1. Yɛɛ nda pɛɛku yɛ num a Wana Toosiaa okɔɔ?

TE O yɔŋ pɛ maa Seiyaa Chɛhowaa manda num ni, naapum ma pɛɛku a Mɛlɛka okɔɔ chɔŋ a teleŋ ŋ wa o pɔmbɔ wo. Ma pɛɛku maa waŋndo cho o toosiaa nyɔɔŋ kpou wo, nduyɛ maa o nɔ suliŋnda kɛndɛ kɛndɛlaŋ. Ma pɛɛku vɛlɛ maa o cho hunɔɔ chieeŋndo kpou siiŋguu Kpele Hɛnɛkiɔɔ.—Chɛ. 1:​1; Walta. 17:​24-27.

2. Vɛɛ waŋnda apum yiyaŋ yɛ a wanaa laalaŋ o Wana Toosiaa niŋnda okɔɔ?

² Le mɛɛ wanaa bɔɔbɔɔ yiyaŋ maa Mɛlɛka cho le yɛ, a laalaŋ kposoŋ maa ndu le toosiaa nyɔɔŋ te. Kɛ a laalaŋ maa nyɔɔŋ kpou a ba ndɔ ŋ hiŋ ni, nduyɛ maa nyaa yoomaa taaniŋnda maŋgalaŋ nyaa yoomaa kɔndɔfili bɛndu cheleŋ ni. Wanaa nɔ laalaŋndo hoo wa a bɔɔbɔɔ wanaa sinaa dɛniaa nda cho ni. Mi nyɛ nda pɛɛku nda wo tosa ma dimi maa, nyɛ Baabuiyo dimi wo cho tonya le. Nduyɛ ma dimi maa wanaa sina dɛnɛ le wa, diɔmnda, ɔɔ wanaa nda keleŋa huiyo wa kinɛi laalaŋ o Wana Toosiaa niŋ ni.

3. Le yɛɛ o bɛnda yɛ mi naapila kindi laalaŋ naa o Wana Toosiaa niŋ?

³ Baa nyɛ wanaa sinaa dɛniaa haa dimi wo tosa pa miŋ mal laalaŋ naŋ nɔ o Chɛhowa, Wana Toosiaa niŋndo? Hei tɔlnuŋ o sabu naŋ laalaŋ o Wana Toosiaa niŋndo choo. Baa waŋndo dimul naa ni maa Wana Toosiaa cho, ɔɔ baa naapila chua teleŋndo ni le yaasiaa sɔɔŋ chɔm maa o cho woŋ? (1 Kɔliŋ. 3:​12-15) O yɔŋ bɛɛ aa ŋ cho niŋ Seiyaa Chɛhowaa le teleŋ vilɛi, naapila nɔ ni miŋ kindi laalaŋ naa. Te ŋ tosa keŋ pɛ, wanaa sɛɛŋgiaa nyɛ Baabuiyo dimi wo wa nɔla ma hui naa a ‘taasi chieeŋndo vɛlɛ a sɔɔŋ ndaŋ lachoowaŋ’ te. (Kolo. 2:​8; Hibu. 11:​6) Le naa malaa a hei okɔɔ, buŋgɛi hei cho naa mala miŋ sina (1) sabu wanaa bɔɔbɔɔ laalaŋ o Wana Toosiaa niŋ te wo, (2) mɛɛ naŋ nɔ miŋ taŋgul laalaŋ naa  o Wana Toosiaa niŋ yɛ, nduyɛ (3) mɛɛ naŋ hiau lachi a laalaŋ naa kindioo poŋ yɛ.

