1. Nyuna kuɛɛ naŋ nyunaŋ yɛ lepum?

BAA ma buulaŋ pa lepum te a yiyaŋ pɛ a sɔɔŋ yɔŋnuŋ niŋ o chilaŋ niŋndoŋ okɔɔ, mɛɛ tambii piɛiyii lachoowɛi, chiŋalaŋ Kɔɔki o lɛŋnde Makɔkileŋ niŋ cho hunɔɔ wanaa Mɛlɛkaa wo, nduyɛ a chɔu Amakɛdɔŋ ndo? Baa a nyunaŋ niŋ pa aa: ‘I lo niŋ pa o laalaŋ nuu choo te sɔɔŋ ŋsiooŋndoŋ muŋ huŋ wa pɛ yɔŋnɔŋndo?’ Te lende i cho ni, mɛɛ yaasiaa naŋ cho wa diomnda Chiisu dimi o bolle Baabuile buŋgɛi hei tɔlnuŋ choo laŋ cho num mala tau. Mbo dimul buɛiyaa nduaa o bolle Baabuileŋ niŋ aa: “La wa a kɔlta tambɛi le. La dɔu laalaŋndo o Mɛlɛka niŋ, mi la dɔu vɛlɛ laalaŋndo o ya niŋ.” (Chɔŋ 14:​1) Laalaŋ kala kalaa cho naa mala, miŋ nɔ kɔl simulaa le sɔɔŋ cho naa komal o chilaŋ niŋndoŋ biuwɔŋndo.

2. Vɛɛ naŋ kindi yɛ laalaŋ naa, nduyɛ yɛɛ naŋ cho yɛ yaasiaa o buŋgɛi hei niŋ?

² Te sɔɔŋ tosa mi laalaŋ naa luɛi o tofaa bɛŋgu woŋ komal naa pɛ, mi keŋ mala naa miŋ sina nyɛ naŋ nɔ miŋ tosa le mi laalaŋ naa chɔɔlu kalu poŋ ndo. Nduyɛ te ŋ yiyaŋ pɛ a sɔɔŋ muŋ okɔɔ, ŋ cho chɔ naa naŋ nɔ miŋ tosa wallo kalaŋ le miŋ chɔɔlu laalaŋ naa kindi wo. Tɔɔndaŋ kɛ kɛ komal naa pɛ miŋ biunuŋ, mi keŋ tosa mi laalaŋ naa kendu poŋ. Nduyɛ hei cho naa mala miŋ biunuŋ tɔɔndaŋnda cho naa komal o chilaŋ niŋndaŋ. O buŋgɛi hei niŋ, ŋ cho yaasiaa sɔɔŋ ŋhiɔɔlu ŋ chɔm maa buɛiyaa Chiisuaa ndaa nɔ ma chɔɔlu laalaŋ ndaa kindi woŋ. Nduyɛ ŋ cho vɛlɛ yaasiaa mɛɛ naŋ biunuŋ sɔɔŋ muŋ hau yɛ, vɛlɛ a mɛɛ ŋ bɛɛndiaa naa le sɔɔŋ cho naa komal o chilaŋ niŋndoŋ yɛ.

