1. A mɛɛ Maatiu 28:​18-20 dimi yɛ, yɛɛ Chiisu ndoo dimullɛ buɛiyaa nduaa le tosaa?

MƐƐ Chiisu miiŋgu yoomu, mbo fula buɛiyaa nduaa o hɔl Kalili. Buɛiyaa nduaa haa kpou a wa a chuuŋgiaŋ naapilɛ nduyɛ, Chiisu ndoo nɔ suɛi sɔvɛi pum le nda dimullo. Yɛɛ wa yɛ suɛi keŋ? Ŋ nɔla miŋ saaluŋ ndi o Maatiu 28:​18-20—Nuawɔ.

2. Nyunala kuɛɛ naŋ cho yɛ yaasiaa?

² Wali Chiisu ke buɛiyaa nduaa o teleŋ koŋ niŋndo buɛiyaa Mɛlɛkaa bɛɛ nɔ hau ni ma tosa. Lelaŋ, ŋ yaasiaŋndɔ nyunala chiɛɛliaŋ a wallo hoo laŋ la yaa. O tasoo, o faŋaŋndɔ o waŋnda sawala Mɛlɛkalaŋ pɛɛkoo kɔɔli, yɛɛ naŋ nɔ yɛ miŋ tosa? O diiŋ ndɔɔ, vɛɛ puaapiliaa a ndepiliaa cho o kundaa niŋ nda kpou mala yɛ wanaa cho Baabuiyo pɛɛkoo wa ma tosa hiouwɔɔ lachioo? O yaa ndɔɔ, vɛɛ naŋ mala yɛ wanaa kelu kɔlaŋ o bɔŋaŋndaŋ a o wali pollo niŋ nda, le ma miiŋgu vɛlɛ wali Chiisu ke naa wo tosaa?

3. Mɛɛ Chiisu wa buɛiyaa nduaa wallo kioo, suɛi sɔvɛi kuɛɛ ndoo dimi yɛ?

³ Nyɛ Chiisu dimul naa le tosaa wo cho kpendekele. O dimi maa naŋ pɛɛku waŋnda nyɛ o dimul naa le tosaa wo. Kɛ mɛɛ Chiisu wa buɛiyaa nduaa wallo hoo kioo, mbo dimi suɛi sɔvɛi pum. Nduyɛ ŋ nɔ miŋ puɛɛnuŋ a nyɛ ndoo dimi koŋ ndo okɔɔ le. Chiisu ndoo dimi naa aa: ‘La pɛɛku nda nyɛ ya dimul nya wo le.’ Kɛ naa ndoo dimi ni aa: “La pɛɛku nda ma tosa nyɛ o nyɛ ya dimul nya le tosaa.” Le batiuwaa hoo sɔlaa, o cho ko  Baabuiyo le naŋ nɔ miŋ pɛɛku waŋnda le. Kɛ ŋ nɔ miŋ chɔm nda mɛɛ nda duau nyɛ nda cho pɛɛkoo wo o wali niŋ yɛ, nduyɛ miŋ mala nda pɛŋ le hei tosaa. (Walta. 8:​31) Le yɛɛ naŋ nɔ yɛ miŋ tosa keŋ?

4. Chɔmndɔ taamaseliiyo le sinaa mɛɛ naŋ mala wanaa naŋ cho Baabuiyo pɛɛkoo wa le ma tosa nyɛ Chiisu dimi wo yɛ.

⁴ Vɛɛ naŋ pɛɛku yɛ waŋndo le mbo “tosa” nyɛ Chiisu dimul naa wo? Tofawɔ taamaseliiyo hoo. Sawalaŋ la cho le sinaa mɛɛ wana kua a nyɛ nyaanaŋndo o nɛi yɛ. Vɛɛ wana cho waŋnda pɛɛkoo le kɔlaŋ a mɔmbillo wo mala yɛ nda ma tosa nyɛ sawalaŋ ndaŋ la dimi wo? I tasei, o nɔ mbo tɛɛsial nda sawalaŋ ndaŋ. Kɛ le ma diikuŋ ndaŋ, mɛɛ mbo tosa nyɛ cheleŋ. O nɔ mbo luɛi o mɔmbillo niŋ a nda, mbo wa kɔlaŋ a nda chɔmndo mɛɛ wana duau laŋ o wali niŋ yɛ. Yɛɛ naŋ pɛɛku yɛ o taamaseliiyo hoo niŋ?

