1. Le yɛɛ naŋ yeema yɛ kɔl dɛɛniaa?

NAA kpou yeema kɔl dɛɛniaa. Naapum, yoomula naalaŋ la cho la piaa cha a buulaŋndaŋ, kɔlta tambɛilaŋ vɛlɛ a siooŋndoŋ. Naapum ŋ cho saŋgaa kanifuule, ŋ cho a naa, ŋ cho hiouwɔɔ lachi a yuuwɛi, ɔɔ le mɛɛ wana naŋ kaala wo vi yɛ. Naapum nda waŋnda cho naa chaa biyɔɔ le. Le handɔɔ lechoo, wanaa balu naa wa cho lɔɔlɔɔ hiouwɔɔ lachi a tandalaŋ keiyo mɛlioo. I cho tonya maa “nyɛ palaa” hoo kpou chɔm maa ŋ cho niŋ o “palɛi mɛɛlɛi” niŋ, nduyɛ mɛɛ palɛi hiau fau yɛ, lende koni naŋ sɔɔŋguu chieeŋ sɛnɛiyo ikɛi kpɛɛluŋ ni. (Timoti Diiŋ Ndɔɔ 3:​1) Kɛ, naapum ŋ bii niŋ chumndo le teleŋ vilɛi le mi mɛila Chɛhowalaŋ la peeluŋ, nduyɛ sɔɔŋ palɛiyoŋ cho wɔ hiouwɔɔ lachi a naa komallo. Lelaŋ, kuɛɛ naŋ sɔla yɛ kɔl dɛɛniaa?

2, 3. (a) Yɛɛ naŋ sina yɛ a Habakuku okɔɔ? (b) Le yɛɛ naŋ cho yɛ yau Habakuku wo yaasiaa?

² Ŋ yaasiaŋndɔ yau Habakuku wo le muli nyuna koŋ saalɔŋndo. Mi che bɛɛ Baabuiyo suu tau a yoomu Habakuku  wo okɔɔ le, kɛ yau ndɔɔ cho bɔɔ yau kɔl dɛɛniaa bɛndu. Diolaŋ ndaŋ Habakuku naapum sim ni, “kɔmaŋndo.” Naapum hei sim a mɛɛ Chɛhowa kɔmaŋ wanaa cho ndu piɛiyo wa le nda kɔltaŋ dɛɛniaa yɛ. Ɔɔ naapum, o sim vɛlɛ a mɛɛ wanaa cho ndu piɛiyo wa bii ndu kpiŋ yɛ. Mi Habakuku suaa o Mɛlɛka lo, nduyɛ mbo nyuna ndu nyuuniaalaŋ lapum. Mi Chɛhowa ke Habakuku nyina ndɔɔ le mbo poonyiaa suukaŋ nda koŋ kanifuule, ndoo sina maa ŋ sɔla niŋ tɔnɔɔ leniŋ.—Habakuku 2:​2.

³ Suukaŋ yɔŋnuŋ hoo Chɛhowa tɛɛŋ nda wana ndoo suaa le ndu kɛ mbo wa a kɔl tambɛiyo wo kinɛi Baabuiyo dimul naa a ndu okɔɔ ni. Kɛ yau ndɔɔ cho o opilɛ o “nyɛ o nyɛ poonyiaŋ sindɛ” o Diom Mɛlɛkaa niŋ, “nduyɛ, la tosa mi ŋ sɔla kɔl biuwaŋndo nduyɛ mi la dɛɛniaa naa kɔltaŋ, o koŋ, mi la tosa mi ŋ wa lehɔl o nɛi.” (Luomaŋnda 15:​4) Vɛɛ yau Habakuku wo mala yɛ naa pilɛŋ pilɛŋnda kpou? O mala miŋ che nyɛ o sim le tiindaŋndo dɔwɔɔ o Chɛhowa niŋndo. Nduyɛ, sɔɔŋ Habakuku dimi woŋ ke naa tiindaŋndo maa mɛɛ mɛɛ bahawɛilaŋ ɔɔ tɔɔndaŋndaŋ la komal naa, ŋ nɔla miŋ nɔ kɔl nyulu Mɛlɛka yɔŋgu wo.

