A wɔsi 1948 ya veluŋ ni, o sɔndɔkɔlɔ pɔmbɔ pilɛ niŋ Naŋchiiliaa Ba Paaleŋ le Dello a Batouwo tɛɛŋ. A teleŋ koŋ finya ni pɔmbɔɔ Musitafaa nda bɛ nuu Wahabi sɔla yiŋɔɔ ni, ma simnuŋ Seiyaa Chɛhowaa. I wa wɔsilaŋ la ŋɔmahiɔɔlu mi finya nuu sɔla piɔmndo. Mi tambu kɔllo tau. Kɛ mi Wahabi dimulla maa, ŋ cho vɛlɛ finya naa chɔ te o miiŋgu pɛ yoomu. Mi yooŋgu kɔl dɛɛniaa koŋ tosa mi kandu Baabuiyo pɛɛkoo. Nduyɛ mi sɔla yiŋɔɔ a wɔsi 1963. Okoŋ kɔɔli, mi bɛndaa niaa a ŋiɔɔŋ a pɔmbɔ nuu bɛɛ sɔla yiŋɔɔ.

A wɔsi 1965, mi kua o bɛ nuu lo Wilisiŋ o chiee bɛndoo Lekɔɔsi niŋ. Nduyɛ mi tuɛi chaŋyɛi kɛndɛi yeela a kɔɔfaa lɔɔlɔɔ waa wa o kunda Igibobi wo niŋndo. Mi nyaale ndaa a sɛmbɛ ndaa piiliaŋ ya tau. Le hei, mi ya bɛɛ kandu kɔɔfaleŋ a Tɛɛkpaa wɔsi 1968.

A teleŋ koŋ, mi puaapilɛnɔ pilɛ wa wallo o Bɛtɛɛllo diolaŋ Alibɛti Olugibebi, kɛɛsiaa le bɔŋaŋ teŋgeŋndo biyɔɔ a naa feleŋguaa, le naa chɔmndo yeemɛi wa Naŋchiiliaa Ba Luaŋndo le kɔɔfaa teŋgeŋnda ve. I loonuŋndɔ kɛ mɛɛ Ŋgɔɔ Olugibebi dɛɛniaa naa kɔltaŋ paaleleŋ yɛ. Mbo dimul naa aa: “Feleŋguaa nya cho wɔ ni. Lelaŋ, la tiuwɔ ba mi la soliŋ teleŋ nyaa a yoomuma nyaŋ kpeku le wali Chɛhowaa tosaa. Wallo cho tau le tosaa!” I wa a yeemɛi tau le mi tol  tamasi Aisaya, wana ndoo suaa le Mɛlɛka wo kɔɔli. Le hei, mi peelu yauwo.—Aisaya 6:8.

A Bukuloo wɔsi 1968, ma yɔŋ ya kɔɔfale teŋgeŋndeŋ tosaa o chiee bɛndoo Kano niŋ, Naŋchiiliaa Ba Luaŋndo. Nduyɛ a teleŋ koŋ, chɔuwo wa o fondaŋ koŋ, chɔŋ a wɔsi 1967 kɔ bii wɔsi 1970. Mi chɔu koŋ tosa mi wanaa bɔɔbɔɔ saŋga tau, vɛlɛ ma sɔla piɔmndaŋ. Okoŋ kɔɔli, ma kua a chɔu koŋ Naŋchiiliaa Ba Paaleŋ le Chaŋndo. Le hei, mi puaapilɛnɔ pilɛ ndoo buulaŋ a ya okɔɔ wo kindiŋ le ya kuunaa kɔlaŋ. Kɛ mi dimul ndu aa: “Nuwali tau le buulaŋndo a ya okɔɔ. Kɛ te Chɛhowa yeema pɛ mi kɔ tosa wali ndɔɔ o fondaŋ koŋ, mɛɛ kposoŋ bɛɛ I nɔ kiisaŋ te kanifuule, o cho wa a ya latulu.”

