1. Yɛɛ Diom Mɛlɛkaa ke yɛ naa?

Ŋ TIUBA miŋ hiou simulta komal naa o yoomoo niŋndaŋ kpou kanifuule, Chɛhowa cho Wana naa Pɛɛkaa Bɛndoo ni. (Aisaya 30:​20, 21) Diom ndɔɔ ke naa nyɛ o nyɛ naŋ yeema le miŋ ‘wa a bɛndaa’ nduyɛ miŋ wa a “bɛɛndiaŋ le wali o wali kɛndɛ tosaa.” (2 Timo. 3:​17) Te ŋ dɔu pɛ nyɛ naŋ cho pɛɛkoo o Baabuiyo niŋndo o wali niŋ, ŋ cho taasioo nɔ mbo hiou wanaa cho “kɔl kalu chieeŋndo hoo” tolɔɔ kɔɔli wa.—1 Kɔliŋ. 3:​19; Sam 119:​97-100.

2. Yɛɛ naŋ cho yɛ yaasiaa o buŋgɛi hei niŋ?

² A mɛɛ naŋ cho pɛɛku o buŋgɛi hei niŋ yɛ, le yeemaŋ ŋdialloŋ tosaa kɔl kalu chieeŋndo nyindu naa lɔɔlɔɔ ni. Lelaŋ mii wa ikala kpoke le yiyaŋ chieeŋndo a kaala wanaa cho leniŋnda fafaŋndo. Le saboo hoo Baabuiyo dimi ni aa, “Waŋnda apum a cho kei waŋnda kɔl kalu iwana chieeyaa pɛɛkoo, o nɔ tɔnɔ o tɔnɔ leniŋ te wo. Huiyo koni pɛɛku koŋ ndu hui wana ni. Lelaŋ, la chɛl mi wana o wana tosa mi la simnuŋ wanaa waa o lakpɛɛ o pɛɛku waa lende bɛŋgu le.” (Kolo. 2:​8) O buŋgɛi hei niŋ, ŋ cho yaasiaa mɛɛ yiyaŋ waŋnda kandu siŋgaŋndo o sɔɔŋ ŋmuuŋ choo yɛ. O isɔɔ kɛ kɛ niŋ, ŋ cho chɔ mɛɛ kɔl kalu chieeŋndo cho diɔmii fondo fuu yɛ, nduyɛ miŋ che mɛɛ kɔl kalu naŋ sɔla o Diom Mɛlɛkaa pɛɛkoo niŋndo cho o sɔvɛ mbo hiau kɔl kalu chieeŋndo hoo yɛ.

3-4. Mɛɛ wɔsi 1900 kanduŋ o Amɛlika niŋ, vɛɛ yiyaŋ waŋnda siŋgaŋ yɛ a chiɛiniŋndo okɔɔ?

³ Mɛɛ wɔsi 1900 kanduŋ o Amɛlika niŋ, mi yiyaŋ waŋnda siŋgaŋ tau a chiɛiniŋndo okɔɔ. O tasela ndɔɔ, wanaa bɔɔbɔɔ ndaa  laalaŋ maa wanaa cho o nɔɔ niŋnda koni nɔ ni ma tosa chiɛiniŋndo nduyɛ o ve suɛi wana soli o bɛɛ le. Kɛ mi yiyaŋndo hoo siŋgaŋ o lepilɛ niŋ kpe, nduyɛ mbo tiu ba o ba fee.

⁴ Kanduŋ o wɔsi 1922-1929, mi waŋnda kandu nyɛm mapuuloŋ toosiaa tau. Mi nyɛm mapuuloŋ muŋ chɔɔlu kaala waŋnda siŋga a chiɛiniŋndo okɔɔ. Mi wana yaasiaa ŋsɔɔ pilɛ dimi aa, “Fotueila wa toosiaŋndo laŋ, chondoŋ, vidueilaŋ, yaula ndaa toosiaa laŋ vɛlɛ a nyɛm ndaa keeliaa woŋ kpou a kaa ihinioo okɔɔ ŋ wa ni.” O wɔsiŋ muŋ niŋ, yola waŋnda ndaa yalaŋ bɛɛ mi laa kpeeŋiaa waŋnda yeemɛi niŋ le hiniei tosaa. Nduyɛ mi chuɛɛnɔŋ lebiɔɔ kandu tolɔɔ toolo. Mi Baabuiyo dimi a palɛi mɛɛlɛi okɔɔ maa, “kɔl kɛndɛ chieeŋndo” waŋchieeya kaala niŋ ni.—2 Timo. 3:​4.

