1-2. (a) Nyunala kuɛɛ naŋ cho yɛ muli o buŋgɛi hei niŋ? (b) Yɛɛ chɔm yɛ maa Chɛhowa nɔ yeemɛi tau le naa malaa?

 CHƐHOWA tiuba mbo mala naa miŋ biunuŋ sɔɔŋ kindilaŋ komal naa woŋ, nduyɛ miŋ wa a kɔl kɛndɛ o ndu piɛiyo niŋ. Sɔɔŋ kuɛɛ o tosa yɛ le naa malaa? Nduyɛ, vɛɛ naŋ sɔla yɛ tɔnɔɔ tau o mala Chɛhowa ke naa wo niŋ? Ŋ cho mulilaŋ sɔla le nyunalaŋ ndaŋ o buŋgɛi hei niŋ. Tuupa miŋ muli nyunalaŋ ndaŋ, ŋ muliŋ ndɔ fɛŋ nyunaa hoo. Baa Chɛhowa cho pa o bɛɛndiaŋ lekɛndɛi le naa malaa?

² Mɛɛ kiilanɔɔ Pɔɔl wa Hibuluiya yauwo poonyiallo, diom o soliŋ kpeku wo tiuba mbo mala naa le miŋ sɔla mulioo le nyunaa hoo. Mbo poonyiaa aa: “Chɛhowa mala ya ni. Lelaŋ siooŋii bii ya le. Yɛɛ wanachioo nɔla yɛ mbo tosal la?” (Hibu. 13:​6) Yaula tɛɛsiaa Baabuiyo laŋ opilɛ dimi maa, diomndaŋ ndaŋ “mala ya ni” o bolle Baabuileŋ ndeŋ niŋ, sim le wana keleŋa wana wa o bahawɛiyo niŋndo malaa wo. Yiyaŋndɔ a mɛɛ Chɛhowa keleŋa sɔɔŋguu le wana wa o bahawɛiyo niŋndo mala yɛ. Hei chɔm kpendekele maa o nɔ yeemɛi tau le naa malaa. Sanaa a mala ndɔɔ, ŋ tiuba miŋ biunuŋ tɔɔndaŋnda komal naalaŋ a kɔl kɛndɛ.

3. Ɔɔ sɔɔŋ ŋgaa Chɛhowa tosa le naa malaa miŋ biunuŋ tɔɔndaŋ ndaŋ a kɔl kɛndɛ wo?

³ Ɔɔ sɔɔŋ ŋ tiŋ ŋ Chɛhowa tosa le naa malaa miŋ biunuŋ tɔɔndaŋ ndaŋ a kɔl kɛndɛ wo? Le nyuna koŋ mulioo, ŋ yaasiaŋndɔ yau Aisaya wo. Le yɛɛ naŋ cho yɛ yau koŋ yaasiaa? Kanifuule, sɔɔŋ bɔɔbɔɔ Aisaya poonyiaa o yau ndɔɔ niŋndoŋ piiliaŋ vɛlɛ hau wanaa Mɛlɛkaa. O faŋaŋ okoŋ kɔɔli, diomnda Aisaya ndoo soliŋ kpeku teleŋ o teleŋ le tɛɛsiaa wana suu Chɛhowa cho wo  laŋ, la kindu bila biyɔɔ le. Bolle 30 leŋ o yau Aisaya wo niŋ, nɔ tamaseliilaŋ a hei okɔɔ. O yauwo hoo niŋ, mbo soliŋ tamaseliila tɛtɛlɛlaŋ kpeku. Nduyɛ mbo chɔm mɛɛ Chɛhowa cho hau wanaa nduaa malaa sanaa a (1) nilaŋ yaŋɔɔ yekeŋ o piɛile naaleŋ a leŋ mulioo yɛ, (2) nɛi chɔmaa naa kioo, nduyɛ (3) salaa naa dɔwɔɔ suŋ suŋ vɛlɛ a o chilaŋ niŋ. Ŋ yaasiaŋndɔ sɔɔŋ yaa woŋ muŋ ŋ pilɛŋ pilɛŋ.

