1-2. (a) Le yɛɛ Pɔɔl dimi yɛ maa “kaalaa” hiou kpou ni? (b) Nyunala kuɛɛ naŋ cho yɛ muli?

 MƐƐ Kiilanɔɔ Pɔɔl wa suɛi a laalaŋndo, tiindaŋndo vɛlɛ a kaalaa okɔɔ, mbo mɛɛlu dimi maa: ‘[Suliŋ] hiou . . . kpou wo cho kaalaa ni.’ (1 Kɔliŋ. 13:13) Le yɛɛ o dimi yɛ diomndaŋ ndaŋ? O chilaŋ niŋ, ŋ dou lɛ niŋ laalaŋndo o diomnda mɛyaala Mɛlɛkalaŋ niŋ le chieeŋ sɛnɛiyo ɔɔ miŋ nɔ tiindaŋndo maa diomnda ndɔla mɛyaalaŋ la cho peelɔŋ te kanifuule, laŋ kpou la cho niŋ chuu peelɔŋ. Kɛ ŋ nɔ niŋ miŋ hiou lachi a kaalaa nɔɔ le Chɛhowa vɛlɛ a wanaa nduaa. Nduyɛ pɛŋ, kaala naa le nda cho hiouwɔɔ lachi a hindɔɔ lefafɛɛŋ.

² Le mɛɛ naŋ nɔ niŋ miŋ chɔm kaalaa le puaapiliaa a ndepiliaa naa lefafɛɛŋ yɛ, ŋ pɛɛkuŋndɔ mulilaŋ le nyunalaŋ ndaŋ. O tasoo, le yɛɛ naŋ nɔ yɛ miŋ kaaliaŋ vellaa velle? O diiŋ ndɔɔ, vɛɛ naŋ chɔmnaŋ yɛ kaalaa vellaa velle? O yaa ndɔɔ, vɛɛ naŋ hiau yɛ lachi a kaala naŋ nɔ le opilɛ a o cheleŋndo wo kindioo poŋ?

3. Sabula kuɛɛ naŋ nɔ yɛ le kaaliaŋndo vellaa velle?

³ Le yɛɛ i cho yɛ suɛi sɔvɛ le miŋ kaaliaŋ vellaa velle? Saboo opilɛ cho ni maa, te ŋ chɔm pɛ puaapiliaa a ndepiliaa naa kaalaa, mi keŋ chɔm kpendekele maa Kilisiɔŋaa tonyaa naŋ cho ni. Mi Chiisu dimul kiilaa nduaa aa: “Te la kaaliaŋ pɛ vellaa velle,  waŋnda kpou cho sina maa buɛiyaa niaa nya cho ni.” (Chɔŋ 13:35) Nduyɛ, kaaliaŋndo vellaa velle mala naa miŋ wa o diompilɔɔ niŋ. Mi Pɔɔl dimi maa, “kaalaa . . . mɔɔsa waŋnda kpou diompilɛ ni.” (Kolo. 3:14) Kɛ sabu sɔvɛ cheleŋ cho o naŋ nɔ miŋ kaaliaŋ vellaa velle wo. Mi kiilanɔɔ Chɔŋ poonyial chaaŋaa nduaa laalaŋnda aa: “Wana o wana kaala Mɛlɛka pɛ, mɛɛ o nɔ vɛlɛ mbo kaala puaapilɛnɔ ndɔɔ.” (1 Chɔŋ 4:21) Te ŋ chɔm pɛ puaapiliaa a ndepiliaa naa kaalaa, mi keŋ chɔm kpendekele maa ŋ kaala Mɛlɛka.

4-5. Kaala naŋ nɔ le Mɛlɛka wo chiɛɛliaŋ a kaala naŋ chɔmnaŋ vellaa velle wo. Chɔmndɔ tamaseliiyo.

⁴ Vɛɛ kaala naŋ nɔ le Mɛlɛka wo chiɛɛliaŋ yɛ a kaala naŋ chɔm puaapiliaa a ndepiliaa naa wo? Ŋ tuunuŋ ndɔ ndi o nɛiyo hoo choo. Mi kɔllo tosa wallo latulu a faluŋ cheleŋ o dialloŋ niŋ. Te wana chiɔuwaa wa pɛ naa mɛɛndiaŋndo le sinaa mɛɛ nyɛsuma naŋ ma cho wallo yɛ, naapum mi keŋ mala ndu le sinaa mɛɛ kɔl naa cho wallo yɛ. Yɛɛ naŋ pɛɛku yɛ o hei niŋ?