3. Yɛɛ diomnda Chiisulaŋ o Maatiu 6:​30, 33 niŋ mala yɛ naa le miŋ bii bila?

³ I cho tonya maa mi wana cho yuŋgoo bolleŋndo wa yiyaŋndo mɛɛ o cho looku yuŋgu ndɔɔ nyɛdiaa, nyɛ chuɛɛnaŋndo a naa lɔlaa ke yɛ. Hei ve bɛɛŋ bɛɛŋ o chieeŋ kala kalaa hoo niŋ te. Lepum  ma soli chaaŋaa naa laalaŋnda o wallo niŋ, mi che bɛɛ a wa sɛmbɔɔ dɔwɔɔ tau le ndu tosaa. Nduyɛ naapum mbo wa ikala le ma sɔla wali cheleŋ. Mi apum kɛɛ waltaŋ lapum la Kilisiɔŋnɔɔ nɔ mbo tosa le laŋ. O sɔɔŋ waa nuaa niŋ, ŋ nɔ miŋ nɔ laalaŋ kala kalaa maa Chɛhowa cho tosa a sabu miŋ sɔla nyɛm naŋ hauba woŋ. Mi Chiisu chɔm buɛiyaa nduaa hei kpendekele, mɛɛ o wa waŋnda pɛɛkoo o pembei choo. (Nuawɔ Maatiu 6:​30, 33.) Te ŋ laalaŋ pɛ kɛsɛ maa fɛɛŋ bɛɛ Chɛhowa mel naa le, keŋ cho naa mala miŋ handu kɔl naa kpou o ndu piɛiyo choo. Te ŋ wa pɛ chɔɔ mɛɛ Chɛhowa cho naa malaa le nyɛm naŋ hauba woŋ sɔlaa yɛ, mi keŋ tosa miŋ sɔɔŋguu ndu ikɛi kpɛɛluŋ, nduyɛ mi laalaŋ naa chɔɔlu kalu poŋ.

4-5. Yɛɛ mala yɛ yuŋgu pilɛ mɛɛ nda wa buulaŋndo a mɛɛ nda looku niŋ nyɛm nda hauba woŋ sɔlaa yɛ okɔɔ?

⁴ Ŋ tofaŋndɔ mɛɛ Chɛhowa mala yuŋgu pilɛ o lɛŋnde Vɛnɛsueelaleŋ niŋ, le nyɛm nda hauba woŋ sɔlaa yɛ. Yuŋgoo hoo wa buulaŋndo tau mɛɛ nda looku niŋ ma sɔla nyɛm nda hauba woŋ yɛ. Wali ichiɔɔ yuŋgoo hoo ndoo tosa ni, le nyɛm nda hauba woŋ sɔlaa. Kɛ a teleŋ pilɛ, mi puaa huŋ o ndalo a yekpaŋndaŋ, ma bii fondaŋ ndaa tosa chiɛiyo, nduyɛ ma soli nda o fonda koŋ. Mi finya yuŋgu koŋ diolaŋ Mikɛl dimi aa: “Fondaŋndo nyɛɛmbɔ koni naŋ nɔ niŋ ni le wallo tosaa, nduyɛ waŋndo ndoo ke naa fonda koŋ ni. Idii o idii, mi yaa nyuna Chɛhowa le mbo mala naa mi naŋ sɔla nyɛm naŋ hauba woŋ.” Yoomoo wa o kala kpoke le yuŋgoo hoo, kɛ le mɛɛ ndaa nɔ laalaŋ kala kalaa maa Finya nda cho o choo choo niŋndo cho nda nyɛm nda hauba woŋ ke yɛ, mi ndaa kuɛ o bɔŋaŋndaŋ a o wali pollo niŋ teleŋ o teleŋ. Ma kɛsi Masale Mɛlɛkaleŋ nyɛ tasoo o yoomula ndalaŋ niŋ, nduyɛ mi Chɛhowa ndoo ke nda nyɛm ndaa hauba woŋ.

