1, 2. (a) Yɛɛ hiou yɛ wa nyɛ sɔvɛ bɛndu o yoomu numndo niŋ? (b) Tonyala kuɛɛ naŋ chua yɛ maa nyɛm sɔvɛ bɛndu, nduyɛ le yɛɛ? (Tofa fotueilaŋ o peeleŋ ndeŋ choo.)

YƐƐ hiou yɛ wa nyɛ sɔvɛ bɛndu o yoomu numndo niŋ? Maa wanaa Chɛhowaa, nyɛ hiou wa o sɔvɛ o yoomu naa niŋndo cho chaŋyɛi nɛi a Mɛlɛka ni. Ŋ yeema miŋ pisi ndi le nyɛ o nyɛ cheleŋ te. Nyɛ cho vɛlɛ o sɔvɛ le naa wo cho tonya cho o Baabuiyo niŋndo ni kanifuule, ndu tosa a sabu ni miŋ wa chaaŋaa Chɛhowaa.—Kolosiaŋnda 1:​9, 10.

² Chɛhowa cho Wana naa Pɛɛkaa Bɛndoo ni. O pɛɛku naa tonyala sɔvɛlaŋ o Diom ndɔɔ niŋ, Baabuiyo. Mbo pɛɛku naa mɛɛ diola ndɔlaŋ la cho la sɔvɛ yɛ, nduyɛ mbo chɔm naa a suliŋnda ndɔla kɛndɛlaŋ okɔɔ. Mɛlɛka dimul naa maa kaala bɛndu o nɔ le naa wo tosa ni mbo yɔŋgu Po ndɔ kaalaa le naa. Chɛhowa pɛɛku naa a Masale Mɛsayanɔɔ okɔɔ. O ke naa tiindaŋndo le chilaŋ. Wanaa sɔla pɔyaŋndo wa, le kɔlaŋ o choo choo niŋ, nduyɛ ‘saa cheleŋnda,’ le waa o Kpele Hɛnɛkiɔɔ niŋ o chieeŋndo choo. (Chɔŋ 10:​16) Chɛhowa cho naa pɛɛkoo mɛɛ naŋ nɔ miŋ  bii yoomu naa yɛ. Ŋ chua tonyalaŋ ndaŋ maa nyɛm baakalaŋ pila kanifuule, la mala naa miŋ sɔɔŋguu Wana Toosiaa naa wo ikɛi kpɛɛluŋ, nduyɛ mi la ke naa saboo o yoomoo niŋ.

3. Baa Chɛhowa nyuna naa pa le miŋ paawa kaniei le tonyaa pɛɛkoo?

³ Mɛlɛka ikɛndɔɔ Chɛhowa cho ni. Nduyɛ, o chɔm naa kɛndɛi nduɛi bɛnduei a mɛɛ o soliŋ Po ndɔɔ sala le naa yɛ. Te Chɛhowa che pɛ maa waŋndo cho tonyaa nuuviaa, mbo mala wana koŋ le ndu saalɔŋndo. Fɛɛŋ bɛɛ o nyuna naa le miŋ paawa ikani le tonyaa pɛɛkoo le. O teleŋ pum niŋ, mi po pilɛ diolaŋ Saimɔŋ ke Pitɛ wana Chiisu vem hɔlte ndɔ wo kaniei le mbo ke ndu kpaayaa le wanaa cheleŋnda nyina diandaa kioo. Mi Pitɛ tɛɛsiaa maa yiyaŋ wɔɔŋndo wa koŋ ni, nduyɛ mbo dimul ndu aa, “Le yiyaŋndo maa a piandu ke Mɛlɛkaa, num ni, nyɛ sɔlaa numndo ni, nuaa nya sɔla tambii fɛɛŋ fɛɛŋnde ni.” (Walta Wanaa Chiisuaa 8:​18-20 NW) Kɛ, yɛɛ o sim yɛ le ‘tonyaa piondɔɔ’?

