mbo “fuuluu a yɔŋ wɔɔŋ naa ŋ tosa wo le.” (Sam 103:10) Kɛ, ŋ nɔ miŋ piɛi ndu a kɔl naa kpou. (Koloniko Tasoo 28:9) Vɛɛ naŋ looku yɛ keŋ tosa mi che bɛɛ wanaa lahakiaa naŋ cho ni?

² Le naa malaa, ŋ nɔ miŋ tuu yoomu Masaa Asa wo a o Masaa Amasiya wo. Mi masaa ŋiɔɔŋnda haa kpou tosa sɔɔŋ kɛndɔŋ, kɛ ma tosa vɛlɛ biondɔŋndaŋ kanifuule, wanaa lahakiaa nda wa ni. Kɛ Baabuiyo dimi maa mi “Asa lo o tiindaŋ ndɔ koŋ choo haaa a yoomu ndɔɔ mɛɛlulaŋ.” (Koloniko Diiŋ Ndɔɔ 15:16, 17; 25:1, 2; Pulɔwaa 17:3) Lɔɔlɔɔ Asa wa kindiŋndo le Chɛhowa piɛiyo a kɔl ndɔɔ kpou, nduyɛ o wa o yɔŋgaŋ kpou o Chɛhowa lo. (Koloniko Tasoo 28:9) Kɛ Amasiya  ndu piɛi Chɛhowa ‘a kɔllo kpou’ le. Mɛɛ o yem yaamɔɔwaa Mɛlɛkaa, mbo kuendi piɔmaa ndaa, okoŋ, mbo huŋ kandu nda sooluuwo.—Koloniko Diiŋ Ndɔɔ 25:11-16.

³ Wana piɛi Chɛhowa ‘a kɔllo kpou’ wo nɔ kaala yiŋgoloŋndo le ndu, nduyɛ o yeema mbo piɛi ndu lefafɛɛŋ. Te Baabuiyo dimi pɛ aa ‘kɔllo,’ ndu sim le wana chieeyɛi nɛi ni. Ndu cho ni, mɛɛ naŋ yiyaŋ yɛ, nyɛm naŋ kaala woŋ, nyɛ naŋ yeema le tosaa a yoomu naa wo, a le sabu naŋ cho tosaa sɔɔŋ ŋpum ndo. Mi che bɛɛ naa wanaa lahakiaa naŋ cho ni, kɛ ŋ nɔla miŋ piɛi Chɛhowa a kɔl naa kpou. A beŋ naa le ndu piɛi le. Nduyɛ, o cho ko le kaa naŋ nɔ le ndu piɛiyo wo le. Ŋ cho ndu piɛiyo kanifuule, ŋ yeema kɛsɛ miŋ piɛi ndu.—Koloniko Diiŋ Ndɔɔ 19:9.

4. Yɛɛ naŋ cho yɛ niko yaasiaa?

⁴ Te ŋ yaasiaa pɛ yoomu Asa wo, a masaa laalaŋaa yaa cheleŋ wa o Chuda niŋnda, ŋ sɔla sinapɛŋgoo nyɛkɛndɛi a nyɛ o sim le Chɛhowa piɛiyo a kɔllo kpou wo. Masaa kaŋ cho yɛ Chɛhosiafati, Hɛsɛkiya, a Choosaya ni. Mi che bɛɛ mi masaa hiɔɔluaa haa tosa biondɔŋndaŋ, kɛ ma nɛŋi Chɛhowa kɔllo. Mbo cha maa ma piɛi ndu a kɔl ndaa kpou. Le yɛɛ Mɛlɛka che yɛ nda lende, nduyɛ vɛɛ naŋ tuallɛ taamasi ndaa kɔɔli?