⁵ Mi che bɛɛ a wa o teleŋ kala kalaa hoo niŋ, kɛ mi Mikɛl nda laa ndɔ Yuluei cha mɛɛ Chɛhowa wa nda mandaa yɛ. Nduyɛ o keŋ choo ndaa handu kɔlta ndalaŋ ni. Teleŋnda bɔɔbɔɔ, mi Chɛhowa ndoo soliŋ chaaŋaa ndaa laalaŋnda kpeku, le nda malaa a nyɛm nda hauba woŋ ɔɔ le Mikɛl malaa mbo sɔla wallo. A teleŋnda cheleŋ, mi Chɛhowa ndoo soliŋ vɛlɛ Lɛuve kpeku le nda nyɛm ndaa hauba woŋ kioo. Chɛhowa mel nda le. Nduyɛ fulamakɔɔlioo cho ni, yuŋgoo hoo kpou che niŋ mɛɛ laalaŋ ndaa chɔɔlu kalu poŋ yɛ. Mɛɛ chua nda kaasoŋnɔɔ Yuseliŋ wa suɛi a mɛɛ Chɛhowa mala nda o suɛi pum niŋ yɛ okɔɔ, mbo dimi aa: “I cho suɛi kɔl dɛɛniaa le chɔɔ mɛɛ Chɛhowa mala naa yɛ. I che niŋ ndu maa chaaŋ ni kpeekpeiyo o cho ni, o ya tiindaŋ le ya malaa teleŋ o teleŋndo.” Mbo chɔɔlu dimi aa: “Teleŋ kala kala naŋ keeku hoo niŋndo bɛɛndiaa naa le sɔɔŋ kala kalaŋ komal naa niŋ o chilaŋ niŋndoŋ biuwɔŋndo.”

6. Te bahawɛi nyɛsɔlaa komal num pɛ, yɛɛ ŋ nɔ yɛ ma tosa le ma kindi laalaŋ numndo?

⁶ Baa bahawɛi nyɛsɔlaa cho num pa choo? Te lende i cho ni, mɛɛ teleŋ kala kalaa ŋ cho hoo niŋ ni. Mi che bɛɛ bahawɛi kala kalaa cho num choo, kɛ a tiuba ma soliŋ teleŋndo hoo kpeku le laalaŋ numndo kindioo. Piɛi a ndi okɔɔ, nduyɛ ma veelu diomnda Chiisu dimi mi la wa o Maatiu 6:​25-34 niŋndaŋ, okoŋ ma yiyaŋ lechoo. Yiyaŋ a tamaseliila buɛiyaa Chɛhowaa o palɛi nɛi niŋ okɔɔ, a handu kɔlta ndalaŋ kpou o wali Chɛhowaa  choo, nduyɛ mbo wa nda kioo nyɛm nda hauba woŋ nda. (1 Kɔliŋ. 15:​58) Hei tosaa cho num mala ma laalaŋ kɛsɛ maa Finya num cho o choo choo niŋndo cho num mala mɛɛ mɛɛ o cho buɛiyaa nduaa kaŋ malaa yɛ. O sina nyɛ ŋ yeema wo, nduyɛ o sina nɛi o soliŋ kpeku le num ndu kioo wo. Te a che pɛ mɛɛ Chɛhowa cho num malaa yɛ, keŋ cho tosa mi laalaŋ numndo chɔɔlu kalu poŋ, le halikpeŋ ma biunuŋ tɔɔndaŋnda cho num komal o chilaŋ niŋndaŋ.—Haba. 3:​17, 18.

7. A mɛɛ Maatiu 8:​23-26 dimi yɛ, vɛɛ hueiyii bɛndu bɛnduei luei yɛ laalaŋ buɛiyaa Chiisu wa o tofaa bɛŋgu?

⁷ Mɛɛ Chiisu nda buɛiyaa nduaa wa o dɛndɔɔ niŋ, mi hueiyii bɛndu bɛnduei kandu hɔŋndo. Mi Chiisu soliŋ teleŋ koŋ kpeku le nda malaa ma bii bila nyɛ nda nɔ ma tosa, le ma chɔɔlu laalaŋ ndaa kindi wo. (Nuawɔ Maatiu 8:​23-26.) Mɛɛ hueiyii keŋ i hɔŋ tei, mi mɛŋndaŋ ma pia o dɛndɔɔ niŋ cha. Kɛ a teleŋ koŋ, Chiisu waŋnuŋ o luaŋ. Buɛiyaa nduaa wa a siooŋnde tau. Le hei ma kɔ tindi ndu, nduyɛ ma dimul ndu le mbo piŋi nda. Mɛɛ o chɛŋ mbo nyuna nda aa: “Le yɛɛnɛ nya cho yɛ siooŋnde? Baa la nɔ laalaŋ bɔɔ le?” Mi che bɛɛ buɛiyaa Chiisuaa wa a siooŋnde, kɛ ndaa nɔ ma sina maa Chɛhowa ndoo tiuba mbo piŋi Chiisu vɛlɛ a nda. Yɛɛ hei pɛɛku yɛ naa? Laalaŋ kala kalaa mala naa miŋ biunuŋ bahawɛila kala kalala komal naalaŋ.