⁵ Te wana chiɔuwaa wa pɛ tofaa mɛɛ nyɛsuma naŋ ma cho wallo yɛ, mi keŋ mala ndu mbo sina mɛɛ kɔl naa cho wallo yɛ. O nɛi pilɛ koŋ choo, ŋ tiuba miŋ sina mɛɛ kpɛ naŋ kaala Mɛlɛka yɛ, te ŋ mɛɛndaŋ pɛ kaala naŋ nɔ le puaapiliaa a ndepiliaa wo. Te ŋ saaluŋ pɛ maa kaala naŋ nɔ le puaapiliaa a ndepiliaa naa wo cho tolɔɔ toolo, naapum mi keŋ chɔm naa kpendekele maa, kaala naŋ nɔ le Mɛlɛka wo bɛɛ cho tolɔɔ toolo. Kɛ te ŋ wa pɛ chaaŋaa naa laalaŋnda kaalaa chɔmndo teleŋ o teleŋ, mi keŋ chɔm kpendekele maa kaala naa le Mɛlɛka cho o kala poŋ.

6. Le yɛɛ naŋ nɔ yɛ miŋ buulaŋ te kaala naa le puaapiliaa a ndepiliaa naa kandu pɛ tolɔɔ toolo? (1 Chɔŋ 4:​7-9, 11)

⁶ Ŋ nɔ miŋ buulaŋ, te kaala naŋ nɔ le puaapiliaa a ndepiliaa naa wo kandu pɛ tolɔɔ toolo. Le yɛɛ? Kanifuule keŋ chɔm ni maa chaŋyɛi nɛi a Chɛhowa cho luɛiyɔɔ o kpundɔɔ niŋ. Mi kiilanɔɔ Chɔŋ chɔm naa a hei okɔɔ kpendekele mɛɛ o dimul naa aa: “Wana o wana kaala puaapilɛnɔ ndɔ o cho chɔɔ wo le, mɛɛ o nɔla mbo kaala Mɛlɛka o chi wɔ le wo le.” (1 Chɔŋ 4:20) Yɛɛ naŋ pɛɛku yɛ o hei niŋ? Mi Chɛhowa naŋ kɔl a naa te ŋ “kaaliaŋ [pɛ] vellaa velle.”—Nuawɔ 1 Chɔŋ 4:​7-9, 11.

7-8. Ɔɔ nɛilaŋ latiŋ la naŋ chɔmnaŋ kaalaa vellaa velle laŋ?

⁷ O fondaŋnda bɔɔbɔɔ o Baabuiyo niŋ, mi Chɛhowa ke naa sawaa aa, “la kaaliaŋ vellaa velle.” (Chɔŋ 15:​12, 17; Luomaŋ. 13:8; 1 Tɛsa. 4:9; 1 Pitɛ 1:22; 1 Chɔŋ 4:11) Kɛ, o kɔllo niŋ kaalaa cho ni. Nduyɛ, wana o wana tiuba mbo che naa o kɔl te. Lelaŋ, vɛɛ naŋ tiu yɛ ba miŋ chɔm puaapiliaa maa ŋ kaala nda? Ŋ tosa hei sanaa a nyɛ naŋ dimi wo, vɛlɛ a sɔɔŋ naŋ tosal nda woŋ.

⁸ Nɛilaŋ la cho tau la naŋ chɔm puaapiliaa a ndepiliaa naa kaalaa laŋ. Ŋ tofaŋndɔ latiŋ. Baabuiyo dimi aa: “La dimulaŋ tonyalaŋ vellaa velle.” (Sɛka. 8:16) “La wa a kɔl nyulu vellaa velle.” (Maki 9:50) La “wa wana tasoo le waŋnda bɛɛleŋ kioo.” (Luomaŋ. 12:10) “La biyaŋ vellaa velle, mɛɛ Kiliti bɛɛ bii nya yɛ.” (Luomaŋ. 15:7) “La malnaŋ haki fasɛi.” (Kolo. 3:13) “La hiou lachi a maaliaŋndo vellaa velle o dɛnɛla nyala palaalaŋ niŋ.” (Kalee. 6:2) “La hiou lachi a dɛɛniaŋndo vellaa velle.” (1 Tɛsa. 4:18) “La hiou lachi a dɛɛniaŋndo.” (1 Tɛsa. 5:11) “La piɛi le nyapila vellaa velle.”—Chemi. 5:16.