5. Chɔŋ a wɔsila 1960, vɛɛ yiyaŋnda waŋnda a chiɛiniŋndo okɔɔ siŋgaŋ yɛ ba o ba fee?

⁵ O wɔsila 1960 niŋ, waŋnda ndaa chi lɛ ndi suɛi wɔɔŋ le samaa kɛsioo, poo a poo challe o nɔɔ niŋ, vɛlɛ a kɛyaŋndo o nɔɔ niŋ te. Nyɛm bɔɔbɔɔ ndaa toosiaa le yelelaŋndo woŋ, a kaa ihinioo okɔɔ kposoŋ ŋ wa ni. Yɛɛ cho yɛ fulamakɔɔlioo le sɔɔŋ muŋ kpou? Mi chua pilɛ poonyiaa maa le “mɛɛ yiyaŋ wɔɔŋndo luɛi waŋchieeya o lakɔl a chiɛiniŋndo okɔɔ yɛ,” yuŋgulaŋ la cho hau piɔllo, nɔlaŋ la cho piɔllo mi wana pilɛ koma lo chuauwa mandaa, kɔlta tambɛilaŋ, fotueila tumfondolaŋ la luɛi waŋnda o lakɔl, vɛlɛ a kpundɛla cheleŋ. Naala wɔɔŋnda waŋnda sɔla o tiɔmɔɔ niŋndaŋ mɛɛ SIDAA (EESIIYO) cho naa yɛ, chɔm kpendekele ni maa diɔmii fondo fuu kɔl kalu chieeŋndo cho ni.—2 Pitɛ 2:​19.

6. Vɛɛ waŋnda cho yɛ hau yeemɛi Setana ve tosaa?

⁶ Yeemɛi Setana ve kpeekpei waŋnda cho hau tosaa ni. Setana yeema mi waŋchieeya soli chiɛiniŋndo o baa niŋ, nduyɛ ma kɛɛ bɛɛleŋ chɔmndo le nɔɔ, ke sɔvɛ Mɛlɛka ke naa wo. (Ɛfi. 2:​2) Kaa ihini nɔɔlɛiyo cho ko ke sɔvɛ Chɛhowaa le chuauwa violɔɔ tɛɛmbuuwo le, kɛ wanaa luei vɛlɛ balaŋ o kaa nɔɔlɛiyo hoo niŋnda cho hunɔɔ yoomu fafɛɛŋndo sɔla le.—1 Kɔliŋ. 6:​9, 10.

7-8. Vɛɛ nyɛ Baabuiyo pɛɛku a chiɛiniŋndo okɔɔ wo chɔm yɛ maa o nɔ mbo wa nyɛ lebɛɛ?

⁷ Mi wanaa chɛl kɔl kalu chieeŋndo wa pɛɛsa nyɛ Baabuiyo dimi a chiɛiniŋndo okɔɔ wo, nduyɛ ma dimi maa o cho pɛɛku sɔvɛ le. Mi waŋnda haa nyuna lepum aa, ‘Le yɛɛ mi Mɛlɛka toosiaa naa a yeemɛi le hiniei tosaa nduyɛ mbo dimul naa vɛlɛ maa ŋ tosa ndi le?’  Saboo le nyunaa hoo tɔlnuŋ o yiyaŋ wɔɔŋ nda nɔ wo choo maa, waŋchieeya nɔ ma tosa yeemaŋ huŋ nda lakɔl loŋ kpou. Kɛ nyɛ Baabuiyo ndu pɛɛku wo cho teŋgeŋ. O pɛɛku naa maa ŋ nɔla miŋ dɔu yeemaŋ naŋ o mandaa bɛŋgu te ŋ yeema pɛ. (Kolo. 3:​5) Le handɔɔ lechoo, ke sɔvɛ Chɛhowa ke naa wo cho nɔɔ ni, nduyɛ o tosa hei le mi wanaa cho o nɔɔ niŋnda tuei chiɛiniŋndo yeela. (1 Kɔliŋ. 7:​8, 9) O nɔɔ niŋ, pɔnɔɔ a lanɔɔ tuɛi chiɛiniŋndo yeela a kil iso le, nduyɛ buulaŋ kɛ kɛ ve nda le naala wɔɔŋnda waŋnda sɔla o tiɔmɔɔ niŋndo le.

