1-2. (a) Le yɛɛ wanaa chal sɛnɛi o nɔɔ niŋnda nɔ yɛ ma dɔu tiindaŋndo o Chɛhowa niŋ? (Sam 37:​3,4) (b) Yɛɛ naŋ cho yɛ yaasiaa o buŋgɛi hei niŋ?

BAA a cho pa yiyaŋndo le nɔ kɛsiaa tosaa suŋ suŋ, ɔɔ baa la laŋga chal o nɔɔ niŋ? Te lende i cho ni, mɛɛ a cho yiyaŋndo a mɛɛ ŋ tuɛi niŋ yoomoo yeela nya wana ŋ kaala wo yɛ. I cho tonya maa o cho teleŋ o teleŋ te sɔɔŋ wa bɛɛŋ bɛɛŋ o nɔɔ niŋ te. Nduyɛ wanaa chal sɛnɛi o nɔɔ niŋnda nɔ ma tosa kɛɛsiaala sɔvɛ sɔvɛlaŋ. Mɛɛ nda bii niŋ simultaŋ yɛ vɛlɛ a mɛɛ nda tosa kɛɛsiaalaŋ yɛ, cho piiliaŋ kɔl kɛndɛ ndaa le wɔsiŋ bɔɔbɔɔ. Kɛ te a dɔu pɛ tiindaŋndo o Chɛhowa niŋ, a tiuba ma tosa kɛɛsiaalaŋ a taasi, mi nɔ ndaa wa o kala poŋ, nduyɛ ma wa a kɔl kɛndɛ. Te a kɛɛ pɛ sila Mɛlɛkaa dɔwɔɔ o wali niŋ o nɔ ndaa niŋ, a cho bahawɛilaŋ sɔla tau, nduyɛ a ve niŋ a kɔl kɛndɛ le.—Nuawɔ Sam 37:​3, 4.

² Mi che bɛɛ a wanaa chal sɛnɛi o nɔɔ niŋnda okɔɔ buŋgɛi hei cho suɛi ni, kɛ i cho yaasiaa simulta komal wanaa cho o nɔ laŋ niŋnda. I cho naa chɔm tamaseliila puaa a waŋlaanduaa laalaŋnda o Baabuiyo niŋ, nduyɛ miŋ che nyɛ naŋ pɛɛku leniŋndo. Tamaseliilaŋ o Baabuiyo niŋ la mala naa miŋ pɛɛku sɔɔŋ tau, ŋ naŋ duau o wali niŋ o nɛila bɔɔbɔɔ niŋndaŋ, mɛɛ o nɔɔ niŋ cho naa yɛ. Ŋ cho vɛlɛ chɔ sɔɔŋ yɔŋnaŋ wanaa cho o nɔ laŋ niŋ o palɛi nɛi niŋnda, vɛlɛ a nyɛ naŋ pɛɛku leniŋndo.

3-4. Simulta kuɛɛ komallɛ wanaa chal sɛnɛi o nɔɔ niŋnda?

³ Mi wanaa bɔɔbɔɔ dimul wanaa chal sɛnɛi o nɔɔ niŋnda le ma tosa sɔɔŋ mɛɛ wanaa cheleŋaa cho o nɔ laŋ niŋnda tosa yɛ.  Le tamaseliiyo, mi kalaŋ chuauwa a wanayaŋ kandu nda dimullo le ma keleŋa chuauwa violɔɔ. O faŋaŋ okoŋ kɔɔli, mi chaŋyaŋ ndaŋ kpɛɛluŋndoŋ a wanaa nda cho o yuŋgoo niŋnda dimul nda le ma sɔla chiɛi kɛndɛ kɛndɔɔ, nduyɛ ma pei nyɛm kɛndɛ kɛndɔŋ leniŋ.

