1-2. (a) A mɛɛ Ɛfisiaŋnda 6:​16 dimi yɛ, le yɛɛ tiindaŋ naa cho maa “boo bɛndu” puaa chɔuwa bii o ba le nda mandaa wo yeemaŋ yɛ? (b) Nyunala kuɛɛ naŋ cho yɛ yaasiaa?

A SINA pa maa tiindaŋ numndo cho maa “boo bɛndu” puaa chɔuwa bii o ba le nda mandaa wo? (Nuawɔ Ɛfisiaŋnda 6:​16.) A tonya, lende o cho ni. Mi boo bɛndu puaa chɔuwa bii o ba le nda mandaa wo kumbu dialuŋ ndaŋ. Mɛɛ lende koni tiindaŋ numndo mala num le fafaŋndo kaala nɔɔlɛilaŋ, sɔŋgɔlaŋ a sɔɔŋ kɛ kɛ cheleŋ Mɛlɛka tul leyɛ o chieeŋ wɔɔŋndo hoo niŋ ni.

² Kɛ o wa bɛɛ lende, o “palɛi mɛɛlɛi” chieeŋndo hoo niŋ naŋ cho ni, nduyɛ teleŋ o teleŋ sɔɔŋ nɔla miŋ faŋa naa o tiindaŋ naa choo wo cho naa wa komallo. (2Timo 3:​1) Vɛɛ ŋ looku yɛ tiindaŋ numndo mɛɛndaŋ le sinaa te o cho wɔ pɛ o kala? Nduyɛ, yɛɛ ŋ nɔ yɛ ma tosa le mi tiindaŋ numndo wa o kala poŋ? Ŋ cho mulilaŋ sɔla le nyunalaŋ ndaŋ.

3. Yɛɛ puaa chɔuwa ndaa tosa yɛ a boola bɛndula ndaa bii o ba laŋ, nduyɛ le yɛɛ?

³ O sindɔɔ niŋ, mi ndaa hol yaula visiaa o boola bɛndula puaa chɔuwa ndaa bii o ba laŋ. Mi puaa chɔuwa ndaa suu chuɛiyaŋ o boo bɛndu koŋ le yau koŋ mandaa nyɛkɛndɛi, nduyɛ koŋ ndoo tosa chiliŋii nda toosiaa boo koŋ nde ndii sɔwa le. Te po chɔuwo ndoo sina pɛ maa boo ndɔɔ tambu, mi ndoo keleŋa ndu toosiaa chɔ chɔ le mbo wa o bɛɛndiaŋ teleŋ o teleŋ le chɔuwo. Vɛɛ taamaseliiyo hoo piiliaŋ yɛ tiindaŋ numndo?

4. Le yɛɛ ŋ nɔ yɛ ma wa tiindaŋ numndo mɛɛndaŋndo, nduyɛ vɛɛ ŋ tosa yɛ keŋ?

⁴ Mɛɛ puaa chɔuwa ndaa tosa o sindɔɔ niŋ yɛ, num bɛɛ nɔ ma  wa tiindaŋ numndo mɛɛndaŋndo le ma wa o bɛɛndiaŋ teleŋ o teleŋ le sɔŋgɔɔ. Naa Kilisiɔŋnda, a nyinaa wɔɔŋnda naŋ cho sɔŋgaa o Mɛlɛka piɛiyo niŋ ni. (Ɛfi. 6:​10-12) Wana o wana cheleŋ nɔla mbo lo o tiindaŋndo choo le num te. Yɛɛ mala yɛ num ma lo o tiindaŋ numndo choo o yɔŋ bɛɛ mi tɔɔndaŋndo komal num? Nyɛ tasoo, a nɔ ma piɛi le mi Mɛlɛka mala num. A nɔ vɛlɛ ma soliŋ Diom Mɛlɛkaa kpeku le num malaa ma che numpila mɛɛ Mɛlɛka che num yɛ. (Hibu. 4:​12) Baabuiyo dimi aa: “Dɔu tiindaŋ numndo kpou o Mɛlɛka Yaawɛɛ niŋ. Tiindaŋ sina numndo le.” (Pulɔ. 3:​5, 6) A hei o kɔl, yiyaŋndɔ a kɛɛsiaala ŋ tosa o palɛi biŋgi hiou ve niŋndo. Le taamaseliiyo, baa mi bahawɛi ikani kala kalaa komal num pa? Baa ma yiyaŋ pa a diomnde mɛyaale Chɛhowaleŋ o Hibuluiya 13:​5 niŋ aa: “I feŋaŋ nya ikɛi le, nduyɛ, o nyɛ palaa niŋ bɛɛ I mel nya nya kpeele le” okɔɔ? Baa diomnde Chɛhowa dimi leŋ ndeŋ le ke num pa tiindaŋndo maa o cho num mala? Te lende i cho ni, mɛɛ tiindaŋ numndo cho o kala poŋ.