4. A mɛɛ Hibuluiya 11:​1 dimi yɛ, o yɛɛ choo laalaŋ naa tɔlnuŋ yɛ?

⁴ Waŋnda apum dimi maa ma chi bɛɛ nyɔɔ nduyɛ ma nɔ sɔɔŋ chɔm maa nyɛ koŋ cho wo le, kɛ te a yiyaŋ pɛ maa o cho, mɛɛ ndu cho laalaŋndo ni. Kɛ Baabuiyo ndu dimi maa laalaŋndo tɔlnuŋ o sɔɔŋ chɔm maa nyɛ koŋ o cho woŋ choo. (Nuawɔ Hibuluiya 11:​1.) Lelaŋ, mi che bɛɛ ŋ chi Chɛhowa nda Chiisu le, kɛ ŋ nɔ sɔɔŋ chɔm kɛsɛ maa a cho woŋ. Nduyɛ ŋ nɔ vɛlɛ sɔɔŋ chɔm maa Masale Mɛlɛkaleŋ le cho woŋ. Mi puaapilɛnɔ sinaa dɛnɛ pilɛ dimi aa: “Seiyaa Chɛhowaa nɔ sabula nda laalaŋ o Wana Toosiaa niŋndo, kɛ a pɛɛsa nyɛ wanaa sinaa dɛniaa dimi wo le.”

5. Le yɛɛ wanaa bɔɔbɔɔ laalaŋ yɛ maa nyɔɔŋ kpou a ba ndɔ ŋ hiŋ ni?

⁵ Te o yɔŋ pɛ maa sɔɔŋ cho ŋ chɔm maa Wana Toosiaa cho woŋ, mɛɛ le yɛɛ wanaa bɔɔbɔɔ dimi yɛ maa o cho ndu le toosiaa nyɔɔŋ te? Saboo cho ni, apum yaasiaa wɔ sɔɔŋ chɔm maa Wana Toosiaa cho woŋ a ba nda le. Mi Lɔbɔti cho niŋ Sei Chɛhowaa wo dimi aa: “Le mɛɛ ndaa pɛɛku naa a Wana Toosiaa okɔɔ o sukuu le yɛ, mi yiyaŋ maa nyɔɔŋ kpou a ba ndɔ ŋ hiŋ ni. Kɛ mɛɛ ya fuuluu wɔsioŋ 22 miŋ suukaŋ naa Seiyaa Chɛhowaa, ma soliŋ Baabuiyo kpeku le ya malaa le chɔɔ sɔɔŋ chɔm maa Mɛlɛka toosiaa nyɔɔŋ kpou ni woŋ.” *—Tofa kɔfoo hoo “ Nyɛ Kalaŋ Chuauwa Nɔ Ma Tosa Wo.”

6. Le yɛɛ waŋnda apum laalaŋ yɛ maa Wana Toosiaa cho le?

⁶ Apum dimi maa Wana Toosiaa cho le kanifuule, a yiyaŋ maa nyɛ nda cha wo koni nda nɔ  ni ma laalaŋ. Kɛ o kpeekpei niŋ, nyɔɔŋ ŋpum cho ŋ nda chi le woŋ, kɛ a laalaŋ o muŋ niŋ. Tamaseliiyo cho hueiye ni. Mi che bɛɛ wana chi ndi le, kɛ miŋ sinaŋ ndi. Nduyɛ, laalaŋ Baabuiyo soo a ndu okɔɔ wo bɛɛ tɔlnuŋ o “nyɛm naŋ chi wɔ kposoŋ te woŋ” choo. (Hibu. 11:​1) Lelaŋ, teleŋndo a sɛmbɔɔ pila yeemaŋ ni le mi naapila pɛɛku sɔɔŋ chɔm maa Mɛlɛka toosiaa nyɔɔŋ kpou ni woŋ. Kɛ wanaa bɔɔbɔɔ yeema ma dɔu sɛmbɔɔ le hei tosaa le. Te waŋndo chel mbo yaasiaa sɔɔŋ muŋ a ba ndɔ le, o nɔla mbo laalaŋ o Wana Toosiaa niŋ te.