4. (a) Vɛɛ Chɛhowa tɛɛsiaa yɛ mɛɛ Chuuwa wa o palɛi Aisaya ve niŋ yɛ, nduyɛ yɛɛ o chɛllɛ mbo yɔŋnuŋ nda? (b) Tiindaŋ yɛɛ Chɛhowa ndoo ke yɛ Chuuwaa wa ndu piɛiyo o laalaŋndo choo wa? (Aisaya 30:​18, 19)

⁴ O Aisaya bolle 30 kandɔŋndo, mi Chɛhowa tɛɛsiaa maa ‘chuauwaa simul ndu wa’ Chuuwa wa ni. Nduyɛ maa, ‘yɔŋnda wɔɔŋndaŋ dɔwɔɔ tuŋ nda wa laŋ lechoo ni.’ Mbo chɔɔlu dimi aa: “Waŋnda haa, wanaa simul la wa nda cho ni. . . . Wanaa kɛɛ le nilaŋ yaŋɔɔ o nyɛ ya Mɛlɛka Yaawɛɛ dimul nda wo nda cho ni.” (Aisaya 30:​1, 9) Le mɛɛ waŋnda haa ndaa kɛɛ Chɛhowa nilaŋ yaŋɔɔ yɛ, mi Aisaya dimi a nda okɔɔ maa, Chɛhowa cho tosa ma kuɛ a nda o chɛleŋ niŋ. (Aisaya 30:​5, 17; Chɛlui. 25:​8-11) Nduyɛ a tonya, ma kua a nda o chɛleŋ niŋ Babilɔŋ. Kɛ wanaa wa Chɛhowa piɛiyo o laalaŋndo choo wa, wa nda tɛɛŋ. Nduyɛ Aisaya ndoo nɔ yooŋgu tiuba mbo ke nda tiindaŋndo wo. Mbo dimul nda maa paale wa niŋ, mi Chɛhowa miŋgi nda Chulusalɛm pila. (Nuawɔ Aisaya 30:​18, 19.) Lende kpeekpei i yɔŋnuŋ ni. Mi Chɛhowa soli nda o chɛleŋ niŋ. Kɛ wɔsiŋ bɔɔbɔɔ hiou fɛŋ tuupa mi Chɛhowa soli nda o chɛleŋ niŋ. Dimioo hoo ‘Chɛhowa cho chumndo le mbo tuiinuŋ nya inyiɛɛ,’ chɔm maa teleŋndo wa fɛŋ hiouwɔɔ tau malaŋ Chuuwaa wa Chɛhowa piɛiyo o laalaŋndo choo wa ndaa miiŋgu o lɛŋnde ndaleŋ niŋ. Nduyɛ pɛŋ, wɔsilaŋ 70 hiou fɛŋ, malaŋ nda chɛl Isɔluɛiya apum le ma miiŋgu Chulusalɛm. (Aisaya 10:​21; Chɛlui. 29:​10) Teleŋ nda wa o chɛleŋ niŋ Babilɔŋndo, a wa a kɔlta tambɛilaŋ. Kɛ mɛɛ nda miiŋgu o lɛŋnde ndaleŋ niŋ, ma duaunuŋ nyaale tau.

5. Tiindaŋ yɛɛ Aisaya 30:​19 ke yɛ naa?

⁵ Hau, ŋ tiuba miŋ sɔla kɔl dɛɛniaa o diomnda Aisaya poonyiaa laŋ ndaŋ niŋ. Mbo poonyiaa aa: “Te la koŋul . . . naa Mɛlɛka Yaawɛɛ chua le nya malaa pɛ, o cho chaŋ nyaa tueiyɔɔ mbo tuiinuŋ nya inyiɛɛ.” (Aisaya 30:​19) Mi Aisaya ke naa tiindaŋndo maa, mi Chɛhowa yaŋ nilaŋ yekeŋ te ŋ piɛi pɛ o ndu lo, nduyɛ mbo keleŋa piɛile naaleŋ muli. Mbo chɔɔlu poonyiaa aa: “Dimioo nuaa mbo tuei chaŋ nyaa, o cho nya diom muli.” Diomndaŋ ndaŋ la dɛɛniaa naa kɔllo maa Chɛhowa nɔ yeemɛi, nduyɛ o cho o bɛɛndiaŋ le wanaa nyuna ndu wa malaa. Hei sinaa mala naa miŋ biunuŋ sɔɔŋ kindilaŋ komal naa woŋ a kɔl kɛndɛ.

