1. Yɛɛ naŋ nɔ yɛ miŋ wa kɔl, nduyɛ tiindaŋ kuɛɛ naŋ nɔ yɛ miŋ nɔ?

 Ŋ NƆ miŋ wa kɔl maa simultaŋ la cho naa komal tau le wali pollo tosaa. Ŋ nɔ vɛlɛ miŋ kɛsiŋ o kɔl maa, naapum simultaŋ ndaŋ la cho wa tau o chilaŋ niŋ. (Daan. 11:​44; 2 Timo. 3:​12; Sɔɔŋ. 16:​21) Kɛ, ŋ nɔ miŋ nɔ tiindaŋndo maa Chɛhowa cho naa mala naŋ yeema wo ke le wali ndɔɔ tosaa. Le yɛɛ naŋ dimi yɛ lende? Teleŋ o teleŋ, mi Chɛhowa mala buɛiyaa nduaa le wali o ke nda wo tosaa, mɛɛ mɛɛ wali koŋ kiondu bɛɛ le tosaa. Le tamaseliiyo, ŋ yaasiaŋndɔ sɔɔŋ ŋtiŋ ŋ yɔŋnuŋ Isikiaa wana ndoo suaa le Mɛlɛka wo. Nduyɛ, a teleŋ nda wa o biyɔɔ niŋ Babilɔŋndo Isikiaa dimul Chuuwa yooŋgu Mɛlɛkaa ni.

2. Yɛɛ Chɛhowa ndoo dimi yɛ a wanaa wa o tanda Isikiaa wa yooŋgu ndɔɔ dimioo niŋnda okɔɔ, nduyɛ yɛɛ naŋ cho yɛ pɛɛku o buŋgɛi hei niŋ? (Isikiaa 2:​3-6)

² Wanaa suu maavɛɛ wa yɛ o tanda Isikiaa ndoo dimi yooŋgu Mɛlɛkaa wo niŋ? Mi Chɛhowa dimi a nda okɔɔ maa, “wanaa bolii kalaa,” ‘wanaa tui ndu diom te wa’ vɛlɛ maa, ‘wanaa simul ndu wa nda cho ni.’ Wanaa kaŋ ndaa wɔu naŋ chaa yɔɔŋ ni, nduyɛ mi ndaa tosa sɔɔŋ naŋ chaa ŋgeemaa ni. Kɛ, mi Chɛhowa dimul Isikiaa lediiŋ kpulukuu aa: “Siooŋii bii num te.” (Nuawɔ Isikiaa 2:​3-6.) Mi Isikiaa sɔla batiuwaa le wali ndɔɔ tosaa kanifuule, (1) Chɛhowa ndoo vem ndu ni, (2) mi Chɛhowa ke ndu nyina ndɔ diandaa, nduyɛ (3) Diom Chɛhowaa wa ndu vɛlɛ o ba le ndu malaa. Vɛɛ sɔɔŋ ŋgaa woŋ muŋ mala yɛ Isikiaa? Nduyɛ vɛɛ ŋ mala yɛ naa hau? A hei okɔɔ naŋ cho pɛɛku o buŋgɛi hei niŋ ni.

