1. Mɛɛ Adam nda Ifi tosa hakioo, yɛɛ Chɛhowa ndoo chɔɔmuu yɛ a yaamɔɔnɔ naa okɔɔ?

ADAM ndoo sina maa kɛuwo suu le. Lelaŋ, mɛɛ o sina maa mi kɛuwo suaa o Ifi lo, kɛlɛŋgaa mi Adam sina maa wanachiee cho o inyinaya wo ndoo soo ni. (Chɛnɛsee 3:​1-6) Adam nda Ifi ndaa sina wana wa koŋ o inyinaya wo le. Kɛ mi Adam hɛli le mial koŋ tolɔɔ kɔɔli, nduyɛ mbo tosal Finya ndɔ kaalaa o choo choo niŋ nila kalulaŋ. (Timoti Tasoo 2:​14) O foofo koŋ choo, mi Chɛhowa kandu sɔɔŋ chɔɔmuuwo tau a yaamɔɔnɔ dɛnɛ wɔɔŋ koŋ okɔɔ, nduyɛ mbo mɛi le diom maa o cho hunɔɔ tambei sɔla. Kɛ mi Chɛhowa sila maa le teleŋndo hoo, wana inyinaya soliŋ koŋ kɛuwo kpeku le suɛiyo cho simul wanaa kaala Mɛlɛka wa kpou.—Chɛnɛsee 3:​15.

2, 3. Le yɛɛ Chɛhowa suu tau a Setana okɔɔ tuupa mi Mɛsaya huŋ te?

² Chɛhowa dimul naa diola maalikɛinɔ tosal ndu koŋ nila kalulaŋ ndo le. * (Tofa tɛɛsiaa amatou.) Chɔŋ a teleŋ nila kalulaŋ la yɔŋnuŋ Idɛŋ ndo, mi wɔsilaŋ la hiau 2,500 malaŋ Chɛhowa  chɔɔmuu wana nila kalu koŋ. (Choobu 1:​6) Waŋnda sina maa ndu cho “Setana” ni. Diola laŋ la sim ni, “Wana Simul Waŋndo Wo.” Yaulaŋ la yaa kinɛi o yaula maHibuluilaŋ niŋ, Koloniko Tasoo, Choobu, a Sɛkalaya soo a Setana okɔɔ ni. Le yɛɛ sɔɔŋ bɔɔ dimiŋ a yaamɔɔnɔɔ hoo okɔɔ tuupa mi Mɛsaya huŋ te?

³ Chɛhowa suu tau a Setana okɔɔ vɛlɛ a sɔɔŋ o tosa woŋ o Yaula maHibuluilaŋ o Baabuiyo niŋ te. Sabu Yaula maHibuluilaŋ o Baabuiyo niŋ wa le waŋnda malaa ma sina Mɛsaya nduyɛ ma tol ndu kɔɔli ni. (Luku 24:​44; Kaleesiaŋnda 3:​24) Mɛɛ Mɛsaya hiŋ, mi Chɛhowa soliŋ ndu kpeku a buɛiyaa nduaa le ma chɔɔmuu sɔɔŋ naŋ sina tau a Setana okɔɔ woŋ, vɛlɛ a maalikɛiyaa tol ndu kɔɔli wa. * (Tofa tɛɛsiaa amatou.) Hei bɛnda bɔɔ kanifuule, Chɛhowa cho Chiisu a wanaa pɔyaŋnda soliŋ kpeku le Setana a tol kɔɔliaa nduaa tɛɛmbuuwo.—Luomaŋnda 16:​20; Sɔɔŋ Chɔɔmaŋndoŋ 17:​14; 20:​10.