9. Le yɛɛ acheleŋnda kɔltaŋ dɛɛniaa cho yɛ nyɛ sɔviɔɔ opilɛ, o naŋ tosa le nda kaalaa chɔmndo wo? (Tofa vɛlɛ fotueiyo.)

⁹ Ŋ tofaŋndɔ nɛiyo opilɛ o naŋ soo a ndu okɔɔ o pɛl naŋ hiou wo niŋndo. Mi Pɔɔl dimi  aa: “La hiou lachi a dɛɛniaŋndo vellaa velle.” Le yɛɛ acheleŋnda kɔltaŋ dɛɛniaa cho yɛ nyɛ sɔviɔɔ opilɛ, o naŋ tosa le nda kaalaa chɔmndo wo? A mɛɛ yau pilɛ soo a Baabuiyo okɔɔ wo dimi yɛ, diom Pɔɔl soliŋ kpeku le “kɔl dɛɛniaa” wo sim “le waŋndo waa ikɛi, vɛlɛ ma dɛɛniaa ndu kɔllo a teleŋ nyɛkindilaa komal ndu wo.” Lelaŋ, te ŋ dɛɛniaa pɛ chaaŋ naa cho o nyɛkindilaa niŋndo kɔllo, mi keŋ mala ndu mbo hiou lachi a Chɛhowa piɛiyo o laalaŋndo choo. Teleŋ o teleŋ naŋ dɛɛniaa pɛ puaapilɛnɔɔ ɔɔ ndepilɛnɔ naa kɔllo, mi keŋ chɔm kpendekele maa ŋ kaala ndu.—2 Kɔliŋ. 7:​6, 7, 13.

10. Chiɛɛliaŋ yɛɛ cho yɛ waŋndo nyiɛɛye tuiinɔŋndo tɛɛŋ a ndu kɔl dɛɛniaa kioo?

¹⁰ Chiɛɛliaŋndo cho waŋndo nyiɛɛye tuiinɔŋndo tɛɛŋ, a ndu kɔllo dɛɛniaa. O nɛi kuɛɛ choo? Mi nyiɛɛyii waŋndo nɔ le chaaŋ ndɔ ve nyindu ndu le wana koŋ malaa te o wa pɛ saŋgaa. Lelaŋ, nyɛ tase naŋ nɔ miŋ tosa wo cho chaaŋ naa laalaŋndo nyiɛɛye tuiinɔŋndo ni, okoŋ miŋ dɛɛniaa ndu kɔllo. Mi Pɔɔl tɛɛsiaa a Chɛhowa okɔɔ maa, “Finya inyiɛɛyo o cho ni. Nduyɛ, ndu cho Mɛlɛka dɛɛniaa naa kɔltaŋ o isɔɔ o isɔɔ niŋndo ni.” (2 Kɔliŋ. 1:3) O bolle Baabuileŋ ndeŋ niŋ, mi Pɔɔl dimi maa “Finya inyiɛɛyo” Chɛhowa cho ni. Hei sim ni maa, ndu cho Finya tuiinuŋ naa inyiɛɛyo ni, ɔɔ ndu nyiɛɛye fula o ba ni. Nduyɛ mi nyiɛɛyii o tuiinuŋ naa ve nyindu ndu, le mbo dɛɛniaa naa kɔltaŋ o “nyɛpalaa suu o suu niŋ.” (2 Kɔliŋ. 1:4) Mi pee kɛndɛ kɛndɔɔ ke wanaa kolɔɔ bii ya mɛŋma kɛndiaŋ le kolɔɔ. O nɛi pilɛ koŋ choo, mi Chɛhowa dɛɛniaa wanaa cho o nyɛkindilaa niŋnda kɔltaŋ. Vɛɛ naŋ tuallɛ tamasi ndɔɔ kɔɔli, le acheleŋnda nyiɛɛye tuiinɔŋndo a nda kɔltaŋ dɛɛniaa? Nɛiyo opilɛ cho suliŋnda mala naa le waŋnda kɔltaŋ dɛɛniaa laŋ nɔɔ ni. Ɔɔ suliŋnda laŋ latiŋ?

