1-3. (a) Vɛɛ naŋ nɔ yɛ miŋ yiyaŋ a tonya Baabuiyo? Chɔmndɔ taamaseliiyo. (Tofa fotueilaŋ o peeleŋ ndeŋ choo.) (b) Yɛɛ naŋ cho yɛ yaasiaa o buŋgɛi hei niŋ?

HAU, i cho tɛtɛlɛ le mi waŋndo pendu nyɛ o lɔɔ niŋ, nduyɛ mbo miŋgi ndu wana o pendu ndu wo o ba. Nduyɛ, te waŋndo pendu pɛ nyɛ o intanɛtiiyo choo, i wa tɛtɛlɛ le mbo miŋgi ndu wana o pendu ndu wo o ba. Naapum, wana koŋ hɛnaŋ lɛ a nyɛ o pendu wo mɛɛ ndoo hɛnaŋ a ndu o tasoo yɛ le, ɔɔ naapum nyɛ koŋ nɔ bahawɛiyo. Le hei, mbo kɛɛsiaa le nyɛ koŋ siŋgaa a nyɛ cheleŋ ɔɔ mbo nyuna pɛɛŋ le kanii nduɛi.

² Fɛɛŋ bɛɛ ŋ tosa i waa naa a tonya Baabuiyo le. Te ŋ “pendu” ndu pɛ, fɛɛŋ bɛɛ ŋ yeema miŋ “pisi” ndu le, ndu cho ni, te ŋ pɛɛku tonyaa pɛ, fɛɛŋ bɛɛ ŋ yeema miŋ mal ndu le. (Nuawɔ Pulɔwaa 23:​23; Timoti Tasoo 2:​4) A mɛɛ naŋ yaasiaa o buŋgɛi hiou ve niŋ yɛ, miŋ chua teleŋndo tau le tonyaa pɛɛkoo. Naapum, miŋ mal wali ndoo ke naa kanioŋ tau wo. Nduyɛ, miŋ tosa yɛlɛmiaalaŋ a mɛɛ naŋ tosa chaŋyaŋ a wanaa cheleŋnda yɛ. Miŋ siŋga yiyaŋ naa, mɛɛ naŋ tosa sɔɔŋ yɛ, ɔɔ miŋ pɛŋgi  balaŋ lueiyo o naamulaŋ vɛlɛ a sɔɔŋ nɛŋi Chɛhowa kɔl te woŋ niŋ. Kɛ ŋ nɔ laalaŋndo kɛsɛ maa nyɛ o nyɛ naŋ mal cho o sɔvɛ, mbo hiau salala naŋ cho sɔlaa o tonyaa niŋndo le.

³ Mi Chiisu dimi taloo a wana leyula wa pouta baa kalalaŋ nuuviaa le piondɔɔ wo okɔɔ. Mɛɛ poo hoo saaluŋ pou baa kala bɛndoo, mbo kua sakpo mbo kɔ pisi nyɛm ndɔŋ kpou le halikpeŋ mbo pendu ndu. Pou baa kala koŋ ndoo sim le tonya cho a Masale Mɛlɛkaleŋ okɔɔ wo. O nɛiyo hoo choo, mi Chiisu chɔm mɛɛ kpɛ tonyaa cho wa nyɛ sɔvɛ bɛndu le wanaa cho wa ndu nuuviaa wa yɛ. (Maatiu 13:​45, 46) Teleŋ tase naŋ pɛɛku tonyaa wo, ndu cho ni, tonya cho a Masale Mɛlɛkaleŋ okɔɔ wo vɛlɛ a tonyala sɔvɛlaŋ kpou o Baabuiyo niŋ, miŋ soliŋ sala le halikpeŋ miŋ sɔla ndu. Te ŋ hiou pɛ lachi a tonyaa chɔɔ maa nyɛ sɔvɛ, mɛɛ fɛɛŋ bɛɛ ŋ mel ndu le. Kɛ, o cho suɛi imɔnɔ le sinaa maa wanaa Mɛlɛkaa atiŋ pɛŋgi tonyaa chɔɔ maa nyɛ sɔvɛ, nduyɛ pɛɛŋ ma mal ndu. Fɛɛŋ bɛɛ ŋ yeema miŋ tosa keŋ te! Ŋ nɔ miŋ tol sila Baabuiyo kɔɔli le miŋ hiou lachi a kɔlaŋ “o nɛi tonyaa choo.” (Nuawɔ Chɔŋ Ŋgaa Ndɔɔ 2-4.) Koŋ sim ni maa, ŋ nɔ miŋ handu tonyaa nyɛ tase o yoomu naa niŋ, nduyɛ miŋ dɔu ndu o wali niŋ. Kɛ le yɛɛ, nduyɛ vɛɛ waŋndo “pisi” yɛ, ɔɔ mal lɛ tonyaa? Vɛɛ naŋ tosa yɛ a sabu maa fɛɛŋ bɛɛ ŋ tosa i waa naa le? Nduyɛ, vɛɛ naŋ duau yɛ sɛmbɔɔ le miŋ hiou lachi a kɔlaŋ “o nɛi tonyaa choo”?