4. Yɛɛ naŋ cho yɛ pɛɛku a tonyaa okɔɔ o buŋgɛi hei niŋ?

⁴ Nuawɔ Pulɔwaa 23:​23. Sɛmbɔɔ pila yeemaŋ ni le tonya cho o Baabuiyo niŋndo pɛɛkoo. Le miŋ sɔla ndu, ŋ nɔ miŋ mal nyɛm cheleŋndoŋ. Nduyɛ, te o yɔŋ pɛ miŋ ‘pendu tonyaa,’ ndu cho ni, tonyaa pɛɛkoo, ŋ nɔ miŋ wa yekeŋ yɔŋi naŋ “pisi ndu,” ndu cho ni, malɔɔ ndu. Vɛɛ naŋ ‘piandu’ yɛ tonyaBaabuiyo? Vɛɛ kpɛ o nɔ yɛ baa? Mulila nyunalaŋ ndaŋ la cho naa mala le sinaa mɛɛ naŋ nɔ miŋ chɔɔlu tonyaa chua maa nyɛ sɔvɛ bɛndu yɛ. Nduyɛ, hei cho tosa miŋ chɔɔlu yeemɛi nɔ maa fɛɛŋ bɛɛ ŋ mel ndu le. Ŋ cho biyɔɔ bila le sabu tonya fula Chɛhowa o ba wo cho nyɛ sɔvɛ bɛndu mbo hiau nyɛ o nyɛ cheleŋndo.

5, 6. (a) Vɛɛ naŋ piandu yɛ tonyaa ŋ paawa ikani le? Tɛɛsiaawɔ. (b) Vɛɛ tonyaa chuu yɛ naa tɔnɔɔ?

⁵ Te a dimi pɛ maa a cho nyɔɔ piɔuwo fondo a paawa nyɛ o nyɛ le ndu le, koŋ chɔm naa maa a tosa nyɛ o nyɛ le ndu sɔlaa le le. Diom maHibului nda soliŋ kpeku le “piondu” o Pulɔwaa 23:​23 niŋndo sim vɛlɛ le “sɔlaa.” Diomnda tiɔɔŋndaŋ ndaŋ la chɔm maa mɛɛ mi waŋndo dɔu sɛmbɔɔ ɔɔ mbo yɔŋgu nyɛ le nyɛ o sina maa o cho o sɔvɛ le ndu wo sɔlaa. Le naa malaa miŋ bii bila mɛɛ naŋ piandu tonyaa yɛ, yiyaŋndɔ maa waŋnda cho bɔlɛi piɔuwo o lɔɔ niŋ fondo fuu. Ŋ wa pa kɔl maa bɔlɛi keŋ cho chɔnɔŋ o lɔɔ niŋ lende mi i hiŋ o tibii naa choo? Sako bɛɛ. Mɛɛ miŋ kuɛ o lɔɔ niŋ, nduyɛ miŋ hiŋ a ndi o naa lo chiɛi niŋ. Mi che bɛɛ ŋ nɔ miŋ paawa ikani le bɔlɛi keŋ te, kɛ ŋ nɔ miŋ dɔu sɛmbɔɔ le ndi sɔlaa. O nɛi pilɛ koŋ choo, ŋ nɔ miŋ paawa ikani le tonyaa pɛɛkoo le, kɛ sɛmbɔɔ a sala soliaŋndo yeemaŋ ni le hei tosaa.

⁶ Nuawɔ Aisaya 55:​1-3. Nyɛ Chɛhowa dimi wo mala naa le sinaa nyɛ o sim le tonyaa piondɔɔ wo. Chɛhowa tuu diomnda ndɔla tonyalaŋ a mɛŋndaŋ, mɛɛma nauwaŋ, vɛlɛ a muɛiyaŋ. Mɛɛ wana kolɔɔ biyaa kol mɛŋndaŋ mbo sinaŋ nyɛkɛndɛi yɛ, lende koni tonyaa tosa ni miŋ sinaŋ nyɛkɛndɛi. Nduyɛ, mɛɛ mɛɛma nauwaŋ ma tosa mi chɛlɛkpɔɔ hiou lachi a kaloo poŋ yɛ, lende koni tonya Baabuiyo tosa chaŋyɛi nɛi a Chɛhowa ikala poŋ ni. Mi Chɛhowa tuu vɛlɛ diom ndɔɔ a muɛiyaŋ. Le yɛɛ? Baabuiyo dimi maa muɛiyaŋ ma tosa mi waŋnda dɔunuŋ nyaale. (Sam 104:​15) Lelaŋ, te Chɛhowa dimul naa pɛ maa la ‘piondu muɛiyaŋ,’ mɛɛ dimullo o cho naa koŋ ni maa te ŋ tol pɛ nɛi ndɔ chɔmaa kɔɔli o yoomu naa niŋ, ŋ cho wa a nyaale. (Sam 19:​8) Chɛhowa soliŋ nyɔɔŋ muŋ kpeku le naa malaa miŋ bii bila mɛɛ naŋ  sɔla tɔnɔɔ yɛ te ŋ pɛɛku pɛ tonyaa, nduyɛ miŋ dɔu ndu o wali niŋ. Ŋ yaasiaŋndɔ niko nyɔɔŋ sala ŋuɛɛnu ŋ naŋ mal naapum le tonyaa piondɔɔ wo.