⁴ Te a ve yekeŋ te, kɛɛsiaala nda tosalaŋ la cho nda nyindɔɔ ma bii kueelaŋ tau. Nduyɛ te a bii pɛ kueelaŋ, mɛɛ ma tosa wallo le hawɛila bɔɔbɔɔ malaŋ nda tiuba le laŋ solioo. Nduyɛ mi wali koŋ tosa a nɔ lɛ teleŋ le pɛɛkɔŋ ipilayaa, pɛɛku leyuŋgoo, a wali pollo le. Mi hei tosa ma bendu pɛŋ bɔŋaŋndaŋ kanifuule, a yeema ma chɔɔlu kanioŋ sɔla ɔɔ a yeema ma tosa a sabu a soli nda o wallo niŋ te. Fulamakɔɔlioo wa ni, a nɔla lɛ ma tosa tau o wali Chɛhowaa niŋ te.

5. Yɛɛ naŋ pɛɛku yɛ o tamasi Kilas nda Malisa wo niŋ?

⁵ Tamaseliila bɔɔbɔɔ chɔm maa, o cho nyɛm kiɔɔŋ nɔɔ tau o yoomoo niŋ te tosa miŋ wa a kɔl kɛndɛ le. Tofawɔ nyɛ pɔnɔɔ a lanɔ pilɛ, Kilas nda Malisa dimi a hei okɔɔ wo. * Mi nda ŋiɔɔŋ kpou kandu wallo tosaa lepaa o lepaa le halikpeŋ ma nɔ kanioŋ a nyɛm kiɔɔŋ tau. Kɛ o kpeekpei niŋ, a ve a kɔl hiniaa le. Mi Kilas dimi aa: “Miŋ sɔla nyɛm kɛŋ naŋ yeema woŋ tau, mbo hiau mɛɛ naŋ yeema muŋ yɛ. Kɛ naŋ nɔ kpeleŋ o Mɛlɛka piɛiyo niŋ te. Wana dimi isɔɔ a tonya, yoomu naa wa kpɔndi kpɔndi, nduyɛ bahawɛilaŋ la wa bɔɔ.” Naapum num bɛɛ che niŋ maa kɔllo handɔɔ o nyɛm kiɔɔŋ nuuviaa choo ke naa kɔl hiniaa le. Te o yɔŋ pɛ maa a nɔ kɔl hiniaa o yoomoo niŋ te, mɛɛ tambu kɔl te. Tamaseliila naŋ cho hunɔɔ yaasiaa laŋ, la cho num mala ma tosa siŋgaŋnda yeemaŋ ndaŋ. Le kandɔɔ, ŋ tofaŋndɔ nyɛ piaanduaa pɛɛku o tamasi Masaa Chɛhosiafati wo niŋndo.