5. Yɛɛ ŋ cho yɛ naapum saalɔŋ te a mɛɛndaŋ pɛ tiindaŋ numndo nyɛkɛndɛi?

⁵ Kɔndɔfillo cho num biyɔɔ a sɔɔŋ ŋ cho saalɔŋ ndoŋ te a mɛɛndaŋ pɛ tiindaŋ numndo nyɛkɛndɛi. Naapum a cho saalɔŋ maa a nɔ dialuŋ vilɛiyoŋ o sɔɔŋ pum tosaa niŋ nduyɛ a ve bɛɛ pɛŋ o sina choo le. Le taamaseliiyo, naapum ma saaluŋ dɔɔ maa buulaŋ bɛndoo, choolaŋ, a kɔl tambɛiyo cho tiindaŋ numndo yɔŋyɔlaa. Te a saaluŋ pɛ hei, yɛɛ ŋ nɔ yɛ ma tosa a mel tiindaŋ numndo le?

6. Ɔɔ sɔɔŋ ŋpum ŋ bɛnda le miŋ buulaŋ a muŋndo?

⁶ O bɛnda bɔɔ miŋ buulaŋ le sɔɔŋ ŋpum. Le taamaseliiyo, o bɛnda miŋ buulaŋ le Chɛhowa a Chiisu kɔllo nɛŋioo. (1 Kɔliŋ. 7:​32) Te ŋ tosa pɛ haki wɔɔŋ wɔɔŋndo, ŋ nɔ miŋ buulaŋ le miiŋgoo o chaŋyɛi nɛi niŋ a Mɛlɛka. (Sam 38:​18) Ŋ nɔ vɛlɛ miŋ buulaŋ le wana naŋ cho o nɔɔ niŋndo, wanayaŋ naŋ, a chaaŋaa naa laalaŋnda kɔllo nɛŋioo.—1 Kɔliŋ. 7:​33; 2 Kɔliŋ. 11:​28.

7. A mɛɛ Pulɔwaa 29:​25 dimi yɛ, le yɛɛ naŋ nɔ yɛ miŋ yɔŋ isiooŋ le wanachioo le?

⁷ O baa pilɔɔ choo, mi buulaŋ bɛndoo tosa miŋ mal tiindaŋ naa. Le taamaseliiyo, naapum miŋ buulaŋ teleŋ o teleŋ le nyɛdiaa a nyɛ chuɛyaŋndo sɔlaa tau. (Maa. 6:​31, 32) Le hei, miŋ kandu dɔɔ kɔllo handɔɔ le nyɛm kiɔɔŋ nuuviaa tau. Nduyɛ pɛŋ, mi kaala ikanioo kandu naa luɛiyɔɔ o kɔl. Te ŋ chɛl pɛ mi keŋ yɔŋnuŋ naa, tiindaŋ naa o Chɛhowa niŋ cho yɔŋyɔla nduyɛ mi chaŋyɛi nɛi a ndu tambu. (Maki 4:​19; 1 Timo. 6:​10) Ɔɔ naapum nyɛ cheleŋ tosa vɛlɛ miŋ buulaŋndo cho kindiŋndo le sinaa nyɛ acheleŋnda yiyaŋ a naa okɔɔ wo ni. Mi hei tosa mi siooŋnde wa naa yɔŋi acheleŋnda mam naa ɔɔ ma tusi naa nyɛpalaa choo mbo hiou siooŋnde nɔɔ le Chɛhowa. Yɔŋi hei yɔŋnuŋ naa, ŋ nɔ miŋ nyɔɔlu Chɛhowa le mbo ke naa tiindaŋndo a kɔl sikpa naŋ yeema wo le simullo hoo chɔulabaa.—Nuawɔ Pulɔwaa 29:​25; Luku 17:​5.