8-9. Vɛɛ laalaŋ Anɛl wo luɛi yɛ o tofaa bɛŋgu, nduyɛ yɛɛ mala yɛ ndu?

⁸ Ŋ tofaŋndɔ tamasi ndepilɛnɔ pilɛ o lɛŋnde Puɛɛto Likoleŋ niŋ diolaŋ Anɛl. Ndepilɛnɔɔ hoo chellɔ o nɔ le. Nduyɛ mɛɛ o biunuŋ bahawɛi kala kala komal ndu wo, mi laalaŋ ndɔɔ chɔɔlu kalu poŋ. A wɔsi 2017, mi hueiyii bɛndu bɛnduei hɔŋ o fondaŋ ndepilɛnɔɔ hoo cho wo, nduyɛ mii tɛɛmbuu chiɛi ndɔɔ. O faŋaŋ okoŋ kɔɔli, ma soli ndu o wallo niŋ. Mi Anɛl dimi aa: “Mi yaa buulaŋ tau o bahawɛi kala kalaa hoo niŋ. Kɛ mi pɛɛku le tiindaŋndo dɔwɔɔ o Chɛhowa niŋ sanaa a piɛileŋ o ndu lo. Nduyɛ I chɛl mi bahawɛi koŋ dii ya ŋdial te.”

⁹ Mi Anɛl dimi maa nyɛ cheleŋ mala ndu le bahawɛi koŋ biuwɔŋndo wo wa diikɔŋndo ni. Mbo dimi aa: “Nɛi chɔmaa kɔɔnaa tolɔɔ kɔɔli mala ya ni I yɔŋnuŋ pulaŋ pulaŋ te. Mi cha ba Chɛhowaa o yoomu nuu niŋ sanaa a kɔl dɛɛniaa ya wa sɔlaa puaapiliaa a ndepiliaa o ba wo, vɛlɛ a mɛɛ nda wa ya nyɛm ya hauba woŋ kioo yɛ.” Mbo chɔɔlu dimi aa: “Mi Chɛhowa ke ya nyɛm yaa hauba woŋ mbo hiau bɛɛ mɛɛ yaa yeema muŋ yɛ, nduyɛ mi laalaŋ nuu chɔɔlu kalu poŋ.”

10. Yɛɛ ŋ nɔ yɛ ma tosa te bahawɛi kala kalaa komal num pɛ?

¹⁰ Baa bahawɛi kala kalaa cho num pa choo suŋ suŋ? Naapum kpundɔɔ komal num ni, ɔɔ bahawɛi kɛndiaa cho num choo ni ma wa buulaŋndo tau a ndu okɔɔ, nduyɛ a sina nyɛ ŋ nɔ ma tosa wo le. O wa bɛɛ lende, chɛl mi buulaŋ ŋ cho koŋ a suɛi keŋ okɔɔ wo kuuna num tiindaŋndo dɔwɔɔ o Chɛhowa niŋ te. Sɔɔŋguu ndu ikɛi sanaa a piɛileŋ o ndu lo. Yiyaŋ a teleŋ o mala num niŋ o paandoo niŋndo okɔɔ, le halikpeŋ ma kindi laalaŋ numndo. (Sam 77:​11, 12) Nɔ tiindaŋndo maa fɛɛŋ bɛɛ o mel num te.

