1. Yɛɛ Aisaya, wana ndoo suaa le Mɛlɛka wo wa yɛ chaaŋaa nduaa Isɔluɛiya dimullo?

 MI AISAYA, wana ndoo suaa le Chɛhowa wo tɛɛsiaa a ndu okɔɔ maa, “wana tonyaa” o cho ni. Diomndo hoo “tonyaa” sim le “amiina.” (Aisaya 65:16) Nduyɛ diomndo hoo “amiina” sim ni aa, “o wa lende fɔ,” ɔɔ “i yɔŋnuŋ lende fɔ.” Teleŋ o teleŋ nda soliŋ pɛ diomndo hoo “amiina” kpeku o Baabuiyo niŋ le suɛi a Chɛhowa okɔɔ ɔɔ Chiisu, mi keŋ chɔm maa nyɛ o nyɛ nda dimi, tonyaa o cho ni. Le hei, yooŋgu Aisaya wa chaaŋaa nduaa Isɔluɛiya dimullo wo wa kpendekele. Ndu cho ni maa, teleŋ o teleŋ Chɛhowa dimi isɔɔ pɛ, yɔŋnɔŋndo i yɔŋnuŋ ni. O chɔm niŋ hei kpendekele sanaa a diomnda ndɔla mɛyaalaŋ peeloo.

2. Le yɛɛ naŋ nɔ yɛ miŋ tiindaŋ diomnda mɛyaala Chɛhowalaŋ le chilaŋ, nduyɛ a nyunala kuɛɛ okɔɔ naŋ cho yɛ pɛɛku?

² Baa naa bɛɛ nɔla pa miŋ dɔu laalaŋndo o diomnda mɛyaala Chɛhowalaŋ niŋ le chilaŋ? Mi kiilanɔɔ Pɔɔl tɛɛsiaa a Mɛlɛka okɔɔ maa, teleŋ o teleŋ mbo peelo diomnda ndɔla mɛyaalaŋ. Mbo dimi aa: “Mɛlɛka dimi lachoo le.” (Hibu. 6:18) Kposoŋ bɛɛ maŋgueiyo kum siauwaŋ te. Lende koni, Chɛhowa cho Mɛlɛka tonyaa ni. Lelaŋ, kposoŋ bɛɛ o dimi lachoo le. Le sabu koŋ, ŋ nɔ miŋ tiindaŋ nyɛ o nyɛ o dimi pɛ vɛlɛ a diomnda ndɔla mɛyaalaŋ le chilaŋ. O buŋgɛi hei niŋ, ŋ cho pɛɛku a nyunalaŋ ndaŋ okɔɔ: Yɛɛ Chɛhowa mɛi yɛ lediom le naa kioo o chilaŋ niŋ? Nduyɛ tiindaŋ yɛɛ o ke yɛ naa le naa chɔmndo maa diomnde ndɔle mɛyaaleŋ le cho peelɔŋ?

3. (a) Diomnde mɛyaale kuɛɛ buɛiyaa Chɛhowaa kaala yɛ tau? (Sɔɔŋ Chɔɔmaŋndoŋ 21:​3, 4) (b) Yɛɛ wanaa bɔɔbɔɔ dimi yɛ te ŋ chɔm nda pɛ a diomnde mɛyaaleŋ ndeŋ okɔɔ?