I wa bɔɔ suɛi imɔnɔ le chɔɔ mɛɛ chɔuwo ndoo tɛɛmbuu chiee bɛndoo Kano yɛ. Mi chɔu koŋ tɛɛmbuu fondaŋnda bɔɔbɔɔ o chiee bɛndu koŋ niŋ. Te naŋ wa pɛ o wali pollo niŋ, lepum mi naŋ che dialuŋ vilɛi wanaa ndaa diu diu o chɔu koŋ niŋnda. Mi che bɛɛ kundalaŋ la wa tau o Kano niŋ, kɛ mi puaapiliaa bɔɔbɔɔ nyaanuŋ. Wanaa dimiaa yooŋgu kɛndiaa ndaa lo loŋ nda ndaa sul 15 le. Nduyɛ nda bɛɛ wa a siooŋnde vɛlɛ a kɔl tambɛiyo. Puaapiliaa a ndepiliaa haa wa a kɔl kɛndɛ mɛɛ naŋ fuuluu loŋ. Kɔɔfaa teŋgeŋnda naŋ wa ni, nduyɛ naa ŋɔmpum wa ni. Mi wanaa dimiaa yooŋgu kɛndiaa naŋ kɔl tau a kɔl dɛɛniaa naŋ ke nda wo. Miŋ mala nda le ma kandu vɛlɛ sɔɔŋ ŋMɛlɛkayaŋ tosaa, kona wali pollo yɔŋndo o lɛuve a nyunaa le yaulaŋ.

Mi naa kɔɔfaa teŋgeŋaa kuɛ loŋ nda kandu suɛi maŋgalɛi Hausa ve pɛɛkoo. Mɛɛ waŋnda wa naa tueiyɔɔ yooŋgu kɛndɔɔ dimioo o suɛi ndɛi maŋgalɛi niŋ, mi a bɔɔbɔɔ kandu naa nilaŋ yaŋɔɔ. Kɛ waŋnda apum, a ndaa kua o kaŋii cheleŋnde niŋ nda ndaa hɛnaŋ a wali dimiaa yooŋgu kɛndɛ naŋ wa tosaa wo le. Le hei, naŋ nɔ mi wa yekeŋ. Paale pilɛ, mi ya a puaapilɛnɔ wa o wali pollo niŋndo nyaanuŋ mɛɛ poo wa naa kiltaŋ kɔɔli a muɛi. Kɛ le mɛɛ naŋ hiou ndu kiltaŋ yɛ, o bii naa le. Mi che bɛɛ yoomula naalaŋ la wa o kpundɔɔ niŋ, kɛ mi Chɛhowa “manda” naa. O faŋaŋ okoŋ kɔɔli, mbo tosa vɛlɛ mi wanaa dimiaa yooŋgu kɛndiaa chɔɔlu handɔŋ lechoo. (Sam 4:8) Wanaa dimiaa yooŋgu kɛndiaa hiouwɔɔ 500 cho o kundalaŋ 11 o Kano niŋ ni.

Okoŋ kɔɔli, a Naandɔɔ wɔsi 1968, mɛɛ naŋ chii paŋgoŋ ŋtiŋ o Kano niŋ, ma yɔŋ ya a kɔɔfaa cheleŋ o chiee bɛndoo Niami niŋ, lɛŋnde Niger leŋ. Mɛɛ naŋ fuuluu loŋ, haupa miŋ bii bila maa, o lɛŋii paaleŋ le luaa tau Ba Paaleŋ le Dello tɛɛŋ, Niger cho le pilɛ. Mi che bɛɛ naŋ nɔ miŋ biunuŋ haŋgullo o lɛŋnde leŋ niŋ, kɛ naŋ nɔ vɛlɛ miŋ pɛɛku suɛi maŋgalɛi kpeekpei nda dimi loŋ nde, Filaŋsiiye. A kpɔkɔsilaŋ ndaŋ kpou, miŋ duau tiindaŋ naa o Chɛhowa niŋ, nduyɛ miŋ kandu yooŋgu kɛndɔɔ dimioo o chiee bɛndu koŋ niŋ latulu a wanaa dimiaa yooŋgu kɛndiaa pɔmbuaa naŋ komal loŋ nda. O teleŋ biŋgi bɛŋgu, mi sɔŋgɔ wana o wana ndoo veelu diomndaŋ o Niami niŋ sɔla yauwo hoo, The Truth That Leads to Eternal Life. (Tonya Yaa Wana o Yoomu Fɛɛŋndo Wo) le Baabuiyo pɛɛkoo. Mi waŋnda ndaa nuuviaa naa pɛŋ le halikpeŋ ma sɔla yau koŋ.

