Feleŋguaa, La Simul Masa Nyinaa Wɔɔŋnda
“La wounuŋ wolɔɔla chɔula Mɛlɛka ke nya laŋ kpou. Koŋ tosa ni mi la nɔla mi la kɛɛ sɔɔŋ wɔɔŋ Masa Nyinaa Wɔɔŋnda kɛɛsiaa le nya dɛɛniaa mi la tosa woŋ.”—ƐFISIAŊNDA 6:11.
CHONDOŊ: 79, 140
1, 2. (a) Le sabu yɛɛ feleŋguaa Kilisiɔŋnda cho yɛ hau Setana a nyinaa wɔɔŋnda yomɔɔ? (Tofa fotueiyo o peeleŋ ndeŋ choo.) (b) Yɛɛ naŋ cho yɛ yaasiaa?
MI PƆƆL, wana Chiisu vem ndɔ wo tuu Kilisiɔŋnda a puaa chɔuwa. Ŋ cho o chɔuwo, nduyɛ wanaa kpeekpeiya yaamɔɔwaa naa cho ni! Nduyɛ o cho a waŋchieeya le naŋ cho chɔulabaa le, kɛ a Setana vɛlɛ a nyinaa wɔɔŋnda. Setana nda nyinaa wɔɔŋnda cho niŋ puaa chɔuwa le wɔsilaŋ o waalaŋ niŋ, nduyɛ a chaa chɔulabaa tau. Lelaŋ, mii kuɛ le simnɔŋ maa ŋ nɔla chɔuwo hoo yomɔɔ le, taama taama te ŋ wa pɛ feleŋguaa. Baa feleŋguaa nɔla pa ma yem yaamɔɔwaa kpaaya bɛnduaa haa? Ei, a nɔla. Nduyɛ a cho yomɔɔ! Le sabu yɛɛ? Kanifuule, a cho sɔlaa kpaaya fula Chɛhowa o ba wo. Nduyɛ maa puaa chɔuwaa sɔla pɛɛkoo nyɛkɛndɛi ya, a ‘wounuŋ wolɔɔla chɔula Mɛlɛka ke nda laŋ kpou’ le waa a bɛɛndiaŋ nyɛkɛndɛi le chɔuwo.—Nuawɔ Ɛfisiaŋnda 6:10-12.
Walta Wanaa Chiisuaa 28:16) O buŋgɛi hei niŋ, ŋ cho taamaselii kɛndɛ kɛndɛ koŋ yaasiaa. Ŋ cho vɛlɛ yaasiaa nyɛ feleŋguaa apum dimi a simulta nda sɔla laŋ, vɛlɛ a tɔnɔla wana sɔla le wolɔɔla chɔula naala iMɛlɛkayalaŋ ndaŋ kpou wounɔŋndo wo.
2 Mɛɛ Pɔɔl soliŋ taamaselii koŋ kpeku, naapum a wolɔɔla chɔula puaa chɔuwaa maLuomaŋnda ndaa wounuŋ ndaŋ okɔɔ o wa yiyaŋndo ni. (A wounuŋ pa wolɔɔla chɔulaŋ ndaŋ kpou?
‘TONYAA CHUAA MAA LEYAU’
3, 4. Vɛɛ tonya cho o Baabuiyo niŋndo cho yɛ maa yaule puaa chɔuwaa maLuomaŋnda ndaa yiinuŋ ndeŋ?
3 Nuawɔ Ɛfisiaŋnda 6:14. A chiliŋnde ndaa toosiaa yaule puaa chɔuwaa maLuomaŋnda ni. Mi yaule ndeŋ lee manda po chɔuwo chaŋnda, nduyɛ mi lee bii nyɛ ndoo manda ndu takpaa wo nyɛkɛndɛ kpiŋ. Yau ve hei ipum ndii nɔ nyɛ saa muɛi faŋnde a muɛi biŋgiei nyɛkɛndɛiyo. Te po chɔuwo ndoo yiinuŋ pɛ yauleŋ ndeŋ o chaŋ kpiŋ, mi ndoo kuɛ o chɔuwo a tiindaŋndo.