7. Baa wanaa sinaa dɛniaa kpou laalaŋ ni maa o cho Mɛlɛka le toosiaa nyɔɔŋ te?

⁷ Mɛɛ wanaa sinaa dɛniaa apum pɛɛku a nyɔɔŋ ŋpum okɔɔ, ma cha kpendekele maa waŋndo cho o toosiaa nyɔɔŋ kpou wo. * Maa Lɔbɔti naŋ soo suŋ a ndu okɔɔ wo, mi apum  yiyaŋ ma Wana Toosiaa cho le kanifuule, a pɛɛku nda a hei okɔɔ o sukuu le. Kɛ a kpou, wanaa sinaa dɛniaa a bɔɔbɔɔ sina niŋ Chɛhowa nduyɛ ma kaala ndu. Maa wanaa sinaa dɛniaa haa, naa bɛɛ nɔ miŋ kindi laalaŋ naa o Mɛlɛka niŋ a ba naa, o yɔŋ bɛɛ maa ŋ sina dɛnɛ tau le. Wana o wana nɔ mbo tosa hei le naa le.

8-9. (a) Nyuna kuɛɛ naŋ cho yɛ niko hunɔɔ yaasiaa? (b) Tɔnɔ yɛɛ ŋ sɔla yɛ te a wa pɛ pɛɛkoo a nyɛm Mɛlɛka toosiaa woŋ okɔɔ?

⁸ Vɛɛ ŋ kindi yɛ laalaŋ numndo o Wana Toosiaa niŋ? Ŋ yaasiaŋndɔ nɛilaŋ la hiɔɔlu.

⁹ Pɛɛku a nyɛm balu naa woŋ okɔɔ. A nɔla ma kindi laalaŋ numndo o Wana Toosiaa niŋ te a wa pɛ mɛɛndaŋndo visiaa, tɔlɔɔlaŋ, vɛlɛ a looŋ. (Sam 19:​1; Aisaya 40:​26) Mɛɛ ŋ hiau lachi a pɛɛkoo a nyɔɔŋ muŋ okɔɔ fau, keŋ cho num mala ma che kɛsɛ maa Chɛhowa toosiaa nyɔɔŋ kpou ni. Yaula naalaŋ la nɔ buŋgaŋ tau ŋ soo a nyɛm teŋgeŋ teŋgeŋ Mɛlɛka toosiaa woŋ okɔɔ. O yɔŋ bɛɛ maa mi sɔɔŋ cho o buŋgaŋ muŋ niŋndoŋ kendu bila biyɔɔ, kindiŋ ma pɛɛku muŋ. Pɛɛku mɛɛ ŋ tiuba yɛ. O wɔsila hiou laŋ niŋ, miŋ yaasiaa o bɔŋaŋnda naala bɛndaŋ choo a nyɛm Mɛlɛka toosiaa woŋ okɔɔ. Lelaŋ, puɛɛnuŋ le vidueilaŋ ndaŋ tofaa o tɛɛŋgii nɛi jw.org choo le.

10. Chɔmndɔ tamaseliiyo o chɔm maa Wana Toosiaa cho wo. (Luomaŋnda 1:​20)

¹⁰ Te a wa pɛ pɛɛkoo a nyɛm Mɛlɛka toosiaa woŋ okɔɔ, kindiŋ ma sina mɛɛ nyɛm muŋ pɛɛku num a Wana Toosiaa muŋ ndo okɔɔ yɛ. (Nuawɔ Luomaŋnda 1:​20.) Le tamaseliiyo, mi che bɛɛ mi paaleŋ le yɔŋgu haŋgullo a nyɛ teŋgaa bɛnda le waŋnda chieeya wo, kɛ mi le yɔŋgu vɛlɛ nyɛm cheleŋ ŋ tiuba miŋ tɛɛmbuu yoomoo woŋ. Kɛ nyɛm muŋ nɔla miŋ komal naa le kanifuule, nyɔɔ cho o choo choo niŋ, o tiuba mbo tosa nyɛm muŋ komal naa o chieeŋndo choo le wo. Te nyɛm muŋ wa pɛ hunɔɔ a kpaaya, nyɛ manda muŋ koŋ ndo bɛɛ chɔɔlu kpaaya sɔla le muŋ kuunaa. Vɛ, baa hei ke num laalaŋnda maa waŋndo cho o nɔ kaalaa a taasioo nduyɛ mbo toosiaa nyɔɔŋ muŋ ndo le?