4. Le yɛɛ Habakuku ndoo tambu yɛ kɔllo tau?

⁴ Nuawɔ Habakuku 1:​2, 3. Habakuku wa achal o teleŋ kala kalaa niŋ. Wanaa wa ndu a balaa wa, wanaa dɛnɛwɔɔŋnda vɛlɛ a wanaa latandaa nda wa ni. Nduyɛ, mi hei tɛɛmbuu ndu kɔllo tau. Ba o ba ndoo tofa pɛ, mi ndoo che Isɔluɛiya chaaŋaa ndaa Isɔluɛiya sɔɔŋ wɔɔŋndoŋ a kafalaŋ nda tosallo. Naapum mi Habakuku nyunaŋ aa, ‘Teleŋ kuɛɛ dɛnɛwɔɔŋndo hoo cho yɛ chuwɔɔ? Le yɛɛ Chɛhowa cho yɛ teleŋndo chuaa tau o tosa isɔɔ a hei okɔɔ le?’ Mbo tambu kɔllo tau. Okoŋ, mbo nyɔɔlu Chɛhowa le mbo tosa isɔɔ. Naapum mi Habakuku kandu yiyaŋndo maa Chɛhowa buulaŋ lɛ a wanaa nduaa le, ɔɔ maa o cho isɔɔ tosa le. Kani bɛɛ a yiyaŋ niŋ pa naa paandu?

5. Yɛɛ naŋ pɛɛku yɛ o yau Habakuku wo niŋ? (Tofa fotueiyo o peele naŋ kandu leŋ choo.)

⁵ Baa nyunala Habakuku nyunalaŋ la chɔm maa o ve lɛ tiindaŋ dɔwɔɔ o Chɛhowa niŋ a mɛila ndɔlaŋ te? Sako bɛɛ! Habakuku wa Chɛhowa nyunaa le mbo mala ndu a kiisaŋnda ndoo nɔ laŋ vɛlɛ a bahawɛila ndɔlaŋ. Hei chɔm maa o mel tiindaŋ ndɔɔ le, kɛ ndoo nɔ wɔ tiindaŋndo o Chɛhowa niŋ. Habakuku wa buulaŋndo, nduyɛ ndoo sina nyɛ ndoo tosa wo le. Ndoo bii bila le sabu Chɛhowa wa teleŋndo chuaa tau le mbo tosa isɔɔ wo le, vɛlɛ a le sabu o wa chɛlɔɔ mbo wa saŋgaa tau wo le. Sabu Chɛhowa chɛl le mi Habakuku poonyiaa buulaŋnda ndɔlaŋ ndo, pɛɛku naa suɛi sɔvɛ bɛndu. Ŋ nɔ miŋ yɔŋ isiooŋ le buulaŋnda naalaŋ a kiisaŋnda naalaŋ Chɛhowa chɔmndo le. Nduyɛ, o kpeekpei niŋ, o veelu naa le miŋ piɛi nduyɛ, miŋ dimul ndu nyɛ kpeekpei cho naa o kɔl lo. (Sam 50:​15; 62:​8) Pulɔwaa 3:​5 dɛɛniaa naa kpou aa, “Dɔu tiindaŋ numndo kpou o Mɛlɛka Yaawɛɛ niŋ. Tiindaŋ sina numndo le.” Mi Habakuku duau diomndaŋ ndaŋ o wali niŋ o yoomu ndɔɔ niŋ.

