1, 2. Mɛɛ naŋ hiau lachi fau a hiouwɔɔ lachioo tosaa yɛ, yɛɛ naŋ pɛɛku yɛ? Chɔmndɔ taamaseliiyo.

YIYAŊNDƆ maa waŋndo ke chuaambɔ pɔmbɔɔ kioo. Okoŋ, mi wanaa velu ndu wa dimul chuaambɔ koŋ aa, “Dimi naa balika.” Mbo dimi kanifuule, a dimul ndu le mbo dimi balikaa. Kɛ mɛɛ chuaambɔ hindu fau, mbo kandu sinaa le sabu wanaa velu ndu wa yiyaŋ maa o cho suɛi sɔvɛ le mi wana chɔm balika melaa wo, te waŋndo tosal num pɛ kɛndɛi. O mɛɛlulaŋ, o cho wa fɛɛsɛŋ le acheleŋnda balikaa mello a ba ndɔ kanifuule, o pɛɛku niŋ le balika melaa chɔmndo.

² Mi nyɛ waa naa yɔŋnuŋ naa. Teleŋ tase naŋ kandu tonyaa pɛɛkoo wo, miŋ pɛɛku maa o cho suɛi sɔvɛ le sawala Chɛhowalaŋ diikɔŋndo. Kɛ mɛɛ naŋ hiau lachi fau a hiouwɔɔ lachioo tosaa yɛ, lende koni naŋ pɛɛku tau a yiyaŋnda ndɔlaŋ okɔɔ ni. Koŋ cho ni, nyɛ o hɛnaŋndo, nyɛ o hɛnaŋ te wo, vɛlɛ a mɛɛ o cha sɔɔŋ yɛ. Te ŋ chɛl pɛ mi yiyaŋnda Chɛhowalaŋ la piiliaŋ kaala naalaŋ vɛlɛ a mɛɛ naŋ tosa kɛɛsiaalaŋ yɛ, ŋ cho yiyaŋnda ndɔlaŋ siiŋguu yiyaŋnda naalaŋ.

3. Le yɛɛ i wa ikala le yiyaŋndo mɛɛ Chɛhowa yiyaŋ yɛ?

³ Mi che bɛɛ miŋ tuei yeela tau te ŋ wa pɛ pɛɛkoo le yiyaŋndo maa Chɛhowa, kɛ lepum mbo wa ikala le yiyaŋndo maa ndu kanifuule, wanaa lahakiaa naŋ cho ni. Le taamaseliiyo,  ŋ sina mɛɛ Chɛhowa yiyaŋ a waa o diandaa o kaa niŋ, hɔlte nyɛm kiɔɔŋ, wali dimiaa yooŋgu kɛndɔɔ, koowaŋ soliŋndo kpeku o nɛi bɛnda le wo choo, vɛlɛ a sɔɔŋ cheleŋndoŋ okɔɔ yɛ. Kɛ, naapum mbo wa ikala le miŋ bii bila le sabu Chɛhowa yiyaŋ a muŋ okɔɔ lende wo. Lelaŋ, vɛɛ naŋ pɛɛku yɛ le yiyaŋndo chɔɔloo nɔɔ maa Chɛhowa? Nduyɛ, vɛɛ hei cho yɛ naa mala le nyɛ bɛnda wo tosaa suŋ suŋ vɛlɛ a o chilaŋ niŋ?

