1-2. (a) Vɛɛ sɔɔŋ palaŋ komal naa hau woŋ velaŋ yɛ a ŋ komal Chuuwaa miiŋgu Chulusalɛm nda? (b) Chɔmndɔ sɔɔŋ palaŋ komal Chuuwa woŋ ŋpum. (Tofa kɔfoo hoo, “ Palɛi Hakai, Sɛkalaya a Ɛsilua ve.”)

 BAA ma buulaŋ pa lepum a chilaŋ okɔɔ? Naapum wali numndo hɛluŋ num, nduyɛ a cho buulaŋndo a mɛɛ ŋ mala niŋ yuŋgu numndo yɛ okɔɔ kanifuule, wooluŋ wooluŋ lemasaa cho o lɛŋnde nyaleŋ niŋ, a cho num nyɛpalaa tusioo choo, ɔɔ waŋnda cho wali dimiaa yooŋgu kɛndɔɔ simullo. Baa sɔɔŋ palaŋ muŋ i kɛ kɛ cho num pa choo? Te lende i cho ni, mɛɛ a cho tɔnɔɔ sɔla tau te ŋ yaasiaa pɛ a mɛɛ Chɛhowa mala Isɔluɛiya o paandoo niŋ yɛ okɔɔ, mɛɛ sɔɔŋ palaŋ kala kalaŋ komal nda.

² Chuuwaa wa Babilɔŋnda ndaa nɔ ma dɔu tiindaŋndo o Chɛhowa niŋ le sulta ndalaŋ a nyɛm kɛŋ nda wa tueiyɔɔ yeela woŋ mɛiyo Babilɔŋ, okoŋ ma kuɛ o lɛŋnde ndaa sina tau le leŋ niŋ. Kanifuule Chuuwaa kaŋ a bɔɔbɔɔ, o Babilɔŋ niŋ nda veluŋ ni, nduyɛ loŋ nda sul ni. Mɛɛ nda fuuluu, o chue bɛɛ teleŋ vilɛi le, mi bahawɛi nyɛsɔlaa a wooluŋ wooluŋ lemasaa komal nda, vɛlɛ mi waŋnda kandu nda simullo. Mi a bɔɔbɔɔ cha ndi ikala le kɔllo handɔɔ o chiɛi Mɛlɛkaa miŋgioo taŋgullo choo. A wɔsi 520 Tuupa mi Chiisu Vialuŋ, mi Chɛhowa viam wanaa ndaa suaa le ndu wa a ŋiɔɔŋ, Hakai nda Sɛkalaya, le nda yoomuaŋ lueiyo ma hiou lachi a wali ndaa kandu wo tosaa. (Hakai 1:1; Sɛka. 1:1) A mɛɛ naŋ cho chɔ yɛ, mi kɔl dɛɛniaa wanaa ŋiɔɔŋaa kaŋ ke Isɔluɛiya wo huŋ a fulamakɔɔli kɛndɔɔ. Sɔŋgɔ wɔsilaŋ 50 okoŋ kɔɔli, Chuuwaa ndaa miiŋgu o lɛŋnde ndaleŋ niŋnda ndaa yeema vɛlɛ kɔl dɛɛniaa. Okoŋ, mi Ɛsilua, wana ndoo sina a sawala Mɛlɛkalaŋ okɔɔ tau wo, mal Babilɔŋ le kɔlaŋ Chulusalɛm le halikpeŋ mbo mala wanaa Mɛlɛkaa ma kɛsi piɛile tonyaleŋ nyɛ tase o yoomula ndalaŋ niŋ.—Ɛsi. 7:​1, 6.