8. Yɛɛ naŋ nɔ yɛ miŋ tosa te a dimi pɛ choolaŋ a naa okɔɔ?

⁸ Setana “viam waŋnda choolaŋ dimioo ni.” O cho hau wanaa cho o kpaaya ndɔɔ bɛŋgu wa soliŋndo kpeku le choolaŋ pɛŋgɛlaa a Chɛhowa okɔɔ vɛlɛ a puaapiliaa a ndepiliaa naa. (Chɔŋ 8:​44) Le taamaseliiyo, mi wanaa simul piɛile tonyaleŋ nda dimi choolaŋ o intanɛtiiyo choo, tɛlivisiɔŋndo, a o nɛila cheleŋ niŋ le ma veŋ tonya cho a kɔɔna Chɛhowaa okɔɔ wo. Choolaŋ ndaŋ la cho ‘chiŋɔma leyiŋ’ Setana soliŋ kpeku waŋ ma tiŋ ni. (Ɛfi. 6:​16) Yɛɛ naŋ nɔ yɛ miŋ tosa te waŋndo chiŋa pɛ naa balioo a choola waa naa okɔɔ? Ŋ nɔ miŋ yaŋ nda lani le! Le yɛɛ? Kanifuule, ŋ nɔ tiindaŋndo o Chɛhowa  niŋ nduyɛ ŋ laalaŋ a puaapiliaa naa. Nduyɛ pɛŋ, ŋ nɔ miŋ fafaŋ suukaŋndo a wanaa simul piɛile tonyaleŋ nda o nɛi o nɛi niŋ. Ŋ nɔ miŋ chɛl mi wana o wana ɔɔ nyɛ o nyɛ tosa naa miŋ suukaŋ a nda le. Nduyɛ, ŋ nɔ miŋ kindiŋ pɛŋ le sinaa a suɛi nda cho dimioo ve okɔɔ le.

9. Vɛɛ kɔl tambɛiyo paaliaŋ yɛ naa?

⁹ Mi kɔl tambɛiyo yɔŋyɔla tiindaŋ naa. Nduyɛ pɛŋ, lepum miŋ tambu kɔl tau le mɛɛ naŋ nɔ bahawɛilaŋ yɛ. O kpeekpei niŋ, ŋ nɔ kposoŋ miŋ faŋa kɔllo o bahawɛilaŋ ndaŋ choo le. Kɛ ŋ nɔ miŋ wa buulaŋndo a bahawɛila naalaŋ okɔɔ teleŋ o teleŋ te. Te ŋ wa pɛ buulaŋndo a laŋ okɔɔ, ŋ cho puɛɛnɔŋ a sɔɔŋ kɛndɛŋ Chɛhowa mɛi lediom le naa tosallo woŋ okɔɔ. (Sɔɔŋ. 21:​3, 4) Mi kɔl tambɛiyo tosa miŋ vi ŋdial o Mɛlɛka piɛiyo niŋ nduyɛ miŋ mal pɛŋ Chɛhowa piɛiyo. (Pulɔ. 24:​10) Kɛ ŋ nɔ miŋ chɛl mi keŋ yɔŋnuŋ naa kposoŋ te.