5. (a) A mɛɛ Chɔŋ 14:​15 a Chɔŋ Tasoo 2:​3 dimi yɛ, yɛɛ naŋ nɔ yɛ miŋ mala wanaa naŋ cho pɛɛkoo wa ma tosa? (b) Chɔmndɔ taamaseliilaŋ le sinaa mɛɛ naŋ mala wanaa naŋ cho pɛɛkoo wa yɛ.

⁵ Te ŋ wa pɛ waŋnda Baabuiyo pɛɛkoo, miŋ mala nda le ma sina nyɛ Mɛlɛka yeema naa miŋ tosa wo. Kɛ o cho ko keŋ te naŋ nɔ miŋ tosa le. Ŋ nɔ miŋ mala nda ma dɔu nyɛ nda cho pɛɛkoo wo o wali niŋ. (Nuawɔ Chɔŋ 14:​15; Chɔŋ Tasoo 2:​3.) Taamasi naa nɔ mbo chɔm nda mɛɛ wana duau sawala mandaala Baabuiyo o wali niŋ yɛ. O nɔla mbo mala nda o yɔŋ bɛɛ ma wa o sukuu, naa walla, ɔɔ pisultaŋ. Ŋ chɔm nda vɛlɛ mɛɛ sawala Baabuiyo la mala naa niŋ o yoomoo niŋ yɛ. Te ŋ wa piɛileŋ pɛ a wanaa naa pɛɛkaa, ŋ nyuna Chɛhowa le mbo manda nda a nyina ndɔ diandaa.—Chɔŋ 16:​13.

6. Te ŋ wa pɛ waŋnda pɛɛkoo le ma tosa nyɛ Chiisu dimul naa wo, yɛɛ cheleŋ naŋ nɔ yɛ miŋ tosa?

⁶ Ŋ nɔ vɛlɛ miŋ mala wanaa naŋ cho Baabuiyo pɛɛkoo wa le ma nɔ yeemɛi le waŋnda siiŋguu wo buɛiyaa Chiisuaa. Kanifuule, keŋ bɛɛ cho o sɔɔŋ Chiisu dimul naa le tosaa woŋ tɛɛŋ. Mi wanaa naŋ pɛɛku wa apum nɔ siooŋnde le yooŋgu kɛndɔɔ dimioo. Lelaŋ, ŋ nɔ miŋ biunuŋ nda te ŋ wa nda pɛ malaa le hei tosaa. Ŋ nɔ fɛŋ miŋ mala nda le ma bii nyɛ nda cho pɛɛkoo o Baabuiyo niŋndo bila le mi tiindaŋ ndaa kendu. Keŋ cho nda nyindɔɔ le mi nda bɛɛ kandu yooŋgu kɛndɔɔ dimioo. Yɛɛ naŋ nɔ yɛ miŋ tosa le wanaa naŋ cho pɛɛkoo wa malaa le ma nɔ yeemɛi le yooŋgu kɛndɔɔ dimioo?

7. Yɛɛ naŋ nɔ yɛ miŋ tosa le wana naŋ cho pɛɛkoo wo malaa mbo nɔ yeemɛi le yooŋgu kɛndɔɔ dimioo?

⁷ Ŋ nyuna wana naŋ cho Baabuiyo pɛɛkoo wo nyunalaŋ lapum mɛɛ laŋ la cho naa yɛ. Mɛɛ ŋ tuei yooŋgu kɛndɔɔ ma chɛl le Baabuiyo pɛɛkoo, hiouwɔɔ lachi yɛɛ yɔŋnuŋ yɛ niŋ o yoomu numndo niŋ? A yiyaŋ pa maa wanaa cheleŋ bɛɛ nɔ ma tuei yooŋgoo hoo? Yɛɛ ŋ nɔ yɛ ma tosa le nda malaa? (Pulɔ. 3:​27; Maa. 9:​37, 38) Chɔm ndu yaula pɔmbɔla cho o Kɔfu Nyɛm Waliŋ Naŋ Pɛɛku Waŋnda Woŋ niŋ ndaŋ. Okoŋ, mi ndupila hɛli la o yiyaŋ maa la nɔla mi la mala wanayaŋ ndɔŋ, chaaŋaa nduaa ɔɔ wanaa nda tosa wallo wa. Ke ndu la yɛ yɛlaŋ mi la wa ndu o ba. Pɛɛku ndu mbo sina mɛɛ wana ke waŋnda laŋ yɛ. Kɛ te o yɔŋ pɛ mi wana naŋ cho pɛɛkoo wo simnuŋ wana dimiaa yooŋgu kɛndɛ yiŋndɔ le wo, ŋ nɔ miŋ mal ndu mbo wa fulaa ndupilɛ le. Ŋ nɔ miŋ wa fulaa a ndu latulu le ndu malaa.—Ikili. 4:​9, 10; Luku 6:​40.