4. Le yɛɛ waŋnda o teleŋ Chiisoo niŋ hiu lachi a kɔlaŋ o nɛi tonyaa choo le?

⁴ O teleŋ Chiisoo niŋ, wanaa ndaa pɛɛku tonyaa wa apum hiu lachi a kɔlaŋ o nɛi koŋ choo le. Le taamaseliiyo, mɛɛ Chiisu tosa kaamaa nduyɛ mbo ke waŋnda faŋga bɛndoo nyɛdiaa, mi faŋga bɛndu koŋ tual ndu kɔɔli haaa ma fuuluu kɔŋgɔɔ leeloo o Pioo Kalili. Kɛ mi Chiisu dimi nyɛ, okoŋ mi kɔndɔfillo bii nda. Mbo dimi aa, “Te la di dialluŋ wana nda veelu aa Po Wana Pɔnɔ woŋ, nduyɛ, mi la kol kooma nduaŋ te, la ve yoomu kpeekpei le.” Yɔŋi ndaa nyuna Chiisu le mbo tɛɛsial nda nyɛ o yiyaŋndo, ma dimi aa, “Pɛɛku o pɛɛku hoo wo, o kendu bɔɔ. O nɛɛnɛ nɔla yɛ mbo chɛlaŋ a ndu a pɛɛku ndɔɔ hoo?” Nduyɛ fulamakɔɔlioo wa ni, “mi wanaa wa ndu kɔɔli wa chapo . . . mal ndu. A ve lɛ ndu balɔɔ kɔɔli le.”—Chɔŋ 6:​53-66.

5, 6. (a) Le yɛɛ waŋnda apum o palɛi nɛi niŋ mal lɛ tonyaa? (b) Vɛɛ waŋndo mal lɛ tonyaa o pɔmpɔmbɔ?

⁵ I cho suɛi imɔnɔ le sinaa maa, hau waŋnda apum bɛɛ mal niŋ tonyaa. Le sabu yɛɛ? Apum, le tɛɛsiaa yɔŋnuŋ a bolle Baabuileŋ okɔɔ wo, ɔɔ nyɛ puaapilɛnɔ waŋnda sina tau wo dimi ɔɔ tosa wo paaliaŋ nda ni. Apum yɛ, ndaa hɛnaŋ kposoŋ mɛɛ waŋndo ke nda sila Baabuiyo yɛ le, ɔɔ le suɛi keikaŋ nda tɛɛŋ nda waŋndo o kundaa niŋndo. Nduyɛ apum, pɛɛkula lachoowalaŋ vɛlɛ a choola wanaa mal tonyaa wa, nda tol kɔɔli ni. Sabulaŋ latiŋ la cho laŋ ni le nyɛ waŋnda apum kɛɛ Chɛhowa, vɛlɛ a kundaa kpooŋ ndo. (Hibuluiya 3:​12-14) Nuawɔ se mɛɛ ndii wa niŋ suɛi kɛndɛ bɛndu yɛ, te ndaa dɔu pɛ tiindaŋ ndaa o Chiisu niŋ mɛɛ Pitɛ tosa yɛ! Mɛɛ kɔndɔfillo bii wanaa bɔɔbɔɔ o faŋgaa tɛɛŋ le nyɛ Chiisu dimi wo, mbo nyuna kiilaa nduaa te nda bɛɛ ndaa yeema pɛ ma kuɛnuŋ. Mi Pitɛ muli aa, “Masanɔɔ, te ŋ mal num pɛ, mi nɛɛnɛ naa ŋ tol lɛ kɔɔli? Diomnda numndaŋ, laŋ la tosa ni mi waŋndo sɔla  yoomu kpeekpeiyo, o nɔ lamɛɛlu le wo.”—Chɔŋ 6:​67-69.