³ Diomnde mɛyaale naŋ cho pɛɛku a leŋ okɔɔ leŋ, buɛiyaa  Chɛhowaa chieeŋndo balɔɔ silɔ hɛnaŋ a leŋ okɔɔ, nduyɛ a kaala leŋ tau. (Nuawɔ Sɔɔŋ Chɔɔmaŋndoŋ 21:​3, 4.) Chɛhowa mɛi lediom maa, teleŋ cho fuuluu, “piɔm ve lɛ niŋ te, chaŋ ve lɛ niŋ te, kɔl tambɛi ve lɛ niŋ te, kɛlɛŋgaa mi nyɛ nɛiyaa wa.” Mi naa a bɔɔbɔɔ soliŋ diomnda kɔl dɛɛniaalaŋ ndaŋ o Baabuiyo niŋ kpeku, te ŋ wa pɛ suɛi a mɛɛ yoomoo wa niŋ o Kpele Hɛnɛkiɔɔ niŋ yɛ okɔɔ o acheleŋnda lo. Yɛɛ wanaa bɔɔbɔɔ dimi yɛ te ŋ chɔm nda pɛ a diomnde mɛyaaleŋ ndeŋ okɔɔ? Lepum mi waŋndo dimi aa, “Diomnde mɛyaale kɛndɛleŋ pila le cho leŋ ni, kɛ I laalaŋ maa le cho peelɔŋ te.”

4. (a) Yɛɛ Chɛhowa ndoo sina yɛ? (b) O faŋaŋ o diomnde mɛyaale Chɛhowa ke naaleŋ kɔɔli, yɛɛ cheleŋ o tosa yɛ?

⁴ I cho tonya maa, mɛɛ Chɛhowa ke kiilanɔɔ Chɔŋ nyina ndɔ diandaa le mbo poonyiaa diomnde mɛyaaleŋ ndeŋ a mɛɛ yoomoo wa niŋ o Kpele Hɛnɛkiɔɔ niŋ yɛ okɔɔ, ndoo sina maa, ŋ cho wa acheleŋnda dimullo a leŋ okɔɔ, te ŋ wa nda pɛ yooŋgu leMasaa dimullo o palɛi nɛi niŋ. Nduyɛ ndoo sina vɛlɛ maa, i cho wa ikala wanaa bɔɔbɔɔ o ba le ma laalaŋ diomnde mɛyaaleŋ ndeŋ. (Aisaya 42:9; 60:2; 2 Kɔliŋ. 4:​3, 4) Mɛɛ, vɛɛ naŋ mala yɛ acheleŋnda, vɛlɛ a naapila le laalaŋndo nɔɔ kɛsɛ maa, diomnda dimiŋ o Sɔɔŋ Chɔɔmaŋndoŋ 21:​3, 4 niŋndaŋ la cho peelɔŋ? Chɛhowa ke naa ko diomnda kɔl dɛɛniaalaŋ ndaŋ te, kɛ mbo ke naa sabula kpeekpeila naŋ nɔ miŋ dɔu tiindaŋndo o laŋ niŋndaŋ. Sabula kuɛɛ o ke yɛ naa?

5. Sabula kuɛɛ naŋ nɔ yɛ le tiindaŋndo dɔwɔɔ o diomnde mɛyaale Chɛhowaleŋ niŋ, le lɛŋndeŋ kpou siiŋguuwo Kpele Hɛnɛkiɔɔ o chilaŋ niŋ, nduyɛ kuɛɛ naŋ saaluŋ yɛ sabulaŋ ndaŋ?

⁵ Sɔɔŋ Chɔɔmaŋndoŋ 21:​5, 6 ke naa sabula naŋ nɔ miŋ dɔu tiindaŋndo o diomnde mɛyaale Chɛhowaleŋ niŋ le lɛŋndeŋ siiŋguuwo Kpele Hɛnɛkiɔɔ o chilaŋ niŋ. Bolle Baabuileŋ ndeŋ le dimi aa: ‘Mi wana wa ichali o kpeŋgbei lemasaa choo wo dimi aa: I cho nyɛ o nyɛ fee miŋgioo toosiaa o sɛnɛi. Mbo chɔɔlu ya dimul aa: Poonyiaa, kanifuule tonya diomndaŋ ndaŋ la cho ni, nduyɛ wana nɔla ma tiindaŋ ndaŋ. Mbo dimulla aa: Nyɛ o nyɛ chuu yɔŋnɔŋ! Ya cho Alifa a Omeka ni, kandɔŋndo a mɛɛlulaŋ.’—Sɔɔŋ. 21:​5, 6a.