3. Nyunala kuɛɛ naŋ cho yɛ muli o buŋgɛi hei niŋ? (Pulɔwaa 22:19)

 ³ Mi huuluŋ Hakai nda Sɛkalaya poonyiaa woŋ mala wanaa Mɛlɛkaa o paandoo niŋ, le ma hiou lachi a tiindaŋndo dɔwɔɔ o ndu niŋ mi che bɛɛ waŋnda wa nda simullo. Nduyɛ naa bɛɛ huuloŋ muŋ tiuba miŋ mala naa miŋ dɔu tiindaŋndo o Chɛhowa niŋ, mi che bɛɛ sɔɔŋ palaŋ cho naa komallo. (Nuawɔ Pulɔwaa 22:19.) Te ŋ wa pɛ yooŋgu Hakai nda Sɛkalaya poonyiaa wo vɛlɛ a tamasi Ɛsilua wo yaasiaa, ŋ cho mulilaŋ sɔla le nyunalaŋ ndaŋ: Vɛɛ sɔɔŋ palaŋ komal Chuuwaa miiŋgu o lɛŋnde ndaleŋ niŋnda piiliaŋ yɛ nda? Le yɛɛ naŋ nɔ yɛ miŋ hiou lachi a kɔllo handɔɔ o hɛnaŋ Mɛlɛkaa choo, o yɔŋ bɛɛ mi sɔɔŋ palaŋ komal naa? Nduyɛ vɛɛ naŋ chɔɔlu yɛ tiindaŋndo dɔwɔɔ o Chɛhowa niŋ, te sɔɔŋ palaŋ komal naa pɛ?

4-5. Naapum yɛɛ ndoo tosa yɛ mi sɛmbɛ Chuuwa ndaa nɔ le chiɛi Mɛlɛkaa miŋgioo taŋgullo wo tual toolo?

⁴ Chuuwaa miiŋgu Chulusalɛm nda ndaa nɔ wallo tau le tosaa. Haupa ma taŋgul bandu luamaa lasalaa le salalaŋ solioo o Chɛhowa lo, nduyɛ ma kila chiyii chiɛi Mɛlɛkaa. (Ɛsi. 3:​1-3, 10) Kɛ o viu bɛɛ le, mi sɛmbɛ ndaa tual toolo. Le yɛɛ? Kanifuule o cho ko chiɛi Mɛlɛkaa le ndaa nɔ le taŋgullo le. Ndaa nɔ ma taŋgul chiɛilaŋ le ndapila, ma tɔl kpelelaŋ, vɛlɛ ma ke yuŋgula ndalaŋ nyɛdiaa. (Ɛsi. 2:​68, 70) Le handɔɔ lechoo, yaamɔɔwaa ndaa wa nda simullo, nduyɛ a wa kɛɛsiaa tosaa le wali taŋgulaa nda wa tosaa wo kuunaa.—Ɛsi. 4:​1-5.

⁵ Mi bahawɛi nyɛsɔlaa, vɛlɛ a wooluŋ wooluŋ lemasaa piiliaŋ vɛlɛ Chuuwaa ndaa miiŋgu o lɛŋnde ndaleŋ niŋnda. Lɛŋnde ndaleŋ le wa niŋ o kpaaya Paasiaaŋnda ba bɛŋgu. Mɛɛ masa Paasiaaŋnda Sailɔɔ sɔla piɔmndo a wɔsi 530 Tuupa mi Chiisu Vialuŋ, mi masa miiŋgu o foofo ndɔɔ wo Kambasi kindiŋ le puaa chɔuwa dɔwɔɔ naapilɛ, le Ichipi delɔɔ cho a sɔŋgɔɔ. Mɛɛ nda wa kɔlaŋ Ichipi, naapum mi puaa nduaa chɔuwa nyuna Isɔluɛiya le ma ke nda nyɛdiaa, mɛŋndaŋ, a naa lɔlaa. Mi hei chɔɔlu Isɔluɛiya nyɛkindilaa handɔɔ choo. Mɛɛ Masaa Daliɔɔ o tasoo, miiŋgu o foofo Kambasi wo, o kandɔŋndo, wooluŋ wooluŋ lemasaa wa o lɛŋnde leŋ niŋ, nduyɛ waŋnda wa nilakalulaŋ tosaa. Mi sɔɔŋ muŋ kpou tosa mi Chuwaa bɔɔbɔɔ miiŋgu o lɛŋnde ndaleŋ niŋnda kandu buulaŋndo, a mɛɛ nda wa yuŋgula ndalaŋ nyɛm nda hauba woŋ ke yɛ okɔɔ. Mi sɔɔŋ palaŋ komal nda muŋ kpou woŋ tosa, mi a bɔɔbɔɔ yiyaŋ maa o ve teleŋ kɛndɛ le wa koŋ, le chiɛi Mɛlɛkaa miŋgioo taŋgullo le.—Hakai 1:2.

6. A mɛɛ Sɛkalaya 4:​6, 7 dimi yɛ, sɔɔŋ palaŋ cheleŋ kuɛɛ komallɛ vɛlɛ Chuuwa, nduyɛ tiindaŋ kuɛɛ Sɛkalaya ndoo ke yɛ nda?