6. Vɛɛ Masaa Chɛhosiafati dɔu yɛ sila cho o Pulɔwaa 3:​5, 6 niŋndo o wali niŋ, mɛɛ simul kala kalaa komal ndu?

⁶ Piaanduaa, baa mi la buulaŋ pa lepum tau le kalaŋnda nya nɔ laŋ? Te lende i cho ni, mɛɛ la tiuba mi la pɛɛku tau o tamasi Masaa Chɛhosiafati wo niŋ. Le mɛɛ o wa masaa yɛ, ndoo nɔ mi ndoo manda wanaa wa o lɛŋnde ndɔleŋ niŋnda kpou. Yɛɛ mala yɛ ndu mbo sɔla batiuwaa le kalaŋ lusulɛiyo hoo chuaa? Mbo tosa nyɛ ndoo tiuba wo le lɛŋnde ndɔleŋ mandaa. Mbo taŋgul fondaŋnda kala kalalaŋ o chiooŋ wa o Chuda niŋndoŋ, nduyɛ mbo chuuŋgiaa sovɛiyaa ndaa sina a sɔŋgɔɔ okɔɔ tau wa hiouwɔɔ 1,160,000. (2 Kolo. 17:​12-19) Mɛɛ teleŋ tiŋ hiou, mi simul kala kalaa komal Chɛhosiafati. Mi sovɛiya o lɛŋnde Amɔŋ ndeŋ niŋ, lɛŋnde Mowaabi leŋ, a puaa fula o lɛŋnde ŋpembuleŋ Siɛɛ niŋnda kɔŋgɔlaŋ ndu, yuŋgu ndɔɔ, a wanaa nduaa le nda hunɔɔ delɔɔ choo a sɔŋgɔɔ. (2 Kolo. 20:​1, 2) Yɛɛ ndoo tosa yɛ? Mbo nyuna Chɛhowa le mbo mala ndu a le ndu yoomuaŋ lueiyo. Hei chɛlaŋ a sila cho o Pulɔwaa 3:​5, 6 niŋndo. (Nuawɔ.) Piɛile Chɛhosiafati piɛi mi le wa o Koloniko Diiŋ Ndɔɔ 20:​5-12 niŋndo chɔm maa wana tusiaŋndo o wa ni. Nduyɛ mi piɛile ndɔleŋ le chɔm vɛlɛ  mɛɛ kpɛ ndoo nɔ tiindaŋndo o Finya ndɔ kaalaa cho o choo choo niŋndo yɛ. Vɛɛ Chɛhowa ndoo muli yɛ piɛile ndɔleŋ?

7. Vɛɛ Chɛhowa muli yɛ piɛile Chɛhosiafati leŋ?

⁷ Mi Chɛhowa suaa o Chɛhosiafati lo sanaa a Livainɔ pilɛ diolaŋ Chahasiɛɛ. Mi Chɛhowa dimul ndu aa: ‘La kɔ sim o fondaŋnda nyalaŋ kpɛ kpɛ a bɛɛndiaŋ le sɔŋgɔɔ. La sim yi, mi la che mɛɛ Mɛlɛka Yaawɛɛ o cho nda yomɔɔ, le nya yɛ.’ (2 Kolo. 20:​13-17) O kpeekpei niŋ, o cho nɛiyo hoo le waŋnda ndaa soliŋ kpeku le yaamɔɔwa chɔulabaa le. Kɛ o cho wana chiee le ndoo ke Chɛhosiafati nɛi chɔmaa koŋ te, Chɛhowa ndoo ke ndu nɛi chɔmaa koŋ ni. Nduyɛ le mɛɛ ndoo nɔ tiindaŋ kala kalaa o Mɛlɛka ndɔɔ niŋ yɛ, mbo tosa mɛɛ ndoo dimul ndu yɛ. Mɛɛ nda kuɛ o chɔu koŋ, o cho sovɛiyaa ndaa sina a sɔŋgɔɔ okɔɔ tau wa le o hivi lachi le, kɛ wanaa soliaa ŋchonduaa. Nduyɛ wanaa kaŋ ndaa nɔ pɛŋ nyɛm chɔu o laba le. Mi Chɛhowa peelu diomnde ndoo mel Chɛhosiafati leŋ. Mbo mala ndu le yaamɔɔwaa nduaa yomɔɔ.—2 Kolo. 20:​18-23.