⁸ Teŋgeŋ cheleŋ cho vɛlɛ kɔl kalu chieeŋndo tɛɛŋ a pɛɛkula Baabuiyo. Baabuiyo pɛɛku naa mɛɛ naŋ nɔ miŋ che chiɛiniŋndo yɛ. O dimi maa chiɛiniŋndo tosa mi wanaa cho o nɔɔ niŋnda tuei nɔɔ yeela. (Pulɔ. 5:​18, 19) Kɛ o wa bɛɛ lende, Baabuiyo dimi aa, “Wana o wana a nɔ ma pɛɛku le num pila mandaa mɛɛ o wa o bɛndaa Mɛlɛka o hɔl a ŋwaŋnda chiee yɛ. Yeemɛi wana lanɔɔ i nɔ mi i hiou num o kɔl kɔɔli maa waŋnda a piliaa a sina Mɛlɛka le wa le.”—1 Tɛsa. 4:​4, 5.

9. (a) Vɛɛ wanaa Chɛhowaa sɔla yɛ kɔl dɛɛniaa le taasi cho o Diom Mɛlɛkaa niŋndo tolɔɔ kɔɔli a wɔsi 1900? (b) Sila kuɛɛ cho yɛ o Chɔŋ Tasoo 2:​15, 16 niŋ? (c) A mɛɛ Luomaŋnda 1:​24-27 dimi yɛ, kaala wɔɔŋnda kuɛɛ naŋ nɔ yɛ miŋ fafaŋ?

⁹ Mi che bɛɛ mi yiyaŋ waŋnda a chiɛiniŋndo okɔɔ siŋgaŋ a wɔsila 1900, kɛ wanaa Chɛhowaa chɛl mi wanaa kɛɛ haa siɔmbulaŋ nɔɔ le “isɔɔ o isɔɔ wɔɔŋ” nda hui nda le. (Ɛfi. 4:​19) Ma kindiŋ kpoke le hiouwɔɔ lachi a sawala Chɛhowalaŋ biyɔɔ. Mi Bandu Mɛŋgɛlaa le Bukuloo 15, 1926 dimi aa, “wana pɔnɔɔ ɔɔ wana lanɔɔ nɔ mbo wa o diandaa o kaa niŋ, vɛlɛ a o yiyaŋnda ndɔlaŋ niŋ, taama taama a wana nda cho o nɔ niŋ te wo.” A sɔɔŋ wɔɔŋ wanaa balu nda wa wa tosaa woŋ kpou, wanaa Chɛhowaa wa hiouwɔɔ lachi a taasi cho o Diom Mɛlɛkaa niŋndo tolɔɔ kɔɔli. (Nuawɔ Chɔŋ Tasoo 2:​15, 16.) Ŋ cho bɔɔ a kɔl kɛndɛ le mɛɛ naŋ nɔ Diom Mɛlɛkaa yɛ! Nduyɛ ŋ nɔ balika melaa le mɛɛ Chɛhowa cho naa nyɛm mala naa le pɛɛkoo a ndu okɔɔ woŋ kioo a teleŋndo yɛ. Hei mala naa miŋ fafaŋ yiyaŋ chieeŋndo hoo nɔ a chiɛiniŋndo okɔɔ wo. *—Nuawɔ Luomaŋnda 1:​24-27.

10-11. Yɛɛ Baabuiyo dimi yɛ maa o cho yɔŋnɔŋ o palɛi mɛɛlɛi niŋ?

¹⁰ Mi Baabuiyo dimi maa o palɛi mɛɛlɛi niŋ, “waŋnda chieeya a nɔ niŋ yiyaŋ le chaaŋaa ndaa waŋnda chieeyaa le mɛɛ le ndapila.” (2 Timo. 3:​1, 2) Lelaŋ, kɔndɔfili bii naa le te ŋ che pɛ waŋnda chieeyaa hiouwɔɔ lachi a kaa ikaayioo chɔmndo. Mi yau tɛɛsiaa ŋsɔɔ pilɛ dimi maa a wɔsila 1970, “mi waŋnda toosiaa yaulaŋ le waŋnda dɛɛniaa ma handu kɔllo o ndapila choo suee.” Nduyɛ, mi yaulaŋ lapum la dimi maa, “waŋndo nɔ mbo siŋga nyɛ o nyɛ ɔɔ yiyaŋ ndɔɔ a ndupila okɔɔ le.” Le taamaseliiyo, mi yau waa lende opilɛ dimi aa, “Kaala numpila kanifuule, wana o wana cho o sɔvɛ mbo hiou num te, nduyɛ wana o wana hiu num vɛlɛ naŋɔɔ le.” Mi yau koŋ hiau lachi a dimioo aa, “chɛl sila wana le, tosa nyɛ kɔl numndo dimul numndo, nduyɛ nyɛ o nyɛ ŋ che pɛ maa o ke num tɔnɔɔ, wo le, tosa, o yɔŋ bɛɛ mi waŋnda yeema a ndu le.”