⁶ Nuawɔ Sɛkalaya 4:​6, 7. O faŋaŋndɔ o bahawɛi nyɛsɔlaa a wooluŋ wooluŋ lemasa komal Chuuwa wo kɔɔli, ndaa nɔ vɛlɛ ma biunuŋ nyɛpalaa waŋnda wa nda tusioo choo wo. A wɔsi 522 Tuupa mi Chiisu Vialuŋ, mi yaamɔɔwaa ndaa sɔla batiuwaa le nda kuunaa chiɛi Mɛlɛkaa miŋgioo taŋgullo. Kɛ mi Sɛkalaya ke Chuuwa tiindaŋndo maa, Chɛhowa cho kpaaya nyina ndɔ diandaa soliŋ kpeku le kpɔkɔsila wa nda lachi laŋ kpou faaŋiaa. Nduyɛ a wɔsi 520 Tuupa mi Chiisu Vialuŋ, mi Masaa Daliɔɔ ke nda dioo le ma hiou lachi a wali taŋgulaa koŋ tosaa. Mbo ke pɛŋ Chuuwa nyɛsɔlaa otiŋ, vɛlɛ mbo dimul masaa ŋbuŋgaa apum le ma mala nda o wali koŋ niŋ.—Ɛsi. 6:​1, 6-10.

7. Mɛɛ Chuuwaa miiŋgu o lɛŋnde ndaleŋ niŋnda handu kɔl ndaa kpou o hɛnaŋ Mɛlɛkaa tosaa choo, salala kuɛɛ ndaa sɔla yɛ?

 ⁷ Mi Chɛhowa soliŋ Hakai nda Sɛkalaya kpeku le wanaa nduaa diomnde mɛyaaleŋ kioo maa, te a handu pɛ kɔl ndaa kpou o chiɛi ndɔɔ miŋgioo taŋgullo choo, o cho nda toolu. (Hakai 1:​8, 13, 14; Sɛka. 1:​3, 16) Mi kɔl dɛɛniaa Chuuwa sɔla Hakai nda Sɛkalaya o ba wo  mala nda, le ma miiŋgu wali taŋgulaa koŋ tosaa a wɔsi 520 Tuupa mi Chiisu Vialuŋ. Nduyɛ o fuuluu bɛɛ wɔsila ŋuɛɛnu le, ma chii ndu taŋgul. Mi Chuuwa handu kɔl ndaa kpou o hɛnaŋ Mɛlɛkaa tosaa choo, mi che bɛɛ mi sɔɔŋ palaŋ komal nda. Le hei, mi Chɛhowa ke nda nyɛm nda hauba woŋ, nduyɛ mbo mala nda ma lo o chaŋyɛi kpɛɛluŋnde niŋ a ndu. Fulamakɔɔlioo wa ni, a wa Chɛhowa piɛiyo a kɔl kɛndɛ.—Ɛsi. 6:​14-16, 22.

8. Vɛɛ diomnda cho o Hakai 2:4 niŋndaŋ la mala yɛ naa, le miŋ handu kɔllo o hɛnaŋ Mɛlɛkaa tosaa choo? (Tofa vɛlɛ tɛɛsiaa amatou.)

⁸ Le mɛɛ nyɛpalaa bɛndoo cho niŋ kpɛɛluŋ yɛ, i cho suɛi sɔvɛ le miŋ loonuŋ maa, ŋ nɔ miŋ diikuŋ sawa Chiisu ke naa le yooŋgu kɛndɔɔ dimioo wo mbo hiou maa paandu. (Maki 13:10) Kɛ lepum, mi i wa ikala naa o ba le kɔllo handɔɔ kpou o wali dimiaa yooŋgu kɛndɔɔ choo kanifuule, ŋ nɔ bahawɛi nyɛsɔlaa, ɔɔ waŋnda cho naa simullo. Yɛɛ mala yɛ naa miŋ kɛsi Masale Mɛlɛkaleŋ nyɛ tasoo o yoomula naalaŋ niŋ? Ŋ nɔ miŋ nɔ tiindaŋndo teleŋ o teleŋ maa, ‘Mɛlɛka Yaawɛɛ nɔ kpaayaa kpou wo’ b cho a naa latulu. O cho naa toolu te ŋ hiou pɛ lachi a Masale ndɔleŋ kɛsioo nyɛ tasoo o yoomu naa niŋ.—Nuawɔ Hakai 2:4.