6. Vɛɛ diomnda Aisaya poonyiaa laŋ la chɔm yɛ maa, mi Chɛhowa yaŋ naa a pilɛŋ pilɛŋnda nilaŋ te ŋ piɛi pɛ o ndu lo?

⁶ Yɛɛ cheleŋ naŋ pɛɛku yɛ o Aisaya 30:​19 niŋ, te o hiŋ pɛ a piɛile naaleŋ okɔɔ? Ŋ pɛɛku maa, mi Chɛhowa yaŋ naa a pilɛŋ pilɛŋnda nilaŋ te ŋ wa pɛ piɛileŋ o ndu lo. Le yɛɛ naŋ dimi yɛ lende? Kanifuule o Aisaya bolle 30 kandɔŋndo, diomnda Aisaya soliŋ kpeku laŋ la chɔm maa, o cho o wana pilɛ lo le Chɛhowa wa suɛi le. Kɛ o sɔɔŋ 19 niŋ, mi che bɛɛ diomnda o soliŋ kpeku laŋ la sim le waŋnda kunda, kɛ o wanaa nduaa a pilɛŋ pilɛŋnda lo o wa suɛi ni. Le tamaseliiyo, mbo poonyiaa aa: ‘Chaŋ numndo o chuu, o cho chaŋ numndo tueiyɔɔ mbo tuiinuŋ num inyiɛɛ. O cho num diom muli.’ Finya kaala naa wo Chɛhowa cho ni. Lelaŋ, pesiŋ bɛɛ o dimul buɛi ndɔ cho a kɔl tambɛiyo wo aa: “Vɛ a bii kɔllo maa chaanda le?” Kɛ, o buulaŋ tau a naa a pilɛŋ pilɛŋnda okɔɔ. Nduyɛ, mbo yaŋ nilaŋ yekeŋ o piɛile naaleŋ.—Sam 116:​1; Aisaya 57:​15.

7. Vɛɛ Aisaya nda Chiisu chɔm yɛ mɛɛ i cho suɛi sɔvɛ le miŋ lambaŋ piɛileŋ yɛ?

 ⁷ Te ŋ chɔm pɛ Chɛhowa sɔɔŋ kindilaŋ cho naa choo woŋ o piɛileŋ niŋ, naapum mbo keleŋa nyɛ tosa le naa yoomuaŋ lueiyo miŋ biunuŋ. Nduyɛ te o yɔŋ pɛ mi sɔɔŋ kindilaŋ muŋ keleŋa faŋaŋ mɛɛ naŋ wa kɔllɛ le, ŋ nɔ miŋ hiou lachi a Chɛhowa nyunaa, le mbo luei naa yoomuaŋ miŋ biunuŋ. Lende kpeekpei o dimul naa ni le miŋ tosa. Lelaŋ pɛŋ Aisaya poonyiaa ni aa: “La mei le, la hiou lachi a ndu piɛiyo.” (Aisaya 62:​7) Yɛɛ hei sim yɛ? I sim maa, ŋ nɔ miŋ hiou lachi a Chɛhowa piɛiyo teleŋ o teleŋ. Ŋ nɔ kposoŋ miŋ pɛŋgi le. Diomnda Aisaya dimilaŋ ndaŋ la loonuŋ naa a tale Chiisu dimi mbo wo o Luku 11:​8-10, 13 niŋndo. O bolle Baabuileŋ ndeŋ niŋ, mi Chiisu dɛɛniaa naa le miŋ “lambaŋ nyunaa” le nyina diandaa Mɛlɛkaa. Ŋ nɔ vɛlɛ miŋ nyuna Chɛhowa le mbo ke naa nɛi chɔmaa, le halikpeŋ miŋ tosa kɛɛsiaala kɛndɛlaŋ.