6. Le yɛɛ diomnda cho o Sɔɔŋ Chɔɔmaŋndoŋ 21:​5, 6 niŋndaŋ la kindi yɛ tiindaŋ naa o diomnde mɛyaale Mɛlɛkaleŋ niŋ?

⁶ Le yɛɛ diomnda dimiŋ ndaŋ o Baabuiyo niŋndaŋ la kindi yɛ tiindaŋ naa o diomnde mɛyaale Mɛlɛkaleŋ niŋ? Mi yauwo hoo, Revelation Climax suaa a diomndaŋ ndaŋ okɔɔ aa: “I cho ko maa suei Chɛhowa pila o yau choo ni, ɔɔ yau dioo o ke wanaa cho ndu piɛiyo o laalaŋndo choo wa ni maa, o cho hunɔɔ a salalaŋ ndaŋ o chilaŋ niŋ.” b Diomnde mɛyaaleŋ ndeŋ le cho o Sɔɔŋ Chɔɔmaŋndoŋ 21:​3, 4 niŋ. Kɛ o sɔɔŋ 5 a 6 niŋ, diomnda Chɛhowa soliŋ kpeku laŋ la cho ko ma suei o pila o yau choo ni. Kanifuule, mbo ke naa tiindaŋndo maa, diomnda o dimilaŋ la cho peelɔŋ. Ŋ pɛɛkuŋndɔ a diomndaŋ ndaŋ okɔɔ nyɛkɛndɛi, okoŋ miŋ che le sabu naŋ nɔ miŋ dɔu tiindaŋndo o laŋ niŋndo.

7. Diomnda tasela kuɛɛ Chɛhowa dimi yɛ le naa tiindaŋndo kioo, nduyɛ le yɛɛ la cho yɛ la sɔvɛ?

⁷ Diomnda tasela Chɛhowa soliŋ kpeku le naa tiindaŋndo kioo laŋ la cho o sɔɔŋ 5 kandɔŋndo. Loŋ, mi Baabuiyo dimi aa, “Mi wana wa ichali o kpeŋgbei lemasaa choo wo dimi aa.” (Sɔɔŋ. 21:5a) Diomndaŋ ndaŋ la cho bɔɔ la sɔvɛ kanifuule, o teleŋnda yaala Chɛhowa pila soo o yilaŋnde niŋ mi yau Sɔɔŋ Chɔɔmaŋndoŋ suaa a laŋ okɔɔ laŋ tɛɛŋ, teleŋ tasoo cho hoo ni. Lelaŋ, o cho maalikɛinɔ kpaaya bɛndu ɔɔ Chiisu le dimi diomndaŋ ndaŋ te. Kɛ Chɛhowa pila  dimilaŋ ni. Hei chɔm kpendekele maa, ŋ nɔla miŋ tiindaŋ nyɛ dimiŋ okoŋ kɔɔli wo. Le yɛɛ naŋ dimi yɛ lende? Kanifuule, Chɛhowa “dimi lachoo le.” (Tai. 1:2) Lelaŋ, hei chɔm naa maa ŋ tuiba miŋ tiindaŋ nyɛ dimiŋ o Sɔɔŋ Chɔɔmaŋndoŋ 21:​5, 6 niŋndo.

8. Yɛɛ Chɛhowa dimi yɛ le naa kindilallo maa o cho diomnde ndɔle mɛyaaleŋ peelu? (Aisaya 46:10)

⁸ Mi Chɛhowa dimi vɛlɛ aa: ‘I cho nyɛ o nyɛ fee miŋgioo toosiaa o sɛnɛi.’ I cho tonya maa, a siŋgaŋnda yɔŋnuŋ niŋ o chilaŋ niŋndaŋ okɔɔ Chɛhowa wa suɛi ni. Kɛ le mɛɛ o sina maa o cho diomnde mɛyaaleŋ ndeŋ peelu yɛ, mbo dimi maa ‘I cho nyɛ o nyɛ fee miŋgioo toosiaa o sɛnɛi,’ naŋ chaa o cho niŋ ndi tosaa.—Nuawɔ Aisaya 46:10.