11. Kuɛɛ naŋ saaluŋ yɛ nyɛm kindi laalaŋ naa o Wana Toosiaa niŋndo? (Tofa kɔfoo hoo “ Yaulaŋ a Vidueila Mala Naa Miŋ Kindi Laalaŋ Naa Wo.”)

¹¹ A nɔla ma saaluŋ sɔɔŋ tiuba miŋ kindi laalaŋ numndo o Wana Toosiaa niŋndoŋ o Yau Yaasiaa ŋSɔɔ le Seiyaa Chɛhowaa niŋ, vɛlɛ a yaasiaa tosaa o jw.org choo. A kandu a buŋgaŋ vɛlɛ a vidueila cho o suɛi lebolle hei bɛŋgu laŋ tofaa, “Baa Waŋndo Toosiaa Ndu Ni?” Buŋgaŋ muŋ a vidueilaŋ ndaŋ la bendu le, kɛ la nɔla mi la chɔm naa sɔɔŋ ŋpum a visiaa vɛlɛ a tɔlɔɔlaŋ okɔɔ, la chɔm maa Wana Toosiaa cho wo. La nɔ vɛlɛ tamaseliilaŋ a wanaa sinaa dɛniaa okɔɔ, a kindiŋ le nyɛm Mɛlɛka toosiaa woŋ mɛɛndaŋndo le nyɔɔŋ toosiaa wa.

12. Te ŋ wa pɛ Baabuiyo pɛɛkoo, ɔɔ sɔɔŋ ŋpum ŋ naŋ nɔ miŋ kɛsiŋ o kɔl loŋ?

¹² Pɛɛku Baabuiyo. O tasela ndɔ, wana sinaa dɛnɛ naŋ soo suŋ a ndu okɔɔ o pɛl hiɔɔloo niŋndo ndoo laalaŋ o Wana Toosiaa niŋ te. Kɛ mɛɛ teleŋ tiŋ hiou, mbo laalaŋ kɛsɛ maa Wana Toosiaa cho. Mbo dimi aa: “O kpeekpei niŋ, laalaŋ nuu ndoo tolnuŋ o nyɛ ya pɛɛku o sukuu wo choo le, kɛ o nyɛ ya pɛɛku o Baabuiyo niŋndo choo ndoo tɔlnuŋ ni.” Kɛlɛŋgaa num bɛɛ nɔ niŋ sinapɛŋgoo tau a nyɛ Baabuiyo dimi wo okɔɔ. Kɛ a koŋ kpou, le ma kindi laalaŋ numndo o Wana Toosiaa niŋ, a nɔ ma hiou lachi a Diom Mɛlɛkaa pɛɛkoo. (Chɔɔ. 1:​8; Sam 119:​97) Te a wa pɛ Baabuiyo pɛɛkoo, kindiŋ ma che mɛɛ o tɛɛsiaa vɛ vɛ a sɔɔŋ paandoŋ okɔɔ nduyɛ miŋ wa peelɔŋndo yɛ. Kindiŋ ma che vɛlɛ mɛɛ chɛlaŋndo cho wanaa yɛ yiaa poonyiaa huuluŋ cho o Baabuiyo niŋndo tɛɛŋ yɛ. Te a tosa keŋ pɛ, a cho chɔɔlu laalaŋ kɛsɛ maa Wana Toosiaa naa wo nɔ kaalaa a taasioo. Nduyɛ a cho sina maa ndu tosa a sabu ni  ma poonyiaa Baabuiyo. *—2 Timo. 3:​14; 2 Pitɛ 1:​21.