8. Vɛɛ diomnda cho o Aisaya 30:​20, 21 niŋndaŋ la peeluŋ yɛ o sindɔɔ niŋ?

⁸ Nuawɔ Aisaya 30:​20, 21. Mɛɛ sovɛiyaa Babiloniaŋnda balu Chulusalɛm le wɔsioo opilɛ a tɛndaa tɛɛŋ, mi nyɛpalaa komal wanaa wa Chulusalɛm nda tau. Nduyɛ mɛɛ nyɛpalaa koŋ hiu nda viouwɔɔ choo tei, ma yɔŋnuŋ tindiŋ, a ve lɛ ndu sinaŋ te. Kɛ a mɛɛ sɔɔŋ 20 a 21 dimi yɛ, mi Chɛhowa chuel Chuuwa buŋgɛi maa, te a mal pɛ yɔŋnda wɔɔŋndo nduyɛ ma siŋga kaala ndalaŋ, o cho nda piŋi. Mi Aisaya dimi maa Chɛhowa cho Wana Pɛɛkaa Bɛndoo ni le wanaa nduaa. Nduyɛ maa o cho nda pɛɛku mɛɛ nda nɔ ma piɛi ndu yɛ. Mi Chɛhowa peelu diomndaŋ ndaŋ, mɛɛ o soli Chuuwa o chɛleŋ niŋ. Mbo chɔm maa ndu cho “Wana Pɛɛkaa Bɛndoo” ni. Nduyɛ sanaa a nɛi ndɔ chɔmaa, mi wanaa nduaa miŋgi piɛile tonyaleŋ pila Chulusalɛm. Ŋ cho bɔɔ a kɔl kɛndɛ le mɛɛ Chɛhowa cho Wana Naa Pɛɛkaa Bɛndoo yɛ.

9. Ɔɔ nɛiyo opilɛ o Chɛhowa cho soliŋndo kpeku le naa nɛi chɔmaa kioo wo?

⁹ O tamaselii Aisaya soliŋ kpeku wo niŋ, mbo hiau lachi a tɛɛsiaa maa, naŋ cho sukuuwa ni, mi Chɛhowa wa naa pɛɛkoo o nɛilaŋ latiɔɔŋ choo. O tasoo, mbo dimi aa: “La cho [Wana Nya Pɛɛkaa Bɛndoo] chɔ a hɔlta nyalaŋ pɛŋ.” O tamaseliiyo hoo niŋ, i cho ko mɛɛ wana pɛɛkaa wa nuaa sukuuwa isisi lachi le nda pɛɛkoo yɛ. Nduyɛ, ŋ cho bɔɔ a kɔl kɛndɛ le mɛɛ naŋ cho pɛɛkoo sɔlaa o nɛi waa nuaa choo yɛ. Vɛɛ Chɛhowa pɛɛku yɛ naa? Mbo tosa hei sanaa a kɔɔna ndɔɔ. Ŋ nɔ bɔɔ balika melaa le mɛɛ naŋ cho nɛila chɔmaalaŋ sɔlaa sanaa a kɔɔna ndɔɔ yɛ. Nɛila chɔmaala naŋ sɔla o bɔŋaŋnda naalaŋ, bɔŋaŋnda bɛŋndaŋ, yaula naalaŋ, Tɛlivisiɔŋ Seiyaa Chɛhowaa, a o nɛila  cheleŋ niŋndo mala naa, miŋ biunuŋ sɔɔŋ kindilaŋ komal naa woŋ a kɔl kɛndɛ.

10. O nɛi kuɛɛ choo naŋ tuɛinuŋ yɛ Diom Mɛlɛkaa naa amakɔɔ?

¹⁰ Mi Aisaya chɔm vɛlɛ nɛi diiŋ ndɔ Chɛhowa soliŋ kpeku le naa pɛɛkoo wo. Mbo dimi aa: “La tuɛinuŋ [niŋ] diomndo a makɔɔ.” Mi Aisaya tuu Chɛhowa a wana pɛɛkaa wa kɔlaŋ sukuuwaa nduaa kɔɔli, mbo wa nda nilaŋ yaŋɔɔ yekeŋ nduyɛ mbo wa nda nɛi chɔmaa kioo wo. Naa bɛɛ, miŋ tuei hau diom Mɛlɛkaa naa kɔɔli. O nɛi kuɛɛ choo? O chua niŋ wɔsilaŋ o waalaŋ niŋ chɔŋ a teleŋ Chɛhowa dimul waŋnda, le ma poonyiaa diomnda ndɔlaŋ o Diom ndɔɔ niŋndo. Lelaŋ te ŋ wa pɛ diomndaŋ veeloo o Baabuiyo niŋ, i wa ko maa diom Mɛlɛkaa naŋ wa koŋ tuɛinɔŋndo naa amakɔɔ ni.—Aisaya 51:​4.