6. Le yɛɛ piɛileŋ le cho yɛ suɛi sɔvɛ?

⁶ Habakuku ndoo nɔ tiindaŋndo o  Chɛhowa, Chaaŋ ndɔ a Finya ndɔ niŋ. Nduyɛ, mbo chua teleŋndo le mbo sɔɔŋguu ndu ikɛi kpɛɛluŋ. Habakuku chelnuŋ ko mbo wa buulaŋndo a bahawɛila wa ndu choo laŋ, okoŋ mbo nuuviaa nɛilaŋ le laŋ solioo a ba ndɔ le. Kɛ mbo piɛi a yiyaŋnda ndɔlaŋ vɛlɛ a kiisaŋnda ndɔlaŋ okɔɔ. Taamaselii kɛndɔɔ pila cho hoo le naa ni. Chɛhowa, wana muli piɛileŋ ndo dimul naa maa, ŋ chɔm tiindaŋ naa o ndu niŋ te ŋ wa pɛ piɛileŋ, nduyɛ miŋ wa ndu buulaŋnda naalaŋ chɔmndo. (Sam 65:​2) Te ŋ tosa pɛ hei, ŋ cho chɔ mɛɛ Chɛhowa muli piɛile naaleŋ yɛ. Nduyɛ, ŋ cho sinaŋ mɛɛ o kɔmaŋ naa yɛ, te o wa naa pɛ dɛɛniaa vɛlɛ a naa nɛi chɔmaa kioo. (Sam 73:​23, 24) O cho naa mala miŋ bii bila mɛɛ o che bahawɛi naa yɛ, o yɔŋ bɛɛ miŋ wa o nyɛkindilaa bɛŋgu. Piɛileŋ o Chɛhowa lo cho nɛi sɔviɔɔ opilɛ o naŋ chɔm maa ŋ nɔ tiindaŋndo o ndu niŋndo ni.

7. Yɛɛ Chɛhowa tosa yɛ mɛɛ Habakuku chɔm ndu yiyaŋnda ndɔlaŋ?

⁷ Nuawɔ Habakuku 1:​5-7. Mɛɛ Habakuku chii Chɛhowa buulaŋnda ndɔlaŋ chɔm, naapum o wa yiyaŋndo le nyɛ Chɛhowa wa tosa wo. Maa Finya kaalaa, mi Chɛhowa bii yiyaŋnda Habakuku laŋ bila. Ndoo sina maa Habakuku wa saŋgaa, nduyɛ mbo wa nyunaa le malaa. Chɛhowa pɛɛsa Habakuku le, kɛ mbo dimul ndu nyɛ o wa suŋ tosa a Chuuwaa kɛɛ le lo lechoo wo chɔmndo wa wo. Naapum, Habakuku wa wana tase Chɛhowa dimul maa kota o wa nda hunɔɔ tusi choo wo wa niŋ Kpɛɛluŋ ni.

8. Le yɛɛ muli Chɛhowa yɔŋgu wo ve muli Habakuku wa kɔl lo le?

⁸ Mi Chɛhowa tɛɛsial Habakuku maa, o wa o bɛɛndiaŋ le nyɛ tosa. Maa o cho wanaa dɛnɛ wɔɔŋaa kaŋ Chuda kotaa tusi choo. Nduyɛ, nyɛ dimiŋ hoo maa hei cho yɔŋnɔŋ “o teleŋ nyaa niŋ” ndo, chɔm maa Chɛhowa wa nda kɔɔsa o teleŋ Habakuku wo niŋ ɔɔ o teleŋ Isɔluɛiyaa kaŋ niŋ. O cho muli Chɛhowa yɔŋgu wo le Habakuku wa kɔl te. Chaldiaŋnda, ɔɔ Babilɔŋnda, wa bɔɔ wanaa dɛnɛ wɔɔŋ bɛndu. Nduyɛ, ndaa kaala sɔŋgɔlaŋ mbo hiau Isɔluɛiyaa ndaa sina tiŋ a sawala Chɛhowalaŋ okɔɔ wa. Lelaŋ, le yɛɛ Chɛhowa wa yɛ wanaa dɛnɛ wɔɔŋ bɛnduaa haa, a ve ndu piɛi le wa soliŋ kpeku le wanaa nduaa kotaa tusioo choo? Hei wa vɛlɛ Chuda nyɛpalaa chɔɔlu tusi choo. Te ndoo wa pɛ aa num cho Habakuku ni, vɛɛ ŋ wa yɛ yiyaŋ?