⁶ Mi apum kandu tonyaa malɔɔ o pɔmpɔmbɔ, naapum a ve pɛɛŋ o sina choo le. Wana mal tonyaa o pɔmpɔmbɔ wo, cho ko maa dɛndɛ wa o pioo kɔŋgɔ, mbo lo naŋnɔŋndo o pɔmpɔmbɔ haaa mbo kuɛŋnuŋ ndo. Baabuiyo sila naa maa naŋ wa yekeŋ “yɔŋi naa ŋ mal nɛi tonyaa.” (Hibuluiya 2:​1) O kpeekpei niŋ, wana mal tonyaa o pɔmpɔmbɔ wo, ve kɔl kposoŋ le keŋ tosa le. Kɛ, mbo chɛl mi chaŋyɛi nduɛi a Chɛhowa yɔŋnuŋ pɔmbɔlɔsɔɔ. Nduyɛ, o viu lɛ bɛɛ le, mi chaŋyɛi keŋ i kiolu. Vɛɛ naŋ tosa yɛ a sabu maa fɛɛŋ bɛɛ hei yɔŋnuŋ naa le?

7. Yɛɛ cho yɛ naa mala maa fɛɛŋ bɛɛ ŋ pisi tonyaa le?

⁷ Le miŋ hiou lachi a kɔlaŋ o nɛi tonyaa choo, ŋ nɔ miŋ chɛl nduyɛ miŋ diikuŋ nyɛ o nyɛ Chɛhowa dimi. Ŋ nɔ miŋ siiŋguu tonyaa nyɛ hiou wa o sɔvɛ kpou o yoomu naa niŋndo, nduyɛ miŋ tol sawala mandaala Baabuiyo kɔɔli o nyɛ o nyɛ niŋ naŋ wa pɛ tosaa. Mɛɛ Masaa Deeve wa piɛileŋ, mbo chuel Chɛhowa buŋgɛi aa, ‘I cho lakɔ o nɛi num tonyaa choo.’ (Sam 86:​11) Mi Deeve tuu a kɔl ndɔɔ kpou le hiouwɔɔ lachi a kɔlaŋ o nɛi tonyaa choo, nduyɛ nyɛ pilɛ koŋ kpe naa bɛɛ nɔ ni miŋ tosa. Te o ve lende le, miŋ kandu yiyaŋndo a nyɛm naŋ mal le tonyaa pɛɛkoo woŋ, nduyɛ pɛɛŋ, miŋ yeema le nyɔɔŋ muŋ ŋtiŋ miŋgioo sɔlaa. Kɛ, ŋ nɔ miŋ tosa chuaŋ chuaa le tonyala Baabui naŋ nɔ miŋ chua ɔɔ kɛɛ laŋ te. Ŋ nɔ miŋ ‘sina isɔɔ o isɔɔ cho tonya.’ (Chɔŋ 16:​13) O buŋgɛi hiou ve niŋ, miŋ yaasiaa sɔɔŋ ŋuɛɛnu naapum ndaa mal le halikpeŋ miŋ pɛɛku tonyaa, nduyɛ miŋ dɔu ndu o wali niŋndo. O buŋgɛi hei niŋ, ŋ cho chɔ mɛɛ naŋ tosa a sabu maa fɛɛŋ bɛɛ ŋ miiŋgu lɛ sɔɔŋ naŋ mɛi kɔɔli woŋ tosaa le yɛ.—Maatiu 6:​19.