11. Le yɛɛ naŋ nɔ yɛ miŋ diikuŋ wanaa cho chilaŋ chuaa wa?

 ¹¹ Yɛɛ cheleŋ mala yɛ num ma biunuŋ tɔɔndaŋndaŋ? A mɛɛ Anɛl dimi yɛ, diikɔŋndo cho nyɔɔ opilɛ o mala naa wo ni. Lelaŋ, dɔu tiindaŋndo o wanaa Chɛhowa nda Chiisu cho soliŋndo kpeku wa niŋ. Lepum mi wanaa Chɛhowa nda Chiisu yulu iso le chilaŋ chuaa wa ke naa nɛi chɔmaa, nduyɛ miŋ yiyaŋ maa taasi cho leniŋ te. Kɛ ŋ nɔ miŋ kɛsiŋ o kɔl maa, wanaa diikuŋ nda Chɛhowa duau sala ni. Diom ndɔɔ a sɔɔŋ yɔŋnaŋ buɛiyaa nduaa lo o laalaŋ ndaa choo wa chɔm maa, diikɔŋndo piŋi yoomulaŋ. (Ɛsɔ. 14:​1-4; 2 Kolo. 20:​17) Yiyaŋ o sɔɔŋ yɔŋnaŋndoŋ muŋ choo. Hei tosaa cho num mala ma tol nɛi chɔmaa kɔɔna ndɔɔ cho num kioo suŋ suŋndo kɔɔli, vɛlɛ a o chilaŋ niŋ. (Hibu. 13:​17) Hei cho num vɛlɛ mala a nɔ isiooŋ le sɔɔŋ cho num komal o chilaŋ niŋndoŋ te.—Pulɔ. 3:​25.

12. A mɛɛ Luku 18:​1-8 dimi yɛ, chiɛɛliaŋ yɛɛ cho yɛ laalaŋ naa tɛɛŋ a kafala nda tosal naa laŋ biuwɔŋndo?

¹² Mi Chiisu sina maa kafala nda tosal niŋ buɛiyaa nduaa laŋ, la cho laalaŋ ndaa luei o tofaa bɛŋgu. Le hei, mbo dimul nda taloo le nda malaa ma biunuŋ. Taloo hoo cho o yau Luku wo niŋ. O taloo hoo niŋ, mbo chɔm a mɛɛ chua ndoo vii pɔnɔɔ wo lambaŋ kɔlaŋ o wana kialaa ŋyama ndoo nɔ kafalaŋ ndo lo, le halikpeŋ mbo ke ndu di ndɔɔ o suɛi keŋ niŋndo. Ndoo nɔ laalaŋndo maa te o lambaŋ pɛ wana kialaa ŋyama koŋ kɔɔli, o cho batiuwaa sɔla. Nduyɛ o mɛɛlulaŋ kpɔŋ, mi wana kialaa ŋyama koŋ dimi maa o cho nyɛ tosa le halikpeŋ mi chua koŋ sɔla di ndɔɔ. Yɛɛ hei pɛɛku yɛ naa? Chɛhowa cho wana lakafa le. Mi Chiisu dimi aa: “Mɛlɛka bɛɛ tiuba mbo ke wanaa nduaa o hɛli, ma wa ndu piɛiyo idii a ichɔl la di ndaa.” (Nuawɔ Luku 18:​1-8.) Mi Chiisu chɔɔlu dimi aa: “Te Po wana pɔnɔɔ hiŋ pɛ, baa o saaluŋ niŋ pa laalaŋ waa nuaa o chieeŋndo choo?” Te waŋnda wa naa pɛ kafalaŋ tosallo, biuwɔŋ naa vɛlɛ a mɛɛ naŋ cho lambaŋ nyunaa le di naa sɔlaa yɛ, cho chɔm maa ŋ nɔ laalaŋ kala kalaa maa chua ndoo vii koŋ pɔnɔɔ wo. Nduyɛ hei cho naa mala miŋ nɔ tiindaŋndo maa Chɛhowa cho nyɛ tosa o teleŋ biŋgi bɛŋgu, le naa malaa. Ŋ nɔ vɛlɛ miŋ nɔ laalaŋndo maa kpaayaa pila piɛileŋ le nɔ ni. Lepum mi Chɛhowa muli piɛile naa leŋ o nɛi naŋ ve bɛɛ kɔl te wo choo.