7, 8. (a) Le yɛɛ o chua yɛ teleŋndo le tonyaa pɛɛkoo? (b) Yɛɛ sukuunɔ pilɛ ndoo soliŋ yɛ sala, nduyɛ yɛɛ wa yɛ fulamakɔɔlioo?

⁷ Teleŋndo. Teleŋndo pila yeemaŋ ni le mi waŋndo yaŋ nilaŋ o yooŋgu kɛndɛ leMasaa, diomndaŋ veeloo o Baabuiyo niŋ a yaula soo a Baabuiyo okɔɔ laŋ, Baabuiyo pɛɛkoo a Seiyaa Chɛhowaa, bɛɛndiaŋndo le bɔŋaŋnda naalaŋ, vɛlɛ a kɔlaŋ o laŋ. Le sɔɔŋ muŋ kpou tosaa, ŋ nɔ miŋ soliŋ teleŋ naŋ soliŋ paandu kpeku le sɔɔŋ cheleŋ cho ŋ sɔvɛ tau le woŋ tosaa. (Nuawɔ Ɛfisiaŋnda 5:​15, 16.) Vɛɛ kpɛ o chua yɛ waŋndo teleŋndo le tonya tase Baabuiyo pɛɛkoo? Teŋgeŋndo wa le wana o wana. Kpeleŋ cho a mɛɛ kpɛ naŋ pɛɛku a taasi Chɛhowaa, nɛila ndɔlaŋ, vɛlɛ a sɔɔŋ o tosa niŋndoŋ okɔɔ le. (Luomaŋnda 11:​33) Mi Bandu Mɛŋgɛlaa tase nda soli wo tuu tonyaa a “bil lapeeŋge kɛndɛ kɛndɔɔ.” Mbo dimi aa, “Wa a kɔl hiniaa le bil lapeeŋge tonyaa opilɛ le. Te bil lapeeŋge tonyaa opilɛ ndoo wa pɛ letuu, mɛɛ Mɛlɛka ndoo pɛɛku lɛ naa tonyala cheleŋ te. Nuuviaa laŋ tau, nduyɛ ma chɔɔlu laŋ nuuviaa tau tau.” Lelaŋ, ŋ nɔ miŋ nyunaŋ naapila aa, ‘Vɛɛ kpɛ ya pɛɛku yɛ niŋ a Chɛhowa okɔɔ?’ O yɔŋ bɛɛ miŋ wa achal lefafɛɛŋ, sɔɔŋ cho tau ŋ naŋ cho wa pɛɛkoo teleŋ o teleŋ a Chɛhowa okɔɔ wo. Hau, i cho suɛi sɔvɛ le miŋ soliŋ teleŋ naa kpeku le pɛɛkoo a Mɛlɛka okɔɔ a kɔllo kpou. Ŋ tofaŋndɔ niko taamaseliiyo a wana ndoo tosa heiyo.