8. Yɛɛ piaanduaa pɛɛku yɛ o tamasi Chɛhosiafati wo niŋ?

⁸ Piaanduaa, la tiuba mi la pɛɛku tau o tamasi Chɛhosiafati wo niŋ. La nɔ kalaŋndo le yuŋgula nyalaŋ nyɛm nda hauba woŋ kioo. Mi la tosa wallo kalaŋ le wanaa cho o yuŋgula nyalaŋ niŋnda mandaa. Te bahawɛilaŋ la komal nya pɛ, lepum mi la yiyaŋ maa la tiuba le laŋ solioo a ba nya. Kɛ la fafaŋ tiindaŋndo dɔwɔɔ o nyapila niŋ. La wa piɛileŋ o Chɛhowa lo le mbo mala nya. Le handɔɔ lechoo, la wa piɛileŋ teleŋ o teleŋ a laandaa nyaa latulu. La wa nɛi chɔmaa Chɛhowaa nuuviaa sanaa a Baabuiyo pɛɛkoo, vɛlɛ a yaula kɔɔna ndɔɔ cho naa kioo laŋ. Nduyɛ la tosa a sabu, mi la dɔu sila nya saaluŋ leniŋndo o wali niŋ. Lepum acheleŋnda chɛl niŋ kɛɛsiaa ŋ tosa mbo tualnuŋ o sila Baabuiyo choo wo le. Nduyɛ pɛŋ, ma dimul num maa diɔmndo ŋ cho ni. Naapum ma dimul num vɛlɛ maa kanioŋ a nyɛm kiɔɔŋ cho nyɛ sɔvɛ manda yuŋgu numndo wo ni. Kɛ loonuŋ a tamasi Chɛhosiafati wo okɔɔ. Mbo duau tiindaŋ ndɔɔ o Chɛhowa niŋ, nduyɛ mbo chɔm ndi sanaa a nyɛ o tosa wo. Le hei Chɛhowa mel ndu le, nduyɛ num bɛɛ o mel num niŋ te. (Sam 37:​28; Hibu. 13:​5) Yɛɛ cheleŋ wanaa cho o nɔ laŋ niŋnda nɔ yɛ ma tosa le ma wa a kɔl kɛndɛ?

9. Yɛɛ naŋ dimi yɛ a Aisaya wana ndoo suaa le Mɛlɛka wo nda laa ndɔ okɔɔ?

⁹ Mi Aisaya wana ndoo suaa le Mɛlɛka wo nda laa ndɔ, handu kɔlta ndalaŋ kpou o Chɛhowa piɛiyo choo. Wana ndoo suaa le Mɛlɛka wo Aisaya wa ni. Nduyɛ wana che pɛ maa laa ndɔ bɛɛ wana ndoo suaa le Mɛlɛka wo o wa ni. (Aisaya 8:​1-4) I cho tonya maa mi pɔnɔɔ a lanɔɔ hoo handu kɔlta ndalaŋ o Chɛhowa piɛiyo choo. Nuawɔ se tamasi kɛndɛ bɛndu nda kɛsul wanaa cho o nɔ laŋ niŋnda!

10. Vɛɛ huuluŋ cho o Baabuiyo niŋndoŋ pɛɛkoo mala yɛ wanaa cho o nɔ laŋ niŋnda le ma kɛɛsiaŋ o kɔl le tosaa tau o wali Chɛhowaa niŋ?

¹⁰ Wanaa cho o nɔ laŋ niŋnda bɛɛ tiuba ma handu kɔlta ndalaŋ kpou o Chɛhowa piɛiyo choo, te a tosa pɛ o nda tiuba wo o wali ndɔɔ niŋ. A tiuba ma kindi laalaŋ nda nɔ o Chɛhowa niŋndo sanaa a huuluŋ cho o Baabuiyo niŋndoŋ pɛɛkoo diompilɛ, nduyɛ ma che mɛɛ ŋ cho peelɔŋndo yɛ. * (Tai. 1:​2) A tiuba ma yiyaŋ a nyɛ nda nɔ ma tosa le malaa mi huului Baabuiye peeluŋndo okɔɔ. Le tamaseliiyo, a tiuba ma tosa tau le ma mala mi huului Chiisu dimi maa yooŋgu kɛndɔɔ cho dimiŋ ba o ba fee o chieeŋndo choo wo peeluŋ. (Maa.  24:​14) Te wanaa cho o nɔ laŋ niŋnda laalaŋ pɛ kɛsi maa huuluŋ cho o Baabuiyo niŋndoŋ cho peelɔŋndo, keŋ mala nda ma kɛɛsiaŋ o kɔl le tosaa tau o wali Chɛhowaa niŋ.