13. Chɔmndɔ tamaseliiyo opilɛ le chɔɔ taasi cho o Diom Mɛlɛkaa niŋndo.

¹³ Te a wa pɛ Diom Mɛlɛkaa pɛɛkoo, kindiŋ ma che mɛɛ silala ndɔlaŋ la cho la sɔvɛ yɛ. Le tamaseliiyo, o cho niŋ hau teleŋ vilɛi mi Baabuiyo sila maa kaala ŋkanioo luei wana “o saŋgaa niŋ.” (1 Timo. 6:​9, 10; Pulɔ. 28:​20; Maa. 6:​24) Baa silaa hoo cho wɔ pa hau o sɔvɛ? Ei. Mi yau pilɛ soo a kaala waŋnda o teleŋ naa hoo niŋndo dimi aa: “O kpeekpei niŋ, wanaa nɔ nyɛm kiɔɔŋ tau wa ve ko a kɔl kɛndɛ le, nduyɛ nda hiau buulaŋ. Hali wanaa yeema le kanioŋ chɔɔloo sɔlaa wa bɛɛ ve a kɔl kɛndɛ le, nduyɛ nda hiau bahawɛi kɛndiaa nɔ.” Lelaŋ, sila Baabuiyo yɔŋgu a kaala ŋ kanioŋ okɔɔ wo cho bɔɔ sila kɛndɛ! A nɔla pa ma yiyaŋ a sawala mandaala cheleŋ o Baabuiyo niŋ la mala num niŋndaŋ okɔɔ? O kpeekpei niŋ, te ŋ yiyaŋ pɛ a silala cho o Baabuiyo niŋndaŋ okɔɔ, ŋ nɔla miŋ che kɛsɛ maa Wana Toosiaa kaala naa wo sina nyɛ hiou wa o sɔvɛ le naa wo. Nduyɛ hei tosa miŋ tiindaŋ silala o ke naa laŋ teleŋ o teleŋ. (Chemi. 1:​5) Fulamakɔɔlioo cho wa ni, ŋ cho yoomoo tueiyɔɔ yeela tau.—Aisaya 48:​17, 18.

14. Yɛɛ Baabuiyo pɛɛkoo mala yɛ num ma sina a Chɛhowa okɔɔ?

¹⁴ Te a wa pɛ Baabuiyo pɛɛkoo, kɛsi kpeleŋndo le ma sina Chɛhowa nyɛkɛndɛi. (Chɔŋ 17:​3) Baabuiyo pɛɛkoo cho num mala ma sina wana suu Chɛhowa cho wo vɛlɛ a suliŋnda ndɔlaŋ. A nɔla vɛlɛ ma che suliŋnda ndɔlaŋ o nyɛm o toosiaa woŋ niŋ. Wana dimi isɔɔ a tonya, suliŋndaŋ ndaŋ la chɔm naa kɛsɛ maa Chɛhowa cho. (Ɛsɔ. 34:​6, 7; Sam 145:​8, 9) Mɛɛ ŋ hiau lachi fau a Chɛhowa sinaa nyɛkɛndɛi, lende koni laalaŋ ŋ nɔ o ndu niŋndo chɔɔlu hindɔɔ ni. Kaala ŋ nɔ le ndu wo bɛɛ cho chɔɔlu yiŋgila, okoŋ mi chaŋyɛi cho nya tɛɛŋnde chɔɔlu kalu poŋ.