⁸ Mi Maliko, * (Tofa tɛɛsiaa amatou) chua feleŋgɔnɔɔ o Chepaŋ niŋ, kua o Amɛlika niŋ le kɔlaŋ o sukuu o chiee bɛndoo Niu Yɔk niŋ. Paale pilɛ, mi ndepilɛnɔ kɔɔfanɔɔ kɔ dimul ndu yooŋgu kɛndɔɔ o ndu lo bɛɛ. Maliko ndoo nɔ niŋ kaaŋnde ndɔleŋ, kɛ mbo kandu Baabuiyo pɛɛkoo nda ndepilɛnɔɔ hoo. Mbo kaala nyɛ o wa pɛɛkoo wo tau. Nduyɛ pɛɛŋ, mbo nyuna le ma wa pɛɛkoo tosaa lediiŋ o lɔɔ bɛŋgu. Mi che bɛɛ Maliko wa kpɔndi kpɔndi a pɛɛku o wa o sukuu wo, vɛlɛ a wali ndoo tosa palɛi i pilɛŋ o lɔɔ bɛŋgu wo, kɛ o dounuŋ tamala le. Mbo kandu kɔlaŋ o bɔŋaŋnda leKilisiɔŋndaŋ. Nyɛɛmbɔ koni ndoo soliŋ niŋ teleŋ ndɔɔ kpeku ni le yelelaŋndo tosaa, le halikpeŋ mbo nɔ teleŋndo tau le tonyaa pɛɛkoo. Mɛɛ Maliko soliŋ salalaŋ ndaŋ, mbo sɔɔŋguu Chɛhowa ikɛi kpɛɛluŋ. Nduyɛ, o chiŋa bɛɛ iwɔsi le, mbo sɔla yiŋɔɔ. Paŋgoŋ ŋɔmpum okoŋ kɔɔli, o wɔsi 2006 niŋ, mbo kandu kɔɔfaleŋ. Nduyɛ, o cho wɔ hiouwɔɔ lachi a kɔɔfaleŋ tosaa.

9, 10. (a) Vɛɛ tonyaa pɛɛkoo siŋga yɛ yiyaŋ naa a nyɛm kiɔɔŋ okɔɔ? (b) Yɛɛ chua feleŋgɔnɔ pilɛ ndoo mal lɛ, nduyɛ vɛɛ ndoo yiyaŋ yɛ a keŋ?

⁹ Nyɛm kiɔɔŋ. Le miŋ pɛɛku tonyaa, naapum miŋ mal wali ndoo ke naa nyɛsɔlaa tau wo ɔɔ wali naŋ pɛlnuŋ ladio o chieeŋndo hoo niŋndo. Le taamaseliiyo, wanaa yɔɔyaa Pitɛ nda Andulu wa ni. Kɛ mɛɛ Chiisu veelu nda le ma huŋ simnuŋ buɛiyaa nduaa, ma mal wali nda yɔɔyaa, okoŋ ma tual Chiisu  kɔɔli. (Maatiu 4:​18-20) Kɛ hei chɔm naa maa te a pɛɛku pɛ tonyaa, mɛɛ a nɔ ma mal wali numndo le. Waŋndo nɔ mbo tosa wallo, nduyɛ mbo ke yuŋgu ndɔɔ nyɛm nda hau ba woŋ. (Timoti Tasoo 5:​8) Kɛ te a pɛɛku pɛ tonyaa, mi yiyaŋ numndo a nyɛm kiɔɔŋ okɔɔ siŋgaŋ. Ma sina nyɛ cho nyɛ sɔviɔɔ kpeekpei o yoomoo niŋndo. Mi Chiisu dimi aa, “La chuuŋgiaa nyɛm sulaŋ chieeŋ nanuŋ te.” Nduyɛ mbo dɛɛniaa naa aa, “Nyɛm sulaŋ ɛchɛnɛ, muŋ nya chuuŋgiaa ni.” (Maatiu 6:​19, 20) Keŋ chua feleŋgɔnɔ pum diolaŋ aa Malia ndoo tosa ni.