3. Diomnda kuɛɛ laa luei yɛ dɔɔ Isikiaa yoomuaŋ, nduyɛ vɛɛ Chɛhowa chɔm yɛ maa o wa ndu wa kɔɔli?

³ Mi Chɛhowa dimul Isikiaa aa: “I cho num viomɔɔ.” (Isi. 2: 3, 4) Naapum mi diomndaŋ ndaŋ la luei Isikiaa yoomuaŋ. Le yɛɛ? Mbo loonuŋ dɔɔ maa, naapum diomndaŋ ndaŋ koni Chɛhowa soliŋ kpeku ni, mɛɛ o wa Muuse a Aisaya viomɔɔ le ma wa wanaa suaa le ndu wa. (Ɛsɔ. 3:​10; Aisaya 6:​8) Isikiaa ndoo sina vɛlɛ mɛɛ Chɛhowa mala puaa ŋiɔɔŋnda haa le simultaŋ chɔulabaa yɛ. Lelaŋ, mɛɛ Chɛhowa dimul ndu bɛmbɔɔ lediiŋ aa: “I cho num viomɔɔ,” mi Isikiaa sɔla tiindaŋndo maa Chɛhowa cho ndu mala. O yau Isikiaa wo niŋ, diomndaŋ ndaŋ: ‘Mi Mɛlɛka Yaawɛɛ o suaa naa ya chua,’ la cho o fondaŋnda bɔɔbɔɔ. (Isi. 3:​16) Nduyɛ diomndaŋ ndaŋ: “Mi Mɛlɛka Yaawɛɛ o suaa vɛlɛ naa ya chua,” laŋ bɛɛ la cho o fondaŋnda bɔɔbɔɔ. (Isi. 6:​1) A tonya, Isikiaa ndoo sina kɛsɛ maa Chɛhowa vem ndu ni. O fulawɔ okoŋ kɔɔli, po wana soliaa lasalaa o wa ni. Le hei, naapum mi finya ndɔ dimul ndu dɔɔ a mɛɛ Chɛhowa ndoo wa wanaa ndaa suaa le ndu wa kɔɔli yɛ. Mi Chɛhowa dimul Aase, Chekɔpu, a Chɛluimaya aa: ‘I cho wa a [nya] latulu.’—Chɛ. 26:​24; 28:​15; Chɛlui. 1:​8.

4. Diomnda kɔl dɛɛniaala kuɛɛ laa tiu yɛ ba mi la luei Isikiaa yoomuaŋ?

⁴ Yɛɛ Isɔluɛiyaa bɔɔbɔɔ ndaa tosa yɛ niŋ te ndaa tuei pɛ yooŋgu Isikiaa wa nda dimullo? Mi Chɛhowa dimi aa: “Waŋnda Isɔluɛi a cho num lani yaŋɔɔ le. Kani fondole, a yeema ma tuei ya diom te.” (Isi. 3:​7) Nduyɛ mɛɛ wanaa kaŋ a kɛɛ Isikiaa nilaŋ yaŋɔɔ, ma chɔm kpendekele maa a yeema ma yaŋ Chɛhowa nilaŋ te. Mi diomnda Chɛhowa dimul Isikiaa laŋ la ke ndu tiindaŋndo maa, mi waŋnda yeŋ ndu bɛɛ lani le, keŋ chɔm naa maa o sɔla batiuwaa le le. Mi Chɛhowa ke vɛlɛ Isikiaa tiindaŋndo maa, te diomnda kɔɔsɔla o cho waŋnda dimul laŋ la peeluŋ pɛ, wanaa kaŋ cho sina maa “wana suaa le Mɛlɛka wo o [wa nda tɛɛŋ.]” (Isi. 2:​5; 33:​33) I cho kpendekele maa mi diomnda kɔl dɛɛniaala laŋ la luei Isikiaa yoomuaŋ le wali ndɔɔ tosaa.

5. A mɛɛ Aisaya 44:​8 dimi yɛ, yɛɛ luei yɛ naa yoomuaŋ?

⁵ Naa bɛɛ nɔ kɔl simulaa le yooŋgu kɛndɔɔ dimioo kanifuule, ŋ sina maa Chɛhowa vem naa ni. Mbo veelu naa pɛŋ aa Seiyaa nduaa. (Aisaya 43:​10) Nuawɔ se dikeŋnaŋ bɛndu! Mi Chɛhowa dimul Isikiaa aa: “Siooŋii bii num te.” Diomnda pilɛ la laŋ kpe o dimul naa ni aa: “La yɔŋ isiooŋ te.” Le yɛɛ naŋ nɔ yɛ miŋ yɔŋ isiooŋ le wanaa simul naa wa le? Maa Isikiaa, naa bɛɛ Chɛhowa vem naa ni nduyɛ o cho naa toolu.—Nuawɔ Aisaya 44:​8.

6. (a) Vɛɛ Chɛhowa ke yɛ naa tiindaŋndo maa o cho wa a naa latulu? (b) Yɛɛ dɛɛniaa yɛ naa kɔllo, nduyɛ mbo luei naa yoomuaŋ?