Tonya naŋ cho pɛɛkoo o Diom Mɛlɛkaa niŋndo cho naa malaa le pɛɛkula lachoowalaŋ kpakpalaa
4 Maa leyau, tonya naŋ cho pɛɛkoo o Diom Mɛlɛkaa niŋndo cho naa malaa le pɛɛkula lachoowalaŋ kpakpalaa. (Chɔŋ 8:31, 32; Chɔŋ Tasoo 4:1) Nduyɛ mɛɛ naŋ hiau lachi a tonya cho o Diom Mɛlɛkaa niŋndo kaalaa fau, lende koni i wa tɛtɛlɛ le sawala Mɛlɛkalaŋ biyɔɔ ni, ɔɔ le wounɔŋndo ‘nyɛ manda naa takpaa’ wo. (Sam 111:7, 8; Chɔŋ Tasoo 5:3) Vɛlɛ te ŋ bii pɛ tonyaa bila nyɛkɛndɛi, ŋ nɔla miŋ manda ndu yaamɔɔwa naa o ba.—Pitɛ Tasoo 3:15.
5. Le yɛɛ naŋ nɔ yɛ miŋ dimi tonyaa lɔɔlɔɔ?
5 Le mɛɛ tonyala fula o Diom Mɛlɛkaa niŋndaŋ la cho nyɛ sɔvɛ le naa yɛ, ŋ diikuŋ nyɛ Baabuiyo dimi wo nduyɛ miŋ dimi tonyaa lɔɔlɔɔ. Choolaŋ la cho wolɔɔ chɔuwo opilɛ o Setana tiu waŋnda ba wo ni. Mi choolaŋ la yɔŋul wana dimi laŋ ndo, a wana laalaŋ o laŋ niŋndo. (Chɔŋ 8:44) Mi che bɛɛ wanaa lahakiaa naŋ cho ni, ŋ nɔ miŋ kindiŋ o nɛi o nɛi niŋ le choolaŋ kiɔɔ dimioo. (Ɛfisiaŋnda 4:25) Mi hei wa ikala. Abi nɔ wɔsilaŋ 18 wo dimi aa, “Tonyaa dimioo lɔɔlɔɔ bɛnda ko le, taama taama te choolaŋ dimioo soli num pɛ o suɛi pum niŋ.” Kɛ le yɛɛ ndoo kindiŋ yɛ le tonyaa dimioo lɔɔlɔɔ? Mbo dimi aa, “Te I dimi pɛ tonyaa, mi nɔ kɔl iyama walaŋndo Chɛhowa o hɔl. Nduyɛ wanaa velu ya wa a chaaŋaa niaa sina maa a nɔla ma laalaŋ a ya.” Vitoliaa nɔ wɔsilaŋ 23 wo dimi aa, “Te a dimi pɛ tonyaa nduyɛ ma sim le laalaŋnda numndaŋ, lepum, ma handu num nyɛkindilaa choo. Kɛ ma sɔla lɔɔlɔɔ fulamakɔɔlila kɛndɛ kɛndɛlaŋ. Siooŋii ve num te, ma sinaŋ maa a sɔɔŋguu Chɛhowa ikɛi kpɛɛluŋ, nduyɛ mi wanaa kaala numnda ke num bɛɛleŋ.” A che le sabu i cho suɛi sɔvɛ le ‘tonyaa chuaa maa leyau’ teleŋ o teleŋndo?
Tonya cho maa leyau wo (Tofa pɛlta 3-5)
‘SAKPOYƐI CHUAA LE WAA NYƐ MANDA NAA TAKPAA WO’
6, 7. Le yɛɛ nda tuu yɛ sakpoyɛi a nyɛ manda po chɔuwo takpaa wo?