9-10. Vɛɛ pɔnɔɔ a lanɔ pilɛ che yɛ nyɛ Chiisu dimi o Maatiu 6:33 niŋndo o peelɔŋndo?

⁹ Ŋ tofaŋndɔ tamasi Olɛgi nda Ilina wo. c Pɔnɔɔ a lanɔɔ nda cho ni, nduyɛ a cho kɔɔfaleŋ tosaa. Mɛɛ nda kuɛ malaa yɔŋgoo o kunda pilɛ niŋ o fondaŋ ndaa, mi wali nda wa tosaa le ma nɔ nyɛsɔlaa wo hialuŋ nda kanifuule, nyɛsɔlaa lepɛŋndo wa o lɛŋnde leŋ niŋ. Mi che bɛɛ wɔsioo opilɛ kpulukuu ndaa nɔ wali kpeekpei le, kɛ teleŋ o teleŋ mi ndaa che mɛɛ Chɛhowa wa nda tooloo o nyɛkindilaa koŋ niŋ yɛ, nduyɛ mi ndaa sɔla puaapiliaa a ndepiliaa ndaa malaa o  ba. Yɛɛ mala yɛ nda mɛɛ bahawɛi kala kalaa hoo komal nda? O tasela ndɔ, mi Olɛgi tambu kɔllo tau. Kɛ mbo dimi aa: “Waa kpɔndi kpɔndi a yooŋgu kɛndɔɔ dimioo, mala naa ni miŋ handu kɔllo kpou o nyɛ hiou wa o sɔvɛ o yoomoo niŋndo choo.” Mi ndu nda laa ndɔ hiau lachi a wallo nuuviaa. A koŋ kpou, a wa hiouwɔɔ lachi a yooŋgu kɛndɔɔ dimioo.

¹⁰ Paale pilɛ, mɛɛ nda fula yooŋgu kɛndɔɔ dimioo, mi chaaŋ nda kpɛɛluŋndo buli tiŋ vilɛiyo le mɛɛliilaŋ 100, le nda nyɛdiaa chuuwo o bɔlɔlaŋ latiɔɔŋ niŋ, la piaa cha. Mi Olɛgi dimi aa: “O paaleleŋ choo, miŋ cha mɛɛ Chɛhowa a kundaa buulaŋ le naa yɛ. Ŋ nɔ tiindaŋndo kɛsɛ maa fɛɛŋ bɛɛ Chɛhowa puɛɛnuŋ a buɛiyaa nduaa le, mɛɛ mɛɛ bahawɛi ndaa wa o kala.”—Maa. 6:33.

11. Yɛɛ Chɛhowa cho yɛ tosa te ŋ handu pɛ kɔl naa kpou o wali o ke naa wo choo?

¹¹ Chɛhowa yeema naa miŋ handu kɔl naa kpou o wali cho yoomula waŋnda piŋioo wo choo. A mɛɛ naŋ che o  pɛl 7 wo niŋ yɛ, mi Hakai dɛɛniaa wanaa Mɛlɛkaa le ma kandu chiɛi Mɛlɛkaa miŋgioo taŋgullo. Mi Chɛhowa mɛi lediom maa, te ndaa tosa pɛ nyɛ Hakai ndoo dimul nda wo, o wa nda “salaa dɔwɔɔ.” (Hakai 2:​18, 19) Naa bɛɛ nɔ miŋ nɔ tiindaŋndo maa, Chɛhowa cho sɛmbɛ naa dɔwɔɔ sala te ŋ handu pɛ kɔl naa kpou o wali o ke naa wo choo.