8. Vɛɛ mɛɛ Kilisiɔŋnɔɔ soliŋ teleŋ ndɔɔ kpeku yɛ, tosa yɛ mbo mal tonyaa? Chɔmndɔ taamaseliiyo.

⁸ Teleŋndo. Le miŋ tosa a sabu maa fɛɛŋ bɛɛ ŋ mel tonyaa le, ŋ nɔ miŋ hiou lachi a teleŋ naa soliŋndo kpeku o nɛi taasi niŋ. Te ŋ ve yekeŋ te, miŋ chua teleŋndo tau le yelelaŋndo, pisultaŋ, kɔlaŋ o intanɛtiiyo choo, ɔɔ tɛlivisiɔŋndo nuaa. Mi che bɛɛ sɔɔŋ muŋ wɔu le, kɛ lepum miŋ wa teleŋ naŋ soliŋ paandu kpeku le pɛɛkoo vɛlɛ a wali pollo wo soliŋndo kpeku le nyɔɔŋ muŋ. Mi nyɛ waa naa yɔŋnuŋ Ɛmma. * (Tofa tɛɛsiaa amatou.) Chɔŋ a teleŋ o wa wɔ o pɔmbɔ wo, ndoo kaala bɔɔ suaa, nduyɛ mi ndoo nyaanuŋ a nda teleŋ o teleŋ ndoo yeema pɛ. Kɛ kɔl iyama ndɔɔ wa ndu paaliaŋndo kanifuule, pisulta ndɔlaŋ la wa ndu bɔɔ teleŋndo chuaa o ba. Le hei, mbo kɛɛsiaa le mbo tosa siŋgaŋndaŋ. Mi Ɛmma pɛɛku nyɛ o suɛi yɔŋnaŋii Yema Koli Wɛls ve niŋ, o ndoo nyaanuŋ a suaa le kilulaŋndo nda chaaŋaa nduaa wo. * (Tofa tɛɛsiaa amatou.) Nduyɛ  suŋ suŋ niŋ, Ɛmma cho niŋ teleŋ ndɔɔ soliŋndo kpeku tau le Chɛhowa piɛiyo. O nɔ niŋ teleŋndo tau le waa latulu a yuŋgu ndɔɔ, vɛlɛ a chaaŋaa nduaa cho Chɛhowa piɛiyo wa. O nɔ niŋ sinaŋndo maa o sɔɔŋguu niŋ Mɛlɛka ikɛi kpɛɛluŋ nduyɛ, o cho a nyaale le mɛɛ o cho teleŋ ndɔɔ soliŋndo kpeku a taasi yɛ.

9. Vɛɛ nyɛm kiɔɔŋ simnuŋ yɛ nyɛ sɔvɛ bɛndu le naa?

⁹ Nyɛm kiɔɔŋ. Le miŋ hiou lachi a kɔlaŋ o nɛi tonyaa choo, ŋ nɔ miŋ chɛl mi nyɛm kiɔɔŋ wa nyɛ sɔvɛ bɛndu le naa le. Te ŋ pɛɛku pɛ tonyaa, miŋ sina kɛsɛ maa Chɛhowa piɛiyo cho nyɛ sɔvɛ bɛndu ni mbo hiau nyɛm kiɔɔŋ. Nduyɛ, ŋ wa a nyaale le nyɔɔŋ muŋ malɔɔ le tonyaa. Kɛ mɛɛ teleŋndo hiau fau, naapum miŋ che acheleŋnda nyɛm mapuuluŋ sɛnɛŋ laŋga fula woŋ piondɔɔ, ɔɔ ma wa nyɛm cheleŋ nda pendu woŋ tueiyɔɔ yeela. Okoŋ, miŋ kandu yiyaŋndo maa chaanda cho bɔɔ yoomoo tueiyɔɔ yeela. Nduyɛ, ŋ ve lɛ a kɔl hiniaa a nyɛm naŋ nɔ woŋ te. Okoŋ, miŋ kandu kɔllo handɔɔ tau o nyɛm kiɔɔŋ nuuviaa choo mbo hiou Chɛhowa piɛiyo. Hei yiyalaŋ naa a nyɛ ndoo yɔŋnuŋ Demasi wo. Kaala ndoo hiu nɔɔ le “nyɔɔŋ chieeŋ naŋ” ndo, tosa ni mbo mal wali ndoo keŋnuŋ ndu le tosaa nda Pɔɔl wana Chiisu vem hɔlte ndɔ wo wo. (Timoti Diiŋ Ndɔɔ 4:​10) Naapum, Demasi ndoo nɔ kaalaa tau le nyɛm kiɔɔŋ mbo hiau Mɛlɛka piɛiyo. Ɔɔ naapum, ndoo yeema lɛ sala soliŋ le mbo hiou lachi a wallo latulu a Pɔɔl le. Yɛɛ naŋ pɛɛku yɛ o hei niŋ? Naapum o paandoo niŋ, naŋ nɔ kaalaa tau le nyɛm kiɔɔŋ. Nduyɛ te ŋ ve yekeŋ te, mi kaala koŋ kandu naa vɛlɛ hunɔɔ o kɔl, nduyɛ mbo tosa pɛɛŋ miŋ mal kaala naŋ nɔ le tonyaa wo.

