O IŊDONIISIAA niŋ, ndepiliaa naa a yaa cho o lɛŋnde ibuŋgaleŋ Saŋgi Bɛɛsa niŋ. Mi ndepiliaa haa dimi yooŋgu kɛndɔɔ o lɛŋnde ibuŋgaleŋ ndeŋ niŋ. Waŋnda sina nda tau le yooŋgu kɛndɛ nda dimi wo, a le mɛɛ nda mala waŋnda ma bii Baabuiyo bila yɛ. Kɛ o wɔsiŋ hiou woŋ niŋ, a wa wallo opum tosaa o daa choo paale pilɛ, nduyɛ o cho wali dimiaa yooŋgu kɛndɛ le nda wa tosaa le.

O tasoo, ma tual o mɛŋndaŋ niŋ, nduyɛ ma soli pouta bɛŋndaŋ o kɔŋgɔ. Pouta laŋ latiŋ la wa la bɛndu naŋ chaa bɔllo ni. Okoŋ kɔɔli, mi ndepiliaa kaŋ chal o kpeŋgbeila pɔmbɔlaŋ choo, ma soliŋ nyɛ nda baŋ lɔndimɛiyoŋ ndo kpeku le pouta laŋ pesi pesioo. Mɛɛ nda chii, ma wou laŋ o baawalaŋ niŋ, okoŋ ma kua a laŋ naa nda lɔlla. Okoŋ kɔɔli, ma duau laŋ o bɔlɔla bɛŋndaŋ niŋ le ma kɔ wou laŋ o mɔmbilta bɛŋndaŋ niŋ, le ma soliŋ ndaŋ kpeku le nɛiyo toosiaa. Nduyɛ mi ndaa ke nda nyɛsɔlaa le pouta laŋ.

Ndepilɛnɔ pilɛ wa ndaa tɛɛŋ diolaŋ aa Hulida. Mi bahawɛila ndɔlaŋ la chɛl ndu le teleŋndo chuaa tau o wali koŋ tosaa niŋ, mbo hiau ndepiliaa apiliaa. O paandoo niŋ, mi ndoo soliŋ nyɛsɔlaa ndoo sɔla o wali koŋ niŋndo kpeku le yuŋgu ndɔɔ nyɛm nda hauba woŋ kioo. Kɛ, o wa wali koŋ tosaa a kpeleŋ cheleŋ o kɔl. Ndoo yeema nyɛ mapuulu mala ndu mbo soliŋ JW Library app kpeku wo piondɔɔ. Hulida ndoo sina maa, vidueilaŋ a nyɛm cheleŋ cho o tɛɛŋgii nɛi choo woŋ wa ndu mala le wali pollo tosaa nyɛkɛndɛi, nduyɛ mbo chɔɔlu Baabuiyo biyɔɔ bila.

Le paŋgei ipilɛ a tɛndaa tɛɛŋ, mi Hulida ndoo tosa wali koŋ le hawɛilaŋ latiɔɔŋ idii o idii. Nduyɛ mbo pesi pesi poutaŋ tau. Okoŋ, mbo duau laŋ o mɔmbillo niŋ. O mɛɛlulaŋ kpɔŋ, mbo sɔla nyɛsɔlaa le nyɛ mapuuloo piondɔɔ.

Mi Hulida dimi aa: “Mi che bɛɛ mi saŋga tau le pouta laŋ piɔlɔɔ, kɛ haupa mi puɛɛnuŋ a saŋga nuu okɔɔ, mɛɛ ya kandu nyɛ mapuulu ya pendu wo soliŋndo kpeku le wali pollo tosaa nyɛkɛndɛi a le bɛɛndiaŋndo le bɔŋaŋndaŋ bɛɛŋ bɛɛŋ.” Mbo dimi maa, a teleŋ Naa Kolonaa dello, mi nyɛ mapuulu koŋ mala ndu le bɔŋaŋndaŋ biyɔɔ a kundaa latulu vɛlɛ a wali pollo tosaa. Ŋ cho bɔɔ a kɔl kɛndɛ le mɛɛ Hulida komal kpeleŋ ndɔɔ yɛ.