13. Vɛɛ piɛileŋ le mala yɛ yuŋgu pilɛ?

¹³ Ŋ tofaŋndɔ suɛi yɔŋnaŋii ndepilɛnɔ pilɛ diolaŋ Velo. Ndepilɛnɔɔ hoo cho o lɛŋnde Koŋgoleŋ niŋ. Pɔnɔɔ ndepilɛnɔɔ hoo cho Chɛhowa piɛi le. Mɛɛ chɔuwo del o fondaŋ ndaa, ma nyaanuŋ o sɔndɔkɔlɔ cheleŋ a chua nda wɔsila 15. Mɛɛ nda wa nyaanɔŋndo, ma komal sovɛiya o nɛi. Mi sovɛiyaa kaŋ simi nda, nduyɛ ma dimi maa a cho nda diyɔɔ. Le hei, mi Velo kandu chaŋndo. Kɛ mi chua ndɔɔ kandu piɛileŋ choo choo kpeleŋ o Chɛhowa lo, le ndu kɔllo dɛɛniaa. Nduyɛ chuaambɔ koŋ wa diola Mɛlɛkalaŋ lambaŋndo veeloo o piɛile ndɔleŋ niŋ. Mɛɛ o chii piɛileŋ, mi wana bɛndu wa sovɛiya bolleŋndo nyuna ndu aa: “Nɛɛnɛ pɛɛku yɛ num mɛɛ wana piɛi yɛ?” Mbo muli aa: “Kala nuu pɛɛku ya ni. Piɛile cho o Maatiu 6:​9-13 niŋndeŋ o soliŋ kpeku ni le ya pɛɛkoo.” Mi wana bɛndu sovɛiya dimi aa: “La  kɔŋnuŋ mi la wa o kɔl nyulu niŋ, nduyɛ maa Chɛhowa Mɛlɛka nyaa hiou lachi a nya mandaa fɔ!”

14. Yɛɛ luei yɛ laalaŋ naa o tofaa bɛŋgu, nduyɛ yɛɛ mala yɛ naa miŋ biunuŋ?

¹⁴ Sɔɔŋ yɔŋnaŋ waa nuaa pɛɛku naa maa, fɛɛŋ bɛɛ ŋ nɔ miŋ puɛɛnuŋ maa piɛileŋ le cho nyɛ sɔvɛ le. Kɛ te o wa yɛ maa Chɛhowa keleŋa piɛile numndeŋ muli le, ɔɔ maa o muli leŋ o nɛi kɔndɔfili niŋ te? Maa chua vii pɔnɔɔ wo o tale Chiisu wo niŋ, ŋ nɔ miŋ lambaŋ piɛileŋ nduyɛ miŋ nɔ tiindaŋndo maa fɛɛŋ bɛɛ Mɛlɛka mel naa le, nduyɛ maa o cho piɛile naa leŋ muli a teleŋ bɛnda wo. Lambaŋ Chɛhowa nyunaa le nyina ndɔ diandaa. (Filipi. 4:​13) Loonuŋ maa Chɛhowa cho num suŋ salaa dɔwɔɔ, o tosa niŋ ma puɛɛnuŋ saŋgala keeku num choo o paandoo niŋndaŋ. Te a biunuŋ pɛ tɔɔndaŋndaŋ sanaa a mala Chɛhowa cho num kioo wo, keŋ cho num mala ma kindi laalaŋ numndo le sɔɔŋ palaŋ cho num komal o chilaŋ niŋndoŋ.—1 Pitɛ 1:​6, 7.