10. Kaa yɛɛ naŋ nɔ yɛ miŋ simul?

¹⁰ Chaŋyɛi a wanaa cheleŋnda. Le miŋ hiou lachi a kɔlaŋ o nɛi tonyaa choo, ŋ nɔ miŋ chɛl kposoŋ mi wanaa cho Chɛhowa piɛi le wa nyindu naa le nyɛ Chɛhowa kɛɛ wo tosaa le. Te ŋ pɛɛku pɛ tonyaa, mi chaŋyɛi nɛi a chaaŋaa naa cho Chɛhowa piɛi le wa vɛlɛ a yuŋgula naalaŋ siŋgaŋ. Naapum mi apum chɔm bɛɛleŋ le laalaŋnda naala sɛnɛilaŋ, kɛ mi apum simul naa. (Pitɛ Tasoo 4:​4) Kɛ a koŋ kpou, miŋ kindiŋ o nɛi o nɛi niŋ le waa o ikɛndɛiya niŋ a yuŋgula naalaŋ, vɛlɛ a waa wanaa ikɛndɛ naa nda chua. Kɛ, ŋ nɔ miŋ kɛɛ bɛɛleŋ chɔmndo le sawala Chɛhowalaŋ le nda kɔllo nɛŋioo le. Nduyɛ, a mɛɛ naŋ pɛɛku o Kɔliŋtiaŋ Tasoo 15:​33 niŋ yɛ, wanaa naŋ nɔ miŋ wa o chaŋyɛi kpɛɛluŋnde niŋnda, cho wanaa kaala Chɛhowa wa ni.

11. Vɛɛ naŋ fafaŋ yɛ yiyaŋnda nɔɔlɛilaŋ a kaala nɔɔlɛilaŋ?

¹¹ Yiyaŋnda nɔɔlɛilaŋ a kaala nɔɔlɛilaŋ. Le miŋ hiou lachi a kɔlaŋ o nɛi tonyaa choo, ŋ nɔ miŋ wa a diandaa Chɛhowa o hɔl. (Aisaya 35:​8; nuawɔ Pitɛ Tasoo 1:​14-16.) Mɛɛ naŋ pɛɛku tonyaa, miŋ tosa siŋgaŋndaŋ o yoomu naa niŋ le sawala Baabuiyo tolɔɔ kɔɔli. Apum siŋgaŋnda bɛndulaŋ pila la wa ni. Kɛ, ŋ nɔ wɔ miŋ wa yekeŋ maa fɛɛŋ bɛɛ ŋ siŋga lɛ yoomu naa diandaa le kaala nɔɔlɛilaŋ tosaa le. Yɛɛ mala yɛ naa ŋ wou laba o yeemɛi le kaa nɔɔlɛiyo tosaa niŋ te? Yiyaŋ a nyɛ Chɛhowa yɔŋgu le miŋ wa a diandaa wo. Mbo yɔŋgu yoomu Po ndɔ kaalaa, Chiisu Kiliti! (Pitɛ Tasoo 1:​18, 19) Le naa malaa miŋ lo a diandaa Chɛhowa o hɔl, ŋ nɔ miŋ wa yiyaŋndo lɔɔlɔɔ mɛɛ sala baŋaa Chiisoo cho o sɔvɛ yɛ.

12, 13. (a) Le yɛɛ naŋ nɔ yɛ miŋ che dunyaŋ mɛɛ Chɛhowa che muŋ yɛ? (b) Yɛɛ cheleŋ naŋ cho yɛ hunɔɔ yaasiaa?