4. Yɛɛ o sim yɛ le Mɛlɛka chɛlɔɔ mbo maŋgala naa?

⁴ Nauwɔ Luomaŋnda 12:​2. O bolle Baabuileŋ niŋ, mi Pɔɔl wana Chiisu vem hɔlte ndɔ wo tɛɛsiaa nyɛ naŋ nɔ miŋ tosa wo, le miŋ pɛɛku le yiyaŋndo mɛɛ Chɛhowa yiyaŋ yɛ. Mbo dimi maa, “la hiau lɛ lachi a kaala waŋnda o chieeŋndo hoo niŋ a tosa laŋ te.” A mɛɛ naŋ pɛɛku o buŋgɛi hiou ve niŋ yɛ, hei sim ni maa, ŋ nɔ miŋ kɛɛ yiyaŋnda chieeŋndo vɛlɛ a kaala ndɔlaŋ. Kɛ, mi Pɔɔl dimi vɛlɛ maa, ŋ nɔ miŋ chɛl mi Mɛlɛka maŋgala naa. Hei sim ni maa, ŋ nɔ miŋ pɛɛku Diom Mɛlɛkaa, miŋ bii yiyaŋnda ndɔlaŋ bila, miŋ yiyaŋ lechoo, nduyɛ miŋ tosa wallo kalaŋ le miŋ nɔ yiyaŋ Mɛlɛkaa.

5. Chɔmndɔ teŋgeŋ cho diomndaŋ veeloo wo tɛɛŋ a pɛɛkoo.

⁵ Pɛɛkoo cho ko diomndaŋ keleŋaa veeloo o yau naŋ pɛɛku wo niŋ ɔɔ pulaŋ keiyo o mulilaŋ choo le nyunalaŋ te. Te ŋ wa pɛ pɛɛkoo, ŋ nɔ miŋ yiyaŋ a nyɛ buŋgɛi keŋ pɛɛku naa a wana suu Chɛhowa cho wo, nyɛ o tosa wo, vɛlɛ a mɛɛ o yiyaŋ yɛ. Ŋ nɔ miŋ kindiŋ le sinaa sabu Chɛhowa dimul naa le sɔɔŋ ŋpum tosaa wo, vɛlɛ a le ŋpum kiɔɔ tosaa wo. Ŋ nɔ vɛlɛ miŋ yiyaŋ a siŋgaŋnda naŋ nɔ miŋ tosa o yoomu naa niŋ vɛlɛ a o yiyaŋnda naalaŋ niŋndo. I cho tonya maa o cho teleŋndaŋ fau le naŋ tiuba miŋ yiyaŋ o sɔɔŋ muŋ choo kpou le te ŋ wa pɛ pɛɛkoo. Kɛ, i cho ikɛndɛ le miŋ chua teleŋ pɔmbɔ, naapum teleŋ naa pɛɛkaa piɔuwo tɛɛŋ, le yiyaŋndo o nyɛ naŋ veelu diomndaŋndo choo.—Sam 119:​97; Timoti Tasoo 4:​15.

6. Yɛɛ yɔŋnuŋ yɛ te ŋ yiyaŋ pɛ o Diom Mɛlɛkaa choo?

⁶ Mi suɛi kɔndɔfili pum yɔŋnuŋ te ŋ wa pɛ yiyaŋndo lɔɔlɔɔ o Diom Mɛlɛkaa choo. Miŋ ‘laalaŋ kɛsɛ’ maa yiyaŋ Chɛhowaa nɔ biondɔŋ te. Miŋ kandu sɔɔŋ chɔɔ mɛɛ Chɛhowa cha muŋ yɛ. Nduyɛ o mɛɛlulaŋ, miŋ chɛl yiyaŋnda ndɔlaŋ. Okoŋ, miŋ chɛl mi Mɛlɛka maŋgala naa, nduyɛ miŋ kandu yiyaŋndo o nɛi sɛnɛiyo choo. Ŋ lo lende o pɔmpɔmbɔ haaa miŋ siiŋguu yiyaŋnda Chɛhowalaŋ yiyaŋnda naalaŋ.

7, 8. (a) Vɛɛ Chɛhowa che yɛ nyɛm kiɔɔŋ? (Tofa fotueilaŋ o peele naŋ kandu leŋ choo.) (b) Te ŋ che pɛ nyɛm kiɔɔŋ mɛɛ Chɛhowa che muŋ yɛ, yɛɛ cho yɛ wa nyɛ sɔvɛ bɛndu hiou kpou wo le naa?