4. Le yɛɛ siooŋii nɔ mii wa naa le Masa Nyinaa Wɔɔŋnda le?

⁴ Pitɛ, wana Chiisu vem hɔlte ndɔ wo tɛɛsiaa Setana maa “kpɔkuŋ bɛndoo,” nduyɛ mi Chɔŋ vɛɛlu ndu aa ‘kɛuwo’ a ‘tambalakaa.’ (Pitɛ Tasoo 5:​8; Sɔɔŋ Chɔɔmaŋndoŋ 12:​9) Kɛ siooŋii nɔ mii wa naa le Masa Nyinaa Wɔɔŋnda le. Kpaaya ndɔɔ nɔ kpeleŋndo. (Nuawɔ Chemisi 4:​7.) Chɛhowa, Chiisu, a maalikɛiyaa dɔu tiindaŋndo o Chɛhowa niŋnda cho naa mandaa. A mala ndaa, ŋ nɔla miŋ simul yaamɔɔnɔ naa. Kɛ, ŋ nɔ miŋ sina mulilaŋ le nyunala sɔvɛlaŋ la yaa. Vɛɛ kpɛ Setana nɔ yɛ kpaayaa le waŋnda huiyo? Vɛɛ o kindiŋ yɛ le waŋnda huiyo? Nduyɛ ɔɔ sɔɔŋ o tiuba tosa le woŋ? Ŋ muliŋ ndɔ nyunalaŋ ndaŋ nduyɛ miŋ che sɔɔŋ naŋ pɛɛku woŋ.

5, 6. Le sabu yɛɛ masɛi waŋchieeya nɔla mii hiŋ a siŋgaŋnda waŋnda hau ba tau tau laŋ te?

⁵ Mi maalikɛiyaa bɔɔbɔɔ tual Setana kɔɔli le Mɛlɛka simullo. Tuupa mi Mɛŋma Koŋgi Bɛnduaŋ ma huŋ, mi Setana tɔɔndaŋ apum le kaa ihini nɔɔlɛiyo tosaa a waŋlaanduaa. Mi Baabuiyo tɛɛsiaa hei o nɛiyo hoo choo maa, te looŋ o halaa niŋ muŋ wa nyɛ piɔuwaa sala yaa pɛ, mi tambalaka fula koŋ o choo choo niŋ mbo del lɛŋndo koondiaa kundaa opilɔɔ kinɛi. (Chɛnɛsee 6:​1-4; Chudi 6; Sɔɔŋ Chɔɔmaŋndoŋ 12:​3, 4) Mɛɛ maalikɛiya haa mal yuŋgu Mɛlɛkaa, ma luɛi o ba Setana wo bɛŋgu. Ŋ nɔ miŋ yiyaŋ maa kunda laasi laasioo le maalikɛiyaa nila kaluaa kaŋ cho le. Setana kila masale ndɔleŋ o chieeŋ inyinayaa niŋ, mbo wa taamasi Masale Mɛlɛkaleŋ tuulaa. O siiŋguu ndupila masaa, nduyɛ mbo kɔɔna nyinaa wɔɔŋnda, mbo ke nda kpaayaa, vɛlɛ mbo siiŋguu nda masaa le chieeŋndo.—Ɛfisiaŋnda 6:​12.

⁶ Setana cho kɔɔna ndɔɔ soliŋndo kpeku le masɛi waŋchieeyaa kpou nɛi chɔmaa kioo. Ŋ nɔla miŋ dimi maa hei cho tonya kanifuule, mbo chɔm Chiisu “lɛŋnde kpou  o chieeŋndo choo,” nduyɛ mbo dimul ndu aa, “I nɔla mi tosa ma wa masaa o lɛŋnde hei choo kpou, . . . nduyɛ wana o wana ya I hɛnaŋ ndu ya ke ni.” (Luku 4:​5, 6) Masɛi bɔɔbɔɔ cho sɔɔŋ kɛndɔŋ tosaa le wanaa cho nda o ba bɛŋgu wa, nduyɛ apum yeema kɛsɛ ma mala waŋnda. Kɛ masa wanachiee kɛ kɛ nɔla mbo hiŋ a siŋgaŋnda naŋ hau ba tau tau laŋ te.—Sam 146:​3, 4; Sɔɔŋ Chɔɔmaŋndoŋ 12:​12.

7. O fula wɔ o masɛi kɔɔli, vɛɛ Setana cho yɛ piɛile lachoowaleŋ a chieeŋ leyulaa soliŋndo kpeku? (Tofa fotueiyo o peele naŋ kandu leŋ choo.)