¹¹ A tuei niŋ hei paandu? Nyɛ waa naa Setana ndoo dimul Ifi ni. Mbo dimul ndu maa o cho “sina suɛi kɛndɛi a i wɔɔŋnde pɛŋgu maa Mɛlɛka pila.” (Chɛ. 3:​5) Hau, mi wanaa bɔɔbɔɔ chuaŋnuŋ, nduyɛ ma yiyaŋ maa wana o wana, hali Mɛlɛka bɛɛ, nɔ mbo chɔm nda ikɛndɛi tɛɛŋ a iwɔɔŋnde le. Yiyaŋ waŋnda nɔ a nɔɔ okɔɔ wo chɔm kaa hoo kpendekele.

12. Yiyaŋ kuɛɛ waŋnda nɔ yɛ a nɔɔ okɔɔ?

¹² Baabuiyo sila pɔnɔɔ a lanɔɔ maa a nɔ ma  keŋnaŋ bɛɛleŋ vellaa velle, nduyɛ mi wana o wana lo o diomnde o mɛi leŋ choo. Nduyɛ, o dɛɛniaa pɔnɔɔ a lanɔɔ le ma hiou lachi a waa diompilɛ. O dimi aa, “poo mɛi finya ndɔ a kala ndɔ mbo chalnuŋ nda laandɔ . . . , ma simnuŋ dialle ipilɛ.” (Chɛ. 2:​24) Kɛ o baa pilɔɔ choo, wanaa nɔ kɔl kalu chieeŋndo wa nɔ yiyaŋ cheleŋ a hei okɔɔ. Ma dimi maa wanaa cho o nɔɔ niŋnda nɔ ma handu kɔllo o yeemaŋ ndapilaŋ choo suee. Mi yau pilɛ soo a kɛyaŋndo okɔɔ wo dimi aa, “O nɔ la kɛsiaa laŋ lapum, waŋnda siŋga nyɛ ndaa dimi paandu le kpema nɔɔ yiiyo wo. A dimi lɛ aa ‘ŋ cho wa naa num tei a piɔmndo le’ kɛ maa ‘ŋ cho wa naa num te kaalaa wa naa pɛ tɛɛŋ.’ Yiyaŋ waa naa a nɔɔ okɔɔ pɛl niŋ yuŋgula bɔɔbɔɔ. Nduyɛ o tosa niŋ mi wanaa bɔɔbɔɔ sɔla kɔl tambɛiyo. A tonya, yiyaŋ chieeŋndo a nɔɔ okɔɔ cho bɔɔ suɛi i diɔm.

13. Le sabu yɛɛ Chɛhowa tullɛ wanaa yoŋgaa leyɛ?

¹³ Baabuiyo dimi aa, “Wana o wana cho wana yoŋga, Mɛlɛka Yaawɛɛ o tul nda leyɛ.” (Pulɔ. 16:​5) Le yɛɛ Chɛhowa tullɛ wanaa yoŋgaa leyɛ? Saboo opilɛ cho ni, wana o wana cho wana yoŋga nduyɛ mbo nɔ kaayei, kaa Setana wo o cho tolɔɔ kɔɔli ni, kanifuule, wana yoŋgaa Setana bɛɛ cho ni. Yiyaŋndɔ a hei okɔɔ, mi Setana bii kɔllo mbo dimul Chiisu, wana Mɛlɛka soliŋ kpeku le nyɔɔŋ kpou toosiaa wo maa, o beŋ ndu wulaŋ mbo piɛi ndu! (Maa. 4:​8, 9; Kolo. 1:​15, 16) Kaa wanaa chuaŋnuŋ haa ndapila wa chɔm kpendekele maa diɔmnde kɔl kalu chieeŋndo hoo cho Mɛlɛka o hɔl ni.