15. Tɔnɔ yɛɛ ŋ cho yɛ sɔla te a dimul pɛ acheleŋnda sabu ŋ laalaŋ o Mɛlɛka niŋndo?

¹⁵ Dimul acheleŋnda le sabu ŋ laalaŋ o Mɛlɛka niŋndo. Te a wa pɛ hei toosiaa, num bɛɛ cho chɔɔlu laalaŋndo nɔ o ndu niŋ. Kɛ te o wa yɛ mi wana ŋ cho yooŋgu kɛndɔɔ dimullo wo dimi maa Mɛlɛka cho le, nduyɛ maa numpila bɛɛ sina mulioo le, yɛɛ ŋ cho yɛ tosa? Kindiŋ ma tofa le muli nyunaa hoo o yaula naalaŋ niŋ, okoŋ mi la suukaŋ lechoo nya wana koŋ. (1 Pitɛ 3:​15) A nɔla vɛlɛ ma nyuna chaaŋ num Kilisiɔŋnɔɔ le mbo mala num a hei okɔɔ. O yɔŋ bɛɛ mi wana koŋ laalaŋ mulila ŋ cho ndu ke o Baabuiyo niŋndaŋ ɔɔ mbo laalaŋ te, a cho tɔnɔɔ sɔla tau le mɛɛ ŋ tosa yaasiaa yɛ. Laalaŋ numndo cho vɛlɛ chɔɔlu kalu poŋ. Fulamakɔɔlioo cho wa ni, wanaa yiyaŋ maa a nɔ taasioo, a sina dɛnɛ, nduyɛ ma dimi maa Wana Toosiaa cho le wa, nɔla ma hui num ma kɛɛ laalaŋndo o ndu niŋ te.

16. Yɛɛ yɔŋnuŋ yɛ te ŋ hiu lachi a laalaŋ naŋ nɔ o Mɛlɛka niŋndo kindioo le?

¹⁶ O yɔŋ bɛɛ maa ŋ cho niŋ Chɛhowa piɛiyo le teleŋ vilɛi, ŋ nɔ miŋ hiou lachi a laalaŋ naŋ nɔ o Mɛlɛka niŋndo kindioo. Le yɛɛ? Kanifuule te ŋ mandaŋ te, laalaŋ naa nɔla mbo yɔŋnuŋ pɔmbɔlɔsɔɔ. A mɛɛ naŋ pɛɛku o buŋgɛi hei niŋ yɛ, loonuŋ maa laalaŋndo tɔlnuŋ o sɔɔŋ naŋ chi le woŋ choo. Ŋ nɔla miŋ puɛɛnuŋ nyɛm naŋ chi wɔ le woŋ chɔ chɔ. Lelaŋ, mi Pɔɔl tuu kiɔɔ laalaŋndo nɔɔ a “yɔŋ wɔɔŋ yiu yiu naa wo.” (Hibu. 12:​1) Mɛɛ yɛɛ mala yɛ naa mi laalaŋ naa hiou lachi a waa o kala poŋ?—2 Tɛsa. 1:​3.

17. Yɛɛ naŋ nɔ yɛ miŋ tosa le mi laalaŋ naa hiou lachi a waa o kala poŋ?

¹⁷ Nyɛ tase naŋ nɔ miŋ tosa wo cho ni, lambaŋndo Chɛhowa nyunaa o piɛileŋ niŋ le  mbo mala naa a nyina ndɔ diandaa. Le yɛɛ? Kanifuule, laalaŋndo cho o suliŋnda nyina Mɛlɛkaa mala naa le sɔlaa laŋ tɛɛŋ. (Kalee. 5:​22, 23) Te o ve a mala nyina ndɔ diandaa le, ŋ nɔla miŋ taŋgul laalaŋ naa nduyɛ mbo hiou lachi a waa o kala le. Te ŋ lambaŋ pɛ Chɛhowa nyunaa le nyina ndɔ diandaa, o cho naa ndu ke. (Luku 11:​13) Ŋ nɔla pɛŋ miŋ piɛi aa: “Mala naa mi laalaŋ naa chɔɔlu kalu poŋ.”—Luku 17:​5.