Haupa miŋ cha maa, masaleŋ lee hɛnaŋ a wali Seiyaa Chɛhowaa wa tosaa wo le. A Suɛɛsɔɔ wɔsi 1969, miŋ chuuŋgiaŋ le bɔŋaŋ ibuŋga tasoo biyɔɔ o lɛŋnde leŋ niŋ. Nduyɛ waŋnda le 20 wa o bɔŋaŋ koŋ ni. Waŋnda a ŋiɔɔŋ ndaa nɔ le yiŋɔɔ sɔlaa. Kɛ o paale taseleŋ choo, mi polisiiya huŋ kuuna naa ndu biyɔɔ. Ma kua a naa kɔɔfaa teŋgeŋnda a buɛi ibuŋgaa o fondaŋ polisiiya. Mɛɛ nda chii naa nyuuniaa, ma dimul naa le miŋ miiŋgu vɛlɛ loŋ diimandɔɔ. Mɛɛ naŋ che maa kpundɔɔ wa hunɔɔ, miŋ kɛɛsiaa le suɛi yiŋɛi yɔŋgoo o chiɛi waŋndo niŋ. Okoŋ, miŋ kɔ yiŋ wanaa ndaa nɔ le yiŋɔɔ sɔlaa wa o peelo sɔɔsɔɔ.

Mɛɛ lɔɔlaŋ latiŋ la hiou, mi masaleŋ le dimulla a kɔɔfaa teŋgeŋaa ŋuɛɛnuaa cheleŋ le miŋ mal lɛŋnde ndaleŋ. Ma ke naa hawɛilaŋ 48 le miŋ fula o lɛŋnde ndaleŋ niŋ, nduyɛ naapila naŋ nɔ ni miŋ tosa kɛɛsiaa le lɛŋnde leŋ malɔɔ. Miŋ tosa mɛɛ masaleŋ lee dimi yɛ. Okoŋ, miŋ miiŋgu o lɛuve Naŋchiiliaa. Mɛɛ naŋ fuuluu, ma yɔŋ naa o fondaŋnda cheleŋ.

Ma yɔŋ ya o sɔndɔkɔlɔ pilɛ niŋ diolaŋ Olisuŋbale, o Naŋchiiliaa niŋ. Mi tuɛi yooŋgu kɛndɔɔ dimioo a pɛɛkula Baabuilaŋ tosaa yeela, latulu a wanaa dimiaa yooŋgu kɛndiaa ya komal loŋ nda mi che bɛɛ a ve a bɔɔ le. Kɛ mɛɛ paŋgoŋ ŋɔmpum hiou okoŋ kɔɔli, mi lɛuve dimulla le mi miiŋgu Niger a ba ni. O tasela ndɔ, mi kɔndɔfillo bii ya, nduyɛ I wa buulaŋndo. Kɛ I wa a yeemɛi kpeekpei le mi chiikaŋ vɛlɛ a puaapiliaa wa Niger wa.