6 Teleŋnda bɔɔbɔɔ a chiliŋuŋ vilɛiyoŋ ndaa toosiaa nyɛ ndoo manda po chɔu maLuomaŋndo takpaa wo ni. Kpokpola ŋchiliŋndaŋ la wa la bayiaa a yuei le ndu kindaa. Mi boo ichiliŋ koŋ ndoo kumbu vɛlɛ po chɔu koŋ choŋgulaŋ mɔɔsu. Nduyɛ mi nyɛ koŋ ndoo
kuuna ndu vɛlɛ sɔɔŋ pum tosaa. Ndoo nɔ mbo wa mɛɛndaŋndo teleŋ o teleŋ le chɔɔ maa nyɛ koŋ kumbu ndu takpaa nyɛkɛndɛi. Kɛ mi nyɛ koŋ ndoo manda kɔl ndɔɔ a faluŋ cheleŋ yɔŋi muɛi faŋnde ɔɔ chiŋɔleŋ le boli muŋ!Ŋ nɔ taasi bɔɔ le kɔl naa mandaa le
7 Ŋ tuu nyɛ manda koŋ po chɔuwo takpaa wo a sawala sakpola Chɛhowalaŋ, la manda “kɔl” naa, ɔɔ yiyaŋnda naalaŋ ndo. (Pulɔwaa 4:23) Po chɔuwo siŋga boo ichiliŋ manda ndu takpaa wo a o nda toosiaa a yau visioo wo le. Lende koni, ŋ nɔla miŋ siŋga sawala Chɛhowalaŋ a sakpoyɛi okɔɔ a mɛɛ yiyaŋnda naalaŋ la cho a sakpoyɛi okɔɔ yɛ le. Ŋ nɔ taasi bɔɔ le kɔl naa mandaa le. (Pulɔwaa 3:5, 6) Lelaŋ naŋ nɔ ni miŋ mɛɛndaŋ lɔɔlɔɔ te ‘nyɛ manda naa takpaa wo’ cho wɔ pɛ kɔl naa mandaa.
8. Le sabu yɛɛ naŋ nɔ yɛ miŋ diikuŋ sawala Chɛhowalaŋ?
8 Baa ma yiyaŋ pa teleŋndaŋ lapum maa sawala Chɛhowalaŋ la kuuna num waa hɛnɛkɛ, ɔɔ le sɔɔŋ ŋ yeema woŋ tosaa? Daaniɛɛ nɔ wɔsilaŋ 21 wo dimi aa, “Mi wanaa pɛɛku ya wa a chaaŋaa niaa o sukuu ndaa mam ya le mɛɛ ya cho sawala Baabuiyo biyɔɔ yɛ. Le teleŋndo opum, mi kɔl sikpa nuu hialuŋ ya nduyɛ mi tambu kɔl.” Kɛ vɛɛ o cho yɛ niŋ suŋ suŋ yiyaŋndo? Mbo dimi aa, “O mɛɛlulaŋ kpɔŋ, mi cha tɔnɔla cho o sawala Baabuiyo biyɔɔ niŋndaŋ. Mi ‘chaaŋaa’ niaa apum kandu kooma nda ve o ndapila niŋ te waŋ chuaa, nduyɛ mi acheleŋnda fulaŋ o sukuu. I wa bɔɔ suɛi imɔnɛ le chɔɔ mɛɛ yoomula ndalaŋ la mɛɛlu wa yɛ. Chɛhowa cho naa bɔɔ mandaa.” Madisiŋ nɔ wɔsilaŋ 15 wo dimi aa, “Chɔulabaa kɛsɛ i cho le ya ni le sawala Chɛhowalaŋ biyɔɔ, nduyɛ le kiɔɔ nyɛ chaaŋaa niaa yiyaŋ maa o bɛnda wo tolɔɔ kɔɔli.” Lelaŋ, yɛɛ chuaambɔɔ hoo tosa yɛ? “Mi loonuŋ yapila maa diola Chɛhowalaŋ la cho ya choo. Nduyɛ maa tɔɔndaŋndo cho wolɔɔ chɔu Setana wuu ya a ndu wo ni. Te I yem pɛ chɔulaba ya cho wo, mi naŋ kɔl tau a yapila.”