5. Yɛɛ Asa ndoo tosa yɛ mɛɛ o simnuŋ masaa?

⁵ Asa wa masa yaa ndɔɔ o Chuda niŋ ni. A boondii kaaleŋ Isɔluɛi piɔuwaŋ tɛɛŋndo o simnuŋ masa ni, boondii masaleŋ Isɔluɛi a masaleŋ Chuda wa wo. Mɛɛ Asa simnuŋ masaa le Chuda, ndoo nɔ kɔl sikpaa le piɛile lachoowaleŋ faŋaa, nduyɛ mbo kindiŋ le kaa ihini nɔɔlɛiyo faŋaa o masale ndɔleŋ bɛŋgu. Mbo pesi pesi piɔmaa waŋnda wa sooluuwo wa, nduyɛ mbo tuau wanaa wa suundaa o maaŋndo niŋnda. Mi Asa faŋa pɛŋ mama ndɔ o foofo o wa maa “kalaa masa bɛndu” wo, le mɛɛ “ndu oo nɔ piɔm nda aa tosa sɔɔŋ wɔɔŋ ndoŋ” ndo yɛ. (Masaa Bɛnduaa Tasiaa 15:11-13) Mi Asa dɛɛniaa vɛlɛ waŋnda le “ma tosa nyɛ hini Mɛlɛka Yaawɛɛ . . . kɔllo wo” nduyɛ ma diikuŋ “sawala ndɔlaŋ a pɛɛkula ndɔlaŋ.” Mi Asa kei o nɛi o nɛi niŋ le acheleŋnda malaa ma piɛi Chɛhowa.—Koloniko Diiŋ Ndɔɔ 14:4.

6. Yɛɛ Asa ndoo tosa yɛ mɛɛ Itoopiaŋnda chiŋalaŋ Chuda a sɔŋgɔɔ?

⁶ O wɔsiŋ tɔ tase Asa chal o masaleŋ ndoŋ, chɔula ve o masaleŋ Chuda bɛŋgu le. Kɛ mi Itoopiaŋnda huŋ a puaa chɔuwa miiliɔŋndo opilɛ a nyɛm nyaanaŋ suaa naŋndoŋ kɛmɔɔ leyaa le Chuda chiŋalaŋndo a sɔŋgɔɔ. (Koloniko Diiŋ Ndɔɔ 14:1, 6, 9, 10) Yɛɛ Asa ndoo tosa yɛ? Ndoo tiindaŋ maa Chɛhowa cho wanaa nduaa mala. Okoŋ, mbo piɛi o Chɛhowa lo le mbo mala nda ma yem chɔuwo. (Nuawɔ Koloniko Diiŋ Ndɔɔ 14:11.) Teleŋndaŋ lapum, mi Chɛhowa ndoo hɛli le wanaa nduaa malaa ma yem yaamɔɔwaa ndaa, o yɔŋ bɛɛ mi masaa ndaa dou tiindaŋ o ndu niŋ te. Mi ndoo tosa hei le chɔmndo maa Mɛlɛka tonyaa o cho ni. (Masaa Bɛnduaa  Tasiaa 20:13, 26-30) Kɛ a teleŋndo hoo, mi Chɛhowa mala wanaa nduaa le mɛɛ Asa ndoo dɔu tiindaŋndo o ndu niŋ yɛ. (Koloniko Diiŋ Ndɔɔ 14:12, 13) Kɛ mi Asa tosa siɔwii wɔɔŋ wɔɔŋnde. Mbo nyuna masaa Siiliaa le malaa, kɛ o nyuna Chɛhowa le. (Masaa Bɛnduaa Tasiaa 15:16-22) A koŋ kpou, mi Chɛhowa cha maa Asa kaala ndu. Mi Asa yɔŋguŋ a kɔllo kpou o Chɛhowa lo. “O lo o tiindaŋ ndɔ koŋ choo haaa a yoomu ndɔɔ mɛɛlulaŋ.” Vɛɛ naŋ tuallɛ taamasi kɛndɛ Asa wo kɔɔli?—Masaa Bɛnduaa Tasiaa 15:14.

7, 8. Vɛɛ ŋ tuallɛ taamasi Asa wo kɔɔli?

⁷ Vɛɛ naŋ looku yɛ sina maa ŋ cho Chɛhowa piɛiyo a kɔllo kpou? Ŋ nyunaŋndɔ aa, ‘I cho pa Chɛhowa diikɔŋ o wa bɛɛ ikala le tosaa lende? I nɔ pa kɔl sikpaa le kunda ndɔ leKilisiɔŋndo kɛsioo o diandaa?’ Yiyaŋndɔ mɛɛ kpɛ Asa ndoo yeema kɔl sikpaa le mama ndɔ faŋaa o foofo ndɔ lemasaa choo yɛ! Teleŋndaŋ lapum, a nɔ ma wa a kɔllo sikpa maa Asa. Le taamaseliiyo, te o wa yɛ mi waŋndo o yuŋgu numndo niŋ ɔɔ chaŋyɛi num nya chii baltaŋ nde tosa hakioo, kɛ mbo kɛɛ le yɔŋ ndɔ wɔɔŋndo malɔɔ, nduyɛ mbo nɔ le solioo sɔlaa o kunda leKilisiɔŋndo niŋ? A cho pa kɔl sikpaa nɔ le kiɔɔ chaŋyɛi tosaa a wana koŋ? Yɛɛ kɔl numndo cho yɛ num nyindɔɔ le tosaa?

