“Te I wa pɛ wanapilɛyɛi chɔulabaa, nduyɛ mi tambu kɔl, mi Chɛhowa dɛɛniaa ya kɔllo sanaa a chonduŋ fula o Tɛlivisiɔŋ Seiyaa Chɛhowaa choo woŋ.”—Lɔliŋ, Amɛlika.

Kilisiɔŋnda bii niŋ chondoŋ soliŋndo kpeku le Chɛhowa saŋgalaa chɔŋ o sindɔɔ niŋ. (Kolo. 3:16) Te a pɛɛku pɛ chondoŋ muŋ miŋ wa num o kɔl, ŋ nɔla miŋ mala num o yɔŋ bɛɛ ma nɔ yau ŋchondoo ɔɔ nyɛ mapuulu o ba le. Kindiŋ ma tol kɛɛsiaa cho hoo lebɛŋgu naŋndo kɔɔli, le num malaa ma loonuŋ muŋ.

• Veelu diomnda cho o chonduŋ muŋ niŋndaŋ nyɛkɛndɛi, nduyɛ ma sina nyɛ la simndo. A tiuba ma loonuŋ yooŋgulaŋ chɔ chɔ, te a bii pɛ laŋ bila nyɛkɛndɛi. Diomnda cho o chonduŋ naŋ leMasaŋ, chonduŋ cheleŋ vɛlɛ a chondoŋ le chuaambuaa niŋndaŋ kpou, la cho o jw.org choo. Kɔ o Library, okoŋ ma tofa Nyɛchaa.

• Poonyiaa diomnda cho o chonduŋ muŋ niŋndaŋ a ba num. Te a wa pɛ hei tosaa, naapum keŋ cho num mala mi diomnda laŋ la chal num o kɔl, nduyɛ ma loonuŋ ndaŋ.—Ditɔnɔ. 17:18.

• Pɛɛku le muŋ solioo choo choo kpeleŋ. Veelu diomnda cho leniŋndaŋ, ɔɔ wa sondoo miŋgioo lechoo.

• Tofa te a loonuŋ pɛ diomnda cho o chonduŋ muŋ niŋndaŋ. Kindiŋ ma miŋgi sondoo o diomnda cho leniŋndaŋ choo, ma ve bɛɛ laŋ tofa le. Okoŋ kɔɔli, a tofa le chɔɔ mɛɛ kpɛ ŋ tosa hiouwɔɔ lachioo yɛ.