11. Yɛɛ Pilisila nda Akuila ndaa tiu yɛ ba le tosaa, nduyɛ le yɛɛ?

¹¹ Wanaa chal sɛnɛi o nɔɔ niŋnda nɔla ma pɛɛku tau Pilisila nda Akuila o ba. Chuuwa pɔnɔɔ a lanɔɔ hoo wa ni, nduyɛ o Luom niŋ nda wa ichali ni. Mɛɛ pɔnɔɔ a lanɔɔ hoo tuei yooŋgu kɛndɔɔ a Chiisu okɔɔ, ma chɛl ndu, nduyɛ ma simnuŋ Kilisiɔŋnda. I cho kpendekele maa ndaa nɔ kɔl hiniaa o yoomu ndaa niŋ. Kɛ mi sɔɔŋ siŋgaŋ o yoomu ndaa niŋ, mɛɛ Masaa Kulɔdiɔɔ dimul Chuuwa kpou le ma mal Luom. Yiyaŋndɔ mɛɛ hei ndii piiliaŋ pɔnɔɔ a lanɔɔ hoo yɛ. Ndaa nɔ ma mal fondaŋ ndaa sina wo ma kɔ kila vɛlɛ yuŋguleŋ naa cheleŋ, nduyɛ ma kandu yulaleŋ tosaa o fondaŋ sɛnɛi koŋ. Baa mi siŋgaŋndo hoo tosa pa ma kɛɛ le Masale Mɛlɛkaleŋ kɛsioo nyɛ tasoo o yoomula ndalaŋ niŋ? Kɛlɛŋgaa a sina mulioo le nyunaa hoo. Mɛɛ nda fuuluu Kɔliŋ, ma kandu kunda wa loŋ ndo malaa tau. Mi ndaa tosa wallo a Pɔɔl latulu le puaapiliaa yoomuaŋ lueiyo. Mɛɛ teleŋ tiŋ hiou, ma kua malaa o chieeŋ cheleŋ muŋ nɔ yeemɛi le wanaa dimiaa yooŋgu kɛndiaa wa. (Walta. 18:​18-21; Luomaŋ. 16:​3-5) Yiyaŋndɔ mɛɛ kpɛ nda wa a nyaale o wallo hoo tosaa niŋ yɛ!

12. Le yɛɛ wanaa cho o nɔ laŋ niŋnda nɔ yɛ ma kɛsi kpeleŋndaŋ o Mɛlɛka piɛiyo niŋ?

¹² Wanaa cho o nɔ laŋ niŋnda tiuba ma tol tamasi Pilisila nda Akuila wo kɔɔli, te a kɛsi pɛ Masale Mɛlɛkaleŋ nyɛ tase o yoomula ndalaŋ niŋ. Teleŋ sɔvɛ nda nɔ ma suukaŋ a hei okɔɔ wo cho teleŋ nda wa nuaŋnaŋndo wo ni. Te pɔnɔɔ a lanɔɔ kɛsi pɛ kpeleŋndaŋ o Mɛlɛka piɛiyo niŋ, nduyɛ ma kindiŋ le laŋ komallo, mi keŋ mala nda ma che mɛɛ Chɛhowa cho nda malaa o yoomula ndalaŋ niŋ yɛ. (Ikili. 4:​9, 12) Ŋ tofaŋndɔ suɛi yɔŋnaŋii Lɔsɛl nda Elisabɛɛ ve. Mi Lɔsɛl dimi aa: “Teleŋ naŋ wa nuaŋnaŋndo wo, miŋ suukaŋ a kpeleŋnda naalaŋ o Mɛlɛka piɛiyo niŋ okɔɔ.” Mi Elisabɛɛ dimi aa: “Miŋ suukaŋ a hei okɔɔ kanifuule, i wa naa mala kɛɛsiaala naŋ wa tosa o chilaŋ niŋndaŋ  la ve naa kuuna kpeleŋnda naalaŋ komallo le.” Mi Ŋgɔɔ Lɔsɛl nda Elisabɛɛ kua malaa naa yeemɛi le wanaa dimiaa yooŋgu kɛndiaa cho tau o lɛŋnde Makoloniisiaaleŋ niŋnda.