⁸ Maa Asa, teleŋndaŋ lapum miŋ yiyaŋ maa wana o wana kaala naa le. Kɛlɛŋgaa mi chaaŋaa numnda o sukuu ɔɔ wanaa pɛɛku numnda mam num le mɛɛ ŋ cho Chɛhowɛinɔɔ yɛ. Ɔɔ lepum, mi wanaa nya tosa baalaa wa yiyaŋ maa diɔmndo ŋ cho ni le mɛɛ ŋ mal baalaa le bɔŋaŋ ibuŋgaa biyɔɔ ɔɔ le mɛɛ ŋ kɛɛ teleŋndo chɔɔloo le wallo yɛ. O sɔɔŋ waa naa niŋ, dɔu tiindaŋndo o Chɛhowa niŋ maa Asa. Piɛi o Chɛhowa lo, nɔ kɔl sikpaa, nduyɛ ma hiou lachi a nyɛ bɛnda wo tosaa. Loonuŋ maa mi Mɛlɛka luei Asa yoomuaŋ, nduyɛ num bɛɛ o cho num yoomuaŋ luei.

9. Vɛɛ naŋ nɛŋi yɛ Chɛhowa kɔl te ŋ wa pɛ yooŋgu kɛndɔɔ dimioo?

⁹ Asa ndoo yiyaŋ ko a ndupila okɔɔ le. Kɛ mbo dɛɛniaa waŋnda le “ma tosa nyɛ hini Mɛlɛka Yaawɛɛ . . . kɔllo wo.” Naa bɛɛ cho waŋnda malaa le Chɛhowa piɛiyo. Mbo sina te ŋ wa pɛ suɛi o wanaa cheleŋnda lo a ndu okɔɔ. Kɔllo pila o naŋ ni, te o wa pɛ mi kaala naŋ nɔ le ndu wo nyindu naa le keŋ tosaa, nduyɛ le mɛɛ naŋ buulaŋ le waŋnda a chilaŋ ndalaŋ yɛ!

10, 11. Vɛɛ naŋ tuallɛ taamasi Chɛhosiafati wo kɔɔli?

¹⁰ Po Asa wo, Chɛhosiafati wa ni. Mbo tual “kaa Asa, finya ndɔ o wa choo wo” kɔɔli. (Koloniko Diiŋ Ndɔɔ 20:31, 32) Vɛɛ o tosa yɛ keŋ? Maa finya ndɔ, mi Chɛhosiafati dɛɛniaa waŋnda le ma wa Chɛhowa piɛiyo. Mbo viam puaa o chieeŋ bɛndoŋ o Chuda niŋ le ma kɔ pɛɛku waŋnda “o yau lasawa Mɛlɛka Yaawɛɛ wo” niŋ. (Koloniko Diiŋ Ndɔɔ 17:7-10) Mi Chɛhosiafati kua pɛŋ o tanda lemasa wa kpeŋgii baluaŋnde o Isɔluɛi niŋndo, o wanaa wa o lɛŋnde ipembuleŋ o Efiluem niŋnda, le nda dɛɛniaa “ma miiŋgu Mɛlɛka Yaawɛɛ, . . . sooluuwo.” (Koloniko Diiŋ Ndɔɔ 19:4)  Mi masaa Chɛhosiafati “tosa nyɛ bɛnda Mɛlɛka Yaawɛɛ o hɔllo.”—Koloniko Diiŋ Ndɔɔ 22:9.