11. Le miŋ biunuŋ sɔɔŋ kindilaŋ komal naa woŋ a kɔl kɛndɛ, sɔɔŋ muuŋ kuɛɛ naŋ nɔ yɛ miŋ tosa, nduyɛ le yɛɛ?

¹¹ Vɛɛ naŋ sɔla yɛ tɔnɔɔ tau o nɛi chɔmaa Chɛhowa cho naa kioo sanaa a kɔɔna ndɔɔ vɛlɛ a o Diom ndɔɔ niŋndo? Mi Aisaya chɔm naa nɛilaŋ latiɔɔŋ, la naŋ tiuba miŋ tosa heiyo. O tasoo, mbo dimi aa, “nɛiyo cho hoo ni.” O diiŋ ndɔɔ, mbo dimi aa, “la kɔ lechoo.” (Aisaya 30:​21) I cho ko letuu le “nɛi” Aisaya soo hoo a ndu okɔɔ wo sinaa le. Kɛ ŋ nɔ vɛlɛ miŋ ‘kuɛ lechoo.’ Sanaa a Diom Chɛhowaa, mi kɔɔna ndɔɔ tɛɛsial naa nyɛ o yeema naa miŋ tosa wo. Nduyɛ miŋ che vɛlɛ mɛɛ naŋ duau nyɛ naŋ pɛɛku wo o wali niŋ yɛ. Le miŋ biunuŋ sɔɔŋ komal naa o Chɛhowa piɛiyo niŋndoŋ a kɔl kɛndɛ, ŋ nɔ miŋ tosa sɔɔŋ ŋmuuŋ ŋ Aisaya soo a muŋ okɔɔ wo. Te ŋ pɛɛku pɛ nyɛ Chɛhowa yeema naa miŋ tosa wo, nduyɛ miŋ dɔu ndu o wali niŋ, mɛɛ ŋ nɔ miŋ nɔ tiindaŋndo maa Chɛhowa cho naa dɔwɔɔ sala.

12. A mɛɛ Aisaya 30:​23-26 dimi yɛ, o nɛi kuɛɛ choo Chɛhowa ndoo dɔu yɛ Chuuwa sala?

¹² Nuawɔ Aisaya 30:​23-26. Vɛɛ huului dimiŋ o bolle Baabuileŋ niŋndo peeluŋ yɛ mɛɛ Chuuwa fula o chɛleŋ niŋ Babilɔŋ ma miiŋgu o lɛŋnde Isɔluɛileŋ niŋ? Mi Chɛhowa duau nda sala tau. Mbo ke nda nyɛm mala nda ma wa yoomu, nduyɛ ma hiou lachi a ndu piɛiyo woŋ. Mbo duau wanaa nduaa sala sanaa a nda nyɛdiaa kioo tau. I hiou kpou ve, mbo ke nda nyɛm ndaa hauba o ndu piɛiyo niŋndoŋ, le mi ndaa miŋgi piɛile tonyaleŋ pila o lɛŋnde Isɔluɛileŋ niŋ. Salala Mɛlɛka dɔu wanaa nduaa teleŋ koŋ o ndu piɛiyo niŋndaŋ, laa hiou salala kɛ kɛ ndaa tuei niŋ yeela. A mɛɛ naŋ che o sɔɔŋ 26 niŋ yɛ, mi Chɛhowa hiau lachi a nda malaa le Diom ndɔɔ biyɔɔ bila. (Aisaya 60:​2) Mi salala Chɛhowa duau buɛiyaa nduaa laŋ la mala nda ma wa a nyaale o ndu piɛiyo niŋ, nduyɛ ma nɔ kɔl hiniaa kanifuule, a cho “a kɔl kɛndɛ.”—Aisaya 65:​14.

13. Vɛɛ huului dimiŋ le piɛile tonyaleŋ miŋgioo o Isɔluɛi niŋndo cho yɛ hau peelɔŋndo?

 ¹³ Baa huului dimiŋ le piɛile tonyaleŋ miŋgioo o lɛŋnde Isɔluɛileŋ niŋndo cho pa hau pɛɛlɔŋndo? Ei! O nɛi kuɛɛ choo? Chɔŋ a 1919 o faŋaŋ Chiisu wo kɔɔli, waŋnda o miiliɔŋndaŋ niŋ cho Babilɔŋ Bɛndoo malɔɔ. Ndu cho yɛ kɔɔna piɛiyii lachoowɛi ni. Waŋnda haa cho hau hunɔɔ o fondaŋ sɔvɛ sɔviɔɔ, mbo hiau Lɛŋnde Mɛyaale Mɛlɛka ndoo ke Isɔluɛiya leŋ. A cho luɛiyɔɔ o kpele hɛnɛkiɔɔ niŋ o Mɛlɛka piɛiyo niŋ. (Aisaya 51:​3; 66:​8) Yɛɛ cho yɛ kpele hɛnɛkiɔɔ hoo?