⁷ Setana a nyinaa wɔɔŋnda cho vɛlɛ piɛile lachoowaleŋ a chieeŋ leyulaa soliŋndo kpeku le “ŋwaŋnda chiee kpou” huiyo. (Sɔɔŋ Chɔɔmaŋndoŋ 12:​9) Setana cho piɛile lachoowaleŋ soliŋndo kpeku le choolaŋ pɛŋgɛlaa a Chɛhowa okɔɔ. Vɛlɛ o kindiŋ niŋ pɛɛŋ le diola Chɛhowalaŋ vioŋɔɔ. (Chɛluimaya 23:​26, 27) Nduyɛ fulamakɔɔlioo cho ni, wanaa yiyaŋ kɛsɛ maa a cho Mɛlɛka piɛiyo wa cho nyinaa wɔɔŋnda piɛiyo. (Kɔliŋtiaŋ Tasoo 10:​20; Kɔliŋtiaŋ Diiŋ Ndɔɔ 11:​13-15) Setana cho vɛlɛ chieeŋ leyulaa hoo soliŋndo kpeku le choolaŋ pɛŋgɛlaa, mɛɛ choolaŋ maa kaniei a nyɔɔŋ tosa mi waŋnda wa a nyaale cho naa yɛ. (Pulɔwaa 18:​11) Wanaa laalaŋ choola waa naa laŋ simnuŋ chiaa le “nyɛ sɔlaa” kɛ o cho le Mɛlɛka le. (Maatiu 6:​24) O yɔŋ bɛɛ mi ndaa kaala Mɛlɛka paandu, kɛ kaala ndaa le nyɛm kiɔɔŋ simnuŋ o kala poŋ, nduyɛ mbo tuau kaala nda nɔ le Mɛlɛka wo.—Maatiu 13:​22; Chɔŋ Tasoo 2:​15, 16.

8, 9. (a) Sɔɔŋ sala tiɔɔŋ kuɛɛ naŋ pɛɛku yɛ o kaa Adam nda Ifi wo niŋ, vɛlɛ a maalikɛiyaa nila kaluaa? (b) Le yɛɛ o bɛnda yɛ miŋ sina maa Setana cho chieeŋndo nɛiyo chɔmndo ni?

⁸ Ŋ pɛɛku sɔɔŋ sɔviɔŋ ŋmuuŋ o kaa Adam nda Ifi tosa wo niŋ, vɛlɛ a maalikɛiyaa nila kaluaa. O tasoo, ŋ pɛɛku maa kumboŋ sala tiɔɔŋ cho ni, nduyɛ ŋ nɔ miŋ hɛli kumbuei ipilɛ. Ŋ nɔla miŋ wa o kumbuii Chɛhowɛi choo ɔɔ kumbuii Setana ve. (Maatiu 7:​13, NW) O diiŋ ndɔɔ, ŋ pɛɛku maa tɔnɔlaŋ nyɛɛmbuiinii wanaa tol Setana kɔɔli wa sɔla ni. Mi Adam nda Ifi sɔla dioo le kɛɛsiaa tosaa a ba nda o kɛndɔɔ tɛɛŋ a o wɔɔŋndo. Nduyɛ mi nyinaa wɔɔŋnda sɔla kpaayaa opum masɛi waŋchieeya choo. (Chɛnɛsee 3:​22) Kɛ kumbuii Setana ve hɛlioo huŋ lɔɔlɔɔ a fulamakɔɔlila wɔɔŋndaŋ. Tɔnɔla bɛɛ cho le!—Choobu 21:​7-17; Kaleesiaŋnda 6:​7, 8.

⁹ Le yɛɛ o bɛnda yɛ miŋ sina maa Setana cho chieeŋndo nɛiyo chɔmndo ni? O mala naa le yiyaŋ bɛnda wo nɔɔ a masɛi okɔɔ, nduyɛ mbo nyindu naa le yooŋgu kɛndɔɔ dimioo. Ŋ sina maa Chɛhowa yeema naa miŋ ke masɛi bɛɛleŋ. (Pitɛ Tasoo 2:​17) O yeema naa miŋ ke sawala ndalaŋ bɛɛleŋ te o yɔŋ pɛ mi sawala laŋ la tɛɛmbuu la ndɔlaŋ te. (Luomaŋnda 13:​1-4, NW) Kɛ o sina vɛlɛ maa ŋ nɔ miŋ wa yuŋyeŋ, nduyɛ pɛ pɛ bɛɛ ŋ nɔ miŋ toolu yalale chieeŋndo ɔɔ masa wanachioo le. (Chɔŋ 17:​15, 16; 18:​36) Le mɛɛ naŋ sina maa Setana cho kindiŋndo le diola Chɛhowalaŋ vioŋɔɔ a ndu tɔɔ tɛɛmboo yɛ, ŋ nɔ miŋ tosa nyɛ o nyɛ naŋ tiuba le waŋnda  pɛɛkoo tonyaa a Mɛlɛka naa okɔɔ. Ŋ hɛnaŋ bɔɔ le mi waŋnda veelu naa a diola ndɔlaŋ nduyɛ le laŋ soliŋndo kpeku. Kaala Mɛlɛkaa cho bɔɔ nyɛ sɔvɛ mbo hiau kaala ikanioo ɔɔ nyɔɔŋ.—Aisaya 43:​10; Timoti Tasoo 6:​6-10.