⁶ Chɛhowa ke naa tiindaŋndo maa o cho wa a naa latulu. Le tamaseliiyo, tuupa mbo dimi aa, “Nya cho seiyaa niaa ni,” o dimi fɛŋ aa: “O yɔŋ bɛɛ mi la kei o mɛŋma yiŋgilɛiyaŋ niŋ, I cho wa a nya latulu. Wana pilɛ bɛɛ o lo niŋ o peelo le. La keeku bɛɛ o yiŋndeŋ niŋ la ŋue le, yiŋndeŋ le tɛɛmbuu nya le.” (Aisaya 43:​2) Te ŋ wa pɛ yooŋgu kɛndɔɔ dimioo, mi simulta komal naalaŋ la wa naŋ chaa mɛŋma yiŋgilɛiyaŋ ni. Nduyɛ, mi tɔɔndaŋnda komal naalaŋ la wa naŋ chaa yiŋndeŋ ni. A koŋ kpou, a mala Chɛhowaa, miŋ hiou lachi a yooŋgu kɛndɔɔ dimioo. (Aisaya 41:​13) Mi wanaa bɔɔbɔɔ kɛɛ yooŋgu kɛndɛ naŋ dimul nda wo mɛɛ waŋnda o palɛi Isikiaa ve niŋ tosa yɛ. Kɛ ŋ nɔ miŋ kɛsiŋ o kɔl maa o yɔŋ bɛɛ ma kɛɛ, keŋ sim naa maa ŋ sɔla batiuwaa le le. Miŋ sɔla dɛɛniaa a yoomuaŋ kanifuule ŋ sina maa Chɛhowa hini kɔl a naa le mɛɛ naŋ cho hiouwɔɔ lachi a yooŋgu ndɔɔ dimioo yɛ. Mi kiilanɔɔ Pɔɔl dimi maa wana o wana “cho hunɔɔ fandaa sɔla le wali o tosa wo.” (1 Kɔliŋ. 3:​8; 4:​1, 2) Mi ndepilɛnɔ kɔɔfanɔ viou niŋ kɔɔfaleŋ tosaa wo dimi aa: “I sina maa mi Chɛhowa fanda naa le sɛmbɛ naŋ cho dɔwɔɔ wo. Hei kpeekpei ke ya nyaaloo tau ni.”

7. Te Isikiaa ndoo yiyaŋ pɛ a yilaŋii kɔndɔfilii o che ve okɔɔ, yɛɛ keŋ ndii tosallɛ ndu? (Tofa fotueiyo o kɔɔ.)

⁷ O yilaŋnde niŋ, mi Isikiaa cha mɛɛ nyina diandaa ke maalikɛiya kpaayaa yɛ, nduyɛ a mɛɛ o cho kandu Chɛhowaa o choo choo niŋ malaa le mbo wa hiŋnɔŋndo yɛ. (Isi. 1:​20, 21) Yɛɛ Isikiaa tosa yɛ mɛɛ o che yilaŋnde hei? Mi ndupila chɔm nyɛ yɔŋnuŋndo. Mbo dimi aa: “Mɛɛ ya I che paŋgeloo hoo, mi hini mi fuuluu hɔlla lɛŋ mɛɛ.” Mɛɛ siooŋnde bii Isikiaa tei, mbo hini lɛŋ sanaa. (Isi. 1:​28) Okoŋ kɔɔli, teleŋ o teleŋ Isikiaa ndoo yiyaŋ pɛ a yilaŋii kɔndɔfilii o che ve okɔɔ, naapum mi ndoo chɔɔlu yoomuaŋ sɔla maa sanaa a nyina diandaa Mɛlɛkaa, o tiuba mbo tosa wali Mɛlɛka ke ndu wo.

8-9. (a) Yɛɛ nyɛ Chɛhowa dimul Isikiaa wo tosallɛ ndu? (b) Vɛɛ Chɛhowa chɔɔlu yɛ Isikiaa yoomuaŋ luei le wali kala kala ndoo ke ndu wo tosaa?