8. Le yɛɛ i cho yɛ i sɔvɛ le mi wanaa naŋ cho pɛɛkoo wa nɔ kaala yiŋgoloŋndo le Mɛlɛka a le chaaŋ nda wanachioo? (Tofa kɔfoo hoo, “ Mɛɛ Naŋ Mala Wanaa Naŋ Cho Pɛɛkoo Wa le Ma Kaala Mɛlɛka Yɛ.”)

⁸ Kɛsiŋ o kɔl maa mi Chiisu dimul naa maa, naŋ pɛɛku waŋnda “ma tosa nyɛ o nyɛ” o dimul naa le tosaa. Mɛɛ ŋ nɔ vɛlɛ miŋ mala nda le ma diikuŋ sawala tiɔɔŋ nda hiou sawalaŋ kpou laŋ. Laŋ la cho ni, kaalaa nɔɔ le Mɛlɛka a le chaaŋ naa wanachioo. Sawalaŋ ndaŋ la  chiɛɛliaŋ a wali Chiisu ke naa le waŋnda siiŋgoo buɛiyaa ndɔ wo. (Maa. 22:​37-39) Vɛɛ la chiɛɛliaŋ yɛ a wallo hoo? Nyɛ kpeekpei nyindu naa le yooŋgu kɛndɔɔ dimioo wo cho kaala naŋ nɔ le Mɛlɛka a le chaaŋ naa wanachioo wo ni. Kɛ a koŋ kpou, mi wanaa naŋ pɛɛku Baabuiyo wa apum yɔŋ siooŋnde le yooŋgu kɛndɔɔ dimioo. Lelaŋ te ŋ wa wanaa waa ndoo pɛɛkoo pɛ, ŋ nɔ miŋ dɛɛniaa nda maa Chɛhowa cho nda mala mi siooŋii wana chioo fula nda o kɔl o pɔmpɔmbɔ. (Sam 18:​1-3; Pulɔ. 29:​25) Kɔfu cho o buŋgɛi hei niŋndo chɔm mɛɛ naŋ mala wana naŋ cho pɛɛkoo wo mbo nɔ kaalaa le Mɛlɛka yɛ. Kɛ vɛɛ kundaa bɛɛ mala yɛ wanaa sɛnɛiya haa le ma hiou lachi a kaalaa nɔɔ le Mɛlɛka a le chaaŋ nda wanachioo?

9. A mɛɛ naŋ che o taamaseliiyo niŋ yɛ, vɛɛ wana cho mɔmbillo pɛɛkoo wo nɔla yɛ mbo chaa kɔlaŋ a ndu?

⁹ Ŋ soonuŋndɔ vɛlɛ a wana cho mɔmbillo pɛɛkoo wo okɔɔ. Te o wa pɛ o mɔmbillo niŋ nda wana cho ndu pɛɛkoo wo, mbo chɔɔlu sina mɛɛ wana duau sawala cho a nɛiyo okɔɔ laŋ o wali niŋ yɛ. O nɛi kuɛɛ choo? O cho wa wana cho ndu pɛɛkoo wo nilaŋ yaŋɔɔ nduyɛ mbo wa vɛlɛ chɔɔ wanaa cheleŋ cho kɔlaŋ a mɔmbiltaŋ nda. Le taamaseliiyo, te wana cho ndu pɛɛkoo wo che pɛ mi wana cho ndu lachi wo dɛɛna mɔmbil ndɔɔ le mi chaaŋ ndɔ hiou, o chɔm ndu loŋ. Ɔɔ naapum mi wana cho ndu hunɔɔ lachi wo tusi nyɛ wawoŋ ndɔɔ yɔŋi o paaliaŋ wanaa cho ndu fulaa lachi wa. Nduyɛ, mi wana ndɔ pɛɛkaa dɛɛniaa ndu le waa keŋ tosaa. Taamasilaŋ ndaŋ la nɔla mi la mala wana cho pɛɛkoo wo te o wa pɛ kɔlaŋ lɔɔ cheleŋ a mɔmbillo.