10-12. (a) Vɛɛ Setana ndoo soliŋ yɛ malaleŋ kpeku le maalikɛiya tɔɔndaŋndo? (b) Yɛɛ naŋ pɛɛku yɛ o nyɛ maalikɛiyaa kaŋ a tosa wo niŋ?

¹⁰ Nɛila tosa wallo chɔ chɔ laŋ Setana soliŋ kpeku le acheleŋnda huiyo ni. Le nda baa tiuwo le tosaa nyɛ o yeema wo, teleŋndaŋ lapum, malale o soliŋ kpeku leŋ le cho tɔɔndaŋndo ni. Nduyɛ teleŋndaŋ lapum, mbo kindiŋ le nda nyɛkindilaa handɔɔ choo.

¹¹ Mi Setana soliŋ malaleŋ ndeŋ kpeku le maalikɛiya chalaŋ tɔɔndaŋndo. Kɛlɛŋgaa mbo mɛɛndaŋ nda le teleŋ vilɛi le sinaa tɔɔndaŋ o tiu nda ba wo. Mi maalikɛiya apum chua malaleŋ ndeŋ, nduyɛ ma tosa kaa ihinioo a waŋlaanduaa. Wanaa niilu latanda dialuŋ kalaa dɛnɛ wɔɔŋnda chuauwaa nda velu wa wa ni. (Chɛnɛsee 6:​1-4) O fulawɔ o kaa ihini nɔɔlɛiyo soliŋndo kpeku le maalikɛiyaa kaŋ tɔɔndaŋndo, kɛlɛŋgaa mi Setana dimul nda vɛlɛ maa a cho kpaayaa sɔla waŋchieeya choo. O nɛiyo hoo choo, naapum Setana wa kindiŋndo le kuunaa suɛi Chɛhowa ndoo dimi le peelɔŋndo a “yɛyii wana lanɔɔ” okɔɔ ve. (Chɛnɛsee 3:​15) Kɛ Chɛhowa chɛl ndu mbo sɔla batiuwaa le. Mbo huŋ a Mɛŋma Koŋgi Bɛnduaŋ, ma tɛɛmbuu tuu kɛ kɛ Setana a nyinaa wɔɔŋnda ndaa nɔ wo.

¹² Yɛɛ naŋ pɛɛku yɛ o hei niŋ? Kaala nɔɔlɛilaŋ a kaa heelaŋndo cho malale keleŋa wana biyɔɔ leŋ ni. Maalikɛiyaa tol Setana kɔɔli wa wa fɛŋ o choo choo niŋ le wɔsiŋ bɔɔbɔɔ a Mɛlɛka pila! Kɛ a koŋ fau, mi a bɔɔbɔɔ chɛl le mi yeemaŋ wɔɔŋndoŋ luɛi nda o lakɔl, nduyɛ mi yeemaŋ muŋ kiandu nda niŋ poŋ. Ŋ nɔ miŋ loonuŋ lɔɔlɔɔ maa mɛɛ mɛɛ naŋ viou Chɛhowa piɛiyo, mi yeemaŋ wɔɔŋndoŋ vil puundoŋ naa o lakɔl. (Kɔliŋtiaŋ Tasoo 10:​12) Le sabu koŋ naŋ nɔ ni miŋ wa kɔlta naalaŋ yaasiaa teleŋ o teleŋ, le miŋ soli yiyaŋnda nɔɔlɛilaŋ a kaa heelaŋ kɛ kɛ cho naa o lakɔl!—Kaleesiaŋnda 5:​26; nuawɔ Kolosiaŋnda 3:​5.