⁸ Mi Chɛhowa dimul Isikiaa aa: “Wana chioo Isikiaa, chɔŋ ma sim ma tuei nyɛ ya I cho num dimullo.” Mi nyina Chɛhowa, vɛlɛ a nyɛ o dimul koŋ Isikiaa wo luei ndu yoomuaŋ le mbo chɛŋ mbo sim. Mi Isikiaa pila poonyiaa aa: “O lepilɛ niŋ kpe mi nyina Mɛlɛkaa tual la kɔɔli. Mbo chua ya mbo simi ya.” (Isi. 2:​1, 2) Mɛɛ keŋ yɔŋnuŋ, mi “nyina Mɛlɛkaa” tual Isikiaa kɔɔli o wali o wa tosaa wo niŋ. (Isi. 3:​22; 8:​1; 33:​22; 37:​1; 40:​1) Mi nyina diandaa Mɛlɛkaa luei Isikiaa yoomuaŋ le wali ndɔɔ tosaa. Ndu cho yɛ, “wanaa bolii kalaa bɛnduaa,” a “wanaa simul [Mɛlɛka] wa” yooŋgu Mɛlɛkaa dimullo o tanda ndɔɔ niŋ ni. (Isi. 3:​7) Mi Chɛhowa dimul Isikiaa aa: “Mɛɛ nda cho wanaa bolii kala nuaa, nduyɛ ma wa wanaa kala kala yɛ, num bɛɛ lende ya I cho num siiŋguu wana bolle kala nda o hɔl ni. Nduyɛ mi tosa num ma simnuŋ wana kala kala. I cho tosa mi kɔl numndo simnuŋ, mbo wa o kala kala maa pou. Lelaŋ, mɛɛ mɛɛ  nda nua num a hɔlta siaŋa, wou nda le, siooŋii bii num le nda le.” (Isi. 3:​8, 9) O dimi niŋ, dimullo Chɛhowa wa Isikiaa ni aa: ‘Chɛl mi bolle ndale kala leŋ le tɛɛmbuu num kɔl te. I cho num yoomuaŋ luei.’

⁹ Chɔŋ niŋ a teleŋ koŋ, nyina Mɛlɛkaa wa Isikiaa kɔɔli. Mi ndupila poonyiaa aa: “Kpaaya bɛndu Mɛlɛka Yaawɛɛ wo, o wa ya kɔɔli.” Mi Isikiaa chua lɔɔ kpulukuu le mbo bii yooŋgu Mɛlɛka ke ndu wo bila, nduyɛ mbo sɔla kɔl simulaa le acheleŋnda ndu dimullo. (Isi. 3:​14, 15) Okoŋ kɔɔli, mi Mɛlɛka dimul ndu le mbo kuɛ o lɛŋnde dɛŋgbɛleŋ niŋ. Loŋ ‘nyina Mɛlɛkaa tol ndu kɔɔli’ ni. (Isi. 3:​23, 24) Chɔŋ niŋ a teleŋ koŋ, Isikiaa wa o bɛɛndiaŋ le wali Mɛlɛka ke ndu wo tosaa.

10. Yɛɛ mala yɛ naa miŋ hiou lachi a yooŋgu kɛndɔɔ dimioo, nduyɛ le yɛɛ?

¹⁰ Yɛɛ mala yɛ naa hau le miŋ hiou lachi a yooŋgu kɛndɔɔ dimioo? Le miŋ sɔla mulioo le nyunaa hoo, ŋ yiyaŋndɔ a nyɛ yɔŋnuŋ Isikiaa wo okɔɔ. Tuupa mbo kandu wali ndɔ pollo, mi Mɛlɛka ke ndu nyina diandaa le ndu malaa. Hau bɛɛ, mi Chɛhowa ke naa nyina ndɔ diandaa le yooŋgu kɛndɔɔ dimioo, mɛɛ o ke Isikiaa nyina ndɔ diandaa yɛ. Le yɛɛ? Kanifuule, Setana cho naa chiŋalaŋndo le miŋ pɛŋgi yooŋgu kɛndɔɔ dimioo. (Sɔɔŋ. 12:​17) O yiyaŋ iwana chieeyaa niŋ, Setana hiou naa kpaayaa poloŋ. Kɛ sanaa a yooŋgu kɛndɛ naŋ dimi wo, ŋ tiuba miŋ yem Setana. (Sɔɔŋ. 12:​9-11) O nɛi kuɛɛ choo? Te ŋ wa pɛ yooŋgu kɛndɔɔ dimioo, mi keŋ chɔm kpendekele maa ŋ nɔ isiooŋ le nɛila kaŋgalaala Setanalaŋ te. Teleŋ o teleŋ naŋ wa pɛ yooŋgu kɛndɔɔ dimioo, Setana naŋ wa koŋ kɔllo tɛɛmbuuwo ni. Yɛɛ cho yɛ naa malaa le hiouwɔɔ lachi a yooŋgu kɛndɔɔ dimioo, mi che bɛɛ yaamɔɔwaa naa cho naa simullo? Nyɛ cho naa malaa wo cho nyina Mɛlɛkaa ni nduyɛ ŋ sina maa Chɛhowa hini kɔl a naa.—Maa. 5:​10-12; 1 Pitɛ 4:​14.