⁷ Yiyaŋnda naalaŋ la piiliaŋ mɛɛ naŋ tosa sɔɔŋ yɛ. (Maki 7:​21-23; Chemisi 2:​17) Ŋ yaasiaŋndɔ taamaseliilaŋ latiŋ miŋ che suɛi hei kpendekele. Taamaseliiyo opilɛ cho bundɛi a violɔŋ Chiisoo okɔɔ ni. Nduyɛ, hei chɔm kpendekele yiyaŋ Chɛhowaa a nyɛm kiɔɔŋ okɔɔ. Mi che bɛɛ Choosɛ nda Meele ndaa nɔ nyɛ sɔlaa bɔɔ le, kɛ mi Mɛlɛka pila hɛli nda le ma manda Po ndɔɔ. (Lɛvitikɔɔ 12:​8; Luku 2:​22-24) Mɛɛ Chiisu veluŋ, mi Meele “yambu ndu o nyɛ nda dou chɔluaa nyɛ diaa wo niŋ. Kani fondole,  fondaŋ nda aa yiya mialla wo wa o piaa cha a waŋnda chieeya.” (Luku 2:​7) Te Chɛhowa ndoo yeema pɛ, o wa tosa a sabu mi Chiisu ndoo veluŋ o fondaŋ ndoo hiou bɛnda wo niŋ. Kɛ ndoo yeema mi Chiisu ndoo veluŋ o yuŋgule kɛsi piɛile Mɛlɛkaleŋ nyɛ tasoo o yoomu ndaa niŋndo niŋ. Nyɛ hiou wa o sɔvɛ bɛndu le Chɛhowa wo wa koŋ ni.

⁸ Bundɛi hei a violɔŋ Chiisoo okɔɔ pɛɛku naa mɛɛ Chɛhowa che nyɛm kiɔɔŋ yɛ. Kalaŋ chuauwa apum yeema mi chuauwaa ndaa nɔ nyɛm kɛŋ sɔviɔŋ, o yɔŋ bɛɛ mi chaŋyɛi kɛndɛi chuauwaa ndaa nɔ a Chɛhowa ve del o kpundɔɔ niŋ. Kɛ o kpeekpei niŋ, Chɛhowa che chaŋyɛi kɛndɛi naŋ nɔ a ndu ve, maa nyɛ sɔvɛ bɛndu hiou kpou wo. A chɛl niŋ pa yiyaŋ Chɛhowaa a suɛi hei okɔɔ? Yɛɛ nyɛ ŋ tosa wo chɔm yɛ?—Nuawɔ Hibuluiya 13:​5.

9, 10. Vɛɛ naŋ chɔm yɛ maa ŋ che acheleŋnda tosaa ma mal laalaŋ ndaa mɛɛ Chɛhowa che ndu yɛ?

⁹ Taamaselii cheleŋ cho a mɛɛ Chɛhowa che wana tosa mi acheleŋnda mal laalaŋ ndaa wo yɛ. Koŋ cho ni, tosaa mi waŋndo tosa hakioo ɔɔ mbo mal Chɛhowa piɛiyo. Mi Chiisu dimi aa, “Wana o wana yɔŋi num oo tosa mi a pɔmbuaa laalaŋ haa a ya wa, mi o pilɛ bɛɛ mal laalaŋndɔ koŋ yɛ, o bɛnda bɛɛ ma baa num pou bɛndoo o labolo ma mal num o mɛŋma yiŋgilɛiyaŋ niŋ.” (Maki 9:​42) Diomnda kala kalalaŋ pila la cho laŋ ni! Nduyɛ, ŋ sina maa Chiisu cho ko maa Finya ndɔ. Lelaŋ, ŋ nɔ miŋ laalaŋ kɛsɛ maa mi Chɛhowa tambu kɔl tau te waŋndo tosa pɛ mi buɛi Chiisoo mal laalaŋ ndɔɔ.—Chɔŋ 14:​9.

¹⁰ Baa ŋ che pa acheleŋnda tosaa ma mal laalaŋ ndaa mɛɛ Chɛhowa nda Chiisu che ndu yɛ? Yɛɛ nyɛ naŋ tosa wo chɔm yɛ? Le taamaseliiyo, naapum miŋ kaala chuɛinɔŋndo opum. Kɛ yɛɛ naŋ cho yɛ tosa te ŋ sina pɛ maa chuaŋ chua naa cho waŋnda apum o kundaa niŋ kɔllo tɛɛmbuu ɔɔ cho tosa mi acheleŋnda nɔ yiyaŋnda nɔɔlɛilaŋ? Baa kaala naa le puaapiliaa naa cho naa nyindɔɔ miŋ kɛɛ le nyɛ naŋ yeema wo tosaa?—Timoti Tasoo 2:​9, 10.