10. Yɛɛ mala yɛ wana cho Baabuiyo pɛɛkoo wo mbo tosa hiouwɔɔ lachioo?

¹⁰ Mɛɛ lende ko i yɔŋnuŋ a wana cho Baabuiyo pɛɛkoo wo ni. Te o kandu pɛ kɔlaŋ o nɛi yoomoo choo, o cho ko wana ndɔ pɛɛkaa o ba le o sina sɔɔŋ te. Kɛ mi taamasi wanaa cheleŋ o kundaa niŋ mala ndu mbo sina sɔɔŋ tau. Lelaŋ, yɛɛ mala yɛ wanaa naŋ cho pɛɛkoo wa ma tosa hiouwɔɔ lachioo tau? Kɔlaŋ o bɔŋaŋnda naala leKilisiɔŋndaŋ mala nda ni. Le yɛɛ naŋ dimi yɛ lende? Sɔɔŋ nda yɔŋgu o bɔŋaŋndaŋ ndo nɔla miŋ mala nda ma chɔɔlu sinapɛŋgoo sɔla, mi tiindaŋ ndaa kendu nduyɛ ma hiou lachi a kaalaa nɔɔ le Mɛlɛka. (Walta. 15:​30-32) Te wana cho Baabuiyo pɛɛkoo wo kuɛ vɛlɛ pɛ o bɔŋaŋndaŋ, wana ndɔ pɛɛkaa nɔla mbo chɔm ndu puaapiliaa a ndepiliaa cheleŋ o kundaa niŋ. Naapum bahawɛi o nɔ wo puaapiliaa a ndepiliaa haa bɛɛ ndaa nɔ paandu ni. O nɔla vɛlɛ mbo che mɛɛ kpɛ kaalaa cho naa tɛɛŋ o kundaa niŋ yɛ. Ŋ tofaŋndɔ taamaseliilaŋ lapum le hei sinaa.

11. Te wana cho pɛɛkoo wo wa pɛ kɔlaŋ o bɔŋaŋndaŋ, taamasila kuɛɛ o cho yɛ chɔ o kundaa niŋ nduyɛ, vɛɛ la piiliaŋ yɛ ndu?

¹¹ Ŋ dimi wɔ maa wana cho Baabuiyo pɛɛkoo wo ndupilɛ cho chuauwaa nduaa mandaa ni. Te o yɔŋ pɛ mbo kuɛ o bɔŋaŋndo mbo komal ndepilɛnɔ cho o bahawɛi waa lende niŋndo, mi taamasi ndɔɔ mala ndu tau. Kanifuule, o cho wa chɔɔ mɛɛ ndepilɛnɔɔ hoo cho kindiŋndo le kɔlaŋ a chuauwaa nduaa pɔmbuaa o bɔŋaŋndaŋ yɛ. Ɔɔ te o wa pɛ mi wana cho Baabuiyo pɛɛkoo wo che ndi ikala le sikɛɛtiiyo malɔɔ, te o kuɛ pɛ o bɔŋaŋndaŋ, o nɔla mbo komal puaapilɛnɔ ndoo nɔ bahawɛi koŋ paandu wo. Puaapilɛnɔɔ hoo nɔla mbo chɔm ndu mɛɛ kaala o nɔ le Chɛhowa wo mala ndu mbo mal kaa hoo yɛ. (2 Kɔliŋ. 7:​1; Filipi. 4:​13) Te puaapilɛnɔɔ hoo dɔu pɛ baltaŋ nda wana cho Baabuiyo pɛɛkoo wo, naapum o cho ndu dimul aa, “Num bɛɛ nɔla ma mal sikɛɛtiiyo kolɔɔ.” Nduyɛ hei nɔla mii luei ndu yoomuaŋ le kaa hoo chɔulabaa. Ŋ dimi wɔ vɛlɛ maa chuaambɔ feleŋgɔnɔ cho Baabuiyo pɛɛkoo wo kuɛ o bɔŋaŋndo. Mɛɛ o kuɛ, mbo cha ndepilɛnɔ feleŋgɔnɔ cho Chɛhowa piɛiyo a kɔl kɛndɛ wo. Mɛɛ o che maa ndepilɛnɔɔ hoo cho a nyaale lɔɔlɔɔ, mi ndu bɛɛ yeema le chɔɔloo pɛɛkoo le sinaa nyɛ tosa mbo wa lende wo.