11. Yɛɛ nyina diandaa Mɛlɛkaa tiu yɛ ba mbo tosal naa, nduyɛ yɛɛ naŋ nɔ yɛ miŋ tosa le mi Mɛlɛka hiou lachi a naa ndu kioo?

¹¹ Yɛɛ cheleŋ naŋ pɛɛku yɛ te ŋ yiyaŋ pɛ a mɛɛ Mɛlɛka mala Isikiaa le yooŋgu Mɛlɛkaa dimioo yɛ? Ŋ pɛɛku maa, mi nyina Mɛlɛkaa luei  naa yoomuaŋ le miŋ tiu simulta komal naa o wali pollo niŋndaŋ ba. (2 Kɔliŋ. 4:​7-9) Mɛɛ yɛɛ naŋ nɔ yɛ miŋ tosa le mi Mɛlɛka hiou lachi a naa nyina ndɔ diandaa kioo? Ŋ nɔ miŋ wa piɛileŋ teleŋ o teleŋ le ndu. Nduyɛ, ŋ nɔ miŋ nɔ tiindaŋndo maa Chɛhowa cho piɛile naaleŋ tueiyɔɔ. Mi Chiisu pɛɛku buɛiyaa nduaa aa: “La lambaŋ nyunaa, . . . la lambaŋ nuuviaa, . . . [nduyɛ] la lambaŋ dioo lɔɔ.” Te ŋ tosa pɛ hei, Baabuiyo dimi maa Chɛhowa “tiuba mbo ke wanaa cho ndu nyunaa wa nyina ndɔ diandaa!”—Luku 11:​9, 13; Walta. 1:​14; 2:​4.

12. A mɛɛ Isikiaa 2:​9–3:​3 dimi yɛ kuɛɛ yau simbulaa ndoo fula yɛ nduyɛ yɛɛ wa yɛ o poonyiaa lechoo?

¹² O cho ko nyina diandaa Mɛlɛkaa le luei Isikiaa yoomuaŋ te, kɛ mi Diom Mɛlɛkaa kindi vɛlɛ laalaŋ ndɔɔ o Mɛlɛka niŋ. O yilaŋii Mɛlɛka chɔm ndu ve niŋ, mbo cha waŋndo a yau simbulaa o ba. (Nuawɔ Isikiaa 2:​9–3:​3.) Kuɛɛ yau simbulaa koŋ ndoo fula yɛ? Yɛɛ wa yɛ o poonyiaa lechoo? Nduyɛ vɛɛ o kindi yɛ laalaŋ Isikiaa wo? Ŋ tofaŋndɔ. O kpeŋgbei lemasa Mɛlɛkaa yau simbulaa koŋ ndoo fula ni. Naapum maalikɛiyaa hiɔɔluaa Isikiaa che o tasela ndɔ wa, opilɛ Chɛhowa soliŋ kpeku ni le ndu yau koŋ kioo. (Isi. 1:​8; 10:​7, 20) Yooŋgu kɔl tuu Mɛlɛkaa wa o yau simbulaa koŋ choo ni, nduyɛ Isikiaa ndoo nɔ mbo dimul wanaa bolii kalaa wa kaŋ o chɛleŋ niŋnda yooŋgu koŋ. (Isi. 2:​7) Yooŋgu koŋ wa o poonyiaa o yau simbulaa koŋ niŋ a o kɔɔ.