Sakpoyɛi cho maa nyɛ manda wana takpaa wo (Tofa pɛlta 6-8)
‘WAA O BƐƐNDIAŊ LE WAŊNDA YOOŊGU KƐNDƐ MƐLƐKAA DIMULLO A KƆL NDƆ NYULOO O KƆƆ, NDU CHO KƆƆVƐILA NAŊ WOUNUŊ NDAŊ NI’
9-11. (a) Kɔɔvɛila kuɛɛ Kilisiɔŋnda wounuŋ yɛ? (b) Yɛɛ mala yɛ naa le waa hɛnɛkɛ o yooŋgu kɛndɔɔ dimioo niŋ?
9 Nuawɔ Ɛfisiaŋnda 6:15. Po chɔu maLuomaŋndo ndoo kue o chɔuwo le te ndoo wounuŋ kɔɔvɛila ndɔlaŋ te. Kpeŋgbeleŋ ndaa toosiaa kɔɔvɛilaŋ ndaŋ ni, nduyɛ la kala kala la wa ni. Kɛ kɔɔvɛilaŋ ndaŋ laa nɛi wana peloŋ te. Nduyɛ mi po chɔuwo ndoo kela a laŋ o siɛɛla le.
10 Mi kɔɔvɛila puaa chɔuwaa maLuomaŋnda ndaa wounuŋ ndaŋ laa mala nda le chɔuwo yomɔɔ. Mɛɛ lende koni kɔɔvɛila sim ndaŋ lewundu laŋ la mala naa le waŋnda ‘yooŋgu kɛndɛ Mɛlɛkaa dimullo a kɔl nyuloo okɔɔ’ ni. (Aisaya 52:7; Luomaŋnda 10:15) Kɛ teleŋndaŋ lapum, kɔl sikpaa yeemaŋ tau le yooŋgu kɛndɔɔ dimioo. Boo nɔ wɔsilaŋ 20 ndo dimi aa, “Siooŋnde wa ya le chaaŋaa niaa naŋ wa o toŋgo pilɔɔ niŋ o sukuu wa yooŋgu kɛndɔɔ dimullo. I che maa siɔmbulaŋ la wa ya ni. Te I yiyaŋ niŋ pɛ a keŋ, I sina le sabu keŋ yɔŋnuŋ ya wo le. Suŋ suŋ, I cho a kɔl kɛndɛ le chaaŋaa niaa yooŋgu kɛndɔɔ dimullo.”
11 Feleŋguaa Kilisiɔŋaa bɔɔbɔɔ saaluŋ maa ma wa hɛnɛkɛ le yooŋgu kɛndɔɔ dimioo te
a bɛɛndiaŋ fɛŋ pɛ nyɛkɛndɛi. Yɛɛ ŋ nɔ yɛ ma tosa le bɛɛndiaŋndo? Chuliaa nɔ wɔsilaŋ 16 ndo dimi aa, “Mi kɛsi yaulaŋ o bɔlɔ ni sukuuwo niŋ, nduyɛ mi yaŋ nilaŋ o sɔɔŋ chaaŋaa niaa naŋ cho o toŋgo pilɔɔ niŋnda laalaŋ ndoŋ a yiyaŋnda ndalaŋ. Okoŋ, I nɔla mi yiyaŋ a nyɛ mala nda wo okɔɔ. Te I bɛɛndiaŋ pɛ, mi soo o nda lo a nyɛ ke nda tɔnɔɔ kpeekpeiyo wo.” Makɛŋsi nɔ wɔsilaŋ 23 wo dimi aa, “Te a wa pɛ wana ikɛndɛ nduyɛ ma wa wana nila yaŋaa kɛndɛ, a nɔla ma sina simul chaaŋaa numnda nɔ wo. Mi tosa a sabu le diomndaŋ veeloo o yaula nda poonyiaa le feleŋguaa laŋ niŋ kpou. O nɛiyo hoo choo, I nɔla mi chɔm chaaŋaa niaa o Baabuiyo niŋ ɔɔ o jw.org nyɛ mala nda wo.” Bɛɛndiaŋndo nyɛkɛndɛi le yooŋgu kɛndɔɔ dimioo cho ko maa “kɔɔvɛila” bii num peloŋ mɔɔsu laŋ wounɔŋndo.Peluŋ cho ŋ bɛɛndiaŋ ndoŋ (Tofa pɛlta 9-11)
“TIINDAŊNDO CHO MACHUAA MAA NYƐ KALA KALA PUAA CHƆUWA BII O BA MAA BOO BƐNDU WO”
12, 13. ‘Chiŋɔma leyiŋ’ kuɛɛ Setana nɔ yɛ?