9. (a) Mi Chɛhowa dimi maa o ‘cho nyɛ o nyɛ fee miŋgioo toosiaa o sɛnɛi.’ Nyɛm kuɛɛ o cho yɛ miŋgioo toosiaa ŋ sɛnɛi? (b) Yɛɛ cho yɛ yɔŋnɔŋ a “choo choo paandoo” vɛlɛ a “chieeŋ paandoo”?

⁹ Ŋ tofaŋndɔ vɛlɛ diomnda cheleŋ o Sɔɔŋ Chɔɔmaŋndoŋ 21:5 niŋ. Laŋ la cho ni aa: ‘Miŋgioo toosiaa o sɛnɛi.’ Bolle Baabuileŋ ndeŋ le soo a nyɔɔŋ ŋmuuŋ okɔɔ, ŋ Chɛhowa cho hunɔɔ tosa woŋ. O tasoo, o cho chieeŋ dɛnɛ wɔɔŋndo hoo tɛɛmbuu. O diiŋ ndɔɔ, o cho hunɔɔ a chieeŋ sɛnɛiyo. Sɔɔŋ Chɔɔmaŋndoŋ 21:1 dimi aa: “Choo choo paandoo a chieeŋ paandoo faŋaŋ.” “Choo choo paandoo” sim le masɛi Setana a nyina nduaa wɔɔŋnda cho soliŋndo kpeku ve. (Maa. 4:​8, 9; 1 Chɔŋ 5:19) A mɛɛ Baabuiyo chɔm yɛ, ‘chieeŋndo’ sim le waŋnda chieeya o chieeŋndo choo. (Sam 96:1) Lelaŋ, “chieeŋ paandoo” sim le wanaa dɛnɛ wɔɔŋnda. Hei sim nuaa maa Chɛhowa cho hunɔɔ “choo choo paandoo” a “chieeŋ paandoo’’ miŋgi bɛɛndiaa le, kɛ o cho hunɔɔ nyɔɔŋ muŋ tɛɛmbuu kpou. Te o tɛɛmbuu muŋ pɛ, o cho hunɔɔ a “choo choo sɛnɛiyo” vɛlɛ a “chieeŋ sɛnɛiyo.” Hei sim ni maa, masale sɛnɛileŋ le cho wa wana sakpuaa choo ni.

10. Yɛɛ Chɛhowa miŋgi yɛ niŋ toosiaa o sɛnɛi?

¹⁰ Sɔɔŋ Chɔɔmaŋndoŋ 21:5 chɔm naa vɛlɛ nyɛ Chɛhowa dimi a nyɛm o dimi maa o cho miŋgi toosiaa ŋ sɛnɛiyoŋ okɔɔ. Chɛhowa dimi nuaa maa, ‘I cho nyɛ o nyɛ sɛnɛi  miŋgioo toosiaa le.’ Kɛ nuaa o dimi ni aa: ‘I cho nyɛ o nyɛ fee miŋgioo toosiaa o sɛnɛi.’ Hei sim ni maa, Chɛhowa cho chieeŋndo miŋgi toosiaa o sɛnɛi, nduyɛ mbo mala waŋnda chieeya ma simnuŋ wanaa walaŋnda. A mɛɛ Aisaya dimi yɛ, lɛŋndeŋ kpou le cho simnɔŋ kpele kɛndɛ kɛndɔɔ, mɛɛ kpeloo Idɛŋ wa yɛ. Nduyɛ Chɛhowa cho naa pilɛŋ pilɛŋnda kpou miŋgi a sɛnɛi o nɛila yɛ yɛlaŋ choo. Namtaa, wanaa sumɛiya, a bobuaa kpou cho sioŋgɔɔ sɔla. O faŋaŋ okoŋ kɔɔli, o cho vɛlɛ waŋvilɛiyaa miŋgi yoomu.—Aisaya 25:8; 35:​1-7.

