MƐƐ Chiisu pɛɛku buɛiyaa nduaa mɛɛ nda nɔ ma dimi yooŋgu kɛndɔɔ yɛ, mbo sila nda maa o cho lɔɔlɔɔ le waŋnda cho wa nda nilaŋ yaŋɔɔ le. (Luku 10:​3, 5, 6) Nyɛ pilɔɔ kpe yɔŋnuŋ a yooŋgu kɛndɛ naŋ dimi wo ni. Mi wanaa naŋ komalla apum dimul naa diomnda wɔɔŋndaŋ ɔɔ ma tuulu kɔl. Nduyɛ te a tosa pɛ lende, o wa ikala lepum le miŋ nɔ nyiɛɛye nduyɛ le yeemɛi nɔɔ le nda yooŋgu kɛndɔɔ dimullo.

Mi wana nɔ nyiɛɛye wo che bahawɛila acheleŋnda, mi mɔnɛi bii ndu le nda, nduyɛ mbo yeema nda malaa. Kɛ yɛɛ yɔŋnuŋ yɛ, te ŋ kɛɛ pɛ nyiɛɛye nɔɔ le wanaa naŋ komal o wali pollo niŋnda? Ŋ nɔ lɛ dialuŋ fulaa le, koŋ cho ni, ŋ nɔ lɛ kɔl landɛi le nda yooŋgu kɛndɔɔ dimullo le, nduyɛ ŋ tiu vɛlɛ ba le nda malaa le. Ŋ tuu dialuŋ fulaŋ naŋ a yiŋndeŋ. Le mi yiŋndeŋ le hiou lachi a biyɔɔ nyɛkɛndɛi, mɛɛ miŋ chɔɔlu yɔmnde. Lende koni, le mi dialuŋ fulaŋ naŋ hiou lachi, ŋ nɔ miŋ chɔm nyiɛɛye!—Tɛsaloniaŋ Tasoo 5:​19.

Vɛɛ naŋ pɛɛku yɛ le chɔɔloo waa wanaa inyiɛɛ, mi che bɛɛ i kendu? Ŋ soonuŋndɔ a taamaseliila naŋ tual kɔɔli laŋ la yaa. Chɛhowa, Chiisu, a Pɔɔl, wana Chiisu vem hɔlte ndɔ wo.

Le wɔsilaŋ o waalaŋ niŋ, waŋnda dimi niŋ choola dɛnɛ wɔɔŋndaŋ a Chɛhowa okɔɔ. Kɛ o cho wɔ “wanaa sina ikɛndɛ le wa a wanaa kɔl vesɛiya” kɛndɛi tosallo. (Luku 6:​35) Vɛɛ o chɔm yɛ kɛndɛi? Mbo biunuŋ wana o wana fee. Chɛhowa yeema “mi waŋnda kpou” sɔla pioŋɔɔ. (Timoti Tasoo 2:​3, 4) Mi che bɛɛ Mɛlɛka tul dɛnɛ wɔɔŋndo leyɛ, kɛ waŋchieeya cho a sɔvɛ ndu o hɔl, nduyɛ o yeema mi wana o wana vi le.—Pitɛ Diiŋ Ndɔɔ 3:​9.

Chɛhowa sina maa Setana chaa bɔɔ waŋnda nyindɔɔ le ma laalaŋ choolaŋ. (Kɔliŋtiaŋ Diiŋ Ndɔɔ 4:​4) A pɛɛku wanaa bɔɔbɔɔ choolaŋ a Mɛlɛka okɔɔ chɔŋ a teleŋ nda wa a pɔmbɔ wo. Lelaŋ, mi yiyaŋ ndaa tosa ndi ikala le tonyaa chɛlɔɔ. Kɛ Chɛhowa nɔ yeemɛi le nda malaa. Vɛɛ naŋ looku yɛ keŋ sina?

Chua taamaseliiyo mɛɛ Chɛhowa ndoo yiyaŋ a wanaa wa o chiee bɛndoo niŋ Ninivɛɛ yɛ. Mi che bɛɛ wanaa niilu latandaa nda wa ni, kɛ mi Chɛhowa dimul Chona aa, “Baa I nɔ mi tuiinuŋ chiee bɛndoo Ninivɛɛ inyiɛɛ, o nɔ waŋnda hiouwɔɔ 120,000 ndo, a sina ikɛndɛi tɛɛŋ a iwɔɔŋnde le wo le?” (Chona 4:​11, NW) Mi nyiɛɛye bii Chɛhowa le wanaa kaŋ, a ndaa sina tonyaa a ndu okɔɔ le wa. Lelaŋ, mbo viam Chona le mbo sila nda.

Yiyaŋ Chɛhowa nɔ le waŋnda wo koni naa bɛɛ nɔ ni. A cho a sɔvɛ. Maa Chɛhowa, naa bɛɛ nɔ yeemɛi le nda malaa ma pɛɛku a ndu okɔɔ, o yɔŋ bɛɛ ma chɛl tonyaa le.