¹⁰ Chɔŋ a teleŋ Malia wa o pɔmbɔ wo, ndoo tuɛi bɔɔ pisulta nda luaa bɔlta pɔmbɔlaŋ a yɔmnde le luɛiyɔɔ o sooŋndaŋ niŋndo yeela. O wɔsiŋ ndɔŋ mɛɛlaŋ niŋ le sukuuwo chiiyo, mbo tosa hiouwɔɔ lachioo tau o pisultaŋ ndaŋ niŋ. Nduyɛ, mbo chaa pisultaŋ ndaŋ nyɛkɛndɛi, okoŋ ma ke ndu dioo le kɔlaŋ o sukuu bɛndoo. Kpeleŋ Malia wo wa ni, le mi ndoo simnuŋ wana pɛlnuŋ ladio o pisultaŋ ndaŋ tosaa niŋ a le mbo sɔla nyɛ sɔlaa tau. Okoŋ, mbo kandu Baabuiyo pɛɛkoo. Mbo kaala nyɛ o wa pɛɛkoo wo tau, nduyɛ mbo kandu ndu dɔwɔɔ o wali niŋ. Mbo dimi aa, “Mɛɛ ya wa hiouwɔɔ lachi fau a yɛlɛmiaalaŋ tosaa le mi kaala nilaŋ la wa la chɛlaŋ a sawala Baabuiyo yɛ, lende koni ya wa nyaaloo sɔlaa tau o yoomu nuu niŋ ni.” Mi Malia sina maa ndoo wa niŋ ikala le mbo kɛsi kɔllo o chaŋyɛi nduɛi nda Chɛhowa choo, vɛlɛ a pisulta ndɔlaŋ. (Maatiu 6:​24) Mbo kɛɛsiaa le mbo mal pisulta ndoo pialnuŋ niŋ ladio wo, le nyɛ sɔvɛ cheleŋ. Hau niŋ, o cho kɔɔfaleŋ tosaa, nduyɛ mbo dimi pɛɛŋ maa o nɔ niŋ “yoomu nyaaloo, yoomu kɔl nyulu kpeekpeiyo.”

11. Te ŋ pɛɛku pɛ tonyaa, yɛɛ yɔŋnuŋ yɛ lepum a chaŋyaŋ naŋ ŋpum?

¹¹ Chaŋyɛi a wanaa cheleŋnda. Te ŋ kandu pɛ nyɛ naŋ pɛɛku o Baabuiyo niŋndo dɔwɔɔ o wali niŋ, naapum mi chaŋyɛi nɛi a chaaŋaa naa vɛlɛ a yuŋgulaŋ naalaŋ siŋgaŋ. Chiisu mala naa le miŋ bii hei bila. Mbo piɛi a buɛiyaa nduaa okɔɔ, “Tosa ma wa a yɔŋgaŋ o num ndo sanaa a tonya cho a num okɔɔ wo. Diom numndo, ndu cho tonyaa ni.” (Chɔŋ 17:​17) Dimioo hoo aa, “tosa ma wa a yɔŋgaŋ o num ndo” sim ni, “waa teŋgeŋ.” Te ŋ kandu pɛ tonyaa dɔwɔɔ o wali niŋ o yoomu naa niŋ, miŋ wa teŋgeŋ o chieeŋndo niŋ kanifuule, sawala cho o Baabuiyo niŋndaŋ naŋ wa tolɔɔ kɔɔli ni. Mi che bɛɛ miŋ kindiŋ le chaŋyɛi kɛndɛi nɔɔ naa chaaŋaa naa vɛlɛ a yuŋgula naalaŋ, kɛ apum hɛnaŋ lɛ a naa mɛɛ ndaa hɛnaŋ a naa paandu yɛ le. Nduyɛ pɛɛŋ, lepum ma simul laalaŋnda naalaŋ. Kɔndɔfili bii naa le hei le. Mi Chiisu dimi aa, “Waŋndo o ndu pila lo chiɛi niŋ yaamɔɔwaa nduaa a chaŋ niŋ ni.” (Maatiu 10:​36) Kɛ, mi Chiisu mei lediom maa, mɛɛ mɛɛ naŋ mal nyɔɔŋ le tonyaa, ŋ cho hunɔɔ nyɔɔŋ sɔla mbo hiou bɛɛ ŋ naŋ mal loŋ!—Nuawɔ Maki 10:​28-30.