¹¹ Hau, Chɛhowa yeema waŋnda o chieeŋndo choo le ma pɛɛku a ndu okɔɔ. Nduyɛ naa kpou nɔla miŋ yɔŋgu malaa le wallo hoo tosaa. Baa kpeleŋ numndo i cho ni le wallo hoo tosaa ipaŋgu o ipaŋgu? Baa a yeema pa le waŋnda Baabuiyo pɛɛkoo le halikpeŋ mi nda bɛɛ kandu Chɛhowa piɛiyo? A cho pa piɛileŋ a hei okɔɔ? Te a kindiŋ pɛ, Chɛhowa nɔla mbo mala num le ma kandu pɛɛku Baabuiyo tosaa a waŋndo. Baa a nɔ pa yeemɛi le waŋndo pɛɛkoo teleŋ ŋ nɔ le pɛŋgioo wo? Nduyɛ mɛɛ Chɛhosiafati ndoo kindiŋ le waŋnda malaa ma miiŋgu vɛlɛ Chɛhowa piɛiyo yɛ, naa bɛɛ kindiŋ le wanaa vi ŋdial o Mɛlɛka piɛiyo niŋnda malaa. Nduyɛ, bɛnduaa kundaa kɛɛsiaa le kɔlaŋ o wanaa sɔla solioo wa lo o tanda ndaa niŋ le nda malaa. Kɛlɛŋgaa waŋnda haa mal niŋ haki nda wa tosaa wo.

12, 13. (a) Mɛɛ siooŋnde bii Chɛhosiafati, yɛɛ ndoo tosa yɛ? (b) Le yɛɛ naŋ nɔ yɛ miŋ tol taamasi Chɛhosiafati wo kɔɔli?

¹² Maa Asa finya ndɔ, mi Chɛhosiafati duau tiindaŋ ndɔɔ o Chɛhowa niŋ a boondii puaa chɔuwaa kaakuu wa huŋ chiŋalaŋ Chuda le sɔŋgɔɔ wo. (Nuawɔ Koloniko Diiŋ Ndɔɔ 20:2-4.) O wa a siooŋnde nduyɛ mbo nyuna Chɛhowa le malaa. O piɛile ndɔleŋ niŋ, mbo dimi maa o tiuba yaamɔɔwa haa yomɔɔ le. Mbo dimi vɛlɛ maa ndu a wanaa nduaa sina nyɛ nda nɔ ma tosa wo le. Chɛhosiafati ndoo nɔ tiindaŋndo maa Chɛhowa cho nda mala. Mbo dimi aa, “Num koni naa ŋ tiindaŋ ni le ma mala naa.”—Koloniko Diiŋ Ndɔɔ 20:12.

¹³ Maa Chɛhosiafati, teleŋndaŋ lapum, ŋ sina nyɛ naŋ nɔ miŋ tosa a bahawɛiyo opum okɔɔ wo le. Naapum mi siooŋnde bii naa. (Kɔliŋtiaŋ Diiŋ Ndɔɔ 4:8, 9) Kɛ loonuŋ a nyɛ Chɛhosiafati ndoo tosa wo. Mbo piɛi o Chɛhowa lo waŋnda o hɔl kpou, nduyɛ mbo dimul ndu maa a kindu ŋdial te. (Koloniko Diiŋ Ndɔɔ 20:5) Wanaa cho yuŋgulaŋ bolteŋ nda nɔ ma tol taamasi Chɛhosiafati wo kɔɔli. Nyuna Chɛhowa le mbo mala num nya yuŋgu numndo le bahawɛiyo biuwɔŋndo nduyɛ le sinaa nyɛ nya nɔ mi la tosa wo. Yɔŋ lasiɔmbu le mi yuŋgu numndo tuei piɛile waa naa le. A cho sina mɛɛ kpɛ ŋ tiindaŋ o Chɛhowa niŋ yɛ. Mi Chɛhowa mala Chɛhosiafati nduyɛ num bɛɛ o cho num mala.

14, 15. Vɛɛ Hɛsɛkiya ndoo dɔu yɛ tiindaŋ ndɔɔ kpou o Mɛlɛka niŋ?