13. Yɛɛ Chɛhowa ndoo dimullɛ Isikiaa le mbo tosa a yau simbulaa, nduyɛ le yɛɛ yau koŋ ndoo yeela yɛ?

¹³ Mi Chɛhowa dimul Isikiaa le mbo ‘de yau simbulaa koŋ, mbo pim ndu cha.’ Mi Isikiaa diikuŋ Chɛhowa, nduyɛ mbo dia yau simbulaa koŋ kpou. Yɛɛ hei sim yɛ? I sim maa, Isikiaa ndoo nɔ mbo bii yooŋgu Mɛlɛkaa bila nyɛkɛndɛi, tuupa mi ndoo dimul waŋnda ndu. Ndoo nɔ mbo laalaŋ yooŋgu koŋ, nduyɛ mbo nɔ yeemɛi le acheleŋnda dimullo a ndu okɔɔ. Mɛɛ Isikiaa wa yau koŋ dioo, mi suɛi kɔndɔfille yɔŋnuŋ. Mbo cha maa yau koŋ ndoo ‘yeela naŋ chaa liaaŋ ni.’ (Isi. 3:​3) Le yɛɛ yau koŋ ndoo yeela yɛ Isikiaa o sondo? Kanifuule, Isikiaa ndoo che ndi maa dikeŋnaŋ bɛndoo ndoo sɔla ni le waŋnda yooŋgu Mɛlɛkaa dimullo. (Sam 19:​8-11) Isikiaa ndoo nɔ balika melaa tau le Chɛhowa, le mɛɛ o hini kɔl a ndu, nduyɛ mbo siiŋguu ndu wana suaa le ndu wo yɛ.

14. Yɛɛ mala yɛ Isikiaa le mbo wa o bɛɛndiaŋ le yooŋgu Mɛlɛkaa dimioo?

¹⁴ Mɛɛ teleŋ tiŋ hiou, mi Chɛhowa dimul Isikiaa aa: “Wana chioo Isikiaa, yaŋ nilaŋ nyɛ kɛndɛ kɛndɛ o nyɛ ya I cho num dimullo. Nduyɛ, ma kɛsiŋ ndu o kɔl nyɛ kɛndɛ kɛndɛ.” (Isi. 3:​10) Hei ndii sim ni maa, Isikiaa ndoo nɔ mbo loonuŋ nyɛ wa o poonyiaa o yau simbulaa koŋ niŋndo, nduyɛ mbo wa yiyaŋndo lechoo. Mɛɛ Isikiaa tosa keŋ, mi laalaŋ ndɔɔ chɔɔlu kala poŋ. Yooŋgu o wa koŋ kɛsiŋ o kɔllo ndoo nɔ ni mbo kɔ dimul waŋnda. (Isi. 3:​11) Mɛɛ Isikiaa bii yooŋgu Mɛlɛkaa bila nduyɛ mbo laalaŋ ndu, mi keŋ mala ndu le mbo wa o bɛɛndiaŋ le ndu dimioo a dialuŋ fulaa.—Tuuwɔ Sam 19:​14.

15. Le miŋ biunuŋ sɔɔŋ kindilaŋ komal naa o wali pollo niŋndoŋ, yɛɛ naŋ nɔ yɛ miŋ “kɛsiŋ” o kɔl?

¹⁵ Le miŋ biunuŋ sɔɔŋ kindilaŋ komal naa o wali pollo niŋndoŋ, ŋ nɔ miŋ chɛl diom Mɛlɛkaa le mbo kindi laalaŋ naa poŋ. Maa Isikiaa, ŋ nɔ miŋ “kɛsiŋ” sɔɔŋ Chɛhowa dimul naa woŋ kpou o kɔl. Hau, o Baabuiyo niŋ sanaa Chɛhowa suaa o naa lo ni. Vɛɛ naŋ chɔm yɛ maa ŋ yeema mi Diom Mɛlɛkaa piiliaŋ yiyaŋnda naalaŋ, yeemaŋ naŋ, a sɔɔŋ naŋ tosa woŋ?