12. Le yɛɛ naŋ dimi yɛ maa wana o wana o kundaa niŋ nɔla mbo mala wanaa naŋ cho Baabuiyo pɛɛkoo wa?

 ¹² Te wanaa cho Baabuiyo pɛɛkoo wa sina pɛ puaapiliaa a ndepiliaa tau, taamasi nda kɛndɔɔ nɔla mbo mala nda. O nɔla mbo mala nda ma sina nyɛ o sim le tosaa nyɛ Chiisu dimul naa wo. Ndu cho ni, kaalaa nɔɔ le Mɛlɛka a le chaaŋ naa wanachioo. (Chɔŋ 13:​35; 1 Timo. 4:​12) A mɛɛ naŋ dimi suŋ yɛ, te wana cho pɛɛkoo wo komal pɛ wanaa ndaa nɔ bahawɛi ndɔɔ wa o kundaa niŋ, mbo pɛɛku nda o ba tau. Taamasi ndaa nɔla mbo ke ndu tiindaŋndo maa, ndu bɛɛ nɔla mbo tosa siŋgaŋndaŋ le simnɔŋndo buɛi Chiisu wo. (Ditɔnɔ. 30:​11) Wana o wana o kundaa niŋ nɔla mbo tosa nyɛ, le wanaa naŋ cho pɛɛkoo wa malaa ma tosa hiouwɔɔ lachioo. (Maa. 5:​16) Vɛɛ num kindiŋ yɛ niŋ le wanaa cho Baabuiyo pɛɛkoo wa dɛɛniaa ma hiou lachi a kɔlaŋ o bɔŋaŋndaŋ?

13-14. Mɛɛ buɛiyaa Chiisu wa vi ŋdial le wali o ke nda wo tosaa, vɛɛ ndoo bii yɛ nda?

¹³ Puaapiliaa a ndepiliaa naa bɔɔbɔɔ vi niŋ ŋdial o Mɛlɛka piɛiyo niŋ. Ŋ nɔ miŋ mala nda le ma miiŋgu vɛlɛ wali Chiisu ke naa hoo wo tosaa. Mi buɛiyaa Chiisu wa bɛɛ wu ŋdial a teleŋ pum. Kɛ mɛɛ o bii nda yɛ nɔla mbo mala naa miŋ sina mɛɛ naŋ nɔ miŋ bii puaapiliaa a ndepiliaa vi ŋdialla yɛ.

¹⁴ Mɛɛ Chiisu chii wali ndɔ pollo ma bii ndu le ndu diyɔɔ, mi buɛiyaa nduaa “kpou a mal ndu ma nyaanuŋ.” (Maki 14:​50; Chɔŋ 16:​32) Vɛɛ Chiisu ndoo bii yɛ nda, mɛɛ nda vi ŋdial le wali o ke nda wo tosaa o boondii keŋ niŋ? Dimioo naa o miiŋgu yoomu, mbo dimul buɛiyaa nduaa apum aa: “La yɔŋ isiooŋ te! La kɔ mi la kɔ dimul pɔmbuaa niaa [maa I miiŋgu yoomu].” (Maa. 28:​10a) Chiisu ndoo tembu kɔl a buɛiyaa nduaa le. Mi che bɛɛ mi nda kpou mal ndu, kɛ mbo veelu wɔ nda kɛ aa “pɔmbuaa niaa.” Mbo tual taamasi Chɛhowaa kɔɔli le nda nyɛiye tuiinɔŋndo a nda malɔɔ haki.—2 Masaa. 13:​23.

