O SINDƆƆ niŋ, wali buɛiyo ndoo tosa wo wa nyɛm kɛŋ wana ndɔ bɛndoo ɔɔ chiɛi ndɔɔ biyɔɔ nyɛkɛndɛi ni. Diom maHibului a o maKilikii nda soliŋ kpeku le “buɛiyo” wo sim vɛlɛ le wana chua chilaŋndo ɔɔ wana wa chiɛiyo hɔlteŋndo.

Mɛɛ po Chekɔpu wo Choosɛ wa o chɛleŋ niŋ Ichipi, mbo simnuŋ buɛi wa buɛiya kpou chilaŋndo. Nduyɛ pɛŋ, mi wana ndɔ bɛndu Ichipiaŋnɔ koŋ “chua nyɛ o nyɛ ndɔ fau, mbo yɔŋgu Choosɛ, mi ŋ wa o ba ndɔɔ bɛŋgu.” (Chɛ. 39:​2-6) Mɛɛ Choosɛ bɛɛ simnuŋ masa kpaaya bɛndu o Ichipi niŋ okoŋ kɔɔli, mbo chua buɛiyo le mbo wa chiɛi ndɔɔ chilaŋ.—Chɛ. 44:​4, 5.

Teleŋ Chiisu wa o chieeŋndo choo wo, o chieeŋ bɛndoŋ niŋ pɔ wanaa ndaa tosa chiɔɔŋ nda ndaa wa ni. Le hei, mi ndaa chua buɛiya le wali kɛ kɛ wanaa walla ndaa tosa o chiɔɔŋ ndaŋ niŋ waa chilaŋ.

Nɛɛ ndoo suliŋ yɛ le foofo le buɛiyo sɔlaa? Mi wana ndoo poonyiaa le Luomaŋnda o wɔsiŋ kɛmɛ tasoŋ niŋndo Kɔlimela dimi maa le ma siiŋguu chiɔɔ buɛiyo, “mɛɛ mi waŋndo ndoo wa wana pɛɛku le wallo tosaa nyɛkɛndɛiyo.” Buɛiyo ndoo nɔ mbo wa “wana lamamɔɔ le nduyɛ ndoo nɔ vɛlɛ mbo wa ŋuasu ŋuasu le.” Mbo chɔɔlu dimi aa: “Kɛ nyɛ ndoo yeemaŋ buɛiyo o ba mbo hiau nyɔɔŋ kpou wo wa ni, o nɔ mbo yiyaŋ naa maa o sina nyɛ o nyɛ fee le. Nduyɛ ndoo nɔ mbo nɔ yeemɛi le sɔɔŋ cheleŋ waa pɛɛkoo.”

Diom Mɛlɛkaa tuu walta buɛiyo ndoo tosalaŋ a walta cho hau tosaŋndo o kunda leKilisiɔŋndo niŋndaŋ latiŋ. Le taamaseliiyo, mi Pitɛ, wana Chiisu vem hɔlte ndɔ wo dɛɛniaa Kilisiɔŋnda le ma soliŋ kɔl kalula Mɛlɛka ke nda laŋ kpeku le waa “wanaa waliaa kɛndɛ nduyɛ mi walta [nda] tosa laŋ la wa le waŋnda malaa.”—1 Pitɛ 4:​10.

Mi Chiisu bɛɛ suaa a wali buɛiyo ndoo tosa wo okɔɔ a mɛɛ Luku 16:​1-8 dimi yɛ. Le handɔɔ lechoo, mɛɛ o wa suɛi a teleŋ o kandu niŋ masaleŋ o choo choo niŋndo okɔɔ, mi Chiisu ke tol kɔɔliaa nduaa tiindaŋndo maa o cho “buɛi cho sakpo, nduyɛ, mbo wa buɛi kɔl kalu wo” iso yulɔɔ. Wali kpeekpei buɛiyo hoo nɔ le tosaa wo cho tol kɔɔliaa Kiliti wa kioo nyɛm mala nda le pɛɛkoo a Mɛlɛka okɔɔ woŋ o teleŋ mɛɛlaa hoo niŋ ni. (Maa. 24:​45-47; Luku 12:​42) Ŋ nɔ bɔɔ balika melaa le buɛi cho hoo sakpo wo. Yaula o cho toosiaa laŋ la cho naa malaa chieeŋndo balɔɔ silɔ le tiindaŋ naa kindioo poŋ.