Te waŋnda kɛɛ pɛ nilaŋ yaŋɔɔ o yooŋgu naa, ŋ nɔ miŋ bii bila le sabu nda tosa keŋ ndo. Kɛlɛŋgaa a nɔ yiyaŋ wɔɔŋndo a Baabuiyo, ɔɔ a Kilisiɔŋnda okɔɔ, le mɛɛ nda che wanaa dimi maa Kilisiɔŋnda nda cho ni wa sɔɔŋ wɔɔŋndoŋ tosaa yɛ. Naapum a dimul niŋ wanaa cheleŋnda choolaŋ a sɔɔŋ naŋ laalaŋndoŋ okɔɔ.  Ɔɔ naapum wanaa cheleŋnda nɔ siooŋnde maa te wanayaŋ ndaŋ ɔɔ wanaa nda cho o fondaŋ pilɔɔ wa tuei pɛ maa a soo o naa lo, a cho nda mamɔɔ.

Kɛlɛŋgaa wanaa naŋ komalla apum nɔ sɔɔŋ wɔɔŋ wɔɔŋ yɔŋnuŋ nda woŋ, ŋ cho nda paaliaŋndo tau woŋ. Mi chua misiɔnalueinɔɔ diolaŋ Kim dimi maa, mi chɔuwo biandu wanaa bɔɔbɔɔ o tanda ndɔɔ niŋ, nduyɛ mi nyɛm ndaa nɔ woŋ kpou hialuŋ nda. A nɔ tiindaŋ kpeekpei le chilaŋ te. Kɔl tambɛiyo cho nda nduyɛ a laalaŋ wana o wana le. Mi waŋnda o tanda koŋ niŋ kindiŋ le Chɛhowɛiya kuunaa yooŋgu kɛndɔɔ dimioo. Teleŋ pilɛ, mɛɛ Kim wa yooŋgu kɛndɔɔ dimioo, ma chiŋalaŋ ndu a sɔŋgɔɔ.

Vɛɛ Kim cho yɛ hiouwɔɔ lachi a nyiɛɛye chɔmndo mi che bɛɛ waŋnda cho ndu biyɔɔ wɔɔŋndo? Lɔɔlɔɔ mbo kindiŋ le loonɔŋndo nyɛ Pulɔwaa 19:​11 dimi wo aa, ‘Wana o wana cho wana kɔl kalu, o cho wana dɔɔnuŋ ko tumbe chɔ chɔ le.’ Te o yiyaŋ pɛ a nyɛ waŋnda o tanda ndɔɔ niŋ keeku niŋndo, mi hei mala ndu le nyiɛɛye nɔɔ le nda. Nduyɛ o cho wanaa o komalla kpou le kɛɛ ndu nilaŋ yaŋɔɔ le. O tanda pilɛ koŋ niŋ kpe, o nɔ miiŋgula makɔɔla kɛndɛ kɛndɛlaŋ.

Ŋ nyunaŋndɔ aa, ‘Te yaa sina tonyaa le, kaa yɛɛ ya wa yɛ chɔm te Seiyaa Chɛhowaa ndaa hiŋ ya pɛ yooŋgu kɛndɔɔ dimullo?’ Le taamaseliiyo, te ndoo wa yɛ maa waŋnda dimul la choolaŋ tau a Chɛhowɛiya okɔɔ? Kɛlɛ-ŋgaa naa bɛɛ ve kaa kɛndɛ chɔm te, nduyɛ ŋ wa yeema le mi ndaa tuiinuŋ naa inyiɛɛ. Chiisu dimi maa kaa naŋ hɛnaŋ mi acheleŋnda tosal naa wo, naa bɛɛ nɔ miŋ tosal nda kaa koŋ. Lelaŋ, ŋ nɔ miŋ kindiŋ le sinaa mɛɛ acheleŋnda cho sinaŋndo yɛ nduyɛ miŋ biunuŋ nda, o yɔŋ bɛɛ mi keŋ wa ikala.—Maatiu 7:​12.

Teleŋ Pɔɔl, wana Chiisu vem hɔlte ndɔ wo wa yooŋgu kɛndɔɔ dimioo wo, mbo chɔm wanaa ndaa chiŋalaŋ ndu a sɔŋgɔɔ wa nyiɛɛye. Le yɛɛ? Kanifuule, mbo loonuŋ wana suu o wa wo. Mbo dimi aa, “Mi che bɛɛ o tasela ndɔɔ mi I tɛɛmbuu diola ndɔlaŋ, o koŋ kɔɔli, mi I tusi ndu nyɛ palaa choo, nduyɛ mi yiou ndu ni, kɛ o koŋ niŋ kpou, Mi Mɛlɛka tuiinuŋ ya inyiɛɛ. Kani fuule nyɛ o nyɛ ya I wa tosaa I wa mavaa ndu tosaa o laalaŋ lepɛŋ ndo niŋ a sina pɛŋgu lepɛŋ ndo.” (Timoti Tasoo 1:​13) Pɔɔl ndoo sina maa mi Chɛhowa nda Chiisu chɔm ndu nyiɛɛye tau. Ndoo nɔla mbo bii bila wanaa ndaa yeema ndu kuunaa yooŋgu kɛndɔɔ dimioo wa, kanifuule, ndu bɛɛ ndoo nɔ paandu yiyaŋ pilɔɔ maa nda.