Mi miiŋgu vɛlɛ Niami. Paale ya fuuluu leŋ diimandɔɔ, mi laŋunɔ leyula Naŋchiliɛinɔ pilɛ sina maa Sei Chɛhowaa ya cho ni. Le hei, mbo kandu ya nyuuniaalaŋ tau a Baabuiyo okɔɔ. Mi pɛɛku ndu Baabuiyo. Nduyɛ mɛɛ o pɛŋgi sikɛɛtiiyo a muɛiyaŋ kolɔɔ bɛndoo, mbo sɔla yiŋɔɔ. Okoŋ kɔɔli, I wa a kɔl kɛndɛ le wallo tosaa latulu a puaapiliaa a ndepiliaa wa o fondaŋnda yɛ yɛlaŋ o Niger niŋnda. Nduyɛ miŋ cha hiouwɔɔ lachi wa yɔŋnɔŋndo o lɛŋnde leŋ niŋndo. Mɛɛ ya kuɛ o tasela ndɔ, Seiyaa Chɛhowaa 31 wa o lɛŋnde leŋ niŋ ni. Kɛ teleŋ ya wa faŋaŋndo loŋ ndo, a wa niŋ 69.

A wɔsi 1977 mɛɛlulaŋ, mi miiŋgu Naŋchiiliaa le pɛɛkoo. Mɛɛ naŋ chii pɛɛku koŋ le lɔɔlaŋ layaa, mi  wana ndoo Kɔɔna Sɔɔŋ le Wanaa Chua Chilaŋ o Lɛuve wa diolaŋ Malikɔm Viko, dimulla le mi veelu diomndaŋ o yau lɛuve Saloŋ ndoo yɔŋ ndo niŋ. Puaapiliaa o lɛuve Saloŋ ndaa yeema puaapilɛnɔ yembu ndoo nɔ kɛndiaa sɔviɔɔ, vɛlɛ mbo chaa Iŋkilisiiye a Filaŋsiiye dimioo nyɛkɛndɛiyo le mbo kɔ wa buɛile ibuŋgaleŋ tosaa o Kini niŋ. Mi Ŋgɔɔ Viko dimulla maa, le wali koŋ tosaa nda pɛɛku ya ni. Kɛ mbo dimulla kpendekele maa, o cho wali bɛɛŋ bɛɛŋ te cho koŋ te. Mbo dimulla aa: “Yiyaŋ nyɛkɛndɛi a ndi okɔɔ tuupa ma tosa kɛɛsiaa.” Mi mulul ndu o foofo koŋ choo aa, “Chɛhowa cho ya viomɔɔ loŋ ni. Lelaŋ, I cho lakɔ.”

Okoŋ, mi luɛi o dɛndɛ choo niŋ le kɔlaŋ Saloŋ. Nduyɛ mi komal puaapiliaa o lɛuve. Mi waŋndo opilɛ o wa chilaŋ chuaa o lɛuve wo dimulla aa, “Ŋ sina tau a wali leMasaa okɔɔ o Kini niŋ te.” Mi che bɛɛ lɛuve Saloŋ wa wali dimiaa yooŋgu kɛndɛ wa tosaŋndo o Kini niŋndo chilaŋ ni, kɛ i ve bɛɛŋ bɛɛŋ le suukaŋndo a wanaa dimiaa yooŋgu kɛndiaa o Kini niŋ te kanifuule, wooluŋ wooluŋ lemasaa wa o lɛŋnde leŋ niŋ. Mi che bɛɛ wanaa wa lɛuve Saloŋ chilaŋ nda wa kindiŋndo o nɛi o nɛi niŋ le ma nɔ hɔlte lɛuve o lɛŋnde leŋ ni, kɛ kposoŋ bɛɛ ndaa tiuwɔ ba le. Le hei, ma dimulla le mi kuɛ o chiee bɛndoo le Kini niŋ Konakili, okoŋ mi nyuna masaleŋ le ma chɛlla mi chal loŋ.