9. Nyunala cheleŋ kuɛɛ Habakuku ndoo nyuna yɛ?

⁹ Nuawɔ Habakuku 1:​12-14, 17, NW. Mi che bɛɛ Habakuku ndoo sina maa Chɛhowa wa Babilɔŋnda soliŋ kpeku le wanaa wɔɔŋaa wa ndu a balaa wa tɛɛmbuuwo, kɛ a koŋ kpou, Habakuku ndoo sina nyɛ ndoo tosa wo le. Kɛ o wa wana tusiaŋ, nduyɛ mbo handu kɔl ndɔɔ kpou le hiouwɔɔ lachi a tiindaŋndo dɔwɔɔ o Chɛhowa niŋ. Mbo dimi pɛɛŋ maa Chɛhowa cho “pou kpoowa” ndɔɔ ni. (Ditɔnɔmii 32:​4; Aisaya 26:​4) Habakuku ndoo nɔ tiindaŋndo kɛsɛ maa Mɛlɛka cho wana kaalaa, nduyɛ maa o cho wana ikɛndɛ. Le hei, o yɔŋ isiooŋ le Chɛhowa chɔɔloo nyunaa le. Mbo nyuna ndu vɛlɛ aa, Le yɛɛ Chɛhowa chɛllɛ mi dɛnɛwɔɔŋndo o Chuda niŋ wa hiouwɔɔ lachi a kuiyo, vɛlɛ mi wanaa nduaa wa hiouwɔɔ lachi a saŋgaa? Le yɛɛ o tosa isɔɔ a hei okɔɔ suŋ suŋ te? Le yɛɛ Mɛlɛka Kpou Kpou wo cho yɛ chɛlɔɔ mi dɛnɛwɔɔŋndo wa o tiuwaa ba o ba fee, o “tosa isɔɔ a ndi okɔɔ le”? A koŋ kpou, Chɛhowa cho “Mɛlɛka diandaa” ni, nduyɛ o chɛl mbo “che yɔŋ wɔɔŋndo a lehɔl te.”

10. Le yɛɛ naŋ yiyaŋ yɛ lepum maa Habakuku?

¹⁰ Lepum, miŋ yiyaŋ maa Habakuku. Miŋ  yaŋ Chɛhowa nilaŋ, vɛlɛ miŋ dɔu tiindaŋ naa o ndu niŋ. Miŋ veelu diomndaŋ o Diom ndɔɔ niŋ, nduyɛ mi hei kindi tiindaŋ naa poŋ. Miŋ tuei vɛlɛ a mɛila ndɔlaŋ okɔɔ te ŋ wa pɛ nilaŋ yaŋɔɔ o nyɛ kɔɔna ndɔɔ cho naa pɛɛkoo wo. Kɛ a koŋ kpou, mi kɔndɔfillo bii naa, nduyɛ miŋ nyuna aa, ‘Teleŋ kuɛɛ nyɛpalaa hoo cho yɛ naa chuwɔɔ choo?’ Ŋ pɛɛku o nyɛ cheleŋ Habakuku tosa wo niŋ.

11. Yɛɛ Habakuku ndoo tuunuŋ yɛ o kɔl le hiouwɔɔ lachi a tosaa?

¹¹ Nuawɔ Habakuku 2:​1. Mi suukaŋ Habakuku tosa a Chɛhowa wo ke ndu kɔl nyulu Mɛlɛka yɔŋgu wo. Mi keŋ tosa mbo tuunuŋ o kɔl le Chɛhowa chumndo mbo tosa nyɛ. Nduyɛ, mi Habakuku kei vɛlɛ sondoo o yoomuma ndoo nɔ le chumndo waŋ choo. Mbo dimi aa, “I cho biuŋ mi chum . . . teleŋ Mɛlɛka cho hunɔɔ nda nyɛ palaa tusi choo wo fuuluu.” (Habakuku 3:​16) Nduyɛ, mi buɛiyaa laalaŋaa Mɛlɛkaa wa ndu piɛiyo wa hiau lachi a biuwɔŋndo vɛlɛ a chumndo le mi Chɛhowa tosa nyɛ. Taamaselii ndaa dɛɛniaa naa tau kanifuule, o chɔm maa naa bɛɛ tiuba miŋ tosa nyɛ pilɛ koŋ kpe.—Makal 7:​7; Chemisi 5:​7, 8.