12. Le yɛɛ Ɛsilua nda kunda diiŋ ndɔ mal Babilɔŋ ndo ndaa nɔ yɛ ma dɔu tiindaŋndo o Chɛhowa niŋ?

¹² A wɔsi 468 Tuupa mi Chiisu Vialuŋ, mi Ɛsilua a kunda diiŋ ndɔɔ mal Babilɔŋ, ma kua Chulusalɛm. Ɛsilua nda wanaa kaŋ ndaa nɔ ma nɔ tiindaŋndo o Chɛhowa niŋ. Wanaa wɔɔŋnda wa o nɛila nda wa kei choo laŋ. Nduyɛ ndaa nɔ ma kuɛ a kooliiyoŋ vɛlɛ a kaniŋ humbuŋ masaa ndoo yɔŋgu le chiɛi Mɛlɛkaa miŋgioo taŋgullo wo. (Ɛsi. 7:​12-16; 8:31) Le handɔɔ lechoo, ma bii bila maa Chulusalɛm bɛɛ wa o kpundɔɔ niŋ. Wanaa bɔɔ ve o chioo hoo niŋ te, nduyɛ ndaa nɔ ma miŋgi saasa ndoo balu ndu wo taŋgul. Yɛɛ naŋ pɛɛku yɛ Ɛsilua o ba te o hiŋ pɛ a tiindaŋndo dɔwɔɔ o Chɛhowa niŋ okɔɔ?

13. Yɛɛ mala yɛ Ɛsilua le mbo chɔɔlu tiindaŋndo nɔ o Chɛhowa niŋ? (Tofa vɛlɛ tɛɛsiaa amatou.)

¹³ Ɛsilua ndoo che niŋ mɛɛ Chɛhowa toolu wanaa nduaa o teleŋnda kala kalalaŋ niŋ yɛ. O wɔsiŋ muŋ hiou woŋ bɛŋgu, naapum Ɛsilua wa Babilɔŋ mbo cha mi Masaa Sɛsɛɛ duau sawaa a wɔsi 484 Tuupa mi Chiisu Vialuŋ, le ma diu Chuuwa kpou o masale Paasiaaŋnda bɛŋgu. (Ɛsita 3:​7, 13-15) Yoomu Ɛsilua wo wa o kpundɔɔ niŋ. Mɛɛ Chuuwaa wa o buŋgaŋ muŋ niŋnda kpou tuei a sawa masaa ndoo dɔu wo okɔɔ, mi kɔltaŋ la tambu nda, nduyɛ ma bii sumndo. Naapum le Chɛhowa nyunaa o piɛileŋ niŋ le nɛi chɔmaa. (Ɛsita 4:3) Kɛ yiyaŋndɔ mɛɛ Ɛsilua nda chaaŋaa nduaa Chuuwa wa sinaŋndo yɛ, mɛɛ wanaa ndaa kɛɛsiaa le nda diuwo wa sɔla piɔmndo. (Ɛsita 9:​1, 2) Naapum mi nyɛ yɔŋnuŋ Ɛsilua o teleŋ koŋ niŋndo bɛɛndiaa ndu, le simulta wa ndu komal o chilaŋ niŋndaŋ, nduyɛ mi i kindi tiindaŋ ndɔɔ poŋ maa Chɛhowa tiuba mbo mala wanaa nduaa. d

14. Yɛɛ ndepilɛnɔ pilɛ pɛɛku yɛ mɛɛ Chɛhowa mala ndu o teleŋnda kala kalalaŋ niŋ?

¹⁴ Te Chɛhowa mala naa pɛ o teleŋnda kala kalalaŋ niŋ, mi tiindaŋ naa o ndu niŋ chɔɔlu kalu poŋ. Ŋ tofaŋndɔ tamasi ndepilɛnɔ pilɛ o Yulopi Ba Paaleŋ le Chaŋndo niŋ diolaŋ Anasitaasia. Mbo mal wali o wa tosaa wo le halikpeŋ mbo loŋnuŋ yuŋyeŋ. Mbo dimi aa: “Mɛɛ ya mal wali koŋ, teleŋ ni tasoo wa koŋ ni le mi nyɛsɔlaa chuu ya o ba.” Mbo chɔɔlu dimi aa:  “Mi mal Chɛhowa nyɛ o nyɛ o ba, nduyɛ mi cha kpendekele mɛɛ o buulaŋ le ya yɛ. Lelaŋ o yɔŋ bɛɛ mi wali nuu hɛluŋ ya vɛlɛ, siooŋii bii ya kposoŋ te. Te Finya nuu o choo choo niŋ buulaŋ pɛ le ya hau, o cho vɛlɛ buulaŋ le ya siɔdii.”