15. Vɛɛ kɔllo cho yɛ naa a wanaa kelu kɔlaŋ o wali pollo niŋ nda?

¹⁵ Naa bɛɛ, buulaŋndo cho naa o kɔl tau le wanaa kelu kɔlaŋ o wali pollo niŋ nda. Puaapiliaa a ndepiliaa naa nda cho ni nduyɛ ŋ kaala nda tau. Fɛŋ bɛɛ ŋ puɛɛnuŋ a mɛɛ chaaŋaa naa laalaŋnda haa fafala o wali Mɛlɛkaa niŋ paandu yɛ le. Mi apum dia kuɛi o wallo hoo niŋ le wɔsila bɔɔbɔɔ. (Hibu. 6:​10) Wana dimi isɔɔ a tonya, yeemɛi ndɛi cho naa bɔɔ o kɔl! (Luku 15:​4-7) O nɛila kuɛɛ niŋ naŋ tual lɛ taamasi Chiisu wo kɔɔli le chɔmndo maa ŋ buulaŋ a nda?

16. Vɛɛ naŋ chɔm yɛ maa ŋ buulaŋ le puaapiliaa a ndepiliaa naa vi ŋdial o Mɛlɛka piɛiyo niŋ nda?

¹⁶ Veelu nda le kɔlaŋ o bɔŋaŋndo. Nyɛ Chiisu bɛɛ tosa le buɛiyaa nduaa vi ŋdialla kɔllo dɛɛniaa wo opilɛ wa hoo ni. (Maa. 28:​10b; 1 Kɔliŋ. 15:​6) O nɛi pilɛ koŋ choo, te wanaa kelu kɔlaŋ o wali pollo niŋ nda ve lakɔ o bɔŋaŋndaŋ te, ŋ nɔ miŋ dɛɛniaa nda le kɔlaŋ o bɔŋaŋndaŋ. Ŋ nɔ miŋ kɛsiŋ o kɔl maa mɛɛ miŋ lambaŋ nda veeloo malaŋ nda kandu kɔlaŋ. Mɛɛ Chiisu veelu buɛiyaa nduaa o bɔŋaŋndo ma kua, mi kɔllo naŋ ndu dɔɔ tau.—Tuuwɔ Maatiu 28:​16 a Luku 15:​6.

17. Yɛɛ naŋ nɔ yɛ miŋ tosa te ŋ che pɛ wana vi ŋdial o Mɛlɛka piɛiyo niŋndo o bɔŋaŋndo?

¹⁷ Demul nda a dialuŋ fulaa. Mɛɛ Chiisu bii bɔŋaŋ koŋ a buɛiyaa nduaa, mbo tosa ma sinaŋ nyɛkɛndɛi. Ndu fɛŋ pɛŋ kandu suɛi o nda lo. (Maa. 28:​18) Yɛɛ naŋ nɔ yɛ miŋ tosa te ŋ che pɛ wana kelu kɔlaŋ o bɔŋaŋndaŋ ndo o Toŋgo leMasaa? Ŋ nɔ miŋ kɔ demul ndu a dialuŋ fulaa. Te ŋ che ndu pɛ o tasela ndɔ, naapum ŋ sina nyɛ kpeekpei naŋ nɔ miŋ dimul ndu wo le. Te lende i cho ni, ŋ nɔla miŋ dimul ndu kinɛi maa ŋ naŋ bɔɔ kɔl le ndu chɔɔ. Kɛ ŋ nɔ miŋ tosa mi siɔmbulaŋ la bii ndu kposoŋ te.