11. Yɛɛ Chɛhowa ndoo dimullɛ Chɔŋ le mbo tosa, nduyɛ sabu kuɛɛ o ke yɛ ndu?

¹¹ Yɛɛ cheleŋ Mɛlɛka dimi yɛ le naa tiindaŋndo kioo maa diomnde ndɔle mɛyaaleŋ le cho peelɔŋ? Mbo dimul Chɔŋ aa: “Poonyiaa, kanifuule tonya diomndaŋ ndaŋ la cho ni, nduyɛ wana nɔla ma tiindaŋ ndaŋ.” (Sɔɔŋ. 21:5) Chɛhowa dimul ko Chɔŋ le mbo “poonyiaa” diomnda laŋ te, kɛ mbo chɔm saboo. Mbo dimi aa: “Kanifuule tonya diomndaŋ ndaŋ la cho ni, nduyɛ wana nɔla ma tiindaŋ ndaŋ.” Hei chɔm ni maa, ŋ tiuba miŋ tiindaŋ diomnda ndɔlaŋ ndaŋ. Ŋ nɔ bɔɔ balika melaa le mɛɛ Chɔŋ diikuŋ Chɛhowa le diomndaŋ ndaŋ “poonyiaa” yɛ. Kanifuule, ŋ tiuba miŋ veelu diomndaŋ a diomnde mɛyaale Chɛhowaleŋ okɔɔ le hunɔɔ a Kpele Hɛnɛkiɔɔ o chilaŋ niŋ, vɛlɛ miŋ yiyaŋ a salala naŋ sɔla niŋndaŋ okɔɔ.

12. Le yɛɛ Chɛhowa dimi yɛ aa: “Nyɛ o nyɛ chuu yɔŋnɔŋ!”

 ¹² Yɛɛ Mɛlɛka dimi yɛ okoŋ kɔɔli? Mbo dimi aa: “Nyɛ o nyɛ chuu yɔŋnɔŋ!” (Sɔɔŋ. 21:6) Diomnda Chɛhowa dimilaŋ ndaŋ la cho ko maa, nyɛ o dimi a Kpele Hɛnɛkiɔɔ o chilaŋndo chuu yɔŋnɔŋ. O tiuba mbo dimi hei kanifuule, nyɛ o nyɛ nɔla mbo kuuna nyɛ o dimi wo peelɔŋndo le. Okoŋ kɔɔli, mi Chɛhowa dimi vɛlɛ nyɛ cheleŋ, le naa tiindaŋndo kioo maa diomnde ndɔle mɛyaaleŋ le cho peelɔŋ. Yɛɛ o dimi yɛ?

13. Le yɛɛ Chɛhowa dimi yɛ aa: “Ya cho Alifa a Omeka ni”?

¹³ A mɛɛ naŋ che o kandɔŋndo yɛ, mi Chɛhowa pila suaa o Chɔŋ ndo bɛmbɔɔ leyaa o yilaŋnde niŋ. (Sɔɔŋ. 1:8; 21:​5, 6; 22:13) A teleŋnda laŋ kpou, mbo dimi aa: “Ya cho Alifa a Omeka ni.” Diomndo hoo Alifa cho chomul tasoo le chomulta maKilikii laŋ ni, nduyɛ Omeka cho chomul mɛɛlaa le chomulta laŋ ni. Lelaŋ, dimioo hoo “Ya cho Alifa a Omeka ni” chɔm maa, te Chɛhowa kandu pɛ nyɛ tosa, mɛɛ mbo chii ndu tosa kpou.