12 Nuawɔ Ɛfisiaŋnda 6:16. Mi po chɔu maLuomaŋndo ndoo kuɛ a boo bɛndoo o ba o chɔuwo. Mi boo koŋ ndoo kumbu ndu chɔŋ o choŋgulaŋ mbo tol o wulaŋ yɔŋi nda boli ndu a mɔɔŋ, balloŋ, vɛlɛ a chiŋuaŋ.
13 ‘Chiŋɔma leyiŋ’ kuɛɛ Setana soliŋ yɛ lepum kpeku le num viɔɔ? Kɛlɛŋgaa mbo chiŋ-alaŋ num a choolaŋ dimioo a Chɛhowa okɔɔ. Setana yeema num ma yiyaŋ maa Chɛhowa kaala num te, nduyɛ maa wana o wana buulaŋ a num te. Ida nɔ wɔsilaŋ 19 wo dimi aa, “Mi yaa yiyaŋ daandi daandi maa Chɛhowa cho ya ikɛi kpɛɛluŋ te, nduyɛ maa o yeema mbo wa chaaŋ ni le.” Yɛɛ o tosa yɛ te o nɔ pɛ yiyaŋ waa naa? “Bɔŋaŋndaŋ la cho nyɛ kala kala ke tiindaŋ nuu yoomuaŋ ndo ni. Mi yaa bii laŋ, kɛ yaa muli nyuna le. I wa yiyaŋndo maa wana o wana ndoo yeema mbo tuei nyɛ yaa nɔ le dimioo wo le. Kɛ suŋ suŋ, mi bɛɛndiaŋ le bɔŋaŋndaŋ, nduyɛ mi kindiŋ le mulilaŋ la tiɔɔŋ ɔɔ la yaa yɔŋgoo. I kendu, kɛ mi sinaŋ nyɛkɛndɛi te I tosa pɛ keŋ. Nduyɛ puaapiliaa a ndepiliaa cho bɔɔ wanaa kɔl dɛɛniaa. Lɔɔlɔɔ te I mal pɛ bɔŋaŋndaŋ mi wa miiŋgoo o bɛɛ, mi sina maa Chɛhowa kaala ya.”
14. Yɛɛ suɛi yɔŋnaŋii Ida ve pɛɛku yɛ naa?
14 Boo manda po chɔuwo wo ndoo feŋaŋ lechoo le, nduyɛ ndoo henduŋ lechoo le. Kɛ a mɛɛ suɛi yɔŋnaŋii Ida ve pɛɛku naa yɛ, o cho lende le tiindaŋ naa cho le. Mi tiindaŋ naa hindu ɔɔ mbo dɔɔnaŋ, o nɔla mbo kendu ɔɔ mbo yɔŋyɔla. O lo a naapila. (Maatiu 14:31; Tɛsaloniaŋ Diiŋ Ndɔɔ 1:3) Le mi ‘tiindaŋ cho maa nyɛ kala kala puaa chɔuwa bii o ba maa boo bɛndu wo’ manda naa, ŋ nɔ miŋ hiou lachi a ndu tosaa o bɛndu nduyɛ a ndu kindioo!
Tiindaŋ cho maa boo bɛndu wo (Tofa pɛlta 12-14)
PIŊI MƐLƐKA PIŊI NAA WO CHO MƆSIL CHƆU NAŊ WOUNUŊNDO NI
15, 16. Vɛɛ tiindaŋ naa cho yɛ maa mɔsil?