 ¹² Naamulaŋ a sɔɔŋ nɛŋi Mɛlɛka kɔl te woŋ. Naapum mi yuŋgula naalaŋ, wanaa naŋ tosa wallo latulu wa, a chaaŋaa naa sukuuwa kindiŋ le naa dɛɛniaa le miŋ wa latulu a nda le dunyaŋ ndaŋ biiloo. Yɛɛ mala yɛ naa miŋ kɛɛ balaŋ lueiyo o naamulaŋ a dunyaŋ nɛŋi Chɛhowa kɔl te woŋ niŋ? Ŋ nɔ miŋ sina kɛsɛ le sabu Chɛhowa hɛnaŋ a dunyaŋ muŋ te wo. Ŋ tosa yaasiaa o yaula naalaŋ niŋ le sinaa mɛɛ dunyaŋ muŋ ŋpum looku kandɔŋ yɛ. Te ŋ yiyaŋ pɛ o sabula cho o Baabuiyo niŋ le dunyaŋ muŋ kiɔɔ biiloo wo choo, miŋ sina kɛsɛ maa ŋ cho “nyɛ nɛŋi Masanɔɔ Mɛlɛka kɔl lo” wo tosaa. (Ɛfisiaŋnda 5:​10) Te ŋ dɔu pɛ tiindaŋ naa o Chɛhowa niŋ vɛlɛ a Diom ndɔɔ, ŋ cho wa a isiooŋ le nyɛ wanaa cheleŋnda yiyaŋndo le.—Pulɔwaa 29:​25.

¹³ Ŋ nɔ tiindaŋndo maa ŋ cho hiouwɔɔ lachi a kɔlaŋ o nɛi tonyaa choo lefafɛɛŋ. Yɛɛ mala yɛ naa miŋ hiou lachi a sɛmbɔɔ nɔɔ le kɔlaŋ o nɛi tonyaa choo? Nuawɔ sɔɔŋ yaa naŋ nɔ le tosaa woŋ.

14. (a) Vɛɛ hiouwɔɔ lachi a Baabuiyo pɛɛkoo mala yɛ naa miŋ nɔ sɛmbɔɔ maa fɛɛŋ bɛɛ ŋ mel tonyaa le? (b) Le yɛɛ naŋ yeema yɛ kɔl kaloo, pɛɛku kɛndɔɔ, a sina pɛŋgoo?

¹⁴ O tasoo, hiou lachi a Baabuiyo pɛɛkoo vɛlɛ a yiyaŋndo yiŋgoloŋ o nyɛ ŋ pɛɛku wo choo. Nuuviaa teleŋndo ma wa hei tosaa lɔɔlɔɔ. Mɛɛ ŋ pɛɛku fau yɛ, lende koni ŋ hiau lachi a tonyaa kaala ni. Nduyɛ, ma nɔ sɛmbɔɔ maa fɛɛŋ bɛɛ a mel ndu le. Pulɔwaa 23:​23 dimul naa aa, “piondu tonyaa” a “kɔl kaloo, a pɛɛku kɛndɔɔ, nduyɛ a sina pɛŋgoo.” O cho letuu le tonya Baabuiyo sinaa kinɛi le. Ŋ nɔ miŋ dɔu ndu o wali niŋ. Te ŋ nɔ pɛ sinapɛŋgoo, koŋ mala miŋ dɔu sɔɔŋ naŋ pɛɛku woŋ, vɛlɛ a ŋ naŋ sina niŋ paandu woŋ diompilɛ. Nduyɛ, kɔl kaloo nyindu naa miŋ dɔu nyɛ naŋ sina wo o wali niŋ. Lepum, mi tonyaa sila naa nduyɛ mbo chɔm naa siŋgaŋnda naŋ nɔ miŋ tosa laŋ. Ŋ nɔ miŋ wa chɔ chɔ le sila waa naa tolɔɔ kɔɔli kanifuule, Baabuiyo dimi maa o cho o sɔvɛ mbo hiau kooliŋ kɛndɛ kɛndɔŋ.—Pulɔwaa 8:​10.