14. (a) O dimi niŋ, a teleŋ kuɛɛ Chɛhowa cho yɛ dimi aa, “Alifa,” nduyɛ a teleŋ kuɛɛ o cho yɛ dimi aa, “Omeka.” Chɔmndɔ tamaseliiyo. (b) Yɛɛ Chɛhowa dimi yɛ o Chɛnɛsee 2:​1-3 niŋ le naa malaa miŋ nɔ tiindaŋndo o diomnde ndɔle mɛyaaleŋ niŋ?

¹⁴ Mɛɛ Chɛhowa toosiaa Adam nda Ifi, mbo chɔm nda tuu tase ndoo nɔ le waŋnda chieeya a le lɛŋndeŋ ndo. Baabuiyo dimi aa: “La violu chuauwa, mi la kui mi la pɛ cha o lɛŋndeŋ choo, nduyɛ mi lɛŋndeŋ le wa nya o ba bɛŋgu.” (Chɛ. 1:28) O kpeekpei niŋ, dimioo Chɛhowa wa a teleŋ koŋ ni aa, “Alifa.” Mbo chɔm kpendekele maa teleŋ cho fuuluu, mi chuauwaa mamaa Adam nda Ifi wa simnuŋ walaŋ, ma pɛ cha o chieeŋndo choo, vɛlɛ ma siiŋguu lɛŋndeŋ Kpele Hɛnɛkiɔɔ o chilaŋ niŋ. A teleŋ koŋ, i wa niŋ ko maa dimioo Chɛhowa cho ni aa, “Omeka.” Mɛɛ o chii “choo choo, a lɛŋndeŋ, a nyɛ o nyɛ cho leniŋ toosiaa” mbo dimi nyɛ nɔla mbo ke  naa tiindaŋndo o diomnde ndɔle mɛyaaleŋ niŋndo. Nyɛ o dimi wo cho o Chɛnɛsee 2:​1-3. (Nuawɔ.) Mbo dimi maa, paale ŋɔmmɛuleŋ, paale teŋgeŋndeŋ le cho ndu o hɔl ni. Yɛɛ keŋ sim yɛ? I sim maa, tuu o nɔ le waŋnda chieeya a le lɛŋndeŋ ndo cho peelɔŋ o paale ŋɔmmɛuleŋ mɛɛlulaŋ.

15. Le yɛɛ Setana ndoo yiyaŋ yɛ maa, o tiuba mbo kuuna Chɛhowa tuu tase ndoo nɔ le waŋnda chieeya a le lɛŋndeŋ ndo peeloo?

¹⁵ Mɛɛ Adam nda Ifi tosa nilakalulaŋ, ma simnuŋ wana lahakiaa nduyɛ ma tɛɛŋguu chuauwaa ndaa mamaa hakioo. (Luomaŋ. 5:12) Fulamakɔɔlioo wa ni, i wa ko maa mi Setana tɛɛmbuu tuu Chɛhowa ndoo nɔ le mi waŋnda chieeya pei chieeŋndo, ma diikuŋ ndu vɛlɛ ma simnuŋ wanaa walaŋnda wo. Baa Setana ndoo tiu pa ba mbo kuuna Chɛhowa diomnde ndɔle mɛyaaleŋ peeloo? Naapum mi Setana yiyaŋ maa, Chɛhowa nɔla lɛ niŋ mbo peelu diomnde ndɔle mɛyaaleŋ te. Kɛlɛŋgaa mbo yiyaŋ ma Chɛhowa cho Adam nda Ifi diyɔɔ o foofo koŋ choo, mbo toosiaa pɔnɔɔ a lanɔ cheleŋ le halikpeŋ ma peelu tuu tase ndoo nɔ le waŋnda chieeya wo. Kɛ te Chɛhowa ndoo tosa pɛ keŋ, o wa dimi maa, wana lachoowaa Chɛhowa cho ni. Le yɛɛ? Kanifuule, a mɛɛ Chɛnɛsee 1:28 dimi yɛ, mi Chɛhowa dimul Adam nda Ifi maa chuauwaa ndaa mamaa cho piɔ cha o lɛŋndeŋ choo.