11, 12. Vɛɛ naŋ cho yɛ naapila manda te ŋ pɛɛku pɛ le nyɛ Chɛhowa tul leyɛ wo yɛleŋ tullo, vɛlɛ a kɔl naa baa tiuwo?

¹¹ Nuawɔ taamasi yaa ndɔɔ. Chɛhowa tul sɔɔŋ wɔɔŋndoŋ tosaa le yɛ. (Aisaya 61:​8) O kpeekpei niŋ, Chɛhowa sina maa lepum mbo wa ikala le miŋ tosa o kɛndɔɔ kanifuule, wanaa lahakiaa naŋ cho ni. Kɛ a koŋ kpou, o yeema miŋ tul o wɔɔŋndo leyɛ mɛɛ o tul ndu leyɛ yɛ. (Nuawɔ Sam 97:​10.) Te ŋ yiyaŋ pɛ le sabu Chɛhowa tul sɔɔŋ wɔɔŋndoŋ leyɛ wo, keŋ mala naa miŋ che sɔɔŋ mɛɛ o cha muŋ yɛ. Nduyɛ, miŋ sɔla kɔl sikpaa le kiɔɔ sɔɔŋ wɔɔŋndoŋ tosaa.

¹² Te ŋ pɛɛku pɛ le o wɔɔŋndo tullo leyɛ, keŋ mala naa miŋ che le sabu sɔɔŋ ŋtiŋ bɛnda le tosa le wo, mi che bɛɛ Baabuiyo suu a muŋ okɔɔ kpendekele le. Le taamaseliiyo, yolaŋ lapum la cho niŋ o chieeŋndo niŋ mi la wa la tiuwaa ba o ba fee. A veelu yolaŋ ndaŋ aa, yolaŋ o lɔlulaŋ choo. Nduyɛ, yolaŋ ndaŋ la cho a kaa  ihini nɔɔlɛiyo okɔɔ. Waŋnda apum yiyaŋ maa yolaŋ ndaŋ la cho nyɛ pilɛ a hiniei tosaa a waŋndo le. Lelaŋ, a yiyaŋ maa la cho yola wɔɔŋ te. * (Tofa tɛɛsiaa amatou.) Kɛ baa lende kpeekpei Chɛhowa yiyaŋ a laŋ ni? Loonuŋ maa Chɛhowa tul nyɛ o nyɛ cho nyɛ wɔɔŋ leyɛ. Lelaŋ, ŋ wounuŋ laba o nyɛ o nyɛ cho nyɛ wɔɔŋ niŋ te. Nduyɛ le hei tosaa, mɛɛ miŋ pɛɛku le kɔl naa baa tiuwo, nduyɛ miŋ tul nyɛ Chɛhowa tul leyɛ wo leyɛ.—Luomaŋnda 12:​9.

13. Le yɛɛ naŋ nɔ yɛ miŋ yiyaŋ o mɛɛ Chɛhowa cha sɔɔŋ yɛ choo suŋ suŋ le halikpeŋ miŋ tosa kɛɛsiaalaŋ a taasi o chilaŋ niŋ?

¹³ Te ŋ wa pɛ pɛɛkoo, ŋ nɔ miŋ yiyaŋ a mɛɛ Chɛhowa cha sɔɔŋ yɛ kanifuule, hei mala naa miŋ tosa kɛɛsiaalaŋ a taasi. Nduyɛ, te bahawɛiyo komal naa pɛ miŋ yeema le kɛɛsiaa tosaa chɔ chɔ, kɔndɔfili bii naa niŋ te. (Pulɔwaa 22:​3) Ŋ yaasiaŋndɔ taamaseliilaŋ lapum o Baabuiyo niŋ.