12. Yɛɛ Po Chuunɔ pilɛ ndoo mal lɛ le tonyaa?

¹² Chɔŋ o chuaambɔyɛi nduɛi niŋ, po Chuunɔɔ hoo diolaŋ aa Eelɔŋ, ndoo nɔ laalaŋndo maa i cho suɛi wɔɔŋ le diola Mɛlɛkalaŋ veeloo. Kɛ, ndoo yeema kpeekpei mbo sina tonyaa a Mɛlɛkala okɔɔ. Paale  pilɛ, mi Sei Chɛhowaa chɔm ndu maa, te o handu pɛ chomultaŋ latiŋ o chomulta hiɔɔlula maHibuluila nda poonyiaa diola Mɛlɛkalaŋ niŋndo choo, o veelu laŋ aa, “Chɛhowa.” Mi Eelɔŋ naŋ kɔl tau a nyɛ o pɛɛku wo. Nduyɛ, mbo kua sakpo o chiɛi nda lekaaŋndo, mbo kɔ dimul wanaa ndaa pɛɛkaa. Mbo yiyaŋ maa a cho wa a kɔl kɛndɛ le tonyaa pɛɛkoo a diola Mɛlɛkalaŋ okɔɔ, kɛ a ve a kɔl kɛndɛ kposoŋ te. Nduyɛ pɛɛŋ, ma tufu ndu lɔluaŋ choo, okoŋ ma tuau ndu. Mi yuŋgu Eelɔŋ ndo bɛɛ simul ndu. Kɛ, o chɛl le mi hei kɛɛlu ndu pɛɛkoo tau a Chɛhowa okɔɔ le. Mi Eelɔŋ simnuŋ Sei Chɛhowaa, nduyɛ mbo piɛi Chɛhowa a yoomu ndɔɔ kpou. Naa bɛɛ nɔ miŋ wa kɔl maa naapum, chaŋyɛi nɛi a wanaa cheleŋnda siŋgaŋ, te ŋ pɛɛku pɛ Baabuiyo.

13, 14. Siŋgaŋnda kuɛɛ naŋ nɔ yɛ miŋ tosa o yiyaŋnda naalaŋ niŋ vɛlɛ a o kaala naalaŋ niŋ mɛɛ naŋ pɛɛku tonyaa? Chɔmndɔ taamaseliiyo.

¹³ Yiyaŋnda nɔɔlɛilaŋ a kaala nɔɔlɛilaŋ. Te ŋ pɛɛku pɛ tonyaa, nduyɛ miŋ kandu sawala Baabuiyo dɔwɔɔ o wali niŋ, ŋ nɔ miŋ chɛl le yɛlɛmiaalaŋ tosaa a mɛɛ naŋ yiyaŋ yɛ, vɛlɛ a mɛɛ naŋ tosa sɔɔŋ yɛ. Mi Pitɛ wana Chiisu vem hɔlte ndɔ wo poonyiaa aa, “La wa wanaa tuei Mɛlɛka diom. Nduyɛ yeemaŋ nya aa nɔ niŋ a boondii nya aa sina wɔ tonya cho a Mɛlɛka okɔɔ wo le woŋ, la wa lɛ nyɛ yeemaŋ muŋ ŋ dimul nya woŋ tosa le.” Okoŋ, mbo dimi vɛlɛ aa, “La wa a diandaa o kaa o kaa niŋ nya tosa, mɛɛ Mɛlɛka o veelu nya le waa wanaa ndɔ wo cho o diandaa yɛ.” (Pitɛ Tasoo 1:​14, 15) O chiee bɛndoo Kɔliŋ niŋ sindɛ, wanaa bɔɔbɔɔ wa o kaala nɔɔlɛilaŋ niŋ. Wanaa wa loŋ nda ndaa nɔ ma tosa siŋgaŋnda bɛndaŋ le ma simnuŋ wanaa diandaa Chɛhowa o hɔl. (Kɔliŋtiaŋ Tasoo 6:​9-11, NW) Hau, mi wanaa bɔɔbɔɔ tosa siŋgaŋnda waa naa te a pɛɛku pɛ tonyaa. Mi Pitɛ tɛɛsiaa hei mɛɛ o poonyiaa aa, “Sɔɔŋ wanaa tuii Mɛlɛka diom te wa a hɛnaŋ tosaa woŋ, muŋ koni nya wa tosaa ni. Nduyɛ la tosa niŋ muŋ tei. Muŋ cho yɛ muŋ ni, niilula nɔɔlɛilaŋ, kɔl landaŋ bɛndoo o suɛi wana lanɔɔ kɛlɛŋgaa suɛi wana pɔnɔɔ, a waa o kuuliaala mamuɛilaŋ choo, a sɔɔŋ lasiɔmboŋ tosaa, a nyɛm cheleŋndoŋ sooluuwo, suɛi wana chiee nɔ mbo tosa le ve.”—Pitɛ Tasoo 4:​3.