16. Naapum yɛɛ wa yɛ tosa mi Setana ndoo yiyaŋ maa, wana sɔla batiuwaa le wo Chɛhowa cho ni?

¹⁶ Kɛɛsiaa cheleŋ kuɛɛ Setana ndoo yiyaŋ yɛ dɔɔ maa Mɛlɛka cho tosa? Naapum mbo yiyaŋ maa, Chɛhowa cho chɛlɔɔ mi Adam nda Ifi velu chuauwa, kɛ kposoŋ bɛɛ chuauwaa ndaa kaŋ ndaa simnuŋ niŋ wanaa walaŋnda le. (Ikili. 7:20; Luomaŋ. 3:23) Te keŋ ndii yɔŋnuŋ pɛ, o wa vɛlɛ dimi maa, Chɛhowa sɔla batiuwaa le. Le yɛɛ? Kanifuule, kɛɛsiaa koŋ ve tuu Mɛlɛkaa peelu kposoŋ te. Ndu cho ni, le mi chuauwaa mamaa Adam nda Ifi wa pɛ cha o Kpele Hɛnɛkiɔɔ niŋ o chilaŋ niŋ, ma wa Chɛhowa diikɔŋndo, nduyɛ ma simnuŋ walaŋ.

17. Vɛɛ Chɛhowa bii yɛ nilakalula Setana a Adam nda Ifi tosalaŋ, nduyɛ yɛɛ wa yɛ niŋ fulamakɔɔlioo? (Tofa vɛlɛ fotueiyo.)

¹⁷ Pesiŋ bɛɛ kɔllo del Setana o tuu sɔvɛ cheleŋ Chɛhowa ndoo nɔ wo le. (Sam 92:5) Mi Chɛhowa chɔm maa, o cho wana lachoowa le, mɛɛ o chɛl le mi Adam nda Ifi velu chuauwa. Nduyɛ mbo chɔm ma wana sɔla batiuwaa wo o cho ni, vɛlɛ maa nyɛ o nyɛ o dimi pɛ peelɔŋndo o peeluŋ ni. Hei cho kpendekele kanifuule, mbo tosa a sabu le mi ‘kulii’ wana lanɔɔ sɔlaŋ, le halikpeŋ mi chuauwaa Adam nda Ifi cho ndu  diikɔŋ nda sɔla pioŋɔɔ. (Chɛ. 3:15; 22:18) Mi Chɛhowa tosa le mi kulii chuaa, ndi cho yɛ Po ndɔɔ ni, yɔŋgu yoomu ndɔɔ le waŋnda chieeya baŋaa. Naapum pesiŋ bɛɛ Setana ve hei kɔl te. Le yɛɛ? Kanifuule, kɛɛsiaa hoo tɔlnuŋ o kaala yiŋgoloŋ Chɛhowa nɔ le naa wo choo. (Maa. 20:28; Chɔŋ 3:16) Kposoŋ bɛɛ Setana nɔ suliŋndo hoo le. Kɛ, yɛɛ yɔŋnuŋ yɛ niŋ sanaa a kɛɛsiaa Chɛhowa tosa le waŋnda chieeya baŋaa wo? Te Wɔsila Waa Pilɛla Kiliti Cho Wa o Masaleŋ Choo Laŋ la chuu pɛ, chuauwaa mamaa Adam nda Ifi wa, a cho Chɛhowa diikɔŋ nda, cho simnɔŋ walaŋ, ma wa o kpele hɛnɛkiɔɔ niŋ o lɛŋndeŋ choo, mɛɛ mɛɛ Chɛhowa ndoo tuu o tasela ndɔ yɛ. O dimi niŋ, a teleŋ koŋ Chɛhowa cho dimi ni aa, “Omeka.”