15. Vɛɛ tonyaa manda yɛ naa maa leyau?

¹⁵ O diiŋ ndɔɔ, dɔu sɛmbɔɔ le tonyaa dɔwɔɔ o wali niŋ lepaa o lepaa o yoomu numndo niŋ. Baabuiyo tuu tonyaa a yaule sovɛinɔɔ. (Ɛfisiaŋnda 6:​14) O teleŋ ma sindɔɔ niŋ, mi sovɛinɔɔ ndoo yiinuŋ yauleŋ le ndu malaa vɛlɛ a ndu mandaa o chɔuwo. Kɛ, ndoo nɔ mbo yiinuŋ yauleŋ ndeŋ poŋ. Te yaule ndɔleŋ lee ve leyiyaa poŋ te, lee mala ndu le. Vɛɛ tonyaa manda yɛ naa maa leyau? Te ŋ kɛsiŋ pɛ tonya Baabuiyo o kɔl teleŋ o teleŋ, o cho naa manda le kiɔɔ yiyaŋ wɔɔŋndo nɔɔ nduyɛ, o mala naa le kɛɛsiaala  kɛndɛlaŋ tosaa. Te ŋ nɔ pɛ bahawɛi kala kalaa ɔɔ mi simullo komal naa le suɛi wɔɔŋnde tosaa, tonya Baabuiyo tosa miŋ nɔ sɛmbɔɔ le nyɛ cho o kɛndɔɔ wo tosaa. Fɛɛŋ bɛɛ sovɛinɔɔ ndoo kue o chɔuwo mbo mɛi yaule ndɔleŋ kɔɔli le. Naa bɛɛ, fɛɛŋ bɛɛ ŋ yeema miŋ mal tonyaa le. Ŋ nɔ miŋ tosa a sabu le dɔwɔɔ tonya Baabuiyo o wali niŋ teleŋ o teleŋ o yoomu naa niŋ. Mi sovɛinɔɔ ndoo kuɛ vɛlɛ a muɛi i landaŋ o yaule ndɔleŋ. Ŋ tofaŋndɔ mɛɛ naŋ tosa nyɛ pilɛ koŋ kpe yɛ.

16. Vɛɛ tonyaa pɛɛkoo mala yɛ naa miŋ hiou lachi a kɔlaŋ o nɛi tonyaa choo?

¹⁶ O yaa ndɔɔ, pɛɛku acheleŋnda tonya Baabuiyo teleŋ o teleŋ. Ŋ tuu Baabuiyo a muɛi. Mɛɛ sovɛinɔ kɛndɔɔ ndoo bii muɛi nduɛi kpiŋ yɛ, naa bɛɛ nɔ miŋ bii Diom Mɛlɛkaa kpiŋ. (Ɛfisiaŋnda 6:​17) Naa kpou nɔla miŋ simnuŋ wanaa pɛɛkaa kɛndɛ le “diom tonyaa hivioo . . . waŋnda o lani.” (Timoti Diiŋ Ndɔɔ 2:​15) Te ŋ soliŋ pɛ Baabuiyo kpeku le acheleŋnda pɛɛkoo, hei tosa miŋ chɔɔlu tonyaa sina, nduyɛ miŋ chɔɔlu ndu kaala tau. Okoŋ, miŋ chɔɔlu pɛɛŋ sɛmbɔɔ nɔ le hiouwɔɔ lachi a kɔlaŋ o nɛi tonyaa choo.

17. Le yɛɛ tonyaa cho yɛ nyɛ sɔvɛ bɛndu le num?

¹⁷ Ke sɔvɛ bɛndoo pila tonyaa cho ni fulaa Chɛhowa o ba. Tonyaa tosa a sabu ni miŋ luɛi o chaŋyɛi kpɛɛluŋnde niŋ a Finya naa cho o choo choo niŋndo. Nyɛ sɔvɛ bɛndu naŋ nɔ mbo hiau kpou wo cho koŋ ni. Chɛhowa pɛɛku naa niŋ sɔɔŋ bɔɔbɔɔ, kɛ kandɔɔ ko cho hoo ni! O mɛi lediom le mbo hiou lachi a naa pɛɛkoo lefafɛɛŋ. Lelaŋ, chua tonyaa nyɛ sɔvɛ bɛndu mɛɛ ŋ chua naa pou baa kala bɛndoo maa nyɛ sɔvɛ yɛ. ‘Piondu tonyaa, . . . nduyɛ pisi ndu mbo fula num o ba le.’ Nduyɛ maa Deeve, a cho lo o buŋgɛi ŋ chuel Chɛhowa ve choo aa, ‘I cho lakɔ o nɛi num tonyaa choo.’—Sam 86:​11.