¹⁴ Dɛviŋ nda Chasmiŋ wa wanaa kolaa mamuɛi bɛndu le wɔsila bɔɔbɔɔ. Mi che bɛɛ Dɛviŋ wa wana kɛsiaa layau kɛndɛ, kɛ haupa mi ndaa soli ndu o wallo niŋ le kaa ndɔ kolaa. Wanaa bɔɔbɔɔ ndaa sina Chasmiŋ le kɔl tuuwo a sɔŋgɔlaŋ mɛlioo. Paale pilɛ, o waŋnuŋ o muɛiyaŋ niŋ yikpi, okoŋ mbo komal misiɔnalueiyaa Seiyaa Chɛhowaa a ŋiɔɔŋ o nɛi. Ma dimul ndu maa a yeema ma kandu ndu Baabuiyo pɛɛkoo. Kɛ mɛɛ nda kuɛ o ndalo bɛɛ lɔɔ pilɔɔ, ma komal Chasmiŋ nda Dɛviŋ a yiŋnaŋ yikpi o muɛiyaŋ niŋ. Ndaa laalaŋ pɛɛŋ maa misiɔnalueiyaa kaŋ wa lɛ hunɔɔ o ndalo bɛɛ le. Mɛɛ misiɔnalueiya miiŋgu loŋ a teleŋ cheleŋ, a komal nda maa paandu le. Chasmiŋ nda Dɛviŋ wa a dialuŋfulaa le ma kandu tonya Baabuiyo pɛɛkoo. Nduyɛ, ma keleŋa sɔɔŋ nda wa pɛɛkoo woŋ dɔwɔɔ o wali niŋ. O chiŋa bɛɛ paŋguŋ ŋgaa le, ma mal muɛiyaŋ kolɔɔ, ma soli yau nɔ ndaa, okoŋ ma simnuŋ pɔnɔɔ a lanɔɔ. Mi wanaa bɔɔbɔɔ o chiee ndaa niŋ cha mɛɛ Dɛviŋ nda Chasmiŋ tosa siŋgaŋndaŋ yɛ. Nduyɛ, mi keŋ tosa mi nda bɛɛ kandu Baabuiyo pɛɛkoo.

15. Siŋgaŋ kuɛɛ wa yɛ lepum o kala kpoke le tosaa le tonyaa, nduyɛ le yɛɛ?

¹⁵ Naamulaŋ a sɔɔŋ nɛŋi Mɛlɛka kɔl te woŋ. Siŋgaŋ kala kala naŋ nɔ le tosaa wo cho pɛŋgioo balaŋ wouwo o naamula Chɛhowa hini kɔl te laŋ niŋ ni. Mi che bɛɛ maa mi apum pɛɛku a mɛɛ Chɛhowa yiyaŋ a sɔɔŋ  muŋ okɔɔ yɛ, kɛ mii wa wɔ ikala kpoke le ma pɛŋgi balaŋ wouwo leniŋ. Ma wa buulaŋndo a nyɛ yuŋgula ndalaŋ, wanaa nda tosa wallo latulu wa, ɔɔ chaaŋaa ndaa cho tosa wo. A sina maa waŋnda apum nɔ laalaŋndo o kala kpoke o naamulaŋ latiŋ niŋ, taama taama la cho a wanaa vilɛiya okɔɔ laŋ. (Ditɔnɔmii 14:​1) Lelaŋ, yɛɛ mala yɛ naa miŋ tosa siŋgaŋnda yeemaŋ ndaŋ? Ŋ nɔla miŋ pɛɛku o taamaseliila kɛndɛ waŋnda o sindɔɔ niŋ a kɛsi laŋ niŋ, a ndaa tosa siŋgaŋndaŋ nda, mɛɛ nda pɛɛku tonyaa. Mɛɛ Kilisiɔŋaa tasiaa o Ɛfisɔɔ niŋ sindɛ wa naa yɛ.