12. Yɛɛ naŋ pɛɛku yɛ Habakuku o ba?

¹² Yɛɛ naŋ pɛɛku yɛ o nyɛ Habakuku ndoo tuunuŋ o kɔl le tosaa wo niŋ? O tasoo, fɛɛŋ bɛɛ ŋ nɔ miŋ kelu piɛileŋ o Chɛhowa lo le, mɛɛ mɛɛ naŋ nɔ bahawɛilaŋ. O diiŋ ndɔɔ, ŋ nɔ miŋ yaŋ nilaŋ o nyɛ Chɛhowa cho naa dimullo o Diom ndɔɔ vɛlɛ a o kɔɔna ndɔɔ niŋndo. Nduyɛ o yaa ndɔɔ, ŋ nɔ miŋ biuŋ, miŋ chum le mi Chɛhowa tosa nyɛ. Miŋ nɔ tiindaŋndo maa o cho naa soli o nyɛpalaa niŋ a teleŋ bɛnda ndu o hɔl lo. Te ŋ tol pɛ taamasi Habakuku wo kɔɔli, ŋ cho kɔl nyulu Mɛlɛka yɔŋgu wo sɔla, nduyɛ miŋ nɔla biuwɔŋndo. Tiindaŋ naŋ nɔ wo cho naa mala le miŋ biuŋ, nduyɛ miŋ wa a nyaale mɛɛ mɛɛ naŋ nɔ bahawɛilaŋ. Ŋ nɔ tiindaŋndo maa Finya naa o cho o choo choo niŋndo cho isɔɔ tosa.—Luomaŋnda 12:​12.

13. Vɛɛ Chɛhowa dɛɛniaa yɛ Habakuku kɔllo?

¹³ Nuawɔ Habakuku 2:​3. Ŋ nɔ tiindaŋndo maa Chɛhowa wa a kɔl hiniaa mɛɛ Habakuku kɛɛsiaa le ndu chumndo mbo tosa nyɛ. Mɛlɛka Kpou Kpou wo ndoo sina nyɛpalaa kpeekpei Habakuku wa niŋndo. Lelaŋ, mbo dɛɛniaa ndu kɔllo, nduyɛ mbo chɔm ndu o nɛi kaalaa niŋ maa o cho suŋ nyunala ndɔlaŋ muli. Mbo dimul ndu maa o cho suŋ nyɛ tosa a buulaŋnda ndɔlaŋ. I wa ko maa dimullo Chɛhowa wa Habakuku ni aa, “Num biunuŋ suee, nduyɛ ma dɔu tiindaŋndo o ya niŋ. I cho piɛile numndeŋ muli, o yɔŋ bɛɛ ma yiyaŋ maa I cho bɔɔ teleŋndo chuaa le mulioo.” Mi Chɛhowa yiyalaŋ Habakuku maa o chii niŋ kɛɛsiaa teleŋ o wa diomnda ndɔla o mɛilaŋ peelu wo. Lelaŋ, mbo dɛɛniaa Habakuku le mbo hiou lachi a chumndo. Nduyɛ maa o mɛɛlulaŋ, o sɔla niŋ kɔl tambɛi le.

14. Yɛɛ naŋ nɔ yɛ miŋ tuunuŋ o kɔl le tosaa te ŋ wa pɛ o nyɛpalaa bɛŋgu?

 ¹⁴ Naa bɛɛ nɔ miŋ chum Chɛhowa le mbo tosa nyɛ. Nduyɛ ŋ nɔ miŋ yaŋ nilaŋ yekeŋ o nyɛ o cho naa dimullo wo. Hei mala naa miŋ nɔ tiindaŋndo vɛlɛ a kɔl nyuloo mɛɛ mɛɛ nyɛpalaa wa naa choo. Chiisu dɛɛniaa naa maa, ŋ nɔ miŋ handu kɔllo o “teleŋnda. . . kɛlɛŋgaa boonduŋ” Mɛlɛka dimul naa le woŋ choo le. (Walta Wanaa Chiisuaa 1:​7) Ŋ nɔ miŋ nɔ tiindaŋndo maa Chɛhowa sina teleŋ bɛnda le nyɛ tosa wo. Lelaŋ, ŋ wu nuŋ ŋdial te. Kɛ, ŋ waŋnuŋ wanaa tusiaŋ, wanaa biuwaŋ vɛlɛ miŋ dɔu tiindaŋ naa o Mɛlɛka niŋ. Nduyɛ, a teleŋ naŋ cho wɔ hoo chumndo wo, ŋ nɔ miŋ soliŋ teleŋ naa kpeku a taasi le Chɛhowa piɛiyo a yoomuma naŋ kpou. —Maki 13:​35-37; Kaleesiaŋnda 6:​9.