15 Nuawɔ Ɛfisiaŋnda 6:17. Mi po chɔu maLuomaŋndo ndoo wounuŋ mɔsillo le ndu bolleŋ, kɛsei, a hɔlla mandaa. Teleŋndaŋ lapum, mi mɔsil koŋ ndoo nɔ nyɛ saa le mi po chɔuwo bii ndu o ba.
16 Mɛɛ mɔsil koŋ ndoo manda po chɔu koŋ hullaŋ yɛ, lende koni tiindaŋ naa le pioŋɔɔ sɔlaa manda yiyaŋ naa ni. (Tɛsaloniaŋ Tasoo 5:8; Pulɔwaa 3:21) Tiindaŋndo mala naa ni le hɔlla mulioo o sɔɔŋ Mɛlɛka mɛi lediom ndoŋ choo, nduyɛ bahawɛila naalaŋ la nɔla mi la tɛɛmbuu naa kɔllo le. (Sam 27:1, 14; Walta Wanaa Chiisuaa 24:15) Kɛ te ŋ yeema pɛ mi tiindaŋ naa piŋi naa, o nɔ mbo wa nyɛ kpeekpeiyo le naa. Ŋ nɔ miŋ wounuŋ “mɔsil” naa o lebol, kɛ ŋ nɔ miŋ bii ndu o ba le!
17, 18. (a) Vɛɛ Setana hui yɛ naa le miŋ suŋguŋ mɔsil naa o lebol? (b) Vɛɛ naŋ chɔm yɛ maa Setana hui naa le?
17 Vɛɛ Setana hui yɛ naa le miŋ suŋguŋ mɔsil naa o lebol? Yiyaŋndɔ a nyɛ ndoo kindiŋ le Chiisu tosallo wo. Setana ndoo sina maa Chiisu wa simnɔŋ masaa le waŋchieeya. Kɛ nyɛ tasoo, Chiisu ndoo nɔ mbo saŋga nduyɛ mbo vi. Okoŋ kɔɔli, ndoo nɔ mbo chum haaa mi teleŋ Chɛhowaa ndoo fuuluu le mbo simnuŋ Masa. Kɛ mi Setana yeema le mi Chiisu keleŋa simnɔŋ masa. Mi Setana chua buŋgɛi maa, le pilɛ bɛɛ Chiisu ndoo sooluu ndu pɛ, o wa simnɔŋ masaa le chieeŋndo o foofo koŋ choo. (Luku 4:5-7) Setana sina vɛlɛ maa Chɛhowa mɛi lediom le naa nyɛm kɛndɛ kɛndɔŋ kioo o chieeŋ sɛnɛiyo niŋ. Kɛ ŋ nɔ miŋ chum le mi diomnde mɛyaaleŋ ndeŋ le simnuŋ nyɛ kpeekpeiyo. Le teleŋndo hoo wɔ, ŋ nɔ miŋ sɔla bahawɛilaŋ tau. Kɛ Setana yeema naa miŋ nɔ yoomu tɛtɛlɔɔ suŋ suŋ. O yeema mi hei wa nyɛ tasoo le naa, nduyɛ miŋ kɛsi Masale Mɛlɛkaleŋ nyɛ diiŋ ndɔɔ.—Maatiu 6:31-33.
18 Setana nɔla Kilisiɔŋaa feleŋguaa bɔɔbɔɔ hui le. Le taamaseliiyo, Kiaana nɔ wɔsilaŋ 20 ndo dimi aa, “I sina maa Masale Mɛlɛkaleŋ
kinɛi naŋ tiindaŋ ni le bahawɛila naalaŋ kpou solioo.” Vɛɛ tiindaŋ chuaambɔɔ hoo piiliaŋ yɛ yiyaŋ ndɔɔ nduyɛ a mɛɛ o cho yoomu ndɔɔ biyɔɔ yɛ? O cho ndu malaa le yiyaŋndo maa le teleŋ biŋgi koni nyɔɔŋ o chieeŋndo hoo niŋ cho ni. Tuupa mbo soliŋ yoomuma nduaŋ kpou kpeku le wallo sɔlaa o chieeŋndo hoo niŋ, Kiaana cho teleŋ ndɔɔ a yoomuma nduaŋ soliŋndo kpeku o Chɛhowa piɛiyo niŋ.Mɔsil chɔu piŋi naa wo (Tofa pɛlta 15-18)
DIOM MƐLƐKAA CHO “MUƐI CHƆUVE NI”
19, 20. Vɛɛ ŋ chɔɔlu yɛ pɛɛku nyɛkɛndɛi le Diom Mɛlɛkaa soliŋndo kpeku?