11. A mɛɛ Koloosiaŋnda 3:12 a 1 Pitɛ 3:8 dimi yɛ, ɔɔ suliŋnda cheleŋnda mala naa miŋ nɔ kaala nyindu naa le acheleŋnda kɔltaŋ dɛɛniaa wo?

¹¹ Yɛɛ mala yɛ naa miŋ hiou lachi a kaaliaŋndo vɛlɛ a “kɔltaŋ dɛɛniaŋndo” lepaa o lepaa? Ŋ nɔ miŋ bii mɔnɛi a puaapiliaa naa latulu, miŋ kaala nda, nduyɛ miŋ tosal nda kɛndɛi. (Nuawɔ Koloosiaŋnda 3:12; 1 Pitɛ 3:8.) Vɛɛ suliŋndaŋ ndaŋ la mala yɛ naa? Te ŋ nɔ pɛ nyiɛɛye a suliŋndaŋ ndaŋ, mi keŋ mala naa miŋ dɛɛniaa wanaa wa o nyɛkindilaa niŋnda kɔltaŋ. A mɛɛ Chiisu dimi yɛ, “nyɛ wa waŋndo o piaa o kɔl lo, ndu o suaa ni. Sɔɔŋ kɛndɛŋ cho ŋ kɛsiaa wana kɛndɔɔ o kɔl loŋ, muŋ o soli ni. Nduyɛ sɔɔŋ wɔɔŋ cho ŋ kɛsiaa wana wɔɔŋndo o kɔl loŋ, muŋ koni o soli ni.” (Maa. 12:​34, 35) Puaapiliaa a ndepiliaa naa kɔltaŋ dɛɛniaa cho nɛi sɔviɔɔ opilɛ o naŋ chɔm nda kaalaa wo ni.

12. (a) Te o hiŋ pɛ a kaalaa okɔɔ, le yɛɛ naŋ nɔ yɛ miŋ wa yekeŋ? (b) Nyuna sɔvɛ sɔvɛ kuɛɛ naŋ cho yɛ niŋ hunɔɔ yaasiaa?

¹² Ŋ nɔ miŋ hiou lachi a “kaaliaŋndo vellaa velle.” (1 Chɔŋ 4:7) Kɛ, i cho suɛi sɔvɛ le miŋ loonuŋ maa, mi Chiisu sila naa kpendekele aa, “kaala wanaa bɔɔbɔɔ nɔ wo cho nyulul.” (Maa. 24:12) O cho dimi le Chiisu wa maa buɛiyaa nduaa bɔɔbɔɔ cho pɛŋgi kaalaa chɔmnaŋ ndo le. Kɛ, ŋ nɔ miŋ wa yekeŋ yɔŋii kaala lepɛŋ cho o chieeŋndo hoo niŋndo piiliaŋ naa. A keŋ o kɔl, ŋ yaasiaŋndɔ nyuna sɔvɛ sɔviɔɔ hoo. Yɛɛ mala yɛ naa mi kaala naŋ nɔ le puaapiliaa wo chɔɔlu kalu poŋ?

13. Yɛɛ duau yɛ kaala naŋ nɔ le puaapiliaa wo o tofaa bɛŋgu?

¹³ Nɛiyo opilɛ o mala naa le sinaa mɛɛ kpɛ naŋ kaala puaapiliaa naa yɛ wo, cho mɛɛ naŋ bii sɔɔŋ o yoomu naa niŋ yɛ ni. (2 Kɔliŋ. 8:8) Mi kiilanɔɔ Pitɛ suaa a sɔɔŋ muŋ ipilɛ okɔɔ.  Mbo dimi aa: “I hiou kpou ve, la kaaliaŋ vellaa velle a kɔllo kpou, kanifuule kaalaa kumbu hakila bɔɔbɔɔ.” (1 Pitɛ 4:8) Lelaŋ, mi dialuŋ vilɛi chaaŋaa naa laalaŋnda vɛlɛ a biondɔŋnda ndalaŋ la tosa, mi kaala naŋ nɔ le nda wo luɛi o tofaa bɛŋgu.