15, 16. (a) Diomnda mɛyaala kuɛɛ naŋ saaluŋ yɛ o  yau Habakuku wo niŋ? (b) Yɛɛ diomnda mɛyaalaŋ ndaŋ la pɛɛku yɛ naa?

¹⁵ Chɛhowa mɛi lediom aa, “Wanaa cho sakpo Mɛlɛka o hɔl la, nda cho wa yoomu. Kani fondole, le mɛɛ nda dɔu tiindaŋ ndaa o Mɛlɛka niŋ yɛ.” Nduyɛ, “chieeŋndo kpou a sina niŋ a mɛɛ Mɛlɛka Yaawɛɛ o cho wana kpaaya yɛ.” (Habakuku 2:​4, 14) A tonya, Chɛhowa mɛi lediom le mbo huŋ ke wanaa cho biuwɔŋndo vɛlɛ ma wa tiindaŋ ndaa dɔwɔɔ o ndu niŋnda yoomu fafɛɛŋndo.

¹⁶ Diomnde mɛyaale cho o Habakuku 2:​4 niŋndeŋ le cho bɔɔ le sɔvɛ. Nduyɛ, mi kiilanɔɔ Pɔɔl soliŋ ndeŋ kpeku haaa  bɛmbɔɔ leyaa o yaula o poonyiaalaŋ niŋ. (Luomaŋnda 1:​17; Kaleesiaŋnda 3:​11; Hibuluiya 10:​38) Ŋ nɔ tiindaŋndo kɛsɛ maa, mɛɛ mɛɛ naŋ wa o nyɛkindilaa bɛŋgu, ŋ cho mɛila Chɛhowalaŋ chɔ o peelɔŋndo te ŋ dɔu pɛ tiindaŋ naa o ndu niŋ. Chɛhowa yeema naa miŋ handu kɔllo o tiindaŋ naa choo le chilaŋ.

17. Yɛɛ Chɛhowa dimi yɛ maa o cho naa ke te ŋ dɔu pɛ tiindaŋ naa o ndu niŋ?

¹⁷ Yau Habakuku wo nɔ suɛi sɔvɛ bɛndu le naŋ cho haa achal o teleŋ mɛɛlaa hoo niŋnda. Chɛhowa mɛi lediom le wana o wana cho sakpo, nduyɛ mbo tiindaŋ o ndu niŋ yoomu fafɛɛŋndo kioo. Lelaŋ, ŋ hiounuŋ lachi a tiindaŋ naa o Chɛhowa niŋ kindioo poŋ, mɛɛ mɛɛ bahawɛilaŋ vɛlɛ a buulaŋndaŋ la wa naa choo. Nyɛ Chɛhowa dimul Habakuku wo ke naa tiindaŋndo maa o cho naa toolu, nduyɛ mbo piŋi naa. O dɛɛniaa naa le miŋ dɔu tiindaŋ naa o ndu niŋ, nduyɛ miŋ hiou lachi a ndu chumndo kpɛ, le teleŋ o kɛsi le mi Masale ndɔleŋ le huŋ chua chieeŋndo kpou wo. A teleŋ koŋ, chieeŋndo kpou cho wa o piaa cha a wanaa kɔl kɛndiaa nduyɛ a wanaa kɔl nyuluaa cho Chɛhowa piɛiyo wa.—Maatiu 5:​5; Hibuluiya 10:​36-39.