15. A mɛɛ Maatiu 17:​19, 20 dimi yɛ, simul kuɛɛ ndoo komallɛ buɛiyaa Chiisuaa?

¹⁵ Mi Chiisu pɛɛku buɛiyaa nduaa maa laalaŋndo cho nda mala le ma hiou lachi a Chɛhowa piɛiyo o yɔŋ bɛɛ mi simulta kala kalalaŋ la komal nda. (Nuawɔ Maatiu 17:​19, 20.) A teleŋ pilɛ, mi buɛiyaa Chiisuaa bumba waŋndo nyina wɔɔŋndo touwɔɔ kɔɔli, mi che bɛɛ ndaa tosa niŋ ndi le teleŋnda bɔɔbɔɔ. Yɛɛ wa yɛ bahawɛiyo? Mi Chiisu tɛɛsiaa maa ndaa nɔ ma chɔɔlu laalaŋndo sɔla. Mbo dimul nda maa te a nɔ pɛ laalaŋ kala kalaa, keŋ cho nda mala ma hiou lachi a Chɛhowa piɛiyo o yɔŋ bɛɛ mi simulta kala kalalaŋ la komal nda. Hau, naa bɛɛ mi simulta kala kalalaŋ la komal naa, nduyɛ mii wa maa ŋ tiu laŋ ba le.

16. Vɛɛ laalaŋndo mala yɛ Kedi mbo biunuŋ suɛi kɔl tambɛi komal ndu ve?

¹⁶ Ŋ tofaŋndɔ tamaselii ndepilɛnɔ pilɛ o lɛŋnde Kuaatemalaleŋ niŋ diolaŋ Kedi. Paale pilɛ, mɛɛ nda wa fulaa o bɔŋaŋndo ma wa miiŋgoo o bɛɛ, mi viiya kei nda delɔɔ choo okoŋ ma dii pɔnɔ ndɔ. Vɛɛ laalaŋ ndɔɔ mala yɛ ndu mbo biunuŋ suɛi kɔl tambɛiye hei? Mbo dimi aa: “Mi nyindul Chɛhowa buulaŋ nuu o piɛileŋ niŋ, nduyɛ mi keŋ tosa mi wa a kɔl nyulu. Mi cha maa Chɛhowa buulaŋ a ya sanaa a mala yuŋgu nuu a chaaŋaa niaa wa ya kioo o kundaa niŋndo. Waa kpɔndi kpɔndi o wali Chɛhowaa niŋ mala ya ni I hiu kɔllo handɔɔ o suɛi kɔl tambɛi komalla ve choo le. Nduyɛ, hei mala ya vɛlɛ ni mi hiou lachi a Chɛhowa piɛiyo I hiu buulaŋ a nyɛ cho yɔŋnɔŋ o chilaŋ niŋndo le. Nyɛ keeku ya hoo choo wo pɛɛku ya maa mɛɛ mɛɛ simultaŋ la komalla o chilaŋ niŋ, I nɔla mi biunuŋ sanaa a mala Chɛhowaa, Chiisu vɛlɛ a kɔɔna nda cho soliŋndo kpeku wo.”

17. Yɛɛ naŋ nɔ yɛ miŋ tosa te simul kala kalaa komal naa pɛ?

¹⁷ Baa a cho pa mɔnɛi biyɔɔ le mɛɛ wana ŋ kaala wo sɔla piɔmndo yɛ? Te lende i cho ni, mɛɛ a tiuba ma kindi laalaŋ numndo sanaa a diomndaŋ veeloo o Baabuiyo niŋ a wanaa ndaa vi nduyɛ mi Chɛhowa miŋgi nda yoomu wa okɔɔ. Baa a cho pa a kɔl tambɛiyo le mɛɛ waŋndo sɔla solioo o yuŋgu numndo niŋ yɛ? Tosa pɛɛku yiŋgoloŋndo  le halikpeŋ ma nɔ tiindaŋ kala kalaa maa, nɛi sɔvɛ sɔvɛ Chɛhowa soliŋ kpeku le naa silaa wo cho koŋ ni. Bahawɛi kɛ kɛ komal num pɛ, soliŋ teleŋ koŋ kpeku le laalaŋ numndo kindioo. Dimul Chɛhowa nyɛ cho num o kɔllo, nduyɛ ma holnuŋ puaapiliaa a ndepiliaa numnda. (Pulɔ. 18:​1) Wa sɔɔŋ mala num ma biunuŋ ndoŋ tosaa o yɔŋ bɛɛ miŋ loonuŋ num a nyɛ yɔŋnuŋndo okɔɔ. (Sam 126:​5, 6) Hiou lachi a kɔlaŋ o bɔŋaŋndaŋ, wali pollo, vɛlɛ a diomndaŋ veeloo o Baabuiyo niŋ. Handu kɔllo o salala Chɛhowa cho hunɔɔ num dɔwɔɔ o chilaŋ niŋndo choo. Te a che pɛ mɛɛ Chɛhowa cho num malaa yɛ, keŋ cho tosa mi laalaŋ ŋ nɔ o ndu niŋndo chɔɔlu kalu poŋ.