10. Yɛɛ ŋ pɛɛku yɛ o yau ndepilɛnɔ pilɛ poonyiaa wo niŋ?

¹⁰ Tofawɔ mɛɛ ndepilɛnɔɔ o Amɛlika niŋ cho loo o tiindaŋ ndɔɔ choo yɛ, mi che bɛɛ o cho pɔnɔ ndɔ cho a naa kala kalaa wo mandaa. Mbo dimi o yau o poonyial puaapiliaa cho o fondaŋnda leboltaŋ ndo niŋ aa: “Lepum, mi bahawɛi naa tosa miŋ tambu kɔl tau, kɛ tiindaŋ naa cho o kala poŋ. I naŋ bɔɔ kɔl le nyɛ o nyɛ Chɛhowa cho naa kioo le tiindaŋ naa kindioo a naa kɔltaŋ dɛɛniaa. Ŋ yeema bɔɔ silaa hoo a kɔl dɛɛniaa. Ndu cho naa malaa ni le hiouwɔɔ lachi a Chɛhowa piɛiyo nduyɛ miŋ wa biuwɔŋndo simulta Setana cho soliŋndo kpeku le naa dialloŋ diyɔɔ wo.” Nyɛ ndepilɛnɔɔ hoo dimi wo pɛɛku naa maa ŋ tiuba miŋ chɔulaba kɔl tambɛiyo! Vɛɛ naŋ tosa yɛ keŋ? Loonuŋ maa Setana cho num bahawɛilaŋ handɔɔ choo le tiindaŋ numndo tofaa. Nɔ tiindaŋndo maa Chɛhowa cho num kɔl dɛɛniaa ke. Nduyɛ ma chɔm balika melaa le nyɛm o cho num kioo le pɛɛkoo a ndu okɔɔ woŋ.

11. Le sinaa mɛɛ kpɛ tiindaŋ naa kendu yɛ, nyunala kuɛɛ naŋ nɔ yɛ miŋ nyunaŋ?

¹¹ A cho pa chɔɔ naa ŋ nɔ ma tosa hiouwɔɔ lachioo le mi tiindaŋ numndo chɔɔlu kalu wo? O paŋguŋ biŋgi hiou woŋ bɛŋgu, baa ma nɔla pa le fafaŋndo buulaŋ bɛndoo? Baa ma nɔla pa le kiɔɔ nilaŋ yaŋɔɔ ɔɔ suukaŋndo a wanaa simul piɛile tonyaleŋ ma wa choolaŋ pɛŋgɛlaa a leŋ okɔɔ wa? Baa ma nɔla pa sɔɔŋ biuwɔŋndo mɛɛ ŋ tambu kɔl? Te lende i cho ni, mɛɛ  tiindaŋ numndo cho wɔ o kala poŋ. Kɛ ŋ nɔ miŋ wa yekeŋ kanifuule, Setana nɔ sɔɔŋ cheleŋ o cho soliŋndo kpeku le naa chɔulabaa wo. Ŋ yaasiaŋndɔ sɔɔŋ muŋ ipilɛ.

12. Yɛɛ yɔŋnuŋ yɛ naa te ŋ nɔ pɛ hɔlte nyɛm kiɔɔŋ?

¹² Mi hɔlte nyɛm kiɔɔŋ tosa mi tiindaŋ naa yɔŋyɔla nduyɛ ŋ tiu lɛ ba miŋ tosa tau le Chɛhowa le. Mi Pɔɔl, wana Chiisu vem hɔlte ndɔ wo dimi aa: “Wana o wana cho sovɛinɔ, o wou ba o sɔɔŋ wanaa cho a sovɛi le wa niŋ te. Kani fuule, yeemɛi nduɛi cho ni, maa mbo tosa nyɛ wana cho ndu bolleŋ ndo o hɛnaŋ ndo.” (2 Timo. 2:​4) Nduyɛ pɛŋ, ndaa chɛl sovɛiyaa maLuomaŋnda le mi ndaa wou laba o leyula niŋ kposoŋ te. Yɛɛ ndoo yɔŋnuŋ yɛ te sovɛinɔɔ ndoo kɛɛ pɛ le sawaa hoo biyɔɔ?