15. Yɛɛ mala yɛ Ɛsilua le mbo chɔɔlu tiindaŋndo dɔwɔɔ o Chɛhowa niŋ? (Ɛsilua 7:​27, 28)

¹⁵ Mi Ɛsilua cha mala Chɛhowaa o yoomu ndɔɔ niŋ. Naapum mɛɛ o yiyaŋ a mɛɛ Chɛhowa mala ndu o paandoo niŋ yɛ okɔɔ, mi keŋ mala ndu mbo chɔɔlu tiindaŋ ndɔɔ kindi o ndu niŋ. Tofawɔ nyɛ o dimi wo. Mbo dimi aa: “Kɛndɛi Mɛlɛkɛi i tosa mi masaa . . . cha ya nyina.” (Nuawɔ Ɛsilua 7:​27, 28.) Mi Ɛsilua soliŋ diomnda pilɛ laŋ ndaŋ kpeku bɛmbɔɔ tau o yau nɔ diola ndɔlaŋ ndo niŋ.—Ɛsi. 7:​6, 8-9; 8:​18, 22, 31.

16. Lepum, o sɔɔŋ kuɛɛ niŋ naŋ cha yɛ mala Chɛhowaa o yoomula naalaŋ niŋ? (Tofa vɛlɛ fotueiyo.)

¹⁶ Chɛhowa tiuba mbo mala naa te bahawɛiyo komal naa pɛ. Le tamaseliiyo, te ŋ yeema pɛ wana chua naa le wallo wo nyunaa le mbo ke naa palɛi itiŋ le kɔlaŋ o bɔŋaŋ bɛndoo, ɔɔ le mbo mal naa miŋ kuɛ o bɔŋaŋnda naalaŋ, mɛɛ fondaa naŋ sɔla koŋ ni le chɔɔ mɛɛ Chɛhowa mala naa yɛ. Naapum kɔndɔfillo cho naa biyɔɔ le chɔɔ nyɛ yɔŋnuŋ niŋ okoŋ kɔɔli wo. Nduyɛ te ŋ sɔla pɛ fulamakɔɔli kɛndɔɔ, mi tiindaŋ naŋ nɔ o Chɛhowa niŋndo chɔɔlu kalu poŋ.

17. Vɛɛ Ɛsilua chɔm yɛ maa o wa wana tusiaŋ o teleŋnda kala kalalaŋ niŋ? (Tofa fotueiyo o kɔɔ.)

¹⁷ Mi Ɛsilua tusiŋ, nduyɛ mbo nyuna Chɛhowa le mbo mala ndu. Teleŋ o teleŋ ndoo sɔla pɛ wali kala kalaa le tosaa, mi ndoo piɛi o Chɛhowa lo. (Ɛsi. 8:​21-23; 9:​3-5) Le mɛɛ Ɛsilua ndoo tiindaŋ Chɛhowa yɛ, mi keŋ mala wanaa balu ndu wa le ma toolu ndu, vɛlɛ ma tol tamasi ndɔɔ kɔɔli le tiindaŋndo dɔwɔɔ o Chɛhowa niŋ. (Ɛsi. 10:​1-4) Naa bɛɛ, te ŋ wa pɛ buulaŋ bɛndoo a nyɛm naŋ hauba woŋ ɔɔ a kɛndiaa yuŋgu naa okɔɔ, ŋ nɔ miŋ piɛi o Chɛhowa lo.

18. Yɛɛ mala yɛ naa le miŋ chɔɔlu tiindaŋndo dɔwɔɔ o Chɛhowa niŋ?

¹⁸ Naa bɛɛ te ŋ wa pɛ wanaa tusiaŋ, nduyɛ miŋ nyuna Chɛhowa le malaa, vɛlɛ miŋ chɛl mala chaaŋaa naa laalaŋnda ke naa wo, tiindaŋ naa o Chɛhowa niŋ cho chɔɔlu kalu poŋ. Mi Ɛlika ndepilɛnɔ pilɛ nɔ chuauwa a yaa wo hiau lachi a tiindaŋndo dɔwɔɔ o Chɛhowa niŋ, mɛɛ sɔɔŋ kɔl tambɛiyoŋ komal ndu. O teleŋ biŋgi bɛŋgu, mbo viikuu, nduyɛ mi pɔnɔ ndɔ sɔla piɔmndo. Mɛɛ o wa suɛi a nyɛ yɔŋnuŋ ndu wo okɔɔ, mbo dimi aa: “Kposoŋ bɛɛ a tiuba ma sina mɛɛ Chɛhowa mala num niŋ yɛ le. Mbo soliŋ nɛila teŋgeŋ teŋgeŋndaŋ kpeku le naa malaa. I pɛɛku niŋ maa, mbo muli piɛile nileŋ sanaa a diomnda chaaŋaa niaa dimilaŋ, vɛlɛ a  sɔɔŋ nda tosalla woŋ. Te I chɔm nda pɛ bahawɛi nuu, mi keŋ tosa ndi tɛtɛlɛ le ma mala ya.”