14. Yɛɛ naŋ pɛɛku yɛ a mɛɛ Choosɛ mulul lanɔɔ Pɔtifa yɛ?

¹⁴ Mɛɛ lanɔɔ Pɔtifa wa kindiŋndo le mi Choosɛ wa a ndu, mi Choosɛ kɛɛ o lepilɛ niŋ kpe. I cho tonya maa, Choosɛ ndoo yiyaŋ niŋ fɛŋ a mɛɛ Chɛhowa che nɔɔ yɛ. (Nuawɔ Chɛnɛsee 39:​8, 9.) Mi Choosɛ dimul lanɔɔ Pɔtifa aa, “Vɛ mi tosa suɛi kɔl vesɛi bɛnduii waa lende? Vɛ mi tosa yɔŋ wɔɔŋ waa lende Mɛlɛka o hɔl?” Hei chɔm maa ndoo siiŋguu niŋ yiyaŋnda Mɛlɛkalaŋ yiyaŋnda ndɔlaŋ. Naa yɛ? Yɛɛ ŋ cho yɛ tosa te wana nya tosa wallo latulu wo kandu pɛ i tɛfɛlɛkɛlɛɛ ve a num? Ɔɔ te o yɔŋ yɛ mi waŋndo yɔŋ num yooŋgoo a kaa ihini nɔɔlɛiyo okɔɔ ɔɔ fotuei tum fondoo o foŋ numndo choo? * (Tofa tɛɛsiaa amatou.) Te o yɔŋ pɛ miŋ pɛɛku mɛɛ Chɛhowa yiyaŋ yɛ, nduyɛ miŋ chɛl yiyaŋnda ndɔlaŋ a sɔɔŋ waa naa okɔɔ, okoŋ miŋ chii niŋ kɛɛsiaa tosa le nyɛ naŋ cho tosa wo, i cho wa tɛtɛlɛ le miŋ chɔm lo lechoo wo o Chɛhowa lo.

15. Vɛɛ naŋ chɔm yɛ lo lechoo wo o Chɛhowa lo mɛɛ Hibuluiyaa yaa wa tosa yɛ?

¹⁵ Ŋ tofaŋndɔ vɛlɛ taamaselii Hibuluiyaa yaa wa Siɛdula, Misiaki, a Abɛniko. Mɛɛ Masaa Nɛbukanɛɛsa o dimul nda le ma sooluu nyɛ ŋkoolii o toosiaa wo, ma kɛɛ a kɔl sikpaa. Mɛɛ nda mulul masaa yɛ, chɔm kpendekele maa ndaa chii niŋ yiyaŋ a nyɛ wa yɔŋnɔŋndo okɔɔ, te ndaa chɔm pɛ lo lechoo wo o Chɛhowa lo. (Ɛsɔdɔɔ 20:​4, 5; Daaniɛɛ 3:​4-6, 12, 16-18) Hau yɛ? Yɛɛ ŋ cho yɛ tosa te wana num banaa dimul num pɛ le ma yɔŋgu chuuŋgiaa ŋkanioo le dunyɛi piɛiyii lachoowɛi biiloo? Ŋ nɔ miŋ lo chumndo haaa mi i waa ndoo komal naa fɛŋ te. O bɛnda bɔɔ miŋ yiyaŋ suŋ suŋ a mɛɛ Chɛhowa yiyaŋ a sɔɔŋ waa lende yɛ. Okoŋ, te i komal naa pɛ o chilaŋ niŋ, i cho  wa tɛtɛlɛ miŋ tosa, nduyɛ miŋ soo nyɛ bɛnda wo, mɛɛ Hibuluiyaa yaa wa tosa yɛ.