19 Mi puaa chɔuwaa maLuomaŋnda ndaa soliŋ mɔɔŋ faŋndoŋ kpeku. Bandii mɔɔŋ muŋ wa sɛŋtimitɛilaŋ 50 (iŋchisiilaŋ 20). Puaa chɔuwaa kaŋ ndaa chaa bɔɔ mɔɔŋ muŋ soliŋndo kpeku kanifuule, mi ndaa pɛɛku lepaa o lepaa le keŋ tosaa.
20 Mi Pɔɔl, wana Chiisu vem hɔlte ndɔ wo dimi maa Diom Mɛlɛkaa cho ma muɛi. Chɛhowa ke naa ndu. Kɛ ŋ nɔ miŋ pɛɛku le ndu soliŋndo kpeku nyɛkɛndɛi le tiindaŋ naa mandaa, ɔɔ le yɛlɛmiaalaŋ tosaa o yiyaŋ naa niŋ. (Kɔliŋtiaŋ Diiŋ Ndɔɔ 10:4, 5; Timoti Diiŋ Ndɔɔ 2:15) Vɛɛ ŋ chɔɔlu yɛ pɛɛku nyɛkɛndɛi? Sibastiaŋ nɔ wɔsilaŋ 21 dimi aa, “Mi poonyiaa suɛi ipilɛ te I wa pɛ diomndaŋ veeloo o bolle Baabuile kɛ kɛ fee niŋ. I cho chuuŋgiaa bolii Baabui ya kaala ve.” Hei cho ndu malaa le yiyaŋnda Chɛhowalaŋ biyɔɔ bila nyɛkɛndɛi. Mi Daaniɛɛ dimi vɛlɛ aa, “Te I wa pɛ diomndaŋ veeloo o Baabuiyo niŋ, mi hɛli bolii Baabui ya yiyaŋ maa i mala waŋnda o wali pollo niŋndo. I saaluŋ maa mi waŋnda muli nyɛkɛndɛi, te a che pɛ maa a kaala Baabuiyo, nduyɛ ma wa kindiŋndo o nɛi o nɛi niŋ le nda malaa.”
Diom Mɛlɛka cho maa muɛi chɔuve (Tofa pɛlta 19-20)
21. Le yɛɛ ŋ nɔ miŋ yɔŋ isiooŋ le Setana a nyinaa wɔɔŋnda le?
21 A mɛɛ naŋ pɛɛku taamaseliila feleŋguaa o buŋgɛi hei niŋ yɛ, ŋ nɔ miŋ yɔŋ isiooŋ le Setana a nyinaa wɔɔŋnda le. I cho tonya maa a nɔ kpaayaa, kɛ a hiu Chɛhowa kpaaya le. Nduyɛ a cho wa achal lefafɛɛŋ te. A cho nda dɔwɔɔ o sooŋ nɔ la mɛɛlu le wo niŋ, nduyɛ a cho lɛ nɔla wana o wana yɔŋul le Wɔsiŋ Waa Pilɛ Kiliti Cho Wa o Masaleŋ Choo Wo le. Nduyɛ te boondii keŋ i chuu pɛ, a cho tambei sɔla. (Sɔɔŋ Chɔɔmaŋndoŋ 20:1-3, 7-10) Ŋ sina yaamɔɔnɔ naa, kaala ndɔla kaŋgalaa laŋ, a kpeleŋ ndɔɔ. Kɛ a mala Chɛhowaa, ŋ nɔla miŋ simul ndu!