Lepum, mi Pɔɔl ndoo komal wanaa ndaa nɔ laalaŋ kala kalaa o pɛɛkula lachoowalaŋ niŋnda. Vɛɛ ndoo yiyaŋ yɛ a hei? Walta Wanaa Chiisuaa 17:​16 dimul naa maa teleŋ o wa Atɛŋ ndo, “mbo saaluŋ maa mɛlɛkaa nda sooluu  wa cho Atɛŋ tau tau. Mi kɔllo laasiaŋ ndu niŋ kpou.” Kɛ, mi Pɔɔl soliŋ nyɛm laasiaa ndu kɔllo woŋ kpeku le waŋnda pɛɛkoo. (Walta Wanaa Chiisuaa 17:​22, 23) Mbo tosa yɛlɛmiaalaŋ o yooŋgu kɛndɔɔ dimioo niŋ, nduyɛ mbo suaa o nɛila yɛ yɛlaŋ niŋ, o wanaa ndaa nɔ kɔɔlima yɛ yiaŋ nda lo, le halikpeŋ o ‘yɔŋ bɛɛ aa a tiŋ ni mbo piŋi nda.’—Kɔliŋtiaŋ Tasoo 9:​20-23.

Te ŋ dimi pɛ yooŋgu kɛndɔɔ o wanaa kɛɛ naa nilaŋ yaŋɔɔ wa lo, ɔɔ a nɔ laalaŋnda lachoowalaŋ nda, ŋ nɔla miŋ tosa nyɛ Pɔɔl ndoo tosa wo. Ŋ nɔla miŋ soliŋ nyɛ naŋ sina a nda okɔɔ wo kpeku le nda malaa ma pɛɛku a “yooŋgu kɔl kɛndɔɔ” okɔɔ. (Aisaya 52:​7) Mi ndepilɛnɔɔ diolaŋ Doloti dimi aa, “O tanda naa niŋ, wanaa bɔɔbɔɔ sɔla pɛɛkoo maa wana ŋuasu ŋuasoo Mɛlɛka cho ni, nduyɛ o hini kɔl a wana o wana le. Mi chandu wanaa waa lende le laalaŋ kala kala nda nɔ o Mɛlɛka niŋndo. Okoŋ, mi dimul nda niko a kaala kɛndɛla Chɛhowa nɔlaŋ okɔɔ, nduyɛ a mɛila ndɔlaŋ le chilaŋ.”

Ŋ nɔ vɛlɛ miŋ kindiŋ le puaapiliaa a ndepiliaa naa malaa te ŋ wa pɛ yooŋgu kɛndɔɔ dimioo a nda latulu. Mi Chɛsika dimi maa te o wa pɛ o wali pollo niŋ a wanaa cheleŋnda, nduyɛ mi suɛi wɔɔŋnde yɔŋnuŋ waŋndo opilɛ, mbo kindiŋ le kiɔɔ kɔllo handɔɔ o keŋ choo. Kɛ, mbo soo a suɛi kɛndɛi ipum okɔɔ, mɛɛ fulamakɔɔlila kɛndɛ yooŋgu kɛndɛ naŋ dimi wo cho naa yɛ, mi che bɛɛ waŋnda apum yeŋ naa lani le.

Chɛhowa sina walaŋ maa teleŋndaŋ lapum, mbo wa ikala kpoke le yooŋgu kɛndɔɔ dimioo. Kɛ mbo naŋ kɔl tau te ŋ tol pɛ taamasi ndɔ inyiɛɛyo kɔɔli! (Luku 6:​36) Kɛ, o cho lefafɛɛŋ te Chɛhowa cho nyiɛɛye nɔ le waŋnda o chieeŋndo hoo niŋ, nduyɛ mbo biunuŋ nda le. Ŋ nɔ tiindaŋndo maa, o sina kɛsɛ teleŋ o cho hunɔɔ a mɛɛlulaŋ ndo. Haaa mi teleŋ koŋ fuuluu, ŋ nɔ miŋ dimi yooŋgu kɛndɔɔ chɔ chɔ. (Timoti Diiŋ Ndɔɔ 4:​2) Lelaŋ, ŋ hiounuŋ lachi a yoo-ŋgu kɛndɔɔ dimioo a dialuŋ fulaa nduyɛ miŋ nɔ nyiɛɛyii kpeekpeiye le “waŋnda kpou.”