18. Dikeŋnaŋ kuɛɛ naŋ cho yɛ tueiyɔɔ yeela suŋ suŋ? (Sam 1:​2, 3)

¹⁸ Nyɛ diiŋ ndɔ naŋ nɔ miŋ tosa wo cho ni, ŋ nɔ miŋ wa pɛɛkɔŋ ipilayaa tosaa teleŋ o teleŋ o Diom Mɛlɛkaa niŋ. (Nuawɔ Sam 1:​2, 3.) A teleŋ nda poonyiaa chondei heiyo, Isɔluɛiya a pilɛŋ koni ndaa nɔ yau lasawaa o ba ni. A koŋ kpou, masaa a wanaa soliaa lasalaa ndaa nɔ ma poonyiaa yaulaŋ ndaŋ okoŋ mi la wa nda o ba. Nduyɛ kɛɛsiaa wa maa te wɔsila ŋɔmmɛu kɛ kɛ hiou pɛ, ndaa nɔ ma ‘chuuŋgiaa puaa, waŋ laanduaa, chuaambuaa, a mialaa wa nda tɛɛŋ nda,’ le mi nda kpou tuei sawalaŋ ndaŋ. (Ditɔnɔ. 31:​10-12) O palɛi Chiisu ve niŋ bɛɛ, waŋnda a pilɛŋ koni ndaa saaluŋ yaula simbulaa laŋ o ba ni. La bɔɔbɔɔ o Chiɛi Chuuwa Piɛi Mɛlɛka Wo niŋ waŋnda ndaa saaluŋ laŋ ni. Kɛ o palɛi nɛi niŋ, wanaa bɔɔbɔɔ tiuba ma sɔla Baabuiyo o tiŋ ɔɔ kpou. Dikeŋnaŋndo kpeekpei naŋ nɔ hoo ni. Vɛɛ naŋ chɔm yɛ balika melaa le ke sɔvɛ naŋ sɔla hoo wo, Baabuiyo?

19. Yɛɛ naŋ nɔ yɛ miŋ tosa le mi laalaŋ naa kendu poŋ?

¹⁹ Ŋ chɔm maa ŋ nɔ balika melaa le Diom Mɛlɛkaa te ŋ wa pɛ diomndaŋ veeloo leniŋ lepaa o lepaa. Ŋ nɔ miŋ kɛɛsiaa le pɛɛkɔŋ ipilayaa tosaa teleŋ o teleŋ. Ŋ nɔ miŋ dimi naa maa mɛɛ miŋ nɔ fɛŋ teleŋndo tau malaŋ naŋ tosa pɛɛkɔŋ ipilayaa le. Kɛ te ŋ tosa pɛ kɛɛsiaa nduyɛ miŋ tol kɛɛsiaa naa koŋ kɔɔli, keŋ cho tosa mi laalaŋ naa kendu poŋ.

20. Yɛɛ naŋ nɔ yɛ miŋ kɛɛsiaŋ o kɔl le tosaa?

²⁰ O Diom Mɛlɛkaa choo laalaŋ naa tɔlnuŋ ni. Ŋ cho maa “wanaa taasiaa a wanaa sinaa dɛɛniaa” o chieeŋndo hoo niŋ te. (Maa. 11:​25, 26) Diom Mɛlɛkaa pɛɛkoo mala naa niŋ miŋ sina sabu sɔɔŋ wɔɔŋndoŋ kui tau o chieeŋndo choo wo, a nyɛ Chɛhowa cho hunɔɔ tosa le muŋ chiiyo wo. Lelaŋ, maa ŋ kɛɛsiaŋ o kɔl le laalaŋ naa kindioo poŋ, nduyɛ miŋ mala wanaa bɔɔbɔɔ le mi nda bɛɛ nɔ laalaŋndo o Wana Toosiaa niŋ. (1 Timo. 2:​3, 4) Nduyɛ maa ŋ hiounuŋ lachi a waa lehɔl o nɛi le teleŋ naa kpou cho deŋi choo choo, nduyɛ miŋ saŋgala Chɛhowa a diomnda cho o Sɔɔŋ Chɔɔmaŋndoŋ 4:​11 niŋndaŋ. Le dimi aa: “Chɛhowa Mɛlɛka naa, numpilɛ kpe bɛnda ni ma sɔla biiloo, . . . kanifuule num toosiaa nyɔɔŋ kpou ni.”