16. Yɛɛ naŋ nɔ yɛ miŋ tosa a Diom Mɛlɛkaa, nduyɛ vɛɛ naŋ kɛsiŋ yɛ nyɛ o dimul naa wo o kɔl?

 ¹⁶ Le mi dialuŋ naŋ wa ŋ kala, mɛɛ miŋ wa nyɛdiaa kɛndɔɔ dioo. O nɛi pilɛ koŋ choo, le mi laalaŋ naa wa o kala poŋ, mɛɛ miŋ wa Diom Mɛlɛkaa pɛɛkoo nduyɛ miŋ yiyaŋ lechoo. Nyɛ Chɛhowa yeema naa miŋ pɛɛku a yau simbulaa okɔɔ wo cho koŋ ni. O yeema naa miŋ pim Diom ndɔɔ cha. Koŋ sim ni maa, ŋ nɔ miŋ kindiŋ le sɔɔŋ naŋ pɛɛku o Diom ndɔɔ niŋndoŋ biyɔɔ bila nyɛkɛndɛi. Ŋ tosa hei sanaa a piɛileŋ, diomndaŋ veeloo o Baabuiyo niŋ, a yiyaŋndo lechoo. O tasoo, tuupa miŋ veelu diomndaŋ o Baabuiyo niŋ, ŋ nɔ miŋ piɛi le kɔl naa bɛɛndiaa. Okoŋ kɔɔli, ŋ nɔ miŋ chua teleŋndo le yiyaŋndo yiŋgoloŋ o nyɛ naŋ veelu diomndaŋ ndo choo. Te ŋ tosa pɛ keŋ, yɛɛ cho yɛ wa fulamakɔɔlioo? Mɛɛ naŋ yiyaŋ fau o Diom Mɛlɛkaa choo yɛ, lende koni naŋ bii ndu bila ni, nduyɛ mi laalaŋ naa chɔɔlu kalu poŋ.

17. Le yɛɛ i cho yɛ suɛi sɔvɛ le miŋ yiyaŋ o nyɛ naŋ veelu diomndaŋ o Baabuiyo niŋndo choo?

¹⁷ Le yɛɛ i cho yɛ suɛi sɔvɛ le miŋ veelu diomndaŋ o Baabuiyo niŋ, nduyɛ miŋ yiyaŋ lechoo? Hei tosaa luei naa yoomuaŋ le yooŋgu kɛndɔɔ dimioo suŋ suŋ, a le yooŋgu kɔɔsa naŋ dimi niŋ o chilaŋ niŋndo. Te ŋ yiyaŋ pɛ a suliŋnda Chɛhowalaŋ okɔɔ, hei tosa mi chaŋyɛi nɛi a ndu chɔɔlu kalu poŋ. Nduyɛ ŋ cho ndi tueiyɔɔ yeela, miŋ nɔ kɔl hiniaa kpeekpeiyo o yoomoo niŋ.—Sam 119:​103.

18. Yɛɛ wanaa cho o tanda naa niŋnda dimi yɛ niŋ te, nduyɛ le yɛɛ?

¹⁸ Ŋ cho maa Isikiaa le kanifuule, wana ndoo suaa le Mɛlɛka wo o wa ni. A koŋ kpou, ŋ nɔ miŋ kɛɛsiaŋ o kɔl le yooŋgu kɛndɛ cho o Baabuiyo niŋndo dimioo, haaa mi Chɛhowa hini kɔl. Te teleŋ Mɛlɛka kɔɔsa niŋ a waŋnda wo fuuluu pɛ, wanaa cho o tanda naa niŋnda nɔ niŋ sabu o sabu le ma dimi maa a tui a yooŋgu Mɛlɛkaa okɔɔ le le. (Isi. 3:​19; 18:​23) Kɛ a cho sina a teleŋ koŋ maa, yooŋgu naŋ wa nda dimullo wo, Mɛlɛka o ba o fula ni.

19. Yɛɛ luei yɛ naa yoomuaŋ le miŋ hiou lachi a wali naa pollo tosaa?

¹⁹ Yɛɛ luei yɛ naa yoomuaŋ le miŋ hiou lachi a wali naa pollo tosaa? Sɔɔŋ ŋgaa mala naa ni. Nduyɛ, sɔɔŋ ŋgaa woŋ muŋ koni luei Isikiaa yoomuaŋ ni. Miŋ hiou lachi a yooŋgu kɛndɔɔ dimioo kanifuule ŋ sina maa Chɛhowa vem naa ni, mi nyina ndɔ diandaa ke naa kpaayaa, nduyɛ ŋ sina maa mi Diom ndɔɔ kindi laalaŋ naa poŋ. A mala Chɛhowaa, ŋ nɔ yeemɛi le yooŋgu kɛndɔɔ dimioo, nduyɛ miŋ “biunuŋ haaa o mɛɛlulaŋ.”—Maa. 24:​13.