Mɛɛ ya fuuluu Konakili, mi kua o fondaŋ wanaa cho hɔlteŋ le Naŋchiiliaa o Kini niŋnda, nduyɛ mi chiikaŋ a wana wa nda chilaŋndo. Mi dimul ndu a yeemɛi yaa nɔ le yooŋgu kɛndɔɔ dimioo o Kini niŋnde okɔɔ. Kɛ mbo dimulla maa ya chal loŋ te, yɔŋii masaleŋ le bii ya ɔɔ ma yɔŋul la. Mbo dimulla aa, “Miiŋgu Naŋchiiliaa ma kɔ dimi yooŋgu kɛndɔɔ loŋ.” Mi dimul ndu aa, “I chii niŋ kɛɛsiaŋ o kɔl le mi chal Kini.” Okoŋ, mbo poonyial wana bɛndu pilɛ ndoo tosa wallo o chiɛi lemasaa niŋ, le waŋnda dioo kioo le challe o Kini niŋndo yauwo. Nduyɛ mi wana bɛndu koŋ mala ya tau.

Teleŋ biŋgi okoŋ kɔɔli, mi miiŋgu o lɛuve Saloŋ. Okoŋ, mi dimul puaapiliaa maa, masaleŋ le chɛlla le mi chal o Kini niŋ. Mɛɛ nda tuei hei, ma deŋi a nyaaloo le mɛɛ Chɛhowa mala ya, mi masaleŋ le chɛlla le mi chal Kini yɛ.

Chɔŋ wɔsi 1978 kɔ bii wɔsi 1989, I wa buɛile ibuŋgaleŋ tosaa o Kini niŋ a Saloŋ. A teleŋ pilɛ koŋ, I wa vɛlɛ buɛile ibuŋga malalaŋndeŋ tosaa o Laabela niŋ. O tasela ndɔ, mi yaa del a naa teleŋnda bɔɔbɔɔ. Lepum o fondaŋnda yololɛlaŋ hei ndii yɔŋnuŋ ya ni. Kɛ mi puaapiliaa ndaa kindiŋ o nɛi o nɛi niŋ le ma kuɛ a ya o fondaŋ chiɔuwaa.

A teleŋ pilɛ, mi malolɛiyo ɔɔ paliiyo bii ya. Nduyɛ dondopolla wa ya vɛlɛ paaliaŋndo o dembe. Mɛɛ ya seŋgu, mi tuɛi maa, teleŋ ya wa koŋ a naa wo, puaapiliaa wa niŋ kɛɛsiaa le fondaŋ nda wa ya kumbɔɔ wo. A sɔɔŋ palaŋ komalla woŋ kpou, pesiŋ bɛɛ I yiyaŋ le wali ndoo keŋnuŋ ya wo malɔɔ le. Nduyɛ yaa nɔ tiindaŋndo maa, Mɛlɛka kinɛi tiuba ni mbo ke naa manda sɔvɛ sɔviɔɔ kanifuule, o yɔŋ bɛɛ miŋ vi, o nɔla mbo miŋgi naa yoomu.

A wɔsi 1988, mi chiikaŋ naa Dɔkaasi. Ndepilɛnɔ ndoo tusiŋ vɛlɛ mbo kiandu o Mɛlɛka piɛiyo niŋndo o wa ni. Nduyɛ o wa kɔɔfaleŋ tosaa. Mɛɛ naŋ chal o nɔɔ niŋ, miŋ hiau lachi a buɛile ibuŋgaleŋ tosaa. Mi Dɔkaasi tosa wallo kalaŋ le ya tooloo o wallo hoo niŋ, nduyɛ o wa o yɔŋgaŋ le soliŋndo sala. Mi naŋ  kuɛ a ŋpelu le mɛɛliilaŋ 15 le kundalaŋ kɔlaŋ yilɔɔ a wolɔɔlaŋ o lebol. Te naŋ wa pɛ kɔlaŋ kundala wa leviltaŋ yilɔɔ, mi naŋ luɛi o mɔmbillo niŋ. Kɛ naŋ yala fuuluu le kanifuule, mi loolioo a sooŋndaŋ laa wa o nɛi.