13. A mɛɛ Sam 28:​7 dimi yɛ, yɛɛ wa yɛ fulamakɔɔlioo te ŋ dɔu pɛ tiindaŋndo o Chɛhowa niŋ?

¹³ Maa Lɔsɛl nda Elisabɛɛ, mi wanaa cho o nɔ laŋ niŋnda a bɔɔbɔɔ kɛɛsiaa le yoomula ndalaŋ tosaa tɛtɛlɛ, le halikpeŋ ma tosa tau o yooŋgu kɛndɔɔ dimioo niŋ a waŋnda pɛɛkoo. Te pɔnɔɔ a lanɔɔ kɛsi pɛ kpeleŋnda sɔvɛlaŋ o Chɛhowa piɛiyo niŋ nduyɛ ma tosa wallo kalaŋ le laŋ komallo, ma sɔla fulamakɔɔli kɛndɔɔ tau. A cho chɔ mɛɛ Chɛhowa buulaŋ a nda yɛ. Tiindaŋ ndaa cho kalu poŋ, nduyɛ a cho nɔ kɔl kɛndɛ kpeekpeiyo.—Nuawɔ Sam 28:​7.

14. Vɛɛ kiilanɔɔ Pitɛ nda laa ndɔ chɔm yɛ maa ndaa nɔ tiindaŋndo o diomnde mɛyaale cho o Maatiu 6:​25, 31-34 niŋndo?

¹⁴ Wanaa cho o nɔ laŋ niŋnda tiuba ma pɛɛku tau o tamasi kiilanɔɔ Pitɛ nda laa ndɔ wo niŋ. Mɛɛ Pitɛ chiikaŋ a Chiisu, ndoo nɔ mbo tosa kɛɛsiaa sɔvɛ sɔviɔɔ. Kɛ o chua fɛŋ paŋgoŋ ŋɔmpum malaŋ o tosa kɛɛsiaa koŋ. Wana yɔɔyaa Pitɛ wa ni, nduyɛ wallo hoo ndoo tosa ni le yuŋgu ndɔɔ nyɛm ndaa hauba woŋ kioo. Le hei, mɛɛ Chiisu dimul ndu le mbo tol ndu kɔɔli, ndoo nɔ mbo yiyaŋ fɛŋ nyɛkɛndɛi a laa ndɔ okɔɔ malaŋ ndoo tosa kɛɛsiaa. (Luku 5:​1-11) Mi Pitɛ tosa kɛɛsiaa le mbo tol Chiisu kɔɔli. Nduyɛ kɛɛsiaa sɔviɔɔ o tosa koŋ ni! Ŋ nɔ sabula kɛndɛlaŋ tau la chɔm maa mi laa ndɔ toolu kɛɛsiaa koŋ ndo. Baabuiyo chɔm maa mɛɛ Chiisu sɔla fulasɛiniŋndo, mi Pitɛ nda laa ndɔ ndaa kuɛ o fondaŋnda bɔɔbɔɔ. Nduyɛ ma tosa hei le teleŋ tiŋ. (1 Kɔliŋ. 9:​5) I cho tonya maa, taamasi kɛndɛ kɛndɛ laa ndɔ kɛsi wo mala ndu ni mbo wa fɛɛsɛŋ le piaanduaa a laanduaa Kilisiɔŋnda silaa kioo. (1 Pitɛ 3:​1-7) Pitɛ nda laa ndɔ ndaa nɔ tiindaŋndo o Chɛhowa niŋ maa o cho diomnde o mɛi leŋ peelu, te a kɛsi pɛ Masale ndɔleŋ nyɛ tase o yoomula ndalaŋ niŋ.—Nuawɔ Maatiu 6:​25, 31-34.