18. Vɛɛ naŋ luei yɛ wanaa vi ŋdial o Mɛlɛka piɛiyo niŋ nda yoomuaŋ?

 ¹⁸ Luei nda yoomuaŋ le ma hiou lachi. Naapum mɛɛ Chiisu dimul buɛiyaa nduaa maa a nɔ ma dimi yooŋgu kɛndɔɔ ba o ba fee o chieeŋndo choo, ma yiyaŋ maa a tiu ndi ba le. Kɛ mi Chiisu luei nda yoomuaŋ mɛɛ o dimul nda aa: “I cho wa latulu a nya.” (Maa. 28:​20) Baa mi hei ndii dɛɛniaa nda pa? Ei. Baabuiyo dimi maa “ma hiau lachi a waŋnda pɛɛkoo a nda yooŋgu kɛndɔɔ chɔmndo.” (Walta. 5:​42) Naa bɛɛ nɔ miŋ luei wanaa vi ŋdial o Mɛlɛka piɛiyo niŋ nda yoomuaŋ. Ma che ndi ikala la kandɔɔ vɛlɛ yooŋgu kɛndɔɔ dimioo. Ŋ nɔ miŋ dɛɛniaa nda miŋ dimul nda maa ŋ cho wa fulaa a nda latulu. Nduyɛ te a bɛɛndiaŋ pɛ le kandɔɔ kɔlaŋ, ŋ nɔ miŋ kuɛ naa ndaa. Te ŋ yɔŋguŋ pɛ le nda malaa ma kandu vɛlɛ yooŋgu kɛndɔɔ dimioo, a cho wa a kɔl kɛndɛ tau. Ŋ nɔ miŋ che wanaa vi ŋdial o Mɛlɛka piɛiyo niŋ nda maa puaapiliaa a ndepiliaa naa nda cho ni. Te ŋ tosa lende pɛ, a nɔla ma miiŋgu yoomuaŋ sɔla nduyɛ mi wana o wana naŋ kɔl o kundaa niŋ.

19. Yɛɛ cho yɛ yeemɛi nɛi, nduyɛ le yɛɛ?

¹⁹ Lɔɔ kuɛɛ naŋ cho yɛ chii wali Chiisu ke naa wo tosa? Ŋ nɔ miŋ tosa ndu haaa mi chieeŋndo hoo fuuluu o mɛɛlulaŋ. (Maa. 28:​20) Baa ŋ nɔla niŋ pa miŋ hiou lachi a ndu tosaa haaa mi teleŋ koŋ fuuluu? Yeemɛi nɛi kpeekpei cho keŋ ni! Lelaŋ ŋ cho lɔɔlɔɔ a nyaale le teleŋ naa, yoomuma naŋ, a nyɛ naa sɔlaa soliŋndo kpeku le ‘wanaa nɔ yeemɛi le ma sɔla yoomu kpeekpeiyo wa nuuviaa.’ (Walta. 13:​48) Te ŋ tosa hei pɛ, mɛɛ taamasi Chiisu wo naŋ cho tolɔɔ kɔɔli ni. Mbo dimi teleŋ pilɛ aa: “Nyɛ ni diaa ndu cho nyɛ wana vem ya wo o hɛnaŋ ndo tosaa ni, a wali o vem ya wo siouwo.” (Chɔŋ 4:​34; 17:​4) Naa bɛɛ yeema miŋ siou wali dimiaa yooŋgu kɛndɛ o ke naa wo maa ndu. (Chɔŋ 20:​21) Nduyɛ, ŋ yeema vɛlɛ wanaa vi ŋdial o Mɛlɛka piɛiyo niŋ nda a wanaa cheleŋ ma sɔɔŋguu le wallo hoo tosaa haaa o mɛɛlulaŋ.—Maa. 24:​13.

20. A mɛɛ Kɔliŋtiaŋ Diiŋ Ndɔɔ 4:​7 dimi yɛ, yɛɛ ke yɛ naa tiindaŋndo maa ŋ nɔla miŋ tosa wali Chiisu ke naa wo?

²⁰ O cho suɛi bɛɛŋ le wali Chiisu ke naa wo tosaa le. Kɛ o cho naa kinɛi le cho wallo hoo tosaa le kanifuule, mi Chiisu dimi maa o cho wa a naa latulu. Mɛlɛka pila bɛɛ cho naa kɔɔli o wallo hoo niŋ kanifuule, ‘wanaa walla naŋ cho latulu a ndu ni.’ (1 Kɔliŋ. 3:​9; 2 Kɔliŋ. 2:​17) Lelaŋ, ŋ nɔla miŋ tosa wallo hoo. Bɛɛle bɛndeŋ pila naŋ sɔla ni le wallo hoo tosaa a le wanaa cheleŋ malaa le mi nda bɛɛ tosa ndu.—Nuawɔ Kɔliŋtiaŋ Diiŋ Ndɔɔ 4:​7.