16. Vɛɛ sinapɛŋgu kpeekpeiyo nɔɔ a yiyaŋ Chɛhowaa okɔɔ mala yɛ naa miŋ bɛɛndiaŋ le bahawɛi kɛndiaa choŋ choŋndo?

¹⁶ Yiyaŋndo o yiyaŋnda Chɛhowalaŋ choo mala naa vɛlɛ miŋ chɔm lo lechoo wo o ndu lo, te bahawɛi kɛndiaa choŋ choŋndo komal naa pɛ. I cho tonya maa, pesiŋ bɛɛ ŋ chɛl le ma hivi naa kooma kpeekpeiyaŋ ɔɔ kooma sala hiɔɔlu ma kɛ kɛ o ŋdial te. (Walta Wanaa Chiisuaa 15:​28, 29, NW)Kɛ, sɔɔŋ cheleŋndoŋ cho a koowaŋ okɔɔ ŋ Kilisiɔŋnɔɔ pila nɔ mbo tofa sawala mandaala Baabuiyo, le kɛɛsiaa tosaa a ba ndɔ wo. Teleŋ kuɛɛ bɛnda yɛ ma kɛɛsiaa le nyɛ ŋ cho tosa wo? Baa mɛɛ miŋ wa niŋ o fonda chiɔuwaa, naapum miŋ wa niŋ o nyɛ nɛiyaa niŋ, nduyɛ ma wa naa kindilaa le miŋ keleŋa kɛɛsiaa tosa? Sako bɛɛ. Suŋ suŋ naŋ nɔ ni miŋ tosa yaasiaa, nduyɛ miŋ dɔu yooŋgula yeemaŋ ndaŋ o yau tɛɛsiaa danda suu naŋ yeema wo choo. Okoŋ, miŋ dimul wana naa chiɔuwaa a ndi okɔɔ. * (Tofa tɛɛsiaa amatou.)

17-19. Le yɛɛ i cho yɛ suɛi sɔvɛ miŋ pɛɛku suŋ suŋ mɛɛ Chɛhowa yiyaŋ a sɔɔŋ yɛ? Chɔmndɔ taamaseliiyo.

¹⁷ O mɛɛlaa, yiyaŋndɔ a mɛɛ Chiisu keleŋa Pitɛ mulul le sila wɔɔŋ Pitɛ ke ndu wo yɛ aa, “Yiyaŋ yiyaŋ waa lende ma tuunuŋ keŋ te. Mɛlɛka tuɛi bɛɛ nyɛ ŋ dimi hoo wo le, Masanɔɔ.” Chiisu ndoo chii niŋ yiyaŋ nyɛkɛndɛi o nyɛ Mɛlɛka ndoo yeema ndu mbo tosa wo choo. Nduyɛ, mbo yiyaŋ vɛlɛ a huuluŋ muŋ dimiŋ a yoomu ndɔɔ vɛlɛ a piɔm ndɔɔ okɔɔ wo. Sinapɛŋgu ndoo nɔ a sɔɔŋ muŋ okɔɔ wo luei ndu yoomuaŋ ni, mbo chɔm lo lechoo wo o Chɛhowa lo, nduyɛ mbo yɔŋgu yoomu ndɔɔ maa sala baŋaa le naa kpou.—Nuawɔ Maatiu 16:​21-23.

¹⁸ Hau, Mɛlɛka yeema naa miŋ wa chaaŋaa nduaa, nduyɛ miŋ tosa wali dimiaa yooŋgu kɛndɔɔ a yoomuma naŋ  kpou. (Maatiu 6:​33; 28:​19, 20; Chemisi 4:​8) Kɛ, naapum mi waŋnda apum a nɔ yiyaŋ kɛndɔɔ wa kindiŋ le naa dialloŋ diyɔɔ, mɛɛ Pitɛ tosal Chiisu yɛ. Le taamaseliiyo, naapum mi wana num banaa dimi le num kanioŋ kioo tau. Kɛ, ma sina maa a nɔ ma chɔɔlu havɛilaŋ chua tau le wallo tosaa nduyɛ a nɔ lɛ niŋ teleŋ tau le kɔlaŋ o bɔŋaŋndaŋ ɔɔ o wali pollo niŋ a kundaa latulu le. Ɔɔ, te o wa pɛ maa a cho wɔ kɔlaŋ o sukuu, nduyɛ naapum mi wana num pɛɛkaa ke num dikeŋnaŋndo le malɔɔ o numndo ma kuɛ o sukuu cheleŋ le ma kɔ chɔɔlu pɛɛkoo sɔla. Te i waa lende yɔŋnuŋ pɛ, baa a nɔ pa ma piɛi, ma tosa yaasiaa, nduyɛ ma suukaŋ a wanaa numnda o yuŋgoo niŋ ɔɔ bɛnduaa kundaa tuupa ma tosa kɛɛsiaa? O bɛnda ma pɛɛku suŋ suŋ mɛɛ Chɛhowa che sɔɔŋ muŋ yɛ, nduyɛ ma siiŋguu yiyaŋnda ndɔlaŋ yiyaŋnda numndaŋ. Okoŋ, te a sɔla dilakeŋnaŋ waa naa pɛ, a cho sina maa o cho nyɛm ŋ nɔ ma lau le muŋ te ŋ cho le. Nduyɛ, ma sina nyɛ kpeekpei ŋ nɔ ma tosa wo kanifuule, a chii niŋ kɛɛsiaa le ma hiou lachi a kɔllo handɔɔ o Chɛhowa piɛiyo choo.