15. Yɛɛ naŋ pɛɛku yɛ o suɛi yɔŋnaŋii Tiako nda Ɛsita ve niŋ?

¹⁵ Te la chua niŋ pɛ wɔsilaŋ latiŋ o nɔ nya niŋ, vɛɛ nya hiau yɛ lachi a yeemɛi nɔɔ le tosaa tau o wali dimiaa yooŋgu kɛndɔɔ niŋ? Nɛiyo opilɛ cho pɛɛkoo o sɔɔŋ yɔŋnaŋ wanaa cheleŋ cho o nɔ laŋ niŋnda ni. A tiuba ma saaluŋ sɔɔŋ yɔŋnaŋndoŋ muŋ o yaula naalaŋ niŋ. Mɛɛ Tiako nda laa ndɔ Ɛsita veelu diomndaŋ a sɔɔŋ yɔŋnaŋndoŋ muŋ okɔɔ, miŋ mala nda tau. O lɛŋnde Bilasilleŋ niŋ pɔnɔɔ a lanɔɔ hoo fula ni. Nduyɛ ndaa nɔ yeemɛi tau le kɔlaŋ malaa naa yeemɛi cho tau wa. Mi Tiako dimi aa: “Mɛɛ naŋ veelu diomndaŋ a sɔɔŋ yɔŋnaŋndo muŋ okɔɔ, nduyɛ miŋ cha mɛɛ Chɛhowa mala buɛiyaa nduaa yɛ, mi keŋ tosa miŋ nɔ yeemɛi le sila Chɛhowaa dɔwɔɔ o wali niŋ, nduyɛ miŋ che mɛɛ o mala buɛiyaa nduaa yɛ.” Okoŋ kɔɔli, mi pɔnɔɔ a lanɔɔ hoo kua o lɛŋnde Palakualeŋ niŋ. Nduyɛ a cho niŋ o tanda nda dimi Potokisiiye ve niŋ chɔŋ a wɔsi 2014. Mi Ɛsita dimi aa: “Bolle Baabuile naŋ kaala tau leŋ le cho Ɛfisiaŋnda 3:​20 ni. Nduyɛ teleŋ o teleŋ, miŋ che diomnda dimiŋ o bolle Baabuileŋ ndeŋ niŋndaŋ peelɔŋndo o wali naŋ cho tosaa le Chɛhowa wo niŋ.” O yau Ɛfisiaŋnda niŋ, mi Pɔɔl dimi maa mi Chɛhowa ke naa nyɛm naŋ hauba woŋ mbo hiou mɛɛ naŋ nyuna ndu yɛ. Nduyɛ ŋ che niŋ diomnde mɛyaale Chɛhowaleŋ ndeŋ peelɔŋndo teleŋnda bɔɔbɔɔ!

16. Nɛɛ waa wanaa chal sɛnɛi o nɔɔ niŋnda nɔ yɛ ma nyuna le malaa, te a wa pɛ yiyaŋndo a mɛɛ nda looku ma komal kpeleŋnda ndalaŋ yɛ okɔɔ?

¹⁶ Wanaa chal sɛnɛi o nɔɔ niŋnda tiuba ma sɔla tɔnɔɔ tau o sɔɔŋ yɔŋnaŋ wanaa cheleŋaa dɔu tiindaŋndo o Chɛhowa niŋnda niŋ. Wanaa  cho o nɔ laŋ niŋnda apum tosa niŋ kɔɔfaleŋ le wɔsiŋ bɔɔbɔɔ. Te la wa pɛ yiyaŋndo a mɛɛ nya komal kpeleŋnda nyalaŋ yɛ okɔɔ, la nyuna nda le ma mala nya. Nɛi cheleŋ cho vɛlɛ hoo ni o ŋ chɔm maa a nɔ tiindaŋndo o Chɛhowa niŋndo. (Pulɔ. 22:​17, 19) Bɛnduaa kundaa bɛɛ tiuba ma mala wanaa chal sɛnɛi o nɔɔ niŋnda le ma kɛsi kpeleŋndaŋ o Mɛlɛka piɛiyo niŋ nduyɛ ma komal taŋ.