14. Yɛɛ cho yɛ kpele hɛnɛkiɔɔ o Mɛlɛka piɛiyo niŋ, nduyɛ nɛɛ yaa cho yɛ leniŋ? (Tofa Tɛɛsiaa le Diomndaŋ.)

¹⁴ Chɔŋ 1919 o faŋaŋ Chiisu wo kɔɔli, Kilisiɔŋaa pɔyaŋnda tuei niŋ waa o kpele hɛnɛkiɔɔ o Mɛlɛka piɛiyo niŋ yeela tau. b Mɛɛ teleŋndo hiau fau, lende koni Kilisiɔŋaa nɔ tiindaŋndo le waa o chieeŋndo choo wa, hiau lachi a luɛiyɔɔ o kpele hɛnɛkiɔɔ hoo niŋ ni. Nda cho yɛ “saa cheleŋnda” ni. Nduyɛ a cho salala Chɛhowa cho nda dɔwɔɔ laŋ tueiyɔɔ yeela tau.—Chɔŋ 10:​16; Aisaya 25:​6; 65:​13.

15. Kuɛɛ kpele hɛnɛkiɔɔ o Mɛlɛka piɛiyo niŋ cho yɛ hau?

¹⁵ Kuɛɛ kpele hɛnɛkiɔɔ o Mɛlɛka piɛiyo niŋ cho yɛ hau? Buɛiyaa Chɛhowaa cho hau ba o ba fee o chieeŋndo choo. Mɛɛ kpele hɛnɛkiɔɔ o Mɛlɛka piɛiyo niŋ bɛɛ cho ba o ba fee o chieeŋndo choo. Lelaŋ ba o ba naŋ wa, te ŋ wa pɛ piɛile tonyaleŋ tooloo a kɔl naa kpou, mɛɛ ŋ cho o kpele hɛnɛkiɔɔ hoo niŋ.

16. Le miŋ hiou lachi a diompilɛ cho o Mɛlɛka piɛiyo niŋndo tooloo, yɛɛ naŋ nɔ yɛ miŋ tosa?

¹⁶ Le miŋ hiou lachi a waa o kpele hɛnɛkiɔɔ hoo niŋ, ŋ nɔ miŋ tosa sɔɔŋ tau. Ipilɛ cho ni maa, ŋ nɔ miŋ hiou lachi a balika melaa nɔɔ, le puaapiliaa a ndepiliaa naa. Vɛɛ naŋ tosa yɛ keŋ? Ŋ tosa hei, te ŋ handu pɛ kɔllo o suliŋnda ndala kɛndɛlaŋ choo, kɛ o cho o biondɔŋnda ndalaŋ choo le. (Chɔŋ 17:​20, 21) Le yɛɛ hei cho yɛ isɔvɛ? Ŋ tuunuŋ ndɔ ndi o nɛiyo hoo choo. O kpele kɛndɛ kɛndɔɔ niŋ, mi tɔlɔɔla yɛ yɛlaŋ la wa loŋ tau. O nɛi pilɛ koŋ choo, waŋnda suu o suu cho hau Chɛhowa piɛiyo o kpele hɛnɛkiɔɔ hoo niŋ ni. Nduyɛ, nda kpou nɔ suliŋnda kɛndɛ kɛndɛlaŋ. (Aisaya 44:​4; 61:​3) Ŋ nɔ miŋ  hiou lachi a kɔllo handɔɔ o suliŋnda kɛndɛla puaapiliaa naa nɔ laŋ choo, kɛ o cho o siɔwuŋ ndaŋ ɔɔ o biondɔŋnda ndalaŋ choo le. Ŋ nɔ miŋ chɛl mi biondɔŋnda naalaŋ, ɔɔ biondɔŋnda acheleŋnda o kundaa niŋ faŋa naa kɔllo o diompilɛ naŋ cho tueiyɔɔ yeela a puaapiliaa naa chieeŋndo balɔɔ silɔ wo choo le.