¹⁹ Naapum, a yiyaŋ a sɔɔŋ cheleŋ tiuba miŋ tofa lo lechoo numndo o Chɛhowa lo wo okɔɔ. I cho tonya maa, ŋ nɔla miŋ bɛɛndiaŋ le sɔɔŋ cho naa komal loŋ kpou le. Kɛ, te ŋ yiyaŋ pɛ o yiyaŋnda Chɛhowalaŋ choo teleŋ pɛɛkɔŋ naa ipilayaa, keŋ mala naa miŋ loonuŋ nyɛ naŋ pɛɛku wo, nduyɛ miŋ sina mɛɛ naŋ duau ndu o wali niŋ o suɛi kɛ kɛ niŋ yɛ. Lelaŋ, te ŋ wa pɛ pɛɛkoo, ŋ nɔ miŋ kindiŋ le sinaa mɛɛ Chɛhowa cha sɔɔŋ yɛ, miŋ siiŋguu yiyaŋnda ndɔlaŋ yiyaŋnda naalaŋ, nduyɛ miŋ yiyaŋ a mɛɛ hei mala naa le kɛɛsiaalaŋ tosaa a taasi suŋ suŋ, vɛlɛ a o chilaŋ niŋ yɛ.

20, 21. (a) Le yɛɛ naŋ tuɛi yɛ niŋ hɛnɛkɛyɛi nɛi yeela o chieeŋ sɛnɛiyo niŋ? (b) Vɛɛ naŋ tuɛi yɛ yoomoo yeela suŋ suŋ?

²⁰ Naa kpou cho lehɔl o nɛi le chieeŋ sɛnɛiyo. Naa bɔɔbɔɔ nɔ tiindaŋndo le miŋ huŋ wa yoomu o Kpele Hɛnɛkiɔɔ niŋ lefafɛɛŋ o chieeŋndo choo. O Masale Mɛlɛkaleŋ bɛŋgu, nyɛ nɛiyaa vɛlɛ a nyɛpalaa cho naa hau choo wo kpou cho hunɔɔ faŋaŋ. Nduyɛ i cho tonya maa, ŋ cho wa hɛnɛkɛ le chuaŋ chualaŋ tosaa a mɛɛ yeemaŋ naŋ cho wa yɛ.

²¹ Kɛ hei sim naa maa hɛnɛkɛyɛi nɛi nɔ niŋ kpeleŋ te le. Wanaa tusiaŋnda cho wa kɛɛsiaala chɛlaŋ a sawala Chɛhowalaŋ vɛlɛ a yiyaŋnda ndɔlaŋ ndo tosaa. Nduyɛ, hei huŋ niŋ a nyaaloo vɛlɛ a kɔl nyuloo tau. (Sam 37:​11) Kɛ tuupa mi teleŋ koŋ o fuuluu, ŋ nɔla miŋ tuei yoomoo yeela suŋ suŋ, te ŋ wa pɛ yiyaŋnda Chɛhowalaŋ siiŋguuwo yiyaŋnda naalaŋ.