18. Vɛɛ diomnda Chɛhowalaŋ la piiliaŋ yɛ Habakuku?

¹⁸ Nuawɔ Habakuku 3:​16-19. Mi nyɛ Chɛhowa dimul Habakuku wo piiliaŋ ndu tau. Mi Habakuku yiyaŋ yiŋgoloŋ o sɔɔŋ kɔndɔfiliŋ Chɛhowa ndoo tosal niŋ wanaa nduaa o paandoo niŋndoŋ choo. Nduyɛ, mi tiindaŋ ndɔɔ o Chɛhowa niŋ kiandu poŋ. Mbo laalaŋ kɛsɛ maa Chɛhowa cho suŋ nyɛ tosa! Mi hei dɛɛniaa ndu kɔllo, mi che bɛɛ ndoo nɔ wɔ mbo saŋga le teleŋ biŋgi. Kiisaŋnda ve lɛ Habakuku o kɔl te. Kɛ, ndoo nɔ tiindaŋ kala kalaa maa Chɛhowa wa ndu piŋi. Nduyɛ pɛɛŋ, nyɛ o dimi o sɔɔŋ 18 niŋndo, chɔm naapum maa diomndeŋ ndeŋ le cho o diomnda sɔvɛla dimiŋ o Baabuiyo niŋ a tiindaŋndo chɔmndo okɔɔ laŋ tɛɛŋ. Wanaa dɛnɛ sinaa bɛnduaa apum laalaŋ maa nyɛ o dimi koŋndo sim ni maa, “I cho huulu a nyaaloo le Masanɔɔ. I cho hiŋnɔŋ a kɔl kɛndɔɔ le Mɛlɛka.” Nuawɔ se taamasi kɛndɛ bɛndu le naa kpou! Chɛhowa mɛi ko lediom le sɔɔŋ sɔviɔŋ hunɔɔ tosaa o chilaŋ niŋ te, kɛ o ke naa vɛlɛ tiindaŋndo maa o lo niŋ chobe mbo huŋ peelu diomnda o mɛilaŋ.

19. Vɛɛ Chɛhowa dɛɛniaa yɛ naa kɔltaŋ mɛɛ o dɛɛniaa Habakuku kɔllo yɛ?

¹⁹ Suɛi sɔvɛ bɛndu naŋ pɛɛku o yau Habakuku wo niŋndo cho tiindaŋndo dɔwɔɔ o Chɛhowa niŋ ni. (Habakuku 2:​4) Le miŋ hiou lachi a tiindaŋndo dɔwɔɔ o Chɛhowa niŋ, mɛɛ miŋ kindi chaŋyɛi nɛi a ndu. Lelaŋ tofawɔ nyɛ naŋ nɔ miŋ tosa wo. (1) Ŋ nɔ miŋ hiou lachi a piɛileŋ, nduyɛ miŋ chɔm Chɛhowa buulaŋnda naalaŋ kpou vɛlɛ a yiyaŋnda naalaŋ. (2) Ŋ nɔ miŋ yaŋ nilaŋ yekeŋ o nyɛ Chɛhowa cho naa dimullo o Diom ndɔɔ niŋndo, nduyɛ miŋ tol nɛila chɔmaala o cho naa kioo o kɔɔna ndɔɔ niŋndo kɔɔli. (3) Ŋ nɔ miŋ nɔ laalaŋndo, nduyɛ miŋ biuŋ chumndo le mi Chɛhowa huŋ peelu diomnda ndɔla o mɛilaŋ. Keŋ Habakuku tosa ni. Mi che bɛɛ o wa a kɔl tambɛiyo teleŋ o kandu suukaŋndo a Chɛhowa wo, kɛ o mɛɛlulaŋ, mbo sɔla kɔl dɛɛniaa, nduyɛ mbo wa a nyaale! Te ŋ tol pɛ taamasi Habakuku wo kɔɔli, naa bɛɛ cho kɔl dɛɛniaa sɔla kanifuule, Finya naa o cho o choo choo niŋndo Chɛhowa, cho naa kɔmaŋ. Kɔl dɛɛniaa cheleŋ kuɛɛ hiou yɛ koŋ o chieeŋ dɛnɛwɔɔŋndo hoo niŋ?