17. Yɛɛ naa a pilɛŋ pilɛŋnda nɔ yɛ miŋ tosa le mi diompilɔɔ wa o kundaa niŋ?

¹⁷ Yɛɛ naa a pilɛŋ pilɛŋnda nɔ yɛ miŋ tosa le mi diompilɔɔ wa o kundaa niŋ? Ŋ nɔ miŋ wa wanaa tosa mi kɔl nyuloo miiŋgu waŋnda tɛɛŋnda. (Maa. 5:​9; Luomaŋ. 12:​18) Teleŋ o teleŋ naŋ chua pɛ chilaŋ le mi kɔl nyuloo wa naa tɛɛŋ a acheleŋnda o kundaa niŋ, mɛɛ diompilɛ cho o kpele hɛnɛkiɔɔ niŋ o Mɛlɛka piɛiyo niŋndo naŋ cho koŋ tooloo ni. Ŋ nɔ miŋ kɛsiŋ o kɔl maa, Chɛhowa hiŋ a wana o wana o kpele hɛnɛkiɔɔ hoo niŋ ni, le mbo wa o piɛile tonyaleŋ niŋ. (Chɔŋ 6:​44) Yiyaŋndɔ mɛɛ Chɛhowa wa a kɔl kɛndɛ yɛ te o che naa pɛ kindiŋndo kpoke, le mi diompilɔɔ a kɔl nyuloo wa naa tɛɛŋ.—Aisaya 26:​3; Hakai 2:​7.

18. A yɛɛ okɔɔ naŋ nɔ yɛ miŋ wa yiyaŋndo teleŋ o teleŋ, nduyɛ le yɛɛ?

¹⁸ Vɛɛ naŋ sɔla yɛ tɔnɔɔ tau o salala Mɛlɛka cho naa dɔwɔɔ laŋ niŋ? Ŋ nɔ miŋ yiyaŋ yiŋgoloŋ a nyɛ naŋ pɛɛku o Diom Mɛlɛkaa a o yaula naalaŋ niŋndo okɔɔ. Hei tosaa mala naa miŋ nɔ suliŋnda leKilisiɔŋndaŋ. Nduyɛ suliŋndaŋ ndaŋ la mala naa miŋ nɔ nyiɛɛye le chaaŋaa naa laalaŋnda, vɛlɛ miŋ “kaaliaŋ vellaa velle.” (Luomaŋ. 12:​10) Te ŋ yiyaŋ pɛ a mɛɛ Chɛhowa cho naa salaa dɔwɔɔ suŋ suŋ yɛ okɔɔ, keŋ mala naa miŋ nɔ chaŋyɛi kɛndɛi a ndu. Nduyɛ te ŋ wa pɛ yiyaŋndo a salala o cho naa dɔwɔɔ o chilaŋ niŋndaŋ okɔɔ, keŋ tosa mi tiindaŋ naa wa o kala poŋ. Sɔɔŋ muŋ kpou tosaa mala naa mi tiindaŋ naa wa o kala poŋ o Chɛhowa piɛiyo niŋ.

19. (a) A mɛɛ Aisaya 30:​18 dimi yɛ, tiindaŋ yɛɛ naŋ nɔ yɛ? (b) Yɛɛ mala yɛ naa miŋ biunuŋ sɔɔŋ palaŋ komal naa woŋ a kɔl kɛndɛ?

¹⁹ Chɛhowa cho naa tuiinɔŋ inyiɛɛ te o huŋ wa pɛ chieeŋ dɛnɛwɔɔŋndo hoo tɛɛmbuuwo. (Aisaya 30:​18) Ŋ nɔ tiindaŋndo maa, “Mɛlɛka tosa sɔɔŋ sakpo” wo Chɛhowa cho ni. Nduyɛ pesiŋ bɛɛ o cho chɛlɔɔ mi chieeŋ Setanaa hoo viou, mbo hiou mɛɛ o nɔ mbo viou yɛ le. (Aisaya 25:​9) Ŋ nɔ miŋ biunuŋ chumndo le mi paale Chɛhowa piŋi niŋ naaleŋ le fuuluu. Kɛ haaa mi paale leŋ le fuuluu, maa ŋ kɛɛsiaŋ o kɔl le dikeŋnaŋ naŋ nɔ le piɛileŋ ndo chuaa o sɔvɛ, miŋ wa Diom Mɛlɛkaa pɛɛkoo a nyɛ naŋ pɛɛku wo dɔwɔɔ o wali niŋ. Nduyɛ miŋ wa yiyaŋndo o salala Chɛhowa dɔu niŋ naa laŋ choo. Te ŋ tosa pɛ sɔɔŋ muŋ, Chɛhowa cho naa mala miŋ biunuŋ sɔɔŋ palaŋ komal naa o ndu piɛiyo niŋndoŋ a kɔl kɛndɛ.