Wana kɔl simulaa pila Dɔkaasi cho ni. Le tamaseliiyo, lepum te naŋ wa pɛ kɔlaŋ kundalaŋ yilɔɔ, mi naŋ taŋ peela nɔ kuiya leniŋndaŋ. A teleŋ pilɛ, miŋ chua palɛi i ŋuɛɛnu o tiŋndo niŋ. O kɔla la laŋ niŋ, miŋ komal tallo opilɛ o tambɛiyo. Le hei, miŋ soliŋ dɛndɔɔ kpeku le taŋɔɔ. Mɛɛ naŋ fuuluu o kɔŋgɔɔ pilɔɔ, mi Dɔkaasi chaŋ le mbo fula o dɛndɔɔ niŋ, kɛ mbo siɛɛla okoŋ mbo del o peelo. Nduyɛ yiŋgilaa pila pee koŋ ndoo yiŋgila ni. O faŋaŋ okoŋ kɔɔli, kiuya wa o pee koŋ niŋ. Kɛ naa ŋiɔɔŋ kpou, naŋ chiee saanaa le. Le hei, mi puaa feleŋguaa pum del o peelo okoŋ ma soli ndu. Teleŋnda bɔɔbɔɔ, mi naŋ sɔl luaŋ a nyɛ yɔŋnuŋ paaleleŋ ndo okɔɔ. A koŋ kpou, miŋ hiau lachi a wali naa tosaa.

A wɔsi 1992 kandɔŋndo, mi kɔndɔfillo bii naa, mɛɛ nda dimul naa maa Dɔkaasi cho a folioo. Lelaŋ, naŋ nɔ miŋ tosa kɛɛsiaa te ŋ cho pɛ hiouwɔɔ lachi a kɔɔfale teŋgeŋndeŋ tosaa. Miŋ dimi aa, “Kioo Chɛhowa ke naa ni.” Lelaŋ mɛɛ Dɔkaasi velu, miŋ ke chua naa diolaŋ aa, Jahgift. Wɔsioŋ ŋhiɔɔlu okoŋ kɔɔli, mi Dɔkaasi vialu vɛlɛ po naa tasoo, nduyɛ miŋ ke ndu diolaŋ aa Ɛliki. Chuaa naa ŋiɔɔŋnda haa kpou, ke fula Chɛhowa o ba le naa wo nda cho ni. Le teleŋ tiŋ, chua naa wa wallo tosaa o fondaŋ hiviaa wa Konakili wo. Nduyɛ suŋ suŋ niŋ, buɛi malalaŋndo Ɛliki cho ni.

Mi che bɛɛ Dɔkaasi hiu lachi a kɔɔfale teŋgeŋndeŋ tosaa le, kɛ mbo hiau lachi a kɔɔfale lɔɔlɔɔ leŋ tosaa, mi che bɛɛ o wa chuauwaa naa mandaa. A mala Chɛhowaa, mi hiau lachi a wali lɔɔlɔɔ teŋgeŋndo tosaa. Mɛɛ chuauwaa naa sul kaasoŋnda, mi Dɔkaasi miiŋgu vɛlɛ kɔɔfale teŋgeŋndeŋ tosaa. Suŋ suŋ niŋ, naa ŋiɔɔŋ kpou cho misiɔnalueileŋ tosaa o Konakili niŋ.

Mi kua ba o ba Chɛhowa ndoo vem ya. Teleŋnda bɔɔbɔɔ, mi ya naa laa nuu yiyaŋ a mɛɛ Chɛhowa manda naa vɛlɛ mbo duau naa sala yɛ okɔɔ. Tiindaŋndo dɔwɔɔ o Chɛhowa niŋ mala naa ni, sɔɔŋ kindilaŋ komal wanaa handu nyɛm kiɔɔŋ nuuviaa nyɛ tase o yoomula ndalaŋ niŋnda komal naa le. Ya naa Dɔkaasi pɛɛku niŋ o sɔɔŋ yɔŋnuŋ naa woŋ niŋ maa, Chɛhowa kinɛi cho “wana naa piŋiaa” ni. (1 Kolo. 16:35) I nɔ tiindaŋndo kɛsɛ maa, wana o wana dɔu pɛ tiindaŋndo o Chɛhowa niŋ, ‘mandaa o manda yoomu wana koŋ ni.’—1 Saam. 25:29.