13. Le yɛɛ o bɛnda yɛ mi sovɛinɔɔ luei laba o yulaleŋ niŋ kposoŋ te?

¹³ Yiyaŋndɔ a taamaseliiyo hoo okɔɔ. Sovɛiya pena pɛɛkoo le sinaa mɛɛ nda soliŋ mɔɔŋ ndaŋ chɔuwoŋ kpeku yɛ. Kɛ mɛɛ nda fuuluu naa pɛɛkaa, ma saaluŋ maa chaaŋ ndaa opilɔɔ cho nda tɛɛŋ te. Chaaŋ nda koŋ waŋnuŋ nyɛdiaa pisioo o lɔɔ niŋ. A paale yɔŋgaŋndeŋ, mi sovɛiyaa kaŋ chua teleŋndo ma mɛɛndaŋ boola bɛndula nda bii o ba le nda mandaa laŋ, nduyɛ ma yikpa mɔɔŋ ndaŋ. Kɛ mi chaaŋ nda kuɛŋnuŋ koŋ nyɛdiaa pisioo wo chua teleŋ koŋ le nyɛdiaa bɛɛndiaa le pisioo diimandɔɔ. Diimandɔɔ, mi yaamɔɔwaa ndaa huŋ del nda choo. O sovɛiya haa tɛɛŋ, a kuɛɛ cho yɛ wa a bɛɛndiaŋ le chɔuwo nduyɛ ma nɛŋi wana nda bɛndoo kɔl? Nduyɛ, te o yɔŋ pɛ aa a cho o chɔuwo hoo, nɛɛnɛ ŋ yeema yɛ mbo sim num ikɛi, sovɛiyaa bɛɛndiaŋ nda ɔɔ o kuɛŋnuŋ yulaleŋ tosaa wo?

14. Naŋ cho sovɛiya le Kiliti wa, yɛɛ hiou yɛ wa o sɔvɛ le naa?

¹⁴ Ŋ cho ko maa sovɛiyaa kɛndiaa kaŋ. Nduyɛ, kpeleŋ naa cho le Masaa naa Chɛhowa a Chiisu kɔllo nɛŋioo ni. Ndi hiou wa i sɔvɛ o yoomu naa niŋ a nyɛ o nyɛ cheleŋ naŋ sɔla o chieeŋ Setanaa hoo niŋ. Ŋ nɔ miŋ soliŋ yoomuma naŋ a teleŋ naa kpeku le Chɛhowa piɛiyo. Ŋ nɔ vɛlɛ miŋ hiou lachi a tiindaŋ naa kindioo nduyɛ miŋ tosa a sabu maa wolɔɔla chɔula Mɛlɛka ke naa laŋ kpou la cho nyɛkɛndɛi.

15. Sila yɛɛ Pɔɔl ke yɛ naa, nduyɛ le yɛɛ?

 ¹⁵ Fɛŋ bɛɛ ŋ nɔ miŋ puɛɛŋ a naapila okɔɔ le! Le yɛɛ? Mi Pɔɔl, wana Chiisu vem hɔlte ndɔ wo yɔŋgu silaa maa “wanaa nɔ haa yeemɛi le sullo wa” cho malɔɔ “tiindaŋndo dɔwɔɔ o Mɛlɛka niŋ.” (1 Timo. 6:​9, 10) Diomndaŋ ndaŋ malɔɔ “tiindaŋndo dɔwɔɔ o Mɛlɛka niŋ,” chɔm maa ŋ nɔla miŋ faŋa kɔllo o Mɛlɛka piɛiyo choo miŋ muli hɔlla le nyɛm naŋ heuba le woŋ nuuviaa. Te ŋ del lɛ pɛ nyɔɔŋ muŋ nuuviaa, “yeemaŋ ŋdiɔmndoŋ ŋ huŋ a kpundɔɔ woŋ” nɔla miŋ luɛi naa o kɔl. Kɛ yɔŋi naŋ chɛl mi yeemaŋ muŋ luɛi naa o kɔl, ŋ nɔ miŋ loonuŋ maa muŋ Setana cho soliŋndo kpeku ni maa wolɔɔla chɔu le tiindaŋ naa yɔŋyɔlaa.

16. Nyunala kuɛɛ nyɛ dimiŋ o Maki 10:​17-22 niŋndo tosa yɛ miŋ yiyaŋ choo?

¹⁶ Te o yɔŋ yɛ miŋ nɔ nyɛsɔlaa tau le nyɔɔŋ piondɔɔ puɛɛ. Baa o wa pa suɛi wɔɔŋ le piondɔɔ nyɛm naŋ yeema kɛ ŋ heuba kpeekpei le muŋ te woŋ? Sako. Kɛ yiyaŋndɔ o nyunalaŋ ndaŋ choo: O yɔŋ bɛɛ miŋ nɔ kaniei le nyɔɔ piondɔɔ, baa ŋ nɔ pa teleŋndo le ndu soliŋndo kpeku, ɔɔ ŋ nɔla niŋ pa ndu biyɔɔ nyɛkɛndɛi? Baa nyɔɔŋ hiuwo piondɔɔ tosa pa miŋ kandu hɔlteŋ luɛiyɔɔ o nyɛm kiɔɔŋ? Baa kaala naŋ nɔ le nyɛm naŋ kiɔɔŋ ndo tosa pa miŋ wa maa po chua piandu kɛɛ veelu Chiisoo le tosaa tau o wali Mɛlɛkaa niŋndo? (Nuawɔ Maki 10:​17-22.) O wa bɔɔ suɛi kɛndɛ le miŋ tosa  yoomu naa tɛtɛlɛ nduyɛ miŋ soliŋ teleŋ naa a yoomuma naŋ kpeku le hɛnaŋ Mɛlɛkaa tosaa!