14. A mɛɛ 1 Pitɛ 4:8 dimi yɛ, kaala suu kuɛɛ naŋ nɔ yɛ miŋ nɔ le puaapiliaa naa? Chɔmndɔ tamaseliiyo.

¹⁴ Ŋ tofaŋndɔ diomnda Pitɛ dimilaŋ nyɛkɛndɛi. Nyɛ tase o dimi o sɔɔŋ 8 niŋndo chɔm naa kaala suu naŋ nɔ miŋ nɔ wo. Mbo dimi maa, “la kaaliaŋ vellaa velle a kɔllo kpou.” Diom Pitɛ soliŋ kpeku le diomndaŋ ndaŋ “a kɔllo kpou “ wo sim le nyɔɔ “nanɔɔ.” Diom cheleŋ Pitɛ soliŋ kpeku o bolle Baabuileŋ niŋndo, chɔm nyɛ naŋ tosa wo te ŋ kaala pɛ puaapiliaa a ndepiliaa naa a kɔllo kpou. Ndu cho ni, miŋ kumbu hakila ndalaŋ. Ŋ tuunuŋndɔ ndi vɛlɛ o nɛiyo hoo choo. Ŋ dimi wɔ maa, a nɔ tibiiyo a sɔŋndaŋ lechoo tau. Le sɔŋnda laŋ kumbɔɔ, a tiuba ma pɛŋgɛla kolaa o tibii koŋ cho mbo tiu ndu silɔ. Keŋ mala num wana o wana nɔla mbo che sɔŋnda laŋ te. O nɛi pilɛ koŋ choo, te ŋ kaala pɛ puaapiliaa naa a kɔllo kpou, keŋ mala naa miŋ kumbu dialuŋ ndaŋ vilɛiyoŋ a biondɔŋnda ndalaŋ kpou.

15. Te kaala naŋ nɔ puaapiliaa a ndepiliaa naa wo wa pɛ o kala poŋ, yɛɛ keŋ cho yɛ naa mala le tosaa? (Koloosiaŋnda 3:13)

 ¹⁵ Kaala naŋ nɔ le chaaŋaa naa laalaŋnda wo nɔ mbo wa o kala poŋ, le naa mala miŋ mal nda haki o yɔŋ bɛɛ mi i wa ikala naa o ba le ndi tosaa. (Nuawɔ Koloosiaŋnda 3:13.) Te ŋ mal pɛ acheleŋnda haki, keŋ cho chɔm maa kaala naa le nda cho o kala poŋ, nduyɛ maa ŋ yeema Chɛhowa kɔllo nɛŋioo. Yɛɛ cheleŋ mala yɛ naa miŋ mal puaapiliaa naa haki vɛlɛ miŋ fafaŋ tumboo dɔɔnɔŋndo chɔ chɔ, te a benduŋ a naa pɛ ɔɔ ma tosal naa suɛi tɛɛmbuu naa kɔllo ve?

16-17. Yɛɛ cheleŋ mala yɛ naa le miŋ faŋa kɔllo o nyɛ puaapilɛnɔɔ dimi ɔɔ tosa mbo tɛɛmbuu naa kɔllo wo choo? Chɔmndɔ tamaseliiyo. (Tofa vɛlɛ fotueiyo.)

¹⁶ Handu kɔllo o siɔwuŋ puaapiliaa a ndepiliaa numnda choo le, kɛ handu kɔllo o suliŋnda ndala kɛndɛ laŋ choo. Ŋ tofaŋndɔ tamaseliiyo hoo. Ŋ dimi wɔ maa, a cho yelelaŋndo tosaa a puaapiliaa a ndepiliaa numnda latulu, nduyɛ mi la tuɛi teleŋ nya wa diompilɛ wo yeela tau. Kɛ mɛɛ nya hiŋ le ndu chiiyo, mi nya kpou sim naapilɛ le fotueiyo chuaa. Mi wana wa fotueiyo chuaa wo, chua latiɔɔŋ ɔɔ layaa, le mi numpila hɛli o bɛnda wo. Mɛɛ ŋ wa fotueila laŋ tofaa, ma cha maa o fotueiyo opilɛ niŋ, puaapilɛnɔɔ opilɔɔ ve mamɔɔ le. Yɛɛ ŋ tosa yɛ a fotuei koŋ? O kpeekpei niŋ, ma wɔɔsuu ndu kanifuule, a nɔ fotuei pilɛ koŋ lediiŋ, nduyɛ o fotueila tiɔɔŋnda laŋ niŋ kpou, wana o wana cho mamɔɔ, hali puaapilɛnɔ koŋ bɛɛ.