14. Vɛɛ Luomaŋnda 12:​3 mala yɛ naa le miŋ nɔ yiyaŋ kɛndɔɔ a naapila okɔɔ?

¹⁴ Baabuiyo mala naa le miŋ nɔ yiyaŋ kɛndɔɔ a naapila okɔɔ. O chɔm maa kaalaa nɔɔ tuuleŋ le naapila cho suɛi wɔɔŋ te. Mi Chiisu dimi aa, “Kaala chaaŋ num wana chioo mɛɛ ŋ kaala num pila yɛ.” Hei chɔm maa, ŋ nɔ miŋ handu kɔllo tiŋ o nyɛm naŋ hauba woŋ choo. (Maa. 19:​19) A koŋ kpou, Baabuiyo dimi maa ŋ nɔ miŋ chuanuŋ mbo hiou acheleŋnda le. O dimi aa, “Wana o wana tosa isɔɔ o isɔɔ le num pilɛ dɛnɛ num  kɛndɔɔ suee le. Nduyɛ, la tosa isɔɔ o isɔɔ le chɔmnɔŋ o ŋwaŋnda chiee lo le. La wa a tusiaŋ vellaa velle o chaaŋaa nyaa lo. Wana o wana ma chua bɛɛ chaaŋ num maa ndu hiou bɛnda a num.”—Filipi. 2:​3; nuawɔ Luomaŋnda 12:​3.

15. Le yɛɛ ŋ yiyaŋ yɛ maa sila Baabuiyo yɔŋgu a chuaŋnɔŋndo okɔɔ wo cho sila taasi?

¹⁵ Hau, mi wanaa bɔɔbɔɔ waŋnda chua maa wanaa taasiaa wa dimi maa kɔl kalu cho o sila Baabuiyo yɔŋgu a chuaŋnɔŋndo okɔɔ wo niŋ te. Ma dimi maa acheleŋnda chuaa maa a hiou num tosa mi waŋnda che num chɔdɔ. Nduyɛ keŋ tosa mi waŋnda nɛi o di numndo choo. Kɛ o kpeekpei niŋ, yɛɛ cho yɛ fulamakɔɔlioo le kaa waŋnda nɔ hoo wo? Fulamakɔɔli yɛɛ num che yɛ niŋ? Baa mi wanaa nɔ kaayei wa wa pa a kɔl kɛndɛ? Yuŋgula ndalaŋ la wa pa a kɔl kɛndɛ? A nɔ pa chaŋyaŋ sɔviɔŋ? A nɔ pa chaŋyɛi kpɛɛluŋnde a Mɛlɛka? A mɛɛ ŋ bii niŋ chɔɔ yɛ, kɔl kalu chieeŋndo a taasi cho o Diom Mɛlɛkaa niŋndo, o kuɛɛ nɔ yɛ fulamakɔɔli kɛndɔɔ?

16-17. Le yɛɛnɛ naŋ nɔ yɛ miŋ nɔ balika melaa, nduyɛ le yɛɛ?

¹⁶ Wanaa yaŋ nilaŋ o sila wanaa chieeŋndo chua maa wanaa taasi wa, cho ko maa wana nyuna miallo le mbo chɔm ndu nɛiyo wo. Mi Chiisu suaa a wanaa ndaa dimi maa a nɔ kɔl kaloo o palɛi nduɛi niŋnda okɔɔ aa, “wana sumɛiyo nɔla pa mbo see chaaŋ ndɔ wana sumɛiyo tindaa . . . a del o sooŋndo niŋ te?” (Luku 6:​39) A tonya, diɔmnde kɔl kalu chieeŋndo hoo cho Mɛlɛka o hɔl ni.

¹⁷ Le teleŋ o teleŋ, diomnda taasila cho o Baabuiyo niŋndaŋ la cho diomnda “nɔ malaa leniŋ. Kani fuule, la cho le waŋnda tonya cho a Mɛlɛka okɔɔ wo pɛɛkoo. La cho le pɛɛkula lachoowalaŋ chɔɔmuuwo, nduyɛ, la cho le waŋnda miŋgioo o nɛi. La cho vɛlɛ le waŋnda pɛɛkoo mɛɛ nda wa wanaa sakpo Mɛlɛka o hɔl lɛ.” (2 Timo. 3:​16) Ŋ nɔ bɔɔ balika melaa le mɛɛ Chɛhowa cho kɔɔna ndɔɔ soliŋndo kpeku mbo wa naa mandaa le yiyaŋ chieeŋndo hoo fafaŋndo yɛ! (Ɛfi. 4:​14) Nyɛm o cho naa kioo le pɛɛkoo a ndu okɔɔ woŋ, cho naa yoomuaŋ lueiyo le miŋ tol sawala cho o Diom ndɔɔ niŋndaŋ kɔɔli. Nuawɔ se dikeŋnaŋ bɛndu le mi taasi cho o Baabuiyo niŋndo wa naa nɛiyo chɔmndo!