13. Malale suu Cheleŋ kuɛɛ Setana cho yɛ soliŋndo kpeku, nduyɛ vɛɛ naŋ kpakpala yɛ leŋ?

 ¹³ Malale suu cheleŋ Setana soliŋ kpeku leŋ le cho yeemɛi nɔɔ le sinaa a nyinaa wɔɔŋnda okɔɔ ni. Hau, mbo kindiŋ le piɛiyii lachoowɛi a yelelaŋndaŋ soliŋndo kpeku le mi waŋnda nɔ yeemɛi o nyinaa wɔɔŋnda niŋ. Vidueilaŋ, pisultaŋ a nyɛm mapuuloŋ, a yelelaŋnda cheleŋ tosa mi sɔɔŋ nyinaa wɔɔŋnda ŋ simnuŋ nyɛ kɛndɛ. Vɛɛ naŋ kpakpala yɛ malaleŋ ndeŋ? Ŋ nɔ miŋ wa kɔɔna Mɛlɛkaa kɔl le naa kioo yelelaŋnda kɛndɛlaŋ a la wɔɔŋnda o lepula le. Ŋ nɔ miŋ pɛɛku kɔlta naala iyamalaŋ, nduyɛ miŋ soliŋ sawala mandaala Chɛhowalaŋ kpeku le hɛlioo nyɛ bɛnda wo. (Hibuluiya 5:​14) Nduyɛ te ŋ nɔ pɛ ‘kaala kpeekpeiyo’ le Mɛlɛka, ŋ cho chuaŋ chuaa tosa a taasi. (Luomaŋnda 12:​9) Wana nɔ kaala kpeekpei le wo tosa suɛi o dimi ve le. Lelaŋ, te ŋ wa pɛ yelelaŋndo hɛlioo, ŋ nɔ miŋ nyunaŋ aa, ‘I cho pa diikɔŋndo sawala mandaala ya cho acheleŋnda dimullo le ma tol kɔɔli laŋ? Vɛɛ wanaa ya cho Baabuiyo pɛɛkoo wa, ɔɔ miiŋgula makɔɔla nilaŋ la cho yɛ yiyaŋ te a che pɛ yelelaŋ ya hɛli wo?’ Te ŋ diikuŋ pɛ sawala mandaala naŋ dimul acheleŋnda le ma tol kɔɔli laŋ, o wa tɛtɛlɛ le miŋ kpakpala malale Setana leŋ.—Chɔŋ Tasoo 3:​18.

14. Vɛɛ Setana kindiŋ yɛ le naa nyɛkindilaa handɔɔ choo, kɛ vɛɛ naŋ sim yɛ yi?

¹⁴ Mi Setana kindiŋ vɛlɛ le naa nyɛkindilaa handɔɔ choo, nduyɛ mbo luei naa siooŋnde le miŋ mal lo lechoo naa chɔmndo o Chɛhowa lo. Le taamaseliiyo, mbo nyindu masaleŋ le mi le kuuna wali naa dimiaa yooŋgu kɛndɔɔ. Mbo nyindu chaaŋaa naa naŋ tosa wallo latulu wa, ɔɔ chaaŋaa naa o sukuu le naa mamɔɔ le mɛɛ naŋ cho sawala Baabuiyo tolɔɔ kɔɔli yɛ. (Pitɛ Tasoo 4:​4) Mi Setana soliŋ vɛlɛ kpeku wanaa naŋ cho Chɛhowa piɛi latulu le wa o yuŋgoo niŋ. Mi waŋnda haa nɔ yiyaŋnda kɛndɛlaŋ le naa, kɛ ma kuuna naa le kɔlaŋ o bɔŋaŋndaŋ. (Maatiu 10:​36) Yɛɛ naŋ nɔ yɛ miŋ tosa le nyɛkindilaa Setana wo simullo? Kɔndɔfili nɔ mbo bii naa le chiŋalaŋ suu waa naa le, kanifuule, ŋ sina maa Setana cho naa chɔulabaa. (Sɔɔŋ Chɔɔmaŋndoŋ 2:​10; 12:​17) Ŋ nɔ vɛlɛ miŋ loonuŋ maa, suɛi kpeekpeiye cho ni, Setana dimi maa mɛɛ mi sɔɔŋ wa tɛtɛlɛ malaŋ naŋ  piɛi Chɛhowa, kɛ te sɔɔŋ kendu dɔɔ naa choo pɛ, ŋ kɛɛ Mɛlɛka. (Choobu 1:​9-11; 2:​4, 5) O mɛɛlulaŋ kpɔŋ, ŋ nɔ miŋ wa Chɛhowa nyunaa lɔɔlɔɔ le mbo ke naa yoomuaŋ. Loonuŋ maa fɛŋ bɛɛ Chɛhowa mel naa le.—Hibuluiya 13:​5.