 ¹⁷ Ŋ tuunuŋndɔ fotueila naŋ chua laŋ a sɔɔŋ naŋ kɛsiŋ o kɔlloŋ. Lepum, miŋ chua teleŋndo a puaapiliaa a ndepiliaa naa latulu. Kɛ te o wa yɛ maa a teleŋndo opum, mi puaapilɛnɔɔ ɔɔ ndepilɛnɔɔ dimi ɔɔ mbo tosa suɛi tɛɛmbuu naa kɔllo ve? Yɛɛ naŋ cho yɛ tosa a nyɛ o tosal naa wo? Ŋ nɔ miŋ wɔɔsuu ɔɔ miŋ soliŋ ndi o kɔl, mɛɛ mɛɛ waŋndo wɔɔsuu nuaa fotuei bɛnda le wo yɛ. (Pulɔ. 19:11; Ɛfi. 4:32) Ŋ tiuba miŋ faŋa kɔllo o biondɔŋ puaapilɛnɔɔ ɔɔ ndepilɛnɔ koŋ choo kanifuule, ŋ sina maa o tosal naa niŋ sɔɔŋ kɛndɔŋ tau a teleŋnda cheleŋndaŋ. Sɔɔŋ kɛndɛŋ waa lende naŋ nɔ ni miŋ kɛsiŋ o kɔl, nduyɛ miŋ wa yiyaŋndo a muŋ okɔɔ teleŋ o teleŋ.

18. Sɔɔŋ kuluŋ kuɛɛ naŋ pɛɛku yɛ a kaalaa okɔɔ o buŋgɛi hei niŋ?

¹⁸ Le yɛɛ naŋ nɔ yɛ miŋ hiou lachi a kaala naŋ nɔ le opilɛ a o cheleŋndo wo kindioo poŋ? A mɛɛ naŋ pɛɛku o buŋgɛi hei niŋ yɛ, te ŋ chɔm pɛ puaapiliaa a ndepiliaa kaalaa, mi keŋ chɔm kpendekele maa ŋ kaala Chɛhowa. Kɛ vɛɛ naŋ chɔm yɛ puaapiliaa a ndepiliaa naa kaalaa? Nɛiyo opilɛ o naŋ tosa heiyo cho nda kɔltaŋ dɛɛniaa ni. Nduyɛ le miŋ hiou lachi a “dɛɛniaŋndo vellaa velle,” ŋ nɔ miŋ nɔ nyiɛɛye. Vɛɛ naŋ hiau yɛ lachi a kaala naŋ nɔ le opilɛ a o cheleŋndo wo kindioo poŋ? Ŋ tosa hei te ŋ kindiŋ pɛ o nɛi o nɛi niŋ, le acheleŋnda malɔɔ haki.

19. Le yɛɛ i cho yɛ suɛi sɔvɛ le chaaŋaa naa laalaŋnda kaalaa taama taama o palɛi nɛi hei niŋ?

¹⁹ Le yɛɛ i cho yɛ suɛi sɔvɛ le chaaŋaa naa laalaŋnda kaalaa chɔmndo taama taama o palɛi nɛi hei niŋ? Ŋ tofaŋndɔ sabu Pitɛ yɔŋgu wo. Mbo dimi aa: “Mɛɛlula nyɛ o nyɛ la sɔɔŋguu niŋ kpɛɛluŋ. Lelaŋ, . . . la kaaliaŋ vellaa velle a kɔllo kpou.” (1 Pitɛ 4:​7, 8) Mɛɛ mɛɛlula chieeŋndo hoo suuŋguu fau, yɛɛ naŋ nɔ yɛ miŋ kɛsiŋ o kɔl? Mɛɛ Chiisu wa suɛi a buɛiyaa nduaa okɔɔ, mbo dimi aa: “Waŋnda kpou a cho nya yɛleŋ tul le diola nilaŋ.” (Maa. 24:9) Le miŋ biunuŋ yɛle tulaaleŋ ndeŋ, ŋ nɔ miŋ wa o diompilɔɔ niŋ. A tonya, te kaala naa le puaapiliaa a ndepiliaa naa wa pɛ o kala poŋ, pesiŋ bɛɛ Setana tiu niŋ ba mbo piɔu naa tɛɛŋ te kanifuule, kaalaa “mɔɔsa waŋnda kpou diompilɛ ni.”—Kolo. 3:14; Filipi. 2:​1, 2.