¹⁴ Masa wa vɛlɛ “sakpo Mɛlɛka Yaawɛɛ o hɔl” lo wa Hɛsɛkiya ni. Mi che bɛɛ finya ndɔ wa piɔmnda sooluuwo, okoŋ mbo kɛsi taamasi wɔɔŋndo, o tul ndu kɔɔli le. Mi Hɛsɛkiya tɛɛmbuu “fondaŋnda lasooluula waŋnda nda aa taŋgul le mɛlɛkaa ndaa yɛ yiaa sooluuwo laŋ. . . . O koŋ kɔɔli, nyɛla nda simi a poutaŋ maa masuŋgbu ma sooluu laŋ maa mɛlɛkaa nda laŋ, mbo pesi pesi laŋ kpou. . . . O koŋ kɔɔli, kɛu Muuse ndu oo tuula sindɛ a bulɔŋsiiye, mbo heelu ndu o pollo niŋ ndo, mbo pesi pesi kɛu tuulaa koŋ kpou.” Le mɛɛ Isɔluɛiya wa kɛu koŋ sooluuwo yɛ o tɛɛmbuu ndu ni. Mi Hɛsɛkiya yɔŋguŋ a kɔl ndɔɔ kpou o Chɛhowa lo. “Nyɛ o nyɛ sawala Mɛlɛka ke Muuse laŋ la dimi le tosaa, o pilɛ o mɛi ndu mbo kɛɛ ndu tosa le.”—Masaa Bɛnduaa Diiŋ Nduaa 18:1-6.

 ¹⁵ Teleŋ Hɛsɛkiya wa o masaleŋ choo wo, mi puaa chɔuwaa Asiiliaŋnda simul Chuda le sɔŋgɔɔ nduyɛ ma kɔŋgɔlaŋ le Chulusɛlɛm tɛɛmboo. Mi Sɛnachɛluibi, masaa le Asiiliaa tɛɛndaŋ Chɛhowa, nduyɛ mbo dimul Hɛsɛkiya le mbo yɔŋguŋ o ndulo. A boondii kpundɛ bɛndu koŋ, mi Hɛsɛkiya duau tiindaŋ ndɔɔ kpou o Chɛhowa niŋ nduyɛ mbo piɛi le mala ndɔɔ. Mbo sina maa Mɛlɛka nɔ kpaayaa mbo hiau Asiiliaŋnda nduyɛ o nɔla mbo piŋi wanaa nduaa. (Nuawɔ Aisaya 37:15-20.) Mi Mɛlɛka muli piɛile ndɔleŋ. Mbo yɔŋ maalikɛinɔɔ mbo huŋ diu puaa chɔuwaa Asiiliaŋnda 185,000.—Aisaya 37:36, 37.

16, 17. Vɛɛ ŋ tuallɛ taamasi Hɛsɛkiya wo kɔɔli?

¹⁶ Okoŋ kɔɔli, mi Hɛsɛkiya naa nduyɛ o wa tendu piɔm. A boondii kalɛi keŋ, mbo nyɔɔlu Chɛhowa le mbo loonuŋ tiindaŋ o dɔu o ndu niŋndo nduyɛ mbo mala ndu. (Nuawɔ Masaa Bɛnduaa Diiŋ Nduaa 20:1-3.) Mi Chɛhowa tuɛi piɛile Hɛsɛkiya leŋ nduyɛ mbo siŋgi ndu. Hau ŋ nɔla miŋ wa kaamaa Mɛlɛkaa kɔl le naala naalaŋ siŋgioo ɔɔ le yoomu naa chɔɔloo bɛndioo le. Ŋ sina hei o Baabuiyo niŋ. Kɛ maa Hɛsɛkiya, ŋ nɔla miŋ tiindaŋ Chɛhowa le malaa. Ŋ nɔla miŋ dimul ndu aa, “Oo Mɛlɛka Yaawɛɛ, loonuŋ maa buɛi num dɔu tiindaŋ ndɔɔ o num niŋ ndo ya I cho ni. A sina maa le teleŋ, o teleŋ I cho nyɛ ŋ dimul la wo tosaa a kɔl nuu kpou.” A laalaŋ pa maa Chɛhowa cho lɔɔlɔɔ buulaŋndo le num, o yɔŋ bɛɛ ma wa a naa?—Sam 41:3.