17. Yɛɛ yɔŋnuŋ yɛ Kilas nda Malisa, nduyɛ yɛɛ naŋ pɛɛku yɛ o suɛi ndɛi yɔŋnaŋnde niŋ?

¹⁷ Lepum miŋ tosa kɛɛsiaa le tosaa tau o wali Chɛhowaa niŋ o nɛiyo opum choo, kɛ mi Chɛhowa soliŋ naa kpeku o nɛi cheleŋ choo. Yiyaŋndɔ a tamasi Kilas nda Malisa naŋ soo suŋ okɔɔ wo. Mɛɛ nda chua wɔsilaŋ la yaa o nɔ ndaa niŋ, ma mal fondaŋ ndaa, okoŋ ma yɔŋguŋ le wali taŋgulaa tosaa o lɛuve Fiŋlaŋ. Kɛ mɛɛ nda kuɛ, ma dimul nda maa a ve niŋ loŋ le paŋguŋ ŋɔmpum te. Ma tambu kɔl tau o tasela ndɔ. Kɛ mɛɛ teleŋ biŋgi hiou, ma dimul nda le ma kuɛ o sukuu nda pɛɛku Alabikiiye wo. Nduyɛ suŋ suŋ niŋ, a cho a kɔl kɛndɛ le yooŋgu kɛndɔɔ dimioo o lɛŋnde cheleŋ niŋ, o tanda nda dimi Alabikiiye wo niŋ. Mɛɛ Malisa yiyaŋ a nyɛ yɔŋnuŋndo okɔɔ, mbo dimi aa: “Siooŋnde wa ya tau le nyɛ ya tosa wɔ paandu le wo tosaa. Nduyɛ yaa nɔ mi dɔu tiindaŋndo o Chɛhowa niŋ. Kɛ I che niŋ mɛɛ Chɛhowa mala naa teleŋ o teleŋ o nɛila naŋ ve bɛɛ kɔl te laŋ niŋ yɛ. Hei mala ya niŋ mi tiindaŋ ya nɔ o ndu niŋndo chɔɔlu kalu poŋ.” A mɛɛ tamasi ndaa hoo chɔm yɛ, ŋ nɔ miŋ laalaŋ kɛsɛ maa mi Chɛhowa fanda naa teleŋ o teleŋ, te ŋ dɔu pɛ tiindaŋ kala kalaa o ndu niŋ.

18. Yɛɛ wanaa cho o nɔ laŋ niŋnda nɔ yɛ ma tosa le ma chɔm maa a dɔu tiindaŋndo o Chɛhowa niŋ?

¹⁸ Ke fula Chɛhowa o ba wo nɔɔ cho ni. (Maa. 19:​5, 6) Nduyɛ o yeema mi wanaa cho o nɔ laŋ niŋnda tuei ndu yeela. (Pulɔ. 5:​18) Wanaa laŋga chal o nɔlaŋ niŋnda, la yiyaŋ yiŋgoloŋ a mɛɛ nya cho yoomu nyaa biyɔɔ yɛ okɔɔ. Baa la cho pa tosaa o nya tiuba wo le Chɛhowa chɔmndo kɛsɛ maa la nɔ balika melaa le nyɛm kɛndɛŋ o cho nya kioo woŋ? La soo o Chɛhowa lo o piɛileŋ niŋ. La wa yaasiaa tosaa o Diom ndɔɔ niŋ, le halikpeŋ mi la che sawala mandaala nya nɔ mi la dɔu o wali niŋndaŋ. La tol nɛila chɔmaala Chɛhowa cho nya kioo laŋ kɔɔli. Te la kɛsi pɛ Chɛhowa piɛiyo nyɛ tasoo o yoomula nyalaŋ niŋ, keŋ cho tosa mi la wa a kɔl kɛndɛ nduyɛ mi la sɔla batiuwaa!