19-20. Yɛɛ naŋ pɛɛku yɛ Chuuwaa ndaa nɔla ma miiŋgu Chulusalɛm te wa o ba?

¹⁹ Ŋ tiu vɛlɛ ba miŋ pɛɛku sɔɔŋ sɔvɛ sɔviɔŋ Chuuwaa ndaa nɔla ma miiŋgu Chulusalɛm te wa o ba. Naapum Chuuwaa kaŋ apum wa a yuwɛiya, ndaa nɔ bahawɛi kɛndiaa, ɔɔ ndaa nɔ kalaŋnda yuŋgoo tau. A koŋ kpou, ma yɔŋguŋ a kɔllo kpou le chaaŋaa nda wa miiŋgoo wa tooloo a nyɛm ndaa hauba woŋ. (Ɛsi. 1:​5, 6) Mɛɛ kunda tase mal Babilɔŋndo fuuluu Chulusalɛm, wɔsilaŋ 19 okoŋ kɔɔli, wanaa ndaa lo o Babilɔŋ niŋnda wa wɔ hiouwɔɔ lachi a toolula ndalaŋ yɔŋndo Chulusalɛm.—Sɛka. 6:10.

²⁰ O yɔŋ bɛɛ miŋ tiu lɛ ba tosaa tau o wali Chɛhowaa niŋ te, ŋ nɔ miŋ nɔ tiindaŋndo maa, Chɛhowa nɔ balika melaa le sɛmbɛ naŋ cho dɔwɔɔ le ndu kɔllo nɛŋioo wo. Vɛɛ naŋ looku yɛ keŋ sina? O palɛi Sɛkalaya ve niŋ, mi Chɛhowa dimul ndu le mbo toosiaa mɔsillo a kooliiyoŋ vɛlɛ a kaniŋ humbuŋ wanaa ndaa lo o Babilɔŋ niŋnda yɔŋ ndoŋ. (Sɛka. 6:11) ‘Mɔsil lemasa’ koŋ wa le nda loonɔŋndo a toolula wanaa kaŋ ndaa yɔŋgu laŋ okɔɔ. (Sɛka. 6:14) Naa bɛɛ nɔ miŋ nɔ tiindaŋndo maa, fɛɛŋ bɛɛ Chɛhowa puɛɛnuŋ a sɛmbɛ naŋ cho dɔwɔɔ le ndu piɛiyo o teleŋnda kala kalalaŋ ndaŋ niŋndo le.—Hibu. 6:10.

21. Yɛɛ cho yɛ naa mala miŋ hiou lachi a tiindaŋndo dɔwɔɔ o Chɛhowa niŋ, mɛɛ mɛɛ sɔɔŋ palaŋ komal naa o chilaŋ niŋ?

²¹ O kpeekpei niŋ, sɔɔŋ palaŋ cho hiouwɔɔ lachi a naa komallo o palɛi mɛɛlɛi hei niŋ. Nduyɛ pɛŋ, naapum sɔɔŋ cho chɔɔlu lewɔu o chilaŋ niŋ. (2 Timo. 3:​1, 13) Kɛ, ŋ nɔ miŋ hiu buulaŋ tau le. Loonuŋ diomnda Chɛhowa ndoo dimul wanaa nduaa o palɛi Hakai ve niŋndaŋ. Mbo dimul nda aa: “I cho wa a nya latulu. . . . Lelaŋ la yɔŋ isiooŋ te.” (Hakai 2:​4, 5) Naa bɛɛ nɔ miŋ nɔ tiindaŋndo maa, Chɛhowa cho wa a naa latulu te ŋ kindiŋ pɛ kpoke le hɛnaŋ ndɔɔ tosaa. Te ŋ dɔu pɛ sɔɔŋ sɔvɛŋ naŋ pɛɛku o huuluŋ Hakai a Sɛkalaya poonyiaa woŋ o wali niŋ, nduyɛ miŋ tol tamasi Ɛsilua wo kɔɔli, keŋ cho naa mala miŋ hiou lachi a tiindaŋndo dɔwɔɔ o Chɛhowa niŋ mɛɛ mɛɛ sɔɔŋ palaŋ komal naa o chilaŋ niŋ.