17. Yɛɛ naŋ nɔ yɛ miŋ puɛɛŋ te?

¹⁷ Fɛŋ bɛɛ ŋ nɔ miŋ puɛɛnuŋ maa o chɔuwo le naŋ cho le. Nduyɛ ŋ nɔ miŋ wa a bɛɛndiaŋ lepaa o lepaa le sɔŋgaa. (Sɔɔŋ. 12:​17) Puaapiliaa a ndepiliaa naa nɔla ma biilul naa boo naa chɔuwo, o cho tiindaŋ naa wo le. Naapila nɔ ni miŋ bii ndu nyɛkɛndɛ kpiŋ.

18. Le sabu yɛɛ sovɛiya o sindɔɔ niŋ ndaa bii yɛ boola ndala chɔulaŋ nyɛkɛndɛ kpiŋ?

¹⁸ O sindɔɔ niŋ, mi ndaa ke sovɛinɔɔ bɛɛleŋ tau te ndoo chɔm pɛ kɔl sikpaa o chɔuwo. Kɛ mi siɔmbulaŋ laa bii ndu te ndoo fula pɛ o chɔuwo mbo miiŋgu a boo ndɔ chɔuwo le. Mi Tacitɔɔ, wana ndoo poonyiaa le Luomaŋnda wo dimi aa: “Suɛi lasiɔmbuei pila i wa ni le mi sovɛinɔɔ ndoo fula o chɔuwo o miiŋgu a boo ndɔ chɔuwo le.” Le sabu koŋ kpeekpei sovɛiya ndaa bii boo nda chɔuwo nyɛkɛndɛ kpiŋ ni.

19. Te ŋ yeema pɛ mi tiindaŋ naa hɛluŋ naa le, yɛɛ naŋ nɔ yɛ miŋ tosa?

¹⁹ Te ŋ yeema pɛ mi tiindaŋ naa hɛluŋ naa le, ŋ nɔ miŋ wa kɔlaŋ o bɔŋaŋnda leKilisiɔŋndaŋ lɔɔlɔɔ a suɛi o acheleŋnda lo a Chɛhowa okɔɔ vɛlɛ a Masale ndɔleŋ. (Hibu. 10:​23-25) O fulawɔ o muŋ kɔɔli, ŋ nɔ vɛlɛ miŋ wa Diom Mɛlɛkaa pɛɛkoo lepaa o lepaa nduyɛ miŋ piɛi Chɛhowa le mbo mala naa miŋ dɔu nyɛ naŋ pɛɛku wo o wali niŋ. (2 Timo. 3:​16, 17) Te ŋ tosa pɛ lende, mɛɛ wolɔɔ o wolɔɔ chɔu cho mi Setana soliŋ ndu kpeku mbo yɔŋul naa lefafɛɛŋ te. (Aisaya 54:​17) Tiindaŋ naa “cho . . . maa boo bɛndu wo” cho naa manda. O cho naa mala miŋ sim yi, nduyɛ miŋ tosa wallo diompilɛ a puaapiliaa a ndepiliaa naa a kɔl sikpaa. O cho naa vɛlɛ mala miŋ sɔla batiuwaa le chɔu naŋ cho lepaa o lepaa wo yomɔɔ. Kɛ i hiou kpou ve, ŋ cho hunɔɔ dioo sɔla le waa o kumbui Chiisu ve choo teleŋ o yam niŋ Setana a wanaa tol ndu kɔɔli wa kpou wo.—Sɔɔŋ. 17:​14; 20:​10.