¹⁷ O nɛi kuɛɛ choo naŋ tuallɛ vɛlɛ taamasi Hɛsɛkiya wo kɔɔli? Kɛlɛŋgaa nyɛ sim chaŋyɛi nɛi lachi a Chɛhowa ɔɔ mbo wa teleŋ naa chuaa le ndu piɛiyo. Le taamaseliiyo, wanaa bɔɔbɔɔ cho hau waŋnda chuaa maa mɛlɛkaa nda. Ma ke wanaa nɔ tɔɔ bɛndoo wa bɛɛleŋ tau a wanaa cheleŋaa nda sina le wa bɛɛ. Wanaa bɔɔbɔɔ cho teleŋ ndaa soliŋndo kpeku le nuaa a waŋnda haa okɔɔ a fotueila ndalaŋ. Ɔɔ teleŋnda bɔɔbɔɔ, ma soliŋ nyɛm suukaŋndoŋ kpeku tau tau le suukaŋndo a waŋnda haa o Intanɛtiiyo choo. A tonya, miŋ soliŋ nyɔɔŋ muŋ kpeku le suukaŋndo a yuŋgu naa ɔɔ chaŋyaŋ naŋ chii baltaŋ ndoŋ. Kɛ te ŋ soliŋ muŋ pɛ kpeku le wanaa naŋ sina le wa chaŋyɛi biyɔɔ, o tɛɛmbuu teleŋ naa tau. Te wanaa bɔɔbɔɔ dimi pɛ maa a hɛnaŋ a fotueilaŋ a yooŋgula naŋ handu o Intanɛtiiyo choo laŋ, lepum, miŋ pɛɛluŋ tau. Ɔɔ, te ŋ sina pɛ maa waŋnda apum pɛŋgi nyɛm naŋ handu o Intanɛtiiyo choo woŋ nuaa, miŋ tuulu kɔl. Ŋ pɛɛku nyɛ o taamaseliila Pɔɔl, Akuila, a Pilisila laŋ niŋ. A yiyaŋ pa maa a wa teleŋ ndaa soliŋndo kpeku lepaa o lepaa le nuuviaa nyɛ o nyɛ taaniŋ waŋnda ndaa tosa, taama taama wanaa ve Chɛhowa piɛi le wa? Baabuiyo dimi maa mi Pɔɔl “chua teleŋ ndɔɔ kpede, a balɔɔ suɛi Mɛlɛkɛi dimioo.” Nduyɛ mi Pilisila nda Akuila soliŋ teleŋ ndaa kpeku le yooŋgu kɛndɔɔ dimioo nduyɛ ma chɔɔlu tɛɛsiaa “nyɛ kɛndɛi a nɛi Chiisu chɔm waŋnda le waa lechoo wo okɔɔ.” (Walta Wanaa Chiisuaa 18:4, 5, 26) Ŋ nɔla miŋ nyunaŋ aa, ‘I cho pa yekeŋ le kiɔɔ waŋnda chuaa maa mɛlɛkaa ni? I cho pa kpakpalaa le teleŋndo chuaa tau le sɔɔŋ kpeekpei cho ŋ sɔvɛ le woŋ tosaa?’—Nuawɔ Ɛfisiaŋnda 5:15, 16.

18, 19. Vɛɛ naŋ looku yɛ wa maa Choosaya?

¹⁸ Mi Masaa Choosaya diikuŋ vɛlɛ sawala Chɛhowalaŋ a “kɔl ndɔɔ . . . kpou.”  (Koloniko Diiŋ Ndɔɔ 34:31) Po mama Hɛsɛkiya wo Choosaya wa ni. Teleŋ o wa o pɔmbɔ wo, “mbo kandu Mɛlɛka Deeve finya ndɔ mamaa sooluuwo.” Nduyɛ mɛɛ o fuuluu wɔsilaŋ 20, mbo kandu piɛile ŋpiɔmndeŋ faaŋiaa o Chuda niŋ. (Nuawɔ Koloniko Diiŋ Ndɔɔ 34:1-3.) Mi Choosaya kindiŋ kpoke le Chɛhowa kɔllo nɛŋioo mbo hiau masaa bɔɔbɔɔ o Chuda niŋ. Okoŋ paale pilɛ, mi masa wanaa soliaa lasalaa saaluŋ yau laSawa Mɛlɛkaa o maaŋndo niŋ. Kɛlɛŋgaa Muuse pila ndoo poonyiaa yauwo hoo ni! Mɛɛ wana poonyiaa veelul Choosaya diomndaŋ leniŋ, mbo sinapɛŋgu maa o nɔ mbo chɔɔlu tosa le Chɛhowa piɛiyo a kɔllo kpou. Mbo dɛɛniaa vɛlɛ waŋnda le nyɛ pilɔɔ kpe tosaa. Fulamakɔɔlioo wa ni, a boondii Choosaya wa yoomu ve, “waŋnda a kɛɛ lɛ le Mɛlɛka Yaawɛɛ . . . tolɔɔ kɔɔli le.”—Koloniko Diiŋ Ndɔɔ 34:27, 33.