18. Te a saaluŋ pɛ maa laalaŋ numndo cho o kala poŋ te, yɛɛ ŋ nɔ yɛ ma tosa?

¹⁸ Te tɔɔndaŋnda komal num niŋndaŋ la mala num pɛ ma cha maa laalaŋ numndo cho o kala poŋ te, mɛɛ tambu kɔl te. Chɔ ndi maa fondaa ŋ sɔla koŋ ni le laalaŋ numndo chɔɔloo kindioo. Nyɔɔlu Chɛhowa mɛɛ kiilaa Chiisuaa ndaa tosa yɛ. Ma dimi aa: “Mala naa mi laalaŋ naa chɔɔlu kalu poŋ.” (Luku 17:​5) Nduyɛ, yiyaŋ a tamaseliila naŋ soo a laŋ okɔɔ o buŋgɛi hei niŋndaŋ. Maa Mikɛl nda Yuluei, loonuŋ a teleŋnda Chɛhowa mala num niŋndaŋ okɔɔ. Maa chua Velo wo nda Anɛl, piɛi teleŋ o teleŋ o Chɛhowa lo taama taama te sɔɔŋ kindilaŋ komal num pɛ. Nduyɛ maa Kedi, sina maa mi Chɛhowa ke naa mala naŋ yeema wo sanaa a yuŋgu naa vɛlɛ a chaaŋaa naa. Te a chɛl pɛ mi Chɛhowa mala num le tɔɔndaŋnda cho num choo suŋ suŋndaŋ biuwɔŋndo, keŋ cho num mala ma laalaŋ kɛsɛ maa o cho num mala ma biunuŋ te tɔɔndaŋndaŋ la komal num pɛ o chilaŋ niŋ.

19. Tiindaŋ yɛɛ Chiisu ndoo nɔ yɛ, nduyɛ tiindaŋ yɛɛ ŋ nɔ yɛ ma nɔ?

¹⁹ Mi Chiisu chɔm buɛiyaa nduaa naa nda nɔ ma tosa wallo kalaŋ, le ma chɔɔlu laalaŋ ndaa kindi wo. Kɛ ndoo sina maa a mala Chɛhowaa, buɛiyaa nduaa wa biuwɔŋ tɔɔndaŋnda wa nda komal o chilaŋ niŋndaŋ. Kiisaŋ ve ndu a hei okɔɔ le. (Chɔŋ 14:​1; 16:​33) Ndoo nɔ tiindaŋndo maa laalaŋ kala kalaa cho faŋga bɛndoo mala ni, le ma sɔla pioŋɔɔ o nyɛpalaa bɛndoo niŋ. (Sɔɔŋ. 7:​9, 14) Baa a wa niŋ pa faŋga bɛndoo hoo tɛɛŋ? A nɔla ma wa nda tɛɛŋ, te a tosa pɛ nyɛ o nyɛ ŋ tiuba le laalaŋ numndo kindioo suŋ suŋ sanaa a mala Chɛhowaa!—Hibu. 10:​39.