15. Baa mi Setana baŋ naa le tosaa nyɛ naŋ yeema le wo? Tɛɛsiaawɔ.

¹⁵ Setana beŋ wana le tosaa nyɛ ŋ yeema le wo le. (Chemisi 1:​14) Wanaa bɔɔbɔɔ o chieeŋndo niŋ sina pɛɛŋ maa a cho o kumbuii Setana ve choo le. Kɛ te waŋndo pɛɛku pɛ tonyaa, o nɔ mbo tosa chuaŋ chuaa le waa o kumbuii Chɛhowa ve choo ɔɔ o kumbuii Setana ve choo. (Walta Wanaa Chiisuaa 3:​17; 17:​30) Te ŋ nɔ pɛ kɔl sikpaa le Mɛlɛka diikɔŋndo, Setana nɔla mbo tɛɛmbuu lo lechoo naa le.—Choobu 2:​3; 27:​5.

16, 17. (a) Yɛɛ cheleŋ Setana a nyinaa wɔɔŋnda tiu yɛ ba tosa le? (b) Te ŋ wa pɛ piɛileŋ o Chɛhowa lo, le yɛɛ siooŋii nɔ mii bii naa le diomndo heeloo choo choo le?

¹⁶ Nyɛm cheleŋndoŋ cho ŋ Setana a nyinaa wɔɔŋnda tiuba tosa le woŋ. Le taamaseliiyo, pesiŋ bɛɛ Baabuiyo dimi naa maa a nɔla ma sina nyɛ cho naa o kɔltaŋ niŋndo le. Chɛhowa nda Chiisu kinɛi nɔla keŋ tosaa ni. (Saamiɛɛ Tasoo 16:​7; Maki 2:​8) Lelaŋ, baa siooŋnde nɔ pa mii bii naa le diomndo heeloo choo choo o piɛileŋ niŋ, maa te Masa Nyinaa Wɔɔŋnda a nyinaa nduaa wɔɔŋnda tuei nyɛ naŋ cho dimioo wo pɛ, a nɔla ma soliŋ ndu kpeku le naa simullo? Sako bɛɛ! Le sabu yɛɛ? Yiyaŋndɔ a taamaseliiyo hoo. Ŋ nɔ isiooŋ le sɔɔŋ kɛndɔŋ tosaa o wali Chɛhowaa niŋ le mɛɛ Masa Nyinaa Wɔɔŋnda cho naa chɔɔ yɛ le. O nɛi pilɛ koŋ choo, siooŋii nɔ mii bii naa le diomndo heeloo choo choo o piɛileŋ niŋ le mɛɛ Masa Nyinaa Wɔɔŋnda cho naa nilaŋ yaŋɔɔ yɛ le. Baabuiyo soo vɛlɛ a teleŋnda bɔɔbɔɔ buɛiyaa Mɛlɛkaa ndaa heelu diomndo choo choo o piɛileŋ niŋndo. Nduyɛ ŋ chi wɔ o Baabuiyo niŋ maa mi siooŋnde bii nda le mɛɛ Masa Nyinaa Wɔɔŋnda wa nda nilaŋ yaŋɔɔ yɛ le. (Masaa Bɛnduaa Tasiaa 8:​22, 23; Chɔŋ 11:​41, 42; Walta Wanaa Chiisuaa 4:​23, 24) Te ŋ kindiŋ pɛ kpoke le suɛi nduyɛ miŋ tosa sɔɔŋ Mɛlɛka yeema woŋ, ŋ nɔ tiindaŋndo maa Chɛhowa chɛl mi Masa Nyinaa Wɔɔŋnda yɔŋul naa lefafɛɛŋ te.—Nuawɔ Sam 34:​7.

¹⁷ Ŋ nɔ miŋ sina yaamɔɔnɔ naa, kɛ o nɔ mbo luei naa siooŋnde le. Mi che bɛɛ wanaa lahakiaa naŋ cho ni, kɛ a mala Chɛhowaa, ŋ nɔla miŋ yem Setana. (Chɔŋ Tasoo 2:​14) Te ŋ simul ndu pɛ, o nɔla mbo nyaanuŋ naa. (Chemisi 4:​7; Pitɛ Tasoo 5:​9) Hau, i cho kpendekele maa Setana cho feleŋguaa chiŋalaŋndo. Vɛɛ nda nɔla yɛ ma simul Masa Nyinaa Wɔɔŋnda? Ŋ cho hei yaasiaa o buŋgɛi cho lachi ve niŋ.