18. Sɔɔŋ ŋgaa kuɛɛ Chɛhowa dimi yɛ le naa tiindaŋndo kioo o diomnde ndɔle mɛyaaleŋ niŋ? (Tofa vɛlɛ kɔfoo hoo, “ Sɔɔŋ Ŋgaa Chɛhowa Dimi le Naa Tiindaŋndo Kioo o Diomnde Ndɔle Mɛyaaleŋ Niŋndoŋ.”)

¹⁸ A mɛɛ naŋ pɛɛku o buŋgɛi hei niŋ yɛ, tiindaŋ kuɛɛ naŋ nɔ yɛ, le acheleŋnda chɔmndo maa, diomnde mɛyaale Mɛlɛkaleŋ le hunɔɔ a Kpele Hɛnɛkiɔɔ o chilaŋ niŋ cho peelɔŋ? I tasei, Chɛhowa pila ke naa diomnde mɛyaaleŋ ndeŋ ni. Yau sɔɔŋ Chɔɔmaŋndoŋ dimi aa: ‘Mi wana wa ichali o kpeŋgbei lemasaa choo wo dimi aa: I cho nyɛ o nyɛ fee miŋgioo toosiaa o sɛnɛi.’ O nɔ taasioo, kpaayaa, a yeemɛi le diomnde ndɔle mɛyaaleŋ ndeŋ peeloo. I diiŋ nduɛi, Chɛhowa sina kɛsɛ maa diomnde ndɔle mɛyaaleŋ ndeŋ le cho peelɔŋ. Le sabu koŋ, ndu o hɔl, i cho ko maa le chuu niŋ peelɔŋ. Lelaŋ o dimi ni aa: “Tonya diomndaŋ ndaŋ la cho ni, nduyɛ wana nɔla ma tiindaŋ ndaŋ. . . . Nyɛ o nyɛ chuu yɔŋnɔŋ!” I yaa nduɛi, a mɛɛ diomndaŋ ndaŋ, “Ya cho Alifa a Omeka ni” chɔm yɛ, te Chɛhowa kandu pɛ nyɛ tosa, mɛɛ mbo chii ndu tosa kpou. A tonya, o cho chɔm kpendekele maa Setana cho wana lachoowaa a wana sɔla batiuwaa le wo ni.

19. Te waŋndo laalaŋ diomnde mɛyaale Chɛhowaleŋ le hunɔɔ a Kpele Hɛnɛkiɔɔ o chilaŋ niŋ te, yɛɛ ŋ cho yɛ tosa?

¹⁹ Loonuŋ maa, teleŋ o teleŋ naŋ wa pɛ o wali pollo niŋ, miŋ chɔm acheleŋnda a tiindaŋ naŋ nɔ o diomnda mɛyaala Chɛhowalaŋ niŋndo okɔɔ, mi keŋ chɔɔlu tiindaŋ naa kindi poŋ. Lelaŋ, te a wa pɛ o wali pollo niŋ, ma veelul waŋndo diomndaŋ a mɛɛ Kpele Hɛnɛkiɔɔ wa niŋ o chilaŋ niŋ yɛ okɔɔ o Sɔɔŋ Chɔɔmaŋndoŋ 21:4 niŋ, kɛ mi wana koŋ dimi aa, “Diomnde mɛyaale kɛndɛleŋ pila le cho leŋ ni, kɛ I laalaŋ maa le cho peelɔŋ te,” yɛɛ ŋ cho yɛ tosa? O bɛnda bɔɔ ma veelul ndu diomndaŋ o sɔɔŋ 5 a 6 niŋ, nduyɛ ma tɛɛsial ndu. Chɔm ndu maa, i cho ko ma suei Chɛhowa pila o yau choo ni, le naa malaa miŋ nɔ tiindaŋndo o diomnde ndɔle mɛyaaleŋ ndeŋ niŋ.—Aisaya 65:16.