16. Sala soliaŋ kuɛɛ waŋnda apum o Ɛfisɔɔ niŋ ndaa tosa yɛ?

¹⁶ O chiee bɛndoo Ɛfisɔɔ niŋ sindɛ, i wa tɛtɛlɛ le mi waŋnda ndaa wou balaŋ o kooma wɔɔŋndaŋ niŋ. Yɛɛ wanaa ndaa nɔ balaŋ o koowaŋ niŋnda tosa yɛ mɛɛ nda simnuŋ Kilisiɔŋnda? Baabuiyo dimi aa, “Mi wanaa ka ka a nda aa nɔ kooma wɔɔŋndaŋ nda ma huŋ a yaulaŋ ndalaŋ naa pilɛ ma luam ndaŋ waŋnda kpede o hɔl. Kani fondole, yaulaŋ ndaŋ la aa chɔm nda mɛɛ nda aa toosiaa kooma wɔɔŋndaŋ yɛ ni. Mɛɛ nda dɔu baa yaulaŋ ndaŋ kpou naa pilɛ, ndu oo wa le kaniŋ humboŋ waalaŋ bele-ŋuɛɛnu. O koŋ, mi yooŋgoo a Masanɔɔ okɔɔ o hiau lachi a pɛŋgɛlaŋndo ba o ba fee. Lɔɔ lɔɔ wanaa sɛnɛiya wa laalaŋndo a yooŋgu Masanɔɔ wo.” (Walta Wanaa Chiisuaa 19:​19, 20) Mi Kilisiɔŋaa laalaŋnda haa yɔŋguŋ wulee le yaula ndala baa kala laŋ lomɔɔ, nduyɛ mi Chɛhowa duau nda sala le hei.

17. (a) Ɔɔ sɔɔŋ ŋpum ŋ naapum ndaa mal le tonyaa wo? (b) Nyunala kuɛɛ naŋ cho yɛ muli o buŋgɛi cho lachi ve niŋ?

¹⁷ Yɛɛ num soliŋ yɛ niŋ sala le halikpeŋ ma pɛɛku tonyaa? Naa kpou soliŋ niŋ teleŋ naa sala. Naapum ndaa mal niŋ dilakeŋnaŋnda naŋ nɔ le simnɔŋndo wanaa sulaa wa. Nduyɛ naapum, chaŋyɛi nɛi a wanaa cheleŋnda siŋgaŋ niŋ. Naa bɔɔbɔɔ tosa niŋ yɛlɛmiaalaŋ a mɛɛ naŋ yiyaŋ yɛ, vɛlɛ a mɛɛ naŋ tosa sɔɔŋ yɛ. Ŋ cho lɛ laba o naamulaŋ vɛlɛ a sɔɔŋ nɛŋi Chɛhowa kɔl te woŋ niŋ te. Kɛ, ŋ nɔ laalaŋndo maa tonya Baabuiyo hiou wa nyɛ sɔvɛ bɛndu a nyɛ o nyɛ cheleŋ naŋ mal. Tonya Baabuiyo tosa a sabu ni miŋ wa o chaŋyɛi kpɛɛluŋnde niŋ a Chɛhowa. Nduyɛ, ndi hiou wa nyɛ sɔvɛ bɛndu o yoomula naalaŋ niŋ. Te ŋ yiyaŋ pɛ a salala naŋ sɔla niŋndaŋ kpou le mɛɛ naŋ cho o tonyaa niŋ yɛ, o wa ikala le miŋ bii bila le sabu waŋnda apum “pisi ndu” wo. Vɛɛ hei yɔŋnuŋ yɛ? Nduyɛ, vɛɛ naŋ kpakpala yɛ biondɔŋ wɔɔŋ waa lende tosaa? Ŋ cho nyunalaŋ ndaŋ muli o buŋgɛi cho lachi ve niŋ.