¹⁹ Te feleŋgɔnɔɔ ŋ cho ni, a nɔla ma tol taamasi Choosaya wo kɔɔli le Chɛhowa chɔɔloo sinaa nyɛkɛndɛi. Wana che pɛ maa mi Choosaya pɛɛku Masaa Manaase finya ndɔ mama o ba, o ndoo mal yɔŋ ndɔ wɔɔŋndo wo, maa Chɛhowa nɔ yeemɛi le waŋndo malɔɔ haki. Num bɛɛ pɛɛku kaasoŋnda o ba o yuŋgu numndo niŋ a o kunda leKilisiɔŋndo niŋ. A nɔla ma dimul num sɔɔŋ kɛndɛŋ bɔɔbɔɔ Chɛhowa tosal nda woŋ. Loonuŋ vɛlɛ nyɛ Choosaya ndoo tosa teleŋ o pɛɛku Diom Mɛlɛkaa wo. Ndoo nɔ yeemɛi le Chɛhowa kɔllo nɛŋioo nduyɛ mbo tosa siŋgaŋndaŋ chɔ chɔ. Te a wa pɛ diomndaŋ veeloo o Baabuiyo niŋ, kɛlɛŋgaa num bɛɛ cho chɔɔlu kɔl sikpaa nɔ le Chɛhowa diikɔŋndo. Fulamakɔɔlioo cho ni, chaŋyɛi numnde nya ndu cho chɔɔlu ikalu nduyɛ a cho chɔɔlu nyaaloo sɔla. Okoŋ, a cho yeema le waŋnda dimullo a Chɛhowa okɔɔ. (Nuawɔ Koloniko Diiŋ Ndɔɔ 34:18, 19.) Te a pɛɛku pɛ Baabuiyo, kɛlɛŋgaa a cho sina nɛi ŋ chɔɔlu hiouwɔɔ lachioo tosa o Mɛlɛka piɛiyo niŋndo. Te lende i cho ni, maa Choosaya, kindiŋ o nɛi o nɛi niŋ le siŋgaŋndaŋ tosaa.

20, 21. (a) Yɛɛ masaa naŋ soo haa a nda okɔɔ wa kpou tosa yɛ mbo wa nyɛ pilɛ? (b) A yɛɛ okɔɔ naŋ cho yɛ isɔɔ o buŋgɛi cho lachi ve niŋ?

²⁰ Yɛɛ naŋ pɛɛku yɛ masaa hiɔɔluaa haa o Chuda niŋ o ba a piɛi Chɛhowa a kɔl ndaa kpou wa? Puaa haa ndaa nɔ kɔl sikpaa le Chɛhowa kɔllo nɛŋioo nduyɛ le ndu piɛiyo tei a yoomu ndaa mɛɛlulaŋ. Ma tiindaŋ Chɛhowa teleŋ yaamɔɔwaa kpaayaa bɛnduaa huŋ del nda choo a sɔŋgɔɔ wo. I hiou kpou ve cho ni, ma piɛi Chɛhowa kanifuule ndaa kaala ndu.

²¹ Mi che bɛɛ wanaa lahakiaa masaa hiɔɔluaa haa wa ni nduyɛ ma tosa biondɔŋndaŋ, kɛ mi Chɛhowa hini kɔl a nda. Mbo cha nyɛ wa nda o lakɔllo, nduyɛ mbo sina maa a kaala ndu kɛsɛ. Wanaa lahakiaa naa bɛɛ ŋ cho ni nduyɛ miŋ tosa biondɔŋndaŋ. Kɛ Chɛhowa cho naŋɔɔ kɔl a naa te o che pɛ maa ŋ cho ndu piɛiyo a kɔl naa kpou. O buŋgɛi cho lachi ve niŋ, ŋ cho isɔɔ a nyɛ naŋ nɔ miŋ pɛɛku o biondɔŋnda masaa haa tosalaŋ niŋ.